Saturday, 25 January 2014
10:57 | 
Posted by
༄༅།། ཨེ་མ་ཧོའི་རིག་མཛོད་། |
ཁྲག་དར་དམར་པོའི་འོག་ཏུ་བསྡད་མི་དགོས་པ་ངའི་གཟི་བརྗིད་ཡིན།
ཨེ་མ་ཧོ།།
ཀ་བ་བུམ་པ་ཡང་མ་རྩོད།
།
ཁ་ཁོག་མཚུངས་པ་ཡི་ཆོས་པ། །
ག་ས་གང་དུ་ལ་སོང་ཡང་། །
ང་ནི་དྲང་བདེན་ལ་གནས་ཡོད། །
ཅ་ཅོའི་འདུ་འཛི་ལ་མ་ཆགས།
།
ཆ་ལུགས་སྣ་ཚོགས་ཞིག་བསྒྱུར་ཀྱང་། །
ཇ་རྩམ་ངམ་ངོམ་ལ་རོལ་ནས། །
ཉ་བ་ཏེ་ལོ་བཞིན་བསྡད་ཡོད།
།
ཏྰ་ལེར་ངོ་རྒོལ་ཡང་མ་བྱས། །
ཐ་དག་མོས་མཐུན་ལ་དབེན་ཡང་། །
ད་ལྟའི་རང་དབང་གི་འཚོ་བས། །
ན་ཚོད་བཤད་སྒྲུབ་ལ་བརྩོན་ཡོད། །
པ་ར་མི་ཏ་ལ་འབད་བཞིན།
།
ཕ་མེས་ཆོས་བརྒྱུད་ང་དུང་བས། །
བ་ར་ནང་རྩོད་ཀྱང་མེད་པར།
།
མ་ལུས་གཞན་དོན་ལ་ཕྱོགས་ཡོད། །
ཙྭ་རིའི་སྦས་ཡུལ་དང་འདྲ་བའི། །
ཚ་གྲང་ཆ་མཉམ་པའི་ཞིང་ཁམས།
།
ཛ་ཡའི་རྗེས་འཇུག་གི་ངོ་སྐལ། །
ཝ་ཡེལ་རི་ཁྲོད་དུ་བཞུགས་ཡོད། །
ཞྭ་རྩོད་ཆོས་པ་རུ་མ་རློམས། །
ཟྭ་སྔོའི་འཚོ་བ་ལ་རོལ་བཞིན། །
འ་ཅག་གངས་ཅན་ལ་དུང་བས། །
ཡ་མཚན་ཀུན་བཟང་ཞིག་མཛད་ཡོད།
།
ར་ཛའི་ཆོ་འཕྲུལ་ལ་མ་ཞེན། །
ལ་རྒྱའི་བསྟན་སྲིད་ལ་དུང་བས། །
ཤ་རུས་ཁྲག་རྒྱུན་ཙམ་མིན་པར།
།
ས་ལམ་ཡོན་ཏན་ཀུན་ཤེས་ཡོད། །
ཧ་ཅང་མཁས་འདོགས་ཙམ་མིན་པར།
།
ཨ་བུའི་མི་ཚེ་ཡི་ལོ་རྒྱུས། །
ཨི་ལྡན་དབྱངས་གསལ་དུ་རྒྱུན་ནས། །
ཨུ་དུམ་བ་ར་བཞིན་མཆོད་ཡོད། །
ཨེ་མ་ཧོ་ཞེས་ནི་འབོད་པར། །
ཨོ་རྒྱན་བླ་མ་ཡིས་གནང་བས། །
མཆོག་གསུམ་རྩ་གསུམ་དང་སྲུང་མས། །
ཉིན་མཚན་བར་མེད་དུ་སྐྱབས་ཡོད། །
མདོར་ན་ཚེ་སྲོག་ནི་འདི་ཆད་ཚེ།
།
ཁྲག་དར་སྐར་ལྔ་ལ་མི་རེ། །
མི་ཚེ་ས་མཐའ་ལ་སྐྱེལ་ནས། །
དུར་ས་དབྱིན་ཡུལ་ལ་འདེབས་ངེས།
།
སྔ་དྲོ་ཆོས་སྤྱོད་ལ་འབད་ནས། །
ཚོགས་བསགས་འགྲོ་ཀུན་ལ་བསྔོ་ཞིང་། །
ཕྱི་དྲོ་ཆོས་ཚན་ལ་བརྩོན་བཞིན། །
འཁོར་འདས་བདེ་སྐྱིད་ལ་རོལ་ཡོད། །
ནམ་གུང་འོད་གསལ་གྱི་སྣང་བས། །
རྨི་ལམ་དབང་ཕྱུག་གི་འདུན་ལམ། །
བདེ་ཆེན་དག་ཞིང་ལ་གཏད་ནས།
།
ཆོས་རྗེའི་དགོངས་པ་བཞིན་སྒྲུབ་ཡོད། །
འཛམ་གླིང་ཆོས་མཐུན་གྱི་གྲོགས་དང་།
།
གངས་ཅན་ཕོ་མོ་ནི་ཡོངས་ལ། །
འདི་ཕྱིའི་བདེ་སྐྱིད་ལ་སྨོན་པས།
།
ཆོས་བཞིན་འགྲུབ་པ་ནི་གྱུར་ཅིག །
ཅེས་པ་འདི་ཡང་རབ་རྒྱན་ཆུ་སྦྲུལ་རྒྱལ་ཟླའི་ཚེས་བཟང་ལ་གྲོགས་པོ་འགས་བ་རའི་(བ་ར་ནི་དབུ་མ་དང་རང་བཙན་གྱི་བསྡུས་མིང་གསར་དུ་སྙན་ངག་པ་ཀླུ་སྨྱོན་ཧེ་རུ་ཀས་བཏགས་པ་ཞིག་ཡིན)རྩོད་པ་དང་དྲ་འབིས་བསྐུལ་བ་བཞིན་དབྱིན་ཡུལ་ཝ་ཡེལ་རི་ཁྲོད་ནས་ཨེ་མ་ཧོས་གང་དྲན་གླུ་རུ་བླངས་པར་དགེའོ།
།
Subscribe to:
Post Comments (Atom)
0 comments:
Post a Comment