Sunday 2 September 2012
04:50 | 
Posted by
༄༅།། ཨེ་མ་ཧོའི་རིག་མཛོད་། |
སྐུ་ཚེ་རིང་། །
ཨེ་མ་ཧོ།
ཀ་མ་ལ་ལྟར་ལྷག་བསམ་མཚུངས་མེད་པ། །
ཁ་བའི་རིགས་བདག་རྒྱལ་པོ་མ་ཎི་ཀ །
ག་བུར་མདངས་ཀྱིས་མཛེས་པའི་ཁྱིམ་བདག་པོ། །
ང་ཡི་ཡབ་ཆེན་རྗེ་བཙུན་སྐུ་ཚེ་རིང་། །
ཅ་དག་ཤྰཀྱའི་དགེ་སྦྱོང་རིན་པོ་ཆེ། །
ཆ་ལུགས་རབ་བྱུང་ཆོས་གོས་རྒྱན་འཆང་ཞིང་། །
ཇ་ཆང་འདོད་ཡོན་སྤངས་པའི་བྱ་བྲལ་བ། །
ཉ་གང་དྲན་པའི་བཤེས་གཉེན་སྐུ་ཚེ་རིང་། །
ཏ་ཐྰ་ག་ཏའི་བསྟན་པ་ཡོངས་ཀྱི་བདག །
ཐ་སྙད་ཤེས་ཚན་རིག་པའི་དེད་དཔོན་རྗེ། །
ད་ལྟའི་དུས་གསར་བའི་འདྲེན་པ་མཆོག །
ན་ཚོད་མཐོན་པོའི་བླ་མ་སྐུ་ཚེ་རིང་། །
པྰ་ར་མི་ཏྰའི་དགོངས་དོན་ཇི་བཞིན་གཟིགས། །
ཕ་མའི་རྒྱུད་སྡེའི་གསང་ཆེན་སྟོན་མཁས་པས། །
བ་མཆོག་འོ་མའི་བཅུད་ཀྱིས་ལུས་འཚོ་ལྟར། །
མ་ལུས་འགྲོ་བའི་སྨན་པ་སྐུ་ཚེ་རིང་། །
ཙ་རི་ས་སྤྱོད་དག་པའི་ཞིང་གི་གཙོ། །
ཚ་གྲང་དམྱལ་བའི་འདྲེན་པ་དགེ་འདུན་སྐྱོབ། །
ཛ་ཡའི་བསྟན་པའི་ཆོས་བདག་སྤྲུལ་པའི་སྐུ། །
ཝ་ལེར་ཆོས་ཀྱི་རྒྱལ་པོ་སྐུ་ཚེ་རིང་། །
ཞྭ་མདོག་རིས་མེད་བོད་བརྒྱུད་ཆོས་ཀྱི་རྒྱལ། །
ཟ་ཧོར་མཁན་པོའི་རྒྱལ་ཚབ་དགེ་སློང་ཆེ། །
འ་ཅག་རིག་པའི་སློབ་དཔོན་བཀའ་དྲིན་ཅན། །
ཡ་མཚན་ཀུན་ལྡན་དམ་པ་སྐུ་ཚེ་རིང་། །
རབ་མཛེས་ཁ་བའི་ཚེ་རིང་རྣམ་དྲུག་གིས། །
ལ་ལུང་ཕན་བདེ་འཛིན་སྐྱོང་སྤེལ་བའི་བདག །
ཤ་ཁྲག་རུས་པའི་རྒྱུན་གཅིག་སྤྱི་དཔོན་རྗེ། །
ས་སྐྱོང་ཞིང་གི་མགོན་པོ་སྐུ་ཚེ་རིང་། །
ཧ་ཤང་སྒམ་པའི་རང་བཞིན་ངང་གིས་དག །
ཨ་ཏིའི་ཟབ་གཏེར་གཉུག་མའི་གཤིས་སུ་རྫོགས། །
བཤད་སྒྲུབ་འཕྲིན་ལས་འོད་སྣང་སྨིན་མཛད་པ། །
རིག་འཛིན་ཞི་བདེ་གླིང་པ་སྐུ་ཚེ་རིང་། །
ཞེས་པ་འདི་ཡང་རབ་གནས་ཆུ་འབྲུག་ཁྲུམས་སྟོད་ཟླ་བའི་དབང་ཕྱོགས་རྒྱལ་བ་དང་པོར་བོད་བརྒྱུད་རྣལ་འབྱོར་ཆོས་ཚོགས་ཁང་དུ་དཔལ་ལྡན་ལྷ་མོས་ཚེ་རིང་རྣམ་དྲུག་གི་སྐུ་ཐང་འདི་ལེགས་འབུལ་གནང་བའི་རྐྱེན་ལས་ཤྲྰིས་གུས་པས་གསོལ་བ་འདེབས་པ་དགེའོ། །
ཤྲཱི་མཚན་ལྡན་གྲུབ་མཆོག་མཁན་པོའི་ཞབས།
གངས་ཅན་མདོ་རྒྱུད་སྒྲ་དོན་ལེགས་གཟིགས་མཐུས།
བོད་ཀྱི་ངག་ཚིག་སྡེབ་ལ་མངའ་བརྙེད་པ།
སྐུ་ཚེ་རིང་ཞིང་བོད་སྐད་སྐྱོང་བར་མཛོད།།
ལ་དྭགས་འཇམ་དཔལ་གྱིས་་་་་་་
ཤྲཱི་མཚན་ལྡན་གྲུབ་མཆོག་མཁན་པོའི་ཞབས།
གངས་ཅན་མདོ་རྒྱུད་སྒྲ་དོན་ལེགས་གཟིགས་མཐུས།
བོད་ཀྱི་ངག་ཚིག་སྡེབ་ལ་མངའ་བརྙེད་པ།
སྐུ་ཚེ་རིང་ཞིང་བོད་སྐད་སྐྱོང་བར་མཛོད།།
ལ་དྭགས་འཇམ་དཔལ་གྱིས་་་་་་་
Subscribe to:
Post Comments (Atom)
0 comments:
Post a Comment