Wednesday, 16 May 2012
02:46 | 
Posted by
༄༅།། ཨེ་མ་ཧོའི་རིག་མཛོད་། |
༈ ༀ་སྭ་སྟི་བི་ཛ་ཡནྟུ།
དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །
ཀུན་བཟང་ཆོས་སྐུའི་བླ་མ་རིན་པོ་ཆེ། །
འོད་གསལ་སྙིང་དབུས་ཁབ་ཏུ་རྟག་བཞུགས་ནས། །
ཀུན་མཁྱེན་བརྒྱུད་པའི་བསྟན་པ་རིན་པོ་ཆེ། །
འཛིན་སྐྱོང་སྤེལ་བའི་བྱེད་པོ་བདག་གྱུར་ཅིག །
ལྷ་ཀླུ་གནོད་སྦྱིན་མི་དང་དྲང་སྲོང་ཆེ། །
ཉན་རང་བྱང་སེམས་རིག་འཛིན་རྣལ་འབྱོར་བ། །
མཁས་བཙུན་གྲུབ་པའི་གདན་ས་དབེན་གནས་ཆེ། །
ཀུན་བཟང་པདྨའི་དགའ་ཚལ་གླེང་བར་བྱ། །
ཕ་མཐའ་མི་མངོན་ནགས་ཀློང་སྟུག་པོས་རྒྱན། །
ཕྱོགས་མཚམས་གངས་རྫ་སྤང་གི་རི་བོས་བསྐོར། །
སྟེང་དུ་གནམ་དབྱིབས་འཁོར་ལོ་རྩིབ་བརྒྱད་དང་། །
འོག་ཏུ་ས་གཞི་པདྨ་འདབ་བརྒྱད་བཀྲ། །
ཤར་མཐོང་ཉི་ཟླའི་སྤྱན་རས་གཡོ་བའི་གནས། །
ལྟ་བ་མཁའ་རྒྱ་བསྐྱོད་པའི་རྟེན་འབྲེལ་བཟང་། །
ནུབ་རི་དབང་ཆེན་རྒྱལ་པོ་གདན་བཞུགས་འདྲ། །
གསང་ཆེན་སྒོམ་པའི་རྒྱལ་ས་བརྟན་པར་བརྗིད། །
བྱང་ཕྱོགས་ས་འཛིན་རུས་སྦལ་གཡུ་རྫ་མདོག །
ཕྱི་ནང་གསང་བའི་མི་མཐུན་གཡུལ་རྒྱལ་རྟགས། །
ལྷོ་རི་གཡའ་སྤང་ནོར་བུ་སྤུངས་ལྟར་མཛེས། །
འབྲས་ཆོས་རྒྱ་མཚོས་རྩི་ཤིང་དགའ་ཚལ་རྒྱས། །
མདུན་ཐང་ཉེ་སར་གཡུ་མཚོ་སྙིང་ལྟར་མཚན། །
དྭངས་གསང་ཡིད་འོང་ཡན་ལག་བརྒྱད་དང་ལྡན། །
ངང་ངུར་ཆུ་བྱ་སྣ་ཚོགས་དགའ་བདེའི་ངང་། །
སྒྲ་སྙན་ཞི་འཇམ་འཚོ་བའི་ལོངས་སྤྱོད་རོལ། །
ཤར་ལྷོར་རྩྭ་རི་སྨན་འཛིན་ཚོད་མའི་ཚལ། །
རོ་བརྒྱའི་རྩི་ཐོག་ཞིམ་མངར་མཚར་དུ་དངར། །
ཞལ་ཟས་གང་འདོད་རང་བཞིན་སྣ་ཚོགས་པ། །
ཅི་འདོད་བཟའ་གཏུང་རོ་མཆོག་ལྡན་པས་ཕྱུག །
ལྷོ་ནུབ་ཁྲུས་རྫིང་གཏིང་ཟབ་དྲོ་གྲོང་མཉམ། །
འདག་རྫས་དཀུ་མཉེ་རང་དབང་ཉེ་མཁོ་དང་། །
མི་ཟད་དགའ་བདེའི་གཞོན་ནུའི་རྩེད་ཐང་ཆེ། །
སྟོབས་རྩལ་ལྡན་པའི་ལུས་སྦྱང་རང་འགུལ་མཆིས། །
ནུབ་བྱང་བྲག་རྫོང་རང་བྱུང་དབེན་པའི་གནས། །
ཆུ་ཕྲན་དྲག་པོའི་བབས་སྒྲ་འཇའ་གཟུགས་དང་། །
དྲི་ཞིམ་མེ་ཏོག་རླུང་བསིལ་རླན་པའི་ཆབ། །
ཏིང་འཛིན་རང་འཁྲུངས་བདེ་གསལ་ངང་གིས་འདྲེན། །
བྱང་ཤར་རྫ་རི་མཁར་དམར་གནང་རྫོང་དུ། །
གཟའ་ཀླུ་གནོན་སྦྱིན་སྲིན་པོ་རྒྱུ་བའི་གཏམ། །
འཇིགས་པའི་རྐན་སྒྲ་སྒྲོགས་པའི་དྲག་པོའི་རི། །
རུ་ཤན་གཅོད་པའི་གདན་ས་འདྲེ་མོ་ལྗོངས། །
དུག་ཚེར་དུག་སྦྲུལ་སྐྱི་གཡའ་བགྲོད་དཀའ་ཞིང་། །
གཅན་གཟན་སྟག་གཟིག་དོམ་དྲེད་མཆེ་བ་ངོམས། །
དཀོར་སྲུང་གློག་གི་ཚ་ཟེར་ར་བས་བསྐོར། །
དཀོར་བདག་མདོག་ནག་མི་རྒོད་ཤ་གཟན་ཡོད། །
དབུས་གནས་ཀུན་བཟང་ཆོས་གླིང་དགའ་ཚལ་དུ། །
བརྒྱུད་གསུམ་བླ་མའི་སྐུ་བརྙན་གསུང་འབུམ་བཞུགས། །
ཟབ་རྒྱས་འཛབ་དབྱངས་སྙན་པའི་འཁོར་ལོ་འཁོར། །
གྲོགས་ཀུན་ཞི་དུལ་དམ་ཆོས་བཤད་སྒྲུབ་མཛད། །
བརྙས་པས་མི་ནོན་དབུ་འཕང་དགུང་ལས་མཐོ། །
འབྱོར་བས་མི་ཁེངས་དམན་འགྲོ་གཅེས་པའི་སྙིང་། །
རྒན་པར་གུས་ཤིང་ཡོན་ཏན་ཅན་ལ་བརྟེན། །
དཔའ་བོ་ཆེན་པོས་ཚངས་སོགས་ཟིལ་གྱིས་གནོན། །
མུ་འཐུད་་་་་་
Subscribe to:
Post Comments (Atom)
0 comments:
Post a Comment