Thursday 6 March 2014
15:51 | 
Posted by
༄༅།། ཨེ་མ་ཧོའི་རིག་མཛོད་། |
བོད་ཡོངས་ལ་གདམས་ངག་སོར་མོ་དོ་ཞེས་བྱ་བ།
ཀ་ཡེ་གསོན་དང་གངས་ཅན་བོད་པ་རྣམས།།
ཁ་བའི་ལས་དབང་ཡག་དགའ་ཉེས་སྡུག་ལ།།
ག་ལེར་བསམ་ཚེ་བཟོད་དཀའི་ཚོར་སྣང་བཅས།།
ང་ཡིས་གྲོས་འདེབས་སྙིང་གཏམ་འདི་སྐད་ཐལ།།
ཅ་དག་དངོས་པོ་བཟང་ངན་བར་གསུམ་དང་།།
ཆ་ལུགས་ཡུལ་སྲོལ་གོམས་གཤིས་གནའ་དེང་སྐོར།།
ཇ་ཡུན་ཙམ་གྱིས་མེ་བསྲེག་མི་གཏོང་བར།།
ཉ་ར་གནང་ནས་འཛིན་སྐྱོང་སྤེལ་ན་བཟང་།།
ཏ་ཟིག་ཡུལ་སྲོལ་ལྷ་ཀླུ་གཉན་གསོལ་དང་།།
ཐ་དག་ཀུན་མཁྱེན་ནང་བསྟན་རིག་གཞུང་སྲོལ།།
ད་གདོད་རྙེད་པར་དཀའ་བའི་གཏེར་རྫས་དང་།།
ན་བཟའ་ལྤགས་རིགས་རྣམས་ཀྱང་དེ་བཞིན་སྲུངས།།
པ་ལགས་ལྷ་འདྲེ་གང་ལ་སྐྱབས་འགྲོ་ཡང་།།
ཕ་མེས་བཀའ་དྲིན་བརྟག་ཞིང་རིགས་པས་དཔྱད།།
བ་གླང་དམར་མཆོད་ལྟ་བུ་སྲོལ་ངན་རྣམས།།
མ་རབས་གནོད་པའི་ཚོགས་ཀུན་དོར་ན་ལེགས།།
ཙྭ་རི་གནས་མཆོག་ཁོར་ཡུག་སྲུང་སྐྱོབ་དང་།།
ཚ་གྲང་ལེགས་སེལ་སྨན་རྫས་དཀོན་ཚོད་རིགས།།
ཛམ་གླིང་ཕན་བདེའི་ཁྱད་ནོར་རིན་ཆེན་རྣམས།།
ཝ་ཏི་བཟང་པོའི་ཕྱོགས་ལ་གཅེས་སྐྱོང་མཛོད།།
ཞྭ་དཀར་ཞྭ་ནག་རྩོད་པའི་དུས་མ་ཡིན།།
ཟ་འོག་མི་ནོར་བསྲེག་པར་གནས་མ་ཡིན།།
འ་ཅག་ཕན་བདེའི་གངས་ལྗོངས་མདུན་ལམ་ལ།།
ཡ་རབས་དམ་པའི་ཆོས་དང་མཐུན་པར་གཅེས།།
ར་ལུག་གཡག་རྟའི་འཚོ་གནས་འབྲོག་སྡེ་དང་།།
ལ་ལུང་འབྲུ་དྲུག་བཏབས་མཁས་ཞིང་པའི་རིགས།།
ཤ་ཁྲག་གངས་ཅན་བོད་ནས་མཆེད་ཚད་ཀུན།།
ས་སྟེང་བོད་ལུས་བླངས་པར་དོན་ལྡན་མཁྱེན།།
ཨ་རོགས་ཉིན་མཚན་རྨི་ལམ་གང་གནས་ཀྱང་།།
ཧ་ཅང་ཡག་དགའ་ཉེས་སྡུག་ཡོད་པའི་ཕྱིར།།
ཨི་ལྡན་དབྱངས་གསལ་སྙིང་གཏམ་མ་རལ་བར།།
ཨུ་ཚུགས་དང་བཅས་བོད་ཡིག་བརྩོན་པར་མཛོད།།
ཨེ་མ་ངེད་ཅག་ལས་སྨོན་རྟེན་འབྲེལ་བཟང་།།
ཨོ་རྒྱན་རིག་འཛིན་བརྒྱུད་པའི་གྲལ་མཐར་སྐྱེས།།
སོར་བྱང་གསང་སྔགས་ཆོས་ལྡན་ཞིང་ཁམས་འདིར།།
ཁམས་དབང་མོས་པའི་མཁྱེན་རབ་རྒྱས་གྱུར་ཅིག།
ཅེས་པ་རབ་རྒྱན་རྒྱལ་ཟླའི་ཡར་ཚེས་རྒྱལ་བར་གཉིས་པར་བོད་ནང་དུ་འགའ་རེས་མི་ནོར་རྒྱུ་བཅས་བསྲེག་སའི་ངོ་དེབ་གཅིག་མཐོང་བའི་མོད་ཡུལ་གངས་ཅན་པ་རྣམས་ལ་ཤྲྰིཿ་ཨེ་མ་ཧོས་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་ནས་བྲིས་པ་དོན་དང་ལྡན་པར་གྱུར་ཅིག་གུ།། ཤྲྰི་སརྦ་བི་ཛ་ཡནྟུ།།
Subscribe to:
Post Comments (Atom)
0 comments:
Post a Comment