Sunday 12 August 2012
05:15 | 
Posted by
༄༅།། ཨེ་མ་ཧོའི་རིག་མཛོད་། |
བུ་མོ་ཆོས་དབྱིངས་སྐྱིད་ལ་ཕུལ་བའི་ལེགས་སྐྱེས་ཀྱི་ཁ་བཏགས་དམར་པོ། །
འགྲོ་འདུལ་འཕགས་པ་སྤྱན་རིས་གཟིགས་དབང་ཕྱུག་ལ་ཕྱག་འཚལ་ལོ། །
ཞི་བའི་གོམས་རྒྱུགས་སེམས་ལ་འཆང་ཞིང་ལུས་ཀྱི་སྒྱུ་རྩལ་རྒྱུན་དུ་སྦྱོང་། །
ཞི་བདེ་རྒྱལ་ཁ་ཁ་ཙམ་མིན་པར་རང་བརྩོན་རྔུལ་ཆུའི་ཐིགས་པ་བསགས། །
ཞི་བདེའི་རྒྱ་མཚོའི་ཤར་ནུབ་ཀུན་ལ་ཁྱོད་ཀྱི་གཟེངས་རྟགས་མངོན་སུམ་སྟོན། །
ཞི་རྩལ་ཨོ་འགྲན་གོམས་སྟབས་ཤིག་གིས་རྒྱལ་ཡོངས་ཀུན་ལ་བོད་ཅེས་གླེང་། །
སྟོབས་ཆེན་རྒྱལ་ཁབ་མི་མང་ཀུན་ལ་གསེར་དངུལ་གཟེངས་རྟགས་རྡོ་བཞིན་འགྲིམས། །
ནུས་ཆུང་རྒྱལ་ཕྲན་གྲངས་ཉུང་འགའ་ལ་གཟེངས་རྟགས་ཐོབ་པ་སྲིད་མཐའ་ཙམ། །
དེ་དག་ཀུན་ལས་ཆོས་དབྱིངས་སྐྱིད་ཀྱི་རིན་ཆེན་གཟེངས་རྟགས་ངོ་མཚར་འབར། །
གདོང་དམར་ཉམ་ཆུང་ཤ་ཁྲག་མཆེད་པའི་ཟངས་མདོག་དཔལ་རིའི་རྟེན་འབྲེལ་ངོམས། །
ཆོས་ཀྱི་ཞིང་ས་གངས་ཅན་ལྗོངས་ཞེས་དཔའ་མཛངས་ལྡན་པའི་རྒྱལ་ཁབ་ལ། །
ཆོས་སྲིད་མཐུན་པའི་དཀའ་སྤྱད་གོམས་པའི་རིན་ཆེན་ཟངས་ཀྱི་གཟེངས་རྟགས་འདི། །
ཆོས་ཅན་ཆོས་ཉིད་རྟེན་འབྲེལ་ལེགས་འགྲིགས་ཞི་འདུར་གོམས་རྒྱུགས་ཨང་གསུམ་པ། །
ཆོས་དབྱིངས་སྐྱིད་ལ་དགའ་འཛུམ་བཅས་པས་བཀྲ་ཤིས་བདེ་ལེགས་ཕུན་ཚོགས་ཞུ། །
བོད་པའི་བུ་མོ་ཆོས་དབྱིངས་སྐྱིད་ལ་རྒྱལ་ཡོངས་རྩེད་འགྲན་གཟེངས་རྟགས་འདིས། །
གངས་ཅན་བོད་པའི་རྒན་གཞོན་བྱིས་པར་ཤུགས་རྒྱོབ་ཅེས་པའི་བརྡ་རྟགས་ཤིག །
རྫུན་དང་གཡོ་སྒྱུའི་མགོ་སྐོར་མིན་པར་ངལ་རྩོལ་འབོད་པའི་རང་དབང་ཞིག །
རང་སྲོག་བཅད་པར་དཔའ་བོ་མིན་པའི་རིང་འཚོ་འབད་པའི་དུང་ཞེན་ལགས། །
ཚེ་རིང་ནད་མེད་བདེ་སྐྱིད་ལྡན་པའི་དབང་ཐང་བདེ་ཆེན་ཞིང་དང་མཉམ། །
ཡ་རབས་ཆོས་མཐུན་དགེ་བཅུའི་ཁྲིམས་བཟང་འཛམ་གླིང་སྐྱེ་འགྲོ་ཀུན་གྱིས་བརྩི། །
སོར་བྱང་སྔགས་ཀྱི་བསྟན་པའི་སྙིང་པོ་བྱང་ཆུབ་སེམས་མཆོག་རྟག་འབད་ནས། །
འདི་ཕྱི་བདེ་དགའི་ལུགས་གཉིས་ལམ་ལ་ཆོས་བཞིན་སྤྱོད་པས་ལེགས་འཚོ་ཤོག །
ཅེས་པ་རབ་རྒྱན་ཆུ་འབྲུག་ཆུ་སྟོད་ཟླ་ཚེས་དགེ་བར་རྒྱལ་ཡོངས་རྩེད་འགྲན་ལས་བུད་མེད་རིང་རྒྱུགས་ཨང་གསུམ་པ་དེ་བོད་མོ་ཆོས་དབྱིངས་སྐྱིད་ལ་ཐོབ་པར་མཐོང་བའི་མོད་ལ་དགའ་ཚོར་དང་བཅས་གང་དྲན་དུ་ཤྲྰིས་སྨྱོན་པས་དབྱིན་ཡུལ་རྒྱལ་སྤྱིའི་གནམ་ཐང་ནས་ཤར་མར་བྲིས་པ་དགེའོ། །
Subscribe to:
Post Comments (Atom)
0 comments:
Post a Comment