Thursday, 14 March 2013
05:56 | 
Posted by
༄༅།། ཨེ་མ་ཧོའི་རིག་མཛོད་། |
སྐྱིད་ལུང་དྲན་གླུ།
ཀ་དག་ཆོས་སྐུའི་སྟོན་པ་རྡོ་རྗེ་འཆང་། །
ཁ་བའི་ལྗོངས་བྱོན་ཡེ་ཤེས་རྡོ་རྗེ་ཡིས། །
ག་བུར་འཛིན་འདྲའི་ཐུགས་བསྐྱེད་ཀྱིས་བསྐྲུན་པའི། །
ང་ཡི་བསྙེན་གནས་སྐྱིད་ལུང་དགོན་①དེ་དྲན། །
ཅ་རེར་སྤྱོད་བཟང་བག་ཡོད་ལ་གནས་ཤིང་། །
ཆ་རྒྱུས་ཡོད་མེད་གང་ཡང་བྱམས་བརྩེས་སྐྱོང་། །
ཇ་ཆང་ཟས་སོགས་ཀུན་ལ་གཏོད་ཕོད་ལྡན། །
ཉ་ཆུ་ལྟར་མཐུན་སྐྱིད་ལུང་ལྷ་སྡེ་དྲན། །
ཏ་ཐཱ་ག་ཏའི་ཟབ་གསང་སྙིང་པོའི་གནད། །
ཐ་མལ་ཤེས་པའི་རང་ངོ་ངོ་ཤེས་ཀྱང་། །
ད་དུང་ཕྱོགས་མེད་ཐོས་མང་འཚོལ་བ་ཡི། །
ན་སོ་རྒན་གཞོན་སྐྱིད་ལུང་གྲྭ་ཚོགས་དྲན། །
པ་ཏྲའི་རིས་ལྟར་འཁྱོག་པའི་གཡོ་སྒྱུ་བྲལ། །
ཕ་ཁུ་རྒན་རབས་ཀུན་ལ་གུས་བཀུར་ལྡན། །
བ་སོའི་མདངས་ལྟར་དཀར་བའི་སྤྱོད་གཙང་ཅན། །
མ་སྨད་སྐྱིད་ལུང་མོ་སྨན་ཚོགས་རྣམས་དྲན། །
ཙ་རི་ཏྲ་ལྟར་བྱིན་རླབས་ན་བུན་འཐུལ། །
ཚ་གྲང་སྙོམས་ཤིང་ཡུལ་གྱི་ཆགས་ཚུལ་མཛེས། །
ཛ་ཡའི་བསྟན་སྲུང་གཉུག་མར་གནས་པའི་རྟགས། །
ཝ་ལེར་གསལ་བའི་སྐྱིད་ལུང་གནས་རྣམས་དྲན། །
ཞྭ་མོའི་ཏོག་ལྟར་དགྲ་འོག་མི་འགྲོ་ཞིང་། །
ཟྭ་རྒོད་ལྟ་བུའི་གདུག་སེམས་མི་ལྡན་པ། །
འ་འུར་སྟོང་གཏན་ཀུ་ཅོ་མི་སྒྲོགས་པའི། །
ཡ་མེད་སྐྱིད་ལུང་སྟག་ཤར་ཚོགས་རྣམས་དྲན། །
ར་ལུག་རྟ་ནོར་ལ་སོགས་ཕྱུགས་རིགས་ཀྱིས། །
ལ་ལུང་རི་ཀླུང་མ་ལུས་ཡོངས་གང་ཞིང་། །
ཤ་མར་ལ་སོགས་ཟས་རིགས་ཀུན་འཛོམས་པའི། །
ས་བཟང་སྐྱིད་ལུང་ཡུལ་དེ་རྟག་ཏུ་དྲན། །
ཧ་ཅང་རྨད་བྱུང་སྐྱིད་ལུང་དགེ་མཚན་འོད། །
ཨ་སྔོན་ཉི་ཟླའི་ཟེར་དང་ལྷན་ཅིག་ཏུ། །
བསིལ་ལྡན་ཀུན་གསལ་བུ་མོའི་མཛེས་རྒྱན་ལ། །
ནམ་ཡང་ནུབ་མེད་འབར་བར་སྙིང་ནས་སྨོན། །
①
སྐྱིད་ལུང་དགོན་ནི་མདོ་མཁྱེན་བརྩེ་ཡེ་ཤེས་རྡོ་རྗེས་རབ་བྱུང་བཅུ་བཞི་པའི་དཀྱིལ་ཙམ་ལ་ཕྱག་འདེབས་གནང་བའི་སྔ་འགྱུར་རྙིང་མའི་དགོན་པ་གསང་སྔགས་ཆོས་སྡེ་གླིང་བྱ་བ་སྟེ། དགོན་སྡེ་འདི་དཀར་མཛེས་ཁུལ་རོང་བྲག་རྫོང་གི་མངའ་ཁོངས་སུ་གནས། །
Subscribe to:
Post Comments (Atom)
0 comments:
Post a Comment