Wednesday 15 June 2011
02:42 | 
Posted by
༄༅།། ཨེ་མ་ཧོའི་རིག་མཛོད་། |
ན་མོ་གུ་རུ་མ་ཎི་ར་ཛ་ཡེ། །
ཕྱོགས་དུས་རྒྱལ་ཀུན་ཐུགས་རྗེའི་རང་གཟུགས་ཉིད། །
རྒྱལ་སྲས་སེམས་དཔའ་ཕྱག་ན་པད་དཀར་འཆང་། །
བསམ་བཞིན་སྤྲུལ་བའི་ཟློས་གར་བསྒྱུར་བ་མཆོག །
རྨེ་སྤྲུལ་བསྟན་འཛིན་རྒྱ་མཚོར་གུས་ཕྱག་འཚལ། །
ཆོས་གོས་རྣམ་གསུམ་མཛེས་པའི་སྐུ་ལུས་ལ། །
སྡེ་སྣོད་གསུམ་གྱི་བསྟན་པའི་ཆོས་སྒྲ་སྒྲོགས། །
བསླབ་པ་གསུམ་ལྡན་རྒྱལ་བའི་རྒྱལ་ཚབ་མཆོག །
གནས་བརྟན་བསྟན་འཛིན་རྒྱ་མཚོར་གུས་ཕྱག་འཚལ། །
སྨོན་འཇུག་བྱང་ཆུབ་སེམས་ལ་མངའ་དབང་འབྱོར། །
ཐབས་ཤེས་ཐེག་ཆེན་བསྟན་པའི་དམ་ཆོས་སྤེལ། །
བདེན་གཉིས་གནས་ལུགས་མཁྱེན་པའི་ཐུགས་རྗེ་ཅན། །
བྱང་སེམས་བསྟན་འཛིན་རྒྱ་མཚོར་གུས་ཕྱག་འཚལ། །
སྣང་སྲིད་རྣམ་དག་རྒྱལ་བའི་དཀྱིལ་འཁོར་གཟིགས། །
བཟླས་བརྗོད་བསྙེན་པའི་གཟུངས་སྔགས་ཟབ་རྒྱས་དཔལ། །
དག་མཉམ་བདེན་པའི་གནས་ལུགས་ཡོངས་སུ་སྨིན། །
སྔགས་འཆང་བསྟན་འཛིན་རྒྱ་མཚོར་གུས་ཕྱག་འཚལ། །
བྱམས་བརྩེ་ཆེན་པོས་འགྲོ་ཀུན་བདག་ལས་གཅེས། །
སྙིང་རྗེ་ཆེན་པོས་འགྲོ་ཀུན་སྤྱན་གྱིས་གཟིགས། །
དགའ་བ་ཆེན་པོས་གཞན་ཕན་བདག་གིར་བཞེས། །
མཚུངས་མེད་བསྟན་འཛིན་རྒྱ་མཚོར་གུས་ཕྱག་འཚལ། །
རྣམ་སྨིན་རིག་འཛིན་མཆོག་གི་སྤྲུལ་བའི་སྐུ། །
ཚེ་དབང་རིག་འཛིན་ལོངས་སྤྱོད་རྫོགས་པའི་སྐུ། །
ཕྱག་ཆེན་རིག་འཛིན་ལྷན་སྐྱེས་ཆོས་ཀྱི་སྐུ། །
ལྷུན་གྲུབ་བསྟན་འཛིན་རྒྱལ་མཚོར་གུས་ཕྱག་འཚལ། །
ནམ་མཁའ་རྒྱ་མཚོར་འདྲེས་པའི་རི་སུལ་ནས། །
ཡོ་གླིང་སྐྱིད་པའི་བདེ་ལ་མ་ཆགས་པར། །
བསྟན་འཛིན་རྒྱ་མཚོ་མཆོག་གི་སྣང་བརྙན་ཞིག། །
ཡང་ཡང་ཡིད་ལ་འཆར་བའི་སྐལ་བཟང་བདག །
བླ་མ་རྒྱ་མཚོས་སྐུ་ཚེ་བརྟན་གྱུར་ཅིག །
ཡི་དམ་རྒྱ་མཚོས་བྱིན་རླབས་འཇུག་གྱུར་ཅིག །
མཁའ་འགྲོ་རྒྱ་མཚོས་བར་ཆད་སེལ་གྱུར་ཅིག །
ཆོས་སྐྱོང་རྒྱ་མཚོས་བསམ་དོན་ལྷུན་གྲུབ་མཛོད། །
མཁྱེན་བརྩེའི་ཟླ་བའི་ཆ་ཤས་ཡོངས་རྫོགས་ནས། །
འཁོར་ཡུག་ཚ་རླབས་ཕྱུར་བའི་གངས་ལྗོངས་སུ། །
ཕན་བདེའི་བསིལ་ཟེར་སྦྱིན་མཛད་འགྲོ་བའི་མགོན། །
བསྟན་འཛིན་རྒྱ་མཚོའི་ཞབས་པད་བརྟན་གྱུར་ཅིག །
ཅེས་པའང་རབ་རྒྱན་ལྕགས་ཡོས་ས་ག་ཟླ་བའི་ཉ་ཚེས་ལ་བདག་གི་བླ་མ་བྱམས་བརྩེ་བཀའ་དྲིན་ཅན་རྨེ་སྤྲུལ་བསྟན་འཛིན་རྒྱ་མཚོར་དྲན་པའི་མཐུ་ཡིས་སྙིང་དབུས་ནས་གུས་ཕྱག་ཏུ་ཅི་དྲན་དུ་རྒྱལ་ཁམས་པ་དཔལ་དགྱེས་པས་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་གི་ཚོགས་གྲལ་ནས་གསོལ་བ་འདེབས་པ་དགེའོ།། །།
Subscribe to:
Post Comments (Atom)
0 comments:
Post a Comment