༄༅།། ཨེ་མ་ཧོའི་རིག་མཛོད།

འཛམ་གླིང་ཞི་བདེའི་དེད་དཔོན།

འོད་གསལ་མཐའ་ཡས།
༡༽ དུག་མཚོན་བདུད་སྡེའི་དམག་ཚོགས་ལ།།
བྱམས་དང་སྙིང་རྗེས་འཛུམ་མདངས་བསྟན།།
ཤཱཀྱའི་དགེ་སྦྱོང་རྒྱལ་བའི་སྲས།།
སྤྱན་རས་གཟིགས་དབང་ཁྱེད་མིན་སུ།།
༢༽ ཞི་བདེའི་དེད་དཔོན་ཆོས་ཀྱི་རྗེ།།
དྲང་དང་བདེན་པའི་གཤོག་ཟུང་ཅན།།
ཕན་དང་བདེ་བའི་ལམ་བཟང་སྟོན།།
ཕུགས་མདུན་རིང་བའི་ལྷ་བྱ་ལགས།།
༣༽ བླང་དོར་རྨོངས་པའི་སྐྱེ་འགྲོ་ལ། །
མ་རིག་མུན་སེལ་ཉི་མའི་གཉེན། །
འོད་གསལ་སྙིང་པོའི་མ་ཎི་ཀ །
སེམས་ཀྱི་ཞི་བདེ་ཁྱེད་མིན་སུ། །
༤༽ སྐུ་ལ་ངུར་སྨྲིག་རྒྱལ་མཚན་གསོལ། །
གསུང་ལ་སྡེ་སྣོད་ཆོས་སྒྲ་སྒྲོག །
ཐུགས་ལ་བྱང་ཆུབ་སེམས་མཆོག་ལྡན། །
འགྲོ་བའི་མགོན་པོ་ཁྱེད་མིན་སུ། །
༥༽ གོ་མཚོན་གྱོན་པའི་དམག་དཔུང་མེད། །
རང་ཡུལ་བྲལ་བས་རྒྱབ་ཤེད་མེད། །
གཞན་ཡུལ་འཛིན་པའི་དཔལ་འབྱོར་མེད། །
ངེས་འབྱུང་ཕྱུག་པའི་དགེ་སློང་ངོ། །
༦༽ མི་རིགས་དཀར་ནག་ཁྱད་མ་ཕྱེས། །
རྒྱ་བོད་བར་ལ་ཤན་མ་འགྱེད། །
དགྲ་གྲོགས་གཉིས་ལ་དོ་མཉམ་པའི། །
ཞི་བདེའི་དེད་དཔོན་ཁྱེད་མིན་སུ། །
༧༽ འགྲོ་བ་ཡོངས་ལ་དགའ་ཞིང་འཛུམ། །
མི་རིགས་ཀུན་ལ་དུངས་ཤིང་དགྱེས། །
ཤེས་རབ་སྙིང་རྗེའི་བདག་ཉིད་མཆོག །
དྲིན་ཅན་ཕ་མ་དག་དང་མཚུངས། །
༨༽ གངས་ཅན་བོད་པའི་བསོད་ནམས་དང་། །
འཛམ་གླིང་ལས་ཀྱི་སྨོན་ལམ་མཐུས། །
རྟེན་འབྲེལ་རྒྱལ་བའི་སྐུ་གཟུགས་ཤིག །
གླིང་འདིར་བཞུགས་པ་བདེན་སྲིད་དམ། །
ཞེས་པ་འདི་ཡང་མགོན་པོའི་གང་གིས་ཞི་བདེ་གཟེངས་རྟགས་བཞེས་པའི་ཉི་མ་ལ་འོད་ གསལ་མཐའ་ཡས་རྡོ་རྗེར་འབོད་པས་མདོ་ཁམས་སྒ་སྟོད་ཇོ་བོ་ཞལ་དཀར་གྱི་མདུན་རོལ་ ཨེ་ཝྃ་ཆོས་སྨན་ཁང་ནས་གུས་ཕུལ་བགྱིས་པའོ།།

ཁ་བརྡ་ལགས་ཀྱིས་ཟླ་ཚེས་December 9th, 2013 ལ་ རྩོམ། སྡེ་ཚན་དུ་སྤེལ|

“ འཛམ་གླིང་ཞི་བདེའི་དེད་དཔོན། ”སྐོར་ལ་་10 Comments་འདུག

1. # 1 པདྨ་ལགས་ཀྱིས་མཆན་བཏབ་པ།:
   December 10th, 2013 at 12:37 AM སྟོང་ཉིད་སྙིང་རྗེ་ཟུང་དུ་འཇུག་པའི་ལམ།།
   ཆེས་ཆེར་གསལ་མཛད་གངས་ཅན་བསྟན་འགྲོའི་མགོན།།
   ཕྱག་ན་པདྨོ་བསྟན་འཛིན་རྒྱ་མཚོ་ལ།།
   གསོལ་བ་འདེབས་སོ་བཞེད་དོན་ལྷུན་གྲུབ་མཛོད།།
   དིལ་མགོ་མཁྱེན་བརྩེ་རིན་པོ་ཆེ་གསུངས།
   
2. # 2 དགེ་འདུན་རྒྱ་མཚོ།་ལགས་ཀྱིས་མཆན་བཏབ་པ།:
   December 10th, 2013 at 12:58 AM ངག་གི་དབང་ཕྱུག་བློ་བཟང་རྒྱལ་བའི་བསྟན།།
   འཛིན་མཁས་རྒྱལ་བ་རྒྱ་མཚོ་གངས་རིའི་མགོན།།
   སྲིད་གསུམ་དབང་བསྒྱུར་ཕན་བདེ་བདུན་རྩིའི་མཛོད།།
   མཚུངས་པ་མེད་པའི་སྡེ་ལ་གསོལ་བ་འདེབས།།
   
3. # 3 ཨ་ཕྱི་ཆོས་སྒྲོན་ལགས་ཀྱིས་མཆན་བཏབ་པ།:
   December 10th, 2013 at 2:22 AM ངག་གི་དབང་ཕྱུག་བློ་བཟང་རྒྱལ་བའི་བསྟན།།
   འཛིན་མཁས་རྒྱལ་བ་རྒྱ་མཚོ་གངས་རིའི་མགོན།།
   སྲིད་གསུམ་དབང་བསྒྱུར་ཕན་བདེ་བདུན་རྩིའི་མཛོད།།
   མཚུངས་པ་མེད་པའི་སྡེ་ལ་གསོལ་བ་འདེབས།།
   རྒྱལ་བ་རིན་པོ་ཆེའི་ཡོངས་འཛིན་ཁྲི་བྱང་གིས་སོ། །
   
4. # 4 ཀརྡོ་གཉེར་ཕྱག་པ་་ལགས་ཀྱིས་མཆན་བཏབ་པ།:
   December 10th, 2013 at 3:14 AM བདུད་བཞི་མགོ་གནོན་མཛད་པོ། །
   སྡེ་བཞིའི་ཕུན་ཚོགས་སྤེལ་མཁས། །
   སྐུ་བཞིའི་གོ་འཕང་འགོད་མཛད། །
   བཅུ་བཞིའི་༸སྐུ་ཕྲེང་ཁྱེད་རྒྱལ། །
   
5. # 5 ཞོལ་གཡག་འབྲོང་རྒྱུད།་ལགས་ཀྱིས་མཆན་བཏབ་པ།:
   December 10th, 2013 at 3:54 AM སྟོང་ཉིད་སྙིང་རྗེ་ཟུང་དུ་འཇུག་པའི་ལམ།།
   ཆེས་ཆེར་གསལ་མཛད་གངས་ཅན་བསྟན་འགྲོའི་མགོན།།
   ཕྱག་ན་པདྨོ་བསྟན་འཛིན་རྒྱ་མཚོ་མཆོག།།
   ཞབས་པད་སྲིད་མཐའི་བར་དུ་བརྟན་གྱུར་ཅིག།།
   གངས་ཅན་ལྗོངས་ཀྱི་ཆོས་སྲིད་བྱ་བའི་གདུགས།།
   འདེགས་པའི་སྲིད་ཞུར་གཏོགས་པའི་སྐྱེ་བོ་ཀུན།།
   ལྷག་བསམ་རྣམ་དག་དཔུང་པ་རབ་བརྟན་ཅིང་།།
   སྐྱེ་ཀུན་ཕྱག་ན་པདྨོས་རྗེས་བཟུངས་ཤོག།།
   
6. # 6 གནམ་ལགས་ཀྱིས་མཆན་བཏབ་པ།:
   December 10th, 2013 at 4:35 AM དད་པ་ཅན་ལ་དམ་ཆོས་གསུང་འབྱོན་པ།།
   དད་མེད་མྱི་ལ་ཞི་བའི་ལམ་སྟོན་པ།།
   འཛམ་གླིང་ཕྱོགས་བཅུའི་ཞིང་གི་འགྲོ་བ་ལ།།
   ཁྱེད་འདྲའི་ལྷག་ཅིག་ཡོད་ཡང་ཡོད་མི་དགོས།།
   ང་ཡི་བླ་མ་ཁམས་གསུམ་ཉི་མའི་སྐུ།
   ང་དང་སྐལ་ལྡན་སྐྱོབས་པའི་སྐྱབས་ཅིག་གསུང་།།
   ང་དང་ང་འདྲིའི་འགྲོ་བ་འདྲེན་པའི་ཐུགས།།
   སྐུ་གསུང་ཐུགས་ཀྱི་འཕྲིན་ལས་དར་བར་ཤོག།
   
7. # 7 ཤར་པ་་ལགས་ཀྱིས་མཆན་བཏབ་པ།:
   December 10th, 2013 at 5:20 AM མགོན་མེད་གངས་ཅན་ཞིང་འདིའི་འགྲོ་བ་རྣམས།
   ཇི་སྲིད་འཁོར་བའི་ཕྱི་མཐའ་མ་རྫོགས་པར།
   དེ་སྲིད་མཚུངས་པ་མེད་པའི་གསང་གསུམ་གྱིས།
   སྡེ་བཞིའི་དཔལ་ལ་སྦྱོར་བཞིན་བརྟན་པར་བཞུགས།
   བདག་ཅག་གདུང་ཤུགས་དྲག་པོས་གསོལ་འདེབ་ན།
   གངས་ཅན་མགོན་པོ་བསྟན་འཛིན་རྒྱ་མཚོ་ཡི་།
   སྐུ་ཚེ་མི་ཤིགས་བསྐལ་བརྒྱར་རབ་བརྟན་ཅིང་།
   བཞེད་དོན་ལྷུན་གྱིས་པར་བྱིན་གྱི་རློབས།
   
8. # 8 ཆབ་བྲག་ལྷ་མོ་སྐྱབས་ལགས་ཀྱིས་མཆན་བཏབ་པ།:
   December 10th, 2013 at 5:49 AM ༑མཉེས་གཤིན་བྱམས་བརྩེས་འགྲོགས་ཐབས་འཚེ་མེད་ལམ། །
   མཐའ་གཉིས་སྤངས་པ་གཉིས་སྨན་དབུ་མའི་ལམ། །
   འཇིགས་རུང་དྲག་མཚོན་མ་མཆིས་ཞི་བདེའི་ཡུལ། །
   བསྐྲུན་པའི་ཐབས་ཚུལ་འགྲུབ་པའི་མཐུ་དཔུང་སྐྱེད། །
   
9. # 9 ཆབ་བྲག་ལྷ་མོ་སྐྱབས་ལགས་ཀྱིས་མཆན་བཏབ་པ།:
   December 10th, 2013 at 6:00 AM ༸གོང་ས་མཆོག་གི་བཀའ་རྩོམ་འདིར་འགྲེལ་བཤད་རེ་གནང་རྒྱུ་དང་ཡང་ན་བསམ་གཞིགས་རེ་བྱེད་རྒྱུ་ནི་ངས་དེ་རིང་གི་ཉིན་མོ་བསུ་སྟངས་ཤིག་ཡིན།
   
10. # 10 ཤར་པ་་ལགས་ཀྱིས་མཆན་བཏབ་པ།:
    December 10th, 2013 at 6:04 AM ཨམ་མདོའི་ཡུལ་དུ་བོ་མོ་མིང།
    པོ་ཏ་ལ་ཡི་ཁྲི་ལ་འཛིན།
    གངས་མགོན་པོ་ངུར་སྨྲིག་གར།
    དཔལ་ལྡན་ལྷ་མོའི་མཚོ་ལས་འཁྲུངས།