ན་མོ་མ་ཧྰ་གུ་རུ་པདྨ་ཀ་ར་ཡེ། །

ཀུན་བཟང་ཆོས་ཀྱི་དབྱིངས་ལས་མ་གཡོས་བཞིན། །

ཀུན་ཁྱབ་ཆོས་ཀྱིས་འགྲོ་ཁམས་འདྲེན་མཛད་པའི། །

ཀུན་བཟང་ཐུགས་ཀྱི་བསྟན་པའི་མངའ་བདག་མཆོག །

ཀུན་འདུས་པདྨ་འབྱུང་གནས་རྒྱལ་གྱུར་ཅིག །

ཟངས་མདོག་དཔལ་གྱི་རི་བོའི་དཀྱིལ་འཁོར་ཆེ། །

ཐུབ་བསྟན་རྣམ་པར་རྒྱལ་བའི་ཕོ་བྲང་གི །

རྣམ་ཐར་ཕན་ཡོན་སྐོར་ཚད་མདོར་བསྡུས་པ། །

དྲང་བདེན་རིག་པའི་ལམ་བཟང་བསྟན་པར་བྱ། །

ཨོཾ་སྭ་སྟི་བི་ཛ་ཡནྟུ། །

ཀུན་བཟང་གྲོལ་བ་ལྔ་ལྡན་གཙུག་ལག་ཁང་། །

ཀུན་འདུས་བླ་མའི་སྒྲུབ་ཁང་པདྨ་འོད། །

ཀུན་དགའ་ལྷུན་གྲུབ་ཚོགས་གཉིས་དམ་པའི་ཞིང་། །

ཀུན་ཕན་རིན་ཆེན་བསྟན་འགྲོའི་རྒྱན་དུ་བསྐྲུན། །

རྒྱལ་ཀུན་གསང་གསུམ་རྟེན་ཆེན་བཞེངས་པའི་དགེས། །

རྒྱལ་བསྟན་རིན་ཆེན་འཇིག་རྟེན་ཁམས་སུ་ཁྱབ། །

རྒྱལ་སྲས་དགེ་འདུན་བཞེད་དོན་ལྷུན་གྱིས་གྲུབ། །

རྒྱལ་ཀུན་དགྱེས་པའི་ཕྲིན་ལས་མཐར་ཕྱིན་ཤོག །