Tuesday 28 February 2012
09:08 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །ཨེ་ཝྃ་པདྨ་ཀ་རའི་ཆོས་ཚོགས། །
ཨེ་ཝྃ་པདྨ་ཀ་རའི་མདོ་སྔགས་ཆོས། །
ལུང་རྟོགས་བཤད་སྒྲུབ་དམ་པས་འཛིན་སྐྱོང་སྤེལ། །
རྒྱལ་ཁམས་ཞི་བདེ་ཡང་གསང་གདམས་པའི་མཛོད། །
འཇིན་རྟེན་ཀུན་ཏུ་དར་ཞིང་རྒྱས་གྱུར་ཅིག །
དེ་ཡང་བདག་གི་རྨི་ལམ་གྱི་སྣང་བ་མངོན་དུ་གྱུར་ནས་འབྲུག་རྗེ་བློ་ལྡན་དགེ་འདུན་ཆོས་འཕེལ་མཆོག་གིས་ལྷག་བསམ་དང་འབད་བརྩོན་ལ་བརྟེན་ནས་ཤར་ཕྱོགས་འབྲུག་ཡུལ་དང་ཐེ་ལན་རྒྱལ་ཁབ་དག་ཏུ་ཐབས་ཤེས་སྣ་ཚོགས་ཀྱིས་འགྲོ་བ་སྤྱི་དང་དད་ལྡན་སྐྱེ་བོ་ཡོངས་ལ་ཕན་བདེའི་ཆེད་དུ་འཇིག་རྟེན་ལྷ་མིའི་ཐེག་པ་ནས་བཟུང་ཡ་ཀི་རྫོགས་པ་ཆེན་པོའི་བར་གྱི་ལྟ་སྒོམ་སྤྱོད་འབྲས་ལ་སློབ་སྦྱོང་དང་ཉམས་ལེན་ཆོག་པའི་ཆོས་ཚོགས་ཤིག་གསར་དུ་དབུ་འགྱེད་གནང་རྒྱུ་འདི་ནི་དོན་སྙིང་ལྡན་པའི་མཛད་ཕྲིན་ནོ། ཨེ་ཝྃ་པདྨ་ཀ་རའི་ཆོས་ཚོགས་འདི་ནི་འགྲོ་ཁམས་རྒྱུད་ཀྱི་ཐབས་སྙིང་རྗེ་དང་ཤེས་རབ་ཡོན་ཏན་འཕེལ་བའི་ཐབས་གྲོགས་སུ་རྒྱལ་བསྟན་ཡོངས་ཀྱི་ཕྱི་མོ་སྔ་འགྱུར་རྙིང་མའི་གྲུབ་མཐའ་གཞིར་བཞག་ནས་རྒྱལ་ཕྱི་ནང་གི་ཆོས་ལུགས་ཚང་མས་ཟུར་རྒྱན། ཚན་རིག་དང་དྲན་རིག་སྨྲ་བའི་གཞུང་དང་མཐུན་པར། འགྲོ་ཁམས་དབང་པོ་ཀུན་ལ་ཕན་བདེའི་ཐབས་སུ་སྒྲུབ་པ། རྒྱལ་ཁམས་ཡོངས་ལ་ལོ་ལེགས་དང་། ཞི་བདེའི་འཚོ་བའི་ཆེད་དུ་སངས་རྒྱས་བསྟན་པའི་མདོ་སྔགས་ཀྱི་སྐོར་ལ་བཤད་སྒྲུབ་ཕྲིན་ལས་སྤེལ་བའི་ཐབས་ཤེས་དང་། གསོ་སྦྱོང་དང་དགེ་སྒྲུབ་སྡིག་སྤོང་གི་ལམ་ལ་ཡང་དག་བསླབ་པ་བྱ་བ་དང་། རབ་རྒྱན་ཆུ་འབྲུག་ལོ་སར་ཚེས་བཅུ་ཉིན་དགེ་འདུན་འདུས་ཚོགས་ཀྱིས་རབ་གནས་སྨོན་ལམ་ཤིས་བརྗོད་ཀྱི་ཆོ་ག་གཟབ་རྒྱས་གནང་པ་དང་།མང་ཚོགས་ནས་གཟབ་སྤྲོས་མཆོད་པ་ཕུལ་ནས་དམ་པའི་ཆོས་དང་། ཤེས་རིག་གི་བསྟན་པ་དར་ནས་འགྲོ་བ་རྣམས་ཞི་བདེའི་དཔལ་ལ་སྤྱོད་པའི་རྟེན་འབྲེལ་སྨོན་ལམ་ཞུའོ། །
ཨེ་མ་ཧོ། །
ཨེ་ཝྃ་པདྨ་ཀ་རའི་བརྒྱུད་འཛིན་གྱི། །
གསང་ཆེན་བཤད་སྒྲུབ་ཆོས་ལ་འཛིན་སྐྱོང་སྤེལ། །
དགེ་འདུན་ཡང་དག་དར་སྤེལ་རབ་རྒྱས་ནས། །
ཞི་བདེའི་ཏིང་འཛིན་འབད་མེད་འཁྲུངས་གྱུར་ཅིག །
འབྲུག་རྗེ་བློ་ལྡན་དགེ་འདུན་ཆོས་འཕེལ་གྱིས་གསུང་བསྐུལ་བཞིན་མཁན་ཆེན་བླ་མའམ་ཤྲྰི་ཨ་ནནྟ་བཛྲས་གུས་ཕུལ། །
Subscribe to:
Post Comments (Atom)
0 comments:
Post a Comment