དྲ་ངོས་བཀླགས་གྲངས
ཡིག་ཚགས
སྒེར་གྱི་རྒྱུ་ཆ
མཚན་ཉིད་ཀུན་ལྡན་དམ་ཆོས་བླ་མར་མི་ཕྱེད་དད་གུས་ངེས་པར་ཤེས། ། རིགས་དྲུག་འགྲོ་བར་བཅོས་མིན་སྙིང་རྗེས་བདག་ལས་གཞན་གཅེས་སེམས་པར་ཞེན། ། གཡོ་སྒྱུའི་དཔུང་ལ་ངོ་བསྟོད་མི་བྱར་རང་གཤིས་དྲང་བདེན་ཕྲག་ཏུ་བཞེས། སད་རྨིར་དྲང་སྲོང་རྟུལ་ཞུགས་དཔལ་ལྡན་ཐབས་ཤེས་དགྱེས་པའི་གྲུབ་མཐའ་སྐྱོང་། །
ངེད་ཀྱི་སྐོར
- ༄༅།། ཨེ་མ་ཧོའི་རིག་མཛོད་།
- མཚན་ཉིད་ཀུན་ལྡན་དམ་ཆོས་བླ་མར་མི་ཕྱེད་དད་གུས་ངེས་པར་ཤེས། ། རིགས་དྲུག་འགྲོ་བར་བཅོས་མིན་སྙིང་རྗེས་བདག་ལས་གཞན་གཅེས་སེམས་པར་ཞེན། ། གཡོ་སྒྱུའི་དཔུང་ལ་ངོ་བསྟོད་མི་བྱར་རང་གཤིས་དྲང་བདེན་ཕྲག་ཏུ་བཞེས། སད་རྨིར་དྲང་སྲོང་རྟུལ་ཞུགས་དཔལ་ལྡན་ཐབས་ཤེས་དགྱེས་པའི་གྲུབ་མཐའ་སྐྱོང་། །
Powered by Blogger.
Saturday, 18 August 2012
༄༅།
།སྔགས་ཆེན་རྡོ་རྗེ་འཆང་གི་མཛད་པའི་རྣམ་ཐར་རྗེས་སུ་དྲན་པའི་གདུང་དབྱངས་
དུས་ཀྱི་ཕོ་ཉ་ཞེས་བྱ་བ་བཞུགས་སོ།
།
༄༅།
།རྒྱལ་ཀུན་སྙིང་རྗེའི་རང་གཟུགས་པད་དཀར་ཐུགས། །
རྒྱལ་ཀུན་ཡེ་ཤེས་རང་གཟུགས་མཁྱེན་པའི་གཏེར།
།
རྒྱལ་ཀུན་མཐུ་སྟོབས་རང་གཟུགས་གསང་བའི་བདག
།
རིགས་གསུམ་མགོན་པོའི་བདག་ཉིད་ཞབས་ལ་འདུད།
།
མདོ་སྔགས་རིག་གནས་དང་བཅས་གཞུང་ལུགས་འབུམ།
།
སྤྱན་གྱིས་གཟིགས་དང་སྙན་གྱིས་གསན་པ་ཡིས།
།
ཐོས་པའི་ཕར་ཕྱིན་གནས་ལ་འགོད་མཛད་པའི།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
མདོ་རྒྱུད་བསྟན་བཅོས་དཀའ་བའི་གནད་ཕྲ་རགས།
།
ཡིད་ཀྱིས་བསམས་དང་རིགས་པས་དཔྱད་པ་ཡིས།
།
བསམ་པའི་ཕར་ཕྱིན་གནས་ལ་འགོད་མཛད་པའི།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
རྒྱུད་སྡེ་རྒྱ་མཚོའི་དགོངས་དོན་ཚུལ་བཞིན་དུ།
།
མཉམ་བཞག་བསམ་གཏན་ཆེན་པོའི་ཏིང་འཛིན་གྱིས།
།
སྒོམ་པའི་ཕར་ཕྱིན་གནས་ལ་འགོད་མཛད་པའི།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
གངས་ལྗོངས་ཐུབ་བསྟན་བཤད་སྒྲུབ་འཛིན་པའི་ཁུར།
།
ཐུགས་སུ་བཞེས་ནས་སྐལ་ལྡན་བུ་སློབ་རྣམས།
།
ཕན་བདེ་འབྱུང་བའི་དཔལ་ལ་འགོད་མཛད་པའི།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
དུས་མཐར་བསྟན་པའི་རྒྱལ་མཚན་མཁའ་དབྱིངས་སུ།
།
གཅིག་ཏུ་བསྒྲེངས་པའི་ཡོངས་ཀྱི་དགེ་བའི་བཤེས།
།
མཁས་གྲུབ་གཙུག་རྒྱན་གྱུར་པའི་རྣམ་ཐར་ཅན།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
མདོ་སྔགས་བསྟན་པའི་བཤད་སྒྲུབ་སྐྱོང་བ་ལ།
།
དབང་ལུང་ཁྲིད་གསུམ་རྟག་ཏུ་སྩོལ་མཛད་པའི།
།
དུས་མཐའི་རྡོ་རྗེ་འཆང་གི་རྣམ་ཐར་ཅན།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
བདུད་ཀྱི་ཁ་རླངས་འཕྱུར་བའི་དུས་མཐའ་རུ།
།
གངས་ཅན་བསྟན་པའི་བཤད་སྒྲུབ་ཉག་ཕྲ་ཚེ།
།
སླར་ཡང་གསོ་བའི་བྱིན་རླབས་སྩོལ་མཛད་པའི།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
ཡེ་ཤེས་སྤྱན་ཟུང་གཡོ་བའི་གློག་དམར་གྱིས།
།
མི་མཐུན་ཕྱོགས་ཀྱི་སྙིང་རྩ་སྲེག་བྱེད་ཅིང༌།
།
བདེན་པའི་གསལ་ཁ་འཛིན་པའི་རྣམ་ཐར་ཅན།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
གསུང་གི་ལེགས་བཤད་རྡོ་རྗེའི་མཚོན་རྣོན་གྱིས།
།
ལྟ་སྤྱོད་ལོག་སྨྲའི་སྲོག་རྩ་གཅོད་བྱེད་པའི།
།
གནས་ལུགས་རལ་གྲི་འཛིན་པའི་རྣམ་ཐར་ཅན།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
ཁྱེད་ཞལ་མཇལ་བའི་གསུང་གི་དྭངས་མ་ལས།
།
ཆོས་དང་འཇིག་རྟེན་ལུགས་གཉིས་གང་སྒྲུབ་ཀྱང༌།
།
དམ་ཚིག་གཙང་བརྟན་འཛིན་པའི་རྣམ་ཐར་ཅན།
།
སྔགས་ཆེན་རྡོ་རྗེ་འཆང་ཆེན་རྗེས་སུ་དྲན།
།
ཚེ་རབས་ཀུན་ཏུ་མགོན་པོ་ཁྱེད་ཉིད་ཀྱི།
།
སློབ་མའི་དཀྱིལ་དང་འཁོར་གྱི་གྲལ་མཐའ་རུ།
།
སྐྱེ་ནས་སེམས་ཅན་སྤྱི་དང་ཁྱད་པར་དུ།
།
གངས་ཅན་ཕན་བདེ་འབྱུང་བའི་དོན་བྱེད་ཤོག
།
ཞེས་པ་ནི་བོད་རབ་བྱུང་བཅུ་བདུན་པའི་ས་གླང་ལོའི་ཟླ་བ་བརྒྱད་པའི་ཚེས་ཉེར་ལྔ་སྟེ་སྤྱི་ལོ་༢༠༠༩ལོའི་ཟླ་༡༠པའི་ཚེས་༡༣ཉིན་ལྷ་ལྡན་ཆེན་པོའི་གྲོང་ནས་ཁ་པར་ཞིག་འབྱོར་བའི་ལམ་ནས་དུས་མཐའི་འགྲོ་བའི་མགོན་གཅིག་དཔལ་ལྡན་རྡོ་རྗེ་འཆང་ཆེན་པོ་སྔགས་ཆེན་རིན་པོ་ཆེ་དགོངས་པ་ཆོས་དབྱིངས་སུ་གཤེགས་པའི་ཚུལ་ཐོས་འཕྲལ།
དུས་མཐར་བོད་ཀྱི་ཆོས་དང་རིག་གནས་ཀྱི་འཆད་ཉན་དང་བཤད་སྒྲུབ། ཕྱག་ལེན་སོགས་དང༌།
ཁྱད་པར་དུ་བོད་ཁ་བ་ཅན་གྱི་བདེ་སྡུག་གི་གསལ་ཁ་འཛིན་པའི་གནས་ལུགས་ཀྱི་ཤུགས་ཤིན་ཏུ་ཉག་ཕྲ་དུས་སུ་བསམ་བཞིན་མྱུར་སྐྱོབ་ཀྱི་མགོན་པོའི་ཚུལ་དུ་བྱོན་པའི་དུས་མཐའི་རྡོ་རྗེ་འཆང་གང་གི་མཛད་པའི་རྣམ་ཐར་རྗེས་སུ་དྲན་པའི་གདུང་དབྱངས་སུ་མགོན་པོ་གང་གི་སྐུ་ཡི་གསེར་ཞལ་ཐེངས་གཅིག་མཇལ་བ་དང༌།
གསུང་གི་ལེགས་བཤད་ཀྱི་བདུད་རྩི་ཐེངས་གཅིག་མྱོང་བའི་དུས་མཐའི་ཁྱིམ་པ་སྐལ་བ་ལྡན་པ་ཞིག་སྟེ་ཀྲུང་དབྱང་མི་རིགས་སློབ་གྲྭ་ཆེན་མོའི་དགེ་མིང་བ་སྟུག་རྒྱའི་བཀའ་སྲུང་མགོན་པོའམ།
གངས་ཅན་རིག་པ་སྨྲ་བའི་ཁྲོད་དུ་རིག་པའི་ཁུ་བྱུག་གམ།
བརྡ་སྤྲོད་ཀུན་ཏུ་བཏགས་མིང་དུ་མི་འཇིགས་དབྱངས་ཅན་དགའ་བའི་གོ་ཆ་ཞེས་འབོད་པས་མགོན་པོ་གང་གི་མཛད་པའི་རྣམ་ཐར་རྗེས་སུ་དྲན་པའི་གདུང་དབྱངས་སུ་ཀྲུང་དབྱང་མི་རིགས་སློབ་གྲྭ་ཆེན་མོའི་རང་ཤག་རིག་པའི་ཁུ་བྱུག་རྩེན་པའི་རྟེན་འབྱུང་ཉི་མའི་འོད་ཁང་ནས་མཆོད་མེ་གཙང་མ་ཞིག་ཕུལ་བའི་མཚམས་སུ་མཆི་མ་འཐོར་ཞོར་དུ་ཤར་མར་བྲིས་པ་ཀུན་ནས་དགེའོ།
།
Subscribe to:
Post Comments (Atom)
0 comments:
Post a Comment