Friday, 20 April 2012
09:34 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །ཡི་གེའི་བཀླག་ཐབས་བྱིས་པ་བདེ་བླག་ཏུ་འཇུག་པ་ཞེས་བྱ་བ་བཞུགས།
༄༅། །ཨོཾ་སྭ་སྟི་སིདྡྷཾ། འགྲོ་བའི་གཉེན་གཅིག་ཐམས་ཅད་མཁྱེན་པ་དང་། །འཇམ་པའི་དབྱངས་ལ་ཕྱག་འཚལ་གསོལ་བཏབ་སྟེ། །ཡི་གེའི་བཀླག་ཐབས་ཅུང་ཟད་བརྗོད་པར་བྱ། །ཚངས་པ་ཡིས་ཀྱང་རྟག་ཏུ་སྐྱོང་གྱུར་ཅིག །
ཨ་ཨཱ༑ ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿདབྱངས་ཡིག་བཅུ་དྲུག་གོ ༑ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ།ཏ་ཐ་ད་དྷ་ན། པ་ཕ་བ་བྷ་མ༑ ཡ་ར་ལ་ཝ། ཤ་ཥ་ས་ཧ་ཀྵ། གསལ་བྱེད་སུམ་ཅུ་རྩ་བཞིའོ། །ཀ་ཁ་ག་ང༌། ཅ་ཆ་ཇ་ཉ།ཏ་ཐ་ད་ན།པ་ཕ་བ་མ། ཙ་ཚ་ཛ་ཝ།ཞ་ཟ་འ་ཡ།ར་ལ་ཤ་ས།ཧ་ཨ།ཕ་མ་སུམ་ཅུ་ཐམ་པའོ། །ཨི་ཨུ་ཨེ་ཨོ་སྲོག་རྐྱེན་དང་ཡན་ལག་གི་ཡི་གེ་བདུན་ནོ། །གང་གིས་ཡི་གེའི་བྱེ་བྲག་དང༌། །དབྱེ་བསྡུ་འབྱུང་གནས་མི་ཤེས་པར། །སྒྲ་ཀློག་བརྗོད་པ་མཁས་མ་ཡིན། །དོན་ཀྱང་རྣམ་པར་འཁྲུལ་བར་འགྱུར། །དེ་བས་དེ་དག་ལ་བརྩེ་བའི། །བརྗོད་པའི་དོན་མཁས་བྱ་བའི་ཕྱིར། །ཡི་གེའི་བྱེ་བྲག་དབྱེ་བསྡུ་དང༌། །སྒྲ་ཡིག་འབྱིན་ཐབས་འདིར་བཤད་བྱ། །རྒྱ་སྐད་དབྱངས་དང་གསལ་བྱེད་ཀྱི། །ཡི་གེ་ལྔ་བཅུ་ཐམ་པར་འདུས། །བོད་ཀྱི་ཡི་གེ་སུམ་ཅུ་བདུན། །སྒྲ་ཡི་ཕ་མ་སུམ་ཅུར་འདུས། །སྲོག་རྐྱེན་ཡན་ལག་ཡི་གེ་བདུན། །དེ་དག་ཨཱ་ཡི་ཁོངས་སུ་འདུ༑ ༑ཨ་ཉིད་མ་ཡི་ཡི་གེར་བརྗོད། །ལྷག་མ་རྣམས་ནི་ཕ་ཡིན་ནོ། །ཕ་ནི་ལུས་ཞེས་བརྗོད་པ་སྟེ། །མ་ནི་ཡན་ལག་ཏུ་ཡང་འགྱུར། །དེ་བས་ཡི་གེ་མ་ལུས་པ། །ཕ་མ་གཉིས་ལས་འབྱུང་བར་བརྗོད། །དེ་ལ་ཐོག་མར་ཨ་བཤད་དེ། །མ་དང་ཕྱི་མོ་ཡིན་ཕྱིར་དང༌། །རྒྱ་ལས་ཐོག་མར་འབྱུང་ཕྱིར་དང༌། །བརྗོད་པའི་རྒྱུ་ཞེས་གསུངས་པའི་ཕྱིར། །དེ་ལ་ཚེག་གཉིས་སྲོག་གི་ཨའི། །རང་ཉིད་བརྗོད་པར་མི་ནུས་ཏེ། །ཐིག་ལེ་ཆེན་པོ་ཡི་གེ་མེད། །ཡི་གེ་ཀུན་ལ་འཇུག་པའི་ཕྱིར། །ཐིག་ལེ་སྟོང་པ་ཡི་གེ་བརྒྱ། །དེ་ཉིད་བོད་ཀྱིས་གསལ་བར་བྱ། །དང་ཀྱོག་ཤད་ཀྱང་དེ་འདྲ་སྟེ། །གླང་སྣའི་ཨ་དང་རྣམ་གཅད་ཨའོ། །ཨ་ནི་རང་ཉིདབརྗོད་རུང་སྟེ། །སེང་གེ་ལྟ་བུའི་ཨ་ཞེས་བྱ། །ཨི་ཨུ་ཨེ་ཨོ་ཡན་ལག་ཕྱྀར། །ཡན་ལག་གི་ནི་ཨ་ཞེས་བྱ། །སེང་གེ་འདྲ་དང་བརྒྱ་བྱིན་མིག །གླང་སྣ་འོད་མ་བསྒྲེང་འདྲ་དང༌། །ཐང་གུག་དཔེ་ལྔས་བསྟན་པས་ན། །སྟོང་ཆེན་ཡི་གེ་ལྔ་ཞེས་གསུངས། །ད་ནི་ཕ་ཡི་ཡི་གེ་བཤད། །རྐྱང་པ་བཏགས་དང་འཕུལ་བ་དང༌། །འཕུལ་ཞིང་བཏགས་པ་གང་ཡིན་པ། །དེ་དག་ལུས་ཀྱི་ཡི་གེའོ།།དེ་ལྟར་ཕ་མའི་ཡི་གེ་ལ། །གུག་སྐྱེད་བཅས་དང་མཐའ་རྟེན་བཅས། །དེ་ལས་བྱུང་བའི་ཡི་གེ་སྟེ། །དེ་ལས་སྐྱེས་པས་བུ་ཞེས་བྱ། །དེ་ལ་ཕ་མ་སུམ་ཅུ་ཉིད། །རྐྱང་པའི་ཡི་གེ་ཞེས་བྱའོ། །རྒྱ་གར་སྐད་ལ་ཡི་གེ་ཀུན། །གདགས་ཤིང་བརྗོད་དུ་རུང་བ་ཡིན། །བོད་ལའང་དེ་བཞིན་ཕལ་ཆེར་དུ། །གདགས་ཤིང་བརྗོད་དུ་རུང་མོད་ཀྱང༌། །ཕལ་ཆེར་བོད་ཀྱི་སྒྲ་སྐད་ལ། །མི་དགོས་དེ་ཕྱིར་གང་དགོས་བཤད། །ཀ་ལ་ཡ་ར་ལ་གསུམ་གདགས།ཁ་ལ་ཡ་ར་གཉིས་གདགས་ཤིང༌། །ག་ལ་ཡ་ར་ལ་གསུམ་མོ། །ཏ་དང་ད་ལ་ར་གདགས་ཤིང་། །པ་ཕ་གཉིས་ལ་ཡ་རའོ། །བ་ལ་ཡ་ར་ལ་གསུམ་སྟེ། །མ་ལ་ཡ་ར་ཟ་ལ་ལ། །ར་ལ་ཀ་ག་ང་ཇ་ཉ། །ཏ་ད་ན་བ་མ་ཙ་ཛ། །ལ་དང་དེ་ལྟར་བཅུ་བཞི་གདགས། །ལ་ལ་ཀ་ག་ང་ཅ་ཇ། །ཏ་ད་པ་བ་ཧ་བཅུ་གདགས། །ས་ལ་ཀ་ག་ང་ཉ་ཏ། །ད་ན་པ་བ་མ་ཙ་ར། །ལ་སྟེ་དེ་ལྟར་བཅུ་གསུམ་གདགས། །ཧ་ལ་ར་ནི་གདགས་པའོ། །ཝ་ནི་ཀུན་ལ་གདགས་རུང་ཡང༌། །སྐབས་ཀྱི་བཅོ་ལྔ་དག་ལ་འཇུག ༑ཝ་བཏགས་གུག་སྐྱེད་མི་འཇུག་པས། །དེས་ན་ཝ་ནི་ཡན་ལག་ཡིན། །བོད་ལ་ཝ་ནི་འར་བསྡུས་པས། །དེས་ན་མ་ནིང་བརྗོད་ཀྱང་རུང༌། །དེ་དག་གདགས་ཡིག་ཉིས་བརྩེགས་ཏེ། །གསུམ་བཏགས་པ་ཡང་བརྗོད་པར་བྱ། །རྐ་རྒ་རྨ་ལ་ཡ་ཡིན་ཏེ། །སྐ་སྒ་སྤ་སྦ་སྨ་ལྔ་ལ། །ཡ་ར་གཉིས་གཉིས་གདགས་པར་བྱ། །སྒྲ་ཞེས་སྐབས་འགའ་དག་ཏུ་འབྱུང༌། །དེ་ལྟར་ཉིས་བརྩེགས་ལྔ་བཅུ་བརྒྱད། །སུམ་བརྩེགས་ཡི་གེ་བཅུ་བཞིའོ། །མདོར་ན་ཕ་མ་སུམ་ཅུ་ལ། །ཆ་ཐ་ཚ་ཞ་འ་ཤ་ཨ། །ཡི་གེ་བདུན་ལ་བརྩེགས་པ་མེད། །དེ་ལྟར་བརྩེགས་པ་བདུན་ཅུ་གཉིས། ། ཝ་ཡི་དོན་ནི་སྔར་བཤད་པས། །དེ་ནི་བརྩེགས་པར་ཡང་མི་བགྲང༌།། །།ད་ནི་འཕུལ་བ་བརྗོད་པར་བྱ། །ཡི་གེའི་ཕ་མ་སུམ་ཅུ་ལ། །ག་ད་བ་མ་འ་ཞེས་བྱ། །འཕུལ་བར་བྱེད་པའི་ཡི་གེ་ལྔ། །འ་ཧ་ཨ་གསུམ་འཕུལ་བ་མེད། །ཝ་ནི་ཡོད་དང་མེད་པའང་ཡིན། །ར་ལ་གཉིས་ནི་ཕྱེད་འཕུལ་ཏེ། །རྐྱང་པ་མི་འཕུལ་བརྩེགས་པ་འཕུལ། །དེ་ལ་ཡི་གེ་གས་འཕུལ་བ། །ཅ་ཉ་ཏ་ད་ན་ཙ་ཞ། །ཟ་ཡ་ཤ་ས་བཅུ་གཅིག་གོ །ཀ་ག་ང་པ་བ་མ་དྲུག །ད་ཡིས་འཕུལ་བར་བྱེད་པ་ཡིན། །ཀ་ག་ཅ་ཏ་ད་ཙ་ཞ། །ཟ་ཤ་ས་སྟེ་དེ་ལྟར་བཅུ། །ཡི་གེ་བ་ཡིས་འཕུལ་བ་ཡིན།ཁ་ག་ང་ཆ་ཇ་ཉ་ཐ། །ད་ན་ཚ་ཛ་བཅུ་གཅིག་ནི། །མ་ཡིས་འཕུལ་བར་བྱེད་པ་ཡིན། །ག་ཁ་ཆ་ང་ཐ་ད་ཕ། །བ་ཚ་ཛ་སྟེ་བཅུ་པོ་ནི། །འ་ཡིས་འཕུལ་བར་བྱེད་པ་ཡིན། །རྐྱང་པ་འཕུལ་བ་འ་ཡི་མཐའ། །དགོས་ཀྱི་གུག་སྐྱེད་ཅན་ལ་མིན། །དེ་ལྟར་རྐྱང་པ་འཕུལ་བ་ཡི། །ཡི་གེ་བཞི་བཅུ་ཞེ་བརྒྱད་ཡོད་དོ།། །།ད་ནི་བརྩེགས་པའི་འཕུལ་བ་བརྗོད། །གས་འཕུལ་བ་ལ་བརྩེགས་པ་མེད། །དས་འཕུལ་ཀྱ་ཀྲ་གྱ་གྲ་དང༌། །པྲ་པྱ་བྲ་བྱ་མྲ་མྱ་བཅུ། །བ་ཡིས་འཕུལ་བའི་ཡི་གེ་ལ། །ཀྱ་ཀྲ་ཀླ་གྱ་ཟླ་གླ་གྲ། །རྐ་རྒ་རྔ་རྗ་རྙ་རྟ་རྡ། །རྣ་རྩ་རྫ་རླ་ལྟ་ལྡ་སྐ། །སྒ་སྔ་སྙ་སྟ་སྡ་སྣ་སྩ། །སྲ་སླ་དེ་ལྟར་སུམ་ཅུ་དང༌། །རྐྱ་རྒྱ་སྐྱ་སྐྲ་སྒྱ་སྒྲ་དྲུག །སུམ་བརྩེགས་བས་འཕུལ་སུམ་ཅུ་དྲུག །མས་འཕུལ་ཁྱ་ཁྲ་གྱ་གྲ་བཞི། །འགྲོན་ཞེས་བྱ་བ་སྲིད་པ་ཙམ། །འས་འཕུལ་བ་ལ་ཁྱ་ཁྲ་གྱ། །གྲ་ཏྲ་ཕྲ་ཕྱ་བྱ་བྲ་དགུ། །དེ་ལྟར་བརྩེགས་འཕུལ་དྲུག་ཅུ་སྟེ། །འཕུལ་བའི་ཡི་གེ་བརྒྱ་རྩ་བརྒྱད། །བ་གླ་མ་དྲ་གཉིས་ན་དགོས་ཆུང་བས། །བརྒྱ་རྩ་དྲུག་ཡིན་མདོར་བསྡུ་ན། །ལུས་ཀྱི་ཡི་གེ་ཉིས་བརྒྱ་དང༌། །བརྒྱད་ཀྱིས་ལྷག་པར་རབ་ཏུ་ལྡན། །དེ་ལ་ཡན་ལག་བཞི་ལྡན་པས། །ཆིག་སྟོང་དང་ནི་བཞི་བཅུར་འགྱུར། །ག་ང་ད་ན་བ་ལ་ར། །ལ་ས་ཞེས་བྱའི་ཡི་གེ་དགུ། །མཐའ་རྟེན་ཀུན་ལ་རབ་འཇུག་པས། །དགུ་སྟོང་སུམ་བརྒྱ་དྲུག་ཅུར་འགྱུར། །ས་ནི་ག་ང་བ་མ་སྟེ། །བཞི་ལ་མཐའ་རྟེན་གཉིས་པར་འཇུག །དེ་ལ་ལྔ་སྟོང་ཉིས་བརྒྱ་ཡོད། །ན་ར་ལ་གསུམ་པོ་ལ་ཡང༌། །ད་དྲག་དེ་བཞིན་གསུམ་པར་འཇུག །དེ་ལ་གསུམ་སྟོང་བརྒྱ་ཉི་ཤུ། །དེ་དག་བསྣན་པས་ཆིག་ཁྲི་དང༌། །བདུན་སྟོང་དྲུག་བརྒྱ་བརྒྱད་ཅུར་འགྱུར། །དེ་ལ་མཐའ་རྟེན་མེད་པ་དང༌། །ཝ་བཏགས་བཅོ་ལྔ་ཨ་ཡིག་བདུན། །བགླ་བདྲོན་ཞེས་བྱ་བ་ལ་གསུམ། །སྐབས་ཀྱིས་འཇུག་པས་དེ་དག་བསྣན། །དེ་དག་བརྗོད་དུ་རུང་ཚད་ཀྱི། །ཡི་གེའི་གྲངས་ནི་མདོར་བསྡུ་ན།ཁྲི་ཁྲག་གཅིག་དང་སྟོང་ཕྲག་བརྒྱད། །བདུན་བརྒྱ་བཞི་བཅུ་ཞེ་ལྔ་ལྡན། །དེ་དག་ཐམས་ཅད་བོད་སྐད་ལ། །མི་དགོས་གང་དང་གང་དགོས་པ། །རང་གི་བློ་ཡིས་དཔྱད་ཅིང་སྦྱར།ཁོ་བོས་འདི་ལྟར་རྣམ་བསམས་ནས། །བོད་ཀྱི་སྐད་ལ་གང་དགོས་པ། །སྟོང་ཕྲག་བརྒྱད་ཀྱིས་འདུས་པར་བསམ། །སྔོན་གྱི་བྱང་ཆུབ་སེམས་དཔའ་ཡིས། །བོད་སྐད་ཡི་གེར་བསྡུས་པ་ལས། །ཡི་གེའི་བྱེ་བྲག་དབྱེ་བ་དང༌། །གྲངས་ཀྱི་དབྱེ་བསྡུ་དེ་ལྟར་བཤད། །ཡི་གེ་བྱེ་བྲག་དང་དབྱེ་བསྡུ་བསྟན་པ་སྟེ་ལེའུ་དང་པོའོ།། །།
གང་གིས་འབྱུང་གནས་མི་ཤེས་པས། །ལོག་པར་སྨྲ་བ་དུ་མ་མཐོང༌། །དེ་ཕྱིར་དག་པར་བརྗོད་ཤེས་ཕྱིར། །ཡི་གེའི་འབྱུང་གནས་བརྗོད་ཐབས་བཤད།ཁོག་པ་མགྲིན་པ་རྐན་དང་ལྕེ། །སྣ་དང་སྤྱི་བོ་སོ་དང་མཆུ། །སོ་སོ་འམ་ནི་འདུས་པ་ལས། །སྒྲ་རྣམས་ཐམས་ཅད་འབྱུང་བར་བཤད། །ཁོག་པ་མགྲིན་པ་ཐུན་མོང་གནས། །ལྷག་མ་སོ་སོར་ངེས་པ་སྟེ། །བོད་སྐད་གནས་རྣམས་ཐམས་ཅད་ལས། །འབྱུང་བའི་སྒྲ་ཡང་ཡོད་པ་ཡིན། །འ་ཧ་ཨ་ཡི་ཡི་གེ་གསུམ།ཁོག་པ་མགྲིན་པའི་གནས་ནས་འབྱུང༌། །ཀ་ཁ་ག་ངའི་ཡི་གེ་གསུམ། །རྐན་ཕུག་ལྕེ་རྩེའི་ཆ་ལས་འབྱུང་། །ཡ་ཞ་ཅ་ཆ་ཇ་ཉ་ཤ །བདུན་པོ་ལྕེ་དཀྱིལ་རྐན་དབུས་ལས། །ཏ་ཐ་ད་ན་ར་ལ་དྲུག །ལྕེ་རྩེ་རྐན་མཐའི་རྙིལ་ལས་འབྱུང༌། །ཙ་ཚ་ཛ་ཟ་ས་ལྔ་པོ། །ལྕེ་རྩེ་སོ་ལས་འབྱུང་བའོ། །པ་ཕ་བ་མ་ཝ་དང་ལྔ། །མཆུ་ལས་རབ་ཏུ་འབྱུང་བ་ཡིན། །ང་ཉ་ན་མའི་ཡི་གེ་བཞི། །རང་རང་གནས་དང་སྣ་ལས་འབྱུང༌། །ལྷག་མ་གནས་རིམ་ཅི་བཞིན་དུ། །ཅུང་ཟད་ཙམ་གྱིས་དྲག་ཅེས་བརྗོད། །ཨི་ནི་རྐན་ཕུག་ལྕེ་རྩེའི་ཟུར། །ཨུ་ནི་མཆུ་སྨད་ཨེ་རྐན་ཕུག །ཨོ་ནི་མཆུ་སྟོད་སོ་ལས་འབྱུང༌། །ཡན་ལག་རྣམས་ཀྱང་དེ་ལྟར་འབྱུང༌། །དྲག་ལ་སྤྱི་བོའི་ཆ་ཅུང་ཟད། །ཡོད་ཅེས་སྔོན་གྱི་མཁས་རྣམས་སྨྲ། །དེ་ལྟར་ཡི་གེའི་གནས་ཤེས་ནས། །རང་རང་གནས་ནས་ཕྱུང་སྟེ་བརྗོད། །ཡི་གེའི་མདོ་ཞེས་བྱ་བ་ལས། །འདི་དང་འབྱུང་གནས་མི་འདྲ་ཡོད། །དེ་ནོར་འདི་བདེན་གང་ཡིན་པ། །རང་གི་ཁ་ལྕེ་ཡིད་ལ་དྲིས། །དེ་བཞིན་བོད་ཀྱི་ཡི་གེ་ཡི། །བཀླག་ཐབས་ནོར་བ་དུ་མ་བྱས། །ཀ་ཁ་ཕ་མ་ཀུན་གྱིས་ཤེས། །གང་ཡིན་རང་གི་བློ་ཡིས་དཔྱོད། །དེ་ལྟར་འབྱུང་གནས་ཤེས་བྱས་ནས། །ད་ནི་སྒྲ་ཡི་འབྱིན་ཐབས་བརྗོད། །དེ་ཡང་ཡི་གེའི་གོ་རིམ་བཞིན། །བསླབས་ན་དག་པར་འགྱུར་བ་ཡིན། །དང་པོར་ཀ་ཁ་སུམ་ཅུ་བསླབ། །འབྱུང་གནས་བློ་ལ་ཞེན་པར་བྱ། །དེ་ནས་དེ་ལ་གུག་སྐྱེད་ནི། །བཏགས་ཏེ་ཨི་ལ་གུ་གུ་བརྗོད། །ཨུ་ལ་ཞབས་ཀྱུ་ཨེ་འགྲེང་བུ། །ཨོ་ལ་ན་རོ་བརྗོད་ཅིང་སྦྱར། །དེ་བཞིན་འབྱུང་གནས་ཤེས་པ་ཡིས། །ཁ་ལྕེའི་འགྲོ་ཚུལ་ཡིད་ལ་འཆགས། །དེ་ནས་བརྩེགས་པའི་ཡི་གེ་བསླབ། །བཏགས་པའི་བརྡར་ནི་སྟེ་ཞེས་བྱ། །གང་དང་གང་ལ་གང་བཏགས་པ། །གོ་རིམ་བཞིན་དུ་གནས་ནས་འབྱུང༌། །དེ་ལ་ར་མགོ་ལྕེ་རྩེ་འདར། །ལ་མགོ་ལྕེ་ཀློད་རྒྱ་ཡང་བསྐྱེད། །ས་མགོ་སོ་ཡི་བར་ནས་འབྱུང༌། །ལྷག་མ་རྣམས་ཀྱང་དེ་བཞིན་ཤེས། །གལ་ཏེ་མི་ཕྱིན་གྱུར་པ་ནི། །ཡི་གེ་ཕྲལ་ཞིང་བརྗོད་པར་བྱ། །དཔེར་ན་གྲ་ལ་ག་རའམ། །སྒྲ་ལ་སྒ་ར་ཇི་བཞིན་དུ། །དེ་ནས་འཕུལ་བ་བསླབ་པར་བྱ། །འས་འཕུལ་ཐོག་མར་རྐན་ནས་དབྱུང༌། །དས་འཕུལ་ལྕེ་རྩེ་ཀློད་པ་ལས། །བ་མས་ཕུལ་ལ་ཐོག་མར་ནི། །མཆུ་བཙུམས་པ་ལ་ཁྱད་པར་སྣ། །འས་འཕུལ་གྲེ་བའི་ཕུག་ནས་དབྱུང༌། །འཕུལ་ཤིང་བརྩེགས་པའི་ཡི་གེ་ཡང༌། །གོ་རིམ་བཞིན་དབྱུང་མ་ཕྱིན་ན། །འདི་ཡང་ཕྲལ་ཞིང་བཀླག་པ་སྟེ། །མཁྲ་ལ་མཁའ་ར་ཇི་བཞིན་ནོ། །སྦྱོར་དང་ཕྲལ་ཞིང་ནན་ཏན་བསྐྱེད། །དེ་ཡི་ཕྱི་ནས་ཤིན་ཏུ་སླ། །དེ་ནས་དེ་དག་རྣམས་ལ་ཡང༌། །གུག་སྐྱེད་བཞི་པོ་སྦྱར་ཞིང་བཀླག །བརྩེགས་སམ་འཕུལ་ལམ་འཕུལ་ཞིང་བརྩེགས། །ཚེག་བར་གཅིག་ན་ཡི་གེའི་གྲངས། །དུ་ཡོད་དེ་དག་ཐམས་ཅད་ཀྱིས། །གུག་སྐྱེས་མཉམ་པོར་ཐོབ་པ་ཡིན། །དཔེར་ན་སྒྲུ་ལ་སྒུ་རུའམ། །སྦྲེ་ལ་སྦེ་རེ་ཇི་བཞིན་ནོ། །དེ་ལྟར་མ་ཤེས་ཐམས་ཅད་ལ། །གུག་སྐྱེད་བཅས་པ་ཕྲལ་ཞིང་སྦྱར། །དེ་དག་ལྕེ་ཡི་ཟུར་ཕྱིན་ནས། །དེ་ནས་དེ་ལ་མཐའ་བརྟེན་བསླབ། །མཐའ་བརྟེན་གྱིས་ནི་ཡི་གེ་ལ། །བཞག་ཅེས་བྱ་བ་བརྗོད་པར་བྱ། །ཡང་ན་ལུས་དང་མཐའ་བརྟེན་གྱིས། །བར་དུ་ལ་ཞེས་བྱ་བ་གཞུག །སྦྱོར་ཞིང་ཀློག་པའི་དུས་ན་ནི། །མཐའ་བརྟེན་ཟུར་ཕྱིན་རབ་ཏུ་བསླབས། །དེ་བས་སྦྱོར་བའི་དུས་ཀྱི་ཚེ། །ལུས་ཀྱི་ཡི་གེ་ཟུར་མི་ཕྱིན། །དེ་ཕྱིར་དེ་ལ་ཕན་བྱའི་ཕྱིར།།ནོར་པ་དེ་ཡི་འཕྲང་བཤད་བྱ། །དེ་ལ་རང་གི་ཡུལ་གྱི་སྐད། །མ་དག་པ་ཡི་ནོར་བ་མཐོང་། །དབུས་པས་ར་ཡི་མགོ་ཅན་དང༌། །རྐྱང་པར་འདྲ་ཞིང་ཡ་སྟ་དང༌། །ར་སྟ་ཡང་ནི་ནོར་བ་ཡོད། །གཙང་པས་མས་འཕུལ་འས་འཕུལ་དུ། །ནོར་ཅིང་ར་ཡི་མགོ་ཅན་དང༌། །གས་འཕུལ་དས་འཕུལ་ནོར་བ་ཡོད། །རྐན་ཕུག་དང་ནི་ལྕེ་རྩེ་ཡ། །ཡི་གེ་སྦྱར་བ་བཀླག་པར་དཀའ། །དེ་བས་ཡུལ་རྣམས་ཕལ་ཆེར་དུ། །དེ་ནི་ནོར་བ་དག་ཏུ་བརྗོད། །མདོར་ན་སྒྲ་ཡི་འབྱུང་གནས་ལས། །འགལ་འདུའི་ཡི་གེ་བཀླག་པར་དཀའ། །གནས་གཅིག་ནས་ནི་འབྱུང་མོད་ཀྱང༌། །དྲག་ཞན་འགལ་བར་ནོར་བ་ཡོད། །དབུས་གཙང་གཉིས་ཀའི་ཡུལ་མཐིལ་གྱི། །ཐ་མལ་པ་ཡི་སྐད་རྣམས་ལ། །མཐའ་བརྟེན་རྫོགས་པ་རབ་ཏུ་ཉུང༌། །དེ་བས་བསྡུ་ཚེ་མཐའ་བརྟེན་གཟབ། །ད་ནི་རབ་ཏུ་བཤད་པར་བྱ། །བོད་ཀྱི་སྐད་ལ་མི་དགོས་ཀྱང༌། །ནོར་བའི་འཕྲད་ཉིད་བསྟན་པའི་ཕྱིར། །འདོགས་འབྲེལ་མེད་པ་འགའ་ཡང་བརྗོད། །ཀེ་ཀྱེ་ཁེ་ཁྱེ་གེ་གྱེ་དང༌། །ངེ་ཉེ་ཀི་ཀྱི་ཁི་ཁྱི་དང༌། །གི་གྱི་ངི་ཉི་དགེ་དགྱེ་ནོར། །གུག་འགྲེང་ཡ་དང་གནས་གཅིག་ཕྱིར། །ཀྲ་ཏྲ་ཁྲ་ཐྲ་གྲ་དྲ་དྲུག །ཀྲི་ཏྲི་ཁྲི་ཐྲི་དྲི་ལ་སོགས། །གུག་སྐྱེད་བཞི་ཀ་སྦྱར་བ་ཡང༌། །དེ་དག་ཕན་ཚུན་ནོར་བར་འགྱུར། །དེ་བཞིན་བསྐྲ་བསྟྲ་བསྲ་སྤྲ་དང༌། །བསྒྲ་བསྦྲ་བསྟྲ་བབཀྲ་བཏྲ་བགྱ། །འགྲ་འདྲ་འགྱ་མགྱ་འབྲ་དགྲ་དྷྲ། །འཁྲ་འཐྲ་འཕྱ་མཁྱ་འཕྲ་མཐྲ་དང༌། །སྐྲ་སྟྲ་སྲ་སྒྲ་པྲ། །དེ་ལྟར་དེ་དག་ཐམས་ཅད་ལ། །གུག་སྐྱེད་བཞི་དང་མཐའ་བརྟེན་དགུ༑ ༑སྦྱར་བ་བཀླག་པ་རབ་ཏུ་དཀའ། །པྱ་དབྱ་སྦྱ་བཤའ་བཅའ་དང་ནི། །གུག་སྐྱེད་མཐའ་བརྟེན་བཅས་པ་དཀའ། །ཀྐ་སྐ་རྐ་དཀའ་གྒ་སྒ་རྒ་དགའ། །དྡ་སྔ་རྔ་དངའ་དཉའ་གཉའ་སྙ་རྙ། །ཏྟ་སྟ་རྟ་གཏའ་རྡ་སྡ་གདའ། །ནྣ་སྣ་རྣ་གནའ་མྨ་སྨ་རྨ་དམའ། །ཙྩ་རྩ་གཙའ་བཙའ་ཀྱ་དཀྱ་རྐྱ། །མཉའ་དམྱ་རྨྱ་བརྙ།བསྙ་སྨྱ་རྨྱ།རྒྱ་དགྱ༑བཀྱ་བརྐྱ་བསྐྱ་བསྒྱ་བགྱ་བཀའ་བརྐ་བསྐ། །མངའ་རྔ་སྔ་རྣམས་ནོར་བར་འགྱུར། །གཙང་པས་དས་འཕུལ་ར་མགོ་རྣམས་སུ་ནོར། །དབུས་པས་འཕུལ་དང་ར་ས་རྐྱང་པ་ནི། །ནོར་གྱུར་གུག་སྐྱེད་མཐའ་བརྟེན་བཅས་དང་འདྲ། །དེ་བས་གུག་སྐྱེད་མཐའ་བརྟེན་བཅས་པ་བསླབས། །ཀླ་གླ་རླ་སླ་ལླ་བླ་བརླ། །འདི་ལ་གུག་སྐྱེད་མཐའ་རྟེན་བསླབ། །མི་ཉི་མྱི་མྱ་ཉ་ནྱ་དྲུག །སླ་སྟེ་ནོར་མེད་དེ་བས་བསླབ། །མཁའ་འཁའ་མགའ་འགའ་མངའ་དངའ་འདིར། །མདའ་འདའ་ལ་སོགས་འས་འཕུལ་དང༌། །མས་འཕུལ་བ་ནི་ནོར་མི་བྱ། །འཕྱ་འཆའ་འབྱ་འཇ་སྨྲ་དམྲ་སོགས། །འདི་དག་ཀུན་ལའང་གུག་སྐྱེད་དང༌། །མཐའ་བརྟེན་སྦྱར་ཞིང་ལེགས་པར་བསླབ། །དེ་བཞིན་ཡི་གེ་བཀླག་དཀའ་བ། །རང་རང་བློ་གྲོས་དག་གིས་སྦྱར། །དེ་ལྟར་སྦྱོར་ཀློག་སློབ་པའི་ཚེ། །ནན་ཏན་བསྐྱེད་ན་ཕྱི་ནས་སླ། །སྦྱོར་ཀློག་ལྷག་ཆད་མེད་གྱུར་ན། །ཚིག་གི་བར་དུ་རྐྱང་སྡུད་བྱ། །དེ་ཚེ་སྒྲ་ལ་རབ་ཏུ་འབད། །ཤིན་ཏུ་དལ་བ་ཡིད་ལ་བཞག །ཚིག་སྡུད་འོག་མར་འདྲེས་དགོས་ཏེ། །དཔེར་ན་དགྲ་བཅོམ་སྒྲ་བཅོམ་བཞིན། །དེ་ལྟར་བཀླག་ན་འབྱོངས་པའི་ཚེ། །དེ་ལ་ངེས་པ་མང་དུ་སྐྱེ། །ཚིག་སྡུད་ནོར་བ་མེད་གྱུར་ཅིང༌། །ཤིན་ཏུ་མྱུར་བ་གྱུར་པའི་ཚེ། །མིང་གི་མཚམས་སུ་བསྡུ་བར་བྱ། །ཕྲད་ཀྱི་ཚིག་རྣམས་རྐྱང་པར་བཀླག།དེ་ལྟར་རབ་ཏུ་ཤེས་གྱུར་ནས། །ཕྲད་ཚིག་སྔ་མའི་ཁོངས་སུ་བསྡུ། །དེ་ལྟར་གཉིས་སྡུད་གསུམ་སྡུད་ཚེ། །མཐའ་བརྟེན་ཚིག་རྣམས་རྫོགས་པར་བརྗོད། །གལ་ཏེ་མཐའ་བརྟེན་མ་གཟབ་ན། །དེ་ཡི་ཟུར་རྣམས་ཆག་པར་འགྱུར། །དེ་བས་མཐའ་བརྟེན་དཀའ་བ་ཡི། །ཚིག་རྣམས་ཀྱང་ནི་སྦྱར་བར་བྱ། །སངས་རྒྱས་བཅོམ་ལྡན་འདས་ཞེས་དང༌། །དེ་བཞིན་གཤེགས་པ་དགྲ་བཅོམ་དང༌། །ཡང་དག་རྫོགས་པའི་སངས་རྒྱས་དང༌། །སློབ་དཔོན་བྱང་ཆུབ་སེམས་དཔའ་སོགས།།བརྗོད་པ་རབ་ཏུ་དཀའ་བ་ཡིན། །མིང་མཐར་ཝ་སྒྲ་དབྱུང་དཀའ་སྟེ། །ར་ལ་ང་མཐར་དེ་ནོར་ཞིང༌། །གཞན་དག་ལ་ནི་ར་ནོར་འགྱུར། །ང་པ་ག་ད་ལ་སོགས་པའི། །གོང་འོག་ཚིག་འཕྲོ་འགལ་འདུ་དང༌། །བྱིན་ནོ་འགྱུར་རོ་བྱེད་དོ་དང༌། །འགལ་ལོ་བསམ་མོ་ལ་སོགས་པ། །བསྟབས་པའི་ཟུར་ཡང་འབྱུང་དཀའ་བས། །དེ་ཕྱིར་ལྕེ་ལ་གང་མི་བདེ། །དབྱུང་བར་དཀའ་བའི་ཚིག་རྣམས་ཀྱི། །ཟུར་རྣམས་རབ་ཏུ་དབྱུང་བར་བྱ། །དེ་ལྟར་གཉིས་གསུམ་སྡུད་པ་ལས། །སྒྲ་ཟུར་ཕྱིན་པ་མ་ནོར་ཚེ། །སྐད་དང་རྗེས་སུ་མཐུན་པ་ཡི། །ཀློག་གི་སྐད་ལ་བསྐྱོན་ཏེ་བཀླག །ཚིགས་བཅད་རྣམས་ལ་བཅད་ཅིང་བཀླག །ལྷུག་པ་རྣམས་ལ་བསྲིང་བར་བྱ། །དེ་ཚེ་ཤིན་ཏུ་མགྱོགས་གྱུར་པས། །ཤིན་ཏུ་ཐེག་པ་གལ་ཡང་ཆེ། །ཀློག་སྐད་སློབ་པ་ཐོག་མའི་ཚེ། །བཀླག་པ་སླ་ལ་བསླབ་པར་བྱ། །དེ་ནས་དལ་བར་བྱ་བ་དང༌། །དབུགས་ཐག་བསྲིང་བ་ཉིད་ལ་བསླབ། །ཟུར་ཕྱིན་མ་ནོར་ལྷག་ཆད་མེད། །སྒྲ་སྐད་མཉམ་ལ་ཐོགས་རྡུགས་མེད། །དལ་ཞིག་མགྲིན་པ་རབ་ཏུ་སྙན། །ཀློག་མཐར་ཕྱིན་པའི་ཚད་ཡིན་ནོ། །ངག་གིས་དེ་ལྟར་མ་ཤེས་ན། །ཡིད་ཀྱིས་ཤེས་པས་ཅི་ཞིག་ཕན། །ཟས་ཉིད་ཁ་ཡིས་མ་ཟོས་ན། །ཐོས་པས་འགྲངས་ལ་མི་ཕན་ཞིང་༑ ༑དེ་ཕྱིར་དང་པོ་ལེགས་པར་བསླབ། །མ་དག་པ་ཞིག་སྔར་ཤེས་ནས། །སྦྱོར་བ་འམ་ནི་རྐྱང་ཀློག་ཏུ། །བཤིག་ནས་བསླབས་ན་མཁས་པར་འགྱུར། །ཡི་གེའི་འབྱུང་གནས་དང༌།འབྱིན་ཐབས་དང༌།ཀླག་ཐབས་བསྟན་པའི་ལེའུ་སྟེ་གཉིས་པའོ།། །།
དེ་ནས་སྔགས་དང་རྒྱ་སྐད་ཀྱི། །ཡི་གེའི་བཀླག་ཐབས་བརྗོད་པར་བྱ། །འདིར་བརྗོད་རྣམས་ལ་ངག་བྱང་ན། །ཡི་གེ་ཀུན་ལ་ཐོགས་མེད་འགྱུར། །གང་གིས་བཀླག་ཐབས་མི་ཤེས་པ། །རིགས་སྔགས་ལོག་པར་བཟླས་གྱུར་ན།།དད་མེད་རྣམས་ལ་དོན་མེད་འགྱུར། །དད་པ་ཡོད་ཀྱང་དངོས་གྲུབ་རིང༌། །དེ་ལ་བཀླག་ཐབས་མདོར་བསྡུ་ན། །ཨཱ་ལི་ཀཱ་ལི་གུག་སྐྱེད་བཅས། །དེ་རྣམས་སློབ་དཔོན་ངག་བཞིན་དུ།ཁ་མི་འདྲིས་པར་ཡུན་རིང་བསླབ། །བཀླག་ཐབས་རིམ་བཞིན་མི་སློབ་པར། །སྔགས་འབྲུ་རྣམས་ལ་འདི་ཅི་ཞེས། །ཟེར་བའི་རྒྱུ་མེད་འབྲས་འདོད་པའི། །རྨོངས་རྣམས་ཡུན་རིང་དོན་འགྱུར། །དེས་ན་བོད་ཀྱི་ཡི་གེ་ཡི། །སྒྲ་འབྱིན་ཐབས་གཞན་སྔར་བཤད་རྣམས། །ཤེས་ན་རྒྱ་སྐད་ཡི་གེ་ཡང༌།།ཕལ་ཆེར་མཐུན་པས་དག་པར་འགྱུར།། །།ད་ནི་རྒྱས་པར་བཤད་པར་བྱ། །ཐོག་མར་དབྱངས་ཡིག་བཅུ་དྲུག་ལ། །ཨ་ནི་དྲང་པོ་ཨི་བཀུག་པ། །ཨུ་ནི་སྨད་པ་ཞེས་བྱ་སྟེ། །དེ་དག་རིང་ཐུང་གཉིས་གཉིས་ཡོད། །རྀ་རཱྀ་ལྀ་ལཱྀ་ཞེས་བྱ་ཡི། །མ་ནིང་གི་ནི་ཡི་གེ་བཞི། །བསྒྲིམ་དང་ཀློད་པའི་ང་རོ་སྟེ། །དེ་དག་རིང་ཐུང་གཉིས་གཉིས་ཡོད། །ཨེ་ནི་བསྒྲེང་པའི་ང་རོ་སྟེ༑ ༑ཨཻ་བསྒྲེང་ཞིང་བཀུག་པ་ཡིན། །ཨོ་ནི་བསྟོད་པ་ཞེས་བྱ་སྟེ། །ཨཽ་ནི་བསྟོད་དེ་སྨད་པ་ཡིན། །ཨྃ་ནི་སྣ་ལྡན་ཞེས་བྱ་སྟེ། །ཨ༔ནི་རྣམ་པར་བཅད་པའོ། །ང་རོ་དྲང་པོ་ལས་བྱུང་བ། །ཀ་ནས་བརྩམས་ཏེ་ཀྵཿཡི་མཐར། །གསལ་བྱེད་ཡི་གེ་སུམ་ཅུ་བཞི། །ཀ་ཙ་ཊ་ཏ་པ་སྟེ་ལྔ། །ཡི་གེ་ལྔ་ལྔ་ལྡན་པ་ཡིན། །ཡ་སྡེ་མཐར་གནས་ཡི་གེ་སྟེ། །ཤ་སྡེ་དྲོ་བའི་སྡེ་ཞེས་བརྗོད། །ཀྵ་ནི་མཐར་ཟད་ཅེས་བྱའོ། །དེ་ལ་ཡ་ནི་ཀ་ཙའི་མཐའ། །ར་ནི་ཊ་མཐའ་ལ་ཏའི་མཐར། །ཝ་ནི་ས་སྡེའི་མཐར་གནས་ཏེ། །དེ་ལྟར་དེ་དག་སྔ་མ་དང༌། །འབྱུང་གནས་མཐུན་ཕྱིར་མཐར་གནས་ཡིན། །དབུགས་དྲོའི་ཕྱིར་ན་དྲོ་སྡེའོ། །ཀ་སོགས་གསལ་བྱེད་ཐམས་ཅད་ལ། །མ་ནིང་བཞི་པོ་མ་གཏོགས་པའི། །དབྱངས་ཀྱི་ཡི་གེ་བཅུ་གཉིས་སོ། །གུག་སྐྱེད་དུ་ནི་རབ་ཏུ་སྦྱར། །དེ་ལྟར་ཡི་གེ་མདོར་བསྡུ་ན། །བཞི་བརྒྱ་ལྔ་བཅུ་ང་བརྒྱད་ཡོད། །ཡི་གེ་དེ་རུ་མ་འདུས་པ། །སྒྲ་ཡི་བསྟན་བཅོས་ལས་བྱུང་བ། །ྈྐ་ཞེས་བྱ་བ་ལྕེ་རྩ་ཅན༑ ༑ྉྤ་ཞེས་བྱ་བ་མཆུ་ཅན་ནོ། །ཡི་གེ་དེ་རྣམས་ཟུར་ཕྱིན་ན། །རྒྱ་སྐད་ཐམས་ཅད་ཤེས་པར་འགྱུར།། །།ད་ནི་སྒྲ་ཡི་འབྱིན་ཐབས་བརྗོད། །སྐད་ནི་རྒྱ་སྐད་ཡིན་མོད་ཀྱང༌། །བོད་ཀྱི་སྐད་དང་རྗེས་མཐུན་པར། །བརྗོད་པར་སླ་བ་རབ་ཏུ་བྲི། །རིགས་ནི་སྤྱོད་པས་སྟོན་པར་བྱེད།ཁ་ཟས་ལུས་ཀྱིས་སྟོན་པར་བྱེད། །བརྩེ་བ་ཏབ་ཏབ་བྱེད་པས་སྟོན། །ཡུལ་ནི་སྐད་ཀྱིས་སྟོན་པར་བྱེད། །དེ་སྐད་ཟེར་བའི་ཚིག་བདེན་པས། །སྐད་གདངས་ཡུལ་གྱི་སྐད་ཀྱིས་འབྱུང༌། །གལ་ཏེ་སྐད་གདངས་བཅོས་པ་ན། །རྣར་མི་སྙན་ཅིང་བརྗོད་ནོར་འགྱུར། །རྒྱ་སྐད་ཕལ་ཆེར་ལྕེ་རྩེ་ལས། །འབྱུང་ཞིང་བརྗོད་པ་རབ་ཏུ་མྱུར། །སྐད་གདངས་མགྲིན་པ་ཕྲ་ཞིང་སྙན། །བོད་སྐད་ཕལ་ཆེར་ལྕེ་དབུས་ལས། །འབྱུང་ཞིང་བརྗོད་པ་དལ་བ་ཡིན། །མགྲིན་པ་སྦོམ་འགྱུར་ཁ་ཆེ་དང༌། །ཨུརྻན་ཡུལ་ཡང་དེ་དང་འདྲ། །འོན་ཀྱང་དེ་གཉིས་རྒྱ་སྐད་ཀྱི། །ལུགས་སུ་དེ་དག་ལེགས་པར་སྨྲ། །བོད་ལ་ཁྱད་པར་སྐད་ཐུང་ཞིང༌། །རིང་ཐུང་ཁྱད་པར་འགའ་ཡང་མེད། །དེ་ཕྱིར་བོད་ཀྱི་རྒྱ་གར་སྐད། །ལེགས་ལོབས་ཁ་ཆེའི་སྐད་འདྲ་འབྱུང༌། །དེ་བས་སྐད་གདངས་མ་བཅོས་པར། །རིང་ཐུང་ཁྱད་བརྗོད་བསླབ་ལ་འབད། །དེ་ལ་འ་མེད་ཐུང་བ་མང༌། །ཐུང་དང་དྲག་པོར་ནོར་མི་བྱ། །དབྱངས་ཀྱི་ཡི་གེ་རྣམ་དྲུག་ལ། །འ་བཏགས་རྣམས་ནི་རིང་པར་ཀློག །རྀ་རཱྀ་ལྀ་ལཱྀ་མ་ནིང་བཞི། །ཨི་རི་ཨི་ལི་ལྟ་བུར་བརྗོད། །དེ་ཡང་འ་བཏགས་རིང་བར་བསླབ།ཁ་ཆེ་ཨི་ཨེ་ལུགས་གར་སྨྲ། །ཨེ་ཨཽ་བསྒྲེངས་དང་བསྟོད་པ་གཉིས། །འ་མེད་ཀྱང་ནི་རིང་བར་བཀླག །ཨཻ་ཨེ་འིར་བཀླག་པ་སྟེ། །བསྒྲེང་ཞིང་བཀུག་པ་ཡིན་ཕྱིར་རོ། །ཨཽ་ཨོའུ་གང་དུ་བྲིས་ཀྱང་རུང༌། །ཨོ་འུར་བརྗོད་པ་བསྟོད་སྨད་ཕྱིར། །སྣ་ལྡན་རྣམ་པར་བཅད་པ་སྤངས། །རིང་བའི་སྒྲར་ནི་བརྗོད་པར་བྱ། །དེ་ལྟར་དབྱངས་ཡིག་བཅུ་དྲུག་གི །རིང་ཐུང་ཁྱད་པར་ལེགས་ཤེས་ནས། །གསལ་བྱེད་སུམ་ཅུ་རྩ་བཞི་ཡི། །བརྗོད་པ་བསླབ་ཅིང་མིག་འདྲིས་བྱ། །དེ་ལ་ཕལ་ཆེར་བོད་དང་མཐུན། །འོན་ཀྱང་བོད་ལ་ཡི་གེ་གང༌། །མེད་དང་ཡི་གེ་ཡོད་གྱུར་དང༌། །བརྗོད་པ་མི་འདྲ་འདིར་བཤད་བྱ། །ཊ་ཋ་ཌ་ཌྷ་ཎ་ཥ་དྲུག །གྷ་ཛྷ་དྷ་བྷ་ཀྵཿསྟེ་ལྔ། །དེ་ལྟར་ཡི་གེ་བཅུ་གཅིག་པོ། །བོད་ལ་གཏན་ནས་མེད་པ་ཡིན། །རྒྱ་གར་སྐད་ལའང་དེ་དག་ལ། །ཡི་གེ་ལོག་དང་ཧ་བཏགས་མེད། །འོན་ཀྱང་བོད་ཀྱིས་བརྗོད་ཤེས་ཕྱིར། །སྔོན་གྱི་བྱང་ཆུབ་སེམས་དཔས་མཛད། །དེ་ལ་ཏ་ཐ་ད་ན་ཤ །ལྕེ་སྣེ་ལས་བྱུང་དེ་དག་ལས། །ལྕེ་རྩེ་བཟློག་སྟེ་བརྗོད་པ་ཡིན། །ཊ་ཋ་ཌ་ཌྷ་ཎ་ཥ་རྣམས། །འབྱུང་བས་དེ་རྣམས་བཟློག་པར་བྲི། །གྷ་སོགས་ཧ་བཏགས་ཡི་གེ་ལྔ། །ག་ཛ་ཌ་ད་བ་ལྔ་ལ། །ཧ་སྒྲ་ཅུང་ཟད་འབྱུང་བ་ལ། །དགོངས་ཏེ་ཧ་བཏགས་ཡི་གེ་མཛད། །འོན་ཀྱང་བོད་ཀྱི་ཡི་གེ་ཡི། །ལུགས་བྲིས་བརྗོད་པའི་ཐབས་གཞན་བྲིས༑ ༑གྷ་ལ་འཁའ་འདྲ་ཛྷ་འཚའ་འདྲ། །ཌྷ་ནི་འཐྲ་འདྲ་དྷ་མཐའ་འདྲ། །བྷ་ནི་འཕའ་དང་འདྲ་བར་བཀླག །ཧ་སྒྲའང་མི་གསལ་ཅུང་ཟད་འབྱུང༌། །ཀྵ་ནི་ཀ་ཥ་ཡིན་མོད་ཀྱི། །མི་ཤེས་རྣམས་ཀྱི་ཁྱ་འདྲར་བཀླག །ག་ཛ་ཌ་ད་བ་ལྔ་ལ། །མིང་གི་དང་པོའམ་རྐྱང་པར་འབྱུང༌། །གྷ་འཛའ་དྷ་འདའ་འབའ་ལྟར་བཀླག །མིང་མཐར་བྱུང་ན་བོད་འདྲ་ཉིད། །ཤ་ཥ་ས་ཡི་ཡི་གེ་གསུམ། །སྐབས་ཀྱིས་ལྕེ་ལ་གང་བདེར་བཀླག །དེ་ལྟར་གསལ་བྱེད་ཡི་གེ་ལ། །བརྗོད་པའི་ཁྱད་པར་ཅུང་ཟད་ཙམ། །དེ་ནས་དེ་ལས་དབྱངས་བཅུ་གཉིས། །སྦྱང་ཞིང་གུག་སྐྱེད་རིང་ཐུང་གིཁྱད་པར་བསླབ་ལ་ནན་ཏན་ཏུ། །བྱས་ནས་ཨུརྻན་སྐད་འདྲ་འབྱུང༌། །དེ་ལ་སྣ་ལྡན་ཀླད་ཀོར་རྣམས། །མི་འདྲ་བ་ཡི་ཁྱད་ཡོད་དེ། །ཀ་ཚན་གྱི་ནི་ཀླད་ཀོར་ང༌། །ཙ་ཚན་ཉ་ཡིན་ཊ་ཚན་ཎ། །ཏ་ཚན་ན་ཡིན་དེ་གསུམ་ཀ །བོད་ཀྱི་ནར་བརྗོད་པ་ཚན་མ། །མཐར་གནས་བཞི་དང་དྲོ་བ་བཞི། །རིམ་བཞིན་ང་ཉ་ན་མར་བཀླག །ཨ་དང་ཀྵཿཡི་ཀླད་ཀོར་རྣམས། །ངར་བཀླག་པ་ནི་མཆོག་ཡིན་ནོ། །དེ་ལྟར་ཀླད་ཀོར་ཐམས་ཅད་ཀྱང༌། །མིང་གི་འཕྲོ་ལ་གང་བྱུང་དང༌། །རང་གི་ཡི་གེར་མི་བརྗོད་དོ།།ཐ་མའི་ཡི་གེའི་དབང་དུ་བཀླག །བརྩེགས་པ་རྣམས་ཀྱང་དེ་འདྲ་སྟེ། །དེ་ལྟར་བརྗོད་ན་རབ་ཏུ་མཛེས།། །།ད་ནི་བརྩེགས་པའི་ཡི་གེ་བརྗོད། །རྒྱ་གར་ལུགས་ལ་གསལ་བྱེད་ཀྱི། །ཡི་གེ་ཐམས་ཅད་བརྩེགས་ཡོད་པས། །ཆིག་སྟོང་ཆིག་བརྒྱ་ལྔ་བཅུ་དྲུག །དེ་ལ་གུག་སྐྱེད་བཅུ་གཉིས་ཀྱིས། །ཆིག་ཁྲི་སུམ་སྟོང་བརྒྱད་བརྒྱ་དང༌། །བདུན་ཅུ་རྩ་གཉིས་རབ་ཏུ་ལྡན། །དེ་སྟེང་སྔར་གྱིས་མནན་པ་ཡོད། །དེ་ལྟར་ཡི་གེ་མང་ཡོད་ཀྱང༌། །རྒྱ་ལུགས་བཀླག་བསླབ་ཅི་ཕྱིར་ན། །བརྩེགས་པའི་སྟེང་མ་གང་དུ་སྦྱོར། །དཔེར་ན་ཏིཥྛི་ཏིས་ཐྲ་བཞིན། །གལ་ཏེ་གོང་དུ་མི་སྦྱར་བར། །སྔར་བསྟན་འབྱུང་གནས་ཤེས་གྱུར་པས། །ཕྲལ་ཞིང་གནས་ནས་རིམ་བཞིན་དབྱུང༌། །དེས་ན་མི་ཤེས་འགའ་ཡང་མེད། །གུག་སྐྱེད་ཅན་ནི་བྱུང་གྱུར་ནའང༌། །ཕྲལ་ཏེ་གུག་སྐྱེད་ཀུན་ལ་སྦྱར། །དཔེར་ན་ཏྱུ་ལ་ཏ་ཡུའམ། །ཐྱ་ལ་ཤི་ཐི་ཇི་བཞིན་ནོ། །གལ་ཏེ་ཕྲལ་ཏེ་ཀློག་པ་ན། །ཅི་ཕྱིར་ཕྲལ་ནས་མི་འབྲི་ཞེས། །རྒོལ་ན་བོད་སྐད་ཀྱང་མཚུངས་ཞེས། །དེ་གཉིས་ཁྱད་པར་མེད་པར་བསྒྲེ། །མྱུར་དུ་བརྗོད་ཕྱིར་ཡིག་ཉུང་ཕྱིར། །སྒྲ་གནས་བསྡུས་ཕྱིར་འདིར་བརྩེགས་ན། །དེས་ན་འདི་ཡང་དེ་དང་འདྲ། །དེ་ཕྱིར་ཕྲལ་ཞིང་མྱུར་བར་བཀླག །དེས་ན་རྒྱ་གར་སྒྲ་གནས་ཀུན། །བསྡུས་པས་ཨ་ལས་ཨ་བྱུང་ཞིང༌། །ཨེ་ལས་ཨི་བྱུང་ཨོ་ལས་ཨུ། །དེ་ལྟར་འབྱུང་གནས་བསྡུས་པ་ཡོད། །གསང་སྔགས་ཀྱི་ནི་རྒྱུད་རྣམས་ལ། །ཡི་གེ་མང་པོ་བརྩེགས་པ་ཡོད། །དེ་ནི་ས་བོན་ཡིན་པའི་ཕྱིར། །དུས་གཅིག་མི་བརྗོད་ཕྲལ་ཏེ་བཀླག། །།
ད་ནི་བླུན་པོའི་མི་རྣམས་ལ། །བསྟན་ཕྱིར་བོད་ལ་མེད་པ་ཡི། །ཡིག་འབྲུ་བརྩེགས་པ་བཀླག་པའི་ཐབས། །བོད་ཀྱི་ལུགས་ཀྱིས་འགའ་ཞིག་བརྗོད། །ཙ་ཚ་ཛ་ལ་ཡ་སྟ་བཏགས། །བོད་ཀྱི་ཅ་ཆ་ཇ་བཞིན་བཀླག །གུག་སྐྱེད་ཅན་ཡང་དེ་བཞིན་ཏེ། །དཔེར་ན་ཙྱ་ལ་ཙེ་ཡ་བཞིན། །ཏ་ཐ་ད་སོགས་ཡ་སྟ་འབྱུང༌། །ཨེ་སྒྲ་ལྡན་པས་ཕྲལ་ཞིང་བཀླག །དཔེར་ན་ཏྱ་ལ་ཏེ་ཡ་འམ། །ཐྱ་ལ་ཐེ་ཡ་ཇི་བཞིན་ནོ། །ཛྙ་ཞེས་བྱ་བའི་ཡི་གེ་ལ། །རྒྱ་གར་འགྱར་ཀློག་ཁ་ཆེ་གཉའ། །བོད་ཀྱི་གཉའ་ཞེས་བྱ་བར་ཀློག །ཁ་ཆེའི་ལུགས་སུ་བཀླག་ན་བདེ། །ཥྞ་ཥྟ་ཥྛ་སོགས་ཡི་གེ་ལ། །ཤ་ལོག་ཤ་རྣལ་གང་བྱུང་ཡང༌། །ས་དང་འདྲ་བར་བྱ་བ་སྟེ། །སྣྲ་སྟྲ་ཞེས་བརྗོད་པས་འགྲུབ། །གལ་ཏེ་དེ་ལྟར་མ་ཐོབ་ན། །ཕྲལ་ཏེ་བཀླགས་པས་ཐམས་ཅད་འགྲུབ། །སྟྱཻ་དྷ་ལྟ་བུ་ལ། སྟྱཻ་ཡད་དྷར་བཀླགས་པས་འགྲུབ། །དེ་ལ་སོགས་པ་བསམ་མི་ཁྱབ། །སྔགས་ཀྱི་བཀླགས་ཐབས་མི་ཤེས་ན། །འདི་མང་བྲིས་པས་ཅི་ཞིག་ཕན། །དེ་བས་སྔར་བརྗོད་ཐབས་ལ་འབད། །དེ་ནས་གཞན་ཡང་རབ་བཤད་བྱ། །ཨཱ་ལི་ཀཱ་ལི་གུག་སྐྱེད་བཅས། །ལེགས་ཤེས་ཁ་ཆེ་ནས་བྱུང་ཞིང༌། ། ལྕེ་བདེར་འགྱུར་བའི་ཡི་གེ་བྲི། ། རྦ་ཛྙནྶ་ཎྜ་ཌ་ཀྵཿསྠ་རྵ་ནྐ་ཏྲ་ཌྒཙྪ། ཡ་རྐྲ་ཏྟྱ་རྫ་ནཱ་ དྷྲ། ཤངྐུ་ རྠ་ ཉྫུ་ཉྫུ་རྡྷྭ། སྟྭནྟྱ་ཀྲོ་སྨྲོ་སྤྲོ་དྡྷ་ ་ཌཱ། ། ཀནྠི་རྦྷྱ་ཥྐ་བྫིམ་ཕཱ། ཡ ཌྷྱ་པྲེངྐ༌། ངྐ་ཚེཙྪར། རེངྐ་སྲེ་ཀླི་རྠཿའདི་རྣམས་ལེགས་པར་ཟུར་ཕྱིན་ན། །ལྕེ་བདེ་བར་ནི་འགྱུར་བ་ཡིན། །དེས་ན་གཎྜཱིའི་བསྟོད་ཚོགས་ལས། །ཚེག་ཀློག་སྦྱངས་ན་མཁས་པར་འགྱུར། །འདིར་མང་བརྗོད་པས་ཅི་ཞིག་བྱ། །བཀླག་ཐབས་ལེགས་པར་མི་སློབ་པར། །ཡི་གེར་བྲིས་པས་ཆོག་ཤེས་པའི། །རྨོངས་རྣམས་དོན་མེད་མ་གྱུར་ཏམ། །དེ་བས་ལེགས་པར་སློབ་འདོད་ན། །ཐོག་མར་ཨཱ་ལི་ཀཱ་ལི་ལ། །སློབ་དཔོན་གྱི་ནི་ངག་བཞིན་དུ། །རིང་ཐུང་ཕྱེད་པར་ལེགས་པར་བསླབ། །དེ་ལ་གུག་སྐྱེད་བཅས་ཤེས་ན། །དོན་ཡོད་ཞགས་པའི་གཟུངས་སོགས་ལ། །ཤིན་ཏུ་དལ་བར་བྱས་ནས་ནི། །རིང་ཐུང་ཁྱད་ཕྱེད་བྱ་ཞིང་བསླབ། །མདོར་ན་སློབ་དཔོན་བརྗོད་པ་བཞིན། །བོད་ཀློག་ཤེས་པས་ཞག་བཅུའམ། །ཟླ་ཕྱེད་ཉི་ཤུ་རྩ་གཅིག་ཏུ། །བསླབས་ན་ཐམས་ཅད་ཤེས་པར་འགྱུར། །སྐད་གདངས་མ་བཅོས་དལ་བ་དང༌། །རིང་ཐུང་ཁྱད་པར་ལེགས་ཕྱེད་ཅིང༌། །སྒྲ་ཡི་ཟུར་ཕྱིན་མི་ཐོགས་པ། །སྔགས་ཀྱི་ཀློག་མཐར་ཕྱིན་པ་ཡིན། །སྔགས་བརྗོད་རྣམས་ལ་རྣམ་ཀུན་ཏུ། །གལ་ཆེ་བ་ནི་ས་མཚམས་ཡིན། །དཔེ་ལ་ནན་ཏན་བསྐྱེད་དེ་བསླབ། །རྒྱ་ཡིག་ཤེས་ན་གཅིག་པ་རྟ། །ཀློག་པ་བསླབ་ན་མི་ཤེས་པས། །ས་མཚམས་གང་དང་གང་ཡིན་པ། །རང་ཉིད་ཀྱིས་ཀྱང་ལེགས་ཤེས་འགྱུར། །རྒྱ་གར་གྱི་སྐད་དང་སྔགས་ཀྱི་བཀླག་ཐབས་བསྟན་པའི་ལེའུ་སྟེ་གསུམ་པའོ།། །།
དེ་ལྟར་འདི་ནི་ཁོ་བོས་འབད་དེ་བྲིས་པ་གང༌། །མཁས་པ་སློབ་པར་འདོད་པའི་བྱིས་པ་གཞུག་ཕྱིར་ཡིན། །འོན་ཀྱང་ཆེན་པོ་རྣམས་ཀྱིས་ལན་འགའ་གཟིགས་གྱུར་ནའང༌། །དེ་ཡང་དོན་མེད་མི་འགྱུར་བློ་གྲོས་སྐྱེ་བར་འགྱུར་སྙམ་དང་། །དེ་ཉིད་ལེགས་པར་ཤེས་ན་ཀློག་གི་སློབ་དཔོན་ཤེས་ལ་རབ་ཏུ་མཁས་པར་འགྱུར། །དེ་ཕྱིར་མཁས་པ་རྣམས་ཀྱང་ཁེངས་པ་དོར་ནས་འདི་བྲིས་ལེགས་པར་སློབ་གྱུར་སྙམ། །བརྩེ་བས་འདི་བྲིས་པ་ལས་དུབ་པར་གྱུར་པའི་བསོད་ནམས་གང་ཡོད་པ། །དེས་ནི་འགྲོ་བ་མཐའ་དག་བྱང་ཆུབ་སེམས་ལྡན་སྤྱོད་པ་མཆོག་ལ་གནས་ཀྱི་བར། །གང་དང་གང་བརྗོད་དེ་དག་དོན་གསལ་དོན་ལ་བརྗོད་པའི་ཟུར་ཕྱིན་རབ་ཏུ་མཁས། །ལེགས་སྦྱར་རྒྱ་མཚོའི་བློ་གྲོས་ཡངས་པའི་གཟུངས་ཀྱི་རྩེ་མོ་མཆོག་ནི་ཐོབ་པར་ཤོག །ཡི་གེའི་བཀླག་ཐབས་བྱིས་པ་བདེ་བླག་ཏུ་འཇུག་པ་ཞེས་བྱ་བ། །དགེ་བསྙེན་བསོད་ནམས་རྩེ་མོས་སྦྱར་བའོ། །།རྐེད་སླས་དམ་པ་དང༌།དཔལ་ས་སྐྱའི་དབེན་གནས་དམ་པར་སྦྱར་བའོ། །ཕག་ལོ་རྟའི་ཚེས་བཅུ་གཅིག་ལ་ཚར་བར་བགྱིས་སོ། །ཞུ་བ་པོ་ཞང་སྟོན་ཕྱར་བུ་པས་བགྱིས་སོ།། །། ཨོཾ་ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎ་ཡེ་སྭཱ་ཧཱ། ཨོཾ་སུ་པྲ་ཏིཥྛ་བཛྲཱ་ཡེ་སྭཱ་ཧཱ།། །།
Subscribe to:
Post Comments (Atom)
0 comments:
Post a Comment