༄༅།། ཨེ་མ་ཧོའི་རིག་མཛོད།

༄༅། །མཁའ་འགྲོ་མ་བདེ་གཡང་གི་འཁྲུངས་སྐར་དགའ་བསུ་ དཔྱིད་ཀྱི་རྒྱལ་མོ་གླུ་དབྱངས་ཞེས་བྱ་བ། །

ན་མོ་གུ་རུ་མ་ཧྰ་སུ་ཁ་ཨེ་མ་ཧོ། །

ཀ་ཁའི་དབྱངས་གསལ་ཐོགས་མེད་ངག་རྩལ་དག །

ཁ་བའི་ལ་རྒྱ་མཚུངས་མེད་ཐུགས་ལ་རྫོགས། །

ག་དུས་ཡིན་ཡང་བསྟན་སྲིད་ལས་ལ་སྨིན། །

ང་ཡི་སྙིང་གྲོགས་དམ་པར་གཙུག་གི་རྒྱན། །

ཅ་དག་བོད་ཆས་གཙང་མའི་སྐུ་ལུས་མཛེས། །

ཆ་ཚང་ལེགས་བཤད་རིན་ཆེན་མགྲིན་པར་རྒྱན། །

ཇ་ཆང་སྲེད་པའི་ཆོས་ལ་ཞེན་པ་བྲལ། །

ཉ་གང་ཚངས་སྲས་དབང་མོ་གསར་དུ་འཁྲུངས། །

ཏ་ཐྰ་ག་ཏའི་བསྟན་པའི་ཡང་སྙིང་རྟོགས། །

ཐ་སྙད་ཤེས་བྱའི་རིག་པའི་བཟང་ངན་འབྱེད། །

ད་འདས་མ་འོང་བོད་པའི་རྒྱུད་འཛིན་མཆོག །

ན་གཞོན་ཁྱེད་འདྲ་གཞི་བྱེས་གཉིས་སུ་དཀོན། །

པ་ར་མི་ཏྰའི་ཕྱིན་བཅུའི་གནས་ལ་མཁས། །

ཕ་མ་གཉིས་མེད་རྒྱུད་སྡེའི་དགོངས་པས་བཙུན། །

བ་ཀུ་ལི་ལྟར་སྨན་མཆོག་ཕན་འབྲས་བཟང་། །

མ་སྨད་བསོད་ནམས་བདེ་གཡང་ཡིད་ཀྱི་དཔལ། །

ཙ་མུན་ཛ་ཡིས་དམ་དུ་མ་བཅིངས་ཀྱང་། །

ཚ་རླབས་བདེ་ཆེན་འདྲེན་པའི་པདྨ་ཅན། །

ཛ་ཡའི་གསང་ཆེན་སྟོན་པའི་རྣལ་འབྱོར་མ། །

ཝ་ལེར་སྒོམ་ཚེ་སྙིང་གི་སྨིན་གྲོལ་བརྟས། །

ཞྭ་བཟང་དབུས་པའི་ཐོད་ཅོག་དབུ་ལ་བཀྲ། །

ཟ་འོག་འཇའ་རིས་མཛེས་པས་སྐུ་ལ་ཤིས། །

འ་ཅག་ལྷ་ལྕམ་སྲོལ་རྒྱུན་དུང་བས་བདེ། །

ཡ་རབས་དམ་པའི་གྲལ་ན་ཤིན་ཏུ་ལེགས། །

ར་བ་གངས་དཀར་ལྷ་མོ་གཡང་གི་སྲས། །

ལ་ལུང་བདེ་སྐྱིད་སྤེལ་མཛད་མཛེས་མཛངས་མ། །

ཤ་ཞེན་བོད་ལ་དུང་བའི་སྙིང་གྲོགས་མ། །

ས་སྟེང་འགྲོ་བའི་དེད་དཔོན་གཙུག་ན་རྒྱལ། །

ཧ་ཅང་དད་གུས་དགའ་བའི་གཅེས་ཕྲུག་ལ། །

ཨ་བུ་འཁྲུངས་སྐར་བཀྲ་ཤིས་བདེ་ལེགས་ཀྱི། །

ཨི་ལྡན་སྙན་པའི་རོལ་དབྱངས་འདི་ནས་དཀྲོལ། །

ཨུ་ཚུགས་མིན་པར་སྙིང་གི་ལེགས་སྐྱེས་འབུལ། །

ཨེ་ཝྃ་ཟུང་འཇུག་བདེ་ཆེན་བསྐྱེད་པའི་གྲོགས། །

ཨོ་རྒྱན་པདྨའི་རྒྱུད་འཛིན་ཐུགས་རྗེ་ཅན། །

སྐྱེ་བ་ཀུན་ཏུ་ཡང་དག་རྗེས་འབྲེལ་ནས། །

བསྟན་དང་འགྲོ་བའི་དོན་ཆེན་ལྷུན་འགྲུབ་ཤོག །

རྩ་བརྒྱུད་བླ་མའི་བྱིན་རླབས་སེམས་ལ་འཁྲུངས། །

ཡི་དམ་ལྷ་ཡིས་དག་མཉམ་དངོས་གྲུབ་ཐོབ། །

མཁའ་འགྲོའི་དམ་ཚིག་ནམ་ཡང་མི་འབྲལ་འགྲོག །

ཆོས་སྐྱོང་སྲུང་མས་གང་བསམ་ཡིད་བཞིན་སྩོལ། །

ཅེས་པ་འདི་ཡང་སྙིང་གྲོགས་བདེ་གཡང་གི་འཁྲུངས་སྐར་ཉིན་ལ་གང་དྲན་དབྱངས་གསལ་མཆོད་པ་འདི་ཡང་རབ་རྒྱན་ཆུ་སྦྲུལ་སྨིན་ཟླའི་ཡར་ཚེས་གཅིག་ལ་དབྱིན་ཡུལ་ཨེ་ཝྃ་སྨན་ཁང་ནས་ཕུལ་བར་དགེའོ། དགེའོ། དགེའོ། ། ། །