Tuesday 31 December 2013
00:20 | 
Posted by
༄༅།། ཨེ་མ་ཧོའི་རིག་མཛོད་། |
༄༅།།ལོ་གསར་གྱི་ཞུ་ཡིག་ཀ་མ་ལ། །
ན་མོ་གུ་རུ་ཀ་ལ་ཙཀྲ་ཡ། །
ཀ་ལ་ཙཀྲ་ཕྱི་ནང་གསང་བའི་དོན། །
ཁ་བའི་ལྗོངས་སུ་འདྲེན་པའི་བླ་མ་རྗེ། །
ག་དུས་ཡིན་ན་དྲན་པའི་སྙིང་གི་གྲོགས། །
ང་ཡི་རིག་པའི་ཡེ་ཤེས་རྒྱན་ཏུ་རྒྱལ། །
ཅ་དག་དངོས་བཤམས་ཡིད་སྤྲུལ་མཆོད་པ་དང་། །
ཆ་རྐྱེན་བཟང་པོའི་གཞལ་ཡས་ཁང་ཆེན་དུ། །
ཇ་ཆང་འདོད་པའི་ལོངས་སྤྱོད་ཚོགས་འཁོར་བསྐོར། །
ཉ་གང་ཟླ་བཞིན་དཀར་པོའི་དགེ་བར་འབད། །
ཏ་ཐྰ་ག་ཏའི་བསྟན་པ་ཚུལ་བཞིན་སྒྲུབ། །
ཐ་སྙད་རིག་པའི་ཚན་རྩལ་གྲོགས་སུ་བརྟེན། །
ད་ལྟའི་དུས་རབས་གསར་པའི་ལོ་སར་ཞིག །
ན་ཚོད་ཁྱད་མེད་ཀུན་གྱིས་གནང་བར་མཁྱེན། །
པ་ལོ་དཀར་པོའི་རྒན་པོ་མན་ཆད་དང་། །
ཕ་མའི་གཅེས་ཕྲུག་ཞག་གཅིག་ལོན་ནས་བཟུང་། །
བན་དེ་དགེ་ལ་ཕྱོགས་པའི་ཆོས་གྲོགས་ཀུན། །
མ་ལུས་ལོ་གསར་དུས་སྟོན་རོལ་ལ་ཕེབས། །
ཙྭ་རི་གནས་ཡུལ་བཞུགས་པའི་སྒོམ་ཆེན་དང་། །
ཚ་གྲང་དཀའ་སྤྱོད་བྲེལ་བའི་ཞིང་འབྲོག་དང་། །
ཛ་ཡའི་བསྟན་པའི་རྗེས་འཇུག་བླ་གྲྭ་སོགས། །
ཝ་ལེར་ལོ་གསར་བཞད་པར་དགའ་སྟོན་མཛོད། །
ཞྭ་གོས་རྒྱན་བཟང་བོད་ཀྱི་སྲོལ་རྒྱུན་གྱོན། །
ཟ་མ་དཀར་ཟས་སྦྲང་དཀར་རྩམ་འཐུད་ཟོས། །
འ་ཅག་སྐྱིད་སྡུག་ལས་ཀྱི་ཕྲེང་བ་ལ། །
ཡ་རབས་འཛིན་སྐྱོང་སྤེལ་བའི་བགྲོ་གླེང་བྱོས། །
ར་བ་གངས་རི་དཀར་པོའི་ཕ་ཁྱིམ་ལ། །
ལ་རྒྱའི་ཆོས་དཔལ་རིག་པའི་རྣོ་སོ་འདོན། །
ཤ་ཚ་སྙིང་རྗེ་འགྲོ་བ་ཡོངས་ལ་བསྐྱེད། །
ས་ལམ་ཡོན་ཏན་ཡར་ངོའི་ཟླ་བཞིན་སྨོན། །
ཧ་ཅང་བསྐལ་བའི་ས་ཐག་རིང་ན་ཡང་། །
ཨ་ལགས་སེམས་པ་གངས་རིའི་ལྗོངས་སུ་ཆགས། །
སྡང་དགྲའི་སྤོབས་པ་ཞིམ་པའི་ལོ་གསར་ཞིག །
མ་རིག་ཀུན་སེལ་འཆར་བ་ཨེ་མ་ཧོ། །
ཞེས་རབ་རྒྱན་ཆུ་སྦྲུལ་ཟླ་ཚེས་དགེ་བའམ་ཕྱི་ལོ་༢༠༡༤ ༡ ༡ ལ་ཝ་ཡེར་ཨེ་ཝྃ་སྨན་ཁང་ནས་དཔལ་ལྡན་ལྷ་མོས་བསྐུལ་བ་ལྟར་ཤྲྰིས་ཕུལ་བ་དོན་དང་ལྡན་པར་གྱུར་ཅིག་གུ། །།
Subscribe to:
Post Comments (Atom)
0 comments:
Post a Comment