༄༅།། ཨེ་མ་ཧོའི་རིག་མཛོད།

ཚེ་རབས་རྗེས་འཛིན་གྱི་སྨོན་ལམ།
ན་མོ་གུ་ར་ཝེ། ༡༽ ཆོས་དབྱིངས་བརྡལ་བ་ཆེན་པོའི་ཀློང་ཡངས་པོར།། དབྱིངས་རིག་དབྱེེར་མེད་ཀུན་བཟང་ཡབ་ཡུམ་ལ།། གསོལ་བ་འདེབས་སོ་འཁོརའདས་གཞི་གྲོལ་ཀློང་།། གདོད་མའི་བཙན་ས་ཟིན་པར་བྱིན་གྱིས་རློབས།། ༢༽ འོད་གསལ་ཡེ་ཤེས་འབྱམས་སུ་ཀླས་པའི་དབྱིངས།། དབྱེར་མེད་ཁ་སྦྱོར་རྡོར་སེམས་སྙེམ་མ་ལ།། གསོལ་བ་འདེབས་སོ་ཡན་ལག་བདུན་ལྡན་ངང་།། སྒྱུ་འཕྲུལ་དྲྭ་བ་ཆེན་པོར་བྱང་ཆུབ་ཤོག། ༣༽ སྤྲུལ་བའི་ཞིང་མཆོག་དཔལ་གྱི་བསམ་ཡས་སུ།། མཚོ་སྐྱེས་རྡོ་རྗེ་ཡེ་ཤེས་མཚོ་རྒྱལ་མར།། གསོལ་བ་འདེབས་སོ་རྫོགས་པ་ཆེན་པོའི་ངང་།། ཆོས་ཉིད་ཟད་སར་འཁྱོལ་བར་བྱིན་གྱིས་རློབས།། ༤༽ ས་སྤྱོད་ཞིང་མཆོག་དེ་ཝི་ཀོ་ཊ་རུ།། ཐུགས་ཀྱི་རིག་འཛིན་ནམ་སྙིང་རྡོ་རྗེ་མཚོར།། གསོལ་བ་འདེབས་སོ་ཡང་དག་ཡེ་ཤེས་ངང་།། ཟུང་འཇུག་རྒྱལ་སར་བྱིན་པར་བྱིན་གྱིས་རློབས།། ༥༽ ཕྱག་ཆེན་དག་པ་ཡེ་ཤེས་ཤིང་རྟ་ཆེ།། སུ་ཁ་སི་དྡྷི་གྲུབ་ཆེན་ས་ར་ཧར།། གསོལ་བ་འདེབས་སོ་སེམས་ཉིད་གཅིག་པའི་སྟེང་།། ཡེངས་མེད་འབྲས་བུ་མཆོག་ལ་སྦྱོར་བར་ཤོག། ༦༽ ཕར་ཕྱིན་མན་ངག་ཞི་བྱེད་གཅོད་ཀྱི་སྲོལ།། འབྱེད་མཛད་དམ་སངས་རྒྱས་ལབ་སྒྲོན་མར།། གསོལ་བ་འདེབས་སོ་སྡུག་བསྔལ་འཛིན་ཞེན་ཞི།། བདུད་བཞི་ཚར་གཅོད་བདག་མེད་དོན་མཐོང་ཤོག། ༧༽ བཅོ་བརྒྱད་གཏེར་དང་མཁའ་འགྲོ་གསང་བ་འདུས།། སྤེལ་མཛད་གུ་རུ་ཆོ་དབང་ཇོ་མོ་སྨན།། གསོལ་བ་འདེབས་སོ་ཟབ་ལམ་ཆོས་དྲུག་གིས།། ཚེ་འདིར་གྲོལ་བ་ཐོབ་པར་བྱིན་གྱིས་རློབས།། ༨༽ དག་སྣང་སྤྲུལ་བའི་རྒྱལ་ཁབ་གླིང་དཀར་སྟོད།། རྒྱལ་སྲས་གཡུ་ལྷ་སྨན་བཙུན་ནེའུ་ཆུང་མར།། གསོལ་བ་འདེབས་སོ་དྲག་པོའི་བརྟུལ་ཞུགས་ཀྱིས།། སྨོན་ལོག་དམ་སྲི་འདུལ་བར་བྱིན་གྱིས་རློབས།། ༩༽ གངས་རིའི་ལྗོངས་ཀྱི་ངེས་དོན་རྡོ་རྗེ་འཆང་།། ཏཱ་ར་ནཱ་ཐ་འཕྲིན་ལས་དབང་མོ་ལ།། གསོལ་བ་འདེབས་སོ་ཐབས་ཤེས་དབྱེར་མེད་ངང་།། རིམ་གཉིས་མཐའ་རུ་བྱིན་པར་བྱིན་གྱིས་རློབས།། ༡༠༽ མགོ་ལོག་ཡུལ་གྱི་གཏེར་གསུམ་བསྟན་པའི་བདག། དྲི་མེད་འོད་ཟེར་བདེ་སྐྱོང་དབང་མོ་ལ།། གསོལ་བ་འདེབས་སོ་པདྨའི་ཕྲིན་ལས་འགྲུབ།། ཚེ་འདིར་འཇའ་ལུས་འགྲུབ་པར་བྱིན་གྱིས་རློབས།། ༡༡༽ གུ་རུའི་ཆོས་གཏེར་རྒྱ་མཚོའི་འཁོར་ལོའི་བསྒྱུར།། ནམ་མཁའ་གླིང་པ་ཏཱ་རེ་དེ་ཝི་ལ།། གསོལ་བ་འདེབས་སོ་དགོངས་བརྒྱུད་བྱིན་རླབས་འཕོས།། འཕོ་ཆེན་འོད་སྐུར་གྲོལ་བར་བྱིན་གྱིས་རློབས།། ༡༢༽ སྣང་སྟོང་ཟུང་འཇུག་ནམ་མཁའི་ཉི་ཟླའི་ཚུལ།། ཐབས་ཤེས་དབྱེར་མེད་ཆུ་དང་རླན་གྱི་དཔེ།། ཡབ་ཡུམ་འབྲལ་མེད་ཐུགས་བསྐྱེད་བཙན་པོའི་སྟོབས།། དད་དམ་གཙང་མའི་ངོས་སུ་འཆར་བར་ཤོག། ༡༣༽ རྟེན་ཅིང་འབྲེལ་འབྱུང་བཟོ་བོའི་འདུ་བྱེད་ཀྱིས།། ས་ལམ་རི་མོ་ཇི་ལྟར་བཀོད་པའི་ངོར།། ཡབ་ཡུམ་བྱིན་རླབས་འོད་སྣང་རྟག་ཤར་ཤིང་།། འགྲོ་འདུལ་ངོ་མཚར་ལྟད་མོ་འབུམ་འགྱེད་ཤོག། ༡༤༽ ཚེ་རབས་ཀུན་ཏུ་གཏེར་ཆེན་ཡབ་ཡུམ་གྱི།། ཕྱག་གིས་འཆང་བར་འཛིན་པའི་དམ་བཅའ་འདི།། དྲན་ཆོག་སྐྱབས་གཅིག་བླ་མས་བྱིན་རླབས་ཤིང་།། བདེན་འབྲས་མངོན་དུ་འགྱུར་བའི་དཔལ་སྩོལ་ཅིག། ༡༥༽ འདི་ཉིད་འབྲི་ཀློག་འཆང་སོགས་འབྲེལ་ཐོགས་ལ།། སྤྱན་གཅིག་ཟུམ་མེད་གདངས་བའི་སྔགས་སྲུང་མ།། འཇིགས་རུང་ལྟོ་ཞལ་ངོམ་པའི་དྲང་སྲོང་ཆེ།། ཕྱག་ན་རྡོ་རྗེ་ཕྱར་བའི་ལྷ་ཡིས་སྲུངས།། ༡༦༽ མཐོང་ཐོས་དྲན་རེག་མ་ལུས་ཚེ་འདིའམ།། ཕྱི་མའི་དུས་སུ་གཏེར་ཆེན་བླ་མ་དང་།། དཔའ་བོ་མཁའ་འགྲོས་རྡོ་རྗེས་གླུ་གར་བཅས།། འོག་མིན་ཟང་མདོག་དཔལ་རིར་འཁྲིད་པར་ཤོག། ༡༧༽ དེ་ལྟར་སྨོན་པས་མཐུ་ཡིས་ཚེ་རབས་ཀྱི།། ལན་ཆགས་རྟོག་སྒྲིབ་ལྷག་པ་མེད་པར་བྱང་།། མཚོ་སྐྱེས་ལུགས་བཟང་རྣམ་རྒྱལ་རྔ་སྒྲ་ཡིས།། སྲིད་པའི་ཁྱོན་ཀུན་འགེངས་པའི་བཀྲ་ཤིས་ཤོག། ཀཿཐོག་རིག་འཛིན་ཆེན་པོ་པདྨ་དབང་ཆེན་དགྱེས་པའི་རྡོ་རྗེ་ལགས་ཀྱི་གསུང་བྱིན་རླབས་ཅན་འདི་བླ་མའི་འདས་མཆོད་དུ་ཐོན་ལ་ཉེ་བས་ཆོས་གྲོགས་རྣམས་ལ་ཕན་པའི་ཕྱིར་སྤེལ་བ་ཡིན།