༄༅།། ཨེ་མ་ཧོའི་རིག་མཛོད།

༄༅། ། ྋཀུན་མཁྱེན་བླ་མ་ཚུལ་ཁྲིམས་བློ་གྲོས་ཀྱི་གསོལ་འདེབས་དྲང་སྲོང་དགྱེས་པའི་གླུ་དབྱངས། །

      

        ༡
        དྲི་མེད་འོད་ཟེར་ཡེ་ཤེས་ཉི་མ་ཆེས། །
        འགྲོ་ཀུན་རྨོངས་པའི་མུན་པ་བསལ་མཛད་པའི། །
        ཕན་བདེའི་ལམ་བཟང་སྟོན་པའི་སྐྱེ་དགུའི་མིག །
        ཀུན་མཁྱེན་ཤཱཀྱ་སེངྒེས་དགེ་ལེགས་སྩོལ། །
        ༢
        ཆོས་དབྱིངས་ཀུན་ཁྱབ་ཡེ་ཤེས་སྨོན་ལམ་ལས། །
        མཁྱེན་བརྩེ་ནུས་པའི་དབང་ཕྱུག་འཇམ་དཔལ་དབྱངས། །
        སྐུ་གསུམ་ཀུན་འདུས་བླ་མ་ཆོས་ཀྱི་རྗེ། །
        འདྲེན་མཆོག་ཡིད་བཞིན་ནོར་བུ་རྒྱལ་གྱུར་ཅིག །
        ༣
        ཚུལ༵་ཁྲིམས༵་རྣམ་དག་རྒྱལ་བ་དགྱེས་པའི་གར། །
        བློ༵་གྲོ༵ས་ཡང་དག་ཀུན་མཁྱེན་རྒྱལ་བ་དངོས། །
        འགྲོ་ཀུན་རྨོངས་པའི་མུན་པ་བསལ་མཛད་པ། །
        གཙུག་ལག་སྨྲ་བའི་ཉི་མ་ཁྱེད་ལ་གུས། །
        ༤
        གང་གི་ཟབ་གསང་རྣམ་ཐར་རྒྱ་མཚོ་འཇིངས། །
        བློ་ཆུང་བདག་གིས་གཞལ་བར་ནུས་མིན་ཡང། །
        ལྷག་བསམ་དད་བསྐུལ་བཟང་པོ་ལ་བརྟེན་ནས། །
        སྐལ་མཉམ་ཆོས་མཆེད་དགྱེས་པའི་དཔལ་དུ་འབུལ། །
        ༥
        འཕགས་པའི་ཡུལ་གྱི་བསྟན་འཛིན་ཐམས་ཅད་དང་། །
        གངས་རིའི་ལྗོངས་འདིའི་མཁས་གྲུབ་ཇི་སྙེད་ཀྱི། །
        གསང་གསུམ་ཡོན་ཏན་གཅིག་ཏུ་བསྡུས་པའི་སྐུ། །
        ཀུན་གཟིགས་རྒྱལ་བ་ཁྱེད་ལ་སྙིང་ནས་འདུད། །
          ༦
        ཕྱོགས་དུས་རྒྱལ་དང་རྒྱལ་སྲས་བྱིན་རླབས་སྟོབས་དང་། །
        སྐྱེ་རྒུ་བསོད་ནམས་གསར་བའི་དགེ་ལེགས་མཐུས། །
        རབ་རྒྱལ་དགེ་བྱེད་ཆུ་ཕོ་སྟག་གི་ལོར། །
        མདོ་ཁམས་ལྗོངས་སུ་རྒྱལ་བའི་མྱུ་གུ་འཁྲུངས། །
        ༧
        སྨོན་ལམ་སྟོབས་ཀྱིས་དམ་པས་རྗེས་སུ་བཟུང་། །
        དད་བརྩོན་ཤེས་རབ་དྲང་སྲོང་བརྟུལ་ཞུགས་ཅན། །
        ངེས་འབྱུང་རྣལ་མའི་རབ་བྱུང་དད་གུས་པས།
        ཀུན་དགའ་དཔལ་ལྡན་བླ་མར་གསོལ་བ་འདེབས། །
        ༨
        སྣ་ཚོགས་ཐབས་མཁས་བཟང་པོ་ལྷན་སྐྱེས་མངའ། །
        རིག་འཕྲུལ་གསར་བཟོ་ཉམ་ཆུང་འགྲོ་ལ་བྱམས། །
        བྱང་ཆུབ་སེམས་ཀྱི་རང་བཞིན་རྩལ་རྫོགས་པ། །
        འདྲེན་མཆོག་དཔལ་ལྡན་བླ་མར་གསོལ་བ་འདེབས། །
        ༩
        འགྲོ་ཀུན་ཕན་བཞེད་ཐུགས་རྗེས་རབ་བསྐྲུན་པའི། །
        སྤངས་རྟོགས་མཆོག་བརྙེས་ཡོན་ཏན་འབུམ་གྱི་གཏེར། །
        གསང་ཆེན་དག་མཉམ་བདེན་པའི་རྟེན་འབྲེལ་མཐོང་། །
        སྣང་མཛད་རིག་པའི་རྡོ་རྗེར་གསོལ་བ་འདེབས། །
        ༡༠
        ཆོས་རྗེ་ཡིད་བཞིན་ནོར་བུའི་རྗེས་སུ་བཟུང་། །
        ཆོས་ཀུན་དེ་ཉིད་མཁྱེན་པའི་དཔལ་དམ་པ། །
        ཆོས་རྗེ་མཆོག་དང་རྣམ་དབྱེར་མ་མཆིས་པ། །
        ཆོས་ཀྱི་རྒྱལ་པོ་ཁྱེད་ལ་གསོལ་བ་འདེབས། །
        ༡༡
        ཆོས་རྗེ་དམ་པ་ཡིད་བཞིན་ནོར་བུ་ཡིས། །
        བླ་རུང་ཆོས་ཀྱི་གྲོང་ཁྱེར་ཆེན་པོ་རུ། །
        ཆོས་མཆེད་དགེ་འདུན་འདུས་པ་རྒྱ་མཚོའི་དབུས། །
        ཆོས་རྒྱལ་དོན་གྱི་དམ་པར་མངའ་གསོལ་མཛད། །
        ༡༢
        སྐྱེ་བ་སྤྲུལ་སྐུ་ཀློང་ཆེན་རབ་འབྱམས་དངོས། །
        སྣང་བ་ལོངས་སྐུ་གངས་ལྗོངས་འཇམ་དཔལ་དབྱངས། །
        གསང་བ་ཆོས་སྐུའི་སྟོན་པ་ཀུན་ཏུ་བཟང་། །
        ཡང་གསང་སྦས་པའི་རྣལ་འབྱོར་གསོལ་བ་འདེབས། །
        ༡༣
        ལེགས་བཤད་འཆད་ལ་བརྡ་སྤྲོད་ཐོན་མི་རྗེ། །
        ལུང་རིགས་སྨྲ་ལ་མཚུངས་མེད་ཀུན་མཁྱེན་རྗེ། །
        བསྟན་བཅོས་རྩོམ་ལ་ཀློང་རྡོལ་བླ་མ་རྗེ། །
        མཁས་གྲུབ་དམ་པའི་དཔལ་ཡོན་ཁྱེད་ལ་ཕྱུག །
        ༡༤
        དུས་གསུམ་རྒྱལ་བའི་སྤྱི་མེས་ཀུན་ཏུ་བཟང་། །
        རྡོ་རྗེ་སེམས་དཔའི་རྒྱུད་ཀུན་ལེགས་མཁྱེན་པའི། །
        མཁའ་འགྲོའི་གཙོ་མོ་ཡེ་ཤེས་མཚོ་རྒྱལ་དང་། །
        དགའ་རབ་རྡོ་རྗེ་མཆོག་དང་དགོངས་པ་མཉམ། །
        ༡༥
        ཀ་དག་ཁྲེགས་ཆོད་ལྟ་བར་ངེས་ཤེས་འཁྲུངས། །
        ལྷུན་གྲུབ་ཐོད་རྒལ་དགོངས་པ་མངོན་གྱུར་པའི། །
        གཤིན་རྗེའི་བཀའ་བབས་སངས་རྒྱས་ཡེ་ཤེས་དང་། །
        འཇམ་དཔལ་བཤེས་གཉེན་མཆོག་དང་དགོངས་པར་མཚུངས། །
        ༡༦
        མན་ངག་ཕྱི་ནང་གསང་བ་ཡང་གསང་གི །
        ཏིང་འཛིན་གཡོ་མེད་ངང་དུ་རྟག་བཞུགས་པའི། །
        ལོ་ཙྰ་ཆེན་པོ་བེེ་རོ་ཙ་ན་དང་། །
        ཤྲྰི་སེངྷ་ཉིད་དང་སྒྲུབ་པ་མཉམ། །
        ༡༧
        འོད་གསལ་སྙིང་པོའི་དོན་གཟིགས་རྒྱལ་བའི་སྲས། །
        སྙན་བརྒྱུད་གདམས་པའི་བཀའ་བབས་གྲུབ་བརྙེས་མཆོག །
        ཉང་བན་ཆེན་པོ་ཏིང་འཛིན་བཟང་པོ་དང་། །
        པཎ་ཆེན་ལྔ་བརྒྱའི་གཙུག་རྒྱན་བི་མ་དངོས། །
        ༡༨
        གནས་ལུགས་རྗེན་པར་མཐོང་བའི་ཐབས་ཤེས་ཅན། །
        བཞག་ཐབས་བཞི་ཡི་མན་ངག་གདེངས་ཐོབ་པའི། །
        རིག་འཛིན་ཆེན་པོ་ནམ་མཁའི་སྙིང་པོ་དང་། །
        ཛྙྰ་ན་སུ་ཏྲ་མཆོག་དང་གྲུབ་པར་མཉམ། །
        ༡༩
        རྒྱལ་ཡུམ་དགོངས་དོན་མཐའ་བྲལ་དབུ་མའི་དོན། །
        རྟེན་འབྱུང་རིགས་ལམ་ཟབ་མོས་གསལ་མཁས་པ། །
        རྒྱལ་བའི་དབང་པོ་ཀློང་ཆེན་རབ་འབྱམས་དང་། །
        ཐེག་མཆོག་དབུ་མའི་སྲོལ་འབྱེད་ཀླུ་སྒྲུབ་དངོས། །
        ༢༠
        མདོ་སྔགས་ཤེས་བྱ་མ་ལུས་མཁྱེན་པའི་དཔལ།  །
        ཕྱི་ནང་གྲུབ་མཐའ་རྒྱ་མཚོར་མཐར་སོན་པ། །
        ཀུན་མཁྱེན་རིག་འཛིན་འཇིགས་མེད་གླིང་པ་དང་། །
        རྒྱལ་སྲས་འཕགས་པ་ལྷ་དང་དབྱེར་མ་མཆིས། །
        ༢༡
        རྒྱལ་བའི་དགོངས་པ་རྟེན་འབྱུང་དེ་ཉིད་དོན། །
        མཐར་ཐུག་སྤྲོས་ཀུན་བྲལ་བར་གཏན་འབེབས་པ། །
        ས་སྐྱའི་ཀུན་མཁྱེན་གོ་བོ་རབ་འབྱམས་དང་། །
        འཕགས་ཡུལ་སངས་རྒྱས་བསྐྱངས་ཀྱི་རྣམ་ཐར་འཛིན། །
        ༢༢
        ཆོས་ཀུན་བདེན་པའི་དངོས་པོ་མཐའ་བྲལ་ཀྱང་། །
        མཐུན་སྣང་ཚད་མར་ཕྱི་དོན་བཞེད་པ་ཡི། །
        རྗེ་བཙུན་བླ་མ་བློ་བཟང་གྲགས་པ་དང་། །
        རང་རྒྱུད་སློབ་དཔོན་ལེགས་ལྡན་འབྱེད་དང་མཚུངས། །
        ༢༣
        མཐའ་ཀུན་བྲལ་བའི་ཟབ་རྒྱས་དབུ་མའི་ཚུལ། །
        མདོ་སྔགས་ཡོངས་རྫོགས་འདོམས་མཁས་པཎྜི་ཏ། །
        ཀུན་མཁྱེན་མི་ཕམ་རྣམ་རྒྱལ་རྒྱ་མཚོ་དང་། །
        དཔལ་ལྡན་ཟླ་བ་གྲགས་དང་དགོངས་དབྱངས་གཅིག །
        ༢༤
        སྙིང་རྗེ་ཆེན་པོའི་ཉམ་ཐག་འདྲེན་པའི་མགོན། །
        ཟབ་རྒྱས་ལུང་རིགས་འགྲོ་ལ་སྟོན་མཁས་པ། །
        དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། །
        རྒྱལ་སྲས་ཞི་བ་ལྷ་དང་ཕྲིན་ལས་མཉམ། །
        ༢༥
        བདེན་གཉིས་འགལ་མེད་དབུ་སེམས་དགོངས་པའི་དོན། །
        གདུལ་བྱའི་ཁམས་བཞིན་ཟབ་རྒྱས་སྤེལ་མཛད་པ། །
        སྔོན་གྱི་ཆོས་རྒྱལ་ལྷ་གཅིག་བཙན་པོ་དང་། །
        མཁན་ཆེན་ཞི་བ་འཚོ་བཞིན་རྟག་ཏུ་དད། །
        ༢༦
        སྤྲོས་བྲལ་དབུ་མའི་ལྟ་སྒོམ་ཞི་ལྷག་ཟུང་། །
        བཀའ་བསྟན་མདོ་རྒྱུད་བཞིན་དུ་ལེགས་བཀྲལ་བའི། །
        དཔལ་ལྡན་མཉམ་མེད་སྒམ་པོ་རིན་ཆེན་དང་། །
        པདྨའི་ངང་ཚུལ་ནང་བཞིན་རྣམ་འདྲེན་མཛད། །
        ༢༧
        རྒྱལ་བའི་ལུང་བཞིན་རྒྱ་ཆེན་ཤིང་རྟའི་སྲོལ། །
        ཡང་ཟབ་ཐེག་ཆེན་སྡེ་སྣོད་འཛིན་སྐྱོང་སྤེལ། །
        ཀུན་མཁྱེན་ཇོ་ནང་ཤེས་རབ་རྒྱལ་མཚན་དང་། །
        སློབ་དཔོན་ཐོགས་མེད་རྗེ་བཞིན་དྲང་ངེས་འབྱེད། །
        ༢༨
        བྱེ་མཛོད་ཆོས་མངོན་སྡེ་བདུན་མདོ་དང་བཅས། །
        བྱེ་མདོ་ཉན་ཐོས་གྲུབ་མཐའ་གསལ་མཛད་པའི། །
        དོན་རབ་མཁྱེན་པའི་མཆིམས་ཀྱི་འཇམ་དབྱངས་དང་། །
        སངས་རྒྱས་གཉིས་པ་བཞིན་དུ་ཆོས་རབ་འབྱེད། །
        ༢༩
        རྒྱལ་བསྟན་རིན་ཆེན་དངོས་སྟོབས་རིགས་པས་སྟོན། །
        ལེགས་བཤད་རྣམ་དཔྱོད་ཚད་མའི་མིག་འབྱེད་པའི། །
        ཀུན་མཁྱེན་རོང་ཟོམ་ཆོས་ཀྱི་བཟང་པོ་དང་། །
        ཕྱོགས་ཀྱི་གླང་པོའི་གཏན་ཚིགས་ཁྱེད་ལ་མངའ། །
        ༣༠
        ཡང་དག་དཔྱད་གསུམ་ཚད་མའི་གནད་གསང་ཀུན། །
        ཟབ་རྒྱས་མདོ་སེམས་རིགས་པར་རྟོན་མཛད་པའི། །
        ས་སྐྱ་པཎ་ཆེན་ཀུན་དགའ་རྒྱལ་མཚན་དང་། །
        ཆོས་ཀྱི་གྲགས་པའི་ངེས་ཤེས་ཁྱེད་ལ་འཁྲུངས། །
        ༣༡
        རྒྱལ་ཡུམ་ཤེར་ཕྱིན་མངོན་རྟོགས་དབུ་མའི་དོན། །
        རྒྱན་འགྲེལ་ཐོགས་མེད་དགོངས་པ་བཞིན་བཀྲལ་བའི། །
        རྗེ་བཙུན་ལྷ་མོ་མ་ཅིག་ལབ་སྒྲོན་དང་། །
        འཕགས་པ་རྣམ་གྲོལ་སྡེ་ཡང་ཁྱེད་ལ་གུས། །
        ༣༢
        རྒྱལ་བའི་ལུང་བསྟན་བྱམས་མགོན་མན་ངག་བཞིན། །
        རྒྱལ་ཡུམ་ཤེར་ཕྱིན་གཞུང་དོན་གསལ་མཛད་པའི། །
        ཀུན་མཁྱེན་བླ་མ་བོད་པ་སྤྲུལ་སྐུ་དང་། །
        སློབ་དཔོན་སེང་གེ་བཟང་དང་དགོངས་ཀློང་གཅིག །
        ༣༣
        འདུལ་ལུང་སྡེ་བཞིའི་དགོངས་དོན་མ་ནོར་བར། །
        ཐམས་ཅད་ཡོད་སྨྲའི་ལུགས་བཞིན་སོ་ཐར་གཞུང་། །
        ཇི་བཞིན་འདོམས་མཁས་གནས་བརྟན་ཆོས་དཔལ་དང་། །
        སློབ་དཔོན་ཡོན་ཏན་འོད་དང་དབྱེར་མ་མཆིས། །
        ༣༤
        རྒྱལ་བསྟན་གཞི་མ་དམ་ཆོས་འདུལ་བའི་གཞུང་། །
        དྲི་མེད་རིང་ལུགས་སྤེལ་ལ་ཟླ་བྲལ་བའི། །
        འདུལ་འཛིན་ཆེན་པོ་ཤེས་རབ་བཟང་པོ་དང་། །
        ཤཱཀྱ་འོད་ཀྱི་བསྟན་བཅོས་ཁྱེད་ལ་དབང་། །
        ༣༥
         རྒྱ་ཆེན་ཐེག་པའི་སྲོལ་འཛིན་ལམ་རིམ་གཞུང་། །
        ཟབ་རྒྱས་མན་ངག་སྤེལ་བའི་བཀའ་དྲིན་ཅན། །
        མཁས་གྲུབ་དམ་པ་ཁྱུང་པོ་རྣལ་འབྱོར་དང་། །
        དཔལ་ལྡན་ཇོ་བོ་རྗེ་བཞིན་བཤད་སྒྲུབ་སྤེལ། །
        ༣༦
        ཐོས་པས་མདོ་སྔགས་རིག་གཞུང་རྒྱ་མཚོ་མཁྱེན། །
        བསམ་པས་ངེས་འབྱུང་བྱང་སེམས་ཡང་དག་མཐོང་། །
        སྒོམ་པས་ཆོས་ཀུན་དེ་ཉིད་ལེགས་རྟོགས་པའི། །
        མཁས་གྲུབ་བླ་མ་དམ་པ་གསོལ་བ་འདེབས། །
        ༣༧
        རྒྱ་ཡུལ་སྲོག་བསླུའི་བླ་མར་ཡོངས་སུ་གྲགས། །
        བོད་བརྒྱུད་བསྟན་པའི་བདག་པོར་ངང་གིས་གྲུབ། །
        དེང་དུས་ཚན་རིག་དེད་དཔོན་སྤྲུལ་བའི་སྐུ། །
        ཀུན་མཁྱེན་བླ་མ་ཁྱེད་ལ་གསོལ་བ་འདེབས། །
        ༣༨
        ཐུབ་བསྟན་འདུལ་བའི་ཚུལ་ཁྲིམས་རྣམ་པར་དག །
        དཔྱད་འཇོག་སྒོམ་པའི་ཏིང་འཛིན་ལོངས་སྤྱོད་རྫོགས། །
        ཐོས་བསམ་སྒོམ་པའི་ཤེས་རབ་སྨིན་གྲོལ་བ། །
        ཀུན་མཁྱེན་ཚུལ་ཁྲིམས་བློ་གྲོས་གསོལ་བ་འདེབས། །
        ༣༩
        བཀའ་གཏེར་དག་སྣང་མན་ངག་སྙིང་པོའི་དོན། །
        ཇི་བཞིན་ལམ་བཟང་སྟོན་པའི་བཀའ་དྲིན། །
        ཨོ་རྒྱན་རྗེ་དང་རྩ་བའི་བླ་མ་དང་། །
        དབྱེར་མེད་མཁན་ཆེན་བླ་མར་གསོལ་བ་འདེབས། །
        ༤༠
        བདག་ཀྱང་དེང་ནས་ཚེ་རབས་ཐམས་ཅད་དུ། །
        བླ་མ་མཆོག་དང་དེ་ཡི་རྗེས་འཇུག་གི །
        རྒྱལ་བསྟན་སྤེལ་བའི་ཕྲིན་ལས་མཆོག་ཐོབ་ནས། །
        དགྱེས་ཤིང་རྗེས་སུ་འཛིན་པའི་རྒྱུར་གྱུར་ཅིག  །
        ༤༡
        མདོ་རྒྱུད་བཀའ་གཏེར་དག་སྣང་མན་ངག་ལ། །
        ཐོས་བསམ་སྒོམ་པའི་ཤེས་རབ་ཕ་རོལ་ཕྱིན། །
        ཚུལ་ཁྲིམས་ཏིང་འཛིན་བློ་གྲོས་དཔལ་དང་ལྡན། །
        འགྲོ་ཀུན་བསླབ་གསུམ་གཏེར་ལ་དབང་འབྱོར་ཤོག །
        ༤༢
        དེ་ལྟར་རྩེ་གཅིག་གསོལ་བ་བཏབ་པའི་མཐུས། །
        སྐུ་གསུང་ཐུགས་ཀྱི་བྱིན་རླབས་མྱུར་ཏུ་ཐོབ། །
        བསྟན་དང་འགྲོ་བའི་དོན་ཆེན་ལྷུན་གྲུབ་ནས། །
        རྒྱལ་ཀུན་དགྱེས་པའི་དཔལ་ལ་སྤྱོད་གྱུར་ཅིག །
        ༤༣
        འདིར་སྨྲས་དགེ་བས་བཤད་སྒྲུབ་བསྟན་པ་དར། །
        འཁོར་སློབ་སྦྱིན་བདག་མངའ་ཐང་ལོངས་སྤྱོད་རྒྱས། །
        ཞི་བདེར་ཕུན་ཚོགས་སྤེལ་བའི་བླ་མ་རྣམས། །
        འཛམ་གླིང་མཛེས་པའི་རྒྱན་དུ་ཞབས་བརྟན་ཤོག །
        ཅེས་པ་འདི་ནི་སྙིགས་དུས་ཀྱི་མུན་པ་ནག་པོའི་ཁྲོད་ན་མཁྱེན་རབ་ཐུགས་བསྐྱེད་ཀྱི་ཕྲིན་ལས་བཟང་པོའི་གཟི་བྱིན་གྱི་འོད་ཟེར་ལམ་ལམ་དུ་འཕྲོ་བའི་ཡིད་བཞིན་ནོར་བུ་འབུམ་ལས་ལྷག་པའི་བསྟན་འགྲོའི་དཔལ་མགོན་དུ་བཞུགས་ནས་ཕན་བདེ་ཉག་གཅིག་ཏུ་མཛད་པའི་དེད་དཔོན་དམ་པ་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་སྟོན་པ་རྫོགས་པའི་སངས་རྒྱས་བཅོམ་ལྡན་འདས་དང་དབྱེར་མ་མཆིས་པ་ཀུན་མཁྱེན་བླ་མ་ཚུལ་ཁྲིམས་བློ་གྲོས་ཀྱི་རྣམ་ཐར་གསོལ་འདེབས་ཤིག་འབྲི་རོགས་ཅེས་ཨ་མདོའི་མཁན་པོ་འཇིགས་མེད་གཞན་ཕན་དང་ཁམས་ཚ་བུ་འོད་གསལ་མཐའ་ཡས་སོགས་ཆོས་མཆེད་དུ་མས་ཡང་ཡང་བསྐུལ་མ་ལ་བརྟེན་པ་དང་། ཀུན་མཁྱེན་ཉིད་ལ་མི་ཕྱེད་པའི་དད་པ་ཅན་མཆོག་གི་སློབ་བུ་ཐ་ཤལ་བ་དཔལ་དགྱེས་པ་རྡོ་རྗེས་རབ་རྒྱན་ལྕགས་སྟག་མགོ་ཟླ་བའི་ཡར་ངོའི་ཚེས་པ་བཅུའི་ཉིན་ནམ་སྤྱི་ལོ་ ༢༠༡༡/ ༡/ ༡༤/ ལ་མཐའ་འཁོབ་དབྱིན་ཇིའི་རྒྱལ་ཁབ་ཝཱ་ཡེལ་བོད་བརྒྱུད་རྣལ་འབྱོར་ཆོས་ཚོགས་ཁང་དུ་སྙིང་ནས་གསོལ་བ་བཏབ་པ་དགེའོ། དགེའོ། །དགེའོ། །