Thursday 27 December 2012
01:25 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །གསེར་ལྗོངས་བླ་མ་རུང་དྲན་གླུ་དཔྱིད་ཀྱི་རྒྱལ་མོའི་མགུར་དབྱངས།
།
རྨི་ལམ་འོད་གསལ་ལས།
ཨེ་མ་ཧོ། །
དྭངས་གཙང་ཡིད་འོང་དབེན་པའི་དགའ་ཚལ་དུ། །
དད་གུས་དག་སྣང་འདྲིས་པའི་ཞིང་ཁམས་སུ། །
རང་སྣང་ལྷུན་གྲུབ་བདེ་ཆེན་དབང་གི་གནས། །
འོད་གསལ་རྒྱན་དུ་འགྱུར་བ་ཉུང་ཉུང་མིན། །
གངས་དཀར་འདབ་དྲུག་ཤེལ་གྱི་ལྷུན་པོའི་སྤོར།
།
དཀར་གསལ་ཟླ་ལྟར་མཁྱེན་བརྩེ་ནུས་པའི་དཔལ། །
འོད་གསལ་ལྷུན་གྲུབ་བདེན་པའི་རང་གཟུགས་ལ།
།
དམ་ཚིག་དབུགས་དབྱུང་བསྟེན་པ་ཐེངས་ཅིག་མིན། །
མདུན་མཁར་དྲི་མེད་མདངས་ལྡན་རྒྱ་མཚོའི་དབུས།
།
རབ་མཛེས་དབང་གཞུས་འཁྱུད་པའི་ཚོགས་ཞིང་དཀྱིལ། །
རབ་འབྱམས་རྒྱལ་བའི་སྤྱི་གཟུགས་རིན་པོ་ཆེ།
།
ཡིད་བཞིན་ནོར་བུ་དྲན་ཤེས་རྒྱན་དུ་བཞུགས།
།
དད་གསུམ་སྐྱེད་ཚལ་རྒྱུད་ནས་འཁྲུངས་པའི་གཏེར།
།
སོར་བཅུའི་སྙིམ་པ་འདབ་སྟོང་པད་མའི་ཚོམས། །
སྙིང་གར་ཆོས་འཁོར་རྒྱན་དུ་ལེགས་བཀོད་པས།
།
༧ཆོས་རྗེ་དམ་པའི་བྱིན་རླབས་ཨེ་མ་ཧོ།
།
མཚན་དཔེ་སྐུ་ཡི་ལང་ཚོ་ལྷང་ངེར་གསལ།
།
ཚངས་དབྱངས་གསུང་གི་སྙན་པ་ལྷན་ནེར་ཐོས།
།
མཁྱེན་བརྩེ་ཐུགས་ཀྱི་རིག་པ་ལྷམ་མེར་མཇལ། །
ཡིད་བཞིན་ནོར་བུའི་གསང་གསུམ་ཨེ་མ་ཧོ། །
མཚོ་བྱུང་པདྨ་དགྱེས་པའི་རྡོ་རྗེའི་གར།
།
བཤད་སྒྲུབ་ཐོས་བསམ་སྒོམ་པའི་མཛའ་ན་མོ།
།
ལུང་རྟོགས་གེ་སར་བཞད་པའི་ཆོས་གླིང་མཆོག
།
བླ་རུང་ལྔ་རིག་དགའ་ཚལ་ཡང་ཡང་དྲན། །
མཁའ་དབྱིངས་འཇའ་འོད་འ྇ཁྲིགས་པའི་དབེན་ཁྲོད་དང་། །
ནགས་ཚལ་ཀུན་ཏུ་དགའ་བའི་སྐྱེད་ཚལ་བར། །
གསང་ཆེན་འོད་སྐུར་སྨིན་པའི་བླ་མ་རུང་། །
མ་སྒོམ་ཡིད་ཀྱི་རྒྱུན་དུ་རྟག་ཏུ་འཆར། །
ཨེ་མ་ཆོས་རྗེ་བླ་མའི་གདན་ས་མཆོག
།
གསེར་ལྗོངས་མདོ་སྔགས་རིག་པའི་འབྱུང་གནས་ཆེ།
།
གནས་ཆེན་མདོ་ཁམས་རི་བོ་རྩེ་ལྔ་རུ། །
ཀུན་ཏུ་བཟང་པོ་དོན་གཉིས་ལྷུན་གྲུབ་གླིང་།
།
མི་བསྐྱོད་རྡོ་རྗེ་ཉེས་ཚོགས་རང་གྲོལ་གླིང་།
།
རིན་ཆེན་འབྱུང་ལྡན་འདོད་དགུ་ཀུན་འབྱུང་གླིང་། །
སྣང་བ་མཐའ་ཡས་སྣང་སེམས་དབང་སྡུད་གླིང་།
།
དོན་ཡོད་གྲུབ་པ་ཕྱོགས་ལས་རྣམ་རྒྱལ་གླིང་། །
དེ་བཞིན་ལྷན་སྐྱེས་ཀུན་བཟང་ཆོས་ཀྱི་གླིང་།
།
བདེ་ཆེན་སྔགས་སྐྱེས་ལོངས་སྤྱོད་རྫོགས་སྐུའི་གླིང་། །
ཞིང་སྐྱེས་སྤྲུལ་སྐུ་མཁའ་འགྲོ་འདུ་བའི་གླིང་། །
རིགས་ལྔ་རྒྱལ་བའི་གསང་གསུམ་ཡང་ཡང་དྲན། །
ཧ་ཤང་ཡང་དག་བདུད་ལས་རྣམ་རྒྱལ་གླིང་།
།
དགེ་བསྙེན་རྣམ་དག་ལེགས་ཚོགས་ཆར་འབེབས་གླིང་། །
ཕྱོགས་བཅུ་རྒྱལ་བ་སྲས་བཅས་འདུ་བའི་ཞིང་།
།
རིག་འཛིན་རྒྱལ་བའི་གདན་ས་ཨེ་མ་ཧོ།
།
ལྔ་རིག་མཁས་པའི་དབང་ཕྱུག་འདི་ནས་དར།
།
མཆོག་ཐུན་དངོས་གྲུབ་ཐོབ་པ་འདི་ནས་རྒྱས།
།
མཁས་བཙུན་བཟང་པོའི་ཕྲིན་ལས་ཕུན་སུམ་ཚོགས། །
འཛམ་གླིང་འཛིན་མའི་རྒྱན་གཅིག་བླ་རུང་རྒྱལ།
།
མཁའ་སྤྱོད་རྒྱལ་བ་ཀུན་འདུས་དག་པའི་ཞིང་།
།
ས་སྤྱོད་མུན་པ་ཀུན་བསལ་ཉི་ཟླའི་སྒྲོན། །
བཤད་སྒྲུབ་འོད་སྟོང་འབར་བའི་བླ་མ་རུང་། །
༧ཆོས་རྗེ་དམ་པའི་གདན་ས་སྙིང་ནས་དྲན། །
ངེས་འབྱུང་ལྡན་པའི་རབ་བྱུང་འདུས་པའི་སྡེ།
།
བྱང་ཆུབ་སེམས་གཉིས་སྤྱོད་པའི་རྒྱལ་བའི་སྲས། །
གསང་ཆེན་སྨིན་གྲོལ་ཐོབ་ཀྱི་རྣལ་འབྱོར་པ། །
ཡང་གསང་རྫོགས་ཆེན་སྟོན་པ་འདི་ནས་འཁྲུངས།
།
དེང་དུས་དགེ་བཅུ་ཚུལ་བཞིན་སྤྱོད་པའི་གནས།
།
སྐྱེ་རྒུ་བསོད་ནམས་དམ་པའི་ཞིང་ཁམས་འདི། །
ནམ་ཡང་མི་ཉམས་འཇིག་རྟེན་དཔལ་དུ་ཤར། །
སྐལ་བཟང་རྣམ་འདྲེན་བླ་རུང་རྒྱལ་གྱུར་ཅིག །
ཅེས་པ་འདི་ཡང་རབ་རྒྱན་ཆུ་འབྲུག་མགོ་ཟླའི་ཟླ་བ་ཉ་ཡོངས་སུ་གང་བའི་དུས་སམ་༧ཆོས་རྗེ་དམ་པ་ཡིད་བཞིན་ནོར་བུའི་འདས་མཆོད་སྐབས་སུ་རྨི་ལམ་བཟང་པོའི་དག་སྣང་དང་གང་འཆར་བ་འགའ་ཞིག་མཁན་ཆེན་བླ་མ་འམ་རིག་འཛིན་དཔལ་དགྱེས་པ་རྡོ་རྗེས་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་གི་མཆོད་འབུལ་ཚོགས་བསགས་སྐབས་སུ་གསོལ་བ་འདེབས་པ་དགེའོ།
། ཕྱི་ལོ་༢༠༡༢ ༡༢ ༢༨་ལའོ། །
Subscribe to:
Post Comments (Atom)
0 comments:
Post a Comment