Sunday, 9 December 2012
00:59 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །རྗེ་ཀུན་མཁྱེན་འཇིགས་མེད་དབང་བོའི་མཛད་རྗེས་ལ་བསྟོད་པ་
པདྨ་དཀར་བོའི་ཆུན་འཕྱངས་ཞེས་བྱ་བ་བཞུགས་སོ། །
སྒྲོལ་མ་ཚེ་རིང་གིས་བརྩམས།
༄༅། །ལྷ་ཅིག་ཕྱག་ན་པདྨོའི་ཐུགས་རྗེའི་སྤྱན་འོག་ཏུ། །
དགེ་བཅུའི་ལང་ཚོ་རབ་རྒྱས་མདོ་སྨད་འཛིན་མའི་ལྟོར། །
ཆོས་རྩེན་རྒྱལ་སྲས་དབྱར་གྱི་ལང་ཚོ་སྦྲུམ་པ་ཡིས། །
དྲི་མེད་དགའ་ལྡན་གྲུ་ཆར་སྐལ་བཟང་དུས་འདིར་བབས། །
མཆོག་གསུམ་ནོར་བུ་མན་ཤེལ་བློ་ཡིས་མངོན་མཁྱེན་པ། །
རྟག་བརྟན་ཚད་མའི་ཡིད་ཆེས་གློག་ཞགས་འཁྱུག་བྱེད་པའི། །
ཐུབ་བསྟན་ནོར་བུའི་སྙིང་བོ་རང་དབང་འགྱེད་ནུས་མཁན། །
དྲན་དབང་མགོན་པོའི་སྐུ་ལ་བསྟོད་པའི་མཇལ་དར་འབུལ། །
བསམ་སྦྱོར་ཀུན་ནས་དམ་པའི་ཞབས་ལ་བསྟེན་ནས་ནི། །
མདོ་སྔགས་གསར་ཞུན་ཐོས་བསམ་ཧུབ་ཀྱིས་འཇིབ་པ་དང་། །
འཆད་རྩོད་རྩོམ་གྱི་གོ་ཆའི་མཁྱེན་རབ་ཀློང་རྡོལ་བས། །
རིགས་པའི་རྣམ་འགྱུར་ཕྲ་མོར་འགྲན་འོས་རྐང་གཉིས་མེད། །
བརྒལ་བརྟག་རྩོད་པའི་རིགས་པ་རྡོ་རྗེའི་ཉག་ཕྲན་གྱིས། །
རྣམ་དཔྱོད་བློ་ཡི་སྒོ་མོར་ཕུལ་སྟེར་ཚབས་ཆེ་བས། །
མཁས་གང་སྒྲུབ་བྱེད་བརྒྱ་སྟོང་དག་ཀྱང་སྐྱེངས་བྱེད་པའི། །
ཀུན་རིག་མཆོག་སྤྲུལ་གཉིས་པ་འཛིན་མའི་ཁྱོན་ན་དབེན། །
སྒྲ་སྙན་སྡེབ་སྦྱོར་ཆུ་ཀླུང་ཆེན་མོའི་མཐར་སོན་ཞིང་། །
ཟབ་བརླིང་ཐུགས་གསུང་དབྱར་སྐྱེས་རྔ་ཡི་སྒྲ་དབྱངས་ཀྱིས། །
མཁས་རློམ་བྷྲ་མ་རའི་ཚོགས་ཡིད་དབང་རབ་འཕྲོག་པའི། །
ཐུབ་བསྟན་ཀུན་གསལ་དྲི་མེད་དབྱིངས་ཀྱི་སྨྲ་བའི་རྒྱལ། །
འདོར་ལེན་ཉེས་ལྟུང་དྲི་མའི་དུཿཁས་མ་གཟིར་ཞིང་། །
སྐུ་ལུས་ཚུལ་ཁྲིམས་དྲི་ངད་རྒྱང་རིང་འཕྲོ་བ་ཡིས། །
བྱང་ཆུབ་སེམས་དཔའི་བསླབ་པ་དུས་ཀུན་འཛིན་བྱེད་པ། །
ཉིན་བྱེད་བསྟན་པ་ཁོ་ནའི་དོན་བྱེད་འགྲོ་བའི་མགོན། །
རང་གཞན་དགོན་སྡེའི་ཁ་དོག་རིས་སུ་མ་ཆད་པར། །
གྲྭ་སློབ་ཡོན་བདག་རྒྱ་དང་སོག་བཅས་དབྱེར་མེད་དུ། །
ལོ་དང་ཟླ་ལྟར་འགྱུར་མེད་བག་ཡོད་བརྟུལ་ཞུགས་ཀྱིས། །
བསྟན་པའི་མཆོད་མེ་ཇི་སྲིད་བསྒྲོན་པའི་ཡེ་ཤེས་སྐུ། །
རང་དོན་འཁྲི་བ་ཡོངས་སྤངས་འགྲོ་དོན་ཐུགས་ལ་འགོངས། །
དགེ་ལྡན་ལུགས་ལ་སྔར་མེད་ས་བོན་བསྐྲུན་པ་དང་། །
ཉམས་པའི་མེ་རོ་གསོས་ཏེ་ཤེས་རྒྱུད་ལྗོན་པ་རྒྱས། །
སྐལ་ལྡན་ངུར་སྨིག་འཆིང་བའི་སྐྱབས་ཅིག་རྗེ་བཙུན་མཆོག །
བོད་ཡུལ་སྟོད་སྨད་མདོ་དབུས་ཁམས་གསུམ་མཐའ་དག་དང་། །
ཉི་ཕྱོགས་རྒྱ་མཚོའི་མཐའ་བར་ཞབས་ཀྱིས་བཅགས་མཛད་དེ། །
གདོན་བགེགས་ནད་རིམས་བཅས་ཀྱི་འཇིགས་པ་འཇོམས་གྱུར་ནས། །
གདུལ་བྱའི་དོན་ཀུན་མངོན་མཐོ་ངེས་ལེགས་ལམ་ལ་སྦྱར། །
སྲིད་པའི་ནད་བརྒྱ་སེལ་བའི་རིན་ཆེན་སྨན་མཆོག་དང་། །
མཐར་འཛིན་འཆིང་རྒྱ་གཅོད་པའི་ཤེས་རབ་རལ་གྲི་ཞེས། །
དགེ་སྦྱོར་ལས་ལ་གཞོལ་བའི་སྒོམ་ཆེན་མང་པོས་ཀྱང་། །
བསྟོད་པའི་ཚིག་གི་མེ་ཏོག་རིག་པའི་དཔའ་བོར་མཆོད། །
དགེ་འདུན་ཆུ་ཕྲན་ཚོགས་ཀུན་གྲྭ་ཚང་རྒྱ་མཚོར་བཅུག །
མཐའ་ཡས་དགོན་སྡེ་ཞལ་གྲངས་བཞི་བཅུར་ཉེ་བ་ལྷག །
གསར་སྐྱོང་ཉམས་གསོའི་ལས་ཀྱིས་བཤད་སྒྲུབ་རྒྱུན་བཟང་ཚུགས། །
བསྟན་པ་ཡུན་རིང་གནས་པར་གཞལ་མེད་བདུད་རྩི་བསྩལ། །
བཀྲ་ཤིས་གཡས་སུ་འཁྱིལ་བའི་ཆོས་ཀྱི་སྐྱེད་ཚལ་གཙོས། །
རྒྱལ་ཚབ་སྐུ་དང་འདུ་ཁང་གསར་བ་མང་བཞེངས་ཤིང་། །
རིག་བཅུའི་ཕྱག་དཔེའི་རི་རབ་རྣམ་གྲངས་ཁྲིར་ཉེ་བས། །
མཁས་བཙུན་བཟང་གི་སྙན་གྲགས་བ་དན་སྲིད་གསུམ་ཁྱབ། །
ཀྱེ་ཀྱེ་མ་གྱུར་འགྲོ་བའི་མགོན་པོ་འཇམ་པའི་དབྱངས། །
ཀློང་ཀློང་སྲིད་པའི་ཁྱོན་གྱི་མུན་སེལ་བཅུ་གཉིས་བདག །
གསལ་གསལ་འོད་ཀྱི་འདབ་མའི་སྣང་བ་གཞལ་དཀའ་ཡང་། །
དྲན་དྲན་ངག་གི་རྒྱུད་མངས་བློ་ཆུང་བློ་ཡིས་དཀྲོལ། །
མཐའ་ཀླས་འགྲོ་བ་ཆོས་ཁྲིམས་དར་གྱི་མདུད་པས་བྱམས་པར་བྱིལ་བྱེད་ཅིང་། །
རྒྱལ་ཁྲིམས་གསར་གྱི་གཉའ་ཤིང་སྐལ་བར་ཐུགས་ཀྱི་སྙིམ་པས་ཁུར་མཛད་པའི། །
སྐྱབས་གསུམ་རྒྱལ་བ་ཀུན་མཁྱེན་འཇིགས་མེད་དབང་བོར་བསྟོད་པ་པད་དཀར་གྱི། །
ཆུན་འཕྱངས་ཞེས་བྱའི་གླུ་དབྱངས་ལྷ་དར་ཡུག་ཅིག་ཚུལ་དུ་གུས་པས་འབུལ། །
ཞེས་པ་ནི་ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པའི་ཞིབ་འཇུག་སློབ་གླིང་གི་སློབ་མ་སྒྲོལ་མ་ཚེ་རིང་གིས་གུང་ཐང་བསྟན་པའི་སྒྲོན་མེས་མཛད་པའི་རྗེ་ཀུན་མཁྱེན་འཇིགས་མེད་དབང་བོའི་རྣམ་ཐར་རྒྱས་པ་མ་པར་ཐར་བ་རྒྱལ་སྲས་རྒྱ་མཚོའི་འཇུག་ངོགས་ཞེས་བྱ་བ་དང་།
བླ་བྲང་དགོན་པའི་གདན་རབས་རིམ་བྱུང་གི་འབྲེལ་ཡོད་དཔེ་དེབ་ལ་བལྟས་རྗེས་སེམས་པའི་མཚོ་མོའི་ངོགས་སུ་དད་གུས་ཀྱི་རྦ་རླབས་དྲག་ཏུ་འཕྱུར་བས།
བློ་ཆུང་གི་སྨྱུག་རྩེ་ལས་རྗེ་ཁོང་གི་མཐའ་ཀླས་པའི་མཛད་རྗེས་ཀྱི་བརྗོད་པ་འཁྱོངས་དཀའ་རུང་།
རྗེས་དྲན་དང་དད་གུས་ཀྱི་སེམས་པ་ཞིག་མཚོན་བྱེད་དུ་རབ་བྱུང་བཅུ་བདུན་པའི་ཆུ་ཕོ་འབྲུག་གི་ལོའི་བཟོད་པ་ཟླ་བའི་ནག་ཕྱོགས་དགའ་བ་གསུམ་པ་ཧོར་ཟླ་བཅུ་བའི་ཚེས་བཅུ་གསུམ་ཉིན་ལ་ཀྲུང་དབྱང་མི་རིགས་སློབ་གྲྭ་ཆེན་མོ་ནས་པད་དཀར་ཆུན་པོ་ཞིག་གི་ཚུལ་དུ་ཕུལ་བ་དགེའོ།
།
༄༅། །སློབ་སྟོན་དགེ་རྒན་གྱི་གསལ་བཤད་མདོར་བསྡུས། ཀྲུང་དབྱང་མི་རིགས་སློབ་གྲྭ་ཆེན་མོའི་བོད་རིག་པའི་ཞིབ་འཇུག་སློབ་གླིང་གི་མངོན་བརྗོད་རིག་པའི་རྣམ་བཤད་བློ་གསལ་འཇུག་ངོགས་ཞེས་བྱ་བ་བཞུགས་སོ། །ཞེས་པའི་སློབ་ཚན་གྱི་ལས་བྱ་ཞིག་ཏུ་སློབ་མ་སྒྲོལ་མ་ཚེ་རིང་གིས་བྲིས་པའི་རྗེ་ཀུན་མཁྱེན་འཇིགས་མེད་དབང་བོའི་མཛད་རྗེས་ལ་བསྟོད་པ་པདྨ་དཀར་བོའི་ཆུན་འཕྱངས་ཞེས་བྱ་བ་བཞུགས་སོ། །ཞེས་པ་དྲངས་ནས་ལེགས་པར་བཀོད་པ་ཀུན་ནས་དགེ་བར་གྱུར་ཅིག་གོ། །
Subscribe to:
Post Comments (Atom)
0 comments:
Post a Comment