Monday 24 February 2014
13:37 | 
Posted by
༄༅།། ཨེ་མ་ཧོའི་རིག་མཛོད་། |
༧བསྐལ་བཟང་མེ་ཏོག་ལ་གདམས་ངག་རིན་ཆེན་བྷ་ག་ཞེས་བྱ་བ།།
བཅོམ་ལྡན་རྒྱལ་དབང་ཤྰཀ་ཐུབ་པད་འབྱུང་དང་།།
ཉེ་སྲས་བརྒྱད་དང་རྗེ་འབངས་གྲོགས་གསུམ་དང་།།
གནས་བརྟན་བཅུ་དྲུག་གྲུབ་ཆེན་བརྒྱད་ཅུ་སོགས།།
འཕགས་བོད་མཁས་གྲུབ་བླ་མའི་ཚོགས་ཀུན་རྒྱལ།།
བསྐལ་བཟང་མེ་ཏོག་ཐོག་དང་སེར་བས་བཅོམ།།
དད་དང་ངེས་འབྱུང་ནམ་མཁའི་པད་ཟླར་མཚུངས།།
ཕྱག་རྫོགས་དབུ་གསུམ་དྲི་ཙམ་མ་ཚོར་པའི།།
དོན་མེད་དབུ་རེག་དེ་ཚོ་ཤ་རེ་ཚ།།
སྟོན་མཆོག་བསྟན་པའི་སྙིང་པོ་མ་ཤེས་ནས།།
རྟགས་ཙམ་འཛིན་པའི་བསྟན་པ་བྱེད་འདོད་ན།།
ཕ་ཁྲི་དོལ་ཚོགས་དཔུང་གི་སྒོར་ཞུགས་དང་།།
འཁོན་འཛིན་མེད་དོ་འབི་རྒོད་མེ་ཏོག་མ།།
ཀུན་ཏུ་བཟང་དང་རྡོ་རྗེ་འཆང་ཆེན་ནས།།
བརྒྱུད་གསུམ་རིག་འཛིན་བླ་མའི་ཚོགས་བཅས་དང་།།
ཉེ་སྲས་བརྒྱད་དང་གྲུབ་ཆེན་བརྒྱ་རྩ་ཡི།།
བཀའ་དྲིན་ལྟ་ཅི་སྐུ་དཔར་མ་མཐོང་ངམ།།
སྔོན་ཚེ་འཕགས་བོད་མཁས་གྲུབ་དམ་པ་དང་།།
བར་དུ་སྒྲུབ་བརྒྱུད་ཤིང་རྟ་རྣམ་བརྒྱད་སོགས།།
འཛམ་གླིང་མཛེས་པའི་ཆོས་རྒྱལ་རྗེ་འབངས་ལ།།
མཆོད་འོས་སྡེ་གཉིས་ཡོད་པར་མ་དགོངས་སམ།།
དང་པོ་སོ་ཐར་ངེས་འབྱུང་སྡོམ་པ་བླངས།།
བར་དུ་བྱང་ཆུབ་སེམས་ལ་མཉམ་པར་བཞགས།།
བསྐྱེད་རྫོགས་རྫོགས་ཆེན་སྒོམ་པའི་རྣལ་འབྱོར་པས།།
ནང་པའི་བསྟན་པ་སེམས་འདུལ་ཁོ་ན་ལགས།།
བལ་བོ་རྒད་པོའི་ཆོས་གོས་ཆང་རོལ་ཀྱང་།།
པོ་ཏྰ་ལ་ནས་སྤྱན་རིས་གཟིགས་དང་།།
དགོངས་པ་དབྱེར་མེད་ཡིན་པར་མ་གཟིགས་སམ།།
དགེ་བསྙེན་ཡང་དག་བསྟན་པའི་མདོ་ལས་གསུངས།།
དུས་གསུམ་རྒྱལ་བའི་ཐུགས་ཀྱི་བསྟན་པ་ལ།།
འཕྱ་དང་སྨོད་པའི་ཆོས་དྲེད་ལས་ངན་དང་།།
སོར་བྱང་སྔགས་ཀྱི་གནས་ལུགས་མ་རྟོགས་ན།།
དབུ་ཟླུམ་ཆོས་གོས་གྱོན་ཀྱང་སྙིང་པོ་དབེན།།
དད་པའི་མྱུ་གུ་ལང་ཚོའི་ལྕང་ལོ་ལ།།
མཁའ་འགྲོ་རྒྱ་མཚོའི་བསྟི་གནས་སྨུག་ཤིག་ཤིགས།།
དག་སྣང་སྣོད་བཅུད་བདེན་པའི་དོན་གཟིགས་རྣམས།།
ཆོས་གོས་རྣམ་གསུམ་གྱོན་པ་གསལ་བའི་རྒྱན།།
བདག་ཅག་སྟོན་པས་བདེན་བཞི་བྱང་སེམས་དང་།།
གསང་སྔགས་བསྟན་པ་འཛིན་སྐྱོང་སྤེལ་བ་ཀུན།།
སེམས་འདུལ་སེམས་སྲུང་རྟུལ་ཞུགས་མ་གཏོགས་པའི།།
ངོ་མེད་སྒྲོ་འདོགས་དགོས་པར་གང་ནས་གསུངས།།
ང་དང་ང་འདྲ་འདྲས་ཁྱོད་རྒྱུས་མི་ཤེས་ཀྱང་།།
རྟོག་གེ་བ་ནི་ཀུན་མཁྱེན་འདྲ་གསུངས་ཕྱིར།།
རང་གི་ངོ་གདོང་ཙམ་ཡང་མི་སྟོན་པར།།
སྒེར་འཁོན་མི་ཚོད་འཛིན་པ་ཅི་ཡིས་ནོངས།།
ཤན་པ་སྨད་ཚོང་བྱ་དང་རི་དྭགས་སོགས།།
འགྲོ་བའི་རྒྱུད་ཀྱི་དེ་ཉིད་རྟོགས་པ་མང་།།
དུག་གསུམ་སྐུ་གསུམ་གྲོལ་བའི་རིག་འཛིན་དང་།།
མཆོག་གསུམ་ངེས་དོན་ཤེས་པའི་དགེ་འདུན་སྡེ།།
གང་ན་བཞུགས་ཀྱང་སྟོན་པའི་རྒྱལ་ཚབ་དངོས།།
ཡང་དག་གནས་ལུགས་སོམས་ཤིག་གཟུགས་མེད་མ།།
རྟགས་ཙམ་འཛིན་པའི་བསྟན་པ་བསྟོད་དྲག་ནས།།
གངས་རིའི་བསྟན་པ་མུན་པའི་ཟླ་རུ་བཟོས།།
ངེས་དོན་སྙིང་པོ་རི་མོའི་གཟུགས་སུ་བསྒྱུར།།
ཐུགས་དམ་སྙིང་རྗེ་བྲལ་ལམ་རྡོ་རྗེ་ཅན།།
སྤྲུལ་སྐུ་དམ་པ་གསང་སྔགས་བསྟན་འཛིན་འདི།།
གངས་ལྗོངས་ཡུལ་གྱི་པན་ཆེན་གཉིས་པ་ཡིན།།
སྤྱིའི་སྐྱོན་སྒེར་ལ་གཡོགས་ན་ཁྲེལ་མེད་རེད།།
གཞི་མེད་སྒྲོ་འདོགས་མ་མང་གངས་ཅན་པ།།
དཔེར་ན་པན་ཆེན་བལ་ཡུལ་ཕེབས་དུས་སུ།།
ཚོང་རྒྱག་ཟེར་ནས་དྲི་ཆེན་དར་གཡུགས་བཞིན།།
ཕྱོགས་ཞེན་གདོན་གྱིས་ཟིན་པའི་མི་ནག་བཞིན།།
ཉེས་མེད་སྒྲོ་བཀུར་མ་འདེབས་ཉ་མགོ་ཅན།།
སྐྲ་དང་སྨྲ་ར་བསྟན་པའི་སྐྱོན་ཡིན་ན།།
ཚེ་དཔག་མེད་མགོན་འཕགས་མཆོག་སྤྱན་རས་གཟིགས།།
འཇམ་དབྱངས་གསང་བདག་སྒྲོལ་མ་པད་འབྱུང་དང་།།
མར་མི་ཐང་རྒྱལ་གཏེར་བདག་གླིང་སོགས་བཞུགས།།
རྒྱལ་དང་རྒྱལ་སྲས་སེམས་དཔའི་ཚོགས་རྣམས་དང་།།
གྲུབ་ཆེན་བརྒྱད་ཅུ་གནས་བརྟན་བཅུ་དྲུག་སོགས།།
བསྟན་དང་འགྲོ་ལ་གཅིག་ཏུ་ཕན་བཞེད་པའི།།
སྐྱེས་མཆོག་ཕལ་ཆེར་རང་བཞིན་རྣལ་འབྱོར་ལགས།།
མཆོག་ཉིད་སེམས་དཀར་ཡིན་པ་བདེན་སྲིད་ན།།
ཐོས་བསམ་སྒོམ་པའི་ཡོན་ཏན་ཡོད་པའི་ཚེ།།
དད་བརྩོན་དག་སྣང་ཡར་ངོའི་ཟླ་བཞིན་འཕེལ།།
བསྟན་དང་འགྲོ་བའི་དོན་ཆེན་ལྷུན་གྱིས་འགྲུབ།།
དབུ་མ་ཆེན་པོའི་རྟེན་འབྲེལ་གོ་བ་སྐྱེ།།
ཕྱག་རྒྱ་ཆེན་པོའི་བདེ་ཆེན་མྱོང་བས་ཚོར།།
རྫོགས་པ་ཆེན་པོའི་དེ་ཉིད་ལེགས་རྟོགས་ནས།།
རིག་འཛིན་རྣམ་བཞིའི་འབྲས་བུ་མཐར་ཕྱིན་ཤོག།
ཅེས་པ་འདི་ཡང་རབ་རྒྱན་ཤིང་རྟའི་རྒྱལ་ཟླའི་དབང་ཕྱོགས་མཁའ་འགྲོ་འདུ་བའི་དུས་ཆེན་གྱི་སྐབས་སུ་བསྐལ་མེས་མཆོག་སྤྲུལ་གསང་སྔགས་བསྟན་འཛིན་སོགས་སྔགས་རིགས་ཡོངས་ལ་སྨད་པར་མཐོང་ནས་གང་ཤར་དུ་ཤྲྰིཿཨེ་མ་ཧོས་བོད་བརྒྱུད་རྣལ་འབྱོར་ཆོས་ཚོགས་ཁང་གི་ཡུམ་ཀ་བདེ་ཆེན་རྒྱལ་མོའི་བསྙེན་མཚམས་སུ་ནས་ངོ་དེབ་ནང་དུ་བྲིས་པ་དོན་དང་ལྡན་པར་གྱུར་ཅིག་གུ།།
Subscribe to:
Post Comments (Atom)
0 comments:
Post a Comment