Friday, 11 May 2012
15:06 | 
Posted by
༄༅།། ཨེ་མ་ཧོའི་རིག་མཛོད་། |
༄༅། ། ཨེ་མ་ཧོས་ཆོས་མཆེད་དྲ་གྲོགས་ཡོངས་ལ་ཕུལ་བའི་ཚེ་དར་དཀར་པོའི་མཆོད་འབུལ།
།
ན་མོ་གུ་རུ་པདྨ་ཀ་ར་ཡེ། །
བརྟན་གཡོའི་གཉུག་མའི་རཀྟ་དམར་པོའི་བཅུད།
།
མཐའ་ཡས་ཐུགས་རྗེའི་འོད་སྣང་འདྲེས་པའི་སྐུ།
།
སོར་རྟོགས་ཡེ་ཤེས་རང་གཟུགས་ཚེ་དཔག་མེད། །
ཐུགས་བསྐྱེད་བདེན་པའི་དགེ་ལེགས་དེང་འདིར་སྩོལ།
།
སྤྱི་མཆེད་མ་གྱུར་སེམས་ཅན་ཐམས་ཅད་དང་། །
རིང་མཆེད་རྒྱལ་བའི་བསྟན་པའི་རྗེས་འཇུག་ཀུན།
།
ཉེ་བའི་མཆེད་གྲོགས་གསང་ཆེན་བསྟན་པའི་གྲོགས།
།
ནང་འདྲིས་རྡོ་རྗེ་མཆེད་ཀུན་བདག་ལ་དགོངས།
།
གཟུར་གནས་ཉི་མ་མེད་པའི་མཚན་ནག་ཏུ། །
བློ་ལྡན་ཟླ་བ་བྲལ་བའི་མུན་ནག་ཁྲོད། །
དོན་གཉེར་སྐར་ཚོགས་སྒྲིབ་པའི་སྤྲིན་རུམ་ན།
།
དྲང་བདེན་སྲིན་བུ་མེ་ཁྱེར་ཁོ་བོ་ཙམ། །
གངས་དཀར་ཤེལ་གྱི་མཆོད་རྟེན་བརྗེད་མ་མྱོང་།
།
གངས་ཅན་བསྟན་སྲིད་དུང་སེམས་ཉམས་མ་མྱོང་།
།
གངས་ལྗོངས་ཕན་བདེའི་ལེགས་ཚོགས་རལ་མ་མྱོང་།
།
གངས་སེང་དཔའ་རྒོད་དཔལ་དགྱེས་རྡོ་རྗེ་ལགས།
།
ཕྱི་སྣོད་མི་རྟག་འབྱུང་བཞི་འཇིག་པས་གནོད།
།
ནང་བཅུད་མི་རྟག་སྐྱེ་རྒ་ན་འཆི་མང་། །
གསང་བ་བདུད་བཞིའི་གཡུལ་ལས་མ་རྒྱལ་བས། །
ཚེ་སྲོག་མི་རྟག་འཆི་བདག་དྲུང་དུ་རྒྱུ། །
རྒྱལ་དང་སྲས་བཅས་ཐུགས་རྗེས་བདེན་སྟོབས་གཅིག
།
རིག་འཛིན་མཁས་གྲུབ་དབང་པོས་སྨོན་ལམ་གཉིས།
།
དངོས་རིག་ལས་ཀྱི་ཕྱག་རྒྱའི་རྟེན་འབྲེལ་གསུམ།
།
ཀུན་འཛོམས་བཟང་པོ་སྤྱོད་པའི་དཔལ་དུ་ཤར།
།
ཤྲྰི་སེང་ཧའི་གྲུབ་པའི་རྟུལ་ཞུགས་དང་། །
སངས་རྒྱས་ཡེ་ཤེས་མཛད་པའི་ཕྲིན་ལས་གར། །
བཀའ་གཏེར་གདམས་པའི་མཛོད་འཛིན་རང་གྲོལ་རྩལ།
།
སླར་ཡང་འཁྲུངས་རབས་རྣམ་ཐར་སྣང་བ་བཀྲ། །
རྩ་བརྒྱུད་བླ་མའི་བྱིན་རླབས་གཞི་རྩ་བརྟན།
།
མདོ་སྔགས་ཟུང་འཇུག་དགོངས་དོན་ཡན་ལག་རྒྱས།
།
ཟབ་རྒྱས་ཆོས་གཏེར་རིག་པ་སྨིན་གྲོལ་བས། །
མཁྱེན་བརྩེ་ནུས་པའི་འབྲས་བཟང་ཀུན་ཏུ་ཤིས།
།
སྙིགས་ལྔའི་དུས་རླུང་འཚུབས་པ་ཐལ་ཆེ་ཡང་།
།
གསུང་རབ་ལེགས་བཤད་མཇལ་བའི་མིག་བཟང་གིས།
།
མདུན་ལམ་རིང་མཐའ་འཇལ་བའི་ཐབས་མཁས་ཤིང་།
།
སྐལ་བཟང་ལམ་སྣ་ཟིན་པས་སེམས་པ་བདེ། །
ཆོས་ཀུན་གདམས་པའི་ཆུ་ཀླུང་གཅིག་ཏུ་འདུས།
།
ཆོག་ཤེས་བྱང་ཆུབ་སེམས་ཀྱི་ནོར་བུས་བརྒྱན།
།
བརྩོན་འགྲུས་དལ་མེད་ཕྲིན་ལས་རླབས་ཕྲེང་ཅན།
།
ཡོན་ཏན་རྒྱ་མཚོའི་དཔལ་ཡོན་ཤིན་ཏུ་ལེགས།
།
སྡེ་བཞིའི་ཕུན་ཚོགས་རིན་ཆེན་སྐོང་བུ་རུ།
།
དམ་ཆོས་རྩི་བཅུད་མར་ཁུའི་རྒྱ་མཚོ་འཁྱིལ།
།
ཕུང་ཁམས་སྐྱེ་མཆེད་དག་པའི་འོད་སྟོང་ལས། །
རྨི་ལམ་བདེ་ཆེན་ཕྱག་རྒྱར་མངའ་དབང་འབྱོར།
།
ཀ་དག་གདོད་མའི་ངོ་བོ་ནམ་མཁའི་ཁམས། །
ལྷུན་གྲུབ་བདེ་ཆེན་རང་བཞིན་འོད་གསལ་དབྱིངས།
།
ཟུང་འཇུག་རིག་སྟོང་ཡེ་ཤེས་ཕྱག་རྒྱ་ཆེ། །
ཀུན་ཁྱབ་རྫོགས་པ་ཆེན་པོའི་ཀློང་དུ་ཨ། །
ཞེས་པ་ཡང་རབ་རྒྱན་ཆུ་འབྲུག་ནག་པ་ཟླ་བའི་དབང་ཕྱོགས་ཀྱི་སྐབས་སུ་བོད་ཕྱི་ནང་གི་མཁས་གྲུབ་དམ་པ་དང་སྙན་ངག་མཁན་དུ་མས་བདག་ཉིད་སྨན་ཁང་དུ་ཡོད་པའི་འཕྲིན་གསར་གཟིགས་ནས་ཐུགས་སྨོན་དང་འཚམས་འདྲི་གང་མང་གནང་འཁན་བྱུང་བའི་རྐྱེན་ལས་བདེ་འཚམས་བཀྲ་ཤིས་བདེ་ལེགས་ཀྱི་ཚིགས་སུ་བཅད་པ་འདི་དབྱིན་ཡུལ་བོད་བརྒྱུད་རྣལ་འབྱོར་ཆོས་སྨན་ཁང་ནས་ཨེ་མ་ཧོས་གང་ཤར་བྲིས་པ་ཤྲྰི་སརྦ་ལོ་ཀ་བི་ཛ་ཡནྟུ།
།
Subscribe to:
Post Comments (Atom)
0 comments:
Post a Comment