Tuesday 24 April 2012
15:54 | 
Posted by
༄༅།། ཨེ་མ་ཧོའི་རིག་མཛོད་། |
འབུམ་པ་རྒྱ་ཚ་ཞལ་དཀར་དྲན་སྣང་ཀ་པ་ལའི་དབང་རྩ་དཀར་པོ།
།
ན་མོ་གུ་རུ་བུདྡྷ་ཛྙྰ་ན་ཡེ། །
ཀ་མ་ལ་ལྟར་ཝྰ་ཡེལ་མཛེས་ལྗོངས་སུ། །
ཁ་བའི་འདབ་མ་ལྷུང་ལྷུང་འབབ་པའི་ཚེ། །
ག་བུར་བཞིན་རིས་འབུམ་པ་ཞལ་དཀར་མཆོག །
ང་ཡི་སྙིང་གི་དཀྱིལ་ནས་ཤིན་ཏུ་དྲན། །
ཅ་དངོས་དཀར་པོའི་རང་བཞིན་གསལ་བ་དང་། །
ཆ་ཤས་དཀར་པོ་རིགས་ཀྱི་ལོངས་སྤྱོད་དང་། །
ཇ་ཕོར་དཀར་པོའི་མདངས་འཛིན་མཐོང་བའི་ཚེ། །
ཉ་གང་བཞིན་རིས་རྒྱ་ཚ་ཞལ་དཀར་དྲན། །
ཏ་ཐ་ག་ཏའི་བསྟན་འཛིན་གོས་དཀར་དང་། །
ཐ་དག་ཤེས་བྱའི་འོད་དཀར་སྣང་ཆའི་རིགས། །
ད་ལྟའི་དཀར་འཛིན་ཤེས་པར་སྣང་བའི་ཚེ། །
ན་གཞོན་ང་ཡིས་འབུམ་པ་ཞལ་དཀར་དྲན། །
པ་ར་མི་ཏའི་དབུ་དཀར་ལམ་བཟང་དང་། །
ཕ་མའི་རྒྱུད་སྡེའི་དཀར་པོ་ཆིག་ཐུབ་དང་། །
བཛྲ་རིག་འཛིན་དར་ལམ་དཀར་པོ་ཡི། །
མ་ཅིག་རྫོགས་ཆེན་བསྟན་པ་ཞལ་དཀར་དྲན། །
ཙ་ར་ཀ་ཡི་བདུད་རྩི་དཀར་པོ་དང་། །
ཚ་རེག་འཐོམས་པའི་ག་བུར་དཀར་པོ་དང་། །
ཛ་ཏི་དཀར་པོ་སྨན་མཆོག་དྲི་བཟང་རིགས། །
ཝ་ལེར་མཐོང་ཚེ་ཞལ་ལུ་དཀར་པོ་དྲན། །
ཞྭ་དཀར་དབུ་རྨོག་དཀར་པོའི་དར་འཁྲུ་དང་། །
ཟ་འོག་དར་དཀར་རུ་དར་དཀར་པོ་དང་། །
འ་ཅག་རིག་པའི་ཉི་ཟླ་སྐར་མའི་འོད། །
ཡ་མཚན་ལྷག་བསམ་བདེན་ཆེན་ཞལ་དཀར་དྲན། །
ར་བ་གངས་དཀར་སྤྲིན་དཀར་བླ་བྲེ་དང་། །
ལ་ལུང་ཇོ་དར་རྒྱལ་མཚན་དཀར་པོ་དང་། །
ཤ་ཞེན་དཀར་པོའི་སྤུན་ཟླ་མཇལ་བའི་ཚེ། །
ས་སྐྱོང་འབུམ་པ་རྒྱ་ཚ་ཞལ་དཀར་དྲན། །
ཧ་ཅང་དྲན་པའི་ཨ་ཕ་ཞལ་དཀར་ཁྱེད། །
ཨེ་མ་འོད་གསལ་ནང་ནས་མཇལ་བའི་ཚེ། །
རྨི་ལམ་དབང་ཕྱུག་སྙིང་པོ་མ་ཎི་ཀ །
ལག་ཏུ་སོན་པའི་སྤྲོ་དགའ་རབ་ཏུ་བརྟས། །
ཤྲྰིས་སོ། །
Subscribe to:
Post Comments (Atom)
0 comments:
Post a Comment