Friday, 28 December 2012
22:13 | 
Posted by
༄༅།། ཨེ་མ་ཧོའི་རིག་མཛོད་། |
|
[ 2012-7-3 16:38:52 | By: huadajia ]
|
 རྒྱང་རིང་གི་མཁའ་འགྲོ་མ།
ཨ་མདོའི་བུ་མོ་ཆོས་དབྱིངས་སྒྲོལ་མར*ཕུལ་བ།
དང་པོ། ཁོར་ཡུག་གིས་བསླངས་པའི་དྲན་པ་ལང་ལོང་། ན་བུན་ལང་ལོང་གི་དབུས་ནས།། གཡུ་འབྲུག་སང་སིང་དུ་གྲགས་བྱུང་།། འཇའ་ཚོན་ལམ་ལམ་གྱི་ཞགས་པ།། སྦྲང་ཆར་ཟིམ་ཟིམ་ལ་དབང་སོང་།། ས་གཞི་ནེམ་ནེམ་ཏུ་གྱུར་ཏེ།། ཁོར་ཡུག་འཇམ་འཇམ་ཏུ་བསྒྱུར་བ།། མཁའ་རླུང་དྭངས་དྭངས་སུ་སོང་བས།། སྣང་བ་བན་བུན་གྱིས་བསྡམས་ཐལ།། སེམས་པ་སྟོང་སྟོང་འདི་དྲན་ནས།། ཕྱི་རོལ་འཆམ་འཆམ་དུ་འཁྲེང་དུས།། ནམ་ཟླ་གྲང་གྲང་ཅིག་འདུག་པས།། ཁ་ནས་ཧུ་ཧུ་རང་ཤོར་སོང་།། རྒྱ་ལྕང་ལྕུག་ལྕུག་ཏུ་གཡོ་ཞིང་།། འདབ་མ་ལྡེམ་ལྡེམ་ཏུ་བསྐྱོད་པ།། བྱ་བྱེའུ་ཀྱུར་ཀྱུར་འདི་སྙན་པ།། ཁུ་བྱུག་ཀོ་ཀོ་འདི་མཛེས་ཨང་།།  གཉིས་པ། ཟི་ལིང་གྲོང་ནས་མཁའ་འགྲོ་མ་དང་འཕྲད་པ། གོམ་པ་འགའ་འགའ་ཅིག་སྤོས་ཏེ།། མིག་ཟུང་རིག་རིག་གིས་ལྟ་བཞིན།། ཟམ་ཆེན་མཐོ་མཐོ་ཐོག་བགྲོད་ཚེ།། མགོ་དཀྲིས་དམར་དམར་ཅིག་མཐོང་བྱུང་།། ཞལ་རས་སྒོར་སྒོར་གྱི་ཟླ་བ།། མཆུ་སྒྲོས་ལྷུག་ལྷུག་ཏུ་དགོད་པ།། ནུ་འབུར་ལྟེམ་ལྟེམ་གྱིས་འདར་བ།། སྐེད་པ་ལྡེམ་ལྡེམ་གྱིས་བསྐྱོད་པ།། མིག་གིས་ཟུར་མདའ་ཤིག་འཕངས་མོད།། མིག་གིས་མ་མཐོང་ཁད་བྱས་ཐལ།། མིག་གིས་ཡང་ཡང་ཞིག་བལྟས་ཀྱང་།། མིག་ལ་ཨ་ལན་དེ་དབེན་སོང་།། སེམས་ནས་སྙིང་གཏམ་ཤིག་བཤད་འདོད།། སེམས་ཀྱི་སྤོབས་པས་རང་ཞུམ་འགྲོ།། སེམས་ཀྱིས་མི་བཤད་ཅིག་བསམ་ཡང་།། སེམས་པས་བསྐྱུར་ཐབས་ཤིག་མི་འདུག། སྟོང་སྟོང་འཇིག་རྟེན་གྱི་ཁམས་ན།། འདོད་འདོད་བརྩེ་བ་རྫོགས་མེད་ཀྱང་།། དུངས་དུངས་ཕོ་མོ་ཡི་བརྩེ་དུངས།། འགྲན་འགྲན་ཟླ་བོ་ཤིག་མི་འདུག། སྣ་མང་ཚོང་ཁང་གི་ནང་ནས།། སྣ་འདུས་ཨ་རག་ཤིག་རྔུབ་རྗེས།། སྣ་མའི་མེ་ཏོག་ཤིག་བླུས་ཏེ།། སྣ་ལ་ལེགས་སྐྱེས་སུ་ཕུལ་ཡོད།། ཨ་ཅེ་འཁྲེང་སེམས་ཤིག་ཡོད་ན།། ཨ་བུ་སེམས་དབུས་སུ་འཁོར་རོགས།། ཨ་ཅེ་ཕྱི་ཐག་རིང་ལྡན་ན།། ཨ་ཙི་མེ་ཏོག་འདི་བཞེས་རོགས།། ཧ་ཅང་མང་པོ་ནི་མི་ལབ།། ཧ་ལམ་དེ་འདྲ་ཞིག་ཡིན་པ།། ཧ་ལོའི་རྩུབ་སྤྱོད་ཀྱི་གཤིས་ཀ། ཧ་ཧ་བདག་ལ་རང་མེད་དོ།།  གསུམ་པ། སེམས་པ་གཉིས་ཟླ་བའི་ཁང་ཁྱིམ་དུ་འཛུལ། དེ་སྐད་དུངས་ཞེན་གྱི་ཚིག་སྣེ།། དེ་འཕྲལ་ཕར་ཕྱོགས་སུ་འཕངས་པས།། དེ་མཉམ་འཛུམ་མདངས་ཅིག་བསྟན་ཏེ།། དེ་ཡི་མེ་ཏོག་ལ་འཇུས་བྱུང་།། དཀར་དམར་མདངས་ལྡན་གྱི་ལག་པ།། ལྷོད་འཇམ་མཉེན་ཤ་ཤིག་ལྡན་ཀི།། ལྷོད་འཇམ་ཚིག་གསུམ་གྱི་སྐད་ཆ།། དཀར་དམར་སྒྲ་འཛིན་དུ་སིམ་བྱུང་།། འགྲམ་པའི་མཁུར་མཚོས་འདི་ཡག་གི།། གསེར་གྱི་རྣ་ལུང་འདི་ཡག་གི།། དཀར་བའི་དུང་སོ་འདིའང་ཡག་གི།། སྐྱེས་གཟུགས་དེ་ལས་ཀྱང་ཡག་གི།། ཚེ་རོགས་ཡོད་དམ་ཞེས་དྲིས་ཚེ།། མེད་པའི་ཨ་ལན་རང་སྤྲད་བྱུང་།། ཚེ་འདི་བཙལ་རྒྱུ་རང་ཡིན་ཚེ༎ གཏན་གྲོགས་ཁོ་བོ་ཡིས་བྱས་ཆོག། མགོ་བོ་ནང་གུག་གི་བསམ་བློ།། བློ་ཡིས་རྗེས་དཔག་ཅིག་བྱས་ཚེ།། ཚེ་གཅིག་གཏན་གྲོགས་ཀྱི་དོན་ལ།། ལ་མོར་འཐད་པ་རང་ཡིན་པ།། ནུབ་ཁའི་མཚམས་སྤྲིན་གྱི་རླུང་བུས།། ནུབ་མོའི་འཇིག་རྟེན་འདི་བསུས་འོངས།། གྲིབ་མ་མག་མོག་གི་དབུས་ན།། གྲིབ་གཟུགས་རིང་ཐུང་གཉིས་འགུལ་འདུག།  བཞི་པ། སྐྱིད་ཆུའི་ངོགས་ལ་བསྲིངས་པའི་སྣང་བ་བན་བུན། སྔོན་བསགས་བསོད་ནམས་ཤིག་ཡིན་ནམ།། ལས་འབྲས་ཐུག་འཕྲོ་ཤིག་ཡིན་ནམ།། འཛོམས་མཐར་འབྲལ་བ་ཡི་ཆོས་ཉིད།། སུས་ཀྱང་ལྡོག་ཐབས་ཤིག་མི་འདུག ། ན་ཆུང་མེ་ཏོག་གི་ལང་ཚོ།། སྐྱིད་ཆུའི་འགྲམ་ངོགས་སུ་འཕུར་ཀྱང་།། མ་བཅོས་དུངས་སེམས་ཀྱི་རི་མོ།། མ་འགྱུར་སེམས་དབུས་སུ་ཤར་ཡོད།། དྭངས་གསལ་མཁའ་དབྱིངས་ཀྱི་ལྡིང་ཁང་།། སྤྲིན་དཀར་ལང་ལོང་དུ་འཕུར་བ།། པད་མའི་མེ་ཏོག་གི་གསེབ་ན།། རྐང་དྲུག་སྐད་སྙན་འདི་མཛེས་པ།། རྒྱ་རྫོང་ནགས་མོ་ཡི་ཀློང་ནས་།། ཁུ་ལོ་འཇོལ་མོ་གཉིས་གྲགས་ཀི།། མཛེས་སྡུག་སྙིང་མཐུན་གྱི་མཛའ་མོ། ། སེམས་པའི་མཁའ་དབྱིངས་ནས་འཛུམ་འོངས།། སྐྱེས་ལུས་ཚིགས་དྲུག་གི་དོ་ཟླ༎ གནག་སྣུམ་རྒྱ་ལྕང་གི་ལོ་མ།། དགའ་འཛུམ་དགོད་འཛུམ་ཤིག་བྱས་ན།།དུང་སོའི་འོད་གོར་གྱི་ཟླ་བ།། མཚམས་མདོའི་ན་ཆུང་མའི་བུ་མོ།། ལྷ་སའི་བར་སྐོར་ནས་གྲགས་ན།། ཐག་རིང་ཨ་མདོ་ཡི་བུ་ཡིས།། མིག་ཆུ་སྙན་ངག་ལ་འཐིམས་ཡོད།། དུངས་ཞེན་དྲན་གདུང་གི་སྡུག་བསྔལ།། རང་སེམས་གསེར་ཁང་ལ་འཕོས་སོང་།། སྐྱོབ་པའི་ལྷ་ཆེན་ཞིག་མེད་ན།། ཚེ་འདིས་ཐེག་པ་རང་དཀའ་འོ།། ང་ལ་རང་དབང་ཞིག་ལྡན་དེ།། ཁྱོད་ལ་འདོད་འདུན་ཞིག་ཡོད་ན།། དུས་དང་བསྐལ་བ་ཤིག་ཡོད་ན།། མཇལ་འཛོམས་ཁ་གཡང་ཤིག་ལོས་ཡོད།།  ལྔ་བ། ཁེར་རྐྱང་གི་ང་ད་དུང་མི་རྐྱང་ཡིན། ནམ་མཁའི་མཁའ་དབྱིངས་ཀྱི་ཟླ་བ།། ལྷིང་འཇགས་རོལ་དབྱངས་ལ་འཁྲེང་བ།། སྐར་མའི་མིག་ཟུང་གི་འབྱེད་འཛུམ།། ཟླ་བའི་སེམས་གསོ་རུ་རྒུམ་འདུག། ཆུ་ཕྲན་ལྷུང་ལྷུང་གི་དབུས་ན།། མེ་ཏོག་ཆུ་བོ་ལ་ཆགས་ཡོད།། མཛེས་ལྡན་རྐང་དྲུག་གི་བུང་བས།། མེ་ཏོག་ཁྱེད་རང་ལ་སྒུག་ཡོད།། ཟུར་མཆན།མཁའ་འགྲོ་མ་ནི་ཟླ་བཞི་བར་རྩོམ་པ་པོའི་སེམས་ཁོང་ལ་འཕུར་འོངས་པའི་ལྷ་བྱ་ཞིག་ཡིན་ལ། ཁོ་མོའི་སྐད་སྙན་གྱིས་ལྗོངས་འདིར་མཛེས་སྡུག་གི་ཁྱིམ་གཞི་གསར་བ་ཞིག་བསྐུན་པས་འདོད་ལྡན་པ་གང་མང་ཞིག་གིས་བསླུ་བྲིད་ཀྱི་མིག་ཟུང་ཁྱེད་ཀྱི་ཕྱོགས་སུ་གཏད་ནའང་། ཁོ་མོའི་དྭངས་གཙང་གི་སེམས་པ་དང་། རང་དབང་གི་བརྩེ་དུངས། བསླུ་མེད་ཀྱི་དུང་སེམས་བཅས་ལ་འགྱུར་རྒྱུ་མེད། དེ་བས་རྩོམ་པ་པོ་མཁའ་འགྲོ་མ་ལ་དགའ་ཞིང་། རྩོམ་པ་པོའང་མཁའ་མ་ལ་དེ་བས་ཀྱང་དུངས། ལྷག་པར་དུ་མཁའ་འགྲོ་མ་དང་རྩོམ་པ་པོ་གཉིས་ཀྱི་ལས་ཀ་ནི་བྱིས་པ་འགའི་རྫི་བོ་ཡིན་པ་དེའོ།། |
Subscribe to:
Post Comments (Atom)
0 comments:
Post a Comment