Tuesday 27 November 2012
03:49 | 
Posted by
༄༅།། ཨེ་མ་ཧོའི་རིག་མཛོད་། |
|
གསང་ཆེན་བསྟན་པའི་སྒྲོན་མེ་ཆེན་པོ་མཚུངས་བྲལ་ཆོས་ཀྱི་རྒྱལ་པོ་འཇིགས་མེད་ཕུན་ཚོགས་འབྱུང་གནས་རིན་པོ་ཆེར་
བསྟོད་སྨོན་ངོ་མཚར་ནོར་བུའི་དོ་ཤལ་ཞེས་བྱ་བ།
|
| གསང་ཆེན་བསྟན་པའི་སྒྲོན་མེ་ཆེན་པོ་མཚུངས་བྲལ་ཆོས་ཀྱི་རྒྱལ་པོ་འཇིགས་མེད་ཕུན་ཚོགས་འབྱུང་གནས་རིན་པོ་ཆེར་བསྟོད་སྨོན་ངོ་མཚར་ནོར་བུའི་དོ་ཤལ་ཞེས་བྱ་བ། མཆོག་སྦྱིན་རྡོ་རྗེ་རྣོན་པོའི་ཡེ་ཤེས་གཏེར།། སྙིང་གི་པདྨོར་བཀོད་པའི་འོད་ཟེར་གྱིས།། སྐྱེ་དགུའི་ཡིད་ལ་དགའ་སྟོན་རྟག་འགྱེད་པའི།། མི་ཟད་དགེ་བའི་སྤོབས་པ་འདི་ན་ཐོབ།། དབྱངས་ཅན་མགྲིན་པའི་འོ་མཚོར་དགྱེས་རོལ་བས།། ངག་ལ་སྙན་པར་སྨྲ་བའི་བྱིན་ཆགས་པ།། བདེན་གསུང་ཚངས་པའི་དབྱངས་ཀྱི་ཡན་ལག་གི།། ཆོ་ག་ཡོངས་སུ་རྫོགས་པའི་དཔལ་ལ་ཕྱོགས།། “འཇིགས་མེད་ཕྱོགས་ལས་རྣམ་རྒྱལ་གྲུབ་བརྒྱའི་གཙོ།། ཕུན་ཚོགས་ཆེ་དགུའི་གཙུག་ན་མངོན་མཐོ་བ།། སྲིད་ཞིའི་ལེགས་ཚོགས་འབྱུང་གནས་ཆོས་ཀྱི་རྗེར།། བསྟོད་དབྱངས་སྙན་སྤྲིན་རོལ་མོ་འཁྲོལ་ལ་བྲེལ།། གང་ཁྱེད་སྦས་པའི་རྣལ་འབྱོར་ས་ཡི་གསེར།། འགལ་རྐྱེན་གཡའ་ཡིས་མ་གོས་དམ་པའི་གཤིས།། ཚུལ་དགུའི་འོད་སྟོང་འབར་བའི་ངོ་མཚར་དབྱིག། དུས་སུ་བབས་ཚེ་བཀྲག་མདངས་ལྷག་པར་འཚེར།། སྟོན་མཚན་མཁའ་ལ་རྒྱུ་བའི་རི་བོང་འཛིན།། རྣམ་མང་རྒྱུ་སྐར་དབུས་ན་ཉེར་མཛེས་བཞིན།། མཁས་གྲུབ་བྱེ་བའི་གཙུག་རྒྱན་མིའི་ཟླ་བ།། བསྟན་འཛིན་རྒྱུ་སྐར་ཚོགས་པའི་དབུས་ན་མཛེས།། རྫ་ཡུལ་རྫ་ཆབ་སྔོན་མོའི་ཐིགས་ཕྲན་དང་།། དམ་པའི་ཞལ་གྱི་བདུད་རྩི་འདྲེས་པ་ཡིས།། ཁྱོད་སྐུའི་ཁོ་ལག་རྫོགས་དང་ལྷན་ཅིག་ཏུ།། ནང་གི་ཡོན་ཏན་ཁོང་ནས་མ་རྒྱས་སམ།། སྙིགས་དུས་བསྟན་པའི་སྒྲོན་མེ་ཐུབ་བསྟན་མཚན།། ཡོངས་ཀྱི་འཁོར་ལོས་སྒྱུར་བ་འདྲེན་པའི་མཆོག། གཙུག་ཏུ་བསྙེན་པའི་རྣམ་ཐར་སེངྒེའི་སྒྲས།། སྲས་ཀྱི་ཐུ་བོར་ཁྱོད་གཅིག་ཀུན་ཏུ་གྲགས།། གདོད་མའི་མགོན་པོ་མི་ཡི་བརྫུར་ཞུགས་པ།། འཇིགས་མེད་གུ་ཎ་ན་ཐའི་མཚན་ཅན་གྱིས།། དགོངས་བརྒྱུད་རྟོགས་པ་འཕོས་པའི་རྟེན་འབྲེལ་ལས།། “ས་ལམ་ཆིག་ཆོད་རྫོགས་པར་མ་གྱུར་ཏམ།། དང་པོར་དམ་པའི་བཤེས་གཉེན་ལེགས་པར་བསྟེན།། བར་དུ་ཐོས་བསམ་སྒོམ་པས་རང་རྒྱུད་དུལ།། མཐའ་མར་གཞན་དོན་ཕྲིན་ལས་རྩིབས་སྟོང་གི། ཆོས་ཀྱི་འཁོར་ལོས་ས་ཆེན་དབང་དུ་བྱས།། བརྒྱད་གཉིས་གཞོན་ནུའི་དཔལ་འཛིན་མཁྱེན་རབ་གཏེར།། གུར་གུམ་མདོག་ཅན་ཤེས་རབ་རལ་གྲི་འཆང་།། ལྷག་པའི་ལྷ་མཆོག་རྡོ་རྗེ་རྣོན་པོ་ཡི།། མཁྱེན་རབ་ཡེ་ཤེས་ཁྱོད་ལ་བཟླུམ་མིན་ནམ།། རྒྱལ་ཀུན་སྙིང་རྗེའི་རང་གཟུགས་མིག་མི་འཛུམ།། དཀར་གསལ་ལང་ཚོའི་ཆ་རྫོགས་གངས་རིའི་མགོན།། ལྷ་གཅིག་རྗེ་བཙུན་ཕྱག་ན་པདྨོ་ཡི།། བརྩེ་ཆེན་ཐུགས་རྗེ་ཁྱོད་དང་གཉིས་སུ་མེད།། “སྲས་བཅས་རྒྱལ་བའི་ནུས་མཐུ་གཅིག་སྡོམ་པ།། མཐིང་མདོག་མི་ཤིགས་རྡོ་རྗེའི་ཕྱག་མཚན་ཅན།། གསང་བའི་མཛོད་འཛིན་གསང་བདག་དཔའ་བོ་ཡི།། མཐུ་སྟོབས་དཔལ་མངའ་ཁྱོད་ལས་ལོགས་ན་སུ།། རྒྱལ་བསྟན་ཉི་མ་ཆུ་ལྷར་ཕྱོགས་གྱུར་ཅིང་།། དམ་པའི་འོད་སྣང་བག་ལ་ཞ་བའི་ཚེ།། ཤར་རིའི་མཁའ་ལ་འཕགས་པའི་འོད་དཀར་ཅན།། ཉ་རྒྱས་ཟླ་བ་དཀར་པོ་ཁྱོད་མིན་ནམ།། ཡོངས་རྫོགས་བསྟན་པའི་ཕྱི་མོ་སྔ་འགྱུར་པ།། ཆེ་བ་དྲུག་ལྡན་རིག་འཛིན་བརྒྱུད་པའི་སྲོལ།། མི་ནུབ་མཁའ་མཐར་ཁྱབ་པའི་ཕྲིན་ལས་ཀྱི།། གདུགས་དཀར་ཡངས་པོས་ས་ཆེན་འགེངས་འདི་རྨད།། “ཆེན་པོའི་མཚན་གྱི་མཁའ་དབྱིངས་མཐོར་བསྙེགས་ཀྱང་།། སྐྱེས་སྦྱང་གཤོག་རྩལ་དམན་པས་སར་ལྷུང་བ།། ཁྱིམ་བྱའི་འཕྱོར་འགྲོས་ལས་འདས་རྒོད་པོའི་རྩལ།། གནམ་འཕང་མཐའ་རུ་གཅོད་ཁྱེད་སུ་ཡིས་འགྲན།། སྙིགས་དུས་རྒུད་མུན་སྟོབས་སུ་བདོ་དང་ལྷན།། སྣུམ་ཟད་མར་མེའི་མདངས་ལ་ཕྱོགས་པ་ཡི།། ཤིན་ཏུ་ཉག་ཕྲའི་གསང་ཆེན་བསྟན་པའི་སྲོག། བཤད་དང་སྒྲུབ་པས་གསོས་འདི་སུ་ཡིས་བརྗེད།། ལ་ལ་ཕྱོགས་ཞེན་གྱི་ནས་འཆིང་གྱུར་ཅིང་།། འགའ་ཞིག་རང་མཐོང་རྨོངས་པས་བསྒྲིབས་གྱུར་ཀྱང་།། ཡང་དག་དམ་པའི་སྐྱེས་མཆོག་བཙོ་མའི་གསེར།། “ལན་བརྒྱར་བརྟགས་ཀྱང་རང་གཤིས་འགྱུར་སྲིད་དམ།། རྨད་བྱུང་གསང་ཆེན་སྔ་འགྱུར་རྒྱལ་བའི་བསྟན།། གྲགས་པའི་བ་དན་སྲིད་པའི་བླར་བསྒྲེངས་པ།། མདོ་སྨད་གསེར་ལྗོངས་ལྔ་རིག་ཆོས་ཀྱི་གླིང་།། སྙན་པའི་དཔལ་གྱིས་ས་གསུམ་ཀུན་ནས་མཛེས།། དུས་ཀྱི་དབང་གིས་ཐུབ་པའི་ལུང་རྟོགས་བསྟན།། མིང་གི་ལྷག་མར་ཕྱོགས་པའི་དེ་མ་ཐག། བསྟན་ལ་སྟོན་པ་གཉིས་པ་མཚུངས་བྲལ་རྗེ།། མ་སྨད་སྲིད་པའི་རྒྱན་དུ་ལྷག་པར་གསལ།། ཐུན་མོང་ཐུན་མིན་མདོ་སྔགས་གཞུང་ལུགས་ཀུན།། ཡང་དག་ལུང་དང་རིགས་པས་ཉེར་གཞལ་ཏེ།། ཟླ་མེད་འཆད་རྩོད་རྩོམ་པའི་འཕྲིན་ལས་ཀྱི།། “རྒྱལ་རྔ་གསར་པས་ཁོར་ཡུག་བརྗིད་པར་བྱས།། ཕྱོགས་རེར་ཐལ་རྒྱུག་མ་ཡིན་ཤེས་བྱའི་ཆོས།། མཐའ་དག་གཏན་ལ་འབེབས་མཁས་རོང་ཀློང་རྗེའི།། ཤིང་རྟའི་སྲོལ་འཛིན་གསང་ཆེན་སྔ་འགྱུར་པའི།། བསྟན་སྲུང་ལྕགས་རི་ཆེན་པོ་དེང་འདིར་བསྐྲུན།། ཡོངས་རྫོགས་རྒྱལ་བསྟན་གསེར་གྱི་མཆོད་སྡོང་ཆེར།། ལུང་རྟོགས་ཡོན་ཏན་བྱེ་བའི་དཔལ་འབར་བ།། ཁྱེད་གཅིག་རིན་ཆེན་ནོར་བུའི་ཕྲ་ཚོམས་ཏེ།། ངོ་མཚར་འོད་སྣང་རྒྱང་རིང་ལྷག་པར་འཕེལ།། ཡངས་པའི་ས་ཆེན་གཙུག་ན་མངོན་མཐོ་བ།། འཇིག་རྟེན་སྒྲོན་མེ་དམ་ཆོས་དར་བའི་ཡུལ།། བསིལ་ལྡན་གངས་རིའི་ལྗོངས་ཀྱི་མཚན་སྙན་སྒྲ།། གླིང་ལྔ་མཚོ་བཞིར་ཁྱོད་ཀྱིས་ཁྱབ་པར་བྱས།། ཐུབ་བསྟན་སྙིགས་མར་གྱུར་པའི་གཞན་དབང་གི།། རྙོགས་མ་སྒྲུང་བར་བྱེད་ལ་བདུད་རྩིའི་བཅུད།། རླབས་ཆེན་དག་བྱེད་གསར་པའི་རྒྱུན་འཇོ་བས།། དྭངས་གཙང་བྱི་དོར་བཟང་པོ་ཁྱོད་ཀྱིས་བྱས།། དོན་འགྲུབ་དགྲ་ལྷའི་རྒྱལ་པོ་ཡིད་བཞིན་དབང་།། ནག་ཕྱོགས་བདུད་སྡེའི་གཤེད་དུ་ཆས་པའི་ཚེ།། དཀར་ཕྱོགས་ལྷ་ཡི་རུ་མཚོན་སྲིད་པའི་རྩེར།། སྒྲེང་མཛད་སྣང་ཆུང་གཡུ་ཡི་མེ་ཏོག་རྒྱལ།། མངོན་སྤྱོད་ལས་ལ་གྲུབ་པའི་མཐུ་གོམས་པས།། འཇིགས་རུང་དྲག་ཤུལ་རྡོ་རྗེའི་མེ་ཆར་གྱིས།། མ་རུང་རྒྱལ་འགོང་འཇོམས་ལ་ཆེས་དཔའ་བ།། བདུད་འདུལ་ལས་རབ་གླིང་པ་མཆོག་ཏུ་རྔམ།། དབང་མཛད་དོན་ཡོད་ནོར་བུའི་འཕྲུལ་ཞགས་ཀྱིས།། “བརྟན་གཡོའི་དྭངས་བཅུད་འགུགས་དང་ལྷན་ཅིག་ཏུ།། ཆེ་དགུའི་ཡིད་ཀྱི་བརྟན་པ་འཕྲོག་བྱེད་པ།། ཟིལ་གནོན་གར་གྱི་དབང་ཕྱུག་ཉམས་བརྒྱ་འབར།། ལས་རླུང་དབྱིངས་སུ་དག་པའི་དྭངས་མའི་སྲོག། ཡེ་རླུང་དབུ་མར་འཁྱིལ་བའི་ནཱ་དའི་དབྱངས།། མགྲིན་པའི་རྩ་མདུད་ལྷོད་པོར་ཉེར་ཆགས་པས།། རྒྱང་སྙན་དྲི་ཟའི་གླུ་ཡི་ཁེངས་པ་འཕྲོག། ཀུན་བཟང་ཐུགས་ཀྱི་ཡང་བཅུད་རྫོགས་པ་ཆེ།། དབྱིངས་ཀྱི་མཁའ་འགྲོས་སྲུང་བའི་ཟབ་དོན་མཛོད།། ཀློང་གསལ་དགོངས་པའི་བརྡ་རིས་གསང་བའི་རྒྱ།། འགྲོལ་ལ་དགའ་རབ་དཔའ་བོ་གཉིས་སུ་མིན།། གཟུང་དང་འཛིན་པས་མ་ལྷད་རིག་པའི་གཤིས།། “བློས་བྱས་བཅོས་མའི་གཟེབ་ལས་རྟག་གྲོལ་བ།། རྒྱ་ཆད་ཕྱོགས་ལྷུང་བྲལ་བའི་གནས་ལུགས་དོན།། མངོན་སུམ་རང་གནད་ངེས་པས་ཚད་དུ་བསྐྱལ།། རང་རིག་འཛིན་མེད་མ་བཅོས་རང་ཤར་ཀློང་།། གང་སྣང་དག་པ་ཆོས་དབྱིངས་རྒྱན་དུ་ཤར།། ཚོགས་དྲུག་རང་གྲོལ་བྱར་མེད་རྣལ་འབྱོར་པ།། འཁོར་འདས་རེ་དོགས་སྤང་བླང་རྒྱ་ལས་གྲོལ།། མཐའ་བྲལ་དབུ་མ་ཆེན་པོའི་ལྟ་བ་རྟོགས།། ཟུང་འཇུག་ཕྱག་རྒྱ་ཆེན་པོའི་གོ་འཕང་བརྙེས།། བློ་འདས་ཆོས་ཟད་རྫོགས་པ་ཆེན་པོར་ཕྱིན།། གཞི་ལམ་འབྲས་བུའི་དོན་བཅུད་བདག་གིར་བྱས།། གཞི་དབྱིངས་ཀ་དག་འོད་གསལ་ཆེན་པོ་རུ།། ལྷུན་གྲུབ་སྣང་བ་བཞི་ཡི་རྩལ་རྫོགས་པས།། འཕོ་ཆགས་མཚན་མའི་སྤྲོས་པ་ཡོངས་ཞི་བ།། “གདོད་མའི་རྒྱལ་སར་རང་དབང་སྒྱུར་ཁྱོད་བསྔགས།། ཀུན་བརྟགས་མ་རིག་འཁྲུལ་བས་ལྷད་གྱུར་པའི།། གཞན་དབང་འགལ་རྐྱེན་གདོན་ཚོགས་མཐར་བསྐྲད་དེ།། ཡོངས་གྲུབ་ཚེ་ལྷའི་དཀྱིལ་འཁོར་མགོན་པོ་རུ།། མི་འདའ་བསྐལ་པ་རྒྱ་མཚོར་རྟག་བརྟན་ཤོག། དུས་གསུམ་མཚན་མས་དབེན་པའི་དུས་ཀྱི་ཆ།། བཅུ་གཉིས་དུས་སྦྱོར་རྒྱུ་བའི་རླུང་གི་འགྲོས།། འཕོ་བྲལ་དབུ་མའི་སྲོག་ཏུ་ཡོངས་ཚུད་པའི།། བདེ་མཆོག་དང་པོའི་མགོན་དུ་ཞབས་བརྟན་གསོལ།། ཉི་ཟླའི་ཚེ་དང་བརྟན་གཡོའི་སྙིང་པོའི་བཅུད།། དྭངས་མར་དྲིལ་བའི་མི་ཤིགས་འོད་དཀར་མདངས།། “བླ་ཚེའི་ལྗོན་པར་བསྟིམ་པའི་འཆི་མེད་སྲོག། གསང་གསུམ་གཡོ་བ་མེད་པའི་ཕྱག་རྒྱར་བརྟན།། ཤིན་ཏུ་སྐལ་མེད་ལོག་ལྟའི་འཆིང་བ་ཅན།། མ་རུང་བསམ་སྦྱོར་རྩུབ་པའི་རིགས་ཅན་ལ།། དྲང་སྲོང་དམོད་པའི་ལས་ཀྱི་ཟིལ་ཤུགས་ཀྱིས།། སྙིང་རྗེ་ཁྲོས་པའི་རང་གཟུགས་རྟག་ངོམ་ཤོག། ཞབས་ཟུང་མི་ཤིགས་རྡོ་རྗེའི་རེ་ཁ་ཆེ།། མི་འགྱུར་གཡུང་དྲུང་རིས་ཀྱིས་རྟག་སྲུང་བའི།། ངོ་མཚར་ཆོ་གས་བཀྲ་ཤིས་རྫོགས་ལྡན་དཔྱིད།། ཟླུམ་པོའི་ས་གཞིར་བསྐྱིལ་ལ་གཅིག་ཏུ་སྨོན།། འཇིགས་མེད་སྤོབས་པའི་གཟི་བྱིན་ལྷ་ཡིས་བསྩལ།། ཕུན་ཚོགས་བདེ་ལེགས་བརྒྱ་ཕྲག་ལྷུན་གྱིས་གྲུབ།། ཕན་བདེའི་འབྱུང་གནས་ཡིད་བཞིན་འཁོར་ལོའི་སྒྱུར།། “སྲིད་ན་ཆེ་བའི་དཔལ་གྱིས་ཡུན་མཛེས་ཤོག། མཐའ་ཡས་སེམས་ཅན་མ་བསྒྲལ་དེ་སྲིད་དུ།། མགོན་པོ་ཁྱེད་ཀྱིས་དམ་བཅའི་ཁུར་བཟུང་ནས།། ས་ཆེན་རྡུལ་དང་མཉམ་པའི་ཕྲིན་ལས་ཀྱི།། སྣ་ཚོགས་རོལ་མོས་འགྲོ་ཀུན་རྗེས་འཛིན་ཤོག། ལྷག་བསམ་ཕྱོགས་སུ་མ་ལྷུང་དྲང་པོའི་མདའ།། རེ་སྨོན་སྣ་ཚོགས་དར་གྱིས་རབ་བརྒྱན་པ།། ལེགས་ཚོགས་ངང་གིས་འདུ་བའི་གཡབ་མོ་ཅན།། དེང་འདིར་དུས་རབས་གསར་པའི་སྐྱེས་སུ་འབུལ།། ངག་ལ་བདེན་ཚིག་གྲུབ་པའི་རྟེན་འབྱུང་མཐུ།། མཆོག་གསུམ་ལྷ་དང་སྲུང་མའི་མཐུན་འགྱུར་བཅས།། འཛམ་གླིང་ས་མཐོའི་རྩེ་མོ་གངས་ཅན་ཤར།། “དགོས་འདོད་གཡང་དུ་འཁྱིལ་བའི་རྒྱན་ལ་བཀོད།། ཅེས་དུས་རབས་ཉེར་གཅིག་པར་ཕྱོགས་པའི་དུས་མཚམས་སྤྱི་ལོ་མཁའ་མཁའ་མཁའ་མིག་སྟེ། སྟོང་པའི་ཐིག་ལེ་སུམ་སྦྲེལ་ལ་བདེ་སྐྱིད་ཟུང་འབྲེལ་གྱི་ཨང་གཟུགས་ཀྱིས་མཚན་པའི་གནམ་ལོའི་འཛུམ་ཞལ་གསར་དུ་ངོམ་པའི་སྔ་ནུབ་ཏུ། རྒྱ་ནག་པོའི་ཤར་ཕྱོགས་ཀྱི་གྲོང་ཁྱེར་ཧྲང་ཧེ་ཡི་ཐོག་ཁང་མཐོན་པོ་ཞིག་གི་ཡང་རྩེའི་རང་སྤྱིལ་ནས། དྲང་པོར་སྲོང་བའི་སྨྲ་བ་ལ་གཅིག་ཏུ་འདུན་པ་རྫོགས་ཆེན་པདྨ་སྐལ་བཟང་གི་སྨྱུག་རྩེ་ལས་ཐོན་པའོ།། |
Subscribe to:
Post Comments (Atom)
0 comments:
Post a Comment