Friday 13 January 2012
13:05 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །རྨི་ལམ་བཟང་ངན་གྱི་ཆོ་འཕྲུལ། །
ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ །
མཚན་ནག་མུན་པ་འཁྲིགས་པའི་སྤྲིན་རྡུལ་ཀློང་ནས། །
མདོག་ནག་ཤན་པ་ནག་པོའི་གྲིབ་གཟུགས་ཅན། །
གཤིན་དམག་བདུད་བགེགས་སྲིན་པོ་ཤ་གཟན་རིགས། །
གསོན་བསྲེག་མི་ཤ་ཁྲག་རུས་དྲི་ངན་ཐུལ། །
ལན་ཆགས་འཁོར་བའི་བདུད་དམག་བྱུང་བ་རྨིས། །
སྐར་ལྔའི་ཁྲག་དར་ལྷ་སའི་གླིང་ནས་གཡོས། །
སྙིགས་ལྔའི་མུན་ནག་གནམ་སྟོང་སྨག་སྤྲིན་ལས། །
ཁམས་སྟོད་ཡུལ་དུ་གངས་ཐན་བུ་ཡུག་འཚུབ། །
འབྲོག་བདག་རྒན་གཞོན་བྱིས་པ་གསོན་དཀའ་ཞིང་། །
རྟ་ནོར་ར་ལུག་མུག་གེས་ཤི་བ་རྨིས། །
ཤར་ཕྱོགས་དམག་འཁྲུག་ཞི་བདེ་གསོད་ལ་བྲེལ། །
ནུབ་ཕྱོགས་འབྱུང་རྒུད་ནམ་ཟླ་དགྲ་རུ་ལང་། །
བྱང་ཕྱོགས་ནང་འཁྲུག་མེ་ཆུ་གློག་རྡུལ་རྡོལ། །
ལྷོ་ཕྱོགས་ཀླ་ཀློ་ཁ་ཆེས་རོ་ཁང་བརྩེགས། །
ཤ་རུས་ཁྲག་དམར་རི་ལུང་གང་བར་རྨིས། །
དེའི་སྐབས་སྡུག་བསྔལ་སྙིང་ནད་འཕེལ་བའི་ཚེ། །
བླ་མ་ཨོ་རྒྱན་རྗེ་ལ་གསོལ་འདེབས་བྱས། །
ཡི་དམ་རྡོ་རྗེ་གཞོན་ནུའི་བསྐྱེད་རིམ་སྒོམ། །
མཁའ་འགྲོ་སེངྒེའི་གདོང་ཅན་ཕྱག་རྒྱར་བརྟེན། །
ཆོས་སྐྱོང་གེ་སར་ཐུགས་དམ་བསྐུལ་བར་རྨིས། །
བླ་མའི་བྱིན་རླབས་རིགས་བདག་རང་ངོ་ཤེས། །
ཡི་དམ་དངོས་གྲུབ་མཆོག་ཐུན་ཡོན་ཏན་ཐོབ། །
མཁའ་འགྲོ་དགྱེས་པས་བདེ་ཆེན་ཡེ་ཤེས་སྟེར། །
ཆོས་སྐྱོང་སྲུང་མས་བར་ཆད་ཀུན་བསལ་ནས། །
བསྟན་འགྲོར་ཕན་བདེ་ལྷུན་འགྲུབ་འབྱུང་བར་རྨིས། །
ཞེས་པ་རབ་རྒྱན་ལྕགས་ཡོས་མགོ་ཟླའི་ཚེས་དགུ་ཉིན་ཨེ་ཝྃ་ཆོས་ཁང་ནས་འཆར་ཆ་རྨི་ལམ་དེ་ལས་གཉིད་སད་དོ། སྐྱོ་གདུང་དང་དགའ་སྤྲོ་ཡ་མ་ཟུང་གི་སྣང་བར་ཤར། གང་ལྟར་ལོ་གཅིག་གི་འབྱུང་འགྱུར་ཆགས་འཇིག་གི་གཞི་རིམ་ཙམ་དུ་ཤྲྰིས་བྲིས་པ་དགེའོ། །
Subscribe to:
Post Comments (Atom)
0 comments:
Post a Comment