Sunday 30 June 2013
16:22 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །འཛམ་གླིང་ཞི་བདེའི་བྱ་ཕོ་དཀར་པོའི་འཁྲུངས་སྐར་ལ་བཀྲ་ཤིས་བདེ་ལེགས་ཞུ།
།
ན་མོ་བཛྲ་གུ་རུ་པདྨ་ཀ་ར་ཡེ། །
ཀ་དག་སྤྲོས་བྲལ་རིག་པའི་དབྱིངས་ན།
།
ཁ་སྦྱོར་བདུན་ལྡན་ཡན་ལག་རྫོགས་པའི།
།
ག་བུར་མདངས་འཛིན་ཞི་བདེའི་དེད་དཔོན།
།
ང་ཡི་སྙིང་གྲོགས་བྱ་ཕོ་དཀར་པོ།
།
ཅ་དངོས་སྣོད་བཅུད་གཞན་གྱིས་སྤྱོད་ཀྱང་།
།
ཆ་ཡི་ན་ལ་འཛུམ་གྱིས་བསུ་བའི།
།
ཇ་རྩམ་རོལ་མཁས་ཞི་བདེའི་བྱ་ཕོས།
།
ཉ་སོགས་འགྲོ་བར་བྱམས་བརྩེ་གནང་སོང་།
།
ཏ་ཐྰ་ག་ཏྰའི་དགེ་སློང་ཆེན་པོ།
།
ཐ་སྙེད་གཟིགས་པའི་ཚན་རིག་རྒྱལ་པོ།
།
ད་ལྟའི་དུས་འདིར་གངས་རིའི་བདག་པོར།
།
ན་མོ་གུས་པའི་འཁྲུངས་སྐར་བཟང་པོ།
།
པ་ལགས་སྐྱེས་མཆོག་སྐུ་ཡི་འཁྲུངས་སྐར།
།
ཕ་མེས་བརྒྱུད་པའི་བསྟན་སྲིད་སྤྱི་དཔོན།
།
བ་དན་སྐུ་ཚེ་དགུང་དང་མཉམ་ལྟར།
།
མ་ལུས་འགྲོ་བའི་མགོན་དུ་བཞུགས་ཤོག
།
ཙ་རི་ཊ་སོགས་ཆོས་སྐྱོང་ཚོགས་དང་།
།
ཚ་གྲང་དཀའ་ཐུབ་མྱོང་བའི་རིགས་ཀྱིས།
།
ཛ་དྲག་གར་ལ་རྩེན་པའི་སྤྱོད་པས།
།
ཝ་ལེར་འཇིག་རྟེན་དཔལ་དུ་སྨན་ཤོག
།
ཞ་ལོང་ལྟ་བུའི་ལྟ་སྤྱོད་དབེན་པའི།
།
ཟ་འཐུང་ཁོ་ནའི་མི་ཚེ་འདའ་བ་ཡི།
།
འ་ཅན་སེམས་ལ་ཞི་བདེ་འབྲེལ་བར།
།
ཡ་མཚན་ཀུན་མཆོག་དེད་དཔོན་རྒྱལ་ལོ།
།
ར་བར་གངས་རིས་བསྐོར་བའི་ཞིང་ན།
།
ལ་ལུང་ཞབས་ཀྱིས་བཅགས་པའི་ཞལ་བཞེས།
།
ཤ་ཞེན་ཐུགས་ལ་གཉེར་བའི་དམ་བཅའ།
།
ས་སྐྱོང་ཕྲིན་ལས་གཡེལ་བར་མེད་མཛོད།
།
ཧ་ཅང་དགའ་སྤྲོའི་ལྷན་འཛོམས་ཡོང་བའི།
།
ཨ་ལགས་མཆོག་གི་ཞལ་བཟང་དྲོན་མོ།
།
ཧ་ལམ་མཇལ་བའི་བསྐལ་བཟང་འཆར་བས།
།
ཨ་མཚར་བདེ་ཆེན་མྱུར་ཏུ་ངོམས་ཤོག
།
ཨི་ཤྭ་མ་ཏིས་བསྟན་སྲིད་སྐྱོང་ལྟར།
།
ཨུ་ཚུགས་མིན་པར་རྟེན་འབྲེལ་འགྲིགས་པས།
།
ཨེ་མ་གངས་རིའི་རྒྱན་དུ་ཕེབས་ནས།
།
ཨོ་རྒྱན་གཉིས་པའི་ཕྲིན་ལས་སྤེལ་མཛོད།
།
ཅེས་པའང་རབ་རྒྱན་ཆུ་སྦྲུལ་སྣྲོན་ཟླའི་དབང་ཕྱོགས་བཟང་པོ་གཉིས་པར་དབྱིན་ཡུལ་ཨེ་ཝཾ་རྫོགས་ཆེན་ཆོས་ཚོགས་ཁང་ནས་མཁའ་འགྲོ་དཔལ་ལྡན་ལྷ་མོས་བསྐུལ་ངོར་རིག་འཛིན་ཨེ་མ་ཧོས་གང་ཤར་དབྱངས་གསལ་བདེན་པའི་རྟེན་འབྲེལ་སྨོན་ལམ་གྱི་ཆེད་དུ་བཀྲ་ཤིས་བདེ་ལེགས་སུ་གུས་ཕུལ།
།
Subscribe to:
Post Comments (Atom)
0 comments:
Post a Comment