Saturday 23 February 2013
00:37 | 
Posted by
༄༅།། ཨེ་མ་ཧོའི་རིག་མཛོད་། |
རྡོ་གྲུབ་དབང་ལྔ་བ་རིན་པོ་ཆེར་རྟོགས་བརྗོད་དང་འབྲེལ་བར་
གསོལ་བ་གདབ་པ་སྙུག་མ་སར་བའི་གླིང་བུ།
སྤྱང་།
དྲང་འཚོལ།
༡
སྔོན་ཚེ་བཅོམ་ལྡན་པདྨ་ཀ་ར་ཡིས། །རྒྱལ་ཀུན་ཕྲིན་ལས་སྤེལ་ལ་དབང་བསྐུར་བ། །ཆོས་རྒྱལ་ཚངས་པ་ལྷ་ཡི་མེ་ཏོག་ཅེས། །ཐེག་རྩེའི་རྣལ་འབྱོར་མཆོག་དེར་གསོལ་བ་འདེབས། །
༢
གཞན་ཡང་ཀློང་ཆེན་ནམ་མཁའི་རྣལ་འབྱོར་སོགས། །སྐྱེ་རབས་ཕྲེང་བར་ལས་ཅན་གདུལ་བྱའི་ཚོགས། །ཐར་པའི་ལམ་དུ་འདྲེན་པའི་དེད་དཔོན་མཆོག །བདུད་འདུལ་དཔའ་བོ་རྡོ་རྗེར་གསོལ་བ་འདེབས། །
༣
དེ་ལས་སླར་ཡང་རབ་ཚེས་དགེ་བྱེད་ལོར། །གྲུབ་དགོན་ལྷོ་ཕྱོགས་རྫ་ཁྲིའི་དམ་ཅན་ཞོལ། །བུ་རུ་ཞེས་བྱ་སྨུག་པོ་ལྡོང་རིགས་སུ། །སྐྱེ་བའི་མྱུ་གུ་བཟུང་ལ་གསོལ་བ་འདེབས། །
༤
དེ་ཚེ་ཨ་པང་གཏེར་ཆེན་རིགས་ཀྱི་སྲས། །ཝ་ཤུལ་དཔོན་བླ་དབང་ཆེན་ཉི་མ་ཡིས། །གྲུབ་ཆེན་འཇའ་ལུས་རྡོ་རྗེའི་ཡང་སྲིད་དུ། །འཁྲུལ་མེད་ལུང་གིས་བསྔགས་ལ་གསོལ་བ་འདེབས། །
༥
གཞན་ཡང་མཁའ་འགྲོ་ཏ་རེ་ལྷ་མོ་སོགས། །འབྱུང་འགྱུར་གཟིགས་པའི་རྣམ་འདྲེན་དུ་མས་ཀྱང༌། །ཕ་ཅིག་གྲུབ་དབང་བླ་མའི་རོལ་གར་དུ། །འགྱུར་མེད་ཕྱག་རྒྱས་བཏབ་ལ་གསོལ་བ་འདེབས། །
༦
ལྷུམས་སུ་ཞུགས་ཚེ་ཟུག་རྔུའི་སྐྱོན་བྲལ་ཞིང༌། །སྤང་བླང་འཛིན་ཞེན་བྲལ་བའི་རིག་པའི་ངང༌། །མངལ་གྱི་པད་མོའི་སྦུབས་ལས་ཁྱེའུ་ནི། །མཚན་དཔེས་བརྒྱན་པ་བལྟམས་ལ་གསོལ་བ་འདེབས། །
༧
རབ་རྒྱལ་ཤིང་བྱིར་སྐྱབས་རྗེ་རྡོ་གྲུབ་ཆེན། །འཕགས་པའི་ཡུལ་ནས་བོད་འབྱོན་དང་བོའི་སྐབས། །ལྷ་སྲས་གསུང་ལ་འཁྲུལ་བ་མི་བདོག་ཅེས། །དབུགས་དབྱུང་མེ་ཏོག་འཐོར་ལ་གསོལ་བ་འདེབས། །
༨
ལང་ཚོའི་མྱུ་གུ་གཞོན་པའི་དུས་ཉིད་ནས། །བྱམས་དང་སྙིང་རྗེ་དད་གཏོང་ཤེས་རབ་སོགས། །རྩོལ་མེད་ལྷན་སྐྱེས་མངའ་བའི་རྣམ་ཐར་དེས། །དཔྱོད་ལྡན་ཡིད་འཕྲོག་མཛད་ལ་གསོལ་བ་འདེབས། །
༩
ཡབ་རྗེ་རིག་འཛིན་མཁའ་སྤྱོད་རྡོ་རྗེ་ལས། །ཐུན་མོང་ཐུན་མིན་གདམས་པས་རྒྱུད་སྦྱངས་ཚེ། །ཡེ་ཤེས་བླ་མའི་འབྲུ་ཀུན་ཡོངས་འདུས་ཏེ། །ཞལ་ཞུགས་ཉམས་བརྒྱ་བརྟས་ལ་གསོལ་བ་འདེབས། །
༡༠
གྲུབ་བརྙེས་ཆེན་པོ་སེ་ར་ཡང་སྤྲུལ་གྱིས། །བི་མའི་རྣམ་འཕྲུལ་རིག་འཛིན་ཀློང་ཡངས་འབྱུངཿ ཞེས་སོགས་རྡོ་རྗེའི་ལུང་གི་བསྔགས་པ་བཅས། །ཟབ་གཏེར་ཆོས་ཀྱིས་བསྐྱངས་ལ་གསོལ་བ་འདེབས། །
༡༡
མིག་དམར་ཞེས་པ་ཤིང་ཕོ་བྱི་བའི་ལོར། །སྙིགས་དུས་རྒྱལ་བསྟན་སྤེལ་ལ་ཟླ་བྲལ་བ། །ཆོས་རྗེ་འཇིགས་མེད་ཕུན་ཚོགས་འབྱུང་གནས་ཞབས། །མཉེས་པ་གསུམ་གྱིས་བསྟེན་ལ་གསོལ་བ་འདེབས། །
༡༢
གང་དེས་ཟབ་རྒུའི་ཆོས་ཚུལ་མཐའ་དག་གི། །དབང་ལུང་མན་ངག་བདུད་རྩིའི་སྒོ་དབྱེས་ཤིང༌། །ཕ་དང་བུ་ཡི་དམ་ཚིག་རྗེས་འབྲེལ་བའི། །གདམས་ཟབ་རོ་མཆོག་མྱངས་ལ་གསོལ་བ་འདེབས། །
༡༣
ཁྱད་པར་ཀློང་ཆེན་གདམས་པའི་གནད་ཟབ་ཆེ། །མཁའ་འགྲོ་སྙིང་ཐིག་ཆོས་ཀྱི་ཆར་ཕབ་ཚེ། །བརྒྱུད་གསུམ་བླ་མའི་བྱིན་རླབས་སྙིང་ལ་སོན། །རྟོགས་པའི་བོགས་ཆེན་ཐོན་ལ་གསོལ་བ་འདེབས། །
༡༤
གནས་དེར་སྒྲ་སྙན་སྐར་རྩིས་རིག་པ་ནས། །དབུ་ཚད་མཛོད་འདུལ་ཕར་ཕྱིན་རྒྱུད་སྡེའི་དབར། །གུས་རྟག་བརྩོན་པས་མི་ལོ་དུ་མར་ཡང༌། །སྒྲུབ་པའི་མཆོད་སྤྲིན་བསྟབས་ལ་གསོལ་བ་འདེབས། །
༡༥
དེ་ཚེ་ཁྱོད་ཀྱིས་ཆོས་རྗེ་བླ་མ་ཡི། །གསུང་གི་གྲྭ་ཟུར་ཙམ་ཡང་མ་བཅགས་ཤིང༌། །སྡོམ་གསུམ་མིག་འབྲས་བཞིན་དུ་བསྲུངས་པ་ཡིས། །གྲགས་པའི་བ་དན་མཐོ་ལ་གསོལ་བ་འདེབས། །
༡༦
རྔ་ཆེན་ཞེས་བྱ་རབ་རྒྱལ་ཆུ་ཁྱི་ལོར། །ལྷ་དང་བླ་མའི་བཀའ་རྒྱ་ལུང་བསྟན་དང༌། །སྔོན་སྨོན་ཐུགས་བསྐྱེད་ཤིང་རྟས་ཉེར་དྲངས་ཏེ། །གྲུབ་ཆེན་གསེར་ཁྲིར་བཞུགས་ལ་གསོལ་བ་འདེབས། །
༡༧
དུས་དེར་ཁྱབ་བདག་འཇའ་ལུས་རྡོ་རྗེ་ཡི། །སྐུ་གདུང་ཁྲི་ཆས་ཕྱག་ཌ་འབྱོར་བ་དང༌། །སྐུ་སྐྱེ་གོང་མའི་དངོས་སློབ་ངོས་ཟིན་སོགས། །རྟེན་འབྲེལ་སྒོ་བརྒྱ་འགྲིག་ལ་གསོལ་བ་འདེབས། །
༡༨
ཨེ་མ་རྣམ་བྱུང་ས་ཕོ་འབྲུག་ལོ་ནས། །གསང་ཆེན་བཀའ་གཏེར་རྒྱ་མཚོའི་མཛོད་འཆང་བ། །གྲུབ་རྗེ་ཐུབ་བསྟན་ཕྲིན་ལས་དཔལ་བཟང་བོའི། །ཞབས་རྡུལ་སྤྱི་བོས་མཆོད་ལ་གསོལ་བ་འདེབས། །
༡༩
དེ་ཚེ་རྗེ་ཡིས་ཐུགས་ཀྱི་བུ་ཆེན་དུ། །བཟུང་ནས་ཀློང་ཆེན་སྙིང་གི་ཐིག་ལེ་སོགས། །ཟབ་ཆོས་སྨིན་གྲོལ་བུམ་པ་གང་བྱོར་བསྩལ། །དོན་བརྒྱུད་རྟོགས་པ་བརྙེས་ལ་གསོལ་བ་འདེབས། །
༢༠
དེ་ནས་ཕྱོགས་ཀྱི་ཆེ་རྒུ་མཐའ་ཡས་པས། །ཁྱོད་ཀྱི་ཞབས་རྡུལ་ཁོ་ན་མངོན་འདོད་དེ། །གཙུག་གི་ཟར་བུས་ནོར་འཛིན་ལྟོ་བ་ལ། །ཡང་ཡང་འདུད་པའི་གནས་དེར་གསོལ་བ་འདེབས། །
༢༡
གང་ཚེ་ཕྲག་དོག་ཁྲག་གིས་རབ་མྱོས་པའི། །རྨོངས་གླེན་གཅན་སྤྱང་སྐྱེ་བོས་གང་དྲན་གཏམ། །ཕྱོགས་སུ་སྤེལ་ཀྱང་བཟོད་པའི་ཕུབ་གཅིག་གིས། །བརྒྱ་སྟོང་གཡུལ་ལས་རྒྱལ་དེར་གསོལ་བ་འདེབས། །
༢༢
གང་གི་གཟིགས་རྒྱ་རིང་བའི་བློ་གྲོས་དང༌། །གྲུབ་རྗེའི་ཐུགས་དགོངས་ཆུ་བོ་གཅིག་འདྲེས་ངང༌། །རྟེན་འབྲེལ་ཤིས་པའི་དགེ་མཚན་འབུམ་དང་བཅས། །ཀུན་ཕན་སློབ་གླིང་བསྐྲུན་དེར་གསོལ་བ་འདེབས། །
༢༣
ཡུ་བི་ཀ་ནས་གྲུབ་རྗེའི་དགོངས་བཞེད་ལྟར། །གསོ་རིག་གླིང་དང་མཐོང་གྲོལ་དཔལ་གྱི་རི། །རྣམ་རྒྱལ་གླིང་དང་ཨོ་རྒྱན་ཆེན་པོ་སོགས། །འཁོར་ལོ་གསུམ་གྱིས་འདས་ལ་གསོལ་བ་འདེབས། །
༢༣
ཁྱད་པར་ཀློང་ཆེན་སྙིང་གི་ཐིག་ལེ་ཡི། །བསྟན་པ་དྲི་མ་མེད་པའི་འབྱུང་གནས་འདིར། །མདོ་སྔགས་ཉན་འཆད་སྒོམ་པའི་རིག་འཛིན་དང༌། །བཤད་སྒྲུབ་ཕྲིན་ལས་སྤེལ་ལ་གསོལ་བ་འདེབས། །
༢༤
ཁྱོད་ཀྱི་འཚོ་ཚིས་ཇི་ལྟར་སྟོབས་ཞན་ཅིང༌། །འདུ་འཁྲུག་འབྱུང་བས་ཇི་ལྟར་གཙེས་གྱུར་ཀྱང༌། །ཉིན་དང་མཚན་མེད་ཕྱོགས་རྣམས་ཀུན་ཏུ་ཡང༌། །གཙུག་ལག་མེ་སོན་སྦར་ལ་གསོལ་བ་འདེབས། །
༢༥
རབ་རྒྱན་མེ་བྱིར་ཆོས་རྗེ་ཡིད་བཞིན་ནོར། །ཚབས་ཆེན་བསྙུན་གྱིས་ཟིན་པའི་ཚུལ་གནང་ཚེ། །བདོག་རྒུ་རྩལ་སྤྲུགས་མ་མགོན་གཡུལ་མདོས་སྒོས། །སྐུ་ཚེའི་འདུ་བྱེད་བསྲིངས་ལ་གསོལ་བ་འདེབས། །
༢༦
གང་ཚེ་ཁྲ་འབྲུག་སྒྲོལ་མ་ལྷ་ཁང་དུ། །ཨོ་རྒྱན་ང་འདྲ་མ་ལ་མཇལ་གནང་བར། །མཇལ་དར་འོད་ཀྱིས་འཐུམ་གྱིན་ཉིད་ལ་སྦྲོན། །དེར་འདུས་དད་བརྒྱས་གཟིར་ལ་གསོལ་བ་འདེབས། །
༢༧
གཞན་ཡང་དཔལ་གྱི་བསམ་ཡས་མཆིམས་ཕུ་དང༌། །ཇོ་ཤཱཀ་ས་སྐྱ་གདན་ས་ཆེ་གསུམ་སོགས། །དད་པས་བསྙེན་ཅིང་བཀུར་བཟོས་རྒྱ་ཆེར་བསྟབས། །མཐོང་བརྒྱུད་ཕྱག་བཞེས་སྐྱོང་ལ་གསོལ་བ་འདེབས། །
༢༨
དེ་ལྟར་དབུས་འབྱོན་ལན་གྲངས་དུ་མར་ཡང༌། །ཨོ་རྒྱན་ཆེན་པོའི་སྒྲུབ་གནས་དུ་མ་དང༌། །གངས་རི་ཐོད་དཀར་ཚེ་རིང་ལྗོངས་སོགས་སུ། །ཁྲིགས་བཅད་གནས་འབྲེལ་གདབ་ལ་གསོལ་བ་འདེབས། །
༢༩
ཕྱི་ནང་རྒུད་པས་ཉེར་འཚེས་འགྲོ་རྣམས་ལ། །གཏོང་བའི་ཕྱག་ཟུང་ནམ་ཡང་མི་ལྷོད་ཅིང༌། །བདོག་རྒུར་ཞེན་འཛིན་བྲལ་བའི་སེམས་དཔའ་མཆོག །གྲུབ་རྗེ་རིག་འཛིན་བླ་མར་གསོལ་བ་འདེབས། །
༣༠
ལས་ཡས་ཁོན་གྱིས་ཧི་པེ་ཐང་ཧྲན་དུ། །གདན་ཞུས་ལྟར་བྱོན་ཡོན་བསྔོས་གསུར་འབུལ་སྐབས། །ཐུགས་རྗེ་ཆེན་པོས་མངོན་སུམ་ཞལ་གཟིགས་པས། །སློབ་འབངས་དད་བརྒྱས་གདུང་ལ་གསོལ་བ་འདེབས། །
༣༡
ཇི་སྙེད་གདུལ་བྱའི་མོས་བློ་སྐོང་སླད་དུ། །ཕྱིས་འབྱུང་ལུང་དུ་བསྟན་ཀུན་གནད་སྨིན་པས། །ཕྱོགས་མཐས་གཏུགས་པའི་རབ་འབྱམས་འཇིག་རྟེན་ན། །སྙན་པ་འབྲུག་ལ་འགྲན་དེར་གསོལ་བ་འདེབས། །
༣༢
དེ་ལྟར་གྲུབ་པའི་ས་མཐོར་གཤེགས་པ་ཡི། །ངོ་མཚར་རྟགས་དང་མཚན་མ་ཇི་སྙེད་ཀྱིས། །ཆེ་རྒུའི་སྤོབས་པ་ལྐོག་མར་ཕྱུངས་ན་ཡང༌། །སྦས་པའི་བརྟུལ་ཞུགས་སྐྱོང་ལ་གསོལ་བ་འདེབས། །
༣༣
གཞན་ཡང་བཅོས་མེད་ནད་ཀྱིས་ཐེབས་པ་དང༌། །དུག་བཏུང་བུ་མོ་ཡིད་བཞིན་ལ་སོགས་པར། །སྐྱེ་ལུས་གཅིག་ལ་ཚེ་སྲོག་གཉིས་པ་ཞིག །ཡོངས་སྩོལ་སྨན་གྱི་བླ་མར་གསོལ་བ་འདེབས། །
༣༤
མདོ་ཁམས་རྒྱ་སོག་ཡུལ་གྲུ་ཀུན་ཏུ་ཡང༌། །ཉ་ལྕོང་སྦལ་བ་ར་ལུག་ཕྱུགས་ཀྱི་ཚོགས། །ཉམ་ཆུང་དུད་འགྲོ་གཤིན་རྗེའི་སྒོ་ཐེམ་ལས། །ཡང་ཡང་སྐྱོབ་པའི་མགོན་དེར་གསོལ་བ་འདེབས། །
༣༥
རྒྱ་བོད་དད་ལྡན་ཁྲི་ཕྲག་དུ་མ་ལ། །སྙིང་ཐིག་གོང་འོག་མཚོན་པའི་དམ་ཆོས་ཀྱི། །སྦྱིན་པའི་སྒོ་འཕར་ལན་གཅིག་མ་ཡིན་པར། །གནས་དུས་ངེས་མེད་འབྱེད་ལ་གསོལ་བ་འདེབས། །
༣༦
རང་རློམ་བསྟན་པའི་བཙས་སུ་ཁས་འཆེ་ཞིང༌། །སྙིགས་ལྔའི་མཚང་ཆེན་བདོ་བའི་དུས་མཐའ་འདིར། །གྲུབ་རྗེ་བླ་མས་ཅི་གསུང་རྡོ་རྗེའི་བཀར། །ཡང་དག་འཛིན་པའི་དཔའ་བོར་གསོལ་བ་འདེབས། །
༣༧
སྙན་དང་མི་སྙན་གཏམ་གྱི་སྦྱོར་བ་དང༌། །ཆེ་ཕྲ་དངོས་རྒུའི་འབུལ་ཁ་མཐོ་དམན་ཀུན། །ཁྱོད་ཀྱི་ཐུགས་སུ་མཉམ་པ་ཉིད་གྱུར་པས། །སྐྱེ་དགུ་ངོ་མཚར་གྱུར་ལ་གསོལ་བ་འདེབས། །
༣༨
མདོར་ན་ཁྱོད་ཀྱི་ཕྲ་རགས་མཛད་པ་ཀུན། །དྲི་མེད་རྒྱལ་བསྟན་འཛིན་སྐྱོང་སྤེལ་གསུམ་དང༌། །མཐའ་ཀླས་འགྲོ་བའི་བདེ་དོན་ཁོ་ན་ལས། །མིག་བརྒྱས་ཡོངས་རྙེད་དཀའ་ལ་གསོལ་བ་འདེབས། །
༣༩
རྣམ་དཀར་ལས་འདིས་བདག་སོགས་ཡིད་ཅན་ཀུན། །སྐྱེ་དང་ཚེ་རབས་གང་དང་ཇི་སྙེད་དུ། །རྒྱལ་བའི་བསྟན་མཇལ་དེ་དང་དེ་འཛིན་བཅས། །བདེན་དྲང་ལྟ་བའི་འགལ་ཟླར་མ་གྱུར་ཅིག །
༤༠
དེ་ལྟར་གསོལ་བཏབ་ངག་གི་རིག་བྱེད་དེས། །མགོན་པོ་མཆོག་དང་ཀློང་སྙིང་བརྒྱུད་ཚོགས་ཀྱི། །གསང་གསུམ་ཡོན་ཏན་བུམ་པ་གང་བྱོས་སུ། །བདག་རྒྱུད་འཕོ་བར་རྩ་གསུམ་ལྷ་ཡིས་དགོངས། །
ཞེས་བོད་རབ་གནས་ལྕགས་མོ་ཡོས་བུའི་ཟླ་བརྒྱད་པའི་ཚེས་༢༩ལ་བཀའ་དྲིན་མཚུངས་མེད་གྲུབ་དབང་ལྔ་བ་ཆེན་མོར་དད་འདུན་འཇོག་པར་རློམ་པ་སློབ་ཐ་འཇམ་དབྱངས་ཤེས་རབ་ཀྱིས་དཔལ་བླ་རུང་ལྔ་རིག་ནང་བསྟན་སློབ་གྲྭའི་ཤར་ཉེས་ཚོགས་རང་གྲོལ་གླིང་རང་སྤྱིལ་གཙུག་ལག་རྒྱ་མཚོའི་ཐེམ་སྐས་ནས་སྨོན་པ་བཞིན་འགྲུབ་པར་གྱུར་ཅིག
Subscribe to:
Post Comments (Atom)
0 comments:
Post a Comment