Monday 3 December 2012
23:17 | 
Posted by
༄༅།། ཨེ་མ་ཧོའི་རིག་མཛོད་། |
༄༅།
།མཁའ་འགྲོ་བདེ་ཆེན་དབང་མོ་འམ་བདེ་གཡང་གི་འཁྲུངས་སྐར་ལ་ཕུལ་བའི་
དུང་བརྩེ་རིན་ཆེན་མན་ཤེལ་དཀར་པོའི་ཕྲེང་བ་ཞེས་བྱ་བ།
ན་མོ་གུ་རུ་ཛྙྰ་ན་ཏྰ་ར་མ་ཧྰ་སུ་ཁ་ཡེ། །
ལྷན་སྐྱེས་མཁའ་འགྲོའི་བདེ་ཆེན་དབྱིངས་རིག་ཀུན་བཟང་གཉུག་མའི་མཁའ་ཀློང་ནས། །
ཞིང་སྐྱེས་མཁའ་འགྲོའི་དག་མཉམ་དབང་ཕྱུག་ལྷ་མོ་རྒྱ་མཚོ་སྤྲིན་བཞིན་སྤྲོས། །
སྔགས་སྐྱེས་མཁའ་འགྲོའི་ཐབས་ཤེས་རིག་ཆར་བདེ་གཡང་མཛེས་མའི་སྒྱུ་རྩལ་ཅན།
།
རྩ་གསུམ་རྒྱལ་བ་ཞི་ཁྲོའི་ཁྱབ་བདག་བདེ་ཆེན་གཡང་གི་རྒྱལ་མོར་འདུད།
།
གནས་ཡུལ་མཁའ་སྤྱོད་སྦས་པའི་ཞིང་ཁམས་སུ། །
སྐལ་ལྡན་རིག་འཛིན་དགྱེས་པའི་བྲོ་ར་ནས། །
ཅི་སྣང་སྒྱུ་འཕྲུལ་ཟློས་གར་རྩེན་མཁས་མའི། །
ཡེ་ཤེས་མཁའ་འགྲོའི་བྱིན་རླབས་དུས་ལ་བབས། །
ཤར་ཕྱོགས་རྡོ་རྗེ་དབྱིངས་ཀྱི་དཀྱིལ་འཁོར་ནས། །
མཁའ་འགྲོ་མཉམ་མེད་དཔལ་ལྡན་ཆོས་ཀྱི་སྒྲོན། །
དཀར་གསལ་ལོངས་སྤྱོད་རྫོགས་སྐུའི་ཞི་བདེའི་གཡང་། །
འབད་མེད་ལྷུན་གྱིས་འགྲུབ་པའི་དངོས་གྲུབ་སྩོལ། །
ལྷོ་ཕྱོགས་རིན་ཆེན་གཏེར་གྱི་དཀྱིལ་འཁོར་ནས། །
མཁའ་འགྲོ་མཚུངས་མེད་རིན་ཆེན་ཆོས་ཀྱི་སྒྲོན། །
སེར་གསལ་ལོངས་སྤྱོད་རྫོགས་སྐུའི་རྒྱས་པའི་གཡང་། །
གང་བསམ་ལྷུན་གྱིས་འགྲུབ་པའི་དངོས་གྲུབ་སྩོལ། །
ནུབ་ཕྱོགས་བདེ་ཆེན་དབང་གི་ཕོ་བྲང་ནས། །
མཁའ་འགྲོ་དྲི་མེད་པདྨ་ཆོས་ཀྱི་སྒྲོན། །
དམར་གསལ་ལོངས་སྤྱོད་རྫོགས་སྐུའི་དབང་གི་གཡང་། །
སྣང་སྲིད་དབང་དུ་སྡུད་པའི་དངོས་གྲུབ་སྩོལ། །
བྱང་ཕྱོགས་སྣ་ཚོགས་འཇའ་སྤྲིན་ཞིང་ཁམས་ནས། །
མཁའ་འགྲོ་གྲངས་མེད་ཀརྨ་ཆོས་ཀྱི་སྒྲོན། །
ལྗང་གསལ་ལོངས་སྤྱོད་རྫོགས་སྐུའི་ཕྲིན་ལས་གཡང་། །
དགྲ་བགེགས་ཚར་གཅོད་དྲག་པོས་དངོས་གྲུབ་སྩོལ། །
དབུས་ཕྱོགས་ཀུན་བཟང་དོན་གྱི་འོག་མིན་ནས། །
མཁའ་འགྲོ་སྤྲོས་མེད་ཀུན་བཟང་ཆོས་ཀྱི་སྒྲོན། །
མཐིང་གསལ་ཆོས་སྐུ་རྒྱལ་བའི་གཉུག་མའི་གཡང་། །
རིག་འཛིན་ཆོས་རྒྱལ་མཆོག་གི་དངོས་གྲུབ་སྩོལ། །
ཕྱོགས་དུས་རྒྱལ་དང་རྒྱལ་སྲས་ཡེ་ཤེས་དཔལ། །
མཁའ་ཁྱབ་འགྲོ་འདྲེན་པའི་ཐུགས་རྗེ་ཅན། །
བདེ་ཆེན་གཡང་གི་རྒྱལ་མོ་སྤྲུལ་འཁོར་གྱིས། །
མཆོག་ཐུན་དངོས་གྲུབ་མ་ལུས་མྱུར་ཏུ་སྩོལ། །
སྐུ་མཆོག་ལང་ཚོ་བཀྲག་མདངས་འོད་ཟེར་འབར། །
གསུང་དབྱངས་སྙན་འཇེབས་ཟབ་རྒྱས་ཆོས་སྒྲ་སྒྲོག །
ཐུགས་རྗེ་ཐབས་མཁས་སངས་རྒྱས་ཡེ་ཤེས་དཔལ། །
དགྱེས་པ་རྡོ་རྗེའི་སྙིང་དཀྱིལ་ཁབ་ཏུ་བཞུགས། །
འཁྲུངས་སྐར་སྨིན་དྲུག་ཟླ་བའི་གཟའ་སྐར་འཆར། །
བཀྲ་ཤིས་བདེ་ལེགས་ཕུན་སུམ་ཚོགས་པའི་ཉིན། །
ཕྱྭ་ཆ་བདེ་བའི་གཡང་བཀྲམས་ལྷ་འབོད་བཅས། །
ཀླུ་བསྐུལ་ཚོགས་བསགས་དགེ་བའི་སྨོན་ལམ་འདེབས། །
མཁའ་འགྲོའི་ཟབ་ཆོས་གཏེར་བདག་བདེ་ཆེན་གཡང་། །
དུང་ཟླ་དགྱེས་ཞལ་འཛུམ་པའི་འོད་སྣང་ལས། །
མཁའ་སྤྱོད་ས་སྤྱོད་གནས་སུ་རྣལ་འབྱོར་མས། །
བདག་སྙིང་བདེ་སྟོང་རིག་པའི་གཏེར་སྒོ་ཕྱེས། །
སྐུ་ཚེ་རབ་བརྟན་འཇའ་ལུས་འཕོ་ཆེན་བཞུགས། །
གསུང་དབྱངས་ལེགས་བཤད་ཟབ་རྒྱས་གདམས་པས་ཕྱུག །
ཐུགས་རྗེ་བྲལ་སྨིན་ཡོན་ཏན་ཀུན་ལྡན་པའི། །
གསང་གསུམ་མཁའ་འགྲོའི་གཙོ་མོ་རྒྱལ་གྱུར་ཅིག །
རིག་འཛིན་རྣམ་བཞི་བགྲོད་པའི་གྲོགས་ཀྱི་མཆོག །
ཆོས་ལོངས་སྤྲུལ་གསུམ་དགོངས་པའི་ས་ལམ་འཁན། །
ཐབས་ཤེས་ཟུང་འཇུག་རྒྱལ་སར་འཁྲིད་མཛད་མ། །
རྗེ་བཙུན་བདེ་ཆེན་དབང་མོ་ཞབས་བརྟན་ཤོག །
ཅེས་པ་འདི་ཡང་རབ་གནས་ཆུ་འབྲུག་སྨིན་ཟླའི་གཟའ་ཚེས་དགེ་བ་འམ། ཕྱི་ལོ་ ༢༠༡༢ ༡༢
༤
ཉིན་སྙིང་གྲོགས་བདེ་གཡང་གི་འཁྲུངས་སྐར་དུས་ཆེན་ལ་སྙིང་ནས་དུང་བའི་དབྲ་བན་དཔལ་དགྱེས་པ་རྡོ་རྗེས་དབྱིན་ཡུལ་ཨེ་ཝྃ་རིག་པའི་ཆོས་ཚོགས་ནས་སྐུ་ཚེ་ཞབས་པད་བརྟན་དུ་ཆེད་དུ་ཕུལ་བས་ཐུགས་བརྩེས་དུང་བའི་མཁའ་ཀློང་ཡངས་པ་ནས་ནམ་ཡང་འབྲལ་བ་མེད་པའི་རྒྱུ་རུ་གྱུར་ཅིག་གུ།།
།།
Subscribe to:
Post Comments (Atom)
0 comments:
Post a Comment