དཀའ་ཚེགས་ཡེ་མི་དགོས་པར་གོ་ལ་ཇེ་ཆུང་དང་འབྲེལ་འདྲིས་ཇེ་ཉེ་རུ་ཐུབ་པའི་དྲ་ཚིགས་ལ་བརྟེན་ནས་དྲང་བདེན་རིགས་པའི་བླང་དོར་གསལ་བའི་སྒྲོན་མེ་ཞིག་སྦར་ན་བསམས། བདག་ནི་སྐྱེས་སྦྱང་གི་ཡོན་ཏན་ན་ཕྲ་ཡང་ལྷག་བསམ་དྲང་བདེན་གྱི་བསམ་པ་རྒྱ་ཆེ་བས་རྒྱལ་བསྟན་སྤྱི་དང་བོད་རང་གི་གནའ་དེང་གི་རིག་གཞུང་ལ་གོམས་འདྲིས་ཀྱི་མྱོང་ཚོར་དག་ངོ་ལྐོག་མེད་པར་རྒྱལ་ཕྱི་ནང་གི་རང་རིགས་སྤུན་མཆེད་དག་ལ་དམ་པའི་ཆོས་དང་མཐུན་མི་མཐུན་གྱི་བཟང་ངན་ཤན་འབྱེད་ཅིག་ཐུན་མིན་བོད་རང་གི་སྐད་ཡིག་ལས་སྟོན་པར་འདོད་ཐལ།

དྲ་ངོས་བཀླགས་གྲངས

ཡིག་ཚགས

སྒེར་གྱི་རྒྱུ་ཆ

མཚན་ཉིད་ཀུན་ལྡན་དམ་ཆོས་བླ་མར་མི་ཕྱེད་དད་གུས་ངེས་པར་ཤེས། ། རིགས་དྲུག་འགྲོ་བར་བཅོས་མིན་སྙིང་རྗེས་བདག་ལས་གཞན་གཅེས་སེམས་པར་ཞེན། ། གཡོ་སྒྱུའི་དཔུང་ལ་ངོ་བསྟོད་མི་བྱར་རང་གཤིས་དྲང་བདེན་ཕྲག་ཏུ་བཞེས། སད་རྨིར་དྲང་སྲོང་རྟུལ་ཞུགས་དཔལ་ལྡན་ཐབས་ཤེས་དགྱེས་པའི་གྲུབ་མཐའ་སྐྱོང་། །

ངེད་ཀྱི་སྐོར

༄༅།། ཨེ་མ་ཧོའི་རིག་མཛོད་།
མཚན་ཉིད་ཀུན་ལྡན་དམ་ཆོས་བླ་མར་མི་ཕྱེད་དད་གུས་ངེས་པར་ཤེས། ། རིགས་དྲུག་འགྲོ་བར་བཅོས་མིན་སྙིང་རྗེས་བདག་ལས་གཞན་གཅེས་སེམས་པར་ཞེན། ། གཡོ་སྒྱུའི་དཔུང་ལ་ངོ་བསྟོད་མི་བྱར་རང་གཤིས་དྲང་བདེན་ཕྲག་ཏུ་བཞེས། སད་རྨིར་དྲང་སྲོང་རྟུལ་ཞུགས་དཔལ་ལྡན་ཐབས་ཤེས་དགྱེས་པའི་གྲུབ་མཐའ་སྐྱོང་། །
View my complete profile
Powered by Blogger.
Monday 21 January 2013


རྫོགས་ཆེན་རིན་པོ་ཆེའི་ཞབས་བརྟན་ཕྱོགས་བསྒྲིགས་བདེན་ཆེན་མེ་ལོང་ཞེས་བྱ་བ། །

ཞབས་བརྟན་རིན་པོ་ཆེ། །
བསླུ་མེད་སྐྱབས་གནས་རྒྱ་མཚོའི་མཐུ་བྱིན་གྱིས། །
པདྨ་རིག་འཛིན་རྒྱལ་བའི་མྱུ་གུ་མཆོག །
... འཇིགས་མེད་བློ་གསལ་གྲུབ་པའི་དབང་པོ་ཡི། །
ཞབས་པད་རྟག་བརྟན་མཛད་འཕྲིན་དར་རྒྱས་ཤོག །
༧སྐྱབས་རྗེ་བདུད་འཇོམས་འཇིགས་བྲལ་ཡེ་ཤེས་རྡོ་རྗེས་སོ། །

བསྟན་འཛིན་འཇིགས་བྲལ་ལྷུན་པོའི་ཞབས་བརྟན་གསོལ་འདེབས། །
ཀུན་བཟང་རྡོ་རྗེ་འཆང་དབང་པདྨ་འབྱུང་། །
གྲུབ་པའི་རིག་འཛིན་མཆོག་ཏུ་རོལ་བའི་གར། །
བསྟན་འགྲོར་རྗེས་སུ་བརྩེ་བའི་ཡ་མཚན་ཕུལ། །
རིམ་བྱོན་སྐྱེ་བའི་ཕྲེང་བར་གསོལ་བ་འདེབས། །
རྨད་བྱུང་ཐུབ་བསྟན་ལུང་རྟོགས་འཛིན་པའི་འཕྲུལ། །
མཁྱེན་བརྩེའི་ཡེ་ཤེས་ཉི་གཞོན་འོད་པོ་ཆེ། །
སྲིད་ཞིའི་འཇིགས་བྲལ་ཕན་དང་བདེ་བའི་དཔལ། །
མི་འགྱུར་ལྷུན་པོའི་སྤོ་ལ་རྟག་ཤར་ཤོག །
ཤཀྱཱའི་དགེ་སྦྱོང་ཆོས་སྨྲ་བ་༧བསྟན་འཛིན་རྒྱ་མཚོ།

གསང་གསུམ་ཞབས་བརྟན་རྡོ་རྗེའི་སྙིང་པོ། །
ཨེ་མ་ཧོ། །
ཀུན་བཟང་རྡོ་རྗེ་འཆང་གི་བསྟན་པ་ལ། །
བཤད་སྒྲུབ་ཕྲིན་ལས་ཀུན་ཁྱབ་རྫོགས་ཆེན་པ། །
ཡང་ཟབ་གདམས་པའི་མཛོད་འཛིན་རིན་པོ་ཆེ། །
གསང་གསུམ་སྲིད་མཐའི་བར་དུ་ཞབས་བརྟན་ཤོག །

ཆོས་གྲོགས་འགས་བསྐུལ་ངོར་ཤྲྰི་སྨྱོན་པས་གུས་ཕུལ། །

གསོལ་བདེན་ཚིག་རྡོ་རྗེའི་སྒྲ་དབྱངས། །
ཁྱབ་གདལ་ཞི་བ་ཆེན་པོའི་དབྱིངས་ཉིད་ལས། །
ལྷུན་གྲུབ་ཡེ་ཤེས་དག་པའི་རོལ་མོ་རུ། །
སྣང་བའི་ཟློ་གར་ཀུན་ནས་སྤྲོ་མཁས་པ། །
དཔལ་ལྡན་བླ་མ་མཆོག་ལ་གསོལ་བ་འདེབས།། མགོན་ཁྱོད་ཤུགས་དྲག་གདུང་བ་མི་མངའ་ཞིང་། ། སྣང་བཞིའི་ནམ་གྱི་བགྲོད་པས་དབུགས་དབྱུངས་སྟེ། ། ལྷུན་རྫོགས་དང་པོའི་མགོན་པོར་སངས་རྒྱས་ཀྱང་། ། ཐོས་འཛིན་སྐལ་བཟང་བྱས་ལ་གསོལ་བ་འདེབས།།རྒྱལ་བསྟན་ལྔ་བརྒྱའི་དུས་མཐར་ཉེན་པ་ལ།། སྐྱོ་ཤས་བསྐུལ་བའི་ཕོ་ཉར་ཞི་བར་གཟིམས།། བསྟན་འགྲོའི་ཉེར་འཚོར་མཆོད་སྡོང་ཡོངས་བཞེངས་པ།། འཇིགས་མེད་བློ་གསལ་དབང་པོ་ཞབས་བརྟན་གསོལ།། ཡེ་ཤེས་སྐུ་ཅན་ཁྱབ་བདག་བླ་མ་ཡི།། གསང་བ་གསུམ་གྱི་འཕྲིན་ལས་མི་ཟད་པ།། སྐལ་བཟང་འགྲོ་བའི་ཁམས་ལ་ལེགས་སྨིན་ཏེ།། མངོན་གསུམ་བྱིན་རླབས་དཔལ་དུ་ཉེར་འཚོ་ཤོག། མཆོག་གསུམ་རྒྱལ་བ་རྒྱ་མཚོའི་བྱིན་རླབས་དང་།། ཆོས་ཉིད་རང་བཞིན་རྣམ་པར་དག་པའི་མཐུས།། གཞན་ཕན་བཟང་པོའི་སྨོན་ལམ་གང་བཏབ་པ།། དེ་དག་ཐམས་ཅད་གེགས་མེད་འགྲུབ་པར་ཤོག།
ཅེས་པའང་གྲུབ་དབང་རྫོགས་ཆེན་སྐུ་འཕྲེང་ལྔ་པ་ཉིད་ཀྱིས་གྲུབ་ཆེན་རིན་པོ་ཆེའི་སྐུ་སྐྱེས་སུ་ངོས་འཛིན་ཐོབ་པ་ཐུབ་བསྟན་འཕྲིན་ལས་དཔལ་བཟང་པོས་སྨོན་པ་དགེ།།

ཞབས་བརྟན་གསོལ་འདེབས་འཆི་མེད་གྲུབ་པའི་སྒྲ་དབྱངས།
བསྟན་གཡོའི་དྭངས་བཅུད་སྙིང་པོར་འདྲིལ་བའི་སྲོག། ཁ་སྦྱོར་བདུན་ལྡན་མཐའ་ཀླས་དཀྱིལ་འཁོར་བདག།། ཚེ་དང་ཡེ་ཤེས་དངོས་ཀུན་སྩོལ་བའི་ལྷ།། རིང་པོར་འཚོ་བའི་དཔལ་གྱི་སྐབས་དབྱེ་ཤོག། ཀུན་བཟང་རྡོ་རྗེ་འཆང་དབང་པདྨ་འབྱུང་།། གྲུབ་པའི་རིག་འཛིན་མཆོག་ཏུ་རོལ་བའི་གར།།བསྟན་འགྲོར་རྗེས་སུ་བརྩེ་བའི་ཡ་མཚན་ཕུལ།། རིམ་བྱོན་སྐྱེ་བའི་འཕྲེང་བར་གསོལ་བ་འདེབས།། རྨད་བྱུང་ཐུབ་བསྟན་ལུང་རྟོགས་འཛིན་པའི་འཕྲུལ།།

མཁྱེན་བརྩེའི་ཡེ་ཤེས་ཉི་གཞོན་འོད་པོ་ཆེ།། སྲིད་ཞིའི་འཇིགས་བྲལ་ཕན་དང་བདེ་བའི་དཔལ།། མི་འགྱུར་ལྷུན་པོའི་སྤོ་ལ་རྟག་ཤར་ཤོག། འཇིགས་མེད་ཐེག་མཆོག་རྡོ་རྗེ་སྙིང་པོ་ཡི།། ཆོས་མཛོད་སྒོ་འཕར་འབྱེད་ལ་ཟླ་བྲལ་ཞིང་།། བློ་གསལ་སྐལ་བཟང་རིག་འཛིན་གྲུབ་པའི་གཙོ།། ལྷ་མིའི་དབང་པོའི་རྒྱན་དུ་འཚོ་ཞེས་གསོལ།། ཚུལ་གནས་ཐོས་བསམ་སྒོམ་པའི་ཡོན་ཏན་རྫོགས།། མདོ་སྔགས་རབ་འབྱམས་འཆད་རྩོད་རྩོམ་པ་དང་།། མཁྱེན་བརྩེ་ནུས་པའི་སྣང་བས་ས་གསུམ་ཁྱབ།། མཁས་བཙུན་བཟང་པོའི་འཕྲིན་ལས་རྒྱས་གྱུར་ཅིག། སྣ་ཚོགས་ཤེས་བྱའི་ཆོས་ཚུལ་མཐའ་ཀླས་པ།། མཁྱེན་པའི་མེ་ལོང་གཙང་མར་ལེགས་འཕོས་ནས།། ཇི་སྙེད་གདུལ་བྱ་འདྲེན་པའི་རྣམ་ཐར་གཟི།། བསྐལ་མཐའི་བར་དུ་ཉམས་མེད་ཞབས་བརྟན་གསོལ།། ཟབ་དང་རྒྱ་ཆེའི་ཆོས་ཀྱི་ཡང་ཞུན་མཆོག། ངེས་གསང་གདམས་པའི་དྲོད་རླང་འཐུལ་བའི་བཅུད།། ཉམས་བཞེས་དགོངས་པའི་གྲུབ་བརྙེས་དགའ་སྟོན་གྱིས།། བསྟན་འགྲོའི་ཕན་བདེ་སྤེལ་ཕྱིར་ཞབས་བརྟན་གསོལ།། མཆོག་གསུམ་རྒྱ་མཚོའི་ཐུགས་རྗེ་འོད་སྣང་གིས།། བསྟན་འགྲོའི་རྒུད་མུན་མིང་མཐར་ཡོངས་བཏང་ནས།། རྫོགས་ལྡན་མགྲོན་དུ་འགུགས་དགེ་མཚན་གྱིས།། བསྟན་འགྲོའི་དབུ་འཕངས་སྲིད་པའི་བླར་མཐོ་ཤོག། རང་བཞིན་ཡེ་དག་ཆོས་ཉིད་བདེན་པའི་སྟོབས།། བསླུ་མེད་ཆོས་ཅན་རྟེན་འབྲེལ་དགེ་བའི་མཐུས།། ཇི་ལྟར་སྨོན་པ་ཇི་བཞིན་ཡོངས་འགྲུབ་ནས།། དགེ་དགུའི་དཔལ་གྱིས་ཀུན་ནས་ཤིས་གྱུར་ཅིག།
ཅེས་པའང་སྐལ་བཟང་རྣམ་འདྲེན་ཡོངས་ཀྱི་འཕྲིན་ལས་གཅིག་ཏུ་བསྡུས་པ་སྐྱབས་རྗེ་རྫོགས་ཆེན་རིན་པོ་ཆེའི་ཞབས་བརྟན་གསོལ་འདེབས། མཁས་བཙུན་གྲུབ་པའི་དབང་ཕྱུག་ནམ་མཁའ་ཚེ་དབང་མཆོག་གྲུབ་ཀྱིས་རྫོགས་སྤྲུལ་བཞི་བའི་ཞབས་བརྟན་དུ་ཕུལ་བ་རྡོ་རྗེའི་བདེན་ཚིག་བྱིན་རླབས་ཀྱི་སྤྲིན་ཕུང་འཕྲོ་བ་ལ་། ཀུན་མཁྱེན་རྒྱལ་བའི་དབང་པོ་དང་རྡོ་གྲུབ་གཉིས་ཀྱིས་མཚན་གསོལ་ཞབས་བརྟན་ལྗགས་རྩོམ་དུ་གནང་བ་ཁ་སྐོང་ཚུལ་དུ་ལེགས་པ་སྦྱར་བའོ།

གྲུབ་དབང་རྫོགས་ཆེན་པའི་སྐྱེ་འཕྲེང་ཞལ་སྐོང་ནི།
བི་མའི་རྣམ་རོལ་རྡོ་རྗེའི་ལུང་གིས་བསྔགས།། ཐུགས་བསྐྱེད་ཕྲིན་ལས་དོན་ཡོད་ཞགས་པ་ཡིས།།བསྟན་འགྲོའི་རྒུད་སེལ་བཀའ་གཏེར་བསྟན་པའི་བདག།། ཐུབ་བསྟན་ཆོས་ཀྱི་རྡོ་རྗེར་གསོལ་བ་འདེབས།། དུས་གསུམ་གཟིགས་པས་ཇི་ལྟར་ལུང་བསྟན་བཞིན།། ཐུགས་རྗེ་ཡེ་སྤྲུལ་འཕགས་པའི་རྣམ་ཐར་གྱིས།།

འགྲོ་ཀུན་རྗེས་སྐྱོང་རྒྱལ་སྲས་སེམས་དཔའ་ཆེ།། འཇིགས་བྲལ་བྱང་ཆུབ་རྡོ་རྗེར་གསོལ་བ་འདེབས།། ཀུན་བཟང་བསྟན་པའི་བདག་པོའི་ཡེ་ཤེས་ཀྱི།། སྒྲིབ་བྲལ་དགོངས་པས་ལུང་བསྟན་མཆོག་སྤྲུལ་ཆེ།། དཔལ་ཆེན་འགྲོ་འདུལ་ཕྲིན་ལས་ཐུགས་རྗེའི་གཏེར།། འཇིགས་མེད་བློ་གསལ་དབང་པོ་ཞབས་བརྟན་གསོལ།།
ཞེས་པའང་བླ་མ་རྒྱལ་དབང་ཉི་མས་རྟེན་བཅས་བཀའ་ཡི་བསྐུལ་མ་གནང་བ་བཞིན། མཚུངས་མེད་གྲུབ་དབང་མཆོག་གི་སློབ་གྲལ་དུ་འཁོད་པ་འཇིགས་མེད་མཁྱེན་བརྩེ་འོད་ཟེར་གྱིས་བྲིས་པ་དགེ་ལེགས་སུ་གྱུར་ཅིག།

འཇིགས་མེད་བློ་གསལ་དབང་པོའི་ཞབས་བརྟན་སྨོན་ཚིག
འཕོ་འགྱུར་བྲལ་བ་རང་བྱུང་རིག་པའི་གཤིས།། སྐད་ཅིག་སྣང་བས་གདོད་མའི་སར་ཕྱིན་པ།།

རྒྱལ་བ་ཀུན་གྱི་འཕྲིན་ལས་ངོ་བོ་ཉིད།། དཔལ་ལྡན་བླ་མའི་ཞབས་པད་བརྟན་གྱུར་ཅིག།

གདུལ་བྱ་གདུལ་བྱེད་རང་སྣང་གཅིག་གི་ངང་།། མ་འདྲེས་གསལ་བ་ཡེ་ཤེས་ཆེན་པོའི་ཁམས།།
མངོན་གསུམ་གྱུར་བའི་རྟེན་གདལ་བ་ལས།། དཔལ་ལྡན་བླ་མའི་ཞབས་པད་བརྟན་གྱུར་ཅིག།
ཀུན་དུ་བཟང་པོའི་ཐུགས་ཀྱི་མཁའ་ཀློང་ནས།། ལྷུན་གྲུབ་རང་མདངས་ཤར་བ་སྙིང་པོའི་དོན།།
རྒྱུད་ལུང་མན་ངག་བསྟན་པ་རྒྱ་མཚོའི་མགོན།། དཔལ་ལྡན་བླ་མའི་ཞབས་པད་བརྟན་གྱུར་ཅིག།
རབ་འབྱམས་སེམས་ཅན་ཞིང་གི་མཐའ་ཁྱབ་ཏུ།། སྐུ་གསུང་ཐུགས་ཀྱི་འཕྲིན་ལས་ལྷུན་གྲུབ་སྟེ།།
རྒྱ་ཆེའི་ཕན་བདེའི་འོད་སྣང་འགྱེད་པའི་གཉེན།། དཔལ་ལྡན་བླ་མའི་ཞབས་པད་བརྟན་གྱུར་ཅིག།།
ཅེས་པ་འཕགས་ཡུལ་རྫོགས་ཆེན་དགོན་གྱི་མཁན་པོ་འཇམ་དཔལ་བསྟན་འཛིན་དང་འདུས་པ་ཡོངས་ནས་ནན་བསྐུལ་བྱུང་བ་ལ་བརྟེན་ནས་རྫོགས་ཆེན་རིན་པོ་ཆེ་༸་འཇིགས་མེད་བློ་གསལ་དབང་པོའི་ཞབས་བརྟན་སྨོན་ཚིག་ཏུ་༸་ཀརྨ་པ་ཨོ་རྒྱན་འཕྲིན་ལས་རྡོ་རྗེས་རྒྱུད་སྟོད་ར་མོ་ཆེའི་གཙུག་ལག་ཁང་དུ་སྦྱར་བའོ།།

ཞབས་བརྟན་གསོལ་འདེབས་ཕན་བདེའི་ཐིག་འཕྲེང་།
འཆི་མེད་ཞིང་མགོན་བཅོམ་ལྡན་ཚེ་དཔག་མེད།། འཆི་མེད་དཔལ་སྟེར་མཚོ་སྐྱེས་རྡོ་རྗེ་དང་།།འཆི་མེད་རིག་འཛིན་གྲུབ་པའི་ལྷ་ཚོགས་ཀྱིས།། འཆི་མེད་རྟག་པ་དམ་པའི་དགེ་ལེགས་སྩོལ།།ལྷུན་གྲུབ་རྫོགས་ཆེན་བདེ་བར་གཤེགས་པའི་ལམ།། འཇིགས་མེད་བཤད་དང་སྒྲུབ་པའི་འཕྲིན་ལས་ཀྱིས།།

སྐལ་ལྡན་བློ་གསལ་དབང་པོར་སྩོལ་མཁས་པ།། སྔ་འགྱུར་བསྟན་པའི་གསལ་བྱེད་ཞབས་བརྟན་གསོལ།། ཚུལ་གནས་ཐོས་བསམ་སྒོམ་པའི་གངས་ཀྱི་རིར།། འཆད་རྩོད་རྩོམ་པའི་གད་རྒྱང་རྟག་སྒྲོག་ཅིང་།། མཁས་བཙུན་བཟང་པོའི་གཡུ་རལ་ཀུན་གསིག་པ།། བསྟན་འཛིན་སྡེར་ཆགས་རྒྱལ་པོ་ཞབས་བརྟན་གསོལ།། ལྷག་བསམ་ཐུགས་བསྐྱེད་སྤྲིན་གྱི་ཟླ་གམ་ལས།། མཛོད་ཆེན་བདུན་དང་སྙིང་ཐིག་ཡ་བཞི་སོགས།། ཕན་བདེའི་ཐིག་འཕྲེང་དུས་སུ་འཇོི་མཛད་པའི།། ཀློང་ཆེན་རྒྱལ་ཚབ་དམ་པར་ཞབས་བརྟན་གསོལ།། བསླུ་མེད་རྩ་གསུམ་རྒྱ་མཚོའི་ཐུགས་རྗེ་དང་།། རྟེན་འབྲེལ་བསླུ་བ་མེད་པའི་བདེན་སྟོབས་ཀྱིས།། ཡིད་ལ་བརྣག་པའི་འདོད་དོན་མ་ལུས་པ།། གེགས་མེད་བདེ་ལེགས་ཉིད་དུ་འགྲུབ་གྱུར་ཅིག།
ཅེས་པ་འདི་ཡང་མཁན་པོ་འཇམ་དཔལ་བསྟན་གྱི་དབུས་འཕགས་ཡུལ་རྫོགས་ཆེན་ཨོ་རྒྱན་བསམ་གཏན་ཆོས་གླིང་འདུས་པ་བྱིང་ནས་བསྐུལ་བའི་ངོར་ཅོན་ཏ་ར་རྫོང་སར་བཤད་གྲྭ་ཆོས་ཀྱི་བློ་གྲོས་སུ་གསང་ངག་རིན་པོ་ཆེ་འཆད་སླེལ་བགྱིས་སྐབས་ས་སྐྱ་ཁྲི་འཛིན་པས་སྦྱར་བའོ།

ཞབས་བརྟན་གསོལ་འདེབས་བཞུགས་སོ།
ཨོྃ་སྭ་སྟི། རྒྱལ་ཀུན་ཡེ་ཤེས་ཕུང་པོ་གཅིག་བསྡུས་པ།། ལོངས་སྤྱོད་རྫོགས་སྐུ་མགོན་པོ་ཚེ་མཐའ་ཡས།།
ཚེ་དབང་རིག་འཛིན་པདྨ་རྒྱལ་པོ་ཡིས།། བསྟན་འཛིན་དམ་པའི་སྐུ་ཚེ་བསྲིང་བར་མཛོད།།
མདོ་རྒྱུད་མན་ངག་ཀུན་འདུས་ཐེག་པའི་རྩེ།། ཀུན་མཐུན་ཀུན་ལས་ཁྱད་འཕགས་རྫོགས་པ་ཆེའི།།
བསྟན་པ་འཛིན་ལ་ལུང་གིས་བསྔགས་པ་ཡི།། འཇིགས་བྲལ་ཕྱོགས་ལས་རྣམ་རྒྱལ་ཞབས་བརྟན་གསོལ།།སྲས་བཅས་རྒྱལ་བའི་ཐུགས་རྗེའི་བདེན་སྟོབས་ཀྱིས།། བསྟན་དང་འགྲོ་བའི་མཛད་པ་འཕྲིན་ལས་ཀུན།།
ཉེར་འཚེའི་བར་ཆད་རླུང་གིས་གཡོ་མིན་པར།། དགེ་ལེགས་སྣང་བས་ས་གསུམ་ཁྱབ་པར་ཤོག །
རྩོམ་པ་པོ། རིག་འཛིན་ཉི་མ་གྲགས་པ།
ཞབས་བརྟན་གསོལ་འདེབས་དངོས་གྲུབ་ཆར་འབེབས།
ཨོྃ་སྭ་སྟི། རྩ་གསུམ་རྒྱལ་བའི་རྣམ་སྤྲུལ་མཚོ་སྐྱེས་རྗེ།། གསུང་གསུམ་སྤྲུལ་བའི་རོལ་གར་ཡོངས་ཤར་བ།།
མདོ་སྔགས་བསྟན་པ་འཛིན་པའི་ཉི་གཞོན་མཆོག། ལྟ་བསྒོམ་ས་ལམ་འཇིགས་བྲལ་ལྷུན་པོའི་རྩེར།།མངོན་གྱུར་གྲུབ་པའི་རིག་འཛིན་ཆེན་པོ་ལ།། གསོལ་བ་འདེབས་སོ་བདག་རྒྱུད་བྱིན་གྱིས་བརློབས།།
བདག་སོགས་འདི་ནས་བྱང་ཆུབ་མ་ཐོབ་པར།། མགོན་ཁྱེད་སྐུ་ཚེ་འཆི་མེད་པད་འབྱུང་བཞིན།།

གཡོ་མེད་རྡོ་རྗེའི་ཁྲི་ལ་བརྟན་བཞུགས་ནས།། འགྲོ་བའི་དོན་གཉིས་འབད་མེད་འགྲུབ་གྱུར་ཅིག།
གཅིག་ཤེས་ཀུན་གྲོལ་བསྟན་པའི་སྒྲོན་མེ་སྦར།། བསྟན་དང་འགྲོ་དོན་རྒྱ་ཆེ་རྒྱས་གྱུར་ནས།།
མགོན་པོ་ཚེ་དཔག་མེད་དང་པདྨ་འབྱུང་།། རྩ་གསུམ་མཁའ་འགྲོ་ཆོས་སྐྱོང་ཐུགས་རྗེ་ཡིས།།
སྙིགས་དུས་བསྟན་པའི་སྒྲོན་མེ་བཤེས་གཉེན་མཆོག། གདན་ས་ཆེན་པོའི་ཁྲི་ལ་འཁོད་པ་དང་།།
ཞབས་པད་སྲིད་མཐའི་བར་དུ་བརྟན་གྱུར་ཅིག།

ཞབས་བརྟན་གསོལ་འདེབས།
རྨད་བྱུང་རྒྱལ་བསྟན་མཁའ་ལམ་ཡངས་པ་རུ།། བཤད་སྒྲུབ་བསྟན་པའི་མངའ་བདག་འགྲོ་བའི་མགོན།། ཆེ་བ་དྲུག་ལྡན་གསང་ཆེན་སྔ་འགྱུར་བའི།། ངེས་པ་དོན་གྱི་བསྟན་པའི་མངའ་བདག་མཆོག། སྐྱབས་གཅིག་པད་དཀར་འཆང་བའི་ཐུགས་ཀྱི་སྲས།། རིག་འཛིན་མཁས་གྲུབ་ཡོངས་ཀྱི་རྒྱལ་ཚབ་རྗེ།། གསུམ་ལྡན་རྡོ་རྗེ་འཛིན་པ་འཁོར་ལོའི་བསྒྱུར།།

ཕྱི་ལྟར་རྣལ་འབྱོར་གྲུབ་པའི་དབང་ཕྱུག་མཆོག། ནང་དུ་བྱང་ཆུབ་སེམས་དཔའི་ས་ཆེན་ཐོབ།། གསང་བ་རིམ་གཉིས་ཟབ་མོའི་རྣལ་འབྱོར་བ།། བརྒྱུད་ལུང་མན་ངག་འདོམ་པའི་གསང་མཛོད་རྗེ།། བསླུ་མེད་མཆོག་གསུམ་རབ་འབྱམས་རྒྱ་མཚོ་དང་།། འཆི་མེད་པདྨ་ཀ་རའི་བྱིན་མཐུ་ཡིས།། སྔ་འགྱུར་བསྟན་པ་ཡོངས་ཀྱི་གཙུག་གི་རྒྱན།། གྲུབ་དབང་བསྟན་འཛིན་འཇིགས་བྲལ་ལྷུན་པོ་ཉིད།། སྐུ་ཚེ་མི་ཤིགས་ཆོས་བདུན་ངོ་བོར་བཞུགས།། ཆེ་དགུའི་གཙུག་ན་ཡིད་བཞིན་ནོར་བུ་མཆོག།། འཁོར་ལོ་གསུམ་གྱི་ངོ་མཚར་མཛད་པ་ཡིས།། འཕྲིན་ལའི་འོད་སྣང་ས་གསུམ་ཁྱབ་པར་ཤོག། རྡོ་རྗེའི་སྐུ་ཉིད་འཕོ་འགྱུར་དང་བྲལ་ཞིང་།། འཁོར་འདས་དྭངས་མའི་ཚེ་བཅུད་ཡོངས་བསྡུས་ནས།། བསྟན་འཛིན་དམ་པའི་སྐུ་ཚེ་བསྲིང་མཛད་སྟེ།། བསྟན་འགྲོའི་དོན་ཆེན་གེགས་མེད་འགྲུབ་པར་ཤོག། ཞེས་ཨ་རིག་ཆོས་གྲྭ་ཆེན་མོའི་མཁན་ཆེན་བླ་མའི་རྒྱབ་ཚབ་གྱི་མིང་འཛིན་པ་ཀཿཐོག་འབྲུག་གྲགས་སྤྲུལ་མིང་བ་ལུང་རྟོགས་བསྟན་པའི་ཉི་མར་འབོད་པ་དེས་སྙིང་ནས་སྨོན་པ་དགེ་ཞིང་བཀྲ་ཤིས་པར་ཤོག། །།

ཞབས་བརྟན་གསོལ་འདེབས།
ཨོྃ་སྭ་སྟི། གང་ཞིག་ཡིད་ལ་དྲན་དང་བསྟེན་པ་ལ།། འདོད་པའི་དཔལ་དང་ཁྱད་པར་ཚེ་ཡི་ནོར།། སྟེར་ལ་མཐུ་དང་སྟོབས་དཔལ་ཕུན་ཚོགས་བདག། རིག་འཛིན་ཚེ་ཡི་ལྷ་རྣམས་མ་གཡེལ་ཅིག། རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི།། དྲི་མེད་རང་ལུགས་སྤེལ་ལ་མཁྱེན་བརྩེའི་མཐུ།། རྨད་བྱུང་རྫོགས་ཆེན་སྤྲུལ་བའི་སྐྱེས་རབས་སུ།། དམ་པའི་ལུང་གིས་འཁྲུལ་མེད་གང་བསྔགས་ཏེ།།

ཐུབ་པའི་བསྟན་པ་འཇིགས་མེད་སྤོབས་པ་བརྒྱའི།། འཛིན་མཛད་བློ་གྲོས་རབ་གསལ་ཀླུའི་དབང་པོ།། སྐུ་ཚེ་མི་འགྱུར་མཛད་པ་ཕྱོགས་ཀུན་ཏུ།། རྒྱས་ཤིང་བླ་མེད་བསྟན་འགྲོའི་མགོན་གྱུར་སྨོན།། རྫོགས་སྤྲུལ་བདུན་པ་ཐུབ་བསྟན་འཇིགས་མེད་བློ་གསལ་དབང་པོའི་ཞབས་བརྟན་དུ་ཧུྃ་ཀར་རྡོ་རྗེའི་གུས་པ་ཆེན་པོས་སྨོན་པ་དེ་བཞིན་འགྲུབ་པར་གྱུར་ཅིག
རྫོགས་ཆེན་ཡིད་བཞིན་ནོར་བུ་སྐུ་འཕྲེང་བདུན་པར་ཞབས་བརྟན་དུ་གསོལ་བ་བཀྲ་ཤིས་དོན་ཀུན་གྲུབ་པའི་དབྱངས་སྙན་བཞུགས།
ཀ་དག་འོད་གསལ་གཉུག་མའི་ཡེ་ཤེས་སྐུ།། ལྷུན་གྲུབ་འཕོ་ཆེན་རྡོ་རྗེའི་སྣང་བ་ནི།། དེང་འདིར་མཆོག་གི་སྤྲུལ་སྐུའི་རྣམ་རོལ་ཅན།། མཚུངས་མེད་བསྟན་པའི་ཉི་མ་རྒྱལ་གྱུར་ཅིག།

ཐུབ་བསྟན་ལུང་རྟོགས་ནོར་བུའི་མཛོད་འཛིན་ཅིང་།། འཇིགས་མེད་སེང་གེའི་སྒྲ་ཡིས་ཕས་རྒོལ་འཇོམས།། བློ་གསལ་མཁས་གྲུབ་ཡོངས་ཀྱི་དབང་པོ་སྟེ།། བསྟན་དང་འགྲོ་བའི་གཙུག་རྒྱན་ཞབས་བརྟན་གསོལ།། སྔ་འགྱུར་བསྟན་འཛིན་རྒྱ་མཚོའི་གཙུག་རྒྱན་མཆོག། མདོ་སྔགས་ཟབ་གསང་འཆད་མཁས་འཇིགས་དང་བྲལ།། གསང་གསུམ་ཡོན་ཏན་ལྷུན་པོའི་དཔང་བཞིན་མཐོ།། སྲིད་གསུམ་འགྲོ་བའི་མགོན་པོ་ཞབས་བརྟན་གསོལ།། ཐེག་དགུའི་རྩེ་རྒྱལ་འོད་གསལ་རྫོགས་པ་ཆེའི།། བསྟན་འགྲོའི་མགོན་དུ་སྤྲུལ་བའི་རྣམ་རོལ་མཆོག། རྟག་ཁྱབ་ལྷུན་གྲུབ་སྲིད་ཞིའི་སྤྱི་དཔལ་དུ།། རྡོ་རྗེའི་ཆོས་བདུན་ངོ་བོར་འཚོ་ཞེས་གསོལ།། རྩ་གསུམ་སྐྱབས་གནས་ཀུན་འདུས་ཨོ་རྒྱན་རྗེར།། མི་ཕྱེད་སྙིང་ནས་གུས་པས་གསོལ་བ་འདེབས།། ཇི་ལྟར་གསོལ་བཞིན་རེ་སྨོན་འགྲུབ་པ་དང་།། མི་མཐུན་ཕྱོགས་ལས་རྣམ་པར་རྒྱལ་གྱུར་ཅིག། ཅེས་པའང་སྔ་འགྱུར་བསྟན་པའི་གཙུག་རྒྱན་སྐྱབས་རྗེ་རྫོགས་ཆེན་རིན་པོ་ཆེར་ཞབས་བརྟན་ཚིག་བཅད་ཁ་ཤས་བྲིས་ཤིགས་ཅེས་མཁས་བཙུན་གྲུབ་པའི་དབང་ཕྱུག་དགེ་མང་མཁན་རིན་པོ་ཆེ་པདྨ་དབང་རྒྱལ་མཆོག་གིས་ནན་ཏན་དུ་བཀས་གནང་བ་ལྡོག་ཏུ་མ་སྤོབས་ཏེ་འབྲི་བ་པོ་ནི་རྫོགས་ཆེན་ཡིད་བཞིན་ནོར་བུ་སྐུ་འཕྲེང་དྲུག་པ་དང་བདུན་པ་གཉིས་ལ་རྒྱུ་མཚན་ཤེས་ནས་དད་པ་ཐོབ་པའི་གུས་འབངས་ཀུན་རྨོངས་ཀུན་ཏུ་རྒྱུ་དཔེ་ཝར་སྤྲུལ་མིང་འཇམ་དབྱངས་བསོད་ནམས་དབང་པོ་སྟེ་དགེ་ཞིང་བཀྲ་ཤིས་པར་གྱུར་ཅིག། །

ཞབས་བརྟན་གསོལ་འདེབས།
ཨེ་མ་ཧོ། འཇིགས་པ་ཀུན་བྲལ་བདེ་ཆེན་རྡོ་རྗེའི་སྐུ།། རྒྱལ་བསྟན་འཛིན་སྐྱོང་སྤེལ་ལ་མངའ་བརྙེས་པ།། རི་རྒྱལ་ལྷུན་པོ་བཞིན་དུ་རྟགས་བརྟན་པའི།། སྐྱབས་གཅིག་དྲིན་ཆེར་བླ་མར་གསོལ་བ་འདེབས།། ཉིད་སྐུ་མི་འགྱུར་རྟག་བརྟན་རྡོ་རྗེའི་ཁྲིར།། སྐུ་ཚེ་བསྐལ་བརྒྱའི་བར་དུ་བརྟག་བཞུགས་ནས།། བསྟན་འགྲོའི་རྒུད་པ་གསོ་བའི་མཐུ་ཐོབ་ཤོག།

ཕྱོགས་བཅུའི་རྒྱལ་བ་ཡོངས་ཀྱི་ཐུགས་བསྐྱེད་དང་།། སྤང་རྟོགས་ཚེ་རིག་འཛིན་པའི་ནུས་མཐུ་དང་།། བདག་གི་ལྷག་བསམ་རྣམ་པར་དག་པའི་མཐུས།། སྨོན་པ་བཞིན་དུ་ཐོག་མེད་འགྲུབ་གྱུར་ཅིག།

ཅེས་པ་འདིའང་རིན་པོ་ཆེ་ལ་ཞབས་བརྟན་གསོལ་འདེབས་སུ་སྤྲུལ་བའི་སྐུ་མཆོག་འཇམ་དབྱངས་བསྟན་འཛིན་གྱིས་ཐུགས་བཞེད་བཞིན་སྙིགས་དུས་ཀྱི་གཏེར་གཟུགས་ཙམ་འཛིན་པ་པདྨ་འཕྲིན་ལས་གླིང་བའི་སྨོན་ཚིག་འདི་གུས་པས་ཕུལ།

ཞབས་བརྟན་གསོལ་འདེབས་འཆི་མེད་སྦྲང་ཆར།
སྟོབས་བཅུ་མངའ་བ་ཐུབ་དབང་ལྷ་ཡི་ལྷ།། འཛམ་གླིང་མཛེས་རྒྱན་དྲུག་དང་མཆོག་གཉིས་སོགས།། རྒྱལ་དང་དེ་སྲས་སྐྱབས་ཡུལ་རྒྱ་མཚོ་ལ།། མི་ཕྱེད་དད་པས་སྙིང་ནས་གསོལ་བ་འདེབས། འཇིགས་བརྒྱད་སྐྱབས་མ་འཕགས་མ་ཏཱ་རེ་མ།། འཆི་བདག་བདུད་འཇོམ་འཆི་མེད་ཚེ་དཔག་མེད།། བདུད་སྡེའི་གཡུལ་ལས་རྣམ་པར་རྒྱལ་མའི་སྡེ།། འཆི་མེད་ཚེ་ལྷ་གསུམ་གྱིས་ཤིས་པ་སྩོལ།།

རྒྱལ་ཀུན་གཅིག་འདུས་འཆི་མེད་པདྨ་འབྱུང་།། རྗེ་འབངས་ཉེར་ལྔ་གཏེར་ཆེན་བརྒྱ་རྩ་བརྒྱད།། བཀའ་གཏེར་བརྒྱུད་པའི་བླ་མ་ཡི་དམ་ལྷ།། གསོལ་བ་འདེབས་སོ་འགལ་རྐྱེན་བར་ཆད་སོལ།། པདྨ་རིག་འཛིན་ཐེག་མཆོག་བསྟན་འཛིན་ཞབས།། བསྟན་འཛིན་བཟང་པོ་མི་འགྱུར་ནམ་མཁའི་མཚན།། ཆོས་ཀྱི་རྡོ་རྗེ་བྱང་ཆུབ་རྡོ་རྗེ་ལ།། རྩེ་གཅིག་གུས་པས་སྙིང་ནས་གསོལ་བ་འདེབས།། སྐྱབས་ཀུན་འདུས་གཟུགས་རྒྱལ་དབང་རྫོགས་ཆེན་པ།། ཞིང་འདིར་གཟིགས་པ་ལྔ་ཡི་བསམ་བཞིན་དུ།། མཚན་དཔེ་ཡོན་ཏན་རྒྱ་མཚོའི་དཔལ་འཆར་བཞིན།། གཡོ་མེད་རྡོ་རྗེའི་ཆོས་སུ་རྟག་བཞུགས་གསོལ།། ཐོས་བསམ་སྒོམ་པས་བསྟན་པའི་རྒྱལ་མཚན་བཙུག། འཆད་རྩོད་རྩོམ་པས་གདུལ་བྱ་ཐབས་ཀྱིས་སྐྱོང་།། མཁས་བཙུན་བཟང་པོས་ཐུགས་རྒྱུད་ཕྱུར་བུར་བསྟམས།། སྐྱེས་མཆོག་མི་ཡི་སེང་གེ་ཞབས་བརྟན་གསོལ།། བདག་སོགས་མཁའ་མཉམ་འགྲོ་བ་མ་ལུས་པ།། རང་རིགས་གདོད་མའི་གནས་ལུགས་མ་སད་བར།། མགོན་ཁྱེད་ཀུན་ཏུ་བཟང་པོའི་གཞི་དབྱིངས་སུ།། མི་འདའ་རྡོ་རྗེ་ཁྲི་ལ་རྟག་བཞུགས་གསོལ།། འཆི་མེད་ཚེ་ལྷ་གསུམ་གྱི་བྱིན་རླབས་དང་།། ཆོས་ཅན་ཆོས་ཉིད་བདེན་པའི་ནུས་མཐུ་དང་།། བདག་གི་ལྷག་བསམ་བཟང་པོས་སྨོན་པའི་ཚིག། གེགས་མེད་ཡིད་བཞིན་འགྲུབ་པའི་བཀྲ་ཤིས་ཤོག།
ཞེས་ཞབས་བརྟན་དུ་གསོལ་བ་འཆི་མེད་སྦྲང་ཆར་ཞེས་བྱ་བ་འདི་འཔགས་ཡུལ་རྫོགས་ཆེན་དགོན་ཨོ་རྒྱན་བསམ་གཏན་ཆོས་གླིང་གི་མཁན་པོ་འཇམ་དཔལ་བསྟན་འཛིན་མཆོག་དང་དགོན་པའི་ལས་བྱེད་དང་འདུས་ཚོགས་ཐུན་མོང་སྐྱབས་རྗེ་གྲུབ་དབང་རྫོགས་ཆེན་སྐུ་འཕྲེང་བདུན་པའི་ཞབས་བརྟན་ཞིག་ཆེད་རྩོམ་དགོས་ཞེསརྟེན་ལྷ་རེག་དང་ཧིན་སྒོར་ལྔ་བརྒྱ་བཅས་ཇི་ལྟར་བསྐུལ་གནང་བ་བཞིན་མདོ་ཁམས་སྡེ་དགེ་སྒ་རྗེ་ཁམས་དབུས་དགོན་པའི་སྤྲུལ་མིང་འཛིན་པ་འཇམ་དབྱངས་དོན་གྲུབ་པས། བོད་རྒྱལ་ལོ་༢༡༣༤ བོད་ཟླ་ ༥ ཚེས་ ༣༠ སྤྱི་ལོ་ ༢༠༠༧ ཟླ་ ༧ ཚེས་ ༡༤ ཉིན་བྲིས་པ་ཤིན་ཏུ་དགེ་བར་གྱུར་ཅིག། །།

ཞབས་བརྟན་སྨོན་ཚིག་མ་བཅོས་རང་མདངས་ཞེས་བྱ་བ།
ན་མོ་གུ་རུ་མཉྫུ་ཤྲཱི་ཡེ། གང་ཁྱོད་བསྐལ་མང་གོང་ནས་སངས་རྒྱས་ཀྱང་།། ལྔ་བདོའི་རྒུད་པ་སེལ་ཕྱིར་སྤྲུལ་བའི་གར།། གྲངས་མེད་གོང་ནས་གངས་ལྗོངས་མདོ་ཁམས་སུ།། བསྟན་པའི་རྒྱལ་མཚན་བསྒྲེང་ལ་གུས་ཕྱག་འཚལ།། དམ་པ་དུ་མས་འཁྲུལ་མེད་ལུང་གིས་བསྔགས།། མདོ་སྔགས་གཞུང་ལུགས་ཀུན་ལ་ཆགས་ཐོགས་བྲལ།། རིག་འཛིན་མཁས་གྲུབ་ཀུན་གྱི་གཙུག་གི་རྒྱན།། གསུམ་ལྡན་རྡོ་རྗེ་འཛིན་པ་ཞབས་བརྟན་གསོལ།།
དུས་མཐའི་མ་རིག་ལང་ཐོག་ཅན་རྣམས་ལ།། གང་ལྟར་སྣང་ཡང་འགྲོ་བའི་དོན་ཉིད་ལས།། ཐབས་མཁས་སྤྱོད་པ་སུ་ཡིས་དཔག་པར་ནུས།། འབྲེལ་ཚད་དོན་ལྡན་ཆེན་པོ་ཞབས་བརྟན་གསོལ།། མདོ་སྔགས་བསྟ༵ན་པ་འཛི༵ན་སྐྱོང་སྤེལ་བ་ལ།། ཉེར་འཚེའི་འཇི༵གས་པ་ཀུན་ལས་བྲ༵ལ་བ་དང་།། སྐུ་ཚེ་མི་འགྱུར་རི་རྒྱལ་ལྷུ༵ན་པོ༵་བཞིན།། འཆ་མེད་རྡོ་རྗེའི་ངོ་བོར་ཞབས་བརྟན་གསོལ།། དཀོན་མཆོག་རྩ་གསུམ་སྲུང་མའི་བྱིན་རླབས་ཀྱིས།། རེ་ལྟོས་གདུལ་བྱའི་ཕན་བདེ་རབ་བསྒྲུབས་ནས།། སྔ་འགྱུར་རྫོགས་ཆེན་བསྟན་པ་དར་བ་དང་།། བསྟན་འགྲོའི་དོན་ཆེན་མཐའ་རུ་ཕྱིན་པར་ཤོག།
སྐྱབས་རྗེ་རྫོགས་ཆེན་རིན་པོ་ཆེ་མཆོག་གི་ཞལ་སློབ་འཇམ་དཔལ་བསྟན་འཛིན་གྱིས་འདི་ལྟར་དགོས་ཞེས་བསྐུལ་ངོར་ཀཿཐོག་དགེ་རྩེ་འགྱུར་མེད་བསྟན་པ་རྒྱལ་མཚན་ནས་ཟླ་ཚེ་དགེ་བར་ཕུལ།

དཔལ་ལྡན་བླ་མའི་ཞབས་བརྟན།
ཨེ་མ་ཧོ། རབ་འབྱམས་རྒྱལ་ཀུན་འདུས་པའི་ངོ་བོ་ཉིད། །གུ་རུ་ཨོ་རྒྱན་རྗེ་ལ་གསོལ་བ་འདེབས། ། ཁྱེད་ཀྱི་གསང་གསུམ་མཁྱེན་རྩེ་ནུས་པའི་མཐུས། །དཔལ་ལྡན་བླ་མའི་ཞབས་པད་ཡུན་བརྟན་ཤོག ། འདྲེན་མཛད་རྒྱལ་བ་ཀུན་གྱི་བརྗོད་བྱའི་ལམ། །ཐེག་གསུམ་ཡོངས་རྫོགས་བསྟན་པ་རིན་པོ་ཆེ། །

མངའ་བདག་ཆོས་ཀྱི་རྒྱལ་བོ་ཟླ་བྲལ་བ། །འཇིགས་མེད་བློ་གསལ་དབང་པོ་ཞབས་བརྟན་གསོལ། ། གང་གི་ཐུགས་གསང་མི་ཤིགས་སྙིང་པོའི་སྲོག །ཨོ་རྒྱན་ཚེ་དཔག་མེད་ཀྱིས་བྱིན་རླབས་ནས། ། གཉིས་སྣང་བར་ཆད་བདུད་ཀྱི་མི་བརྫི་བར། །ཕྱོགས་ལས་རྣམ་རྒྱལ་ཞབས་པད་ཡུན་བརྟན་ཤོག ། ཆོས་ཉིད་གདོད་ནས་རྣམ་པར་དག་པའི་མཐུས། །ཆོས་ཅན་རྟེན་འབྲེལ་བསླུ་བ་མེད་པའི་མཐུས། ། བདག་གིས་ཇི་ལྟར་གསོལ་བ་བཏབ་པའི་དོན། །གེགས་མེད་ཡིད་བཞིན་ལྷུན་གྱིས་འགྲུབ་པར་ཤོག །
ཅེས་པ་འདི་ནི་ཁོང་གི་ཞལ་སློབ་རྣམས་ནས་ཇི་ལྟར་བསྐུལ་བ་བཞིན་བདག་གཡང་ཐང་སྤྲུལ་མིང་པས་གནས་མཆོག་རྡོ་རྗེ་གདན་གྱི་ཉེ་འགྲམ་ནས་ཀུན་འཛིན་ཞེས་པ་ས་ཕོ་བྱི་བའི་ལོའི་རྒྱལ་ཟླ་བའི་ཚེས་བཅུའི་དགོངས་མོར་ཤར་མར་བྲིས་པ་དགེ་བར་གྱུར་ཅིག། །།

ཞབས་བརྟན་སྨོན་ལམ་འཆི་མེད་ལྷ་ཡི་རྔ་སྒྲ་ཞེས་བྱ་བ།
ཨོྃ་སྭ་སྟི། མཚོ་སྐྱེས་རྒྱལ་བསྟན་འོད་སྟོང་མུ་འཁྱུད་འཛིན། །འཇིགས་བྲལ་ཐུགས་བསྐྱེད་མགྱོགས་འགྲོའི་ཤིང་རྟ་ཡིས། །
ལེགས་སྨོན་ལྷུན་པོའི་རྩེ་རུ་འདྲེན་པ་པོ། །གྲུབ་མཆོག་སྤྲུལ་བའི་ཟློས་གར་ཞབས་བརྟན་གསོལ། །སྣང་སྲིད་གཞིར་བཞེངས་རྒྱལ་བའི་དཀྱིལ་འཁོར་དུ། །འཁོར་འདས་ཆོས་ཀུན་ལྷ་སྔགས་ཆོས་ཉིད་ངང་། ། སྲོག་སྡོམ་གཟེར་བཞིས་ཡོངས་བཅིངས་རྣལ་འབྱོར་ཆེ། །སྒྱུ་འཕྲུལ་དྲྭ་བའི་སྟོན་པར་ཞབས་བརྟན་གསོལ། ། རྡོ་རྗེ་ལུས་ཀྱི་འོ་མཚོ་བསྲུབས་པ་ལས། །མཆོག་ཏུ་མི་འགྱུར་བདེ་ཆེན་བཅུད་ཀྱིས་མྱོས། ། གཙུག་ཏོར་འཁོར་ལོས་སྒྱུར་བར་མངའ་དབང་མཛད། །ཀུན་འདུས་རིག་པའི་བདག་པོར་ཞབས་བརྟན་གསོལ། ། སྡེ་གསུམ་ཀློང་དགུའི་ཆོས་ཚུལ་གངྐའི་ཀླུང་། །བརྒྱད་ལྡན་མེས་པོའི་རལ་བར་ལེགས་བསྐྱིལ་བ། ། སྒོམ་བྱུང་ཀློང་རྡོལ་མཁྱེན་དཔྱོད་ཧུབ་ཀྱིས་རོལ། །རྫོགས་ཆེན་བསྟན་པའི་ཤིང་རྟར་ཞབས་བརྟན་གསོལ། ། དེ་ལྟར་རབ་དཀར་ལྷག་བསམ་དཔྱིད་ཀྱི་མངལ། །སྦྲུམ་པའི་སྨོན་འབྲས་ཡོངས་འདུས་ས་བརྟོལ་མྱུག ། མཆོག་གསུམ་བདེན་པའི་གཡུར་དུ་རབ་ལྡེམ་པའི། །བཀྲ་ཤིས་དཔལ་གྱི་དུས་སྟོན་དར་གྱུར་ཅིག །
ཅེས་པ་འདི་ནི་ཤར་མི་ཉག་པ་འཇམ་དཔལ་བསྟན་འཛིན་ནས་ཇི་ལྟར་བསྐུལ་ངོར་འཇིགས་མེད་ཆོས་རྗེའི་གྲལ་མཐར་འཛིན་པ་སྙོམ་ལས་པ་བསྟན་འཛིན་རྒྱ་མཚོས། ཟླ་ཚེས་བཟང་པོར་ཤར་མར་བྲིས་པ་དགེ་ལེགས་སུ་གྱུར་ཅིག། །།

རྫོགས་ཆེན་རིན་པོ་ཆེ་བསྟན་འཛིན་འཇིགས་མེད་བློ་གསལ་དབང་པོའི་ཞབས་བརྟན་གསོལ་འདེབས་བསྡུས་པ་དོན་གཉིས་ཡིད་བཞིན་འདོད་འཇོ་བཞུགས།།
ཨེ་མ་ཧོ། ཐུབ་པའི་བསྟན་པ་འཛིན་སྐྱོང་སྤེལ་ལ་མཁས། །འཇིགས་པ་མེད་པར་སྙིགས་འགྲོའི་འགྲོ་ལ་བརྩེ། །
ཤེས་བྱ་ཀུན་མཁྱེན་བློ་སྟོབས་གཞན་ལས་ལྷག །གསལ་སྟོང་ཟུང་འཇུག་གནས་ལུགས་མངོན་དུ་གྱུར། །
དབང་ཁྲིད་མན་ངག་ཟབ་མོའི་ཆོས་ཆར་འབེབས། །བསྟན་པའི་བདག་པོ་ཡིད་བཞིན་ནོར་བུ་རྗེ། །
ཉིད་སྐུ་མི་འགྱུར་རྟག་བརྟན་རྡོ་རྗེའི་ཁྲིར། །བསྐལ་བརྒྱའི་བར་དུ་ཡུན་རིང་བཞུགས་ནས་སུ། །
བསྟན་དང་འགྲོ་བའི་གསོས་སྨན་འགྱུར་བར་སྨོན། །ཕྱོགས་བཅུའི་རྒྱལ་དང་རྒྱལ་སྲས་འཕགས་ཚོགས་དང་། །
ཚེ་རིག་འཛིན་པའི་ལྷ་ཚོགས་ནུས་མཐུ་ཡིས། །སྨོན་པ་བཞིན་དུ་གེགས་མེད་འགྲུབ་གྱུར་ཅིག །
ཅེས་པ་འདིའང་དགེ་མང་སྤྲུལ་བའི་སྐུ་མཆོག་འཇམ་དབྱངས་བསྟན་འཛིན་གྱི་ཐུགས་བཞེད་བཞིན་པདྨ་འཕྲིན་ལས་གླིང་བས།
ཞབས་བརྟན་འཆི་མེད་བདུད་རྩིའི་ཆར་རྒྱུན།
ཨོྃ་བདེ་ལེགས་སུ་གྱུར་ཅིག ཀུན་བཟང་ཆོས་སྐུ་གཞི་རྩ་བྲལ་བའི་ངང་། །འགག་མེད་ལོངས་སྐུ་རྒྱལ་བ་ཚེ་མཐའ་ཡས། །
རང་བྱུང་སྤྲུལ་སྐུ་མཚོ་སྐྱེས་གྲུབ་ཚིགས་ཀྱིས། །དགེ་ལེགས་འཆི་མེད་བདུད་རྩིའི་ཆར་རྒྱུན་སྩོལ། །


རྫོགས་ཆེན་ཕྲིན་ལས་སྤེལ་ལ་ཟླ་བྲལ་ཞིང་། །པདྨའི་རིག་འཛིན་ཚོགས་ཀྱི་གཙུག་གི་རྒྱན། །
འཇིགས་མེད་ཟངས་ཐལ་ཀློང་དུ་རྡོལ་བའི་མཐུས། །བློ་གསལ་བྱེ་བའི་མགོན་གྱུར་གསོལ་བ་འདེབས། །
མགོན་དེའི་ཐུགས་རྗེས་རྩལ་ལས་འཁྲུངས་པ་ཡི། །སྔ་འགྱུར་བསྟན་འཛིན་དབང་པོ་སྐྱེས་རབས་ཕྲེང་། །
གསེར་རིའི གྲངས་ལ་འགྲན་པའི་འཇིགས་བྲལ་རྗེ། །མཚན་ཙམ་གྱིས་ཀྱང་ལྷུན་པོ་བརྟན་པར་ཤོག །
ཅེས་ཞབས་བརྟན་གསོལ་འདེབས་འཆི་མེད་བདུད་རྩིའི་ཆར་རྒྱུན་འདི་ནི་རྫོགས་ཆེན་མཁན་རིན་པོ་ཆེ་འཇམ་དཔལ་བསྟན་འཛིན་སོགས་ཀྱིས་འདི་ལྟ་བུ་ཞིག་འབྲི་དགོས་ཞེས་ལྷ་རེག་རྟེན་དང་བཅས་བསྐུལ་བ་དང་། རང་ཉིད་ཀྱང་རྫོགས་ཆེན་མཆོག་སྤྲུལ་རིན་པོ་ཆེ་འདི་ཉིད་དང་འབྲེལ་འདྲིས་ཆེ་བ་ཕྲན་སེ་རིའི་མཁན་ཁྲི་བློ་བཟང་དཔལ་ལྡན་པས་ཆུ་སྟོད་ཟླ་བའི་དཀར་ཕྱོགས་རྫོགས་པ་གསུམ་པ་སྟེ་ཚེ་སྤེལ་བའི་འཕྲོད་སྦྱོར་དགེ་བའི་ཉིན་སྐྱབས་ཡུལ་དམ་པར་གསོལ་བ་བཏབ་སྟེ་བགྱིས་པའོ།། །།

ཞབས་བརྟན་གསོལ་འདེབས་དངོས་གྲུབ་དཔལ་སྟེར་ཞེས་བྱ་བ།
གདོད་ནས་ཀ་དག་ཆོས་སྐུ་ཀུན་དུ་བཟང་། །གཅིག་ཏུ་འགྲོ་ལ་བརྩེ་ཆེན་ལོངས་སྤྱོད་རྫོགས། །
གང་འདུལ་སྤྲུལ་བའི་རོལ་གར་མཚོ་སྐྱེས་རྗེ། །དེང་འདིར་བྱིན་རླབས་མཐུ་ཡིས་དངོས་གྲུབ་སྩོལ། །
རྫོགས་སངས་རྒྱས་ཀྱི་ཆོས་ཕུང་བརྒྱད་ཁྲིའི་བཅུད། །ཆེན་པོ་ཐེག་པ་རིམ་དགུའི་ལམ་གྱི་གནད། །
འཇིགས་མེད་སེང་གེའི་ང་རོ་སྒྲོགས་མཛད་ཆེ། །བློ་གསལ་མཁས་པའི་དབང་པོ་ཞབས་བརྟན་གསོལ། །
མཆོག་གསུམ་རྒྱལ་བ་སྲས་བཅས་བདེན་མཐུ་དང་། །སྔ་འགྱུར་ཆོས་སྲུང་རྒྱ་མཚོའི་མཐུ་དཔུང་རྩལ། །
ཆོསཉིད་བསླུ་བ་མེད་པའི་བདེན་སྟོབས་འདིའི། །ཇི་ལྟར་སྨོན་པའི་དོན་ཀུན་འགྲུབ་གྱུར་ཅིག །
ཅེས་པ་འདི་༸རྒྱལ་དབང་འབྲི་ཀུང་བའི་མཚན་གྱིས་བྱིན་གྱི་བརླབས་པ། དཀོན་མཆོག་བསྟན་འཛིན་ཀུན་བཟང་འཕྲིན་ལས་ལྷུན་གྲུབ་ཀྱིས། རབ་བྱུང ༡༧ པའི་ས་བྱི་། སྤྱི་ལོ་ ༢༠༠༨ ཟླ་བ་༡༠ ཚེས་ ༥ ཉིན་དངས་བའི་བློས་བྲིས་པ་དགེའོ། དགེའོ། དགེའོ།། །།
ཞབས་བརྟན་གསོལ་སྨོན།
བསླུ་མེད་སྐྱབས་གནས་རྒྱ་མཚོའི་མཐུ་བྱིན་གྱིས། །པདྨ་རིག་འཛིན་རྒྱལ་བའི་མྱུ་གུ་མཆོག །
འཇིགས་མེད་བློ་གསལ་གྲུབ་པའི་དབང་པོ་ཡི། །ཞབས་པད་རྟག་མཛད་འཕྲིན་དར་རྒྱས་ཤོག །
སྐྱབས་རྗེ་བདུད་འཇོམས་རིན་པོ་ཆེ།
ཞབས་བརྟན་སྨོན་ཚིག།
འཇིགས་མེད་ཐེག་མཆོག་རྡོ་རྗེ་སྙིང་པོ་ཡི། །
ཆོས་མཛོད་སྒོ་འཕར་འབྱེད་ལ་ཟླ་བྲལ་ཞིང་། །
བློ་གསལ་སྐལ་བཟང་རིག་འཛིན་གྲུབ་པའི་གཙོ། །
ལྷ་མིའི་དབང་པོའི་རྒྱན་དུ་འཚོ་ཞེས་གསོལ། །
༧སྐྱབས་རྗེ་རྡོ་གྲུབ་ཆེན་ནས

ཞབས་བརྟན་སྨོན་ཚིག་འཆི་མེད་རང་སྒྲ།
ཨོྃ་སྭ་སྟི།
རབ་འབྱམས་རྩ་གསུམ་རྒྱ་མཚོའི་བྱིན་རླབས་ཀྱིས། ། རྒྱལ་བསྟན་འཛིན་ལ་འཇིགས་བྲལ་ལྷུན་པོ་མཆོག །
གདུལ་བྱ་གླིང་བཞིའི་མགོན་དུ་བརྟན་བཞུགས་ནས། ། འཕྲིན་ལས་རབ་རྒྱས་བཞེད་དོན་ལྷུན་གྲུབ་ཤོག །
ཅེས་པ་འདི་ནི་རྫོགས་ཆེན་དགོན་གྱི་མཁན་པོ་འཇམ་དཔལ་བསྟན་འཛིན་མཆོག་གིས་བསྐུལ་བ་བཟློག་དུ་མ་ནུས་པར་ཕྲིན་ལས་བཟང་པོས་གནས་མཆོག་རྡོ་རྗེ་གདན་དུ་གུས་པས་གསོལ་བ་བཏབ་པ་དགེ།

ཞབས་བརྟན།
བདེ་གཤེགས་རྒྱལ་རིན་ཆེན་ཟུར་ཕུད་ཅན། །
གདུལ་བྱའི་སྣང་ངོར་མི་ཡི་ཚུལ་བཟུང་བ། །
བསྟན་འཛིན་མི་ཤིགས་འཇིགས་བྲལ་ལྷུན་པོའི་དཔལ། ། བསྟན་འགྲོའི་མགོན་དུ་བསྐལ་བརྒྱར་འཚོ་ཞེས་གསོལ། །
འཕགས་ཡུལ་རྫོགས་ཆེན་དགོན་དུ་དཔལ་རྡོ་རྗེ་སེམས་དཔའི་སྒྲུབ་པའི་དལ་ཞལ་ཕྱེ་པའི་བར་གསེང་ཞིག་ལ་རྫོགས་ཆེན་པདྨ་སྐལ་བཟང་དེས་བྲིས། །

ཞབས་བརྟན་གསོལ་འདེབས།
རང་བཞིན་རྫོགས་པ་ཆེན་པོའི་ལྟ་སྒོམ་ཉིད། །
མངོན་གྱུར་འགྲོ་དོན་འཕྲིན་ལས་ཕྱོགས་མེད་ཁྱབ། །
འཇིགས་མེད་བློ་གསལ་དབང་པོ་མཆོག་གི་སྐུ། །
ཞབས་པད་བསྐལ་བ་རྒྱ་མཚོར་བརྟན་གྱུར་ཅིག །
ཅེས་པའང་རྫོང་སར་བཤད་གྲྭའི་མིང་རྒན་བུ་ཀུན་དགའ་དབང་ཕྱུག་གིས། སྤྱི་ལོ ༢༠༠༨ ཟླ ༣ ཚེས་༠༥ ལ།
ཞབས་བརྟན་གསོལ་འདེབས།
མཚན་ཙམ་ཐོས་པས་སྲིད་པའི་གདུང་སེལ་བ། ། གཙུག་ཏོར་ཅན་སོགས་འཕགས་བོད་གྲུབ་བརྒྱའི་གར། །
རྒྱལ་བསྟན་རྒྱ་མཚོའི་མངའ་བདག་རྫོགས་ཆེན་པ། ། བསྟན་འཛིན་འཇིགས་བྲལ་ལྷུན་པོ་ཞབས་བརྟན་གསོལ། །
ཞེས་པ་འདི་ཉིད་འཕགས་ཡུལ་རྫོགས་ཆེན་ཤྲཱི་སེང་མཁན་པོ་འཇམ་དཔལ་བསྟན་འཛིན་སོགས་འདུས་པ་ཡོངས་ཀྱི་ངོར། བོད་རབ་བྱུང་ ༡༧ པའི་ས་བྱི་ཟླ ༡༠ ཚེས་ ༠༤ ལ། ཁྱེའུ་རིག་འཛིན་ཆེན་མོས་སྦྱར་བ་དགེ་ལེགས་སུ་གྱུར་ཅིག། །།

ཞབས་བརྟན་གསོལ་འདེབས།
ཀུན་བཟང་རྡོེར་སེམས་བི་མ་མི་ཏྲ་དང་། །
པདྨ་ཀ་རའི་ཡེ་ཤེས་སྒྱུ་མའི་འཕྲུལ། །
རིག་འཛིན་འོད་གསལ་བདེ་བའི་རྡོ་རྗེ་རྩལ། ། ཞབས་པད་བརྟན་ཅིང་མཛད་འཕྲིན་རྒྱས་གྱུར་ཅིག །
ཅེས་པའང་གསང་ཆེན་སྙིང་པོའི་ཤིང་རྟ་ཆེན་པོ་འཇིགས་བྲལ་བྱང་ཆུབ་རྡོ་རྗེའི་མཆོག་གི་སྤྲུལ་སྐུའི་ཟླ་ཞལ་གསར་འཁྲུངས་སྐབས་རྒྱལ་སྟོན་སྤྲུལ་མིང་རྒན་བུས་གསོལ་བ་རྩེ་གཅིག་ཏུ་བཏབ་པ་དགེ།

ཞབས་བརྟན་གསོལ་འདེབས།
ལྷག་བསམ་བསྟན་ལ་དཀར་བའི་དུས་ཀྱི་མགོན། །
མཛད་ཕྲིན་དུས་སུ་སྨིན་པའི་རྫོགས་ཆེན་པའི། །
ཐུགས་བསྐྱེད་སྐྱ་རེངས་དང་པོའི་འོད་རླབས་དེ། །
མི་འགྱུར་ཚེ་ཡི་ངོ་བོར་བརྟན་པར་ཤོག །

འབྲས་སྤུངས་མཁས་མང་བློ་གསལ་གླིང་གི་བྲག་གཡབ་རྟོགས་ལྡན་སྤྲུལ་སྐུ་བློ་བཟང་བསྟན་པའི་རྒྱལ་མཚན་ནས

རྫོགས་ཆེན་སྐུ་འཕྲེང་བདུན་པའི་ཞབས་བརྟན་བདེན་པའི་གྲུ་ཆར།

ཐུབ་དབང་ཞལ་གྱི་པདྨོ་ལས་འོངས་བའི། །ཆེ་བ་དྲུག་ལྡན་སྔ་འགྱུར་བསྟན་པའི་སྲོལ། །
འཛིན་ཅིང་སྤེལ་ལ་འགྲན་པའི་ཟླ་བྲལ་བའི། །རྫོགས་ཆེན་ཆོས་ཀྱི་རྒྱལ་པོ་ཞབས་བརྟན་གསོལ། །


འབྲས་སྤུངས་མཁན་ཁྲི་སྒོ་མང་མཁན་ཟུར་བློ་བཟང་བསྟན་པས་བྲིས།།

སྔ་འགྱུར་བསྟན་པའི་ཉི་གཞོན་རྫོགས་ཆེན་རྗེའི། ། མཛད་འཕྲིན་གཟི་འོད་སྟོང་གི་འདབ་བརྒྱ་བཞད། །
ཐུགས་བསྐྱེད་གོ་ཆ་བརྟན་པོ་རབ་ཏུ་རྒྱས། །
གང་སྐུ་མི་ཤིགས་ཁྲི་ལ་བརྟན་བཞུགས་ཤོག །

འབྲས་སྤུངས་སྒོ་མང་མཁན་པོ་བློ་བཟང་བསམ་གཏན་ནས་གུས་འདུད་དང་བཅས་ཏེ་བྲིས།
རྩོམ་པ་པོ། འབྲས་སྤུངས་མཁན་པོ་བློ་བཟང་བསམ་གཏན།

ཞབས་བརྟན།
ལུང་རིག་ཁྲ་ཚོམ་བཀྲ་བའི་དཔའ་ཆེན་དངོས། ། བྱམས་བརྩེའི་འོད་དཀར་འཁྱུག་པའི་བྱམས་ཆེན་དངོས། །
རིས་མེད་བསྟན་ལ་གུས་པ་རྫོགས་ཆེན་པའི། །
མཛད་འཕྲིན་ཐ་གྲུ་ཀུན་དུ་རྒྱས་པར་སྨོན། །
འབྲས་སྤུངས་སྒོ་མང་ཧར་གདོང་མཁན་ཟུར་བསྟན་པ་རྒྱལ་མཚན་ནས་སྨོན་པ་བཞིན་དེ་དེ་བཞིན་དུ་འགྲུབ་པར་གྱུར་ཅིག། །།
རྩོམ་པ་པོ། ཧར་གདོང་མཁན་ཟུར་བསྟན་པ་རྒྱལ་མཚན།

0 comments:

ཟིན་བྲིས་འཚོལ་ཡུལ