༄༅།། ཨེ་མ་ཧོའི་རིག་མཛོད།

ཆབ་མདོ་ངག་ཕུན།
དཀོན་མཆོག་རིན་ཆེན་རྣམ་པ་གསུམ།།
མི་འབྲལ་སྤྱི་བོའི་གཙུག་ཏུ་བཞུགས།།
བདག་བློའི་རྨོངས་པ་ཡོངས་བསལ་ནས།།
ཤེས་རབ་སྒྲོན་མེ་གསལ་བར་ཤོག །
བདག་གིས་ལག་གཉིས་སྙིང་ཁར་སྦྱར།།
ཕན་ཐོགས་མེད་པའི་ཆང་རག་དེ།།
སྐལ་ལྡན་བུ་སློབ་ཐམས་ཅད་ཀྱིས།།
སྤང་བླང་འཛོལ་མེད་གནང་བར་མཛོད།།
བདག་ལ་ཤེས་ཡོན་དམན་ན་ཡང་།།
དུག་ཆང་ངན་གོམས་ཐེབས་པ་ལ།།
ཕན་ཐོགས་ཕྲན་བུ་ཡོང་བསམ་ནས།།
ངལ་བ་ལྷོད་མེད་འདི་ཉིད་བྲིས།།
སྔོན་གྱི་སྐྱེས་བུ་དམ་པ་རྣམས་ཀྱིས་ཆང་རག་སྐོར་ལ་ལམ་སྟོན་གནང་བ་རྣམས་ལུང་ འདྲེན་གྱིས་བཀོད་པར་བྱའོ། །དེ་ཡང་ད་ལྟ་སྙིགས་མ་ལྔ་བདོ་བའི་དུས་རབས་འདིར་རང་རེའི་སྐྱེ་བོ་མིག་བློ་ལྡན་ པ་འགའ་ཤས་ཤིག་ལ་ཕན་ཐོགས་འདྲ་བྱུང་ན་བསམ་ནས་བསྒྲིགས་པ་ཞིག་ཡིན་ན་དེ་དོན་ཀུན་ ལ་ཕན་ཐོགས་ཡོང་བའི་རེ་བ་བཅས།
དེ་ཡང་ཉག་བླ་མ་པདྨ་བདུད་འདུལ་གྱིས་གདམས་པ་ལས། “ཆང་ནི་ཉེས་པ་ཐམས་ཅད། ཀུན་གཞི་ཡིན་པ་སྟོན་པས།། ཡང་ཡང་གསུང་བ་ཡིན་ནོ།། བག་མེད་ལོངས་སྤྱོད་པ།། གདམགས་ངག་རླུང་ལ་སྐུར་བ།། རྙེད་དཀའི་དལ་འབྱོར་མི་ལུས།། ཉོས་རྒྱས་མི་དགེ་སྤྱོད་པ། དགེ་བའི་དཔུང་ཚོགས་འཇོམས་པ།། སྒོམ་སྒྲུབ་དགེ་སྦྱོར་གཡེང་ཤོར།། འཆི་བ་གཏན་ནས་མི་དྲན།། འཁོར་བའི་ཉེས་དམིགས་མི་རྟོགས།། ཆགས་སྐྱིད་འདོ་བདེ་སྣང་ཤར།། ལས་འབྲས་ཁྱད་དུ་བསད་པ།།” ཞེས་དང་། ཡང་ཨོ་རྒྱན་རིན་པོ་ཆེས་གསུང་ལས། “ཆང་འཐུང་འདོད་ཆགས་ཞེ་སྡང་།། ལ་སོགས་ཉོན་མོངས་ཀུན་སློངས།། ཞེས་པ་གསུངས་པ་ཡིན་ནོ།།” སྔོན་དུས་དགེ་སློང་ཁྲིམས་ལྡན་ཞིག་ལ་བུད་མེད་ཆང་འཁྱེར་ཞིག་གིས་ར་ཞིག་ཁྲིད་ ནས་འོང་སྟེ། ཁྱེད་ཀྱི་ར་འདི་སོད་དམ་ཡང་ན་ཆང་མི་འཐུང་ངམ། ཡང་ན་མོ་ལ་ཆགས་སྤྱོད་བྱེད་དམ་ཞེས་ལ་སོགས་བརྗོད་པས། དགེ་སློང་དེས་གང་ཡང་བྱེད་མི་ཆོག་སྨྲས་པས། བུད་མེད་དེས་གཅིག་ནི་ངེས་པར་བྱེད་དགོས་ཞེས་སྨྲས་པས། དེ་ནས་དགེ་སློང་བསམ་པར་ཆང་འདི་འཐུང་ན་ཉེས་ཆུང་སྙམ་ནས་ཆང་དེ་འཐུང་བས། ཆང་གིས་བཟི་ནས་འདོད་ཆགས་ལངས་པ་དང་། ར་དེ་བསད་སྡོམ་པ་ཡང་ཤོར་བར་སོགས་ཀྱིས་ཉེས་དམིགས་ཤིན་ཏུ་མང་པོ་ཡོད་པར་གསུངས།
ཡང་མདོ་དྲན་པའི་ཉེར་གཞག་ལས། “ཆང་ལ་བརྟེན་པའི་མི་དག་ནི།། ཆོས་རྣམས་ཀུན་གྱི་སྟ་རེ་ཡིན།། ངོ་ཚ་མེད་པར་བྱེད་མི་མཆོག།།སྤོང་བ་དག་ཏུ་ཉེར་བར་བསྟན།། བློ་ནི་ཤིན་ཏུ་རྨོངས་བསྐྱེད་ཅིང་།། འཇིག་རྟེན་གཉིས་ནི་རྣམ་འཇིག་བྱེད།། ཐར་པའི་ཆོས་ལ་མེ་ལྟར་འབར།། བསྲེག་བྱེད་ཉིད་ནི་ཆང་ཡིན་ནོ།།” ཞེས་དང་ཡང་དེ་ཉིད་ལས། “ཆང་འཐུང་པ་ལ་རྟག་ཏུ་ནི། ཉེས་དམིགས་སུམ་ཅུ་རྩ་གཉིས་ཡོད།། དེ་ཡིས་ཆང་ནི་རྟག་ཏུ་སྤོང་།།” ཞེས་དང་། ཡང་དེ་ཉིད་ལས། “ཆང་གིས་གཡེངས་པའི་མི་དག་ནི།། གསོན་དང་ཤི་བ་དག་དང་མཚུངས།། གང་ཞིག་རྟག་ཏུ་བསོད་འདོད་པས།། ཆང་ནི་རྟག་ཏུ་རྣམས་པར་སྤོངས།” ཞེས་དང་། ཡང་སེང་གེས་ཞུ་བ་ལས། “ཆང་བྱིན་ན་སྐྱེ་བ་ལྔ་བརྒྱ་ལག་སྡུམ་དུ་སྐྱེས་འོ་”ཞེས་དང་། ཡང་དྲང་སྲོང་རྒྱས་པ་ཞུས་ལས། “བསད་ཤ་སྟེར་བ་རྣམས་མ་དག་པའི་སྦྱིན་པར་གསུངས་པའི་ཕྱིར་རོ་”ཞེས། ཡང་མདོ་རྒྱས་པའི་ཉེར་གཞག་ལས། “མི་གང་དག་ནི་ཆང་སྤང་བ།། ཆོས་ཀྱི་ངང་ཚུལ་མཉམ་པར་གཞག། །གང་ན་འཆི་བ་མེད་པ་ཡིན།། གནས་མཆོག་དག་ཏུ་དེ་འགྲོ་འོ།།” ཞེས་དང་། ཡང་སྦྱོང་རྒྱུད་ལས། “ཆང་ནི་བཏུང་བར་མི་བྱ་ཞིང་།། ཤ་ལ་སོགས་པ་བཟའ་མི་བྱ།། སེམས་ཅན་འདོད་པའི་སྦྱོར་བ་ནི།། ནམ་ཡང་བྱ་བ་མ་ཡིན་ནོ།།” ཞེས་དང་། ཡང་དཀྱིལ་འཁོར་ཆེན་པོའི་རྒྱུད་ལས། “མྱོས་པར་འགྱུར་བའི་ལྟུང་བ་རྣམས།། སྦྱིན་པར་མི་བྱ་སྦྱིན་མི་གཞུག། །ཆང་ནི་ཉེས་པ་ཐམས་ཅད་ཀྱི།། རྩ་བ་ཡིན་པར་རྣམ་པར་བཤད།།” ཞེས་དང་།
ཡང་དགེ་སྡིག་རྣམ་པར་འབྱེད་པའི་མདོ་ལས། “ཚེ་འདིར་འབྲུ་ཆང་འཐུང་ཞིང་མྱོས་པ་ནི། ཟངས་ཞུ་འཐུང་བའི་དམྱལ་བར་ལྷུང་ངོ་གསུངས་སོ།” ཞེས་དང་། ཡང་དག་བ་ཅན་གྱི་མདོ་ལས་ཀྱང་། “ཆང་འཐུང་བ་ལ་མངོན་པར་དགའ་བའི་མི་བདག་ལ་ཕན་དང་གཞན་ལ་བདེ་མི་ནུས། རྨོངས་དང་མདོག་ངན་བྱེད་པ་ཆང་ཡིན་ཏེ། ཇི་ལྟར་ཧཱ་ལའི་དུག་བཞིན་དེ་མི་འཐུང་།” ཞེས་དང་། ཡང་མགོན་པོ་ཀླུ་སྒྲུབ་ཀྱིས་ཀྱང་། “ཆོས་དང་འཇིག་རྟེན་གཉིས་ཀྱི་དོན་ཆེན་སྒྲུབ་དགོས་པ་རྣམས་ཆང་འདི་འཐུང་བས་མི་ འཆོར་”ཞེས་དང་། འགྲོམ་སྟོན་པས་ཀྱང་། “མི་ཚེ་ཡུན་རིང་ཐུང་ནམ་འཆི་ཆ་མེད་ལ་ཆོས་ཤིག་བྱ་སྙམ་པས་ཀྱང་ཆང་འཐུང་ན་རྣམ་ གཡེངས་བྱས། ཉིན་མཚན་གར་ཤོར་མི་ཤེས། མི་ཚེ་ཡོད་མ་ཡུད་ལ་འཆོར། ཚེ་ཕྱི་མར་ལག་སྟོང་དུ་འགྲོ་དགོས། ཆང་འཐུང་ན་ཚེ་དིར་ཡང་དོན་ཆེན་སྒྲུབ་དགོས་པ་ཀུན་འཆོར་བ་ཙམ་དུ་མ་ཟད། ཐ་མ་རང་གི་སྲོག་གཅོད་དུ་འགྱུར། ཆང་འཐུང་མགོ་གོས་ཀྱིས་བཏུམས་ནས་ཤི་བ་དང་གྲང་ནས་ཤི་བའམ། གཡང་སར་ལྷུང་བ། རྟ་ཡིས་དྲུད་ནས་བསད་པ། དགྲ་ལག་ཏུ་ཤོར་བ་སོགས་ཆང་འཐུང་ལ་ཆགས་ཏེ་ཆེན་པོ་ཡོང་”ཞེས་དང་། མདོ་དྲན་པའི་ཉེ་གཞག་ལས། “ཆུང་འཐུང་ན་ཚ་དམྱལ་དུ་སྐྱེས་ནས་འཚོད་པ་དང་། ཆུ་བོ་རབ་མེད་ཀྱི་ནང་དུ་སྐྱུར་བ་དང་། དམྱལ་སྲུང་རྣམས་ཀྱིས་ཉ་བཏོན་ཏེ་ལྕགས་བསྲེགས་ལ་བསྡེབས་པ་ལྟར་བྱེད།” ཅེས་དང་།
ཡང་ཨུ་རྒྱན་རིན་པོ་ཆེའི་གསུང་ལས། “སྔགས་པ་ཕུང་བྱེད་རྒྱུ་ནི་ཆང་ནག་ཡིན༔ ཆང་ལ་འདོད་ཞེན་ཞེ་སྡང་གཏི་མུག་དང་༔ ང་རྒྱལ་ཕྲག་དོག་ཉོན་མོངས་མ་ལུས༔ སློང་བའི་རྒྱུ་ཀུན་འདི་ལ་ཚང་བ་ཡིན༔” ཞེས་དང་། བརྟག་གཉིས་ཀྱི་རྒྱུད་ལས། “སུ་ཞིག་ཆང་གིས་མྱོས་གྱུར་པ།། དེ་ལ་གེགས་ནི་མང་པོ་འབྱུང་།།” ཞེས་དང་། ཡང་མདོ་པ་ཉེར་གཞག་ལས། “ཆང་གི་ཉེས་དམིགས་རྒྱས་པར་གསུངས་པ་རྣམས་མདོ་བསྡུས་དེ་བཤད་ན། སེམས་ཅན་དམྱལ་བ་ངུ་འབོད་དུ་སྐྱེ་བར་འགྱུར་རོ།” ཞེས་དང་། ཞབས་དཀར་ཚོགས་དྲུག་རང་གྲོལ་གྱི་གསུང་ལས། “ཆང་གིས་གཡེང་བའི་མི་དག་ནི།། གསོན་ཡང་ཤི་བ་དག་དང་མཚུངས།། གང་ཞིག་རྟག་ཏུ་གསོན་འདོད་ན།། རྟག་པར་ཆང་ནི་རྣམ་པར་སྤོངས།།” ཞེས་དང་། ཡང་”ཆང་ནི་ཉེས་པ་ཀུན་གྱི་གཞི།། རྟག་པར་དོན་ཀུན་མེད་པར་བྱེད།” ཅེས་དང་། ཡང་སློབ་དཔོན་ཀླུ་སྒྲུབ་ཀྱིས་ཀྱང་། “ཆང་གིས་འཇིག་རྟེན་བརྟན་འགྱུར་ཞིང་།། དོན་མལ་ནོར་ཡང་ཟད་པར་འགྱུར།། དེ་བས་ཆང་ནི་རྟག་ཏུ་སྤོངས།།” ཞེས་དང་། དེ་ཡང་ཆང་ནི་བདག་ཅག་གི་སྟོན་པས་རབ་བྱུང་རྣམས་ལ་སྲོག་གི་ཕྱིར་ཡང་འཐུང་མི་ ཆོག་པར་མདོ་སྔགས་སོགས་སུ་གསུངས་པ་ཙམ་མ་ཟད། ཁྱིམ་པ་ལའང་ཆང་འཐུང་ན་ཉེས་དམིགས་ཆེན་པོ་ཡོད་པར་གསུངས་ཡོད། དེ་བཞིན་ཀླུ་སྒྲུབ་དང་ཐོགས་མེད་སོགས་འཕགས་བོད་མཁས་པ་རིམ་བྱོན་གྱིས་ཆང་ནི་ ཉེས་པ་ཐམས་ཅད་ཀྱི་འབྱུང་གཞི་ཡིན་པར་གསུངས།
དེ་ཡང་ཆང་ཞེས་པ་འདིའི་ཉེས་དམིགས་ཅུང་ཟད་གཅིག་སྤྲོས་ན་ཆང་བྱ་བའི་སྨྱོ་ཆུ་ འདི་ནི། “སྔོན་རྒྱལ་མཚོ་བསྲུབས་པ་ལས་ལྷ་མོ་མཛེས་སྡུག་མཐོང་ཚད་ཆགས་པས་མྱོས་ནས་བརྒྱལ་ འགྲོ་བ་ཞིག་བྱུང་བ་ཚངས་པའི་དུག་ཟེར་དུག་ཆང་གི་ལྷ་མོ་དེ་མེ་ཏོག་དཀར་པོ་འདབ་ མ་ལྔ་པར་གྱུར་པ་ནི་ཆང་རྩི་མེ་ཏོག་ཅེས་ཆན་ལ་བཏབ་ནས་ཆང་དུ་ལངས་པར་བྱེད་པ་འདི་ ཡིན། དེ་ལ་ཆང་རྩི་ཟེར་བའི་ཕབས་འདི་འཆོས་པ་ཡིན་པས་ཆང་འཐུང་ན་ཉེས་པ་ཆེན་པོ་ཡོད་ པའི་རྒྱུ་མཚན་ཀྱང་འདི་ལ་བརྟེན་ཆགས་པའི་ལྷ་མོས་ངན་སོང་དུ་འཁྱེར་བ་ཡིན་ཏེ།” ཞེས་དང་། ཡང་བཅོམ་ལྡན་འདས་ཀྱི་མདོ་དྲན་པའི་ཉེར་གཞག་ལས། “ཆང་ནི་དུག་གི་མཆོག་ཡིན་ཏེ།། ཆང་འཐུང་བ་ལ་བསྟན་པ་ནི།། དགེ་བའི་ཆོས་རྣམས་ཉམས་པར་འགྱུར།། གང་ཞིག་རྟག་ཏུ་ཆང་བསྟེན་པ།། དེ་ཡི་བློ་ནི་མི་བརྟན་ཞིང་།། བློ་གཡོ་བ་ལ་ཆོས་མེད་དེ།། དེ་ལྟ་བས་ན་ཆང་སྤོངས་ཤིག།།ཉམས་བྱེད་ནང་ན་ཉམས་མཆོག་ནི།། ཆང་ཞེས་མཁས་པ་རྣམས་ཀྱིས་བཤད།། དེ་ལྟ་བས་ན་དུག་ལྟ་བུའི།། ཆང་འཐུང་བ་ནི་རྣམ་པར་སྤོངས།། ཆང་གིས་འདོད་ཆགས་སྐྱེད་བྱེད་ཅིང་།། དེ་བཞིན་ཁྲོ་དང་གཏི་མུག་དག།། ཡང་དང་ཡང་དུ་སྐྱེད་བྱེད་པས།། དེ་ལྟ་བས་ན་ཆང་སྤོངས་ཤིག” །ཞེས་དང་། རྒྱུད་རྡོ་རྗེ་རྩེ་མོ་ལས། “ཕུང་ཁྲོལ་ཀུན་གྱི་རྩ་བ་ནི།། ཆང་ནི་རྣམ་པར་སྤང་བར་བྱ།།” ཞེས་དང་། ཡང་རྗེ་བླ་མས། “ཆང་འཐུང་བ་ཕུང་ཁྲོལ་ཏེ་ཉེས་དམིགས་ཀུན་གྱི་རྩ་བར་གསུངས་པ་ནི་རྣལ་འབྱོར་གྱི་ རྒྱུད་ཁོ་ན་མ་ཡིན་གྱི་བླ་མེད་དང་ཐུན་མོང་བ་ཡིན་ཏེ། བླ་མེད་ཀྱི་དཀྱིལ་འཁོར་ཆོག་ཚད་ལྡན་དུ་མར་རྒྱུད་རྡོ་རྗེ་རྩེ་མོ་ནས་འབྱུང་བ་ ལྟར་གསུངས་པའི་ཕྱིར་རོ།།
འདུལ་བ་ལུང་ལས། ཆང་འཐུང་དམྱལ་བ་ངུ་འབོད་སྐྱེ།། སྦྱིན་མཁན་དེ་ཡི་འཁོར་དུ་སྐྱེ།།” ཞེས་དང་། མདོ་ལས། “ཆང་འཐུང་བ་ནི་ཚ་བའི་དམྱལ་བར་ལྟུང་ཞིང་སྐྱེ་བར་འགྱུར་རོ། དེར་ལྟུང་བའི་སེམས་ཅན་རྣམས་ནི་ལོ་སྟོང་ཕྲག་མང་པོར་འཚོད་པར་འགྱུར་རོ། དེ་ནས་ཕྱིར་ཕྱུང་ནས་ཆུ་བོ་རབ་མེད་ཀྱི་ངོགས་སུ་བརྒྱུགས་པར་བྱེད་དོ།” ཞེས་ལ་སོགས་པ་མདོ་རྒྱུད་ཁག་ཏུ་ཆང་གི་ཉེས་དམིགས་མང་དུ་གསུངས་སོ། ད་ནི་ང་ཚོ་བོད་མི་རིགས་ལྟ་བུ་ཞིག་ལ་མཚོན་ན་ད་ལྟའི་དུས་སྐབས་འདི་ནི་བོད་ གཞིས་གཉིས་སུ་འགྱེལ་ནས་ཁྲག་དང་མིག་ཆུ་འོག་ཏུ་འཚོ་བ་རོལ་དགོས་པའི་གནས་སྟངས་ ཐབས་སྐྱོ་ཞིག་ཆགས་ཡོད་པ་རེད། དེར་བརྟེན་ནས་ང་ཚོ་ཚང་མས་བློ་རྩེ་བསྒྲིམ་ནས་ལས་དོན་གནང་དགོས་པ་ཞིག་ལས་ཕན་ མེད་ཆང་རག་འཐུང་བ་དུས་ཚོད་གཅིག་ག་ལ་ཡིན། ཆང་ནི་ཚེ་འདི་ཕྱི་གཉིས་ཕུང་གིས་ཤེད་མ་ཞིག་ཡིན་ན་དེ་དག་སྤངས་བླངས་ཚུལ་བཞིན་ བྱེད་དགོས་ལ། དེང་སྐབས་བོད་གཞིས་བྱེས་གཉིས་སུ་ན་གཞོན་འགའ་ཤས་སེམས་ལ་དཀའ་ངལ་བྱུང་སྐབས་ཆང་ རག་འཐུང་བ་སོགས་ཀྱིས་མི་ཚེ་འཕྲོག་ལྷག་འགྲོ་མཁན་ཡོང་གི་ཡོད་པ་རེད། དེ་འདྲ་དཀའ་ངལ་ཕྲད་སྐབས་དཀའ་ངལ་ལ་གདོང་ལེན་གྱི་འགྱེལ་ས་ནས་ལངས་ཐུབ་པར་བྱེད་ དགོས་པ་ཞིག་ལས་ཆང་རག་འཐུང་ནས་དལ་འབྱོར་གྱི་མི་ལུས་གསེར་ལས་དཀོན་པ་ཆུད་ཟོས་ སུ་བཏང་ན་ཞེ་དྲག་བློ་ཕམ་གྱི་གནས་སྟངས་ཤིག་ཀྱང་རེད་སྙམ།
ཆང་རག་འཐུང་ན་རང་ཉིད་ལ་དངུལ་དངོས་ཕྲན་བུ་ཡོད་པ་དེ་དག་རིམ་གྱིས་རྫོགས་ནས་ དཀའ་སྡུག་ནང་ལྷུང་བ་དང་། བཟང་ཚང་བུ་ཕྲུག་དང་ཁ་བྲལ་དུ་ཆགས་པ། ཆང་རག་འཐུང་ན་ཁ་ལག་ཟ་འདོད་མི་སྐྱེ་བས་རྐྱེན་གྱིས་གཟུགས་པོ་སྐྱོ་པོ་ཆགས་ནས་ ན་ཚ་འདྲ་མིན་གཟུགས་པོར་ཕོག་ནས་མལ་སར་ལྷུང་ནས་རང་ལ་ན་ཟུག་རྒྱབ་པ་ཙམ་དུ་ནང་ མི་དང་བཟའ་ཚང་བུ་ཕྲུག་རྣམས་ལ་དཀའ་ངལ་ལྷག་མོ་སྤྲད་པ། ཆང་འཐུང་ནས་བཟི་ཚེ་མིར་གནོད་གཞི་ཅན་གྱི་སྐད་ཆ་མ་གཏོགས་ཕན་ཐོགས་ཡོད་པའི་སྐད་ ཆ་མི་བཤད་པ་སོགས་ཀྱིས་ཆང་རག་འཐུང་ན་མིས་ཆག་འཇོག་དང་ཡིད་ཆེས། རྩིས་མཐོང་སོགས་མི་བྱེད་པ་སོགས་སྤྱི་ཚོགས་ནང་མི་ཐལ་ཤལ་ཞིག་ལ་ངོས་འཛིན་བྱེད་ པ་སོགས་ཀྱིས་དཀའ་ངལ་མང་པོ་འཕྲད་ཀྱི་ཡོད་པ་རེད། དེར་བརྟེན་ནས་ཕན་མེད་ཆང་རག་དེ་ཉིད་ངེས་པར་བཅད་ན་ཚེ་འདི་ཕྱི་གཉིས་ལ་ཕན་ཐོགས་ ཧ་ཅང་ཆེ་བ་ཞིག་ཡོང་རྒྱུ་རེད་ལ། སོ་སོའི་མི་ཚེ་དོན་སྙིང་ལྡན་ཞིག་ཀྱང་ཡོང་གི་རེད་སྙམ། དེར་བརྟེན་ནས་ད་རེས་ཡི་གེ་བཏབ་པ་འདི་ཀུན་ལ་ཕན་ཐོགས་ཤིག་བྱུང་ན་བསམ་ནས་ སྐྱེས་ཆེན་གོང་མ་རྣམས་ཀྱི་ལམ་སྟོན་དེ་དག་ལུང་འདྲེན་གྱིས་བཀོད་ཡོད་ན་ཀུན་ གྱིས་ཐེངས་ཤིག་གཟིགས་གནང་ཡོང་བ་ཞུ་རྒྱུ་ཡིན།
ཞེས་པ་འདི་ནི་ཆབ་མདོ་ངག་ཕུན་གྱིས་ཕྱི་ལོ་ ༢༠༡༣ ཟླ་ ༡༡ ཚེས་ ༢༣ རེས་གཟའ་སྤེན་པ་ཉིན་མོར་སྤེལ་བ་ཡིན་ནོ།།