Wednesday, 11 May 2011
16:05 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །བསྟོད་ཚིག་ལྷ་རྫས་དཀར་པོའི་མཆོད་སྤྲིན། །
མགོ་ལོག་བརྩོན་འགྲུས་རྒྱ་མཚོ། བླ་རུང་།
ཐུབ་བསྟན་ཡལ་ག་སྡེམ་པའི་དགའ་ཚལ་ནས། །
མཁྱེན་དཔྱོད་ཕ་མཐའ་བྲལ་བའི་དགོངས་པ་བརྙེས། །
ཟབ་རྒྱས་ཆོས་ཀྱི་དགའ་སྟོན་འགྱེད་མཛད་པའི། །
དགྱེས༵་པ༵་རྡོ༵་རྗེ༵་འཛིན་མའི་ཁྱོན་ན་རྒྱལ། །
ཕྱོགས་ཀུན་ལྟ་བའི་རྣམ་འགྱུར་ངོམ་པའི་ཚེ། །
རྨད་བྱུང་ཐུགས་བསྐྱེད་གོ་ཆའི་ཉེར་བསྐུལ་ནས། །
ཡལ་འདབ་ལྕུག་མས་གར་སྟབས་མྱུར་བསྒྱུར་ཞིང་། །
རྨད་བྱུང་བསྔགས་པའི་ཟིར་སྒྲ་དབྱངས་སུ་འཐེན། །
ལྔ་རིག་རྒྱའི་འཇིངས་ལ་གནས་བཅས་ཤིང་། །
ལག་ལེན་ཡིད་བཞིན་ནོར་བུའི་གདེང་ཀ་ཅན། །
ཉམ་ཐག་ཡུན་གྱིས་མནར་བའི་སེམས་ཅན་ལ། །
ལུགས་གཉིས་གྲུ་ཆར་འབེབས་པའི་གཉེན་དུ་བསྔགས། །
གང་གི་དགེ་མཚན་ལྷ་ཡི་རྔ་བོ་ཆེ། །
བསྔགས་བརྗོད་དབྱུག་གུས་རབ་ཏུ་བརྡུངས་པའི་སྒྲ། །
ཐོས་འཛིན་དཔལ་དུ་འཇོ་བའི་རྨད་བྱུང་གཏམ། །
ཅུང་ཟད་བརྗོད་ལ་བདག་ཡིད་སྤྲོ་བས་མྱོས། །
ལེགས་བཤད་བསོད་ནམས་འབུམ་གྱི་རྩེད་དགའ་ལས། །
ལེགས་འཁྲུངས་ངུར་སྨྲིག་བྱེ་བའི་འོད་དཀར་ཅན། །
སྙིགས་དུས་རྒྱལ་བསྟན་འཛིན་སྐྱོང་སྤེལ་བ་ཡི། །
རླབས་ཆེན་མཛད་པ་འདི་ཡང་ཨེ་མ་རྨད། །
དེ་སྐད་ལེགས་བྱས་རྣམ་དཀར་དགེ་བ་འདིས། །
ཚེ་རབས་ཀུན་ཏུ་བྱང་ཆུབ་སེམས་དཔའ་ཡི། །
ངོ་མཚར་རྟོགས་པ་བརྗོད་ལ་དབང་འབྱོར་ནས། །
མཁའ་ཁྱབ་གདུལ་བྱ་འདྲེན་པའི་དེད་དཔོན་སྨོན། །
༢༠༠༩ ༨ ༢༣ ཉིན་མགོ་ལོག་པ་བརྩོན་འགྲུས་རྒྱ་མཚོས་བླ་རུང་ནས། །
Subscribe to:
Post Comments (Atom)
0 comments:
Post a Comment