Saturday 15 March 2014
13:58 | 
Posted by
༄༅།། ཨེ་མ་ཧོའི་རིག་མཛོད་། |
 ཆོས་སྐུ་ཀུན་ཏུ་བཟང་པོ།
དེ་ལ་བདག་ཅག་གི་སྟོན་པ་དཔལ་ཀུན་ཏུ་བཟང་པོ་ཉིད་གཞི་གདོད་མའི་དབྱིངས་སུ་མངོན་པར་བྱང་ཆུབ་སྟེ། སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་ལས་མ་གཡོས་པར་བཞུགས་པའི་ཚུལ་ལ།
ནང་གསལ་ཆོས་སྐུའི་གནས་སྐབས་ན་ངོ་བོ་རང་བཞིན་ཐུགས་རྗེ་གསུམ་དབྱིངས་ཀྱི་སྐུ་གསུམ་དུ་གནས་པའི་རྣམ་པ་ཡུལ་ལ་མི་སྤྱོད་པའི་ཕྱིར་ཐམས་ཅད་མཁྱེན་པའི་ཡེ་ཤེས་ངང་གིས་འོད་གསལ་བའོ། ། དེའི་ཚེ་གནས་ཕུན་སུམ་ཚོགས་པ་ཆོས་སྐུའི་ཞིང་ན། སྟོན་པ་ཕུན་སུམ་ཚོགས་པ་ཀུན་ཏུ་བཟང་པོ། འཁོར་ཕུན་སུམ་ཚོགས་པ་ཡེ་ཤེས་རྒྱ་མཚོ་ལ། དུས་ཕུན་སུམ་ཚོགས་པ་ཆོས་ཉིད་འཕོ་འགྱུར་མེད་པའི་ཚེ། ཆོས་ཕུན་སུམ་ཚོགས་པ་རང་བཞིན་རྫོགས་པ་ཆེན་པོ་རང་ཆས་ལྷུན་གྱིས་གྲུབ་པའི་ངང་དུ་འོད་གསལ་བའོ། |
 ལོངས་སྐུ་བྱུང་ཚུལ།
དེ་ཉིད་ཀྱི་ངང་ལས་མ་གཡོས་བཞིན་དུ་རང་སྣང་ལོངས་སྤྱོད་རྫོགས་པའི་སྐུར་རང་བྱུང་བ་ནི། རང་བཞིན་གྱི་སྣང་ཆ་ལས་རྣམ་དག་སྟུག་པོ་བཀོད་པ་བདེ་བའི་ཞིང་ཐམས་ཅད་ཀྱང་ཡེ་ཤེས་ལྔའི་རང་མདངས་ལས་བྱུང་བ།
སྟེང་དང་འོག་དང་ཕྱོགས་མཚམས་མ་ཡིན་ཞིང་འོད་ཁྱིམ་རིན་པོ་ཆེའི་ཁང་བུ་བཀོད་ལེགས་པ་ན། རིགས་ལྔའི་སངས་རྒྱས་སོ་སོའི་དཀྱིལ་འཁོར་གྱི་ཚོམ་བུ་འབུམ་ཕྲག་བརྗོད་ལས་འདས་པས་བསྐོར་བ་རྣམས་ཀྱང༌། གདུལ་བྱ་དང་འདུལ་བྱེད་མ་ཡིན་ཞིང་རང་སྣང་ལྷུན་གྱིས་གྲུབ་པའི་མངའ་དབང་དུ་རང་བྱུང་བ་དེ་ཉིད་ཀྱི་སྣང་ཆ་ལས་རིགས་ལྔའི་སངས་རྒྱས་གྲངས་མེད་བསམ་གྱིས་མི་ཁྱབ་པ་འཕྲོ་ཞིང་སྣང་བ་ཐམས་ཅད་ཀྱང༌། ཟ་འོག་གི་བེར་ཁྱིམ་བཀྲ་བ་ལྟར་བཀོད་ལེགས་ཤིང་ཁ་དོག་ལྔར་འོད་འབར་བ་ནི། ཞལ་དང་ལྗགས་ཀྱི་དཀྱིལ་འཁོར་ལས་ཡི་གེ་དྲུག་གི་འོད་ཟེར་མུ་མེད་པར་འཕྲོ་བ་ལས་རང་བྱུང་བའོ། ། དེའི་ཚེ་གནས་ཕུན་སུམ་ཚོགས་པ་རྣམ་དག་སྟུག་པོ་བཀོད་པར། སྟོན་པ་ཕུན་སུམ་ཚོགས་པ་རིགས་ལྔའི་སངས་རྒྱས། འཁོར་ཕུན་སུམ་ཚོགས་པ་སངས་རྒྱས་ཀྱི་དཀྱིལ་འཁོར་ཚད་མེད་པས་བསྐོར་བ་ལ། ཆོས་ཕུན་སུམ་ཚོགས་པ་ཡེ་ཤེས་འོད་གསལ་བའི་དགོངས་པ། དུས་ཕུན་སུམ་ཚོགས་པ་ཆོས་ཉིད་བསམ་གྱིས་མི་ཁྱབ་པའི་ཚེ་རང་ཆས་སུ་ངང་གིས་འོད་གསལ་བའི་དགོངས་པ་རང་བཞིན་བརྗོད་དུ་མེད་པར་སྟོན་ཏོ། |
 སློབ་དཔོན་དགའ་རབ་རྡོ་རྗེ་ནི།ཇི་སྐད་དུ། ཉོན་མོངས་རྒྱུད་དྲག་ནུས་མཐུ་ཞན། །ལས་ཀྱིས་ཚེ་ཐུང་བཀའ་རྙིང་སྟོར། །བསྟན་སྙིང་གྲུབ་མཐའ་ངན་པས་བསྒྱུར། །གཉེན་པོས་མི་ནོན་སྒྲུབ་ཚུགས་ཞན། །དེ་ཚེ་རིག་པའིརྣམ་རྟོག་ཤར། །ཞེས་རྩོལ་མེད་ཨ་ཏིའི་བསྟན་པ་འབྱུང་བའི་དུས་དྲུག་ལ་བབས་པའི་ཚེ། སུམ་ཅུ་རྩ་གསུམ་གྱི་ལྷ་དེ་བ་བཟང་སྐྱོང་གི་བུ་སེམས་ལྷག་ཅན་ལ་རྨི་ལྟས་ཁྱད་པར་ཅན་བཞི་བྱུང་བ་དང་མཐུན་པར་རྡོ་རྗེ་སེམས་དཔས་རྩ་དབང་རྒྱལ་ཐབས་སྤྱི་བླུགས་ཀྱི་དབང་བསྐུར་ནས་ལྷའི་གནས་སུ་དར། དེ་ནས་མི་ཡུལ་དུ་གསང་བའི་བདག་པོས་དུར་ཁྲོད་མེ་རི་འབར་བར་མཁའ་འགྲོ་དང༌། མཁའ་འགྲོ་མ། གྲུབ་པ་དང༌། རིག་པ་འཛིན་པའི་ཚོགས་ལ་གསང་བ་སྔགས་ཀྱི་ཆོས་བསྟན་པའི་ཚེ་སློབ་དཔོན་དགའ་རབ་རྡོ་རྗེ་མི་ཡུལ་དུ་བྱོན་པ་སྟེ། ཇི་སྐད་དུ། སྒྲ་ཐལ་འགྱུར་རྩ་བའིརྒྱུད་ལས། ང་ནི་མྱ་ངན་འདས་འོག་ཏུ། །ནུབ་ཕྱོགས་ཨོ་རྒྱན་དག་གི་ཡུལ། །དྷ་ན་ཀོ་ཤའི་ལྷ་ལྕམ་ལ། །ཕ་མེད་བུ་སྟེ་བཛྲ་ཧེ། །འདིས་ནི་དམ་པའི་བསྟན་པ་འཛིན། ། ཞེས་པ་ལྟར་ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་ཞེས་བྱ་བར། བདེ་བྱེད་བརྩེགས་པའི་མཆོད་རྟེན་ཞེས་གྲགས་པ་ལྷ་ཁང་ཆེན་པོ་གཅིག་ལ་ལྷ་ཁང་ཆུང་ངུ་སྟོང་དྲུག་བརྒྱ་བརྒྱད་ཀྱིས་བསྐོར་བའི་དཔལ་འབྱོར་ཕུན་སུམ་ཚོགས་པའི་གནས་སུ། ཡབ་རྒྱལ་པོ་དྷ་ཧེ་ན་ཏ་ལོ་དང་ཡུམ་བཙུན་མོ་བརྩོན་རྒྱལ་གཉིས་ལ་སྲས་མོ་པྲ་ར་ནི་བྱ་བའི་དགེ་སློང་མ་ཞིག་བྱུང༌། དེ་ཉིད་ཡུལ་དེ་ནས་དཔག་ཚད་ཙམ་འདས་པའི་གསེར་གྱི་བྱེ་མ་བརྡལ་བའི་མཚོ་གླིང་ཞིག་ཏུ་རྩའི་སྤྱིལ་བུ་ཆུང་ངུ་ཞིག་ལ་བརྟེན་ཏེ། གཡོག་མོ་བདེ་བའི་སྙིང་ལྡན་མ་བྱ་བ་དང་ལྷན་གཅིག་ཏུ་རྣལ་འབྱོར་བསྒོམས་ཤིང་གནས་སོ། ། ཤིང་མོ་གླང་གི་ལོའི་དབྱར་ཟླ་ར་བའི་ཚེས་བརྒྱད་ཀྱི་ཐོ་རངས་ཁའི་རྨི་ལམ་ན། དེ་བཞིན་གཤེགས་པ་ཐམས་ཅད་ལས་འོད་ཟེར་འཕྲོས་ཏེ་ཉི་ཟླ་གཉིས་སུ་གྱུར་པ་ལས་ཉི་མ་སྤྱི་བོ་ནས་མར་དང་ཟླ་བ་རྐང་མཐིལ་ལས་ཡར་ཐིམ་པ་རྨིས་སོ། །དེའི་ནང་པར་མཚོ་ཀུ་ཏྲིའི་འགྲམ་དུ་ཁྲུས་བྱས་ནས་ཁ་ཤར་དུ་ཕྱོགས་ནས་འདུག་པ་ལ། ཕྱག་ན་རྡོ་རྗེ་གསེར་གྱི་ངང་པ་ཞིག་ཏུ་སྤྲུལ་ནས་ལྷའི་བུ་སེམས་ལྷག་ཅན་ཡི་གེ་ཧཱུྃ་ཞིག་ཏུ་བསྡུས། སྤྲུལ་པའི་བྱ་ངང་པ་བཞི་དང་བཅས་ནམ་མཁའ་ལས་བབ་སྟེ་སྲས་མོའི་མདུན་དུ་ཁྲུས་བྱས་པའི་མཐར་སྤྲུལ་གཞི་ནམ་མཁའ་ལ་འཕུར། སྤྲུལ་པའི་གཙོ་བོ་གསེར་གྱི་བྱས་སྲས་མོའི་སྙིང་ཁར་མཆུ་ལན་གསུམ་གཏུགས་ནས་ཧཱུྃ་འོད་འབར་བ་ཞིག་བསྟིམས་ནས་སྔར་གྱི་གནས་སུ་འཕུར་རོ། །དེ་ནས་མི་རིང་བར་ཟླ་དུས་ཚང་བ་ན་རྩིབ་མ་གཡས་པའི་གོ་བར་ནས་ཁྱེའུ་མཚན་དང་དཔེ་བྱད་ཀྱིས་བརྒྱན་པ་ཞིག་བལྟམས་པ་ན། ཡུམ་དགེ་སློང་མ་ཤིན་ཏུ་ངོ་ཚ་ནས་སྨྲས་པ། ཕ་མེད་བུ་འདི་འདྲེ་བས་གཞན་པ་སུ། །གལ་ཏེ་ལྷ་དང་ལྷ་མིན་སྣ་ཚོགས་གཟུགས། །འདི་ལྟར་འབྱུང་བའི་དཔེ་ནི་སུས་མཐོང་མེད། །རྒྱལ་ཁམས་ཆོས་མེད་འདི་ནི་སུ་ལ་སྲིད། །ཅེས་སོགས་སྨྲེ་སྔགས་མང་དུ་བཏོན་ཏེ་ཐལ་དོང་དུ་བསྐྱུར་བ་ན་སྒྲ་དང་འོད་ལ་སོགས་པའང་བྱུང་བར་གྱུར་ཏོ། ། དེ་ནས་ཞག་གསུམ་ནས་བལྟས་པས་ཅི་ཡང་མ་ཉེས་པར་མཐོང་བས་སྤྲུལ་བ་ཡིན་པར་ཤེས་ཏེ་བཀུར་སྟི་ཆེན་པོ་དང་བཅས་པས་སྤྱན་དྲངས་པ་ན། བར་སྣང་ནས་ལྷ་རྣམས་ཀྱིས། མགོན་པོ་ཆེན་པོ་བཅོམ་ལྡན་འདས། །བདག་ཀྱང་རབ་ཏུ་སྐྱབས་པ་དང༌། །ནམ་མཁའི་རྡོ་རྗེ་དེང་བདག་གསོལ། །ཞེས་བཀྲ་ཤིས་པར་བརྗོད་ཅིང་མཁའ་འགྲོ་མ་རྣམས་ཀྱིས་མཆོད་པའི་སྤྲིན་གཏིབས་ཏེ་ལྷ་དང་ཀླུ་དང་གནོད་སྦྱིན་ལ་སོགས་པས་ཙནྡན་དང་གུར་གུམ་གྱི་ཆར་འབེབས་པ་སོགས་བྱུང་ངོ༌། ། ལོ་བདུན་སོང་བ་ན་སྲས་ཀྱིས་ཡུམ་ལ། ཀྱེ་བདག་གིས་པཎྜི་ཏ་རྣམས་ལ་ཆོས་ཀྱི་གཏམ་བགྲོ་གླེང་བྱེད་པར་འཚལ་ན་ཡུམ་བདག་ལ་ཅི་བདེར་གནང་བ་སྩོལ་ཅིག།ཅེས་གསུངས་པ་ན། ཡུམ་གྱིས་བུ་ཁྱོད་ནི་ཤིན་ཏུ་གཞོན་པས་པཎྜི་ཏ་རྣམས་མཁས་ཤིང་གཞུངས་པས་ཁྱོད་ཀྱིས་ཐུབ་པ་དཀའ་འོ་ཟེར། ཅིས་ཀྱང་བགྱི་བར་གསོལ་བ་ན། རྒྱལ་པོས་ཁྱེའུ་འདི་ནི་གཞོན་པས་པཎྜི་ཏ་རྣམས་དང་ཆོས་ཀྱི་གཏམ་འོང་པ་དཀའ་མོད་ཀྱི། འོན་ཀྱང་ལུས་ལ་སྐྱེས་བུ་ཆེན་པོས་མཚན་མང་པོ་འདུག་པས་སྤྲུལ་བ་ཡིན་ཡང་སྲིད་སྙམ་ནས་མཆོད་གནས་པཎ་ཆེན་ལྔ་བརྒྱ་ལ་ཚུལ་དེ་བསྙད། དེ་ནས་པཎྜི་ཏ་རྣམས་ལ་ཕྱག་མཛད་ཅིང་བགྲོ་གླེང་དང་བརྒལ་བརྟག་གི་རིམ་པ་མང་དུ་མཛད་པས་པཎྜི་ཏ་རྣམས་ཀྱི་སྤོབས་པ་བཅོམ་པས་ཞབས་སྤྱི་བོར་བླངས་ཤིང་མཆོད་ནས་པྲ་ཛྙཱ་བྷ་བ་ཞེས་མཚན་གསོལ། རྒྱལ་པོ་ངོ་མཚར་ཞིང་དགའ་བས་དགའ་རབ་རྡོ་རྗེ་ཞེས་མཚན་བཏགས། སྔར་ཡུམ་གྱིས་ཐལ་དོང་དུ་བསྐྱུར་ཀྱང་མ་ཉེས་པས་རོ་ལངས་ཐལ་མདོག་ཏུ་གསོལ། དེ་ནས་བྱང་ཕྱོགས་རི་བོ་ཉི་མ་རབ་ཏུ་སྣང་བྱེད་ཅེས་བྱ་བར་བྲག་རི་ཤིན་ཏུ་འཇིགས་པ་ཡི་དྭགས་ཀྱི་ཚོགས་མངོན་སུམ་དུ་རྒྱུ་བ་ཞིག་གི་སྟེང་དུ་རྩྭའི་སྤྱིལ་བོར་ལོ་སུམ་ཅུ་རྩ་གཉིས་ཀྱི་བར་དུ་ཏིང་ངེ་འཛིན་ལ་བཞུགས་པའི་ཚེ། ས་ཆེན་པོ་ལན་དུ་མར་གཡོས་ཤིང་ནམ་མཁའ་ལས་མུ་སྟེགས་ཀྱི་བསྟན་པ་ཉམས་པར་བྱས་སོ་ཞེས་སྒྲ་གྲག དེ་མུ་སྟེགས་ཀྱི་རྒྱལ་པོས་ཐོས་པས་གཤེད་མ་བཏང་ནས་སློབ་དཔོན་བཀྲོང་བར་བརྩམས་པ་ན་ནམ་མཁའི་ལམ་ནས་གཤེགས་པ་མཐོང་བས་རྒྱལ་པོ་འཁོར་བཅས་དད་དེ་སངས་རྒྱས་པའི་བསྟན་པར་ཞུགས། དེ་ནས་ཐེག་པ་ཕྱི་ནང་གི་སྡེ་སྣོད་རྣམས་དང༌། ཁྱད་པར་འོད་གསལ་རྫོགས་པ་ཆེན་པོ་ཤྭ་ལོ་ཀ་འབུམ་ཕྲག་དྲུག་ཅུ་རྩ་བཞི་ཐུགས་ལ་བཞུགས་པ་རྣམས། རྡོ་རྗེ་སེམས་དཔས་ཞལ་མངོན་སུམ་དུ་བསྟན་ནས་རིག་པ་སྤྱི་བླུགས་ཀྱི་དབང་གིས་མི་སློབ་པའི་ཡེ་ཤེས་མངོན་དུ་མཛད་པའི་ཚུལ་བསྟན། ཚིག་གི་རྒྱུད་རྣམས་ཡི་གེར་འགོད་པའི་ལུང་བྱིན་ཏེ་རི་མ་ལ་ཡའི་རིན་ཆེན་སྤུངས་པ་རྒྱས་པའི་རྩེ་མོར་སློབ་དཔོན་ཉིད་དང༌། རྡོ་རྗེ་དབྱིངས་ཀྱི་མཁའ་འགྲོ་མ་འཇིག་རྟེན་བདེ་བའི་རོ་དང་ལྡན་པ་དང༌། བདེ་བྱེད་སེར་མོ། ཡོན་ཏན་མཐའ་ཡས་པའི་མཁའ་འགྲོ་མ་གསུམ་གྱིས་ལོ་གསུམ་གྱི་བར་དུ་ཚིག་དང་ཡི་གེར་དཀར་ཆག་ཏུ་བཏབ། རང་བྱུང་རང་བབ་ཀྱི་ཡི་གེ་སྤྲུལ་བའི་སྐུ་དང་བཅས་པ་ཕྱིན་ཅི་མ་ལོག་པར་ལེགས་པར་བཀོད་ནས་མཁའ་འགྲོ་མ་མངོན་པར་འབྱུང་བའི་ཕུག་ཏུ་བཞུགས་སུ་གསོལ། དེ་ནས་རྡོ་རྗེ་གདན་གྱི་བྱང་ཤར་དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བ་དབུས་སུ་མཆོད་རྟེན་ཆེན་པོ་ཡོད་ཅིང་སེམས་ཅན་རབ་ཏུ་གདུག་པ་ཚོགས་པའི་གནས་སུ་བྱོན་ནས་མཁའ་འགྲོ་མ་ཉི་མའི་འོད་ཟེར་སོགས་ལ་ཆོས་བསྟན་པས་མཁའ་འགྲོ་མ་འབུམ་ཕྲག་མང་པོ་འཇའ་ལུས་སུ་གྲུབ་ཅིང༌། སློབ་དཔོན་ཉིད་ཀྱང་ཆུ་བོ་དན་ཏིག་བྱ་བར་འོད་ཕུང་དུ་ཡལ་ལོ། ། |
 སློབ་དཔོན་འཇམ་དཔལ་བཤེས་གཉེན་ནི། ཇི་སྐད་དུ། ཐལ་འགྱུར་ལས། དེ་ཡི་རྗེས་འཛིན་ནུབ་ཀྱི་ཕྱོགས། །བྲམ་ཟེའི་ཕྲུ་གུ་སྐལ་ལྡན་པ། །མཉྫུ་ཤྲཱི་པ་ཏི་ཞེས། །ལོ་ནི་བདུན་ཅུ་རྩ་ལྔར་འཛིན། །ཞེས་པ་ལྟར་མ་གྷ་དྷ་རྡོ་རྗེ་གདན་གྱི་ནུབ་ཕྱོགས་སུ་ཡབ་བྲམ་ཟེ་དཔལ་ལྡན་སྐྱོང་དང༌། ཡུམ་བྲམ་ཟེ་མོ་ཀུ་ཧ་ན་ཞེས་བྱ་བ་ལ་འཇམ་དཔལ་གྱི་སྤྲུལ་པ་ཁྱེའུ་མཚན་དང་ལྡན་པ་ཞིག་བྱུང་སྟེ། མཚན་ལ་བྲམ་ཟེ་སྙིང་པོ་གྲུབ་པའམ་བདེ་མཆོག་སྙིང་པོ་ཞེས་སུ་གྲགས། ནང་བའི་ཆོས་སྒོར་ཞུགས་ནས་རིག་པའི་གནས་ལྔ་ལ་མཁས་པའི་དགེ་སློང་རྒྱུ་འབྲས་ཀྱི་ཆོས་ཐམས་ཅད་ཐུགས་སུ་ཆུད་པ་ཞིག་ཏུ་གྱུར་ཏོ། །པཎྜི་ཏ་ལྔ་བརྒྱའི་མཆོག་ཏུ་གྱུར་པའི་ཚེ་སྤྲུལ་པའི་སྐུ་དགའ་རབ་རྡོ་རྗེ་ཞེས་བྱ་བས་རྒྱུ་འབྲས་ལས་འདས་པའི་ཆོས་རྩོལ་མེད་རྫོགས་པ་ཆེན་པོ་སྒྲོག་གོ་ཞེས་ཕྱོགས་ཀུན་ཏུ་གྲགས། དེའི་ཚེབྲམ་ཟེ་སྙིང་པོ་གྲུབ་པ་ལ་རྗེ་བཙུན་འཇམ་དཔལ་གྱིས་ལུང་བསྟན་པ། ནུབ་ཕྱོགས་ཨོ་རྒྱན་གྱི་ཡུལ་དྷ་ན་ཀོ་ཤའི་གླིང༌།མཚོ་ཆེན་པོ་ཀུ་ཤའི་འགྲམ། དུར་ཁྲོད་གསེར་གླིང་ཧེ་ཆེན་བརྡལ་བའི་འདབས་རྡོ་རྗེ་གླིང་གི་ཕུག་པ་ན། སངས་རྒྱས་ཐམས་ཅད་ཀྱིས་རྩོལ་མེད་བསྟན་པའི་སྒྲོན་མེར་དབང་བསྐུར་བ་རྡོ་རྗེ་སེམས་དཔའི་སྤྲུལ་པ་དགའ་རབ་རྡོ་རྗེ་བྱ་བ་ཡོད་ཀྱི། དེ་ལ་རྨད་བྱུང་བསྟན་པའི་སྙིང་པོ་ཨ་ཏི་ཡོ་ག་ཞེས་བྱ་བ་རྩོལ་མེད་སྐད་ཅིག་ལ་འཚང་རྒྱ་བའི་ཆོས་ཡོད་པས་དེ་ལོངས་ལ་སྡུད་པ་པོ་གྱིས་ཤིག་ཅེས་ལུང་བསྟན་ཏོ། ། དེར་པཎྜི་ཏ་གཞན་རྣམས་ན་རེ། རྒྱུ་འབྲས་ལས་འདས་པའི་ཆོས་ཡོད་པ་མི་རིགས་པས་སུན་དབྱུང་བར་འཐད་ཅེས་བགྲོས་སོ། །བྲམ་ཟེ་སྙིང་པོ་གྲུབ་པས་མཁྱེན་བཞིན་དུ་ཆོས་དང་གང་ཟག་གི་ཆེ་བ་འབྱིན་པའི་ཕྱིར་ཞལ་འཆམ་པའི་ཚུལ་གྱིས་རཱ་ཛ་ཧསྟི་སོགས་པཎྜི་ཏའི་མཆོག་བདུན་དང་ལྷན་ཅིག་ཏུ་སོང་ངོ༌། ། དགའ་རབ་རྡོ་རྗེའི་དྲུང་དུ་ལྷགས་ནས་རྒྱུའི་སྡེ་སྣོད་གསུམ་དང་འབྲས་བུ་གསང་སྔགས་ཕྱི་ནང་གང་གི་སྒོ་ནས་བརྩད་ཀྱང་མ་ཐུབ། བདེ་མཆོག་སྙིང་པོས་པཎྜི་ཏ་གཞན་རྣམས་ལ་འུ་ཅག་གིས་རྩོད་པ་ནོངས་པས་སྤྲུལ་བའི་སྐུ་འདི་ལས་རྒྱུ་འབྲས་ལས་འདས་པའི་ཆོས་མི་ཞུའམ་ཞེས་བགྲོ་བ་ལྟར་མཛད་པས། ལ་ལ་ནི་སྐྱེངས་ནས་ངོ་གནག་པར་གྱུར་ཅིང༌། ལ་ལ་ནི་འོ་ཅག་གིས་བརྩད་ཅིང་བརྙས་པ་བྱས་པས་ཞུ་བར་མི་སྤོབས་ཟེར། དེར་བདེ་མཆོག་སྙིང་པོ་ལ་སོགས་པས་བཤགས་པ་བྱ་བར་བགྲོས་ཏེ་པཎྜི་ཏ་རྣམས་ཀྱིས་དགའ་རབ་རྡོ་རྗེ་ལ་ཕྱག་དང་སྐོར་བ་བྱས།སྙིང་པོ་གྲུབ་པས་རང་གི་ལྕེ་བཅད་དེ་བཤགས་པ་བྱ་བར་དགོངས་པ་ན། རིག་འཛིན་དགའ་རབ་རྡོ་རྗེས་མཁྱེན་ཏེ་ཚིགས་སུ་བཅད་པ་འདི་སྐད་གསུངས་སོ། ། མཉམ་ཉིད་ཕྱོགས་བྲལ་ལྷུན་གྲུབ་བདེ་བ་ཆེ། །ཆོས་རྣམས་ཐམས་ཅད་བྱང་ཆུབ་སྙིང་པོ་ལ། །འགྲོ་དྲུག་རང་ལ་ཡུལ་བཟུང་ཞེན་པས་བཅིངས། །མུ་སྟེགས་མཐར་འཛིན་རྟག་ཆད་ལོག་ལྟར་ཞུགས། །ཐེག་བརྒྱད་ངང་ལ་གཉིས་བཟུང་ཡིན་མིན་གྱི། །ཞེ་འདོད་ཕྱོགས་རིས་དབྱིངས་ལ་ཕྱོགས་སུ་ཞེན། །མཉམ་པའི་དོན་ལ་ཕྱོགས་དང་རིས་སུ་བཅད། །རང་ལ་ཡོད་བཞག་མེད་པ་གཞན་དུ་འཚོལ། །ལྷུན་གནས་བདེ་བོར་རྩོལ་བས་དང་དུ་ལེན། །རང་སེམས་སངས་རྒྱས་ནམ་ཞིག་དུས་ལ་ལྟོས། །མཉམ་ཉིད་མ་རྟོགས་ཞེ་འདོད་ཕྱོགས་ལྟ་ལ། །འདི་ཡི་ཐང་ཆད་ཡུས་རྒྱས་སྙིང་རེ་རྗེ། །དེ་བས་ཕྱོགས་འཛིན་ཞེན་པའི་དུག་ཆོམས་ལ། །མཉམ་ཉིད་ཕྱོགས་བྲལ་བདེ་བའི་དོན་ལ་ཞུགས། ། ཞེས་གསུངས་ནས་ཁྱོད་ཀྱིས་ལྕེ་བཅད་པས་སྡིག་པ་མི་འདག།རྒྱུ་འབྲས་ལས་འདས་པའི་ཆོས་ཁྱད་དུ་འཕགས་པ་ཞིག་རྩོམས་དང་དེས་སྡིག་པ་དག་པར་འགྱུར་རོ་གསུངས། ཕྱིས་སུ་བྱང་སེམས་སྡེ་ལ་འགྲེལ་པ་གསེར་ཞུན་བརྩམས་ཤིང་བཀའི་བསྡུ་བ་པོ་མཛད། དེར་བརྡ་བསྟན་པ་ཙམ་གྱིས་རྟོགས་གྲོལ་དུས་མཉམ་དུ་གྱུར་ཀྱང་བསྟན་པ་ཡོངས་སུ་རྫོགས་པར་བྱ་བའི་ཕྱིར་རིན་པོ་ཆེའི་མཎྜལ་སྣ་ཚོགས་པ་ཕུལ་ནས་སྙིང་པོའི་དོན་ཞུས་པས། སེམས་སྡེའི་སྐོར་རྩ་བའི་རྒྱུད་བརྒྱད་དང༌། ཡན་ལག་གི་རྒྱུད་མཐའ་ཡས་པ། དབང་མན་ངག་ལ་སོགས་པ་རྒྱས་པར་གནང༌། དེ་ནས་ཀློང་སྡེའི་སྐོར་ཕྱི་ནང་གསང་བའི་རྒྱུད་ཆེ་ཆུང༌། དགོངས་པ་གཏད་རྒྱའི་སྐོར་ལ་སོགས་པ་རྒྱུད་མན་ངག་དང་བཅས་པས་མཚོན་ཨ་ཏི་ཡོ་གའི་རྒྱུད་དཔག་ཏུ་མེད་པ་གསུངས་སོ། ། དེས་ཀྱང་ཐུགས་མ་ཚིམས་པར་ཕྱག་དང་སྐོར་བ་བྱས་ཏེ་རིན་པོ་ཆེའི་མེ་ཏོག་ཕུལ་ནས་གསོལ་བ་བཏབ་པས། རྒྱལ་ཐབས་སྤྱི་བླུགས་ཀྱི་དབང་བསྐུར། རང་གྲོལ་མངོན་སུམ་དུ་སྟོན་པ་མན་ངག་སྡེའི་སྐོར་ཡང་བྱིན་ཏེ་ཕྱི་ལྟར་འཇམ་དཔལ་བཤེས་གཉེན་དང་ནང་ལྟར་རྡོ་རྗེ་བདེ་བ་རྩལ་དུ་མིང་བཏགས། སླར་ཆུ་བོ་དན་ཏིག་བྱ་བར་དགའ་རབ་རྡོ་རྗེ་འོད་ཕུང་དུ་ཡལ་བའི་ཚེ། འཇམ་དཔལ་བཤེས་གཉེན་གྱིས་གདུང་ཚིག་ལན་གསུམ་བཏོན་པས་ནམ་མཁའ་འོད་ཕུང་གི་དཀྱིལ་ནས་སྐུ་མངོན་སུམ་སྣང་བར་མཛད་དེ། གསེར་གྱི་ཟ་མ་ཏོག་སེན་གང་བ་གཅིག་ཕྱག་ཏུ་བབ་པས་ཚིག་གསུམ་གནད་དུ་བརྡེག་པའི་མན་ངག་འདས་རྗེས་སུ་འདུག་པ་གཟིགས་པ་ཙམ་གྱིས་ཐུགས་སུ་ཆུད། དགའ་རབ་རྡོ་རྗེ་དང་རྟོགས་པ་མཉམ་པ་བྱུང་བས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་སྡེ་གསུམ་དུ་ཕྱེས་ཏེ། སེམས་གནས་རྣམས་ལ་སེམས་ཀྱི་སྡེ། །བྱ་བྲལ་རྣམས་ལ་ཀློང་གི་སྡེ། །གནད་གཙོ་བ་ལ་མན་ངག་སྡེ། །ཞེས་པ་ལྟར་རྫོགས་ཆེན་སྡེ་གསུམ་དུ་ཕྱེས་ཤིང་གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང༌། རྣ་རྒྱུད་གཉིས་སུ་ཕྱེས་ནས་རྣ་རྒྱུད་མཆན་དུ་བཏབ། བཤད་རྒྱུད་སྙིང་གི་ཐིག་ལེ་རེ་ཞིག་སྤེལ་བའི་སྣོད་མ་རྙེད་པས་རྡོ་རྗེ་གདན་གྱི་བྱང་ཤར་ཕ་ཝང་རྡོ་རྗེ་རྒྱ་གྲམ་གྱིས་རྒྱས་བཏབ་པའི་འོག་ཏུ་སྦས་ཏེ་མི་སྣང་བར་བྱས། རྒྱལ་པོ་དྷ་ཧེ་ན་ཏ་སོགས་ལ་དགོངས་པའི་དོན་སྟོན་བཞིན་སོ་ས་གླིང་གི་དུར་ཁྲོད་དུ་ལོ་བརྒྱ་དང་ཉི་ཤུ་རྩ་དགུའི་བར་ཏིང་ངེ་འཛིན་ལ་བཞུགས་ཤིང༌། དེར་མི་སྡུག་པའི་མཁའ་འགྲོ་མ་རྣམས་དང་སྤྱོད་པ་ལ་གནས་པའི་སྒྲུབ་པ་པོ་སེམས་ཅན་དཔག་ཏུ་མེད་པའི་དོན་ནས་རྗེས་སུ་སློབ་དཔོན་ཉིད་སྐུ་འོད་ཕུང་དུ་ཡལ། |
 རིག་འཛིན་ཆེན་མོ་ཤྲཱི་སེངྷ་ནི།ཐལ་འགྱུར་ལས། དེ་ཡི་རྗེས་སུ་སྐལ་ལྡན་པ། །སོ་ས་གླིང་ཞེས་བྱ་བ་རུ། ཁྱིམ་བདག་རིགས་སྐྱེས་ཤྲཱི་སེང༌། །ཞེས་བྱ་བ་ཡིས་འཛིན་པར་འགྱུར། །ཞེས་པ་ལྟར། རྒྱ་ནག་པོའི་གྲོང་ཁྱེར་ཤོ་ཁྱམ་ཞེས་པར་ཁྱིམ་བདག་དགེ་བའི་ཡིད་ཅན་དང༌། ཡུམ་སྣང་བ་གསལ་བ་རབ་ཏུ་མཁྱེན་མ་གཉིས་ཀྱི་སྲས་སུ་སྐུ་འཁྲུངས། ལོ་བཅོ་ལྔ་ནས་སློབ་དཔོན་ཧ་རི་བྷ་ལ་སོགས་པཎྜི་ཏ་ལྔ་བརྒྱ་ལས་སྒྲ་ཚད་སོགས་ཐུན་མོང་གི་རིག་པ་རྣམས་ལོ་གསུམ་ལ་སྦྱངས་པ་མཛད་པས་མཁས་པ་ཆེན་པོར་གྱུར། སྐབས་ཤིག་ནུབ་ཕྱོགས་ཀྱི་གྲོང་ཁྱེར་གསེར་གླིང་བྱ་བར་འགྲོ་བའི་ལམ་བར་ནས་འཕགས་པ་སྤྱན་རས་གཟིགས་ནམ་མཁར་བྱོན་ཏེ་སྐལ་ལྡན་འབྲས་བུ་ངེས་པར་འདོད་ན་རྒྱ་གར་གྱི་དུར་ཁྲོད་སོ་ས་གླིང་དུ་སོང་ཞིག །ཅེས་ལུང་བསྟན་པས་སློབ་དཔོན་ཉིད་ཡིད་ཚིམས་པར་མ་གྱུར་ཏེ་ད་དུང་འབྲས་བུ་བླ་ན་མེད་པ་གོ་སླ་བའི་ཕྱིར་གསང་སྔགས་ཀྱི་རྒྱུད་གཞན་ལ་མཁས་པར་བྱ་སྙམ་དུ་དགོངས་ཏེ་རི་བོ་རྩེ་ལྔ་རུ་གདོལ་བའི་རིགས་ཀྱི་སློབ་དཔོན་བྷེ་ལ་ཀིརྟི་ལས་སྔགས་ཕྱི་ནང་གི་ཆོས་མ་ལུས་པར་གསན་ཅིང་ཉམས་འོག་ཏུ་ཆུད་པར་མཛད། རབ་ཏུ་བྱུང་ནས་དགེ་སློང་སྡེ་སྣོད་འཛིན་པ་མཛད་ཅིང་ལོ་སུམ་ཅུའི་བར་དུ་སྦྱངས་པའི་ཡོན་ཏན་ལ་གནས། སླར་འཕགས་པའི་ལུང་གིས་སྔོན་བཞིན་བསྐུལ་བས་རྒྱ་གར་དུ་བགྲོད་པའི་ལམ་ལ་དཀའ་བ་མེད་པ་ཞིག་དགོངས་ཏེ་ལོ་གསུམ་དུ་སྒྲུབ་པ་ལ་བཞུགས་པས་རིག་པ་འཛིན་པའི་སྐུར་གྱུར། དེ་ནས་ཞབས་ས་ལ་ཁྲུ་གང་ཙམ་གྱིས་མ་རེག་པར་དུར་ཁྲོད་སོ་ས་གླིང་དུ་བྱོན་ནས་སློབ་དཔོན་ཆེན་པོ་འཇམ་དཔལ་བཤེས་གཉེན་དང་མཇལ་བ་སྟེ། ཐོག་མར་ཞལ་མཇལ་སྐབས་སློབ་དཔོན་འཇམ་དཔལ་བཤེས་གཉེན་ཐོང་གཤོལ་ཕྲག་པ་ལ་བཟུང་ནས་ཤམ་ཐབས་ཐོད་དུ་བཅིངས་པ་ཞིག་འདུག་པས་ངོ་མ་ཤེས་ཤིང༌། དེ་ནི་པཎྜི་ཏའི་ཆ་བྱད་དམ་ཡང་ན་རྣལ་འབྱོར་བའི་ཆས་སུ་འོང་སྙམ་ནས་བཟའ་བ་ཞིག་བསླངས་པས། ངའི་ཆུང་མ་ལ་སློངས་ཟེར། དེ་ནས་གྲོང་ཁྱེར་དུ་ཕྱིན་ནས་བསླངས་པས། ཕྱག་རྒྱ་མས་ཚོང་དུས་ནས་བྱེའུ་མཆིལ་བ་བདུན་ཉོས་པ་བཙོས་ཤིང་འབྲས་ཆན་དང་བསྲེས་ནས་དྲངས། ང་དགེ་སློང་ཡིན་པས་བཟའ་བ་མི་རུང་བྱས་པས་རྗེས་སུ་ཡི་རང་ཟེར། ཕར་ལག་མཐིལ་དུ་བཞག་པ་མོས་ཕུས་བཏབ་པས་ཐམས་ཅད་ཅོ་དིར་གྱིས་ནམ་མཁའ་ལ་དེངས་སོང༌། ཅུང་ཟད་ནས་ཁྱིམ་བཙུན་བྱུང་སྟེ་འདི་ལ་བཟའ་བ་བྱིན་ནམ་ཟེར་བར། ཆུང་མས་བཟའ་བ་བྱིན་ཀྱང་ཁོང་མི་འདོད་པ་གདའ་ཞུས་པར། གང་ཟག་འཆིང་བ་ཅན་གསུངས། ཤྲཱི་སེངྷས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞལ་འདོན་མཛད་པས་སློབ་དཔོན་གྱིས་དང་པོ་མལ་ན་གཟིམས་བཞིན་གསན། དེ་ནས་བཞེངས་ཏེ་གསན་ཞིང་ཐམས་ཅད་རྫོགས་པ་ན་དོན་ལ་ལྟ་ཅི་ཚིག་ལའང་རྨོངས་གསུངས་པས་ད་གཟོད་འཇམ་དཔལ་བཤེས་གཉེན་ཡིན་པ་དགོངས། རྗེས་སུ་བཟུང་བར་གསོལ་བ་བཏབ་པས་བླ་མས་ཀྱང་དགྱེས་བཞིན་དུ་གནང༌། ལོ་ཉེར་ལྔའི་བར་ལ་གདམས་པ་དང་རྗེས་སུ་གདམས་པ་རྣམས་བསྩལ་པའི་རྗེས་སུ་སློབ་དཔོན་ཉིད་སྐུ་འོད་ཕུང་དུ་ཡལ། དེའི་ཚེ་ཤྲཱི་སེངྷས་སྨྲེ་སྔགས་ཀྱི་གདུང་དབྱངས་བཏོན་པས་ནམ་མཁའ་ནས་སློབ་དཔོན་གྱི་སྐུ་དངོས་སུ་བསྟན་ཏེ་རིན་པོ་ཆེའི་ཟ་མ་ཏོག་སེན་གང་བ་ཞིག་ཕྱག་ཏུ་གཏད་པར་སྒོམ་ཉམས་དྲུག་པ་ཞེས་བྱ་བའི་འདས་རྗེས་བབ་པས་སློབ་དཔོན་ཉིད་དོན་གྱི་གདེང་དང་ལྡན་པར་གྱུར་ཏོ། ། དེ་ནས་སློབ་དཔོན་ཤྲཱི་སེངྷས་རྡོ་རྗེ་གདན་གྱི་འོག་ནས་སྔར་སྦས་པའི་རྒྱུད་རྣམས་བཏོན་ཏེ་རྒྱ་ནག་ཏུ་བྱོན་ཞིང༌། རྫོགས་པ་ཆེན་པོའི་མན་ངག་གི་སྡེ་ལ། ཕྱི་སྐོར། ནང་སྐོར། གསང་སྐོར། གསང་བ་བླ་ན་མེད་པའི་སྐོར་བཞིར་ཕྱེས་ནས་སྐོར་སྔ་མ་གསུམ་ལ་སྤྲོས་བཅས་ཀྱི་དོན་དུ་བསྡེབས་ནས་བྱང་ཆུབ་ཤིང་གི་ལྷ་ཁང་བྱ་འདབས་སུ་གཏེར་དུ་སྦས། གསང་བ་བླ་ན་མེད་པའི་སྐོར་མཁའ་འགྲོས་ལུང་བསྟན་པ་ལྟར་བཀྲ་ཤིས་ཁྲི་སྒོའི་ཀ་བར་སྨོན་ལམ་གྱི་རྒྱས་བཏབ་ནས་སྦས། སློབ་དཔོན་ཉིད་བསིལ་སྦྱིན་ཞེས་པའི་དུར་ཁྲོད་ཆེན་པོ་རུ་གདུག་པའི་མི་མ་ཡིན་རྣམས་ཀྱིས་བཀུར་སྟི་དང་བཅས་པས་ཏིང་ངེ་འཛིན་ལ་བཞུགས་མཐར་སྐུ་འོད་ཕུང་དུ་ཡལ། ། |
 མཁས་པ་ཛྙཱ་ན་སུ་ཏྲའམ་ཡེ་ཤེས་མདོ་ནི། ཐལ་འགྱུར་ལས། དེ་རྗེས་འཛིན་པ་གདོལ་བའི་རིགས། །ཛྙཱ་ན་སུ་ཏྲས་འདི་ཉིད་འཛིན། །ཞེས་པ་ལྟར། ཤར་ཕྱོགས་ཀ་མ་ཤཱི་ལའི་གྲོང་ཁྱེར་དུ་ཡབ་གདོལ་བའི་རིགས་ཨུ་པ་རྡ་ཛ་ན་བྱ་བ་དང༌། ཡུམ་རྒྱ་མཚོ་མ་བྱ་བའི་བུ་སྦྲུལ་གྱི་གདེངས་ཀས་མཚན་པ་ཞིག་བྱུང་བ་ཕ་མ་གཉིས་སྐྲགས་ཏེ་དུར་ཁྲོད་དུ་བསྐྱལ་བས་ཁྱེའུ་ན་རེ། སྙིང་པོའི་དོན་ལ་ཐུགས་ཕངས་པའི་སྤྲུལ་པ་ཡིན་ཞིང་ལས་ཀྱིས་འབྲེལ་བའི་ཕ་མ་ཡིན་པས་གསོས་ཤིག་ཅེས་ཟེར་བས།བདེན་པར་བཟུང་ནས་བླངས་ཏེ་གསོས། ཁྱེའུ་དེ་གཞན་ལས་སྐྱེད་ཆེ་ཞིང་བློ་གྲོས་དང་ལྡན་པར་གྱུར་ནས་རྒྱལ་པོ་ཧསྟི་དང༌། སྲས་མོ་པྲ་ར་ནི་སོགས་ལས་སེམས་ཕྱོགས་ཀྱི་ཆོས་མང་དུ་གསན། དེ་ནས་རེ་ཞིག་ན་སློབ་དཔོན་བཱི་མ་ལ་ནས་སློབ་དཔོན་ཤྲཱི་སེངྷའི་རྣམ་ཐར་གསན་པས་འབད་རྩོལ་ཆེན་པོས་རྒྱ་ནག་ཏུ་བྱོན་ཏེ་མཁའ་འགྲོ་མས་ལུང་བསྟན་པ་བཞིན་བསིལ་སྦྱིན་དུ་ཤྲཱི་སེངྷ་དང་མཇལ། ལོ་དགུའི་བར་དུ་རྫོགས་ཆེན་གསུངས་ནས་སྙན་བརྒྱུད་དཔེ་དང་བཅས་པ་གནང༌། དེས་ཚིམས་ནས་བྱོན་པར་བརྩམ་པ་ན། སློབ་དཔོན་གྱིས་གཏད་པ་མེད་དོ་གསུངས་པས། ཡེ་ཤེས་མདོ་དོགས་པ་སྐྱེས་ཏེ་སླར་ཡང་རབ་ཏུ་ཟབ་པའི་གདམས་པ་གནང་བར་ཞུས་པས། ཕྱི་སྤྲོས་བཅས་ཀྱི་དབང་རྫོགས་པར་གནང་ནས་གསང་བ་བླ་ན་མེད་པའི་མན་ངག་རྣམས་ལོ་གསུམ་གྱི་བར་དུ་གནང༌། དེ་ནས་ཉམས་སུ་བླང་བར་ཞུས་པས། སྤྲོས་མེད་ཀྱི་དབང་རྫོགས་པར་གནང་ཞིང་རི་བོ་ཀོ་ས་ལའི་རྩེ་མོར་འཁོར་འདས་རུ་ཤན་དབྱེ་བའི་སྤྱོད་པ་མཛད་ཅིང་རབ་ཏུ་སྤྲོས་མེད་ཀྱི་དབང་དང༌། རིམ་པས་ཤིན་ཏུ་སྤྲོས་མེད་ཀྱི་དབང་ཡང་རྫོགས་པར་གནང༌། དེ་ནས་ལོ་བཅུ་དྲུག་ཏུ་ཉམས་སུ་བླངས་པས་སྒོམ་པར་མཛད། སློབ་དཔོན་འདི་ཁྱད་པར་གྱི་སྤྱོད་པ་སྣ་ཚོགས་པར་གནས་པས་དུས་གཞན་ཞིག་ཏུ་ལི་ཡུལ་གྱི་རྒྱལ་པོས་སྤྱན་དྲངས་ནས་དེར་བཞུད་པའི་ཞག་བདུན་ན། སྒྲ་དང་ལྟས་ཆེན་པོབྱུང་བས་ནམ་མཁར་གཟིགས་ཚེ་ཤྲཱི་སེང་ཧ་བཞུགས་པ་མཇལ་བས་སྨྲེ་སྔགས་ཀྱི་གདུང་ཚིག་བཏོན་པས་གཟེར་བུ་བདུན་པའི་ཞལ་ཆེམས་ཕྱག་ཏུ་བབས་པ་དང༌། བཀྲ་ཤིས་ཁྲི་སྒོའི་ཀ་བ་ན་ཡོད་པའི་སྙིང་ཐིག་གསང་བའི་མན་ངག་གི་དཔེ་རྣམས་ལོངས་ལ་དུར་ཁྲོད་བྷ་སིང་དུ་སོང་ཞིག་ཅེས་པ་ཐོས། དེ་ནས་གསང་བའི་དཔེ་རྣམས་བཏོན་ནས་རྒྱ་གར་གྱི་དུར་ཁྲོད་བྷ་སིང་དུ་བྱོན་ཞིང་དེར་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་རྣམས་ལ་གསང་བ་སྙིང་ཐིག་གི་ཆོས་ཀྱི་འཁོར་ལོ་བསྐོར་ཏེ་བཞུགས་བཞིན། བཱི་མ་ལའང་རྗེས་སུ་བཟུང་ནས་གསང་བ་མཆོག་གི་གདམས་པ་ཐམས་ཅད་ལྷག་མེད་དུ་བསྩལ་བའི་མཐར་སྐུ་འོད་ཕུང་དུ་ཡལ་ལོ། ། |
 བཱི་མ་མི་ཏྲའམ་པཎ་ཆེན་དྲི་མེད་བཤེས་གཉེན་ནི།ཐལ་འགྱུར་ལས། དེ་རྗེས་འཛིན་པ་ཁྱིམ་བདག་རིགས། །ཕྱག་རྒྱ་རྒྱ་ཆེན་དག་གིས་འཛིན། །ཞེས་པ་སྟེ་སློབ་དཔོན་འདིའི་རྣམ་ཐར་གདུལ་བྱའི་མོས་སྣང་ལྟར་སྣ་ཚོགས་པར་བཞུགས་པ་ལས་ལོ་རྒྱུས་ཁ་ཅིག་ལྟར་ན། ཕ་མེད་ཀྱི་བུར་གྱུར་བས་ཡུམ་གནོད་དེ་གཡོག་མོ་བྱེ་མའི་ཁུང་དུ་སྦ་བར་མངགས། ཉིན་འགའི་རྗེས་བལྟས་ཙ་ན་མིག་བཀྲ་ཧྲིག་གེ་མ་ཤི་བར་འདུག་པས་སྤྲུལ་པའི་སྐུ་ཡིན་པར་ཤེས་ནས་བླངས། རིག་པའི་གནས་ལྔ་ལ་བསླབས་པས་པཎྜི་ཏ་ལྔ་བརྒྱའི་སྤྱི་ཕུད་དུ་གྱུར། སློབ་དཔོན་ཛྙཱ་ན་སུ་ཏྲ་དང་སྐྱེ་བ་སྔ་མ་སྤུན་ཟླར་གྱུར་པའི་རྟེན་འབྲེལ་ལས་ཐུགས་ཤིན་ཏུ་མཐུན་པར་གནས་ཤིང༌། རེ་ཞིག་ན་སྐྱོ་སངས་ལ་ལྷན་དུ་ཕེབས་སྐབས་རྡོ་རྗེ་སེམས་དཔའ་ནམ་མཁའ་རུ་མངོན་སུམ་དུ་བྱོན་ནས། ཀྱེ་རིགས་ཀྱི་བུ་གཉིས། ཁྱེད་གཉིས་སྐྱེ་བ་ལྔ་བརྒྱ་པཎྜི་ཏའི་ལུས་བླངས་ཤིང་དམ་པའི་ཆོས་སྤྱད་ཀྱང་འབྲས་བུ་མ་ཐོབ། ད་ཡང་མི་ཐོབ་པས་ཚེ་འདི་ཉིད་ལ་ཟག་བཅས་ཀྱི་ཕུང་པོ་མི་སྣང་བར་འཚང་རྒྱ་བར་འདོད་ན་རྒྱ་ནག་པོའི་བྱང་ཆུབ་ཤིང་དྲུང་གི་ལྷ་ཁང་དུ་སོང་ཞིག །ཅེས་ལུང་བསྟན་པས་བཱི་མ་མི་ཏྲ་བརྩོན་འགྲུས་ཆེ་བས་དེ་ཉིད་དུ་ལྷུང་བཟེད་བླངས་ཏེ་བྱོན། ལུང་བསྟན་ལྟར་སློབ་དཔོན་ཤྲཱི་སེང་ཧ་མཇལ་ནས་ལོ་ཉི་ཤུའི་བར་ལ་སྙན་བརྒྱུད་ཕྱི་ནང་གསང་གསུམ་གྱི་གདམས་པ་བསྩལ་ཀྱང་དཔེ་མ་གནང༌། བཱི་མ་ལ་ཐུགས་ཚིམས་ཏེ་སླར་རྒྱ་གར་དུ་བྱོན་ནས་ཛྙཱ་ན་སུ་ཏྲ་ལ་ཇི་ལྟར་བྱུང་བ་རྣམས་བསྙད་དེ་རང་ཉིད་སྤྱོད་པ་ལ་གནས་པར་མཛད། རེ་ཞིག་ན་མཁའ་འགྲོའི་ལུང་གིས། ཀྱེ་སྐལ་ལྡན། སྔར་བས་ཟབ་པའི་སྙིང་ཐིག་གི་གདམས་པ་བཞེད་ན་དུར་ཁྲོད་ཆེན་པོ་བྷ་སིང་གི་ནགས་སུ་སོང་ཞིག། ཅེས་ལུང་བསྟན་པ་བཞིན་དེ་ཉིད་དུ་བྱོན་པས་ཛྙཱ་ན་སུ་ཏྲ་དང་མཇལ་ཞིང་ཆེས་ཟབ་པའི་གདམས་པས་རྗེས་སུ་བཟུང་བར་གསོལ་བ་བཏབ། སློབ་དཔོན་གྱིས་ཆོ་འཕྲུལ་སྣ་ཚོགས་པ་སྣང་བར་མཛད་ནས་སྤྲོས་བཅས་སྤྲོས་མེད་ཀྱི་དབང་རྣམས་བསྐུར། རི་བོ་སྣང་བྱེད་ཀྱི་རྩེ་མོར་འཁོར་འདས་རུ་ཤན་འབྱེད་པའི་སྤྱོད་པ་དང༌། ཤིན་ཏུ་སྤྲོས་མེད་ཀྱི་དབང་རྣམས་རྫོགས་པར་མཛད་པས་ཐུན་མོང་མ་ཡིན་པའི་རྟོགས་པ་འཁྲུངས། ཤངས་ཀྱི་རྩེ་མོར་ཡི་གེ་ཨ་དཀར་པོ་ཟགས་ལ་ཁད་པ་གཅིག་ཀྱང་བྱུང༌། དེ་ནས་རབ་ཏུ་སྤྲོས་མེད་ཀྱི་དབང་རྫོགས་པར་གནང་བས་སེམས་ཀྱི་དེ་ཉིད་ཁོ་ན་རྗེན་པར་མཐོང༌། དབང་དེ་དག་གི་རིམ་པ་བཞིན་རྫོགས་པ་ཆེན་པོ་སྐོར་བཞིའི་གདམས་པ་དཔེ་དང་བཅས་པ་མ་ལུས་པ་གནང༌། ལོ་བཅུའི་བར་ལ་ཞུན་མཐར་བཅད་ཅིང་ཛྙཱ་ན་སུ་ཏྲ་འོད་ཕུང་དུ་ཡལ་བའི་ཚེ་བཱི་མས་སྨྲེ་སྔགས་དང་གདུང་དབྱངས་བཏོན་པ་ན། སླར་ཡང་སྐུ་མངོན་སུམ་དུ་སྣང་བར་མཛད་ནས་རིན་པོ་ཆེ་སྣ་ལྔའི་ཟ་མ་ཏོག་ཅིག་ཕྱག་ཏུ་གཏད་པ་ལས་བཞག་ཐབས་བཞི་པ་ཞེས་པའི་འདས་རྗེས་ཐོབ་ཅིང་ཚིག་དོན་ལ་འཁྲུལ་བ་མེད་པའི་གདེང་ཐོབ་པར་གྱུར་ཏོ། །དེ་ནས་སློབ་དཔོན་བཱི་མ་ཉིད་ཤར་ཕྱོགས་ཀ་མ་རུའི་གྲོང་ཁྱེར་དུ་རྒྱལ་པོ་སེངྒེ་བཟང་པོའི་བླ་མཆོད་དུ་ལོ་ཉི་ཤུར་བཞུགས་ཤིང༌། དེ་ནས་ནུབ་ཕྱོགས་སུ་གྲོང་ཁྱེར་བྷིར་ཡ་ཞེས་པར་རྒྱལ་པོ་དྷརྨ་པཱ་ལའི་མཆོད་གནས་ཀྱང་མཛད། དེའི་འོག་ཏུ་རབ་ཏུ་སྣང་བྱེད་ཅེས་པའི་དུར་ཁྲོད་ཆེན་པོར་ཕྱོགས་ལས་རྣམ་པར་རྒྱལ་བའི་བརྟུལ་ཞུགས་ཀྱི་སྤྱོད་པ་སྤྱད་ཅིང་གདུག་པའི་ཚོགས་ལ་ཆོས་སྟོན་ཞིང་བཞུགས། གསང་བ་མཆོག་གི་དཔེ་རྣམས་ཚར་གསུམ་དུ་བྲིས་ནས། ཚར་གཅིག་ཨོ་རྒྱན་གྱི་ཡུལ་རྒྱ་མཚོ་གསེར་གྱི་བྱེ་མ་བརྡལ་བའི་གླིང་དུ་སྦས། ཚར་གཅིག་ཁ་ཆེའི་ཡུལ་གསེར་གླིང་ཞེས་པའི་བྲག་སྐྱིབས་སུ་སྦས། ཚར་གཅིག་དུར་ཁྲོད་དེར་མཁའ་འགྲོ་མ་རྣམས་ཀྱི་མཆོད་པའི་རྟེན་དུ་བཞག། ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཆུང་བ་ཞེས་བྱ་བ་ཞིག་བཞུགས་ལ། དེ་ཉིད་ལ་མཆོད་གནས་ལོ་དྲུག་ཅུའི་བར་མཛད། པཎྜི་ཏ་ལྔ་བརྒྱའི་ཁྱུ་མཆོག་ཏུ་འཇའ་ལུས་འཕོ་ཆེན་གྱི་སྐུར་བཞེངས་ནས་དགུང་ལོ་ཉིས་བརྒྱར་ཉེ་བར་བཞུགས། ། དེའི་ཚེ་བོད་དུ་བྱང་ཆུབ་སེམས་དཔའ་འཇམ་དཔལ་གྱི་སྤྲུལ་པ་ཁྲི་སྲོང་ལྡེའུ་བཙན་གྱིས་དཔལ་བསམ་ཡས་ལྷུན་གྱིས་གྲུབ་པའི་གཙུག་ལག་ཁང་བཞེངས་ཤིང་དམ་པའི་ཆོས་དར་ཞིང་རྒྱས་པར་མཛད་པའི་སྐབས་སུ་གྱུར་ཅིང༌། འདི་ལ་མཆོད་གནས་ཉང་ཏིང་འཛིན་བཟང་པོ་ཞེས་བྱ་བ་ཞི་གནས་ཀྱི་ཏིང་ངེ་འཛིན་ཐུན་གཅིག་གིས་ལོ་བདུན་དང་ཟླ་བ་བདུན་གྱི་བར་ལ་གནས་པ། ཤའི་སྤྱན་རྣམ་པར་དག་པས་གླིང་བཞི་དུས་གཅིག་ལ་གཟིགས་པ་ཞིག་བཞུགས་པ་དེ་ཉིད་ཀྱིས། ཀྱེ་རྒྱལ་པོ་ལགས། རྒྱ་གར་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཞེས་བྱ་བ་ལ་པཎྜི་ཏ་ལྔ་བརྒྱ་མཆོད་གནས་སུ་བཞུགས་པར་གདའ་བས། དེ་དག་གི་ནང་ནས་འབྲས་བུ་གསང་སྔགས་ལ་མཁས་པ་གཅིག་སྤྱན་དྲངས་ན་བོད་ཀྱིརྒྱལ་ཁམས་སུ་གསང་སྔགས་ཀྱི་བསྟན་པ་དར་ཞིང་རྒྱས་པར་འགྱུར་ཞེས་ལུང་བསྟན། རྒྱལ་པོ་ཡང་རབ་ཏུ་མཉེས་ནས་དེ་ལྟར་བགྱི་བར་ཞལ་གྱིས་བཞེས། དུས་དེར་བོད་ཀྱི་རྒྱལ་ཁམས་ན་བློ་རྣོ་བ་དབུ་རུ་འཕན་ཡུལ་དུ་ཀ་བ་བློ་བརྟན་དང་འབྲོ་བཟའ་རྡོ་རྗེ་ལྕམ་གཉིས་ཀྱི་བུ་སྐ་བ་དཔལ་བརྩེགས་དང༌། རུ་ལག་ཤངས་ཀྱི་དར་སྒང་ན་ལྕོག་རོརྒྱལ་འབྱུང་དང་འབྲོ་བཟའ་མཛེས་མ་གཉིས་ཀྱི་བུ་ལྕོག་རོ་ཀླུའི་རྒྱལ་མཚན་ཞེས་བྱ་བ་གཉིས་ཡོད་པ་བོས་ཏེ། ཀྱེ་རིགས་ཀྱི་བུ་རྫུ་འཕྲུལ་ལྕེ་ལ་དབང་ཐོབ་པ་གཉིས་འོ་སྐོལ་བོད་ཀྱི་རྒྱལ་ཁམས་སུ་འབྲས་བུ་གསང་སྔགས་རབ་ཏུ་ཟབ་པའི་བསྟན་པ་དར་བར་བྱ་བའི་ཕྱིར། རྒྱ་གར་གྱི་ཡུལ་སེར་སྐྱའི་གྲོང་ཁྱེར་ན་རྒྱལ་པོ་ཨིནྡྲ་བྷུ་ཏི་ཞེས་བྱ་བ་མཆོད་གནས་པཎྜི་ཏ་ལྔ་བརྒྱ་བཞུགས་པ་དེའི་སྤྱན་སྔར་སོང་ལ་གསེར་གྱི་པ་ཏྲ་བདུན་པོ་འདི་དང༌། གསེར་ཕྱེ་བྲེ་དགུ་པོ་འདི་ཕུལ་ལ། འདི་བོད་ཀྱི་རྒྱལ་པོས་སྐྱེས་སུ་བསྐུར་བས་སྐྱེས་ལན་དུ་པཎྜི་ཏ་འབྲས་བུ་གསང་སྔགས་ཀྱི་ཆོས་ལ་མཁས་པ་གཅིག་བརྫང་བར་ཞུ་ཞེས་བརྗོད་ལ་སོང་ཞིག་ཅེས་བཀའ་བསྒོས། ལོ་ཙཱ་གཉིས་པོ་རྒྱལ་པོའི་བཀའ་བཞིན་རྒྱ་གར་ཡུལ་དུ་ཕྱིན་ཏེ་རྒྱལ་པོ་ཨི ནྡྲ་བྷུ་ཏི་ལ་ཕྱག་མཛད་ནས། གསེར་གྱི་པ་ཏྲ་དང་གསེར་ཕྱེ་རྣམས་ཕུལ་ཏེ་འཕྲིན་གསོལ་བས། རྒྱལ་པོ་རབ་ཏུ་དགྱེས་ནས་བོད་ཀྱི་བྱང་ཆུབ་སེམས་དཔའ་གཉིས་བསིལ་ཁང་དུ་རེ་ཞིག་བཞུགས་ཤིག་ཟེར་ནས། རྒྱལ་པོ་ཉིད་པཎྜི་ཏ་རྣམས་དྲོ་ལ་བྱོན་པའི་དུས་སུ་དྲོ་གསོལ་བའི་གྲལ་ལ་བྱོན་ཏེ། ཀྱེ་མཁས་པ་ཆེན་པོརྣམས་བདག་ལ་བོད་ཀྱི་རྒྱལ་པོས་སྐྱེས་ཤིན་ཏུ་བཟང་བ་ཞིག་བསྐུར་བྱུང་བས། དེའི་སྐྱེས་ལན་དུ་པཎྜི་ཏ་འབྲས་བུ་གསང་སྔགས་ཀྱི་ཆོས་ལ་མཁས་པ་གཅིག་ཐོངས་ཟེར་བ་སུ་ཞིག་ཕེབས་པར་འཚལ་ཞེས་བཀའ་བསྩལ། སློབ་དཔོན་བུདྡྷ་གུ་ཧྱའི་ཞལ་ནས་སྐྱེས་སྐྱེལ་བ་དེ་གཉིས་འདིར་ཁྲིད་ལ་ཤོག་གསུངས། རྒྱལ་པོས་ཁྲིད་ནས་འོངས་པ་ན། ལོ་ཙཱ་བ་གཉིས་ཀྱིས་བཱི་མ་ལའི་སྐུའི་མཚན་རྟགས་རྣམས་མཐོང་བས་མོས་པ་རབ་ཏུ་སྐྱེས། བཱི་མ་ལས་ཀྱང་གདུལ་བྱ་དུས་སུ་བབ་པ་མཁྱེན་ཏེ་གྲལ་ལས་བཞེངས་ནས། མ་ནུ་དུ་རུ་ཀྲོ་ཧེ་ཞེས་པའི་སྒྲ་བརྗོད་པས། ལོ་ཙཱ་བ་གཉིས་ལ་ཚིག་དེ་གོ་ལུགས་གཉིས་བྱུང་སྟེ། ལྕོག་རོས། གཞུ་མོ་དག་ལ་བརྟེན་པའི་མདའ། །སྐྱེས་བུའི་མཐེབ་མོས་རྩོལ་ཕོད་ན། །མདའ་ཡིས་ཕ་རོལ་སྐྱེལ་བར་འགྱུར། །ཞེས་དང༌། སྐ་བ་དཔལ་བརྩེགས་ཀྱིས། གྲུ་བོ་དག་ལ་བརྟེན་པའི་མིས། །མཉན་པའི་སྐྱ་བས་རྩོལ་ཕོད་ན། །མི་ཡིས་རྒྱ་མཚོའི་ཕ་རོལ་སྒྲོལ། །ཞེས་ཚིག་ཐ་དད་ལ་དོན་གཅིག་ཏུ་གོ། བཱི་མ་ལས་རྒྱལ་པོ་ཁྱོད་ཀྱིས་གཏོང་ཕོད་ན་ངས་བོད་ལ་ཕན་ཐོགས་པར་འདུག་པས་འགྲོ་ཞེས་ཞལ་གྱིས་བཞེས། རྒྱལ་པོས་ཀྱང་གནང་སྟེ་རབ་ཏུ་ཟབ་པ་གསང་བ་སྙིང་ཐིག་གི་དཔེ་ཚར་གཅིག་བསྣམས་ཏེ་ཨ་ཙརྱ་སའི་སྙིང་པོ་བྱ་བ་གཡོག་པོར་ཁྲིད་ནས་བོད་དུ་བྱོན། དེའི་ཚེ་ཡུལ་ཁམས་དེའི་མི་ཐམས་ཅད་མཚན་མོ་རྨི་ལམ་ཀྱང་འཁྲུགས་ཏེ། རྒྱ་གར་ཡུལ་གྱི་ཤིང་དང་མེ་ཏོག་འབྲས་བུ་ཉི་ཟླ་དང་བཅས་པ་བོད་དུ་སོང་བ་རྨིས་པ་དང༌། དུར་ཁྲོད་བསིལ་བ་ཚལ་གྱི་མཁའ་འགྲོ་མ་རྣམས་ཆོ་ངེ་འདེབས་པར་འདུག་པ་དང༌། རྒྱལ་པོའི་ཆུ་ཚོད་དང་དབྱུག་གུའི་རྩིས་ཐམས་ཅད་འཁྲུགས་པར་གྱུར་ཏོ། །ནངས་པར་གྱི་དུས་སུ་རྒྱལ་པོའི་ཕོ་བྲང་གི་སྒོ་མདུན་དུ་རྒྱ་གར་གྱི་མི་ཐམས་ཅད་འདུས་ནས་རྨི་ལམ་བསྡུར་བས་ཐམས་ཅད་མཐུན་ཏེ་འདི་ཅི་ཡིས་ལན་ཞེས་གླེང༌། བུད་མེད་གཅིག་ན་རེ། རྒྱལ་པོའི་མཆོད་གནས་བོད་ལ་མ་ཤོར་རམ། པཎྜི་ཏ་མཁས་པ་གཅིག་གིས་འབྲས་བུ་གསང་སྔགས་ཀྱི་ཆོས་ཐམས་ཅད་དཔེ་ཙམ་མེད་པར་ཁྱེར་བ་མ་ཡིན་ནམ་ཟེར། རྒྱལ་པོས་ཁ་སེང་བཱི་མ་ལ་བོད་དུ་ཤོར་ཟེར་བས། རྒྱ་གར་གྱི་མི་རྣམས་ཀྱིས་རྐང་མགྱོགས་བརྫངས་ཏེ་བོད་ཀྱི་བནྡེ་གཉིས་ཀྱིས་མཐའི་མོན་བུ་ཕྲ་མེན་གྱི་ངན་སྔགས་ཁྱེར་ནས་སོང་བས་བོད་ཀྱི་རྒྱལ་ཁམས་རྣམས་ཕུང་ངོ་ཞེས་པའི་མདོ་བྱང་མང་པོ་བོད་ཀྱི་ལུང་མདོ་དང་སྲང་མདོ་ཐམས་ཅད་དུ་བཏགས་སོ། ། ལོ་ཙཱ་བ་གཉིས་ཀྱིས་བཱི་མ་ལ་མི་ཏྲ་སྤྱན་དྲངས་ནས་དཔལ་བསམ་ཡས་སུ་བྱོན་པ་ན། རྒྱལ་པོའི་དྲུང་ཏུ་ཕྱིན་ཏེ་པཎྜི་ཏ་ནི་གྲུབ་པ་ཐོབ་ཅིང་འཇའ་ལུས་འཕོ་ཆེན་གྱི་སྐུར་བཞེངས་པ། སྤྱིར་སྡེ་སྣོད་མ་ལུས་པ་མཁྱེན་ཅིང་འབྲས་བུ་གསང་སྔགས་ལ་ཐུགས་ཀྱི་དགོངས་པ་འབྱོངས་པ། རྒྱ་གར་དུ་དཔེ་ཙམ་ཡང་མ་བཞག་པར་བོད་དུ་བསྣམས་ནས་བྱོན་ཏེ་མཆིས་སོ་ཞེས་གསོལ་བས། རྒྱལ་པོའི་ཞལ་ནས་དོ་ནུབ་དབུ་ཚལ་གསེར་ཁང་དུ་བཞུགས་དང་ནངས་པར་ཞལ་མཇལ་བྱེད་དོ་གསུངས་པ་བཞིན་དབུ་ཚལ་དུ་བཞུགས་སོ། །དུས་དེར་བོད་ཀྱི་བློན་པོ་གདུག་པ་ཅན་རྣམས་ཀྱིས་མདོ་བྱང་བཀླགས་པ་དང་བསམ་ཡས་སུ་པཎྜི་ཏ་བྱོན་ནོ་ཞེས་ཐོས་པས་ཐམས་ཅད་རྒྱལ་པོའི་སྤྱན་སྔར་འདུས་ཏེ། འོ་སྐོལ་གྱི་འདི་ན་མཐའི་མོན་བུ་ཕྲ་མེན་གྱི་ངན་སྔགས་སྣ་ཚོགས་པ་ཁྱེར་བ་ཞིག་ཡོད་གདའ་བས་འདིར་བཞག་པར་མི་རུང་ཞེས་ཞུ་བ་ཕུལ། ནང་པར་ལོ་ཙཱ་བ་གཉིས་རྒྱལ་པོའི་མདུན་དུ་ཕྱིན་པའི་ཚེ། རྒྱལ་པོའི་ཞལ་ནས་ཁྱེད་གཉིས་ཀྱི་དེ་ཕྲ་མེན་གྱི་ངན་ཐབས་སྣ་ཚོགས་ཁྱེར་བ་ཡིན་པར་འདུག་པས་ཞག་འགའ་ལ་མཚན་མ་བརྟག་གོ་གསུངས་ནས་མ་གནང་ངོ༌། ། དེ་ནས་ལོ་ཙཱ་གཉིས་རབ་ཏུ་སྡུག་བསྔལ་ཞིང་ཞག་གསུམ་ལ་དབུ་ཚལ་དུ་ཉལ་བའི་ནངས་མ་གཅིག་བཱི་མ་ལ་བཞེངས་ནས། རྣམ་པར་སྣང་མཛད་གཟུགས་ཀྱི་ལྷ། གཟུགས་ཀྱི་ལྷ་ལ་ཡེ་ཤེས་ལྷ་ཡིས་ཕྱག་བགྱིའོ། །ཞེས་ཕྱག་མཛད་པས། དེར་ལྡེར་བཟོའི་སྐུ་རྣམས་ཐལ་ཕུང་གིས་སོང་བས་ལོ་ཙཱ་གཉིས་ངོ་མཚར་སྐྱེས་ནས་རྒྱལ་པོ་ལ་བསྙད་པས། འོ་དེ་ཀུན་ཕྲ་མེན་གྱི་ངན་ཐབས་ཡིན་གསུངས། ཡང་ལོ་ཙཱ་གཉིས་སེམས་རབ་ཏུ་མ་བདེ་སྟེ། བདག་ཅག་གཉིས་ཀྱིས་རྒྱ་གར་ནས་དཀའ་བ་སྤྱད་དེ་མཁས་པ་ངོ་མཚར་བ་འདི་ལྟ་བུ་སྤྱན་དྲངས་པ་ལ་རྒྱལ་པོས་འདི་འདྲ་བ་ཅི་ལ་འོས་ཟེར་ནས་ཐུགས་མུག་གོ། དེ་ནས་ཡང་ཞག་གསུམ་གྱི་ནངས་པར་བཞེངས་ནས། རྣམ་པར་སྣང་མཛད་གཟུགས་ཀྱི་ལྷ།གཟུགས་ཀྱི་ལྷ་ལ་ཡེ་ཤེས་ལྷ་ཡིས་དབང་བསྐུར་རོ། །གསུངས་ཏེ་ས་ཕུང་ལ་དབུ་ཞྭ་ཕུད་ནས་བསྐོན་པས། སྐུ་གཟུགས་སྔོན་མ་བས་རབ་ཏུ་ལེགས་པ་རྒྱ་གར་གྱི་ལུགས་སུ་བྱུང་སྟེ་གཟི་མདངས་དང་ལྡན་པར་གྱུར་བས་ཡང་ལོ་ཙཱ་གཉིས་ཀྱིས་རྒྱལ་པོ་ལ་བསྙད་པས། དེ་ནས་རྒྱལ་པོ་ཐུགས་ཡིད་ཆེས་ཏེ་འོ་ན་བོད་ཀྱི་རྒྱལ་ཁམས་སུ་རྐང་མགྱོགས་བརྫངས་ནས་ཟླ་བ་གཅིག་གི་ཚེས་གསུམ་གྱི་ཉིན་པར་འདུས་ཤིག་ཅེས་བཀའ་བཏང༌། དེ་ནས་ཟླ་བ་གཅིག་གི་ནངས་པར་དབུ་རྩེ་རིགས་གསུམ་གྱི་སྒོ་མདུན་དུ་གཡས་སུ་རྒྱལ་པོ་ལ་གཡུ་ཁྲི་རབ་ཏུ་འཕང་མཐོ་བ་བརྩིགས། གཡོན་དུ་གསེར་སྦྲམ་གྱི་ཁྲི་རབ་ཏུ་འཕང་མཐོ་བར་བརྩིགས། མཐའ་འཁོར་དུ་བོད་ཀུན་འདུས་པའི་དབུས་སུ་རྒྱལ་པོས་པཎྜི་ཏ་ལ་ཕྱག་མཛད་པས། རྒྱལ་པོའི་ཐུགས་ཀར་དར་མེན་གྱི་དཀྱིལ་ན་རིགས་གསུམ་མགོན་པོའི་ལྷ་བཀྲ་ཡལ་ལེ་འདུག་པ་ཀུན་ཀྱིས་མཐོང༌། བཱི་མ་ལས་རྒྱལ་པོའི་དབུ་རྒྱན་ལ་ཨོཾ་ཨཱཿཧཱུྃ་ཞེས་སེ་གོལ་བརྡབས་པས་རིགས་ལྔའི་སངས་རྒྱས་སུ་ཀུན་ཀྱིས་བཀྲ་ཡལ་ལེ་མཐོང་བས་བོད་ཀྱི་རྒྱལ་ཁམས་ཀྱི་མི་ཀུན་ཀྱིས་བསྟོད་ཅིང་མཆོད་གནས་སུ་བཟུང༌། དེ་ནས་བཱི་མ་ལས་ཕ་རོལ་ཏུ་ཕྱིན་པ་དང་དབུ་མའི་ཆོས་གསུངས་ཤིང་ཉིན་གཅིག་དྲོ་ལ་བཞུད་པའི་བར་དུ། སྡུད་པ་གསུངས་པའི་ཁྲིའི་རྩར་སྤྲང་པོ་གཅིག་བྱུང་ནས། ཉན་ཐོས་བྱིས་པའི་ཆོས་ཀྱིས་འཚང་མི་རྒྱ། །ཕོ་རོག་རྡོ་རྗེའི་འགྲོས་ཀྱིས་ས་མི་ཆོད། །ཅེས་པའི་ཡི་གེ་ཞིག་བྲིས་ཏེ་སོང༌། ཕྱི་དྲོ་བཱི་མ་ལ་ཁྲི་ཁར་བྱོན་ཚེ་ཡི་གེ་གཟིགས་པས་འདིར་སུ་འོངས་གསུངས། ཆོས་ཉན་པ་དག་གིས་སུ་ཡང་མ་བྱུང་ཟེར་རོ། ། ཁྱེའུ་གཅིག་ན་རེ། ད་ཅི་སྤྲང་པོ་རྒད་པོ་ཞིག་འདུག་པ་ཡིན་ནམ་ཟེར་བས། བཱི་མས་སྤྲང་པོ་དེ་ཚོལ་དང་གསུངས་པས་འཁོར་རྣམས་ཀྱིས་བཙལ་བས་གླིང་གསེབ་ཀྱི་ཆང་མ་ཞིག་གི་ཁྱིམ་ན་འདུག་པ་ཁྲིད་ནས་བྱུང༌། བཱི་མ་ལས་ཁྱེད་སུ་ཡིན་ཞེས་དྲིས་པས། བདག་ནི་བ་གོར་བཻ་རོ་ཙ་ནའི་སློབ་མ་གཡུ་སྒྲ་སྙིང་པོ་བྱ་བ་ལགས་སོ་ཟེར་ནས་སེམས་སྨད་ལྔ་ལ་མཁས་པ་གཅིག་འདུག་གོ། དེའི་ཚེ་བཱི་མ་ལས་ཁོང་ལ་དྲན་པ་སེམས་སྡེ་བཅུ་གསུམ་བསྟན་པས་ལྟ་སྒོམ་སྤྱོད་གསུམ་གང་ནས་ཀྱང་དཔོན་སློབ་གཉིས་མཉམ་པ་ཞིག་བྱུང་ངོ༌། །དེ་ཙམ་ན་རྗེ་བློན་ཀུན་ཀྱིས་རྟ་སྔོན་པོ་གཡུ་བྱ་གསེར་སྒ་དང་བཅས་ཕུལ་ཏེ་མདོ་སྔགས་ཀྱི་ཆོས་བསྒྱུར་བར་ཞུ་ཞེས་གསོལ་བས། བཱི་མ་ལའི་ཞལ་ནས་རྟ་དང་གསེར་གྱིས་དགོས་པ་མེད། ཆོས་ནི་སེམས་ཅན་གྱི་དོན་དུ་བསྒྱུར་ན་བདག་གིས་ཅི་རིགས་པར་བསྒྱུར་བར་བྱའོ་གསུངས་ནས། དབུ་རྩེ་རིགས་གསུམ་གྱི་ལྷོ་ནུབ་མཚམས་སྒྲ་བསྒྱུར་རྒྱ་གར་གླིང་དུ་བྱོན་ཏེ། ཕ་རོལ་ཕྱིན་པ་དང༌། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། དཔལ་ཡང་དག་དང་ཕུར་པ། མ་མོ་དང༌། གཤིན་རྗེ་རྣམས་གཉགས་ཛྙཱ་ན་ཀུ་མ་ར་དང་མཉམ་དུ་བསྒྱུར། གཡུ་སྒྲས་ལོ་ཙཱ་བྱས་ཏེ་སེམས་སྡེ་ཕྱི་འགྱུར་བཅུ་གསུམ་བསྒྱུར། སྐོར་གསུམ་གྱི་རྩ་བའི་རྒྱུད་ལྔ་ཡང་གཉགས་ཀྱིས་བསྒྱུར་རོ། ། ཤིན་ཏུ་ཟབ་པའི་མན་ངག་སྙིང་ཐིག་ནི་བཙན་པོ་དང་ཉང་བན་ཏིང་འཛིན་བཟང་པོ་གཉིས་ལ་ལྐོག་ཆོས་སུ་གསུངས་པ་ལས་གཞན་སྣོད་དུ་རུང་བ་མ་གཟིགས་ནས་དཔེ་རྣམས་བོད་ཡིག་མཛད་དེ་མཆིམས་ཕུའི་དགེ་གོང་དུ་སྦས། བཱི་མ་ཉིད་བོད་དུ་ལོ་བཅུ་གསུམ་ལ་བཞུགས་ནས་རྒྱ་ནག་རི་བོ་རྩེ་ལྔར་གཤེགས། པཎ་གྲུབ་ཆེན་པོ་དེ་ནི་འཇའ་ལུས་འཕོ་བ་ཆེན་པོའི་སྐུར་བཞེངས་པས་ཐུབ་པའི་བསྟན་པ་ཇི་སྲིད་གནས་ཀྱི་བར་སྐུ་ལུས་དེ་ཉིད་ཀྱིས་བཞུགས་ཤིང༌། ལོ་བརྒྱ་བརྒྱ་ན་བོད་ཀྱི་ལྗོངས་འདིར་སྤྲུལ་པ་རེ་བྱོན་ནས་སྙིང་ཐིག་གི་བསྟན་པ་གསལ་བར་མཛད་པར་ཞལ་གྱིས་བཞེས་སོ། ། |
 སློབ་དཔོན་ཆེན་པོ་པདྨ་འབྱུང་གནས་ནི།སྤྱིར་སློབ་དཔོན་ཆེན་པོ་འདི་ཉིད་སྐུ་གསུམ་གྱི་སྟོན་པ་རྒྱ་མཚོའི་ངོ་བོ་ཡིན་པས་བརྒྱུད་པ་བྲེང་ཆགས་ཀྱི་མཚན་ཉིད་ལ་ལྟོས་པ་མེད་ཀྱང་ཚུར་མཐོང་གི་སྣང་ངོར་པཎ་གྲུབ་སྤྱི་ལྟར་བླ་བརྒྱུད་བར་མ་ཆད་པ་ལས་ཟབ་མོའི་མན་ངག་གི་བདུད་རྩི་གསན་བཞེས་ཀྱི་ཚུལ་བསྟན་པ་སྟེ། བཏགས་གྲོལ་སྙིང་པོའི་རྒྱུད་ལས། སྟོན་པ་ཀུན་བཟང་ཡབ་ཡུམ་གྱིས། །ཉིད་ལས་མི་གཞན་སེམས་དཔའི་སྣོད། །བྱིན་གྱིས་རླབས་ཀྱི་བདག་ཉིད་ལ། །བཏགས་པས་གཅིག་ཤེས་ཀུན་གྲོལ་ལོ། །བཅིངས་དང་གྲོལ་བའི་མཐའ་ལས་འདས། །རྡོ་རྗེ་སེམས་དཔའི་བྱིན་རླབས་ཀྱིས། །རང་བྱུང་དགའ་རབ་ཐུགས་ལ་ཤར། །སེང་ཧ་ཉིད་ལ་རྒྱུད་གཏད་པ། །འབྲས་བུ་ཡོངས་རྫོགས་བཏགས་གྲོལ་རྒྱུད། །ཨོ་རྒྱན་པདྨ་ཉིད་ལ་གཏད། །ལྔ་ལྡན་བུ་ལ་འདི་སྟོན་ཅིག ། ཅེས་གསུངས་པ་ལྟར་དགའ་རབ་རྡོ་རྗེ་དང་འཇམ་དཔལ་བཤེས་གཉེན་ལས་ཀྱང་གསན་པར་གྲགས་ཀྱང༌། གཙོ་ཆེར་རྡོ་རྗེ་ཕག་མོས་ལུང་བསྟན་པ་ལྟར་གུ་རུ་ཤྲཱི་སེང་ཧ་ལས་བླ་མ་བསྟེན་ནས་གསན་པའི་ཚུལ་མཛད་པ་སྟེ། དེ་ཡང་བདག་ཉིད་ཆེན་པོ་འདིའི་གསང་བ་བསམ་མི་ཁྱབ་པའི་རྣམ་ཐར་བཀའ་གཏེར་གྱི་ཡི་གེ་རྣམས་ལས་སྣ་ཚོགས་པ་བྱུང་བ་ལས། འདིར་ཐང་ཡིག་སོགས་གཏེར་མ་ཡོངས་གྲགས་ཀྱི་ལུགས་སུ་བྱས་ཏེ་ཅུང་ཟད་གླེང་བ་ལ། ཐོག་མར་མདོ་རྒྱུད་དུ་མ་ནས་ལུང་བསྟན་ཚུལ་ནི། དབུས་འགྱུར་འཆང་ལུང་བསྟན་པའི་མདོ་ལས། ཀུན་དགའ་བོས་སྟོན་པ་མྱ་ངན་ལས་འདས་ནས་མུན་པའི་སྨག་རུམ་དང་འདྲ་བར་ཐུགས་རྗེ་ཇི་ལྟར་་འབྱུང་ཞུས་པས། བཅོམ་ལྡན་འདས་ཀྱིས། ང་ནི་འདི་ནས་མི་སྣང་ནས། །ལོ་ནི་བཞི་གཉིས་ལོན་པ་ན། །དྷ་ན་ཀོ་ཤའི་མཚོ་གླིང་དུ། །པདྨ་གེ་སར་སྡོང་པོ་ལས། །ཀུན་ལས་ལྷག་པའི་སྐྱེས་བུ་འབྱུང༌། །ཞེས་དང༌། བླ་མེད་དོན་རྫོགས་འདུས་པའི་རྒྱུད་ལས། ང་ནི་མྱ་ངན་འདས་འོག་ཏུ། །ལོ་ནི་བཅུ་རུ་གཉིས་ཆད་ན། །ཨོ་རྒྱན་ཡུལ་དུ་ང་ཉིད་འབྱུང༌། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པའི་བདག་པོར་འགྱུར། །ཞེས་དང༌། འཇམ་དཔལ་སྒྱུ་འཕྲུལ་དྲྭ་བ་ལས། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང༌། །ཆེ་བ་སངས་རྒྱས་རིགས་སྔགས་འཆང༌། ། ཞེས་མདོ་རྒྱུད་དུ་མ་ནས་གསལ་བར་བསྟན་པ་ལྟར་དེ་བཞིན་གཤེགས་པ་ཐམས་ཅད་ཀྱི་གསུང་གི་རྡོ་རྗེའི་བདག་ཉིད་སངས་རྒྱས་འོད་དཔག་ཏུ་མེད་པའི་སྤྲུལ་སྐུ་སྟེ། མཚོ་སྐྱེས་རྡོ་རྗེ།དེ་ཡང་ནུབ་ཕྱོགས་ཨོ་རྒྱན་གྱི་ཡུལ་གྱི་ལྷོ་ནུབ་སྲིན་ཡུལ་དང་ཐག་ཉེ་བའི་རྒྱ་མཚོའི་གླིང་དུ། སངས་རྒྱས་ཐམས་ཅད་ཀྱི་བྱིན་རླབས་ལས་བྱུང་བའི་པདྨའི་སྡོང་པོ་ཁ་དོག་སྣ་ཚོགས་པའི་སྦུབས་སུ་བདེ་ལྡན་ཞིང་གི་མགོན་པོའི་ཐུགས་ཀ་ནས་གསེར་གྱི་རྡོ་རྗེ་ཧྲཱིས་མཚན་པ་ཞིག་སྤྲོས་པ་ལས། རྫུས་སྐྱེས་ཀྱི་ཁྱེའུ་ལོ་བརྒྱད་པའི་ན་ཚོད་མཚན་དང་དཔེ་བྱད་ཀྱིས་བརྒྱན་པར་སྤྲུལ་ཏེ་བཞུགས་ཤིང༌། ལྷ་དང་མཚོ་གླིང་གི་མཁའ་འགྲོ་མ་རྣམས་ལ་ཟབ་མོའི་ཆོས་སྟོན་པར་མཛད་པའི་ཚེ་ན། ཡུལ་དེའི་རྒྱལ་པོ་ཨིནྡྲ་བྷོ་དྷི་ལ་སྲས་མེད་པས་དཀོན་མཆོག་མཆོད་ཅིང་དཀོར་མཛོད་སྦྱིན་པ་བཏང་བ་ཟད་དེ་རྒྱ་མཚོའི་གླིང་ནས་ཡིད་བཞིན་གྱི་ནོར་བུ་བླངས་ཏེ་ཚུར་བྱོན་པའི་དུས་ཤིང་སྤྲེལ་སྤྲེལ་ཟླའི་ཚེས་བཅུའི་ཉིན་ཆོས་བློན་ཀྲིཥྞ་འཛིན་གྱིས་ཐོག་མར་མཇལ། དེ་ནས་རྒྱལ་པོས་མཇལ་ཞིང་པད་སྡོང་ལས་ཕབ་སྟེ་ས་ལ་བཞག་པས། སླར་ཡང་པདྨའི་གདན་གཅིག་སྐྱེས། བློན་པོ་རྣམས་ན་རེ། ཁྱེའུ་འདི་པདྨའི་འབྱུང་གནས་སུ་འདུག་གོ་ཞེས་མཚན་ཡང་པདྨ་འབྱུང་གནས་སུ་གྲགས། རྒྱལ་པོས་སྲས་ཀྱི་སྐལ་བར་བྱོན་པར་གསོལ་བ་བཏབ་པ་ལྟར་ཞལ་གྱིས་བཞེས་ནས་ཕོ་བྲང་དུ་སྤྱན་དྲངས། ནོར་བུའི་མཐུ་ལས་བྱུང་བའི་རིན་པོ་ཆེའི་ཁྲིའི་སྟེང་ལ་བཞུགས་སུ་གསོལ་ཏེ་སྐྱེས་རྡོ་རྗེ་ཞེས་མཚན་གསོལ། པདྨ་རྒྱལ་པོ།གཞོན་ནུའི་རོལ་རྩེད་ཀྱིས་གདུལ་བྱ་མཐའ་ཡས་པ་སྨིན་པར་མཛད་ཅིང་མཁའ་འགྲོ་འོད་འཆང་མ་ཁབ་ཏུ་བཞེས། ཟས་གོས་རིན་པོ་ཆེའི་ཆར་གྱིས་སྐྱེ་བོ་ཐམས་ཅད་ཚིམས་པར་བྱས་ཤིང་ཨོ་རྒྱན་གྱི་རྒྱལ་སྲིད་ཆོས་བཞིན་དུ་བསྐྱངས་པས་རྒྱལ་པོ་ཐོར་ཅོག་ཅན་ནམ་པདྨ་རྒྱལ་པོར་གྲགས།ཤཱནྟ་རཀྵི་ཏ།དེའི་ཚེ་རྒྱལ་སྲིད་བཟུང་བས་གཞན་དོན་རླབས་ཆེན་མི་འགྲུབ་པར་དགོངས་ནས་ཡབ་ལ་ཞུས་ཀྱང་མ་གནང་བས་ཕོ་བྲང་ཡང་རྩེ་ནས་གར་མཛད་དེ་རྩེ་གསུམ་ཤོར་བའི་བརྫུ་བག་གིས་བདུད་བློན་གྱི་བུ་དབྱིངས་སུ་སྤར། བུ་བསད་པའི་ཁྲིམས་ཀྱིས་དུར་ཁྲོད་དུ་སྤྱུགས་པས། བསིལ་བའི་ཚལ་དང༌། དགའ་བའི་ཚལ། སོ་ས་གླིང་རྣམས་སུ་བརྟུལ་ཞུགས་ཀྱི་སྤྱོད་པ་མཛད་པ་ན།མཁའ་འགྲོ་བདུད་འདུལ་མ་དང་ཞི་བ་འཚོས་དབང་བསྐུར་ཞིང་བྱིན་གྱིས་བརླབས། དུར་ཁྲོད་ཀྱི་མཁའ་འགྲོ་མ་རྣམས་དབང་དུ་བསྡུས་པའི་ཚེ་ཤཱནྟ་རཀྵི་ཏ་ཞེས་གྲགས། རྡོ་རྗེ་དྲག་པོ་རྩལ།ངྷ་ན་ཀོ་ཥའི་མཚོ་གླིང་དུ་བྱོན་ཏེ་གསང་སྔགས་མཁའ་འགྲོའིགསང་བརྡ་སྐད་ཀྱིས་བསྒྲུབས་པས་མཚོ་གླིང་གི་མཁའ་འགྲོ་མ་དབང་དུ་བསྡུས། རྩུབ་འགྱུར་ཚལ་དུ་སྤྱོད་པ་མཛད་པས་རྡོརྗེ་ཕག་མོས་ཞལ་བསྟན་ནས་བྱིན་གྱིས་བརླབས། རྒྱ་མཚོའི་ཀླུ་དང་བར་སྣང་གི་གཟའ་སྐར་ཐམས་ཅད་དམ་ལ་བཏགས། གནས་གསུམ་གྱི་དཔའ་བོ་མཁའ་འགྲོ་མ་རྣམས་ཀྱིས་དངོས་གྲུབ་བསྩལ་ཏེ་མཚན་རྡོ་རྗེ་དྲག་པོ་རྩལ་དུ་གྲགས་སོ།ཤཱཀྱ་སེངྒེར།དེ་ནས་རྡོ་རྗེ་གདན་དུ་བྱོན་ནས་ཆོ་འཕྲུལ་སྣ་ཚོགས་བསྟན་པས་མི་རྣམས་ཀྱིས་ཁྱོད་སུ་ཡིན་དྲིས་པ་ལ།རང་བྱུང་གི་སངས་རྒྱས་ཡིན་པར་ཞལ་གྱིས་བཞེས་པ་ཡིད་མ་ཆེས་ཏེ་སྐུར་པ་བཏབ་པ་ན། དགོས་པའི་དབང་མང་དུ་གཟིགས་ནས་ཟ་ཧོར་གྱི་ཡུལ་དུ་བྱོན་ཏེ་སློབ་དཔོན་པྲ་བྷ་ཧསྟི་ལས་རབ་ཏུ་བྱུང་བའི་མཚན་ཤཱཀྱ་སེངྒེར་གྲགས། ཉི་མ་འོད་ཟེར།ཡོ་གའི་རྒྱུད་རྣམས་ཚར་བཅོ་བརྒྱད་གསན་པས་དེ་ཉིད་དུ་ལྷ་རྣམས་ཀྱི་ཞལ་མཐོང༌། སླར་ལྷོ་ཕྱོགས་བྷཻདྷེའི་ཡུལ་གྱི་དུར་ཁྲོད་སྐུ་ལ་རྫོགས་སུ་མཁའ་འགྲོ་མ་རྣམས་ཀྱིས་མཆོད་ནས་ཆོས་གསུངས་པས་མཚན་ཉི་མ་འོད་ཟེར་དུ་གྲགས། བློ་ལྡན་མཆོག་སྲེད།དེ་ནས་ནགས་ཚལ་དྲྭ་བ་ཅན་དུ་བྱོན་ནས་སྲས་མོ་གོ་མ་དེ་ཝིས་ཕྱི་ནང་གསང་བའི་དབང་བསྐུར་ཞིང༌། སློབ་དཔོན་འཇམ་དཔལ་བཤེས་གཉེན་དང་མཇལ་ཚེ་ངས་ཁྱོད་འདུལ་བའི་དུས་ལ་མ་སླེབས་པས་མཁའ་འགྲོ་གསང་བ་ཡེ་ཤེས་དགེ་སློང་མའི་ཚུལ་དུ་བྱོན་པ་ཀུན་དགའ་མོ་ལས་ཞུས་ཞེས་ལུང་བསྟན། དེ་ལས་ཕྱི་ནང་གསང་བའི་དབང་རྣམས་རྫོགས་པར་མཛད། སངས་རྒྱས་གསང་བ་ལས་ཕར་ཕྱིན་དང་སྒྱུ་འཕྲུལ་སོགས་མདོ་སྔགས་ཀྱི་ཆོས་མང་པོ་གསན།གཞན་ཡང་འཕགས་ཡུལ་གྱི་མཁས་གྲུབ་དུ་མ་ལས་རིག་པའི་གནས་ཐམས་ཅད་གསན་ཅིང་སྦྱངས་པའི་ཚུལ་བསྟན་པས་ཆོས་ཐམས་ཅད་ཚར་རེ་རེས་མཁས་པར་མཁྱེན་པས་མཚན་བློ་ལྡན་མཆོག་སྲེད་དུ་གྲགས།འཆི་མེད་པདྨ་འབྱུང་གནས།དེ་ནས་སྤྲུལ་པའི་སྐུ་དགའ་རབ་རྡོ་རྗེ་དང༌། འཇམ་དཔལ་བཤེས་གཉེན། ཤྲཱི་སེང་ཧ་གསུམ་ལས་རྫོགས་པ་ཆེན་པོ་དོན་བརྒྱུད་ཀྱི་མན་ངག་རྒྱལ་ཐབས་སྤྱི་བླུགས་ཀྱི་ཚུལ་དུ་ཐོབ་པས་ཟབ་གསལ་གཉིས་སུ་མེད་པའི་ཡེ་ཤེས་ཀྱི་དགོངས་པར་རང་དབང་བརྙེས། ཁྱད་པར་སློབ་དཔོན་ཤྲཱི་སེངྷའི་མདུན་ནས་ལོ་ཉི་ཤུ་རྩ་ལྔའི་རིང་འོད་གསལ་རྫོགས་པ་ཆེན་པོའི་ཚིག་དོན་གྱི་ཆ་ཐམས་ཅད་ལྷག་མེད་དུ་གསན་པའི་ཚུལ་ནི། རྡོ་རྗེ་ཕག་མོས་ལུང་བསྟན་ལས། སྐལ་ལྡན་འབྲས་བུ་ཚེ་གཅིག་ངེས་པའི་ལུང༌། །གང་དང་མི་འདྲ་ཀུན་ཀྱིས་མ་རྟོགས་པ། །ཤྲཱི་སེངྷ་རྡོ་རྗེའི་ཐུགས་ལ་གནས། །རྩུབ་འགྱུར་ཚལ་དུ་དགོངས་པ་རྙེད་པར་འགྱུར། །ཞེས་གསུངས་པ་དང༌། སྐད་ཅིག་གིས་རྩུབ་འགྱུར་ཚལ་གྱི་དུར་ཁྲོད་ཆེན་པོར་རྫུ་འཕྲུལ་གྱིས་བྱོན་ཏེ་སློབ་དཔོན་ཤྲཱི་སེངྷ་ལ་ཕྱག་དང་སྐོར་བ་མཛད་ནས་རྗེས་སུ་བཟུང་བར་ཞུས་པས་གནང་སྟེ།རྫོགས་པ་ཆེན་པོ་ནམ་མཁའ་དང་མཉམ་པའི་རྒྱུད་ལ་སོགས་པ་སེམས་ཀློང་མན་ངག་གི་སྐོར་མཐའ་དག་གསུངས་ཤིང༌། ཁྱད་པར་དུ་ཐིག་ལེ་ཕྱི་ནང་གསང་བའི་སྐོར་མ་ལུས་པ་གསན་དུས། ཡང་ཞུས་པ། སློབ་དཔོན་ཆེན་པོ་ལགས།ཚེ་འདི་ཉིད་ལ་ཟག་བཅས་ཀྱི་ཕུང་པོ་མི་སྣང་བར་ལོངས་སྤྱོད་རྫོགས་པ་སྐུའི་ཞིང་ཁམས་མཐོང་ཞིང༌། ཆོས་ཀྱི་སྐུའི་ཞིང་ཁམས་སུ་སངས་རྒྱས་པའི་གདམས་ངག་གཅིག་གནང་བར་འཚལ་ཞེས་གསོལ་བ་དང༌། ཤྲཱི་སེངྷས་གསུངས་པ།རིགས་ཀྱི་བུ་ཤིན་ཏུ་ལེགས་ཀྱི་ཆོས་ཐམས་ཅད་ཀྱི་ཡང་རྩེ། ལྟ་བ་ཐམས་ཅད་ཀྱི་ཞེ་ཕུགས། ཐེག་པ་ཐམས་ཅད་ལས་འདས་ཤིང༌། མཁའ་འགྲོ་ཐམས་ཅད་ཀྱི་སྙིང་ཏིགགསང་བ་བས་ཀྱང་ཆེས་ཤིན་ཏུ་གསང་བའི་དོན། འོད་གསལ་རྡོརྗེ་སྙིང་པོའི་ཐེག་པ་ཆེན་པོ། སེམས་ལས་འདས་པ། ཡིད་དཔྱོད་དང་བྲལ་བ། རྣམ་པར་ཤེས་པ་ཐམས་ཅད་ཀྱི་སྤྱོད་ཡུལ་དུ་མ་གྱུར་པ། ཡིན་མིན་གྱི་མཐའ་ལ་མི་གནས་ཤིང༌། ལྟ་སྒོམ་བསྐྱེད་རྫོགས་ཀྱི་ཡུལ་ལས་འདས་པ། དུས་གསུམ་རྒྱལ་བ་ཐམས་ཅད་ཀྱི་ཡུམ། རིག་འཛིན་ཆེན་པོ་རྣམས་ཀྱི་ཉེ་ལམ། མཐར་ཐུག་པའི་མན་ངག་བླ་ན་མེད་པ།ལོ་གསུམ་གྱིས་སངས་རྒྱས་ཀྱི་བྱང་ཆུབ་འགྲུབ་པའི་གདམས་པ་ཞིག་ཡོད་ཀྱིས་བསྟན་པར་བྱའོ། །གསུངས་ནས། རྫོགས་པ་ཆེན་པོ་ཡང་གསང་བླ་ན་མེད་པ་མཁའ་འགྲོ་སྙིང་ཏིག་གི་དབང་དང༌། དེའི་ཉམས་ལེན་མན་ངག་གི་ཡི་གེ་རབ་ཏུ་མང་པོ་དང༌། དེའི་རྒྱབ་རྟེན་དུ་སྒྲ་ཐལ་འགྱུར་རྩ་བའི་རྒྱུད། ཡི་གེ་མེད་པ་གཞིའི་རྒྱུད། སྐུ་གདུང་འབར་བ་རྟགས་ཀྱི་རྒྱུད། རྫོགས་པ་རང་བྱུང་དབང་གི་རྒྱུད། ངོ་སྤྲོད་སྤྲས་པའི་རྒྱུད། སྒྲོན་མ་འབར་བའི་རྒྱུད། རིག་པ་རང་ཤར་གྱི་རྒྱུད། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད། རིན་པོ་ཆེ་སྤུངས་པའི་རྒྱུད། ཉི་ཟླ་ཁ་སྦྱོར་གྱི་རྒྱུད། ནོར་བུ་ཕྲ་བཀོད་ཀྱི་རྒྱུད། རིག་པ་རང་གྲོལ་གྱི་རྒྱུད། མུ་ཏིག་ཕྲེང་བའི་རྒྱུད། ཀུན་ཏུ་བཟང་པོ་ཐུགས་ཀྱི་མེ་ལོང་གི་རྒྱུད། བཀྲ་ཤིས་མཛེས་ལྡན་གྱི་རྒྱུད། སེང་གེ་རྩལ་རྫོགས་ཀྱི་རྒྱུད། ཀློང་དྲུག་པའི་རྒྱུད། ཀུན་ཏུ་བཟང་མོ་ཀློང་གསལ་ཉི་མའི་རྒྱུད་དང་བཅོ་བརྒྱད་ཡོངས་སུ་རྫོགས་པར་གསུངས་ཤིང་བསྟན་པ་གཏད་དོ། ། དེ་ནས་དུར་ཁྲོད་ཆེན་པོ་སོ་སའི་གླིང་དུ་བྱོན་ཏེ་ལོ་གསུམ་ཉམས་སུ་བླངས་པས་སྐྱེ་ཤི་གཉིས་སྤངས་ཆུའི་ཟླ་བ་ལྟ་བུའི་སྐུ་གྲུབ་ནས་རྫུ་འཕྲུལ་གྱིས་གནས་རྣམ་པ་སྣ་ཚོགས་སུ་མི་དང་མི་མིན་གྱི་འགྲོ་བ་རབ་ཏུ་མང་པོ་ལ་ཕན་པར་མཛད་ཅིང༌། ཁྱད་པར་རྒྱ་གར་གྱི་རྒྱལ་པོ་ངྷརྨ་པ་ལའི་མཆོད་གནས་སུ་ཉིན་པར་བཞུགས་ཤིང༌། མཚན་མོ་དུར་ཁྲོད་ཆེན་པོ་བསིལ་བའི་ཚལ་དང༌། སོ་ས་གླིང་དང༌། རབ་ཏུ་སྣང་བྱེད་དང༌། དགའ་བྱེད་དང༌། བྷ་སིང་དང༌། ཐ་ཆུང་དང༌། འཇིགས་བྱེད་ལ་སོགས་པར་བྱོན་ཏེ། མཁའ་འགྲོ་འབར་བའི་སྤྲིན་ཕུང་དང་ལྷན་ཅིག་གསང་སྔགས་ཀྱི་ཀུན་ཏུ་སྤྱོད་པས་གནས་པར་མཛད་དོ། ། དེ་ནས་ཟ་ཧོར་གྱི་རྒྱལ་པོ་གཙུག་ལག་འཛིན་གྱི་སྲས་མོ་མནྡ་ར་བ་ཞེས་མཁའ་འགྲོའི་མཚན་དང་ལྡན་པ་དེ་དབང་དུ་བསྡུས་ནས་སྒྲུབ་རྟེན་གྱི་ཕྱག་རྒྱ་མོར་ཁྲིད་ནས་བལ་ཡུལ་བྲག་ཕུག་མཱ་ར་ཏི་ཀར་ཚེའི་སྒྲུབ་པ་ཟླ་བ་གསུམ་མཛད་པས་མགོན་པོ་ཚེ་དཔག་མེད་དངོས་སུ་བྱོན་ནས་དབང་བསྐུར་ཞིང་ཉིད་དང་གཉིས་སུ་མེད་པར་བྱིན་གྱིས་བརླབས། ཚེརྒྱུད་བྱེ་བ་ཕྲག་བརྒྱ་གནང་བས་ཚེ་ལ་དབང་བའི་རིག་པ་འཛིན་པའི་དངོས་གྲུབ་བརྙེས་ནས་སྐྱེ་འཆི་མེད་པ་རྡོ་རྗེའི་སྐུ་གྲུབ་སྟེ་མཚན་འཆི་མེད་པདྨ་འབྱུང་གནས་སུ་གྲགས། པདྨ་ཐོད་ཕྲེང་རྩལ།རྒྱལ་བློན་རྣམས་ཀྱིས་མེ་ལ་བསྲེགས་པ་ན་ཏིལ་མར་མཚོར་འཁྱིལ་བའི་དབུས་སུ་པདྨའི་སྡོང་པོའི་རྩེར་བཞུགས་པའི་རྫུ་འཕྲུལ་བསྟན་ནས་དད་པ་ལ་བཀོད་ཅིང་ཐམས་ཅད་ཆོས་ལ་བཙུད། སླར་ཨོ་རྒྱན་གྱི་རྒྱལ་ཁམས་འདུལ་བའི་ཕྱིར་བསོད་སྙོམས་ལ་ཕེབས་པས། ཡུལ་མི་རྣམས་ཀྱིས་ངོ་ཤེས་ཏེ་སྔོན་གྱི་བདུད་བློན་རྣམས་ཀྱིས་ཙནྡན་གྱི་མེ་ལ་བསྲེགས་པས་མཚོ་དབུས་པདྨའི་སྡོང་པོར་ཡབ་ཡུམ་གཉིས་བཞུགས་ཏེ། སེམས་ཅན་རྣམས་འཁོར་བ་ལས་སྒྲོལ་བ་མཚོན་ཕྱིར་ཐོད་ཕྲེང་སྐུ་ལ་གསོལ་བའི་རྫུ་འཕྲུལ་བསྟན་པས་པདྨ་ཐོད་ཕྲེང་རྩལ་དུ་གྲགས། པདྨ་རྒྱལ་པོ་ནི།རྒྱལ་པོའི་བླ་མཆོད་ལོ་བཅུ་གསུམ་མཛད་ནས་རྒྱལ་ཁམས་ཐམས་ཅད་ཆོས་ལ་བཀོད། བཀའ་འདུས་ཆོས་ཀྱི་རྒྱ་མཚོའི་སྨིན་གྲོལ་བསྩལ་ཏེ་རྒྱལ་པོ་ཡབ་ཡུམ་སོགས་ལས་ཅན་ཐམས་ཅད་མཆོག་གི་རིག་འཛིན་གྱི་ས་ལ་བཀོད་པས་མཚན་པདྨ་རྒྱལ་པོར་གྲགས།སེང་གེ་སྒྲ་སྒྲོགསྐུ་ལ་རྫོགས་པ་སོགས་དུར་ཁྲོད་ཆེན་པོ་རྣམས་སུ་བྱོན་ཏེ་མཁའ་འགྲོ་རྣམས་ལ་གསང་སྔགས་ཀྱི་ཆོས་བསྟན། ཕྱི་ནང་གི་དྲེགས་པ་ཅན་ཐམས་ཅད་ཀྱི་སྲོག་སྙིང་བླངས་ནས་བསྟན་སྲུང་དུ་བསྐོས། རྡོ་རྗེ་གདན་དུ་མུ་སྟེགས་ཀྱི་སྟོན་པ་ལྔ་བརྒྱས་བསྟན་པ་ལ་རྒོལ་བ་རྩོམ་པའི་ཚེ་རྩོད་པ་དང་ནུས་པ་འགྲན་པས་སློབ་དཔོན་ཉིད་རྒྱལ། ཁོང་རྣམས་ཀྱིས་ངན་སྔགས་སྒྲུབ་པའི་ཚེ་མཁའ་འགྲོ་བདུད་འདུལ་མས་ཕུལ་བའི་དྲག་སྔགས་ཀྱིས་ཕྱིར་བཟློག་སྟེ་ཐོག་ཆེན་ཕབ་ནས་མུ་སྟེགས་ཀྱི་སྟོན་པ་རྣམས་བསྒྲལ། གྲོང་ཁྱེར་མེས་བསྲེགས། ལྷག་མ་སངས་རྒྱས་ཀྱི་བསྟན་པ་ལ་བཙུད་ནས་ཆོས་ཀྱིརྒྱལ་མཚན་དགུང་དུ་བསྒྲེངས་བའི་ཚེ་སེང་གེ་སྒྲ་སྒྲོག་ཏུ་གྲགས་ཏེ། བལ་ཡུལ་དུ་བསྟན་པ་བསྐྱངས་ཚུལ།དེ་ནས་བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ་བལ་པོའི་རྒྱལ་པོ་དགེ་འཛིན་གྱི་སྲས་མོ་བལ་མོ་ཤཱཀྱ་དེ་བ་སྒྲུབ་རྟེན་མཛད་ནས་དཔལ་ཡང་དག་གི་སྒོ་ནས་མཆོག་གི་དངོས་གྲུབ་སྒྲུབ་པའི་ཚེ་འདྲེ་སྲིན་མཐུ་བོ་ཆེ་གསུམ་གྱིས་བར་ཆད་བྱས་ཏེ། ལོ་གསུམ་དུ་ཆར་མ་བབ། ནད་དང་མུ་གེ་བཏང་བ་ལ། རྒྱ་གར་དུ་བླ་མ་རྣམས་ལས་བར་ཆད་འདུལ་བའི་ཆོས་ལེན་པར་བཏང་བས་ཕུར་པའི་རྒྱུད་ལུང་མི་ཁུར་གཉིས་བརྫངས་པ་ཕེབས་པ་ཙམ་གྱིས་བར་ཆད་རང་བཞིན་གྱིས་ཞི། ཆར་བབ་ཅིང་ནད་མུག་རྒྱུན་ཆད། ཡབ་ཡུམ་གཉིས་མཆོག་གི་དངོས་གྲུབ་བརྙེས་ཏེ་ཕྱག་རྒྱ་ཆེན་པོའི་རིག་འཛིན་གྱི་སྐུར་བཞུགས་སོ། །གཞན་ཡང་དུས་སྐབས་ཅི་རིགས་པར། ཨོ་རྒྱན་གྱི་གླིང་ཕྲན་ཧུརྨུ་ཛུ་དང༌། སི་ཀོ་ངྷ་ར་དང༌། ངྷ་ན་ཀོ་ས་དང༌། རུཀྨ་སོགས་དང༌། ཏི་ར་ཧུ་ཏི་སོགས་ཐ་རུའི་རྒྱལ་ཁམས་དང༌། ཀཱ་མ་རུ་ལ་སོགས་པ་རྣམས་སུ་གཅིག་དང་དུ་མའི་རོལ་གར་གྱིས་གདུལ་བྱའི་སྐལ་པ་དང་འཚམས་པར་ཆོས་སྟོན་པ་དང་མཆོག་དང་ཐུན་མོང་གི་དངོས་གྲུབ་ཀྱིས་སེམས་ཅན་མང་པོན་བདེའི་སར་བཀོད། བོད་ཡུལ་དུ་རྒྱལ་བསྟན་བསྐྱངས་ཚུལ།གངས་རིའི་ལྗོངས་སུ་རྒྱལ་བསྟན་མདོ་སྔགས་ཀྱི་བསྟན་པ་རིན་པོ་ཆེ་ཉི་མ་ཤར་བ་ལྟར་བྱུང་བ་སློབ་དཔོན་འདི་ཉིད་ཁོ་ནའི་བཀའ་དྲིན་དང་ཕྲིན་ལས་ཡིན་ཏེ། དེ་ཡང་སྔོན་སྨོན་ཐུགས་བསྐྱེད་ཀྱི་དམ་བཅའ་དུས་སུ་སྨིན་པས་མངའ་བདག་རྒྱལ་པོ་ཁྲི་སྲོང་ལྡེའུ་བཙན་གྱིས་མཁན་ཆེན་བོ་དྷི་ས་ཏྭས་ལུང་བསྟན་པ་ལྟར་གུ་རུ་ཉིད་བོད་དུ་གདན་དྲངས། བརྟན་མ་བཅུ་གཉིས་སོགས་བོད་ཀྱི་ལྷ་སྲིན་ཐམས་ཅད་དམ་ལ་བཏགས་ཏེ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས། མཁན་སློབ་གཉིས་ཀྱིས་མེ་ཏོག་འཐོར་བས་ངོ་མཚར་གྱི་རྟགས་སྣང་མཐའ་ཡས་པ་བྱུང་བ་སོགས་སྐུ་རྟེན་གཙུག་ལག་ཁང་རྟེན་དང་བརྟེན་པར་བཅས་པ་བཞེངས། རྒྱ་གར་གྱི་པཎ་ཆེན་བརྒྱ་དང་རྩ་བརྒྱད། གཞན་ཡང་ལི་ཡུལ། རྒྱ་ནགཞང་ཞུང་སོགས་ནས་མཁས་པའི་ཚོགས་མང་པོ་སྤྱན་དྲངས་ནས། ལོ་ཙཱ་བ་སྐ་ཅོག་ཞང་གསུམ་སོགས་གཙོ་བོར་བྱས་པའི་སྤྲུལ་བའི་ལོ་ཆེན་མང་པོ་ལྷན་ཅིག་ཏུ་ཚོགས་ཏེ ། སྟོན་པའི་གསུང་རབ་མདོ་སྔགས་དགོངས་འགྲེལ་དང་བཅས་པ་རྒྱ་གར་ན་ཇི་སྙེད་བཞུགས་པ་ཡོངས་སུ་རྫོགས་པ་དང༌། དཀོན་བརྩེགས་ལི་ཡུལ་དང༌། ཕལ་པོ་ཆེ་རྒྱ་ནག་ནས་འགྱུར་བ་སོགས་ཀྱིས་མཚོན་འཛམ་གླིང་ན་བཞུགས་པའི་གསུང་རྟེན་དམ་པའི་ཆོས་ཐམས་ཅད་ལྷག་མ་མེད་པར་བོད་སྐད་དུ་བསྒྱུར། གདུལ་བྱ་ཐུན་མོང་གི་ངོར་གུ་རུ་པདྨས་མན་ངག་ལྟ་ཕྲེང་དང་གསང་སྔགས་ལམ་རིམ་ཆེན་མོ་སོགས་གསང་སྔགས་ཕྱི་ནང་གི་རྒྱུད་དང་མན་ངག་མང་པོ་གསུངས་ནས་སྔགས་ཀྱིསྲོལ་འཛིན་གོས་དཀར་ལྕང་ལོའི་སྡེ་དང༌། མཁན་པོས་སད་མི་བདུན་རབ་ཏུ་བྱུང་བ་སོགས་དམར་སེར་ངུར་སྨྲིག་གི་སྡེ་སྟེ་ཐུགས་རྟེན་འཕགས་པའི་དགེ་འདུན་གྱི་སྡེ་ཚུགས། མཁན་སློབ་ཆོས་རྒྱལ་གསུམ་གདན་འཛོམས་ཏེ་གངས་ལྗོངས་ཐམས་ཅད་རྒྱལ་བསྟན་རིན་པོ་ཆེའི་སྣང་བས་དཀར་འབྱམས་ཡུག་གཅིག་ཏུ་བརྡལ་བར་མཛད། ཐུན་མོང་མ་ཡིན་པ་རྗེ་འབངས་ཉེར་ལྔ་སོགས་ལས་ཅན་དག་པའི་ངོར་འདུས་པ་ཆེན་པོ་ལན་གསུམ་འཚོགས་ནས། དང་པོ་བཀའ་བརྒྱད་བདེ་གཤེགས་འདུས་པ། གཉིས་པ་བླ་མ་དགོངས་པ་འདུས་པ། གསུམ་པ་བཀའ་འདུས་ཆོས་ཀྱི་རྒྱ་མཚོ་སོགས་ཀྱི་དབང་དང་སྒྲུབ་ཐབས་རྒྱུད་ལུང་མན་ངག་མཐའ་ཡས་པ་བསྩལ། མངའ་བདག་རྒྱལ་པོས་ས་གཞི་སྤོས་ཆུས་སོགས་མཎྜལ་ཚོམ་བུ་བདུན་མ་མཛད་དེ་མཁའ་འགྲོ་ཡེ་ཤེས་མཚོ་རྒྱལ་ཐུགས་ཀྱི་གཟུངས་མས་མཚོན་རྒྱལ་སྲིད་འབངས་འཁོར་དང་བཅས་པ་དབང་ཡོན་དུ་ཕུལ། དེ་དག་གི་སྐབས་སུ་ཆོས་རྒྱལ་ཁྲི་སྲོང་ལྡེའུ་བཙན། གནུབས་ཆེན་སངས་རྒྱས་ཡེ་ཤེས། རྒྱལ་བ་མཆོག་དབྱངས། ནམ་མཁའི་སྙིང་པོ། ཛྙཱ་ན་ཀུ་མཱ་ར། ཡེ་ཤེས་མཚོ་རྒྱལ།དཔལ་གྱི་ཡེ་ཤེས། དཔལ་གྱི་སེང་གེ བཻ་རོ་ཙ་ན་སྟེ་བཀའ་བབས་སྙིང་གི་བུ་དགུས་གཙོར་བྱས་པའི་དབང་དུས་སུ་རྟོགས་པ་བརྙེས་པའི་གྲུབ་ཆེན་རྗེ་འབངས་ཉེར་ལྔ་སོགས་བྱོན། གཞན་ཡང་གུ་རུའི་ཞལ་སློབ་ལུས་དེ་ཉིད་ཀྱི་སྒོ་ནས་ཟུང་འཇུག་འཇའ་ལུས་རྡོ་རྗེའི་སྐུ་བརྙེས་པ། མཆིམས་ཕུའི་གྲུབ་ཆེན་ཉེར་ལྔ། ཡང་རྫོང་གི་རྟོགས་ལྡན་ཉེར་ལྔ། ཡེར་པ་དང་ཆུ་བོ་རིའི་འོད་ལུས་གྲུབ་པ་བརྒྱ་རྩ་བརྒྱད། ཤེལ་བྲག་གི་སྔགས་པ་སུམ་ཅུ། མཚན་ལྡན་ཇོ་མོ་རྣམ་གསུམ། གྲུབ་ཐོབ་གཙང་པ་མི་བདུན། འོད་སྐུར་གཤེགས་པའི་མཁའ་འགྲོ་ཉེར་ལྔ་སོགས་གྲུབ་ཐོབ་ཕོ་མོ་གྲངས་ལས་འདས་པ་བྱོན། རྗེ་འབངས་སོ་སོའི་ངོ་སྐལ་དུ། ཡི་དམ་རྩ་གསུམ་དང༌། བླ་རྫོགས་ཐུགས་གསུམ་གྱིས་གཙོ་བོར་བྱས་པའིརྫོགས་པ་ཆེན་པོའི་རྒྱུད་དང་སྒྲུབ་ཐབས་མན་ངག་མཐའ་ཡས་པར་གདམས། ཕྱི་རབས་ཀྱི་གདུལ་བྱ་ལ་དགོངས་ཏེ་མཚོ་རྒྱལ་སོགས་ལས་ཅན་དག་པའི་འཁོར་དང་བཅས་བོད་ཀྱི་ས་གཞི་རྟ་རྨིག་གང་ཙམ་མ་ལུས་པར་རྫུ་འཕྲུལ་གྱི་ཞབས་ཀྱིས་བཅགས། སྟོད་མངའ་རིས་གངས་བྲགབར་དབུས་གཙང་གནས་ཆེན་ཉེར་གཅིགསྨད་མདོ་ཁམས་གནས་ཆེན་ཉེར་ལྔ། སྦས་ཡུལ་རྒྱལ་པོ་གསུམ། གླིང་ལྔ། ལྗོངས་གསུམ། གླིང་གཅིགདེ་རེ་རེ་ལའང་རྩ་བ་དང་ཡན་ལག་གི་ཚུལ་དུ་རི་མཚོ་གངས་བྲག་ཐམས་ཅད་སྒྲུབ་གནས་སུ་བྱིན་གྱིས་བརླབས། གསང་སྔགས་ཀྱི་བསྟན་པ་མི་ནུབ་པ་དང༌། རྟོག་གེ་བས་བསླད་ཅིང་བཅོས་སུ་མེད་པས་བྱིན་རླབས་མི་གཡེལ་བ་དང༌། ལས་ཅན་གྱི་གདུལ་བྱ་རིམ་པར་འབྱུང་བ་སོགས་བསྟན་ཞབས་གཏེར་གྱིས་སྐྱོང་ཞིང་ཕྱི་རབས་ནས་ཕྱི་རབས་ལ་དགོངས་ཏེ། རྒྱལ་པོའི་བླ་གཏེར་བརྒྱ་དང༌། ཐུགས་གཏེར་ཆེན་པོ་ལྔ། ཟབ་པའི་གཏེར་ཆེན་ཉེར་ལྔ་གཙོ་བོར་གྱུར་པའི་མིང་ཅན་མིང་མེད་ཀྱི་ཆོས་ནོར་དམ་རྫས་ཀྱི་གཏེར་ཁ་གྲངས་ལས་འདས་པ་སྦས། དེ་དག་གདོན་པའི་དུས། འདོན་པའི་གང་ཟགལས་ཅན་ཆོས་བདགགསང་གྲོགས་ལས་རྒྱ་སོགས་ལུང་བསྟན་ཏེ་གུ་རུ་ཡབ་ཡུམ་གྱིས་བཀའ་རྟགས་ཕྱག་རྒྱས་བཏབ་སྟེ་གཏེར་དུ་སྦས། གཏེར་སྲུང་མ་གཟའ་དམ་གསུམ། བདུད་བཙན་ཀླུ་གསུམ། སྲོག་བདག་རྣམ་གསུམ་སོགས་སྡེ་བརྒྱད་སོ་སོ་ལ་གཉེར་དུ་གཏད། མོན་ཁ་ནེ་རེང་སེདྒེ་རྫོང་སོགས་སྟག་ཚང་མིང་ཅན་བཅུ་གསུམ་དུ་དཔལ་ཆེན་རྡོ་རྗེགྲོ་ལོད་ཀྱི་སྐུར་བཞེངས་ནས་ལྷ་སྲིན་ཆེ་ཕྲ་དྲེགས་པ་ཅན་ཐམས་ཅད་དམ་ལ་བཞག།ཕྱི་རབས་ཡིད་ཆེས་པའི་ཕྱིར་བུམ་ཐང་རྡོ་རྗེ་བརྩེགས་པ་སོགས་ལ་སྐུ་རྗེས་དང༌། གནམ་མཚོ་ཕྱུག་མོ་སོགས་གྲགས་པའི་མཚོ་ཆེན་བཞི་ལ་ཕྱག་རྗེས། སྤ་གྲོའི་བྲག་དཀར་པོ་སོགས་ལ་ཞབས་རྗེས་རྡོ་རྗེ་བྲག་གི་ངོས་ལ་མར་དཀར་ལ་པར་གྱིས་བཏབ་པ་བཞིན། རྗེས་འཇུག་མོས་གུས་ཀྱི་རྟེན་དང་གདུལ་བྱའི་བསོད་ནམས་ཀྱི་ཞིང་དུ་མི་འགྱུར་བའི་རྟགས་ཀྱིས་བཏབ་པ་སོགས་འགྲོ་དོན་མཐའ་རུ་ཕྱིན་ཏེ་སྤྱི་ལོ་༨༧༦པར་གུང་ཐང་ལ་ཐོག་ནས་ཆིབས་དང་བཅས་རྔ་ཡབ་སྲིན་པོའི་གླིང་དུ་སྐུ་ལུས་མ་སྤངས་པར་འཇའ་འོད་ཀྱི་ཀློང་ནས་མངོན་སུམ་དུ་གཤེགས་པར་མཛད་དོ། ། |
 ལོ་ཆེན་བཻ་རོ་ཙ་ན་ནི།བདག་ཉིད་ཆེན་པོ་འདི་ནི་ཡུལ་སྙེ་མོ་བྱེ་མཁར་དུ་ཡབ་བ་གོར་ཧེ་འདོད་དང༌། ཡུམ་བྲན་བཟའ་ཀ་སྒྲོན་སྐྱིད་གཉིས་ཀྱི་སྲས་སུ་སྐུ་འཁྲུངས། ཆུང་ངུ་ནས་རྣམ་དཔྱོད་ཤིན་ཏུ་ཆེ་བས་ཨོ་རྒྱན་ཆེན་པོ་དང་བཙན་པོ་ཁྲི་སྲོང་ལྡེའུ་བཙན་གྱིས་སྐུ་བདག་མཛད་དེ་ལོ་ཙཱ་བསླབས་པས་རྒྱ་ཆོས་མང་པོ་བོད་སྐད་དུ་བསྒྱུར། མཁན་ཆེན་བོ་དྷི་སཏྭ་ལས་རབ་ཏུ་བྱུང་ཞིང་བསྙེན་པར་རྫོགས་པས་བཻ་རོ་ཙ་ན་རཀྵི་ཏ་ཞེས་མཚན་གསོལ། རེ་ཞིག་ན་བཙད་པོའི་བཀའ་བཞིན་འཇིགས་པ་ཆེན་པོ་བརྒྱད་དང་དཀའ་བ་ཆེན་པོ་བཅུ་དྲུག་ཁྱད་དུ་བསད་ནས་རྒྱ་གར་གྱི་ཡུལ་དུ་བརྟོལ། དྷ་ན་ཀོ་ཤའི་ཙནྡན་བསིལ་བྱེད་ཀྱི་ནགས་སུ་སློབ་དཔོན་ཤྲཱི་སེདྷས་རྫུ་འཕྲུལ་གྱིས་བཀོད་པའི་ཀེའུ་ཚང་ཆེན་པོ་དགུ་བརྩེགས་དང་ཉེ་བར་སླེབས། དེར་ཆུ་ལེན་གྱི་རྣལ་འབྱོར་མ་ལ་ཕྲིན་བརྫངས་ཀྱང་ལན་མ་བྱུང་ཚེ་བཻ་རོས་ལྟ་སྟངས་མཛད་པས་ཆུ་སྣོད་ས་ལ་འབྱར། རྣལ་འབྱོར་མས་རང་གི་བྲང་ཕྱེས་ནས་རྡོ་རྗེ་དབྱིངས་ཀྱི་དཀྱིལ་འཁོར་བསྟན་ཅིང་དེས་གྲོགས་བྱས་ཏེ་སློབ་དཔོན་ཤྲཱི་སེང་ཧ་དང་མཇལ། གསེར་གྱི་མཎྜལ་ཕུལ་ཏེ་རྩོལ་མེད་ཀྱི་ཐེག་པ་གསུངས་བར་ཞུས་པས་བརྟག་པར་བྱ་གསུངས། ནངས་པར་གསང་བའི་རྩིས་རྒྱ་བཏབ་ནས་ཟབ་མོའི་གནད་རྣམས་བསྟན་པར་བྱ་མོད་ཀྱི།འོན་ཀྱང་ཤིན་ཏུ་མ་གསང་ན་རྒྱལ་པོའི་ཆད་པས་སྲོག་གི་ཉེན་དུ་འགྱུར་བས་ཉིན་པར་པཎྜི་ཏ་གཞན་རྣམས་ལས་རྒྱུ་འབྲས་ཀྱི་ཆོས་ཉོན། མཚན་མོ་མན་ངག་གི་ཆོས་བསྟན་པར་བྱའོ་གསུངས་ཏེ་གཞན་གྱིས་མི་ཤེས་པའི་ཐབས་དང་རྟེན་འབྲེལ་མཛད། སློབ་དཔོན་གྱིས་མཚན་མོ་མན་ངག་སེམས་སྡེ་བཅོ་བརྒྱད་རྣམས་དར་དཀར་པོ་ལ་ར་དཀར་མོའི་འོ་མས་བྲིས་ཏེ་དུད་པས་བདུག་ན་ཡི་གེ་གསལ་བའི་ཐབས་བྱས་ཤིང༌། མན་ངག་གི་དཔེ་བམ་པོ་བརྒྱ་དང་ལྔ་བཅུ་རྩ་བཞི་བྱུང་བའི་ཚེ་གཙང་རིས་ཀྱི་མགོན་པོ་སུམ་བརྒྱ་དྲུག་ཅུ་སོགས་བསྟན་སྲུང་རྣམས་ལ་ཆད་ཐོ་མཛད་དེ་ཤིན་ཏུ་གསང་བའི་རྒྱས་བཏབ་བོ། །ད་དུང་ཡང་བཻ་རོ་ཐུགས་མ་ཚིམ་སྟེ་ཡིད་མི་བདེ་བཞིན་བཞུགས་པས། སློབ་དཔོན་གྱིས་ངས་མན་ངག་ཐམས་ཅད་བསྟན་ཟིན་ན་ཁྱོད་ཅི་ལ་རྡུགས་གསུངས་པར། ཆ་ལ་སེམས་སྡེ་བཅོ་བརྒྱད་པོས། །ཕྲེང་བརྒྱད་སྐྱེལ་མ་མ་ཤོགས་པས། །བདག་རང་བཻ་རོ་ཙཱ་ན་ཡང༌། །ཡུལ་དུ་འགྲོ་བ་ཕྲེང་ལ་རྡུགས་སོགས་ཀྱི་མགུར་ཞུས་པས། སླར་ཡང་སློབ་དཔོན་གྱིས། རྒྱུད་སྡེ་དྲུག་ཅུའི་དབང་དང་མན་ངག་ཐམས་ཅད་དང༌། འབྲས་བུ་རང་ཆས་སུ་སྟོན་པ་ཀློང་གི་སྡེ་དཀར་ནག་ཁྲ་གསུམ་རྣམས་བསྟན་པས་ཆོས་ཐམས་ཅད་ཀྱི་གཏིང་མཐར་ཕྱིན། ད་དུང་མ་ཚིམ་པ་ལྟར་མཛད་པས། སློབ་དཔོན་གྱི་ཞལ་ནས། ཆོས་ཀྱི་དབྱིངས་ལ་ཟད་མེད་ཀྱང༌། །དེ་བཞིན་ཉིད་ནི་གཅིག་ཤེས་ན། །
མ་ལུས་དེ་ལ་ཡོངས་སུ་རྫོགས། །དེ་ལས་ཡོད་ན་ན་ར་ཀན། །ཞེས་གསུངས་ནས། གདམས་པ་བཙའ་ལུགས་གསུམ།
སྦྱིན་པའི་གནས་བཞི། མི་སྦྱིན་པའི་གནས་བཞི་རྣམས་གསུངས་ཤིང་རྒྱས་བཏབ་སྟེ་དགའ་རབ་རྡོ་རྗེ་དང་མཇལ་བར་
ལུང་བསྟན། འདུ་བའི་གནས་ཀྱི་དུར་ཁྲོད་ཆེན་པོར་གཤེགས་པས་སློབ་དཔོན་དགའ་རབ་རྡོ་རྗེ་དང་མཇལ་ནས་
རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་དོན་བརྒྱུད་ཐོབ་ཅིང་དེ་ཉིད་དུ་རྟོགས་གྲོལ་དུས་མཉམ་གྱི་
དངོས་གྲུབ་ཆེན་པོ་མངོན་དུ་བརྙེས་སོ། །གཏེར་མའི་ཕྱོགས་འགའ་ནས་བཻ་རོ་སྙིང་ཐིག་ཅེས་བྱུང་བའང་བརྒྱུད་པའི་ཆུ་
མགོ་འདི་ཉིད་ཡིན་པ་མཁྱེན་པར་འཚལ་ལོ ། །དེ་ནས་བཻ་རོས་རྐང་མགྱོགས་གྲུབ་པ་ལ་བརྟེན་ནས་བོད་དུ་བྱོན།
རྒྱལ་པོ་ཁྲི་སྲོང་ལྡེའུ་བཙན་ལ་ཉིན་མོ་རྒྱུ་འབྲས་ཐུན་མོང་བ་དང༌། མཚན་མོ་རྫོགས་པ་ཆེན་པོའི་སྐོར་ལྐོག་ཆོས་ཁོ་
ནར་གསུངས། སེམས་སྡེ་སྔ་འགྱུར་ལྔ་བསྒྱུར། དེའི་ཚེ་རྒྱ་གར་པས་གདམས་ངག་བོད་དུ་ཁྱེར་བ་ལ་ཕྲག་དོག་གིས་
བོད་རྣམས་ཐེ་ཚོམ་བསྐྱེད་པའི་ཕྲ་མ་དང༌། ཆོས་ལ་གནག་པའི་བཙུན་མོ་དང་བློན་པོ་རྣམས་ཀྱི་དབང་ལས་སློབ་
དཔོན་བཻ་རོ་རེ་ཞིག་ཚ་བ་རོང་དུ་བྱོན་དགོས་པ་བྱུང༌། རྒྱལ་རོང་བྲག་ལྷ་མགོན་པོའི་དགོན་པར་ཐུགས་སྲས་ཐུ་བོར
གཡུ་སྒྲ་སྙིང་པོ་རྗེས་སུ་བཟུང་བ་སོགས་འགྲོ་བ་རྣམས་སྨིན་གྲོལ་ལ་བཀོད། ཚ་རོང་རྟག་རྩེ་མཁར་དུ་གསང་སྟོན་ཡེ་
ཤེས་བླ་མ་ལ་རྫོགས་པ་ཆེན་པོའི་སྐོར་རྣམས་གསུངས། དབུས་སུ་གཉགས་ཛྙཱ་ན་ཀུ་མཱ་ར་དང༌། ལི་བཟའ་ཤེས་རབ་
སྒྲོན་མ་ལ་གསུངས་པ་སྟེ་བརྒྱུད་སྲོལ་རིམ་པ་ལྔར་གྲགས་ཤིང༌། ཕྱི་མ་འདིས་བཻ་རོ་ལི་ཡུལ་དུའང་སྤྱན་དྲངས།
གཞན་ཡང་རྒྱ་ནག་སོགས་སུ་ཕེབས་ནས་ཆོས་ཀྱི་འགྲོ་དོན་རྒྱ་ཆེན་བསྐྱངས་པའི་རྣམ་ཐར་མང༌། དེ་ནས་རེ་ཞིག་གི་
ཚེ་ལྷ་སྲས་མུ་ནེ་བཙན་པོ་སོགས་བོད་ཀྱི་རྗེ་བློན་ཐམས་ཅད་བཻ་རོ་ཚ་བ་རོང་ནས་སྤྱན་འདྲེན་པར་གྲོས་འཆམས་ནས་
བང་མི་གསུམ་བཏང་བས་ཐུགས་དགྱེས་པ་ཆེན་པོས་ཞལ་བཞེས་མཛད་ཅིང་གཡུ་སྒྲ་སྙིང་པོ་དང་བཅས་བོད་དུ་
ཕེབས། ལམ་བར་གྱི་སྟོང་ཁུང་རོང་གི་བྲག་དཀར་རྫོང་དུ་སྤང་རྒན་མི་ཕན་མགོན་པོ་དང་འཕྲད་ནས་དེ་ཉིད་དུ་གྲོལ་
བའི་གདམས་པ་ཟབ་མོ་གནང༌། དཔལ་གྱི་བསམ་ཡས་སུ་པཎ་ཆེན་བཱི་མ་དང་མཇལ་ཞིང་གཉགས་ལོ་སོགས་འཁོར་
ཚོགས་འདུས་པ་ལ་ནང་རྒྱུད་སྡེ་གསུམ་གྱི་ཆོས་འཁོར་བསྐོར། སླར་རྒྱལ་མོ་རོང་དུ་ཕྱིར་ཕེབས་ཏེ་ཐ་མའི་གདུལ་བྱརྣམས་
སྨིན་གྲོལ་ལ་བཀོད་པ་སོགས་འགྲོ་དོན་གྱི་མཇུག་བསྐྱངས་ནས་བོད་དུ་ཕེབས། སྐུ་ཚེའི་མཐར་ཧས་པོ་རིར་
ཟུང་འཇུག་གི་སྐུར་གྱུར་ཏེ་འཇའ་ལུས་སུ་གཤེགས་སོ། །
|
 མངའ་བདག་ཆོས་རྒྱལ་ཁྲི་སྲོང་ལྡེའུ་བཙན་ནི།
ཡབ་རྒྱལ་པོ་ཁྲི་ལྡེ་གཙུག་བརྟན་དང་བཙུན་མོ་གྱིམ་ཤིང་ཀོང་
ཇོ་གཉིས་ཀྱི་སྲས་སུ། རབ་མྱོས་ཞེས་པ་ལྕགས་རྟ་སྟེ་སྤྱི་ལོ་༧༩༠པར་སྐུ་འཁྲུངས། ཐོག་མར་ལྷུམས་སུ་ཞུགས་ཚེ་ཡུམ་
གྱི་རྨི་ལམ་དུ་རྒྱ་ནག་རི་བོ་རྩེ་ལྔ་ནས་འོད་ཉི་མ་ཤར་བ་ལྟ་བུའི་རྩེ་ལས་ཁྱེའུ་ཞིག་བྱུང་ནས་ཁོག་ཏུ་ཞུགས་པ་རྨིས།
རྒྱལ་པོ་ལ་བཤད་པས་ཧ་ཤང་མངོན་ཤེས་མཁན་ཞིག་བཞུགས་པ་ལ་དྲི་བ་མཛད་ཚེ། དེས་ལེགས་པར་བརྟགས་ཏེསྲས་
བྱང་ཆུབ་སེམས་དཔའ་འཇམ་དཔལ་གྱི་སྤྲུལ་པ་ཅིག་འཁྲུངས་པའི་ལྟས་ལགས་པས་རིམ་གྲོ་ཆེར་སྐྱེད་ཅིག་ཅེས་
ཟེར་རོ། །དེ་ནས་ཟླ་བ་དགུ་ངོ་དང་བཅུ་ཚང་པ་སྐར་མ་རྒྱལ་གྱི་ཉིན་པར་སྐུ་བལྟམས་པའི་བཙས་སྟོན་རྒྱ་ཆེན་པོ་
མཛད་ནས་མྱུར་བར་མཚོ་ཆེན་པོའི་པདྨ་ལྟར་ལང་ཚོ་ཆེ་ནས་ཆེར་བསྐྱེད། མཚན་གསོལ་བའི་དགའ་སྟོན་གྱི་ཚེ་མིང་
ཅི་གདགས་བཀའ་བགྲོས་པ་ལས། རྒྱལ་བུ་ཉིད་བཞེངས་ནས་གནམ་ལྷ་བབ་ཀྱི་རྒྱལ་པོ། ས་ལྷུན་གྲུབ་ཀྱི་མངའ་
བདག་མགོ་ནག་ཡོངས་ཀྱི་སྤྱི་རྗེ་སྤྲུལ་པའི་རྒྱལ་པོ་ཁྲི་སྲོང་ལྡེ་བཙན་ལགས་སོ་ཞེས་གསུངས་པས། བོད་འབངས་
ཐམས་ཅད་ཡ་མཚན་སྐྱེས་ནས་ཕྱག་འཚལ་ཞིང་འདུན་ནོ། །དེ་ནས་དགུང་ལོ་བཅུ་གསུམ་ལ་ཡབ་དགུང་དུ་གཤེགས་
ནས་རྒྱལ་སྲིད་ལ་མངའ་གསོལ་ཞིང་བཞུགས་པ་ལ། བློན་པོ་ཆེན་པོ་མ་ཞང་གྲོམ་པ་སྐྱེས་དབང་ཆེ་བས་ཆོས་དར་དུ་
མ་གཏུབ་པར་ཐམས་ཅད་བོན་ལ་བཀོད་ནས་ཆབ་སྲིད་བཟུང༌། མཁར་བྲག་དང་བྲག་དམར་མགྲིན་བཟང་བཤིག
ཇོ་བོ་ཤཱཀྱ་མུ་ནེ་རྒྱ་ཡུལ་དུ་སྐྱེལ་བའི་ཐབས་བྱས་ཀྱང་མ་ཐེག་པས་ས་འོག་ཏུ་སྦས་ཤིང་འཕྲུལ་སྣང་གི་གཙུག་ལག་
ཁང་དུ་བཤས་ར་བྱས། དུས་དེར་སྦས་གསལ་སྣང་མཁན་པོ་ཞི་བ་འཚོ་བལ་ཡུལ་དུ་བཞུགས་པ་མཇལ་དུ་ཕྱིན་ནས་
སེམས་བསྐྱེད་ཞུས་ཏེ་བོད་ལ་འབྱོན་པར་གསོལ་བས། བོད་ངའི་གདུལ་ཞིང་ཡིན་ནའང༌། བཙན་པོ་དང་ཁྱོད་མ་སྐྱེས་
པས་ངས་འདི་ན་བོད་ཀྱི་རྒྱལ་རབས་དགུའི་བར་དུུ་སྒུག་གིན་བསྡད་པ་ཡིན། ད་ཁྱེད་གཉིས་ཀྱང་ནར་སོན་པས་འོ་
སྐོལ་རྣམས་ཀྱིས་བོད་དུ་བསྟན་པ་འཛུགས་པའི་དུས་ལ་བབ། ཅེས་གསུངས། མི་རིང་བར་རྒྱལ་བུ་སྐུ་ནར་སོན་ནས་
ཡབ་མེས་ཀྱི་ཡིག་ཚང་ལ་གཟིགས་པས་ཆོས་མཛད་པར་དགོངས། དགེ་བ་བཅུའི་མདོ་དང༌། རྡོར་གཅོད། སཱ་ལུ་ལྗང་
པ་རྣམས་རྫ་ཁྲོད་ནས་བླངས་ཏེ་གཟིགས་པས་ལྟ་སྤྱོད་དག་ཅིང་ཟུང་དུ་འབྲེལ་བར་གོ། དེ་ནས་སྦ་གསལ་སྣང་རྡོ་རྗེ་
གདན་དུ་མ་ཧཱ་བོ་དྷི་མཆོད་པ་བྱེད་དུ་ཕྱིན་ནས་རིམ་པར་བོད་དུ་ལོག།བཙན་པོ་ལ་མཁན་པོས་གསུང་རྣམས་གསོལ་
བས། བཙན་པོའི་ཞལ་ནས། མ་ཞང་གིས་ཆད་པ་གཅོད་དོགས་ཡོད་པས་ཁྱོད་རང་མྱུར་དུ་སོང༌། ངས་ལྐོག་ཏུ་འགོས་
རྒན་དང་གྲོས་བྱས་ནས་ཐབས་ཀྱིས་སྤྱན་འདྲེན་དུ་བཏང་གི་གསུངས། རྒྱལ་པོས་བློན་པོ་ཆེན་པོ་འགོས་ལ་བོད་
ཐམས་ཅད་ཆོས་ལ་འགོད་པའི་ཐབས་དྲིས་པས། འགོས་ཀྱིས་མཆིད་ནས་དེ་ཤིན་ཏུ་ལེགས་ཀྱང་རྒྱལ་པོ་སྐུ་ཆག་ཆེ་
བས་གླུད་དུ་བློན་པོ་གཉིས་ལོ་གསུམ་ཆད་པར་བཅུག་ན་ཕན་ཞེས་སྒྲོག་ཏུ་གཞུག་གིས། དེ་དུས་དེ་ལྟར་མཛད་པར་ཞུ་
ཞེས་གླེང་ནས་མོ་རྩིས་པ་རྣམས་ལ་བརྔན་པ་བྱིན་ནས་སྒྲོག་ཏུ་བཅུག་པས་རྒྱལ་ཁམས་ཐམས་ཅད་དུ་བསྒྲགས་པའི་
ཚེ། རྒྱལ་པོའི་བློན་འཁོར་བསགས་ནས་ང་ཡི་གླུད་དུ་འགྲོ་ནུས་པ་སུ་ཡོད་དྲིས་པས། འགོས་རྒན་པོ་ལངས་ཏེ་ང་
གཅིག་འགྲོ་བར་ཞུ་ཟེར་བ་དང༌། མ་ཞང་ཡང་འགྲན་པར་ལངས་ཏེ་ང་ཡང་འགྲོ་བ་ཞུ་ཟེར་རོ། །དེ་ནས་སྟོད་ལུང་བྲང་
མདར་ལོ་གསུམ་གྱི་ཡོ་བྱད་དང་བཅས་བློན་པོ་ཆེན་པོ་གཉིས་གསོན་དུར་དུ་བཅུགའགོས་རྒན་ལྐོག་ནས་ཚུར་
བཏོན། མ་ཞང་ཆད་པས་སྒོ་བཅད་དེ་སྲུང་མི་བཞགགཞན་ཡང་བློན་པོ་ཆོས་ལ་མི་དགའ་བ་རྣམས་ཕྱོགས་གཞན་
དང་གཞན་དུ་བཏང༌། དེ་ནས་འགོས་དང་རྒྱལ་པོ་བཀའ་བགྲོས་ཏེ་གཙུག་ལག་ཁང་བཞེངས་པའི་ཐབས་བྱས་ནས་
བློན་འབངས་ལ་འདམ་ཀ་བཀུར་ཏེ་གྲོས་བྱས་པས་གཙུག་ལག་བྲེ་ཞབས་ཙམ་བཞེངས་པར་འཆམས་ཏེ། མཁན་པོ་
ཞི་བ་འཚོ་གདན་འདྲེན་པར་བཏང་བས་མཁན་པོས་ཞལ་ནས་ཁྱེད་རྣམས་རེ་འཕྱིས་ངའི་ལོ་དགུ་བརྒྱ་བསྒུགས་པ་
ལས་ད་བར་མ་བྱུང༌། རྒྱལ་པོ་བཙས་པའི་ཚེ་ཡང་ང་ལ་སོ་མེད་པ་ལས་གཅིག་པོ་འདི་ཕྱིས་སྐྱེས་སོ། །ཞེས་གསུངས་
ཏེ། བོད་ཡུལ་དུ་བྱོན་པས་རྒྱལ་བློན་ཀུན་ཀྱིས་བསུ་བ་མཛད་ནས་གཙུག་ལག་ཁང་རྩིགས་པའི་རྨང་འདིང་བ་ན་ལྷ་
འདྲེ་རྣམས་ཀྱིས་བརྩིགས་སུ་མ་སྟེར་བས། མཁན་པོའི་ཞལ་ནས། རྒྱ་གར་གྱི་ཡུལ་ནས་རྒྱལ་པོ་དྷརྨ་པ་ལའི་མཆོད་
གནས་སུ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཞེས་བྱ་བ་མཁས་ཤིང་གྲུབ་པ་བརྙེས་པ། མཐུ་དང་རྫུ་
འཕྲུལ་ཐོགས་པ་མེད་པ་ཞིག་བཞུགས་པ་དེ་སྤྱན་དྲངས་ནས་ས་འདུལ་མཛད་ན་གཙུག་ལག་ཁང་འབྱོངས་པར་ལུང་
བསྟན་པ་ལྟར་མཛད་པས། སློབ་དཔོན་ཆེན་པོ་རྫུ་འཕྲུལ་གྱིས་བོད་དུ་ཕེབས་ཏེ་ལྷ་འདྲེ་གདུག་པ་ཅན་རྣམས་དམ་ལ་
བཏགས། ཧེ་རུ་ཀའི་གར་དང་རྡོ་རྗེའི་འགྲོས་ཀྱིས་ས་བཏུལ་བར་ཕྱི་བཞིན་རྨང་བཏིང་བས་ཕྱིའི་ལྕགས་རི་མུ་ཁྱུད་རྡོརྗེའ
ི་འགྲོས་ཟུར་མང་རིས་སུ་བྱུང་ངོ༌། །དེའི་ཚེ་ལས་དཔོན་ཆེན་པོ་བཞི་བསྐོས་ཏེ་རྒྱ་དཀར་ནགཞང་ཞུང་སུམ་པ།
ལྷོ་བལ་གར་ལོགལི་མང་ཡུལ་ལ་སོགས་པའི་བཟོ་བོ་མཁས་པ་མང་པོས་ཉིན་པར་བཞེངས་ཤིང༌། མཚན་མོ་ལྷ་
སྲིན་སྡེ་བརྒྱད་ཀྱིས་ལས་དཔོན་བྱས་ཏེ་མི་མ་ཡིན་པ་རྣམས་ཀྱིས་བཞེངས་པས་ཉིན་བརྩིགས་པ་བས་ནུབ་བརྩིགས་
པས་མཐོ་ཞིང༌། རི་མོ་དང་ཤིང་བཟོ་དང༌། ལྡེར་བཟོ་ཡང་མཚན་མོའི་ལེགས་པ་བྱུང༌། དེ་ལྟར་བསམ་ཡས་མི་འགྱུར་
ལྷུན་གྱིས་གྲུབ་པའི་གཙུག་ལག་ཁང་ཆེན་པོ་གླིང་བཞི་གླིང་ཕྲན་བརྒྱད་ཉི་ཟླའི་གླིང་གཉིས་དང་ཇོ་མོ་གླིང་གསུམ་
སོགས་ཕྱི་རྟེན་དང༌། ནང་རྟེན་རྣམས་ལེགས་པར་གྲུབ་ནས་མཁན་པོ་བོ་དྷི་ས་ཏྭ་དང་སློབ་དཔོན་པདྨ་འབྱུང་གནས་
གཉིས་ཀྱིས་རབ་ཏུ་གནས་པ་མཛད་ཚེ་ཡ་མཚན་པའི་ལྟས་དཔག་ཏུ་མེད་པ་བྱུང་ཞིང་མི་ལོ་བཅུ་གསུམ་དུ་བཀྲ་ཤིས་
པའི་དགའ་སྟོན་དང་ལྟད་མོའི་རིགས་མཐའ་དག་བྱས་ཏེ་རྒྱལ་འབངས་ཐམས་ཅད་བདེ་སྐྱིད་ཀྱི་ཉི་མ་ཤར་བར་གྱུར་
ཏོ། །དེ་ནས་མཁན་སློབ་གཉིས་ཀྱིས་རྒྱུ་མཚན་ཉིད་ཀྱི་ཐེག་པ་དང༌། འབྲས་བུ་གསང་སྔགས་རྡོ་རྗེ་ཐེག་པའི་ཆོས་
བཀའ་རྒྱ་ཆེ་བ་རྣམས་གནང་ཞིང་རྗེ་འབངས་ཐམས་ཅད་སྨིན་པར་མཛད། གཞན་ཡང་རྒྱ་གར་ནས་པཎྜི་ཏ་མང་པོ་
སྤྱན་དྲངས་ཤིང་མཁན་སློབ་རྣམ་གཉིས་དང་བཅས་པས་མདོ་སྔགས་ཀྱི་ཆོས་རྒྱ་ཆེ་ཞིང་གྲངས་མང་བར་བསྒྱུར་ཅིང་
གཏན་ལ་ཕབ་པར་མཛད་དོ། །ཁྱད་པར་མངའ་བདག་རྒྱལ་པོ་ཉིད་ཀྱིས་འོད་གསལ་གསང་བ་སྙིང་ཐིག་གི་བརྒྱུད་
པའི་མན་ངག་སློབ་དཔོན་རྣམ་གསུམ་ལས་བཀའ་ལུང་ཆིག་རྫོགས་སུ་གསན་པ་སྟེ ། སློབ་དཔོན་བཱི་མ་ལ་ནས་བར་
ཁང་གཡུ་ཞལ་ཅན་དུུ་ཆོས་རྒྱལ་ཉིད་དང༌། སྐ་བ་དཔལ་བརྩེགས། གཉགས་ཛྙཱ་ན། ཉང་བན་ཏིང་འཛིན། ལྷ་སྲས་མུ་
ཏིག་བཙན་པོ་དང་ལྔས་འོད་གསལ་གསང་བ་སྙིང་ཐིག་གི་གདམས་ངག་བུམ་པ་གང་བྱོས་སུ་གསན་པ་དང༌། དཔལ་
གྱི་བསམ་ཡས་སུ་གུ་རུ་ནས་བརྒྱུད་པའི་གདམས་པ་ཡོངས་རྫོགས་གསན་ཞིང་དབང་དུས་སུ་མེ་ཏོག་དབུས་སུ་བབ་
ཅིང་ཆེ་མཆོག་བདེ་གཤེགས་འདུས་པས་ཞལ་གཟིགས་ཏེ་རྟོགས་པ་མངོན་དུ་གྱུར། ལོ་ཆེན་བཻ་རོ་ནས་སེམས་སྡེ་སྔ་
འགྱུར་ལྔ་དང༌། ཀློང་སྡེ་རྡོ་རྗེ་ཟམ་པ་སོགས་ཟབ་ཆོས་མང་དུ་གསན། ཡང་བཱི་མ་དང་བཻ་རོ་ཐུན་མོང་ནས་སེམས་སྡེཕྱི་
འགྱུར་བཅུ་གསུམ་སོགས་གཙོ་བོར་མཛད་ནས་གསན། དེ་ལྟར་རྫོགས་ཆེན་གྱི་ཤིང་རྟ་ཆེན་པོ་གསུམ་གྱི་ཟབ་ཆོས་
ཡོངས་སུ་རྫོགས་པ་གསན་ཏེ་སྒྲུབ་པ་ཉམས་བཞེས་མཛད་པས་ཆོས་ཉིད་གཅེར་མཐོང་དུ་ངོ་འཕྲོད། དགོངས་པ་ཀློང་
ཆེན་ཡངས་པའི་མཁའ་ལ་གཏན་སྲིད་ཟིན་ཏེ་རྩ་བའི་ཆོས་ཀྱི་བདག་པོར་གྱུར། རིག་རྩལ་ཆོས་རབ་རྣམ་འབྱེད་ཀྱི་
ཤེས་རབ་ཀློང་བརྡོལ་བས་བཀའ་ཡང་དག་པའི་ཚད་མ་སོགས་བསྟན་བཅོས་ཀྱང་མང་དུ་མཛད་པ་བཅས། མདོར་ན་
རྗེ་བཙུན་འཇམ་དཔལ་དབྱངས་མངའ་བདག་ཆོས་ཀྱི་རྒྱལ་པོའི་ཚུལ་དུ་བྱོན་པ་འདིའི་སྐུ་རིང་ལ་བོད་ཡུལ་མུན་པའི་
གླིང་དུ་རྒྱལ་བསྟན་མདོ་སྔགས་ཀྱི་བསྟན་པ་ཉི་མ་ཤར་བ་ལྟར་བྱུང་བ་དང༌། མཐའ་ཡི་རྒྱལ་ཁམས་ཐམས་ཅད་དབང་
དུ་བསྡུས་ཏེ་སུམ་གཉིས་ས་ཡི་དཀྱིལ་འཁོར་ཆེན་པོ་ལ་བཀས་མངའ་དབང་བསྒྱུར། བོད་ཡུལ་སྟོད་སྨད་ཀྱི་ཆབ་
འབངས་ཐམས་ཅད་བདེ་སྐྱིད་རྫོགས་ལྡན་གྱི་དཔལ་ལ་བཀོད་པ་སོགས་ལེགས་མཛད་ཕྱོགས་བརྒྱར་སྤེལ། དེ་ལྟར་
ཐུགས་བསྐྱེད་དང་བཀའ་དྲིན་རྨད་དུ་བྱུང་བའི་མཛད་པ་ནམ་ཡང་ནུབ་པ་མེད་པ་ལྗོངས་འདིར་གསལ་བར་བྱས་ཏེ་
མཐར་དགུང་གྲངས་ལྔ་བཅུ་སྐོར་ཞིང་འདིའི་གདུལ་བྱ་རེ་ཞིག་རྫོགས་པའི་ཚུལ་གྱིས་མྱ་ངན་ལས་འདས་སོ། །
|
 མཁའ་འགྲོ་ཡེ་ཤེས་མཚོ་རྒྱལ་ནི།
འཁྲུངས་ཡུལ་གངས་ཅན་བོད་ཀྱི་ཡུལ་དབུས་མཁར་ཆེན་ལྕོག་རོ་རུ།
ཡབ་མང་རྗེ་ཐོད་དཀར་ལེགས་དང༌། ཡུམ་གནུབས་གཟའ་རྒྱལ་མོ་མཚོ་གཉིས་ཀྱི་སྲས་མོ་རུ་བྱ་ལོ་སྤྲེལ་ཟླའི་ཉི་ཤར་
དུས་སྐུ་འཁྲུངས་པ་སྟེ། ཡུམ་རྒྱལ་མོ་མཚོའི་རྨི་ལམ་དུ་ནམ་མཁའི་དཀྱིལ་ན་བུད་མེད་སྔོན་མོ་གཅིག་གིས་འོད་ཀྱི་
སྐར་མ་ཞིག་འཕངས་པ་ཁོག་པའི་ནང་དུ་སོང་བ་རྨིས་ནས་ཟླ་བ་དགུ་ངོ་བཅུ་ན་བུ་མོ་མཛེས་མ་དཔྲལ་བར་རྡོ་རྗེ་རྒྱ་
གྲམ་གྱི་རི་མོས་མཚན་པ། ཞལ་ནས་ཨུཏྤལ་གྱི་དྲི་ངད་དང་ལྡན་པ་འཇའ་འོད་འཕྲོ་ཞི ང་མེ་ཏོག་གི་ཆར་བ་དང་བཅས་
བལྟམས། ཆེར་སྐྱེས་པའི་དུས་མངའ་བདག་རྒྱལ་པོ་ཁྲི་སྲོང་ལྡེའུ་བཙན་གྱི་བཙུན་མོར་སྤྱན་དྲངས། འབྲི་ཀློག་སོགས་
རིག་པའི་གནས་ཀུན་བརྡ་བསྟན་པ་ཙམ་གྱིས་ཐུགས་སུ་ཆུད། སློབ་དཔོན་ཆེན་པོ་བོད་དུ་ཕེབས་ནས་ཆོས་འཁོར་
སྐོར་བའི་ཚེ་སློབ་དཔོན་ལ་ཤིན་ཏུ་དད་ཅིང་རྒྱལ་པོ་ལ་ཆོས་བྱེད་པར་ཞུས་པས་གནང་སྟེ་སློབ་དཔོན་ལ་ཕུལ། དེ་
ནས་སློབ་དཔོན་གྱིས་ལས་རྒྱ་བགྱིས་ཏེ་གང་དུ་གཤེགས་པ་ཐམས་ཅད་དུ་བྱོན་ནས་བསྙེན་བཀུར་དང་ཞབས་ཏོག་
མཛད། མཆིམས་ཕུ་དང་གཞོ་སྟོད་ཏི་སྒྲོ་སོགས་སུ་ཡབ་ཡུམ་ལྷན་དུ་སྒྲུབ་པར་བཞུགས་པས་བསད་པའི་མི་རོ་
བསླངས་པའི་གྲུབ་པ་ཐོབ་པ་སྟེ་མཆོག་དང་ཐུན་མོང་གི་དངོས་གྲུབ་བརྙེས། སློབ་དཔོན་ཆེན་པོ་ལས་མདོ་སྔགས་ཀྱི་
ཆོས་བཀའ་ཐམས་ཅད་ཐོབ་ཅིང་ཤིན་ཏུ་གཅེས་པའི་མན་ངག་གང་ཟབ་ཟབ་རྣམས་ཐུགས་ཀྱི་གཟུངས་མ་མཚོ་རྒྱལ་
ཁོ་ན་ལ་མནོག་ཆོས་སུ་བསྩལ་ཏེ་བཀའ་གཏད་མཛད། དེ་དག་གི་སྐབས་སུ་མཚོ་རྒྱལ་གྱིས་ཞུ་བསྐུལ་དང་བཀའི་
བསྡུ་བ་མཛད་དེ་དཀར་ཆག་ཏུ ་བཀོད་པ་བསམ་གྱིས་མི་ཁྱབ་ཅིང༌། ཁྱད་པར་དུ་སློབ་དཔོན་ཡབ་ཡུམ་གཞོ་སྟོད་ཏི་སྒྲོབྲག་
ཏུ་སྒྲུབ་པ་མཛད་པའི་ཚེ། ཡེ་ཤེས་ཀྱི་མཁའ་འགྲོ་རྣམས་ཀྱིས་ཇོ་མོ་ལ་བསྐུལ་བ། སློབ་དཔོན་ཆེན་པོ་སྤྲུལ་པའི་
སྐུའི་ཐུགས་ལ་ཚེ་འདི་ཉིད་དུ་གདོས་བཅས་ཀྱི་ཕུང་པོ་མི་སྣང་བར་ལོ་གསུམ་གྱིས་འཚང་རྒྱ་བའི་གདམས་པ་མངོན་
སུམ་སྙིང་ཏིག་གི་མན་ངག་ཟབ་མོ་བཞུགས་པས་གསོལ་བ་ཐོབ་ཅིག་ཅེས་ལུང་བསྟན་ཏོ། །དེའི་ཚེ་ཚོགས་ཀྱི་འཁོར་
ལོ་རྒྱ་ཆེན་པོས་མཆོད་དེ་ཞུས་པ། སློབ་དཔོན་ཆེན་པོ་ལགས། ཚེ་འདི་ཉིད་ལ་ཕུང་པོ་མི་སྣང་བར་འཚང་རྒྱ་བའི་
གདམས་པ་མངོན་སུམ་སྙིང་ཏིག་གི་མན་ངག་གནང་བར་ཞུ་འཚལ་ཞེས་གསོལ་བ་བཏབ་སྟེ་ཕྱག་དང་སྐོར་བ་གྲངས་
མེད་པ་མཛད། སློབ་དཔོན་ཆེན་པོས་གསུངས་པ། མཚོ་རྒྱལ་ཁྱོད་ཀྱིས་ཞུས་པ་དེ་ཤིན་ཏུ་ལེགས། སྔར་དང་མི་འདྲ་
བའི་གདམས་པ་ཐེག་པ་རིམ་དགུ་ཀུན་ལས་འདས་པའི་རྩེ་མོ། གནད་མཐོང་བས་ཡིད་དཔྱོད་ཀྱི་ལྟ་སྒོམ་འཇིག་པ།
འབད་མི་དགོས་པར་ས་ལམ་རྫོགས་པ། བཅོས་སྒྱུར་དང་གཉེན་པོ་མི་དགོས་པར་ཉོན་མོངས་རང་སར་གྲོལ་བ།
རྒྱུས་མ་བསྐྱེད་པར་འབྲས་བུ་རང་ལ་རྫོགས་པ། ལྷུན་གྱིས་གྲུབ་པའི་དགོངས་པ་སྐད་ཅིག་ལ་འཆར་བ། གདོས་
བཅས་ཤ་ཁྲག་གི་ཕུང་པོ་ཚེ་འདི་ཉིད་ལ་འོད་གསལ་ལོངས་སྤྱོད་རྫོགས་པའི་སྐུར་གྲོལ་བ། འོག་མིན་གྱི་གནས་སུ་ལོ་
གསུམ་གྱིས་བགྲོད་ནས་ཆོས་སྐུ་ལྷུན་གྲུབ་རིན་པོ་ཆེའི་ཞིང་དུ་གཏན་སྲིད་ཟིན་པར་བྱེད་པའི་གདམས་པ་མཁའ་འགྲོ་
གསང་བ་སྙིང་ཐིག་ཡོད་ཀྱིས་བསྟན་པར་བྱའོ་གསུངས་ནས། གཞོ་སྟོད་ཏི་སྒྲོ་བྲག་གི་མཁའ་འགྲོའི་ཚོགས་ཁང་ཆེན་
མོར་ཞི་ཁྲོ་དོན་གྱི་དཀྱིལ་འཁོར་ཞལ་ཕྱེས་ནས་ཇོ་མོ་མཁར་ཆེན་བཟས་ཐོག་དྲངས་ཡེ་ཤེས་ཀྱི་མཁའ་འགྲོ་མ་འབུམ་
ཕྲག་གཅིག་ལ་དབང་བསྐུར་ཞིང་ཁྲིད་རྫོགས་པར་མཛད་ནས། ཡང་གསང་རྫོགས་པ་ཆེན་པོ་རྒྱུད་བཅུ་བདུན་ཀློང་
གསལ་ཉི་མའི་རྒྱུད་དང་བཅོ་བརྒྱད། དེའི་མན་ངག་རབ་ཏུ་མང་པོ་དང་བཅས་པ་རྣམས་གསུངས་སོ། །དེ་ནས་དེརྣམས་
ལས་རྒྱུད་རབ་ཏུ་རྒྱས་པའི་མན་ངག་རྣམས་གཅིག་ཏུ་ཕྱེས། སློབ་དཔོན་ཉིད་ཀྱིས་མཛད་པ་ཀུ་ས་ལིའི་སྐོར་
རྣམས་གཅིག་ཏུ་ཕྱེས་ཏེ་སོ་སོར་སློབ་དཔོན་དང་མཚོ་རྒྱལ་གཉིས་ཀྱིས་ཡི་གེར་བྲིས་ཏེ་དཀར་ཆག་ལ་བསྣན་ཅིང་ལྷལྕམ་
པདྨ་གསལ་ལ་སྨོན་ལམ་གཏད་རྒྱ་མཛད་ནས་གཏེར་དུ་སྦས་པར་མཛད། མཐར་སློབ་དཔོན་ཆེན་པོ་དང་མཉམ་དུ་འཇའ་འོད་ཀྱི་ཀློང་ནས་ལྷོ་ནུབ་སྲིན་པོའི་ཡུལ་དུ་རྫུ་འཕྲུལ་གྱིས་གཤེགས་སོ། །
|
ཉང་བན་ཏིང་འཛིན་བཟང་པོ་ནི།
དེ་ཡང་གོང་དུ་བཤད་པ་ལྟར་གསང་བ་མཆོག་གི་རྒྱུད་ལུང་མན་
ངག་ཐམས་ཅད་སློབ་དཔོན་བཱི་མ་ལ་ལས་རྫོགས་པར་ཐོབ་ནས། བཱི་མ་ལ་རྒྱ་ནག་ཏུ་བཞུད་དེ་ལོ་ལྔ་བཅུ་རྩ་ལྔ་ནས་
ཉང་ཏིང་འཛིན་བཟང་པོ་རང་རྒྱུད་རྣམ་པར་དག་ནས་ཟག་པ་ཟད་པའི་ཕུང་པོར་གྱུར། དམ་ཅན་རྡོ་རྗེ་ལེགས་པས་
ཁམས་སུ་སེར་བ་ཕབ་པས་འབྲུ་ནས་རྔ་མོའི་ཁལ་ལྔ་བརྒྱ་བྱུང་བ་ལ། ཉང་གིས་གསེར་གྱི་རྡོ་རྗེ་རྩེ་དགུ་པ་ཞིག་བར་
སྣང་ལ་འཕངས་ཏེ་སྔོན་གྱི་དམ་ཚིག་གིས་རྗེས་སུ་བསྐུལ་བས་ནས་རྣམས་ཉང་ལ་ཕུལ། དེའི་རྫས་ཀྱིས་དབུ་རུ་ཞྭའིལྷ་
ཁང་བཞེངས་སུ་གསོལ་བ་ཆོས་སྐྱོང་ལ་གཉེར་དུ་གཏད་དེ་ཡོངས་སུ་གྲུབ། བཤད་བརྒྱུད་སྙིང་ཐིག་གི་བཀའ་
བརྒྱུད་དག་ཀེའུ་ཚང་རིམ་གསུམ་དུ་སྦས་ཤིང༌། སྙན་བརྒྱུད་ཡི་གེའི་རིགས་ཀྱི་དཔེ་ཤོག་དྲིལ་རྫ་མ་གང་སྒོ་ཁང་གི་
སྟེང་དུ་སྦས། གསང་བ་བླ་ན་མེད་པའི་གསེར་གྱི་སྙིང་པོ་ཉི་མ་རབ་ཏུ་སྣང་བར་བྱེད་པ་ཀ་བའི་སམ་ལེ་གསུམ་གྱི་ཁོང་
སེང་ལ་སྦས་ཏེ་ཕྱི་རབས་སྐལ་ལྡན་གྱི་དོན་དུ་རྒྱས་བཏབ་ནས་བར་དེར་མི་སྣང་བར་མཛད་དོ། །སྙན་བརྒྱུད་ཚིག་གི་
རིམ་པ་མཆན་དུ་བཏབ་ནས་སྦས་བློ་གྲོས་དབང་ཕྱུག་ལ་གཏད་དེ་བརྒྱུད་པའི་བཀའ་སྲོལ་མི་ཉམས་པར་མཛད།
སློབ་དཔོན་ཉིད་ལྷ་སའི་བྲག་ལྷ་ཀླུ་ཡི་ཕུག་གི་ནམ་མཁའ་ལ་ལྷག་མ་མེད་པར་འོད་ཕུང་དུ་ཡལ་ལོ ། །
|
སྦས་བློ་གྲོས་དབང་ཕྱུག་ནི།
ཡུལ་དབུས་འཕན་ཡུལ་དུ་སྦས་ཀྱི་རིགས་སུ་སྐུ་འཁྲུངས། ཉང་ཏིང་འཛིན་བཟང་
པོས་རྗེས་སུ་བཟུང་ནས་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་སྙན་བརྒྱུད་ཀྱི་མན་ངག་ཐམས་ཅད་
ལྷག་མེད་བུམ་པ་གང་བྱོའི་ཚུལ་དུ་བསྩལ། གཡོ་རུ་གཟོང་གི་ཕུག་པ་དང༌། གཙང་རྟ་ནག་སོགས་ཡུལ་དབུས་ཀྱི་སྒྲུབ་
གནས་རྣམས་སུ་སྙིང་པོ་དོན་གྱི་སྒྲུབ་པ་ལ་གཞོལ། གྲུབ་པའི་ས་མཐོར་གཤེགས་ཏེ་ལྷག་མེད་འཇའ་ལུས་རྡོ་རྗེའི་སྐུ་
བརྙེས་པའི་མཐར། གདམས་པ་རྣམས་འབྲོམ་རིན་ཆེན་འབར་ལ་གཏད་དེ་ནམ་མཁར་འོད་ཀྱི་ཕུང་པོར་གཤེགས་
སོ། །དེ་སྐད་དུ། ཀུན་མཁྱེན་ཆེན་པོས། གཡོ་རུ་གཟོང་གི་ཕུག་པ་ན། །སྦས་སྟོན་བློ་གྲོས་དབང་ཕྱུག་ལ་གསོལ་བ་
འདེབས། །ཞེས་གསུངས་པ་ཉིད་ལགས་ཀྱང་རྣམ་ཐར་རྒྱས་པ་མི་བཞུགས་པར་སྙམ།
|
འབྲོམ་རིན་ཆེན་འབར་ནི།
སློབ་དཔོན་འདི་ཡུལ་དབུས་སུ་འབྲོམ་གྱི་རིགས་སུ་སྐུ་བལྟམས། སྦས་
སྟོན་བློ་གྲོས་དབང་ཕྱུག་ལས་འོད་གསལ་རྫོགས་པ་ཆེན་པོ་གསང་བ་སྙིང་ཐིག་སྙན་བརྒྱུད་ཀྱི་གདམས་པ་རྣམས་ལྷག་
མེད་བུམ་པ་གང་བྱོའི་ཚུལ་དུ་རྫོགས་པར་གསན། སྒྲུབ་གནས་བྲག་དཀར་རྟ་སོ་སོགས་དང་སྟོད་ཕྱོགས་ཀྱི་རི་མཚོསྔ་
གངས་བྲག་རྣམས་སུ་སྙིང་པོ་དོན་གྱི་སྒྲུབ་པ་ལ་གཞོལ། རང་བཞིན་རྫོགས་པ་ཆེན་པོའི་གསང་ལམ་ནས་མཆོག་གི་
དངོས་གྲུབ་བརྙེས་ཤིང་གྲུབ་པའི་ས་མཐོར་གཤེགས། གདམས་པ་རྣམས་ལྡང་མ་ལྷུན་གྲུབ་རྒྱལ་མཚན་ལ་ཆིག་
བརྒྱུད་དུ་གདམས་ཏེ་རེ་ཞིག་དགོངས་པ་གདོད་མའི་ནང་དབྱིངས་སུ་བསྡུས་སོ། །དེ་སྐད་དུ། ཀུན་མཁྱེན་ཆེན་པོས།
བྲག་དཀར་རྟ་སོའི་དགོན་པ་ན། །འབྲོམ་སྟོན་རིན་ཆེན་འབར་ལ་གསོལ་བ་འདེབས། །ཞེས་པ་དེ་ཉིད་ཡིན་ནོ། །
|
གནས་བརྟན་ལྡང་མ་ལྷུན་གྲུབ་རྒྱལ་མཚན་ནི།
ཉང་བན་ཆེན་པོ་འོད་དུ་དེངས་ནས་ལོ་བརྒྱ་སོང་པ་
ན། ཉང་མི་དར་མ་དང་དུས་མཚུངས་པར་དབུ་རུ་གཞོལ་མ་དགེ་མཆོག་གི་བུ་རུ་སྐུ་བལྟམས། ངོ་བོ་བཱི་མ་ལའི་སྤྲུལ་
པར་གྲགས་ཀྱང་མཐུན་སྣང་ལ་གནས་བརྟན་དཀྱུས་མའི་ངང་ཚུལ་དུ་བཞུགས། རྡོ་རྗེ་ལེགས་པས་ལུང་བསྟན་ནས་
སྔར་སྦས་པའི་གཏེར་དཔེ་རྣམས་གཏེར་གནས་ནས་སྤྱན་དྲངས། དབས་བློ་གྲོས་དང་འབྲོམ་རིན་ཆེན་འབར་བ་ལས་
འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་མན་ངག་ཟམ་མ་ཆད་པའི་ཚིག་བརྒྱུད་ཀྱང་མཉན་ནས་ཆོས་ཉིད་
ཡིད་དཔྱོད་དུ་མ་ལུས་པར་ཉམས་སུ་བླངས། གཏེར་དཔེ་རྙེད་ནས་ལོ་བཅོ་ལྔ་པ་ལ་བཤད་རྒྱུད་གསུང་བའི་སྣོད་ཚོལ་
དུ་བྱོན་པ་ན་རི་གཟར་རྒོད་པོ་ལུང་དུ་མཇལ། སྣོད་ལྡན་དུ་གཟིགས་ནས་ཁ་རག་ཏུ་གདམས་པ་གསུངས་པའི་དུས་
བྱས། མན་ངག་རྙེད་ནས་ཁ་རག་སྒོམ་ཆུང་ལ་ཁྲིད་བཏབ་སྟེ་བཤད་རྒྱུད་བཞག་པའི་གདམས་པ་རིམ་པ་བདུན་དུ་
བཏབ། ཕྱིས་ཞིག་ལྕེ་བཙུན་གྱིས་འབུལ་བ་ཤིན་ཏུ་མང་པོ་དང་བཅས་བྱོན་པས་སྙེ་ཐང་དུ་ཉང་བཀའ་གདམས་པ་བྱ་
བ་དང་འཕྲད། དེས་ལྡང་མ་ལྷུན་རྒྱལ་སྐུ་གཤེགས་པའི་གཏམ་བཤད་པས། འབུལ་བ་རྣམས་དེ་དང་ཉེ་བར་དགོན་
གནས་གཅིག་འདུག་པའི་དགེ་འདུན་རྣམས་ལ་ཕུལ། ཉང་བཀའ་གདམས་པ་ན་རེ། ལྡང་མ་དེ་གནས་བརྟན་ཡིན་པ་
ཙམ་ལས་གང་ཟག་བཟང་པོར་སྔར་སུས་ཀྱང་མ་ཤེས། སྐུ་གཤེགས་པའི་དུས་ནམ་མཁའ་འཇས་ཁེངས་ཤིང་གདུང་
དང་རིང་བསྲེལ་དཔག་ཏུ་མེད་པ་བྱོན་པས་ཐམས་ཅད་ངོ་མཚར་ཞིང་འགྱོད་པ་སྐྱེས་ནས་གདའ། ཁྱེད་ཀྱང་འབུལ་བ་
འདི་ཙམ་འཁྱེར་ལུགས་ཀྱིས་གདམས་ངག་ཁྱད་པར་ཅན་ཞིག་ཡོད་མཆི་བས་བདག་ལ་སྩོལ་ཅིག་ཞུས། དེ་ཉིད་མན་
ངག་གི་སྣོད་དུ་གཟིགས་ནས་གདམས་པ་བྱིན། དེས་གཞོའི་ཏི་སྒྲོ་བྲག་ལ་ལོ་གཉིས་བསྒོམས་པས་ཕུང་པོ་ལྷག་མེད་
དུ་སོང་ངོ༌། །
|
ལྕེ་བཙུན་སེང་གེ་དབང་ཕྱུག་ནི།
ཡུལ་ཉང་རོ་གཉན་ཚོའི་ལྕེ་ཐུབ་པའི་དབང་པོ་ཞེས་བྱ་བའི་བུ་
གཞོན་ནུ་ནས་ཆོས་མང་པོ་ལ་ཐོས་པའི་ཕ་རོལ་ཏུ་སོན་པ་ཞིག་སྟེ། གནས་བརྟན་ལྡང་མ་བ་དང་རི་གཟར་རྒོད་པོ་
ལུང་དུ་མཇལ་ཏེ་གདམས་པ་རྣམས་རྫོགས་པར་ཐོབ། སློབ་དཔོན་གཤེགས་ནས་གཏེར་དཔེ་རྙིང་པ་རྣམས་ལང་གྲོ་
འཆད་པ་སྟག་འདྲའི་ཆུ་མིག་གི་རྩ་བ་དང༌། འུ་ཡུག་དང༌། ཇལ་གྱི་ཕུ་སྟེ་གཏེར་གནས་གསུམ་དུ་སྦས། འུ་ཡུག་ནས་
ཤངས་མན་ཆོད་ཀྱི་རི་རྒྱུད་རྣམས་ལ་འཕོ་ཞིང་བསྒོམས་པའི་ཚེ། རྨི་ལམ་ན་ཨ་ཙ་ར་གཅིག་བྱུང་ནས། བདག་ནི་བཱི་མ་
མི་ཏྲ་མཁས་པ་སྟེ། །སྐལ་ལྡན་སྙིང་པོའི་ཡང་བཅུད་དོན་འདོད་ན། །མཆིམས་ཕུ་བྲག་དམར་དགེ་གོང་ཡར་འདབས་
ལ། །གསང་བ་སྙིང་ཏིག་སྙིང་དང་འདྲ་བ་ཡོད། །དེ་དག་ཁྱེར་ལ་འོ་ཡུག་ཕྱི་གོང་དུ། །སུས་ཀྱང་མཐོང་བ་མེད་པར་ལོ་
བདུན་སྒོམས། །ཟག་བཅས་ཕུང་པོ་སྣང་བ་མ་ཡིན་ནོ། །ཞེས་གསུངས་པ་ཐོས་ནས་མཆིམས་ཕུར་བྱོན། དེར་བུད་
མེད་དུང་སོ་འཁོར་མ་གཡུའི་སྨིན་མ་ཅན་ཞིག་གིས་དཔེ་རྣམས་བྱིན། སླར་འོ་ཡུག་ཕྱི་གོང་རྫའི་ར་བར་བཞུགས་པས་
བཱི་མ་ལ་དངོས་སུ་བྱོན་ནས་ཟླ་བ་ཕྱེད་དུ་དབང་ཁྲིད་གདམས་པ་དང་བཅས་པ་ཐམས་ཅད་རྫོགས་པར་གནང་སྟེ་རྒྱ་
ནག་ཏུ་གཤེགས་སོ། །དེ་ནས་ལྕེ་བཙུན་གྱིས་ལོ་བདུན་བསྒོམས་པས་ཕུང་པོ་ལྷག་མེད་གྲུབ། སྤྲུལ་པའི་སྐུ་རྒྱལ་བ་
ཞང་སྟོན་དང་མཇལ་བས་གདམས་པའི་སྣོད་དུ་མཁྱེན་ཏེ་མན་ངག་རྫོགས་པར་བྱིན། ལོ་བརྒྱ་དང་ཉི་ཤུ་རྩ་ལྔ་ན་ནམ་
མཁའ་ལ་འཇའ་འོད་ཀྱི་ཕུང་པོ་གཅིག་ཏུ་གཤེགས་སོ། །གཏེར་སྦས་པའི་ལོ་སུམ་ཅུ་ན་རོང་སྣང་མདའ་ནས་ལྕེ་སྒོམ་
ནག་པོས་ཁ་ཤས་བཏོན་ནས་ཉམས་སུ་བླངས་ཤིང་གཞན་མང་པོ་ལའང་བཤད། དེ་བཞིན་དུ་ལང་གྲོ་འཆད་པ་སྟག་
འདྲ་ནས་ཤངས་པ་རས་པ་ཞེས་བྱ་བས་ཀྱང་གཏེར་ནས་བཏོན་ཏེ་དར་རྒྱས་བྱུང་ཞེས་གྲགས་སོ། །
|
སྤྲུལ་སྐུ་རྒྱལ་བ་ཞང་སྟོན་པ་ནི།
ཡུལ་ཡར་འབྲོག་དོ་ནང་དུ་ཡབ་ཞང་སྟོན་དངོས་གྲུབ་དང་ཡུམ་ཞུ་
མོ་ཉ་རེ་ལྕམ་གཉིས་ཀྱི་སྲས་སུ་མེ་མོ་གླང་ལ་སྐུ་འཁྲུངས། བཀྲ་ཤིས་རྡོ་རྗེ་ཞེས་བྱ་བར་མཚན་གསོལ་ཏེ། དགུང་ལོ་
བཅུ་གཅིག་ན་གཙང་རོང་གི་བླ་མ་ལྕེ་སྒོམ་ནག་པོ་དང་མཇལ་ཏེ་རྗེས་སུ་བཟུང་ཞིང་ལོ་གཅིག་གི་བར་དུ་གདམས་པ་
མ་ལུས་པ་གསན། དེ་ནས་ཉི་ཤུ་རྩ་གཅིག་གི་བར་མཁས་གྲུབ་ཀྱི་བླ་མ་མང་དུ་བསྟེན་ནས་སྡེ་སྣོད་གསུམ་དང༌། རྒྱུད་
སྡེ་གསར་རྙིང་གི་ཕྱོགས་ཐམས་ཅད་ལ་སྦྱངས་པས་མཁྱེན་རབ་ཀྱི་པདྨོ་རྒྱས། ཉང་སྟོད་སྣང་ཁུའི་ཡུལ་ན་བཞུགས་
པའི་ཐོ་རེངས་ཁར་ནམ་མཁའ་འོད་ཕུང་འཁྲུགས་པའི་དཀྱིལ་ན་སྔོན་གྱི་བླ་མ་རྣམས་དང༌། དཔའ་བོ་དང་དཔའ་མོ།
ཐུགས་རྗེ་ཆེན་པོ་དང་སྒྲོལ་མ་བཞུགས་པས་ལུང་བསྟན་པ། ཀྱེ་ཀྱེ། ཨེ་མ་ཚེ་གཅིག་གིས་སངས་རྒྱས་པའི་མན་ངག་
རྫོགས་པ་ཆེན་པོ་གསང་བ་བླ་ན་མེད་པའི་སྐོར་བྲག་སེང་གེ་དང་འདྲ་བ་ལ་ཡོད་ཀྱི་གཏེར་ནས་ཐོན་ལ་སེམས་ཅན་
དཔག་ཏུ་མེད་པའི་དོན་གྱིས་ཤིག།ཅེས་གསུངས་ནས་མི་སྣང་བར་གྱུར་ཏོ། །ཡང་རེ་ཞིག་ན་རྡོ་རྗེ་ལེགས་པ་མི་
དཀར་ཞཱ་དཀར་ཅན་དུ་བྱས་པས་དངོས་གྲུབ་སྦྱིན་གྱིས་འདོང་ཟེར་ནས་ཁྲིད། ཉང་སྨད་པ་ཚབ་ཏུ་སླེབས་ཚེ་དེར་ལྷསྔ་
གསོལ་བ་མང་པོས་བཟའ་བཏུང་བྱིན་པ་དངོས་གྲུབ་དེ་ལ་ཟེར་རམ་སྙམ་ནས་གཟིམས་པའི་ཐོ་རངས། མི་དཀར་དེབྱུང་
ནས་དངོས་གྲུབ་གཞན་དུ་ཡོད་ཀྱི་འདོང་ཟེར་ནས་འོད་ཀྱིས་ལམ་སྣ་བྱས་པ་ལྟར་བྱོན། ནུབ་མོ་ཁང་སྟོང་ཞིག་ཏུ་
ཉལ་བས་ཁོ་ན་རེ་འདིར་མ་སྡོད་ད་ལྟ་འདོང་ཟེར་ཙ་ན་སྒོར་ཐོན་མ་ཐག་ཁང་སྟོང་དེ་འགྱེལ་ལོ། །དེ་ནུབ་ཆར་ཆེན་པོབྱུང་
ནས་བྲག་ཁུང་ཞིག་ཏུ་བསྡད་པས་དམ་ཅན་གྱི་སྤྲུལ་པས་བཟའ་བཏུང་མང་པོ་ཁྱེར་བྱུང༌། ནངས་པར་རྭ་ལག་
ཚུགས་བརྒལ་ནས་འོ་ཡུག་མདའ་ན་མར་ཕྱིན་པས་འཁྲུགས་པ་ཡོད་ཀྱང་རྡོ་རྗེ་ལེགས་པས་བསྒྲིབས་ནས་དམག་གིས་
མ་མཐོང༌། དེ་ནས་བྲག་སེང་གེ་འདྲ་བའི་རྩེར་སླེབས་པ་ན་ཁོ་གར་སོང་ཆ་མེད་དུ་མི་སྣང་བར་གྱུར། ཕྱིར་ལོག་གོ་
སྙམ་ན་ཡང་མ་ཐར། ཆ་མ་ཕྱེད་པའི་ངང་ལས་བལྟས་ཙ་ན་བྲག་ཕུག་ཁ་བྱང་བསྟན་གྱི་སྒོ་རྩྭས་འགགས་པ་ཞིག་
མཐོང༌། དེ་བྲུས་པས་བྲག་ཕུག་གི་ནང་ན་དཀྱིལ་འཁོར་ཞིག་འདུག་པ་བསྔོགས་པས། སྦྲུལ་དང་སྦལ་པ་མང་པོ་ཤིག་
གེ་བྱུང་བས་བསལ་ཏེ་བལྟས་པས་གཏེར་གྱི་ཁ་བྱང་བརྒྱ་རྩ་རྙེད་ནས་གཟིགས་དུས་ས་རུབ་པས་མི་དཀར་པོ་དེས་
མར་མེ་དང་བཟའ་བཏུང་ཁྱེར་ནས་བྱུང༌། དར་ཅིག་ན་གདངས་དང་སྐད་ཤིན་ཏུ་མི་སྲུན་པ་ཞིག་བྱུང༌། ཁོས་བརྡའ་
སྦྱར་བས། ངས་ཨ་ཅེས་འབོད་ཀྱི་ཟེར་བའི་མོད། ཨེ་ཀ་ཛ་ཊི་སྤྱན་གཅིག་ཁྲག་ཏུ་ཁོལ་བ། མཆེ་བ་གཙིགས་ཤིང་
བལྟར་མི་བཟོད་པ་ཙམ་དུ་བྱུང༌། དེ་ན་རེ། ང་ནི་ཨེ་ཀ་ཙ་ཊི་ཡིན། །ཚོགས་འཁོར་བརྒྱ་དང་རྩ་བརྒྱད་ཐོང༌། །ལོ་
གསུམ་སུ་ལ་མ་བཤད་སྡོམས། །གསུངས་ནས་བཞུད་དོ། །བྲག་ཕུག་གི་སྒོ་འགྲམ་ནས་གཡུ་གཉིས་རྙེད་པ་ལས་
གཅིག་གིས་ཤ་བུབས་གཅིག་ཉོས། གཅིག་གིས་ནས་ཁལ་གསུམ་ཉོས་ནས་ཚོགས་བརྒྱ་རྩ་བརྒྱད་བྱས། གཏེར་
རྣམས་རིམ་པར་བཏོན་ཏེ་ཉང་སྟག་རྫོང་དུ་ཤག་མོ་དཀར་མཚོས་སྦྱིན་བདག་བྱས་ནས་དཔེ་རྣམས་ཚང་བར་བྲིས་ནས་
ལོ་གསུམ་གསང་མ་ཐུབ་གསུངས་སོ། །དགུང་ལོ་ཉི་ཤུ་རྩ་ལྔ་པར་དབུས་སུ་བྱོན་པས་མཆིམས་ཕུ་ནས་བཱི་མ་ལའི་
ཆོས་གཏེར་ཡང་སྤྱན་དྲངས། དེ་དུས་བཱི་མ་དངོས་དང་ཞལ་མཇལ་ནས་རྗེས་གནང་ཀྱང་ཐོབ་བོ། །སླར་ཤངས་རྟ་
ནག་ཏུ་བྱོན་པའི་ཟམ་ཁར་ལྕེ་བཙུན་ཆེན་པོ་དང་མཇལ་ཏེ་གསང་བ་སྙིང་ཐིག་གི་གདམས་པ་རྫོགས་པར་གནང་ནས་
གཞན་དོན་གྱིས་ཤིག་པའི་རྗེས་གནང་བྱིན་ནས་མི་སྣང་བར་གཤེགས། དེ་ནས་དགུང་ལོ་དྲུག་ཅུ་རྩ་གཅིག་བཞེས་
དུས་རྒྱལ་མོ་གཡང་ཁབ་ཏུ་བཞེས་ནས་འགྲོ་དོན་མཛད་པ་ལས་རྒྱུད་འཛིན་གྱི་སླད་དུ་སྲས་ཉི་མ་འབུམ་འཁྲུངས།
ངས་ཚོགས་པ་མ་བསྐྱངས་ན་ཕུང་པོ་ལྷག་མེད་འོང་བ་ཡིན་གསུངས། ལུས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་ལ་
དབང་ཐོབ་པས་རེས་འགའ་རྒྱལ་བ་རིགས་ལྔར་གསལ་བ་དང་གྲིབ་མའང་གཏན་ནས་མི་མངའ། རྫོགས་པ་ཆེན་
པོའི་ཆོས་གསུངས་དུས་འཇའ་གུར་འཁྱིལ་བ་སོགས་ངོ་མཚར་གྱི་ལྟས་མང༌། དགུང་ལོ་བདུན་ཅུ་དོན་གཅིག་པ་མེ་མོ་
ཕག་གི་ལོ་ས་ག་ཟླ་བའི་ཉེར་གཉིས་ལ་ཤར་ཕྱོགས་ཀྱི་ནམ་མཁའ་ལས་སྒྲ་ཆེན་པོ་ལན་བདུན་གྲགས་ཤིང༌། ས་ལན་
གསུམ་གཡོས། འཇའ་དང༌། འོད་དང༌། སིལ་སྙན་གྱི་སྒྲ་དང༌། དྲི་ཞིམ་གྱི་ངད་ལ་སོགས་པ་གདོད་མའི་ས་ལ་མངོན་
པར་བྱང་ཆུབ་པའི་རྟགས་མ་ལུས་པ་བསྟན་ཏེ་གཤེགས། དེའི་ཕྱི་ནུབ་པུར་སྦྱངས་པས་གདུང་ཆེན་ལྔ་དང་རིང་བསྲེལ་
ཁ་དོག་ལྔ་པ་སྐུ་ལྔའི་རྒྱལ་ཚབ་ཏུ་བཞགམེ་ཏོག་གི་ཆར་དང་འཇའི་གུར་ལ་སོགས་པས་འགྲོ་བ་མང་པོ་དད་པའི་
གནས་ལ་སྦྱར་ཞིང་རང་བཞིན་གྱིས་བསམ་གཏན་ལ་གནས་པ་བྱུང་ངོ༌། །
|
མཁས་པ་གུ་རུ་ཉི་འབུམ་ནི།
ཡབ་རྒྱལ་བ་ཞང་སྟོན་ཆེན་པོ་དང་ཡུམ་རྒྱལ་མོ་གཡང་གཉིས་ཀྱིསྲས་
སུ་སྐུ་འཁྲུངས་ཤིང༌། ལྷུམས་སུ་ཞུགས་དུས་ཡུམ་གྱི་རྨི་ལམ་དུ་ཉི་མ་མང་པོ་དུས་གཅིག་ལ་ཤར་བ་རྨིས་པ་ཡབ་
ལ་ཞུས་པས། ཡབ་ཀྱི་ཞལ་ནས། གསང་བ་བླ་ན་མེད་པའི་དོན་བྱེད་ཅིང་སེམས་ཅན་དཔག་ཏུ་མེད་པའི་མ་རིག་པའི་
མུན་པ་སེལ་བའི་རྟགས་ཡིན་གསུངས་ཏེ་ཉི་མ་འབུམ་ཞེས་བྱ་བར་མཚན་གསོལ། དེ་ནས་དགུང་ལོ་ལྔ་ནས་རིམ་པར་
ཡབ་ལས་གསང་བ་སྙིང་ཏིག་གི་དབང་ཁྲིད་གདམས་པ་དང་བཅས་ལྷག་མེད་བུམ་པ་གང་བྱོའི་ཚུལ་དུ་རྫོགས་པར་
མཛད། དགུང་ལོ་བཅུ་པར་རྒྱུད་བཅུ་བདུན་ལ་བཤད་པ་མཛད་པས་བུ་སློབ་ཀུན་ངོ་མཚར་སྐྱེ་བ་བྱུང༌། ལོ་ཉི་ཤུའི་
བར་དུ་སྒྲུབ་པ་ཁོ་ན་ལ་ནན་ཏན་མཛད། དེ་ནས་རྗེས་ཐོབ་སྒྱུ་མ་ལྟ་བུའི་ཏིང་འཛིན་དང་འགྲོགས་ནས་རྔོག་རྒྱལ་རྩེའི་
སར་གསར་མའི་རྒྱུད་མན་ངག་དང་བཅས་པ་ལ་གསན་པ་མཛད། ཉི་ཤུ་རྩ་གཉིས་པ་ལ་ཇོ་མོ་རྒྱ་གར་དངོས་གྲུབ་ཀྱིརྟེན་
དུ་བཟུང༌། ཉི་ཤུ་རྩ་བདུན་པ་ལ་ས་སྐྱའི་འཁོན་གྲགས་པ་རྒྱལ་མཚན་དང༌། བླ་མ་སྟག་སོ་བ་བསྟེན་ནས་རྒྱུད་
གསུམ་གདམས་ངག་དང་བཅས་པ་དང༌། བདེ་མཆོག་མལ་གྱོའི་ལུགས་མཁྱེན་པར་མཛད། སུམ་ཅུ་ལ་ཁ་རག་གི་
འབྲུག་སྟོན་གྲགས་པ་ལས་བདེ་མཆོག་དང༌། རྗེ་བཙུན་མ་རྭ་ལུགས། ཡེ་ཤེས་མགོན་པོ་སོགས་ཚལ་པའི་ཆོས་སྐོར་
ཞུས་ཤིང༌། ཞང་གཡུ་བྲག་པ་དང༌། གཞུང་གི་རྔོག་རྡོ་རྗེ་སེང་གེ་ལ་སོགས་ཏེ་མཁས་གྲུབ་ཀྱི་བླ་མ་མང་པོ་བསྟེན་ནས་
མདོ་རྒྱུད་དུ་མ་ལ་ཐོས་བསམ་ཕྱོགས་མེད་དུ་མཛད། ཚིག་དོན་ཆེན་མོ་ཞེས་བྱ་བའི་བསྟན་བཅོས་ཀྱང་མཛད། དགུང་
ལོ་ལྔ་བཅུ་རྩ་དྲུག་གི་ཆོ་འཕྲུལ་ཟླ་བའི་ཚེས་བརྒྱད་ཀྱི་ཉིན་ཉི་མ་རྩེ་ཤར་ལ་སྐུ་གཤེགས་ནས་པུར་སྦྱངས་པས་གདུང་
རིགས་ལྔ་བྱོན། འཇའ་ཚོན་གྱི་གུར་ཕུབ། ཆོ་འཕྲུལ་ཟླ་བ་ལ་ཨུག་ཆོས་མེ་ཏོག་སྐྱེས་པ་སོགས་བྱུང་ངོ༌། །སློབ་དཔོན་འདི་སྒྲ་ཐལ་འགྱུར་ནས་ཕྱག་རྡོར་གྱི་སྤྲུལ་པ་བཛྲ་ཕ་ལར་ལུང་བསྟན་པ་ལ་ངོས་འཛིན་པར་གྲགས་སོ། །
|
ཆོས་བདག་གུ་རུ་ཇོ་འབེར་ནི།
ཡབ་མཁས་པ་ཉི་འབུམ་གྱི་གཅུང་པོ་ཟླ་བ་འབུམ་དང༌། ཡུམ་རྒྱ་མོཨུ་
ལུ་གཉིས་ཀྱི་སྲས་སུ་འཁྲུངས་ཏེ། ལོ་བདུན་མན་ཆོད་ལྐུག་པ་འདྲ་བར་ཡོད་པ་ལ་བརྒྱད་ནས་ཤེས་རབ་མེ་ལྟར་
འབར། བཅོ་བརྒྱད་ཀྱི་བར་དུ་ཁུ་བོ་མཁས་གྲུབ་ཆེན་པོ་གུ་རུ་ཉི་འབུམ་ལས་གསང་བ་བླ་མེད་ཀྱི་དབང་ཁྲིད་གདམས་
པ་དང་བཅས་རྫོགས་པར་མཛད་ཅིང༌། རྒྱུད་ཀྱི་བཤད་པ་ལ་ཐོས་པས་སྒྲོ་འདོགས་བཅད་པ་དང༌། མན་ངག་གི་དོན་
ལ་སྒོམ་པས་ཉམས་སུ་བླངས། བཅུ་དགུ་ནས་ཉི་ཤུའི་བར་ས་སྐྱ་ལོ་ཙྭ་བ་ལས་རྒྱུད་གསུམ་མན་ངག་དང་བཅས་པ་
དང༌། བདེ་མཆོག་མལ་གྱོ་ལུགས་གསན་ཅིང་མཁྱེན་པར་མཛད་ནས། དབུ་ཚད་ལ་སོགས་པའི་རིགས་པའང་ཁོང་དུ་
ཆུད་པར་བྱས། ཉེར་གཉིས་ལ་ཁྲོ་ཕུ་ལོ་ཙཱ་བ་ལས་མི་ཏྲ་ཛོ་ཀིའི་གདམས་པ་དང༌། ཆུ་མིག་པ་ལས་ཚད་མ་བསྡུས་པ།
བལ་པོ་གྲགས་འབུམ་ལས་དོ་ཧ་དང་ཕྱག་ཆེན་ཁ་འཐོར་སོགས་མཁས་གྲུབ་དུ་མ་ལས་སྡེ་སྣོད་གསུམ་དང་རྒྱུད་ལུང་
མང་པོ་ལོ་སུམ་ཅུ་རྩ་དྲུག་ཚུན་ཉན་པས་མཁྱེན་པ་ཆེ་ཞིང་ཐོས་པ་ཤིན་ཏུ་མང་བར་གྲགས། སྒྲུབ་པ་མཛད་ཚེ་ཡི་དམ་
གྱི་ལྷ་མང་པོས་ཞལ་མཐོང་ཡང་ཐུགས་སྒམ་པས་མི་གསུངས། ལྷ་སར་ཇོ་བོ་ལ་མཆོད་པ་ཕུལ་སྐབས་འོད་ཀྱི་ཐིག་
ལེའི་ཁོང་ནས་འཕགས་པ་ལག་ན་པདྨ་དང་རྡོ་རྗེ་འཛིན་པས་ཞལ་གཟིགས། ཐོ་རངས་ཞིག་ལ་ཚེ་དཔག་མེད་ཀྱི་ཞལ་
མཐོང་བས་ངེད་ཅག་ལ་ཚེ་རིང་བའི་རིགས་མེད་ཀྱང་ཁོ་བོ་རིང་དུ་འཚོ་བ་དེའི་བྱིན་རླབས་ཡིན་གསུངས། དེ་ལྟར་
ཚད་མེད་པའི་མཁྱེན་རབ་དང་ཐུགས་རྗེའི་མངའ་བདག་འགྲོ་བ་འདྲེན་པའི་དེད་དཔོན་དུ་གྱུར་ནས་དྲུག་ཅུ་པ་ཡོས་ལོ་
སྟོན་ཟླ་ར་བའི་ཉ་ལ་སྐུ་གཤེགས། ཞག་བདུན་དུ་འཇའི་དྲྭ་བས་འབྲེལ་ཞིང་སྐུ་གདུང་ལ་ཨོཾ་ཨཱཿཧཱུྃ་གི་ཡིག་འབྲུ་དང་རིང་བསྲེལ་མང་པོ་བྱོན་ཏོ། །
|
འཁྲུལ་ཞིག་སེང་གེ་རྒྱབ་པ་ནི།
གཡོ་རུ་གྲའི་ཕུ་སོ་གད་ཕྲེང་གི་གྲོང་དུ་ཡབ་བཀྲ་ཤིས་དངོས་གྲུབ་
དང། ཡུམ་དཔལ་ལེགས་གཉིས་ཀྱི་སྲས་སུ་ཉི་མ་རྩེ་ཤར་ལ་འཇའི་གུར་ཕུབ་ཅིང་འཁྲུངས། ལོ་དགུ་ནས་རིགས་སད་
དེ་དག་སྣང་དང་མོས་གུས་དཔག་མེད་ཤར། བཅུ་པའི་ཚེ་སྣང་བ་འདི་རྨི་ལམ་ལྟ་བུ་ལ་སྲ་ཞིང་འཐས་འཐས་འདྲ་བ་མི་
བདེན་སྙམ་པ་དང༌། བཅུ་གཉིས་པ་ལ་འཁོར་བ་ལ་སྐྱོ་བ་ཚད་མེད་པ་སྐྱེས་ཏེ་ཆོས་འབའ་ཞིག་ལས་གང་ལ་ཡང་སྙིང་
པོ་མེད་པའི་ངེས་ཤེས་རྙེད། བཅུ་གསུམ་གྱི་ཐོ་རངས་ཉི་ཟླ་དུས་གཅིག་ལ་ཤར་བའི་རྨི་ལམ་སད་དུས་འཕགས་པ་
ཐུགས་རྗེ་ཆེན་པོའི་ཞལ་མཐོང་སྟེ་ཚེ་གཅིག་གིས་གྲོལ་བ་སྙིང་ཏིག་གི་དོན་སྒོམས་ཤིག་གསུངས། དེ་ནས་བཟུང་སྙིང་
རྗེ་ཕྱོགས་མེད་དུ་རྒྱས། འགྲོ་བ་ཀུན་ལ་མ་གཅིག་པའི་བུའི་འདུ་ཤེས་ཤར། རྐྱེན་དེ་ལ་བརྟེན་ནས་གཞན་ལ་མཐོ་
འགྲོགས་དང་ཁྱད་གསོད་མི་བྱེད་པའི་དམ་བཅའ་བྱས། ལུས་ཀྱི་སྲིན་བུ་རྣམས་ཀྱང་སྙིང་རྗེ་ཆེན་པོས་མི་འདོར་ཞིང་
ལོང་སྤྲང་དང་དམན་པ་ཁོ་ན་ལ་བྱམས་པ་སོགས་ཐེག་པ་ཆེན་པོའི་རིགས་སད་པའི་རྟགས་ཁྱད་པར་ཅན་མངའ།
བཅོ་བརྒྱད་ལ་སྣང་བ་བདེན་མེད་དུ་རྟོགས་པས་སྨྱོན་པ་ཁྲོག་ལངས་པ་ལྟ་བུར་སོང་སྟེ། ཕ་མེས་ནས་ལྷ་གསོལ་
ཡོ་བྱད་བསགས་པ་གཏོར་ཞིང༌། ཕོ་གདོན་རྒྱལ་པོ་མཆོད། མོ་གདོན་སྲིན་མོ་མཆོད། ཅེས་བྱས་པས། ཁྱོད་འདྲ་བའི་
བུ་སྐྱེ་བ་ཟེར་ནས་འཐབས། ཉི་ཤུ་ལ་མཁན་པོ་ལྡེའུ་སྒང་པ་དང༌། སློབ་དཔོན་བཀྲ་ཤིས་སྒང་པ་ལས་རབ་ཏུ་བྱུང་སྟེ་
འདུལ་བ་ལ་ཐོས་བསམ་མཛད། ཉི་ཤུ་རྩ་ལྔ་ལོན་ཚེ་སྲིན་ཞལ་གྱི་སེང་གེ་རྒྱབ་ཏུ་བྱོན། སེང་གེ་རྒྱབ་པ་བར་པ་ལས་
ཚལ་པའི་ཆོས་སྐོར་གསན། བླ་མ་ཙ་རི་བ་ལས་སེང་གེ་མཇིང་བསྣོལ། དེ་བཞིན་རས་པ་དྲི་མེད་འོད། ལྷ་རི་དཔལ།
གཞོན་ནུ་འབུམ། སྟོན་འཆར་བྱང་ཡོན། ཇོ་སྲས་སུ་གྲགས་པ་རྣམས་ལས་གསང་སྔགས་གསར་རྙིང༌། ཞི་བྱེད་གཅོད་
ཡུལ་ཕྱག་ཆེན་བཅས་དམ་ཆོས་མང་དུ་ཉན། ཁྱད་པར་ཐུགས་རྗེ་ཆེན་པོས་ལུང་བསྟན་པ་བཞིན་ཆོས་བདག་གུ་རུ་ཇོ་
འབེར་ལས་རྫོགས་པ་ཆེན་པོ་གསན་པས་རྟོགས་པ་ཐོད་རྒལ་དུ་སྐྱེས། གྲོ་བོ་ལུང་ལ་སོགས་པའི་རི་ཁྲོད་དང་ལུང་
སྟོང་རྣམས་སུ་ལོ་མང་པོའི་བར་དུ་སྒྲུབ་པ་ཁོ་ན་ལ་གཞོལ་བས་དགོངས་པ་ཀ་དག་གི་སར་གཤེགས། སྐལ་ལྡན་མང་
པོ་སྨིན་གྲོལ་ལ་བཀོད་ནས་དྲུག་ཅུ་རྩ་བཞི་པ་ལ་ཐེག་པ་མཆོག་གི་འབྲས་བུ་ཐོབ་པའི་རྟགས་ཁྱད་པར་བ་རྣམས་
མངོན་དུ་བསྟན་ནས་གཤེགས་སོ། །
|
གྲུབ་ཆེན་མེ་ལོང་རྡོ་རྗེ་ནི།
སྒྲགས་ཀྱི་ཕུར་ཡབ་བསམ་ཡས་རྣལ་འབྱོར་པ་དང་ཡུམ་འབར་མ་
གཉིས་ཀྱི་སྲས་སུ་སྐུ་འཁྲུངས། དགུང་གྲངས་དགུ་ན་གྲུབ་ཐོབ་ཟ་ལུང་པ་དང་མཁན་པོ་སེ་ལུང་པ་ལས་རབ་ཏུ་བྱུང༌།
དེའི་དུས་གཤིན་པོའི་དགེ་རྩར་ཡུམ་རྒྱས་འབྲིང་བསྡུས་གསུམ་ཁོ་ན་སྒྲོགས་པས་ལོ་བཅུ་དྲུག་གི་དུས་སྒྲགས་ཀྱི་ཕུའི་
ཞོགས་སྟེང་བྱ་བར་བརྒྱད་སྟོང་བརྒྱ་རྩ་མཛད་པས་གནས་ལུགས་ཀྱི་དོན་རྟོགས། ཟངས་མཚོར་སྒོམ་པ་ཡུན་རིང་
མཛད་པས་ཉམས་རྟོགས་འབར་ཞིང་མངོན་ཤེས་ཕྲ་མོའང་ཤར། དེ་ནས་ཕྱོགས་མེད་རྒྱལ་ཁམས་འགྲིམས་ཏེ་མཚུར་
ཕུའི་དོ་བོ་རས་པ་སོགས་བླ་མ་མང་པོ་བསྟེན། ཤ་འུག་སྟག་སྒོ་དང་མཁར་ཆུ་ལ་སོགས་པའི་གནས་ཆེན་མང་པོར་
བྱོན། ནས་བྲེ་གང་གིས་ཟླ་བ་གཅིག་དང་ཞག་ཉི་ཤུའི་འཚོ་བ་བྱས་པ་སོགས་དཀའ་བ་སྤྱད་པའང་བསམ་གྱིས་མིཁྱབ།
བཅོ་བརྒྱད་པའི་ཚེ་སེང་གེ་རྒྱབ་པ་སངས་རྒྱས་དབོན་པོ་མཇལ་ནས་མན་ངག་སྙིང་ཏིག་ཐོབ། ད་མན་ངག་
གིས་འཚེངས་བསམས་པའི་སྤོབས་པ་སྐྱེས་ཏེ་བསྒོམས་པས་སྔོན་འགྲོའི་དུས་རང་ནས་ཞག་དྲུག་ཏུ་རྡོ་རྗེ་སེམས་
དཔའི་ཞལ་ཉིན་མཚན་མེད་པར་མཇལ། དངོས་གཞིའི་དུས་བརྒྱུད་པའི་བླ་མ་རྣམས་རྨི་ལམ་དུ་མཇལ་ནས་བྱིན་གྱིས་
བརླབས། ཉི་ཤུ་རྩ་གསུམ་པར་སངས་རྒྱས་རས་པ་ལས་རྡོ་རྗེ་ཕག་མོ་ལ་སོགས་པའི་གཏེར་ཆོས་དུ་མ་གསན་ནས་
བསྒྲུབས་པས་རྡོ་རྗེ་ཕག་མོ་མངོན་སུམ་དུ་མཇལ། བྲག་ལ་གསང་རྡོར་བསྣུན་པས་ཐིམ་གྱིས་སོང༌། རྟ་མགྲིན། སྒྲོལ་
མ། སྤྱན་རས་གཟིགས། སློབ་དཔོན་ཆེན་པོ། ཀུན་ཏུ་བཟང་པོ། རྡོ་རྗེ་སེམས་དཔའ། བཱི་མ་ལ། ཟ་ལུང་པ། སངས་
རྒྱས་རས་པ། འགྲོ་མགོན་ཕག་གྲུ་རྣམས་ཀྱིས་ཞལ་གཟིགས། དུང་ལུང་དུ་མཁའ་འགྲོའི་སྒྲ་ཤིན་ཏུ་སྙན་པས་སྐྱེ་རྒྱུན་
ཆོད་པའི་ལུང་བསྟན་ཐོབ། ཀ་བ་ཅན་དུ་ཕག་མོ་དམར་མོ་དང་གྲུབ་ཐོབ་ཟ་ལུང་པ་ནམ་མཁའི་ཀློང་ནས་མཇལ།
ངར་ཆུང་ན་བཞུགས་པའི་ཚེ་རྨི་ལམ་དུ་ཕག་མོ་གཙོ་འཁོར་ལྔ་མཐོང་དེར་མནལ་སད་ཙ་ན་འོད་ཀྱི་ཕག་མོ་དངོས་སུ་
གཟིགས། སྐྱབས་གནས་རྫོང་དུ་རྡོ་རྗེ་སེམས་དཔས་རྨི་ལམ་དུ་རྫོགས་པ་ཆེན་པོའི་དབང་བསྐུར། སྤྱིར་བླ་མ་མང་པོ་
བསྟེན་ཅིང་ཁྱད་འཕགས་ཀྱི་བླ་མ་བཅུ་གསུམ་བཞུགས། བཀའ་དྲིན་འགྲན་ཟླ་བྲལ་བ་གྲུབ་ཐོབ་ཟ་ལུང་པ། མཚུར་
ཕུའི་དོ་བོ་རས་པ། འཁྲུལ་ཞིག་སེང་གེ་རྒྱབ་པ་གསུམ་ལས་སྙིང་པོའི་དོན་རྙེད། འདི་བརྟུལ་ཞུགས་ཞིག་པོའི་སྤྱོད་པ་
བླང་དོར་མེད་པས་གསང་བ་སྔགས་ཀྱི་དམ་ཚིག་ལ་སྒྲ་ཇི་བཞིན་པར་སྤྱོད་ནུས། རྒོད་ཕྲུག་ནམ་མཁའ་ལ་ལྡིང་བ་
མཐོང་བས་རིག་པ་བརྟུལ་ཞུགས་ཀྱི་ངར་ཐོགས་ནས་ནམ་མཁའི་ལམ་ལ་འགྲོ་བ་དང༌། བྲག་ལ་འདམ་ལྟར་བྱེད་པ་
བྱུང༌། ལྷོ་མཁན་པ་ལྗོངས་དང༌། མཁན་པ་གླིང་དང༌། སེང་གེ་རྫོང་དང༌། མཁར་ཆུ་རྣམས་སུ་སྒྲུབ་པའི་རྒྱལ་མཚན་
བཙུགས་ཤིང་སྐལ་ལྡན་དུ་མ་སྨིན་གྲོལ་ལ་བཀོད་དོ། །ཚེ་ཚད་སུམ་ཅུ་རྩ་བདུན་ཡིན་པ་ལ། སློབ་དཔོན་ཀུན་དགའ་
ཞེས་པའི་སྐལ་ལྡན་ཞིག་གིས་གསོལ་བ་ཐེབས་པས་དགུང་ལོ་དྲུག་ཅུ་རྩ་གཅིག་བར་བཞུགས། དེ་ནས་དུར་ཁྲོད་ལ་
བར་དུ་སྐུ་གཤེགས་པའི་ཚེ་འོད་ཆེན་པོ་སྒྲ་དང་བཅས་པ་ནུབ་ཕྱོགས་སུ་ཡལ་བ་ཀུན་ཀྱིས་མཐོང༌། པུར་སྦྱང་དུས་
ནམ་མཁའི་ལམ་ནས་པུར་ཁང་ལ་འོད་ལྔའི་སྣམ་བུ་བརྐྱངས་པ་སོགས་ངོ་མཚར་བའི་ལྟས་དཔག་ཏུ་མེད་པ་བྱུང་ཞིང༌།
སྐུ་ལྔ་ཐོབ་པའི་རྟགས་སུ་གདུང་ཡང་ཤ་རི་རཱཾ་སོགས་རྒྱུད་ལས་ཇི་སྐད་བཤད་པ་བཞིན་བྱོན་ཏོ། །སློབ་དཔོན་འདི་ལ་
ཟབ་ཆོས་མེ་ལོང་སྙིང་ཐིག་ཏུ་གྲགས་པ་གཏེར་ཁ་ངོ་མཚར་ཅན་བབ་པ་དེང་སང་འབྲུག་ཏུ་དཔེ་རྒྱུན་ཙམ་ཡོད་པར་
གྲགས་སོ། །
|
རིག་འཛིན་ཀུ་མཱ་རཱ་ཛ་ནི།
གཡོ་རུ་འོན་བར་གསར་རྫིང་ཁ་ཞེས་བྱ་བའི་གྲོང་རྡལ་དུ་ཡབ་ཇོ་སྲས་
བསོད་ནམས་དཔལ་དང༌། ཡུམ་ཁྱེར་ཚ་འབུམ་མེ་བྱ་བའི་སྲས་སུ་མེ་ཕོ་སྟག་ལ་སྐུ་འཁྲུངས། སྐྱ་མིང་ཐར་པ་རྒྱན་དུ་
བཏགས། ཆུང་ངུ་ནས་དད་པ་དང་སྙིང་རྗེ་ཤེས་རབ་ལ་སོགས་ཏེ་འཕགས་པའི་ནོར་གྱི་ཁྱད་ཆོས་མང་པོ་མངའ་བས་
ཀློག་ཡིག་མ་བསླབས་པར་མཁྱེན། ལོ་བདུན་པ་ལ་ཀོང་པོ་འོར་ཤོད་མཐོ་སྟེངས་དགོན་པའི་བླ་མ་དགྱེས་རྡོར་པ་
ལས་ཀྱེ་རྡོ་རྗེ་དང་བདེ་མཆོག་གི་དབང་ཞུས། ལོ་དགུ་པའི་ཚེ་མཁན་པོ་གཙང་པ་ལས་ཡོངས་རྫོགས་ཀྱི་དགེ་བསྙེན་
བླངས། སྤྱན་རས་གཟིགས་འཁོར་བ་དོང་སྤྲུགས་ཀྱི་ཆོས་སྐོར་ལ་སྦྱངས། བཅུ་གཉིས་པ་ལ་ཕག་མོ་གྲུའི་མཁན་པོ་
ཡེར་བ་པ་དང་སློབ་དཔོན་མངའ་རིས་པ་ལས་རབ་ཏུ་བྱུང༌། མཚན་གཞོན་ནུ་རྒྱལ་པོར་བཏགས་ཤིང་འདུལ་
བསླབ་པ་ལ་ཕྱག་ལེན་ཞིབ། རིན་པོ་ཆེ་གྲགས་ཡེ་ལས་ལོ་ལྔའི་བར་དུ་ནཱ་རོ་ཆོས་དྲུག་ལ་སོགས་པ་དང༌། མཚར་
སྟེངས་པ་ལས་བརྟག་གཉིས་གསན། དབོན་སངས་ཤེ་ལས་བཟོའི་རིག་པ་བསླབ། ཡི་གེ་དྲུག་པ་བཟླས་པས་ཤེལ་
གྱི་ཁང་བུ་གཅིག་ན་ཐུགས་རྗེ་ཆེན་པོ་ཞལ་འཛུམ་པ་མཐོང༌། ཁྱུང་ནག་ཤག་དར་ལས་རྙིང་མའི་རྒྱུད་ལུང་མན་ངག་
མང་དུ་ཞུས། ངར་ཕུག་ཏུ་མེ་ལོང་རྡོ་རྗེ་དང་མཇལ་ཏེ་ཕྱག་རྒྱ་ཆེན་པོའི་ཁྲིད་ཞུས་པས་སེམས་ངོ་ཅེར་མཐོང་དུ་ངོ་
འཕྲོད། དེ་ནས་གྲུབ་ཆེན་མོན་གྱི་མཁའ་འགྲོའི་གླིང་ལ་གཤེགས་པའི་སར་ཕྱག་ཕྱིར་བྱོན། རྡོ་རྗེ་ཕག་མོའི་ཆོས་སྐོར་
སོགས་ཞུས་ནས་བསྙེན་པ་མཛད་པས་ཚེས་བཅུའི་ནུབ་གཅིག་ཨོ་རྒྱན་པདྨ་དང་མཇལ། ཨེ་མ་རིགས་ཀྱི་བུ། རྟག་ཏུ་
ཆོས་གྱིས་ཤིག་གསུངས། མཚུར་ཕུར་བྱོན་ནས་གཉན་རས་དང་དར་མ་མགོན་པོ་ལས་ཀརྨ་པའི་ཆོས་སྐོར་ཞུས། ལ་
སྟོད་དིང་རི་དང་སྤུ་རང་དུ་བྱོན་པས། གྲུབ་ཆེན་ཨོ་རྒྱན་པ་དང༌། རྗེ་ཀརྨ་པ་རང་བྱུང་རྡོ་རྗེ་དགུང་ལོ་བདུན་པ་རབ་ཏུ་
བྱུང་མ་ཐག་པ་དང་མཇལ། ཨོ་རྒྱན་པ་ལས་གདམས་པ་མང་དུ་མནོས། རྒྱ་སྨན་པ་ནམ་མཁའ་རྡོ་རྗེ་ལས་གསང་སྐོར་
གནད་ཀྱི་ངོ་སྤྲོད་དང༌། སྐལ་ལྡན་པ་ཆོས་ཀྱི་སེདྒེ་ལས་གསང་བ་གནད་ཀྱི་མེ་ལོང་སོགས་རྫོགས་ཆེན་གསང་བའི་
སྐོར་ཞུས། སླར་མཁར་ཆུར་གྲུབ་ཆེན་མེ་ལོང་རྡོ་རྗེ་ལས་གསང་བ་སྙིང་ཏིག་དབང་ཁྲིད་གདམས་པ་དང་བཅས་པ་
ལེགས་པར་ཐོབ། འབུལ་རྒྱུ་གཞན་མེད་པས་ལུས་ངག་གི་ཞབས་ཏོག་དང༌། དབྱར་རིལ་པོ་གཉིས་སུ་རི་མོ་མཛད་
ནས་ཁལ་བཞི་བཞི་གནང་བའི་གཉིས་གཉིས་ཀྱིས་ཤོག་བུ་ཉོས། མཚན་མོ་དཔེ་རྣམས་བྲིས། ཕྱེད་པོས་མར་མེ་དང་
གསོལ་བ་མཛད་པའི་དཀའ་ཐུབ་ཀྱི་མཐུས་ཤིག་ནད་དྲག་པོ་ཞིག་བྱུང༌། ཐུགས་དམ་ཡང་ཁྱད་པར་ཅན་འཁྲུངས། བླ་
མ་མཉེས་ནས་འགྲོ་དོན་གྱིས་ཤིག་པའི་རྗེས་སུ་གནང་བ་ཐོབ། དབང་གྲལ་དུ་བླ་མའི་དབུའི་བར་སྣང་ལ་མགོན་པོཕྱག་
བཞི་པ་དང༌། སྒོའི་ཐད་ན་ཨེ་ཀ་ཛ་ཊི་མཐིང་ནག་ཞིང་དབྱུག་དང་སྤྱང་མོ་བསྣམས་པ་ལུས་བོངས་ཉིས་ཐོག་ཙམ་
པ། ཕྱི་ངོས་ན་ལས་ཀྱི་མ་མོ་ཁྲག་རལ་ཅན་ལག་པས་ཁྲག་བཅུས་ནས་འཐུང་བ་རྣམས་གཟིགས། ལོ་བརྒྱད་ཀྱི་བར་
བླ་མ་འབྲལ་མེད་དུ་བསྟེན། ཨོ་རྒྱན་གྱི་སྒྲུབ་གནས་སྙུགས་ཚལ་སྦུག་ཏུ་དགུན་ཐོག་གཅིག་བཞུགས་པས་རྡོ་རྗེ་ཕག་
མོས་ཞལ་གཟིགས། དེ་ནས་ཤེས་རབ་ཕྱོགས་མེད་དུ་རྒྱས། རེ་ཞིག་ཡར་ཀླུངས་མཚར་སྟེང་དུ་རི་ཁྲོད་བཏབ་ནས་
བཞུགས། ཇི་ཞིག་ན་བླ་མ་འདའ་བར་མཁྱེན་ནས་མཁར་ཆུར་བྱོན་ཙ་ན་བླ་མའི་སྲས་གཉིས་ས་སྐྱགས་སུ་འཛོམས།
སླར་ལོག་སྟེ་ཉི་ཤུ་ལྔའི་དུས་མཆོད་བཙུགས། ཙཱ་རི་ལ་བྱོན་པས་ཀྲིག་མོ་ལྷའི་ནེའུ་སིང་གི་རྡོ་སྐུ་ལ་འཇའ་ཚོན་སྣ་ལྔ་
ཟུག་པ་སོགས་བྱུང༌། དེ་ནས་མཚུར་ཕུར་ཆོས་རྗེ་རང་བྱུང་རྡོ་རྗེས་གདན་དྲངས་ཏེ་སྙིང་ཏིག་གི་གདམས་པ་རྣམས་
ཕུལ་ཞིང་དེ་ལས་བརྒྱུད་པར་ཀརྨ་སྙིང་ཐིག་གྲགས་པ་བྱུང༌། ཤངས་སུ་བྱོན་ནས་ལྕེ་སྒོམ་ནག་པོའི་བརྒྱུད་པ་སློབ་
དཔོན་སྒོམ་པ་ལ་གསང་སྐོར་སྙན་བརྒྱུད་རྣམས་དང༌། བསམ་གཏན་མིག་གི་སྒྲོན་མེ་ཞུས། དིང་རི་སྣ་དམར་དུ་
དབོན་པོ་བྱང་སྒྲུབ་ལས་ཀྱང་དགོན་པ་བའི་རི་ཆོས་རྣམས་གསན། ཨོ་རྒྱན་པ་རིན་ཆེན་དཔལ་དང་ཡང་མཇལ། མར་
ལམ་བླ་མ་བཀྲ་ལུང་པ་ལས་གཤིན་རྗེ་དགྲ་ནག་ལ་སོགས་པ་ཞུས། སློབ་དཔོན་ཡེ་དགོན་ལ་སོགས་པ་བཤེས་
གཉེན་མང་དག་ལས་གསང་སྐོར་དང༌། རྒོད་ཚང་པའི་ཁྲིད་ཀྱི་སྐོར། ཨ་རོའི་ཁྲིད་མོ་ཆེ་ལ་སོགས་པ་བོད་ན་གྲགས་
པ་ཆེ་བའི་རྫོགས་རིམ་ཕལ་མོ་ཆེ་ཁོང་དུ་ཆུད། ཆོས་ཕྱིར་དཀའ་སྤྱད་བཟོད་པས་ཙཱ་རི་གསར་མར་བགྲོད་ནས་རྙིང་
མའི་གཡུ་མཚོ་འགྲམ་དུ་གཅིག་པུར་ཟླ་བ་བརྒྱད་ལ་བཞུགས། ཆོ་འཕྲུལ་ཆེན་པོ་བྱུང་བ་གཤིས་ཐོག་ཏུ་རོ་སྙོམས་
པས་གཞི་བདག་དབང་དུ་འདུས་ནས་ཁང་པར་གདན་དྲངས་ཏེ་བསྙེན་བཀུར་བྱས། ཛམ་བྷ་ལྷས་ནོར་བུ་ཕུལ། མཚོ་
ནང་དུ་འོད་ལྔའི་ལྦུ་བ་མཐེ་བོང་ཙམ་ཞིག་ཐིམ་འགྲོ་བ་གཟིགས། ངེས་འབྱུང་དང་སྐྱོ་ཤས་ཀྱིས་ཐུགས་རྒྱུད་བརླན་
པས་དུས་རྟག་ཏུ་ཤམ་པོ་ལ་སོགས་གངས་ཁྲོད་དང་ལུང་སྟོང་འབའ་ཞིག་ཏུ་ལྷགས་སྐྱོབ་ཙམ་ལ་བརྟེན་ནས་བཞུགས་
པས་སློབ་མའི་ཚོགས་མང་པོ་འཁོར་བ་མཐའ་ཅན་དུ་མཛད། སྤྲུལ་པའི་སྐུར་གདོན་མི་ཟ་བ་ཀརྨ་པ་རང་བྱུང་རྡོ་རྗེ་
དང༌། རྒྱལ་བ་ཀློང་ཆེན་པ་གཉིས་རྫོགས་པ་ཆེན་པོའི་སློབ་མའི་གཙོ་བོར་གྱུར་པས་རྫོགས་པ་ཆེན་པོའི་བསྟན་པ་
སྤེལ་བའི་ཕྲིན་ལས་ལ་མུ་མཐའ་དང་བྲལ། དེ་སྐད་དུ་འབྲི་གུང་པ་ཆོས་རྒྱལ་རིན་ཆེན་ཕུན་ཚོགས་ཀྱིས། ཆོས་འདིའི་
བསྟན་པའི་བདག་པོ་ཀུན་མཁྱེན་ཀློང་ཆེན་པ་ཡིན། རྒྱལ་བ་རང་བྱུང་རྡོ་རྗེའི་དུས་ཕྲིན་ལས་རྒྱ་ཆེ། ཞེས་གསུངས་
པས་མཚོན་ནོ། །བྱང་ཆུབ་སེམས་དཔའི་སྤྱོད་པ་ལ་ཤིན་ཏུ་གོམས་པས་སྙིང་རྗེ་ཆེན་པོའི་དབང་གིས་གྲོང་དང་ཡུལ་
འཁོར་མང་པོ་དག་ལ་ཐབས་ལ་མཁས་པས་ཐར་པའི་ས་བོན་འདེབས་པ་ཁོ་ན་ལྷུར་མཛད་ཅིང༌། ཀོང་པོ་ནས་ཨེ་ལ་
ཐུག་གི་བར་འཇིགས་པས་ཉེན་པའི་ལམ་འཕྲང་ལ་འགྲོ་བ་དག་གི་དབུགས་འབྱིན་པ་དང༌། རི་དྭགས་དང་ཉ་ལ་
སོགས་པའི་སེམས་ཅན་ཉམ་ཆུང་བ་དེ་དག་ལ་ཐུགས་ཤིན་ཏུ་བརྩེ་ཞིང་བདོག་པ་ལ་འཕངས་སེམས་མེད་པས་རི་རྒྱ་
དང༌། ལམ་རྒྱ་དང༌། ཆུ་རྒྱ་ལ་སོགས་པ་མཛད་ནས་བདེ་འཇམ་ལ་བཀོད། གང་དུ་བཞུགས་པའི་ལུང་པ་དང༌། ཡུལ་
གྲོང་ཐམས་ཅད་ཀྱི་སད་སེར་ཡམས་ནད་ལ་སོགས་པ་ཞི་བར་མཛད་ཅིང་ཕན་པ་འབའ་ཞིག་ལྷུར་ལེན། སྙིང་ཏིག་གི་
གདམས་པ་རྫོགས་རིམ་གཞན་དང་མ་འདྲེས་པར་རང་སྐད་ཀྱི་གྲུབ་མཐའ་བསླངས་ཏེ་འཆད་ནུས་པ་དང༌། ཤངས་ལ་
སྨེ་བ་ཨའི་རི་མོ་ཅན་མངའ་བ། སྔགས་བདག་གཟའ་དང་དམ་ཅན་རྣམས་ཀྱིས་བཀའ་ལ་ཉན་ཅིང་མི་དང་མི་ལབ་པ་
བཞིན་དུ་ཡོད་པ་དང༌། མངོན་པར་ཤེས་པས་གདུལ་བྱའི་བསམ་པ་མཁྱེན་ནས་འདུལ་ལུགས་མཁས་ཤིང་གཞན་
རྒྱུད་བྱིན་གྱིས་རློབས་ནུས་པ་དང༌། རྗེས་སུ་བཟུང་བའི་སྐལ་ལྡན་ཀུན་ལ་འདས་དུས་རྟགས་ཁྱད་པར་ཅན་འབྱུང་བ་
སོགས་སློབ་དཔོན་བཱི་མ་ལའི་སྐུའི་བཀོད་པར་གྲགས་ཤིང་ཐལ་འགྱུར་ལས་དགེ་སློང་དཔལ་ལྡན་ཞེས་ལུང་གིས་ཟིན་
ཏོ། །དེ་ལྟར་འགྲོ་དོན་བསམ་གྱིས་མི་ཁྱབ་པའི་ངང་ནས་བདུན་ཅུ་རྩ་བརྒྱད་པ་ཆུ་མོ་ལུག་གི་ལོའི་སྟོན་ཟླ་འབྲིང་
ཉི་ཤུ་ལྔ་ལ་སྒྲ་དང་འོད་ཀྱི་གུར་ཁྱིམ་ལ་སོགས་པའི་རྟགས་ངོ་མཚར་བ་དང་བཅས་སྐུ་གཤེགས་པས། ཉེ་གནས་སྒོམ་
དར་ལ་སོགས་པ་དྲུང་ན་ཡོད་པ་རྣམས་ཀྱིས་མོས་གུས་ཆེན་པོས་གདུང་བ་བསྐྱེད་པས་སླར་བཞེངས་ཏེ་སྐྱིལ་མོ་ཀྲུང་
བཅས། ཞལ་འཛུམ་པའི་ངང་ནས་ཁྱེད་རྣམས་མྱ་ངན་མ་བྱེད། ང་ཤི་བ་མིན་གསུངས་ནས་གདམས་ངག་ཞལ་ཏ་ཅི་
རིགས་པ་བྱོན་ཏེ་ཞག་བཅུ་གསུམ་ལ་སྐུ་ཚེ་སླར་བསྲིངས། ཚེས་བདུན་གྱི་ཉིན་ཉེ་གནས་རྣམས་ཀྱིས་གཤེགས་པའི་ཕྱི་
ན་ཇི་ལྟར་བགྱི། བླ་མ་ཀུན་མཁྱེན་པ་གདན་འདྲེན་ནམ་ཞུས་པས། ཁོང་འོ་བརྒྱལ་དུ་མ་འཇུགད་ཕྱིན་ཆོས་ཀྱི་ཞུན་
ཐར་མ་ཆོད་པ་ཡོད་ན་དེར་སོང༌། ཁ་ཏ་མང་པོ་སྔར་ནས་བྱས་ཟིན། ཅལ་ཅོལ་མ་སྨྲ་གསུངས། དྲང་སྲོང་ཙོག་པུའི་
འདུག་སྟངས་དང༌། ཆོས་སྐུའི་གཟིགས་སྟངས་ཀྱི་ངང་ནས་ཞལ་འཛུམ་པར་མཛད་དེ། ཚེས་བརྒྱད་ཀྱི་ཐོ་རངས་ཁ་ན་
གདོད་མའི་གྲོང་ཁྱེར་ག་ལ་བ་དེར་གཤེགས་སོ། །ཉི་ཤུ་ལྔ་ལ་པུར་བཞུས་པས་དབུ་ཐོད་རིལ་པོར་བྱོན་པའི་ནང་ནས་
རིགས་ལྔའི་ཚོམ་དཀྱིལ་དང༌། སྙན་གོང་གཡས་ན་རྗེ་བཙུན་མ་མཐིང་ག་ཚོན་གང་བ། གདུང་རིགས་ལྔ་དང༌། རིང་
བསྲེལ་ལ་སོགས་པ་བྱོན་ཅིང་འཇའི་གུར་གྱིས་ཁོ་ར་ཁོར་ཡུག་ཏུ་དཀྲིགས་སོ། །དེ་ལྟ་བུའི་རིག་འཛིན་བླ་མ་དམ་པ་དེ་
ཉིད་ལས་ཀུན་མཁྱེན་ངག་གི་དབང་པོས་བཱི་མ་སྙིང་ཐིག་གི་སྨིན་དབང་གྲོལ་ཁྲིད་མན་ངག་རྒྱབ་རྟེན་དང་བཅས་པ་
ལྷག་མེད་བུམ་པ་གང་བྱོའི་ཚུལ་དུ་གསན་པ་སྟེ་རྣམ་ཐར་རྒྱས་པ་འོག་ཏུ་འབྱུང་མ་རགས་པ་ལ། སྐབས་འདིར་གུ་རུ་
ནས་བརྒྱུད་པའི་པདྨ་སྙིང་ཐིག་གམ་མཁའ་འགྲོ་སྙིང་ཐིག་གི་དབང་ཁྲིད་གཏད་རྒྱ་དང་བཅས་པའང་ཀུན་མཁྱེན་ཆེན་
པོ་ལ་ཉེ་བརྒྱུད་དུ་བཀའ་བབ་པས་ཐོག་མར་མཁའ་འགྲོ་སྙིང་ཐིག་གི་བརྒྱུད་པའི་ཆོས་ཁུངས་མདོ་ཙམ་འཆད་པར་འདོད་དེ།
|
 རྒྱལ་བའི་དབང་པོ་ཀློང་ཆེན་རབ་འབྱམས་ནི།
དེ་ལྟར་པཎ་ཆེན་བཱི་མ་དང་སློབ་དཔོན་པདྨའི་བཀའ་སྲོལ་ཟུང་དུ་འཇུག་པའི་དབང་ཁྲིད་མན་ངག་གི་ཆུ་
རྒྱུན་མཐའ་དག་རྒྱལ་བའི་དབང་པོ་ཀློང་ཆེན་རབ་འབྱམས་ལ་ཆིག་རྫོགས་སུ་བཀའ་བབ་པ་སྟེ། ཆོས་ཀྱི་རྒྱལ་པོ་
ཀུན་མཁྱེན་ངག་གི་དབང་པོའམ་ཀློང་ཆེན་རབ་འབྱམས་ནི། ཡབ་ཨོ་རྒྱན་ཆེན་པོའི་དངོས་སློབ་སད་མི་མི་བདུན་གྱི་
ནང་ཚན་རྟ་མགྲིན་གྱི་གྲུབ་ཐོབ་ངན་ལམ་རྒྱལ་བ་མཆོག་དབྱངས་དང་གདུང་གཅིག་པའི་གདུང་རབས་ཉི་ཤུ་རྩ་ལྔ་པ།
སློབ་དཔོན་ལྷ་སྲུང་ཞེས་བདུད་རྩིའི་བཅུད་ལེན་གྲུབ་པས་ལོ་བརྒྱ་དང་ལྔར་བཞུགས་པ་ཉིད་ཀྱི་སྲས་སློབ་དཔོན་
བསྟན་པ་སྲུང་ཞེས་རིག་པའི་གནས་ཀུན་དང་སྔགས་ཀྱི་རྣལ་འབྱོར་ལ་རང་བྱན་ཆུབ་པ་དེ་དང༌། ཡུམ་འབྲོམ་སྟོན་
རིན་པོ་ཆེ་རྒྱལ་བའི་འབྱུང་གནས་ཀྱི་གདུང་ལས་བྱོན་པ་འབྲོམ་བཟའ་མ་བསོད་ནམས་རྒྱན་ཅེས་བྱ་བའི་སྲས་སུ་གཡོ་
རུ་གྲྭའི་སྟོད་གྲོང་དབེན་ཚ་ཞེས་པའི་གནས་སུ་སྐུ་བལྟམས། ཐོག་མར་ལྷུམས་སུ་ཞུགས་སྐབས་ཡུམ་གྱི་རྨི་ལམ་དུ་
སེང་གེ་ཆེན་པོ་ཞིག་གི་དཔྲལ་བ་ལས་སྲིད་པ་གསུམ་པོ་ལྷག་གེར་གསལ་བའི་ཉི་ཟླ་གཉིས་དུས་གཅིག་ཏུ་ཤར་ནས་
འོད་ཁྱིལ་ཁྱིལ་དུ་རང་གི་ལུས་ལ་ཐིམ་པ་སོགས་ཡ་མཚན་པའི་རྟགས་དུ་མ་བྱུང༌། རབ་བྱུང་ལྔ་པའི་ས་ཕོ་སྤྲེལ་ལོ་
དབོ་ཟླ་བའི་ཚེས་བཅུ་སྐར་མ་རྒྱལ་དང་ལྡན་པ་ལ་མངལ་གྱི་ཆུ་འཛིན་ལས་རྣམ་པར་གྲོལ། འཁྲུངས་མ་ཐག་ནམ་གྲུ་
རེ་མ་ཏི་བུད་མེད་ནག་མོ་མཆེ་བ་ཅན་བཞིན་གཉེར་ཞིང་རལ་གྲི་ཐོགས་པའི་ཚུལ་དུ་དངོས་སུ་བྱུང་ནས་པང་དུ་བླངས་
ཏེ་ངས་བསྲུང་བར་བྱའོ་ཟེར་ནས་ཡུམ་ལ་གཏད་དེ་མི་སྣང་བར་ཡལ། ཡང་ལན་གཅིག་སྲས་མུ་ཁར་བཞག་ནས་ཡུམ་
གྱིས་ཞིང་ལ་ཡུར་མ་མཛད་ཅིང་ཡོད་ཚེ་སེར་བ་བབ་པས་བརྗེད་དེ་ནང་དུ་ཕེབས་མ་ཐག་དྲན་ཏེ་ལེན་དུ་བྱོན་པས་
སྲས་མི་འདུག་པས་ངུ་ཞིང་ཁྱིམ་དུ་ལོག་པ་ན། སྔར་གྱི་བུད་མེད་དེས་མཛོད་ནས་ཁྱེར་འོང་སྟེ་སྤྲུལ་བའི་སྐུ་ལ་བརྙས་
པ་བྱས་ཞེས་རལ་གྲི་རྡེག་ལ་ཁད་བྱས་ཏེ་གཏད་པ་སོགས་དུས་ཐམས་ཅད་དུ་ནམ་གྲུ་མས་དངོས་གཟུགས་ཐ་དད་པ་
བསྟན་ཏེ་སྐུ་སྲུང་མཛད། གསུང་བྱེ་ཚེ་སྔོན་གནས་རྗེས་སུ་དྲན་པའི་ཚུལ་ཤིན་ཏུ་གསལ་བར་གསུངས་ཤིང་ཆུང་ངུ་
ནས་བསམ་ཡས་ཀྱི་ཁམས་གསུམ་མེ་ཏོག་སྒྲོལ་དང་ཉེ་བ་ཞིག་ཏུ་བྱོན་དགོས་གསུངས། དད་པ་དང་སྙིང་རྗེ་བློ་གྲོས་
ཀྱི་མཐུ་ཆེན་པོ་དང་ལྡན་པས་ལོ་ལྔ་ནས་འབྲི་ཀློག་བརྡ་ཙམ་གྱིས་ཚེགས་མེད་པར་མཁྱེན། བདུན་ནས་བཟུང་ཡབ་
ལས་བཀའ་བརྒྱད་བདེ་གཤེགས་འདུས་པ། རྟ་མགྲིན། ཕུར་པ། གུ་རུ་ཞི་དྲག་རྣམས་ཀྱི་དབང་ལུང་མན་ངག་ཕྱག་
བཞེས་བཅས་དང༌། དེ་མཚུངས་སྨན་རྩིས་ལ་སོགས་ཐུན་མོང་རིག་གནས་གསན་ཅིང་བྱང་ཆུབ་པར་མཛད། དགུ་
པར་གྲྭ་ཕྱིའི་ཚོང་འདུས་སུ་ཉི་ཁྲི་དང་བརྒྱད་སྟོང་པ་བརྒྱ་ཚར་བཀླགས་པས་ཚིག་དོན་ཐུགས་སུ་ཆུད། བཅུ་གཉིས་པ་
ལ་བསམ་ཡས་སུ་མཁན་པོ་བསམ་གྲུབ་རིན་ཆེན་དང༌། སློབ་དཔོན་ཀུན་དགའ་འོད་ཟེར་ལས་རབ་ཏུ་བྱུང་ནས་
མཚན་ཚུལ་ཁྲིམས་བློ་གྲོས་སུ་གསོལ། འདུལ་བ་ལ་སྦྱངས་ཤིང་བཅུ་བཞི་པ་ལ་བཤད་ཁྲིད་མཛད་པས་མཁས་པའིགྲགས་
པ་ཐོབ། བཅུ་དྲུག་པ་ལ་སློབ་དཔོན་རིན་ཆེན་བཀྲ་ཤིས་ལས། ལམ་འབྲས། ཆོས་དྲུགཕག་མོ། བདེ་མཆོག་
དྲིལ་བུུ་པ། ཕྱག་རྡོར་འཁོར་ཆེན་རྣམས་ཀྱི་དབང་དང་གདམས་པ། སློབ་དཔོན་དབང་ཕྱུག་ཡེ་ཤེས་ལས་དུས་འཁོར་
སོགས་གསར་མའི་རྒྱུད་སྡེ་ཕལ་ཆེ་བ། ཟ་ལུང་རིན་པོ་ཆེ་ལས་ཚལ་བའི་ཆོས་སྐོར། རྒོད་ཚང་པའི་ལམ་ཁྲིད། དམ་
པའི་ཞི་བྱེད་སྔ་ཕྱི་བར་གསུམ། མ་གཅིག་གི་གཅོད་ཡུལ་རྣམས་གསན་པ་དང༌། བཅུ་དགུ་པ་ལ་གསང་ཕུ་ནེའུ་ཐོག་ཏུ་
སློབ་དཔོན་ཆེན་པོ་བཙན་དགོན་པ་དང༌། བླ་བྲང་པ་ཆོས་དཔལ་རྒྱལ་མཚན། ཆོས་གྲགས་གཉིས་པར་གྲགས་པ་
གཞོན་ནུ་རིན་ཆེན་གསུམ་གཙོ་བོར་བསྟེན་ཏེ་བྱམས་ཆོས་སྡེ་ལྔ། རྣམ་འགྲེལ་ཚད་བསྡུས་སོགས་ཕར་ཚད་ཀྱི་གཞུང་
འགྲེལ་མཐའ་དག་གསན་ནས་ཚིག་དོན་ཡོངས་ལ་མཁས་པར་སྦྱངས། སློབ་དཔོན་གཞོན་ནུ་རྒྱལ་པོ་ལས་དབུ་མ་རྩ་
འཇུག་སོགས་རིགས་ཚོགས་དང༌། དཔང་བློ་གྲོས་བརྟན་པ་ལས་མངོན་པ་དང་ཚད་མ་སྡེ་བདུན་གྱི་རྣམ་བཤད། ཏིང་
འཛིན་རྒྱལ་པོ་སོགས་ཟབ་མོ་མདོ་ལྔའི་བཤད་པ་དང་སྙན་ངག་སོགས་ཐ་སྙད་གཙུག་ལག་གི་ཚོགས་ཀྱང་རྫོགས་
པར་གསན། དེ་དག་གི་ཚིག་དོན་མཐའ་དག་ལོ་གསུམ་ལ་བྱང་ཆུབ་པར་གྱུར་ཏེ་ལུང་རིགས་སྨྲ་བའི་སྡེ་རྣམས་སུ་གྲྭ་
སྐོར་མཛད་པས། གཞུང་ཚོགས་ཀྱི་རྒྱ། མཁྱེན་རབ་ཀྱི་རྩལ། རིགས་པའི་རྣམ་འགྱུར་ཀུན་ལ་ཐོགས་པ་མི་མངའ་
བས་བསམ་ཡས་ལུང་མང་པ་ཞེས་རྩོད་མེད་འགྲན་ཟླ་དང་བྲལ་བའི་མཁས་པ་ཆེན་པོར་ཡོངས་སུ་གྲགས། གསང་
ཕུར་གསན་བསམ་མཛད་སྐབས་མི་གཡོ་བ་དང༌། དབྱངས་ཅན་མ། ཕག་མོ་སོགས་ཤེས་རབ་གསལ་བྱེད་རྣམས་ཀྱི་
བསྙེན་སྒྲུབ་མཛད་པས་དེ་དག་གིས་ཞལ་གཟིགས། ཁྱད་པར་ལྷ་མོ་དབྱངས་ཅན་མས་ཕྱག་མཐིལ་དུ་བཞག་སྟེ་གླིང་
བཞི་རི་རབ་དང་བཅས་ཞག་བདུན་དུ་བསྟན་པས་ཐོགས་པ་མེད་པའི་བློ་གྲོས་ཀྱི་མཐུ་གྲུབ་པ་སྟེ། བསྟོད་པ་གཞོན་ནུ་
རོལ་དགའ་ལས། ཨེ་མ་ལྷ་མོ་སྐལ་བཟང་མ། །ཡུན་རིང་སྨོན་པ་དེ་རིང་འགྲུབ། །ཅེས་དང༌། དེ་ནས་བཟུང་ལྷ་མོ་
འདི་རྣམ་འགྱུར་ཐ་དད་པས་འབྲལ་བ་མེད་པ་ཡང༌། ཁྱོད་སྐུ་འོད་ཀྱི་ཕུང་པོའི་ནང༌། །དཀར་སེར་དམར་དང་ལྗང་གུ་
སྟེ། །ཞེས་དང༌། ལ་ལར་སྤྲིན་གྱི་བླ་བྲེས་ནང༌། །ལུས་ཕྱེད་དཀར་གསལ་དམར་གསལ་མཐིང༌། །རྩེ་དང་ཆགས་དང་
བཞེངས་སྐུར་སྣང༌། །ཞེས་གསུངས། གཞན་ཡང་དན་ཕག་པ་གཞོན་ནུ་དོན་གྲུབ་ལས་རྙིང་མ་རྒྱུད་འབུམ་དང༌། མདོ་
སྒྱུ་སེམས་ཕྱོགས་ཀྱི་མན་ངག་མང་པོ་དང༌། གཞོན་ནུ་རྡོ་རྗེ་ལས་སྤྱོད་འཇུགབསླབ་བཏུས། བཀའ་གདམས་སྐོར་
སོགས་དང༌། མཁན་པོ་ལས་སྒྲུབ་ཐབས་རྒྱ་མཚོ། མཁའ་འགྲོ་རྒྱ་མཚོ། དཔའ་བོ་རྒྱ་མཚོ། ཆོས་འབྱུང་རྒྱརྩ།
འདུལ་བ་ལུང༌། མདོ་སྡེ་རྒྱས་འབྲིང་བསྡུས་པ། རྡོ་རྗེ་གཅོད་པ། སྡུད་པ། ཤེས་རབ་སྙིང་པོ། ཤེས་རབ་ཁྲི་པ།
ཚུལ་བརྒྱ་ལྔ་བཅུ་པ་ལ་སོགས་གསན་ཞིང༌། ཆོས་རྗེ་ཀརྨ་པ་རང་བྱུང་རྡོ་རྗེ་ལས་སྦྱོར་དྲུག་གེགས་སེལ་དང་བཅས་པ།
ནཱ་རོ་ཆོས་དྲུག།སྐུ་གསུམ་ངོ་སྤྲོད། ཐུགས་རྗེ་ཆེན་པོ་རྒྱལ་བ་རྒྱ་མཚོ་དང་རྒྱལ་པོ་ལུགས། གསང་འདུས། སམ་བྷུ་ཊི།
མ་ཧཱ་མཱ་ཡཱ། གཤིན་རྗེ་གཤེད་དམར་ནག་སོགས་དང༌། སློབ་དཔོན་དབང་ཡེ་ལས་ཡི་དམ་དམར་ཁྲིད། སངས་རྒྱས་
ཐོད་པ། མཁའ་འགྲོ་གུར། འཇིགས་བྱེད་ར་ལུགས། རླུང་འཁོར། ཛམ་ལྷ། ཀུ་རུ་ཀུལླེ། ཐུབ་པ། ཡུམ་དྲུགབྱམས་
པ། གནས་བརྟན་བཅུ་དྲུགསྨན་བླ་སོགས་ཀྱི་སྒྲུབ་ཐབས་མན་ངག་དུ་མ། ཤུག་གསེབ་པ་ལས་དོ་ཧ་སྐོར་གསུམ།
རི་ཆོས་སྐོར་གསུམ། རྟེན་འབྲེལ་བརྒྱ་རྩ་ལ་སོགས་པ། སློབ་དཔོན་སྟོན་ཚུལ་ལས་དྲང་སྲོང་གཞུང་སྐྱེས་ཀྱི་དངུལ་
ཆུའི་བཅུད་ལེན་སོགས་དང༌། བླ་མ་འཇམ་དབྱངས་པ་ལས་དུས་འཁོར་གྱི་སྐར་རྩིས་རི་མོ་ཡོངས་སུ་རྫོགས་པ།
བརྟག་གཉིས། རྡོ་རྗེ་རྩེ་མོ། འཇམ་དཔལ་རྩ་རྒྱུད། རྡོ་རྗེ་འབྱུང་བ། དེ་ཁོ་ན་ཉིད་བསྡུས་པ། ཏ་ཐ་སམ་གྲ་ཧ་སྦྱོང་
རྒྱུད། རྡོར་དབྱིངས། ཀུན་རིགརབ་གནས་དོན་གསལ་རྣམས་དང༌། ས་སྐྱ་བ་བདག་ཉིད་ཆེན་པོ་ལས་ཐུགས་བསྐྱེད་
ཆེན་མོ། རྒྱུད་གསུམ་གྱི་གདམས་པ་ཁ་ཚང་བ། རིན་པོ་ཆེ་ཁྲོ་ཕུ་པ་ལས་རྡོ་རྗེ་ཕྲེང་བ། གུར་དགོན་སྐོར། བླ་མ་ཚོང་
འདུས་པ་ལས་ཆོས་དབང་གི་བཀའ་བརྒྱད་གསང་རྫོགས། ཐུགས་རྗེ་ཆེན་པོ་ཡང་སྙིང་འདུས་པ། རྫོགས་ཆེན་སངས་
རྒྱས་མཉམ་སྦྱོར། འཁོར་བ་དོང་སྤྲུགས། བླ་མ་གསང་འདུས། མགོན་པོ་མ་ནིང༌། གཞན་ཡང་བཅུད་ལེན་བརྒྱ་རྩ།
རྒྱ་མཚོ་དུ་རུ་ཀའི་གཏད་ཁྲམ། བཟོ་ཡིག་པ་ཏྲ། མེ་ཆུའི་སྒྱོགས་དང༌། དཔག་ཆེན་བཅའ་ཐབས་སོགས་ཀྱང་གསན།
ཁང་དམར་པ་ལས་ཚེ་དཔག་པཱ་ལ་པ་ཏྲ། ཚ་ཚ་སྨྱོན་པ། ཙིཏྟ་དམར་པོ། མ་མོ་དུག་གི་སྤུ་གྲི། དུ་བ་རླུང་ཞོན། འབུམ་
པ་ནག་པོ་མུ་སྟེགས་ལྷ་བདུན། སེར་བ་སྲུང་འབེབས་ཀྱི་མན་ངག་བཅས་དང༌། མཐིང་མ་པ་སངས་རྒྱས་གྲགས་འོད་
ལས། ཉང་གཏེར་བཀའ་བརྒྱད་བདེ་འདུས་ཆེན་མོ། གནམ་ལྕགས་ཨུར་མོ། ཕུར་པ། ཌཱཀྐི་གསང་བ་ཡེ་ཤེས།
མགོན་པོ་ལེགས་ལྡན། སྟག་ཞོན། སེང་ཞོན་སོགས་གསན། དེ་ལྟར་གསང་སྔགས་གསར་རྙིང་གི་དབང་དང་མན་
ངག་རྗེས་གནང་དང་བཅས་པ་དང༌། མདོ་སྔགས་གཞུང་ལུགས་ཆེ་ཆུང་མང་པོའི་བཤད་པ་བརྒལ་བརྟག་དང་བཅས་
པ། སྒྲ་སྙན་རྩིས་སྡེབ་སོགས་ཐ་སྙད་རིག་གནས་ཀྱི་ལག་ཁྲིད་སོགས་ཏེ་མདོར་ན་ཤེས་བྱའི་ཆོས་ཚུལ་མཐའ་དག་ལ་
གསན་སྦྱངས་མཐར་ཕྱིན་པས་མཁས་པའི་ཡང་རབ་ཏུ་གྱུར། སླར་ཡང་གསང་ཕུར་བཞུགས་ཤིང་དེ་སྐབས་ཁམས་
བཙུན་རྣམས་ཀྱིས་གནས་ཁང་གཅིག་ནས་གཅིག་ཏུ་ལན་བདུན་དུ་ཕུད་པའི་རྐྱེན་སོགས་ཀྱིས་ཕྱོགས་མེད་རྒྱལ་
ཁམས་སུ་ཕེབས་པར་བཞེད་པ་ནས་མར་བྱོན་པ་ན། རྔོག་ལོའི་གདུང་རྟེན་ཐད་དུ་ཆོས་གྲོགས་ཤིག་དང་འཕྲད་པས་
གར་འགྲོ་ཟེར་བར། ང་ཁམས་གྲྭ་རྣམས་དང་ལྷན་དུ་སྡོད་ས་མི་འདུག་པས་འགྲོ་བ་ཡིན་གསུངས། འོ་ན་ཁམས་གྲྭ་
རྣམས་ལ་ངན་སྨྲས་འཇོག་པར་འཚལ་ཞེས་བསྐུལ་བས། ཀུ་རེའི་ཚུལ་དུ་ཀ་ལིང་སྲིན་པོ་རྒྱུ་བ་བཞིན། །ཞེས་པ་
སོགས་ཀ་རྩོམ་འདི་ཤོག་ཁ་གང་བྲིས་པ་ཁོང་གིས་ཁྱེར་ཏེ་ཆོས་ཁྲི་ལ་སྦྱར། སྐབས་དེར་སྐུ་ཆས་སུ་ཆོས་ཤམ་སྟོད་
འགག་བོད་ཕྲུག་དུར་ཁའི་ཕྱམ་རྩེ་གཅིག་སྟེ། ན་བཟའ་མཐའ་ལ་མ་ལྷུང་ཙམ་ཞིག་ཡོད་པ་མནབས་ཏེ་དབུ་རུ་སྟོད་ལ་
བསོད་སྙོམས་དུ་བྱོན་ནས་ཕྱྭ་མདའི་ཡུལ་ཐང་ཞིག་ཏུ་དེ་ནུབ་བཞུགས་ཤིང༌། རྒྱ་མའི་དགེ་བཤེས་སྟོན་ཚུལ་བྱ་བ་དང་
འཕྲད་པ་ལ། རྒྱ་མ་ན་གྲུབ་ཐོབ་ལྕོག་ལའི་བྲག་ཁུང་གི་དྲི་བ་མཛད་པས་བྲག་ཕུག་ལེགས་པོ་ཞིག་ཡོད་ཟེར། བསོད་
སྙོམས་བྱས་པས་ནས་རྐྱལ་པ་གང་དང་ཡོ་བྱད་ཕྲན་བུ་བྱུང་བ་བསྣམས་ཏེ་ཅོག་ལའི་བྲག་ཕུག་ཏུ་ཕེབས། དེར་ཟླ་བ་
བརྒྱད་ཀྱི་རིང་དགེ་བཤེས་སྟོན་ཚུལ་ལ་ཕར་ཕྱིན་ཐུན་རེ་འཆད་པ་ལས་ཉིན་མཚན་ཁོར་ཡུག་ཏུ་མུན་མཚམས་ཁོ་ནའི་
ཏིང་ངེ་འཛིན་ལ་རྩེ་གཅིག་ཏུ་མཉམ་པར་བཞག་པར་མཛད། ཟླ་བ་ལྔ་སོང་བའི་ཐོ་རངས་ཉམས་ཀྱི་སྣང་བར། ལུང་
པའི་མདའ་བྱེ་མའི་རི་ཆུང་དང་འབབ་ཆུ་ཡོད་པའི་ས་ནས་རྟ་པ་བསེ་ཁྲབ་དང་དྲིལ་བུ་གཡེར་ཁས་བརྒྱན་པ་གཅིག་
དང༌། བུད་མེད་ལོ་བཅུ་དྲུག་གི་ན་ཚོད་མཛེས་སྡུག་མཚུངས་པ་མེད་པ་ཟ་འོག་གི་གོས་དང་རིན་པོ་ཆེའི་པྲོག་ཞུ་དང་
གསེར་གཡུའི་དྲྭ་བའི་རྒྱན་ཚར་དུ་དངར་བ་ཞིག་བྱུང་བར། བུད་མེད་དེའི་ཐུ་བ་ནས་བཟུང་སྟེ་འཕགས་མ་ཐུགས་རྗེས་
བཟུང་བར་ཞུ་ཞེས་ཞུས་པས། དབུ་རྒྱན་ཕུད་ནས་ཉིད་ཀྱི་དབུ་ལ་བསྐོན་ཏེ་དུས་ད་ནས་བཟུང་སྟེ་བྱིན་གྱིས་རློབ་ཅིང་
དངོས་གྲུབ་སྦྱིན་པར་བྱའོ་གསུངས་པ་ནས་ཟླ་བ་གཅིག་གི་བར་བདེ་གསལ་མི་རྟོག་པའི་ཏིང་འཛིན་ལ་ཕྱམ་བརྡལ་
ཞིང་རིག་འཛིན་ཀུ་མ་རཱ་ཛ་དང་མཇལ་བའི་ལུང་བསྟན་ཀྱང་ཐོབ། མཚམས་གྲོལ་ནས་ཡབ་ཡུམ་གྱི་དོན་དུ་ཀུན་རིག་
གི་ཆོ་ག་བརྒྱ་རྩ་མཛད་པ་ན་དགེ་བཤེས་ཀྱིས་ཆོ་ག་འདི་འདྲ་ལ་བྱིན་རླབས་འོང་ངེས་སྙམ་ནས་དབང་གི་ཞུ་བ་ཕུལ་
བས་ཞལ་གྱིས་བཞེས། ཁོང་ཆུ་ལེན་དུུ་འགྲོ་ཤུལ་ནས་རྡུལ་ཚོན་གྱི་དཀྱིལ་འཁོར་ལེགས་པར་བཞེངས་ཚར་བར་
མཛད་ནས་སྔགས་པ་ཞིག་དང་སྟོན་བཙུན་ཕོ་མོ་སུམ་ཅུ་བཅས་ལ་དབང་བསྐུར། དགུང་ལོ་ཉེར་བདུན་པའི་ཚེ་སྔར་
གྱི་ལུང་བསྟན་ལྟར་རིག་འཛིན་ཆེན་པོ་ཀུ་མ་རཱ་ཛ་མཇལ་དུ་བྱོན་པ་ན་ཡར་སྟོད་སྐྱམ་ཕུར་དཔོན་སློབ་བདུན་ཅུ་
བཞུགས་པ་རྣམས་དང་མཇལ། ཞལ་མཇལ་མ་ཐག་ཏུ་བཱི་མ་ལ་དངོས་ཀྱི་འདུ་ཤེས་དང་དད་པ་བརྟན་པོ་འཁྲུངས་
ཤིང༌། བླ་མས་ཀྱང་མདང་ལྷའི་བྱ་ཡིན་ཟེར་བའི་ཡ་མཚན་ཅན་ཞིག་ལ་བྱ་ཕྲན་སྟོང་གིས་བསྐོར་བས་ངའི་དཔེ་ཆ་ཁྱེར་
ནས་ཕྱོགས་ཐ་དད་དུ་སོང་བ་རྨིས། དེ་ཁྱེད་ལ་བལྟ་བ་འདྲ་བས་ངའི་ཆོས་ཀྱི་བརྒྱུད་པ་འཛིན་པ་ཞིག་ཡོང་བར་འདུག་
གསུངས་ཏེ་མཉེས་ཚོར་ཆེན་པོ་མཛད། དཔྱིད་སོས་བར་བཀའ་ཆོས་བསྒུགས་ནས་ལུང་སྟོང་གཅིག་ནས་གཅིག་ཏུ་སྤོ་
སྐྱས་ལན་དགུ་མཛད་པས་སྐུ་ལུས་ཞན་པ་དང་ན་བཟའ་ངན་པའི་སྟབས་ཀྱིས་བཙུན་ཆུང་རྣམས་དང་སྐོར་ཁྱི་ཡང་སྡང་
བ་བྱུང༌། དེ་ནས་སང་ཁྲིད་འཛུགས་ཟེར་བའི་ནུབ་མོ་ཁྲིད་གཉེར་པ་གཉིས་ཀྱིས་བྲེ་ཆེན་པོ་གཅིག་ཁྱེར་ནས་དགེ་
བཤེས་བསམ་ཡས་པ་ཆོས་ཁྲལ་གར་ཡོད་སང་ཉིན་ནས་ཁྲིད་ཚུགས་རྒྱུ་ལ་ནས་ཁལ་བདུན་རེ་སྡུད་པ་ཡིན་ཟེར་བ་ལ།
ང་ལ་ནི་བྲེ་གང་ཡང་མེད་ཆོས་ཐོབ་ཡོང་གསུངས་བྱུང་བས་བསྡད་པ་ཡིན་བྱས་པས། ཁྲིད་འདི་ཙམ་ཞིག་ཞུ་བར་ཆོས་
ཁྲལ་སོ་སོས་མ་འབྱོར་ན་སུས་མཇལ་ཟེར་ནས་སོང༌། སྐྱེ་བ་སྔ་མར་ཚོགས་མ་བསགས་པས་དཀའ་ལས་དེ་ཙམ་གྱིས་
བསྒུགས་ཀྱང་ཆོས་ཁྲལ་ལ་རྡུགས་ནས་འགྲོ་དགོས་པ་མི་ལ་ཡང་ངོ་ཚ་བས་ནམ་ལངས་ཙ་ན་ལུང་པའི་མདོར་སླེབས་
པ་བྱེད་དགོས་དགོངས་ནས་ཐོ་རེངས་སྔ་བར་བཞེངས་ཀྱིན་ཡོད་ཙ་ན། བླ་མས་དགེ་བཤེས་བསམ་ཡས་པ་ད་ལྟ་དྲུང་
དུ་ཤོག་གསུངས་པའི་འབོད་མི་བྱུང་བས་འགྲོ་རྩིས་ཡིན་ཡང་བླ་མའི་བཀའ་བཅག་ན་མི་རུང་སྙམ་སྟེ་བྱོན་པས། ཞལ་
འཛུམ་པ་མཛད་ནས་ཐུགས་སྐྱོ་མ་མཛད་པར་བཞུགས་ལ་གསོལ་ཇ་གསོལ་གསུངས། ཁྲིད་གཉེར་པའང་འབོད་
མཛད་དེ་དགེ་བཤེས་འདིའི་ཆོས་ཁྲལ་འདི་ནས་འདེབས་པ་ཡིན་ཁོང་མ་གཙེར། ང་ལ་ད་རེས་ཀྱི་ཆོས་འཆད་ཉན་པ་
འདི་ཚོ་ཐམས་ཅད་ལས་ཁོང་དགའ་བ་ཡིན་གསུངས། སྐབས་ཤིག་བླ་མའི་གཟིམས་ལམ་དུ་བཱི་མ་ལ་ཡིན་ཟེར་བའི་
པཎྜི་ཏ་པཎ་ཞུ་གསོལ་ཞིང་པུསྟི་བསྣམས་པ་ཞིག་གིས་དྲི་མེད་འོད་ཟེར་འདི་ང་བཱི་མ་ལའི་བསྟན་པ་སྐྱོང་བར་སྨོན་
ལམ་བཏབ་པའི་སྐྱེས་བུ་ཡིན་པས་གཞོན་ནུ་རྒྱལ་པོ་ཁྱོད་ཀྱིས་མན་ངག་རྫོགས་པར་སྟོན་ཅིགཁྱོད་ཀྱི་ཆོས་ཀྱི་བདག་
པོར་གྱུར་ནས་རྫོགས་པ་ཆེན་པོའི་བསྟན་པ་སྐྱོང་བ་ཞིག་ཡོང་ངོ་གསུངས། ཕྱི་ལོར་ཤམ་པོ་གངས་རར་དཔོན་སློབ་
ལྷན་ཅིག་ཏུ་བྱོན་ནས་དེར་དབང་དང་གདམས་པ་མང་པོ་དང༌། ཁྱད་པར་གསང་བ་བླ་ན་མེད་པ་འོད་གསལ་གསང་
བ་སྙིང་པོ་ཕྱི་ནང་གསང་སྐོར། རྒྱུད་ཐམས་ཅད་ཀྱི་རྒྱལ་པོ་སྒྲ་ཐལ་འགྱུར་ལ་སོགས་པ་རྒྱུད་བཅུ་བདུན་མན་ངག་བརྒྱ་
དང་བཅུ་དགུ་ལས་ཕྲན་དང་བཅས་པ། ཨེ་ཀ་ཛཱ་ཊི། ལེགས་ལྡན་ལྕམ་དྲལ། གཟའ་བདུད། རྡོ་རྗེ་ལེགས་པ་སོགས་
ཀྱི་སྒྲུབ་སྐོར་རྗེས་གནང་ལས་ཕྲན་ཕྱག་བཞེས་དང་བཅས་པ་རྫོགས་པར་མཛད་དེ་རྒྱལ་ཚབ་ཆེན་པོར་མངའ་དབང་
བསྐུར་ཅིང༌། བཀའི་སྲུང་མ་རྣམས་ཀྱིས་ཀྱང་གཟུགས་དངོས་སུ་བསྟན་ཏེ་རང་རང་གི་སྒྲུབ་ཐབས་མན་ངག་སྲོག་གི་
སྙིང་པོ་དང་བཅས་པ། ཁྱད་པར་རཱ་ཧུ་ལས་བརྒྱུད་འཛིན་རྣམས་ལ་གྲིབ་དུག་གི་སྲུང་བ་ཁྱད་པར་ཅན་རང་རྟགས་
ཐམ་དམར་རྣམ་བཅུ་དབང་ལྡན་དང་རང་མིང་གི་རི་མོ་ཡོད་པ་ཤོག་བརྩེགས་བརྒྱ་ཕྲག་ལ་གསལ་བ་གཟའ་ཐམ་དུ་
གྲགས་པ་དངོས་སུ་ཕུལ་ཞིང་ཅི་བསྒོ་བའི་བྲན་དུ་ཁས་བླངས་ཤིང༌། ཕྱིས་ཀུན་མཁྱེན་ཆེན་པོ་ཉིད་ཀྱིས་གཟའ་རྒོད་
ཐང་འབེབས་ལན་བདུན་མཛད་ཅིང༌། མོན་དུ་བཞུགས་སྐབས་སྲུང་མའི་བླ་རྟེན་བཙུགས་པའི་ར་ཚེར་ཕུང་ལ་ཐོགས་
ནས་ཤི་སྟེ་ལོག་རྒྱུ་མ་བྱུང་བས་གསོད་པ་པོ་མྱུར་དུ་ཁྲིད་ཤོག་ཅེས་བཀའ་བསྒོས་པས། རླུང་དམར་ཆེན་པོས་ཚེར་ཕུང་
རྩ་ནས་བཏོན་ཏེ་གཟིམས་ཁང་སྒོར་བསྐྱལ་བ་སོགས་ཀུན་ཀྱི་མཐུན་སྣང་དུ་གྲུབ་པ་བྱུང༌། དེ་དག་གི་སྐབས་སུ་མཐུན་
རྐྱེན་ཆེར་མེད་ཀྱང་ཕྱེ་བྲེ་གསུམ་དང་དངུལ་ཆུ་རིལ་བུ་ཉེར་གཅིག་ཙམ་གྱི་འཚོ་བ་དང༌། ཁ་བ་བབ་དུས་སྒྱེ་ནང་དུ་
འཛུལ་ནས་དེས་མལ་སྟན་གཉིས་གོ་བཅད་པ་སོགས་དཀའ་སྤྱད་ཆེན་པོས་གདམས་པ་རྣམས་ལྷག་མ་མ་ལུས་པ་
གསན། དེ་ནས་མཆིམས་ཕུར་ལོ་འགའི་བར་དུ་སྒོ་གསུམ་མི་འདའ་བའི་དམ་བཅའ་བརྟན་པོ་མཛད། ཐོག་མར་ལྷུན་
གྲུབ་སྒང་དུ་བཞུགས་དུས་ཕག་མོ་ནག་མོའི་ཞལ་གཟིགས་ཞག་བདུན་བར་དང༌། གུ་རུ་དྲག་པོ། ཆེ་མཆོག་དབུ་ཉི་ཤུ་
རྩ་གཅིག་པ་ལ་བཀའ་བརྒྱད་ཀྱི་ལྷ་བདུན་བརྒྱ་ཉེར་བཞིས་བསྐོར་བ་གཟིགས། རྡོ་རྗེ་གཡུ་སྒྲོན་མས་རང་གི་ཕྱི་ནང་
གསང་སྒྲུབ་དང༌། ཛམ་བྷ་ལྷས་ནོར་བུ་གཅིག་ཕུལ། དགེ་གོང་དུ་བཞུགས་དུས་གུ་རུ་ཞི་བའི་ཞལ་གཟིགས་ཤིང༌།
མཁའ་སྤྱོད་དུ་བྱོན་ནས་མཁའ་འགྲོ་མ་རྣམས་ལ་ཆོས་འཆད་པ་སོགས་རྣམ་ཐར་ངོ་མཚར་བ་དུ་མ་དང་ཉིད་ལ་བཀྲ་
ཤིས་པའི་མེ་ཏོག་འཐོར་ཞིང་ཚུར་བྱོན་དུ ས་སྐྱེལ་ཐུང་བྱས་ཏེ་སྙིང་ཐིག་གི་རྗེས་གནང་ཕུལ་བ་སོགས་དག་པའི་སྣང་བ་
འབྱམས་སུ ་ཀླས། དགེ་འུར་བཞུགས་དུས་འོད་ཀྱི་རྣམ་པའི་ཕག་མོ་དམར་པོ་དང༌། རྡོར་སེམས། རྟ་མགྲིན། སྒྲོལ་མ།
ཚེ་དཔག་མེད་བཞེངས་སྐུ་རྣམས་ཀྱིས་ཞལ་གཟིགས། དུར་ཁྲོད་དུ་བཞུགས་སྐབས་སྔགས་སྲུང་རལ་གཅིག་མཐིང་གི་
ཞིང་དབྱུག་ཅན་སྤྱང་མོ་ལ་ཞོན་པ་དང༌། གཟའ་བདུད། རྡོར་ལེགས། མགོན་པོ་ཕྱག་བཞི་པ། ཞང་བློན་རྡོ་རྗེ་བདུད་
འདུལ། དགེ་བསྙེན་ཉེར་གཅིག་སོགས་ཀྱིས་གཟུགས་དངོས་སུ་བསྟན་ནས་ཕྲིན་ལས་སྒྲུབ་པར་དམ་བཅས། མཁའ་
འགྲོ་མ་རྣམས་དང་ཆོས་ཀྱི་བགྲོ་བ་མི་དང་མི་ལབ་པ་བཞིན་བྱུང༌། དེ་སྐབས་དོགས་པ་བྱུང་བ་རྣམས་འཕྲལ་འཕྲལ་
བླ་མའི་དྲུང་དུ་བྱོན་ནས་ཞུན་ཐར་བཅད་ཅིང་རྩེ་གཅིག་ཏུ་བསྒོམས་པས་རྟོགས་པའི་རྩལ་དང་སྒོམ་པའི་སྙིང་རུས་ལ་
བླ་མ་མཆོག་ཏུ་མཉེས། ལྷ་སར་ཇོ་བོར་མཆོད་པ་མཛད་ཚེ་མཛོད་སྤུ་ནས་འོད་ཟེར་འཕྲོས་པ་ཉིད་ཀྱི་སྨིན་མཚམས་སུ་
ཐིམ་པས་བྱ་རྒོད་ཕུང་པོའི་རི་དང་ལི་ཡུལ་རྣམས་སུ་པནྜི་ཏར་སྐྱེས་ཚེ་མཁྱེན་པའི་ཆོས་མཐའ་དག་ཀྱང་གསལ་བར་
དྲན་ཏེ་ཐུགས་ལ་བདེ་གསལ་གྱི་ཉམས་ཆེན་པོ་འཁྲུངས། ཀ་ནི་སྒོ་བཞི་རུ་མ་གཅིག་ལབ་ཀྱི་སྒྲོན་མས་ཡེ་ཤེས་ཀྱི་སྐུ་
མངོན་སུམ་པས་རྗེས་སུ་བཟུང་ནས་གཅོད་ཡུལ་གྱི་བཀའ་བབ་གཏད། སུམ་ཅུ་རྩ་གཅིག་པར་སྙེ་ཕུ་ཤུག་གསེབ་ཏུ་
སྐལ་ལྡན་དུ་མ་ལ་སྙིང་ཐིག་ཐོག་མར་གསུངས་པའི་ཚེ་རྣལ་འབྱོར་པ་འོད་ཟེར་གོ་ཆས་མཁའ་འགྲོ་སྙིང་ཐིག་གི་པུསྟི་
དཀའ་སྤྱད་ཆེན་པོས་བཙལ་བ་ཕྱག་ཏུ་ཕུལ་བ་ན་སྲོག་སྒྲུབ་མས་གཏད་པར་གཟིགས་ཤིང༌། དེ་སྐབས་ཤིག་ཏུ་བླ་མ་
རས་མ་ལ་བ་དང་གསུང་གླེང་མཛད་ཅིང་ཡོད་ཚེ་བུད་མེད་ནག་མོ་ཞིག་གིས་པུསྟི་ཕྱག་ཏུ་གཏད་སོང་བ་ལ། རས་མ་
བས་གཟིགས་ཚེ་ཌཱཀྐི་ཙིཏྟ་བྱ་བ་ཞིག་འདུག་པ་གཟིགས་མ་ཐག་བུད་མེད་དེ་ཆ་མེད་དུ་ཡལ། སྲོག་སྒྲུབ་མས་བསྐུལ་
བར་མཁྱེན་ཏེ་ངོ་མཚར་སྐྱེས་ནས་མཆིམས་ཕུར་མཁའ་འགྲོ་སྙིང་ཐིག་གསུང་བར་བསྐུལ་བས་ཞལ་བཞེས་མཛད། དེ་
ནས་དགུང་ལོ་སོ་གཉིས་པ་ཡོས་ཀྱི་སྟོན་ཟླ་འབྲིང་པོ་ལ་མཆིམས་ཕུ་རི་མོ་ཅན་དུ་སྐལ་ལྡན་ཕོ་མོ་བརྒྱད་ལ་མཁའ་
འགྲོ་སྙིང་ཐིག་གསུངས་དུས་རྣལ་འབྱོར་མ་ཞིག་ལ་དཔལ་སྔགས་ཀྱི་སྲུང་མ་བབས་པ་ཐམས་ཅད་ཐེ་ཚོམ་དུ་གྱུར་
ཚེ། འདི་མཁའ་འགྲོ་དངོས་སུ་བབ་པ་ཡིན་ང་སྣང་སེམས་རོ་གཅིག་རྟོགས་པའི་རྣལ་འབྱོར་པ་ལ་བར་ཆད་མི་ཡོང་
གསུངས། དེར་རྣལ་འབྱོར་མས་བླ་མ་ལ་ཕྱག་བྱས་ནས་དཀྱིལ་འཁོར་ལ་བལྟས་ཏེ། རྨ་བྱ་མ་འཛོམས་པ་ག་རེ་
ཟེར། ཡིད་ཀྱིས་བསམ་པ་ཡིན་གསུངས་པས། བརྡའི་ཆོས་ལ་ཡིད་ཀྱིས་ག་ན་འོང་ཟེར། ཡང་བུམ་པའི་སྟེགས་ཀྱི་
མཉྫི་དོར་ཏེ་བུམ་པ་གསུམ་སྦྲེལ་ནས་བཞགཆོ་གའི་རྣམ་བཞག་ཞིབ་མོ་མཛད་དུས་ཐལ་མོ་སྦྱར་ཏེ་ལེགས་སོ་བརྗོད།
རིགས་ཀྱི་ཡི་གེའི་ས་མཐའ་ཆད་ནས་རིག་ཏུ་བོས་པ་ལ། མིན་མིན་རིགས་ཟེར་བ་ཡིན་ཅེས་དང༌། སྔགས་བཟླ་དུས་
ངས་ལད་མོ་གྱིས་ཟེར་ནས་མཁའ་འགྲོའི་སྐད་དུ་འབྲེལ་ལ་མ་བྲེལ་བའི་གདངས་སྙན་པོ་བྱས། ཚོགས་ཀྱི་དུས་བླ་མ་
ལ་བདུད་རྩི་དྲངས་དུས་འདི་མཁའ་འགྲོའི་དམ་རྫས་ཡིན་པས་ཅིས་ཀྱང་བསྟེན་དགོས་ཟེར་ཞིང་ལྷག་མེད་དུ་
དྲངས། དེའི་ཚེ་སློབ་མ་རྣམས་ཀྱང་ཉམས་འུར་ནས་གླུ་ལེན་བྲོ་བརྡུང༌། ཐ་མལ་གྱི་གཉིད་ལས་འདས་པའི་འོད་
གསལ་རྩེ་གཅིག་ཏུ་ཤར། དཔའ་བོ་དང༌། མཁའ་འགྲོ། ཆོས་སྐྱོང་སྣ་ཚོགས་པའི་གཟུགས་བརྙན་མངོན་སུམ་དུ་
མཐོང་ནས། བུད་མེད་ནག་མོ་གཅིག་གིས་ཕྱེ་ཕུད་ཉམས་འདུག་ཟེར་བ་དང༌། དམ་ཅན་མི་དཀར་པོར་བསྟན་ནས་
ངའི་གཏོར་མ་ལ་མར་རྒྱན་ཆད་ཟེར་བ་དང༌། ཇོ་བོ་ལྡང་ལྷ་མི་དཀར་ཅན་དུ་འོངས་ནས་གཏོར་མ་འདོད་པ་ལ་དམར་
གཏོར་བྱིན་པས་མ་འདོད་པ་དང༌། མཁའ་འགྲོའི་ཚོགས་ཀྱིས་བླ་མ་ལ་གདུགས་དབུབ་པ་དང༌། སྐོར་བ་བྱེད་པ་དང༌།
ཧཱུྃ་དང་ཕཊ་ལ་སོགས་པའི་སྒྲ་དྲག་པོ་དང༌། ཐུགས་ཆོམ་ཆེན་པོ་སོགས་ཆོ་འཕྲུལ་བསམ་གྱིས་མི་ཁྱབ་པ་བྱུང་བས།
རྣལ་འབྱོར་པ་གཅིག་གིས་དོ་ནུབ་གནམ་ས་ངོ་ལོག་པ་འདུགཤ་དུམ་ཁྲག་དུམ་བྱེད་ལས་ཆེ་ཟེར་ནས་སྐྲག་པ་སོགས་
བྱུང༌། དེ་བཞིན་འོད་དེ་གུང་རྒྱལ། གཉན་ཆེན་ཐང་ལྷ། སྨན་མོ་མཆེད་བདུན་སོགས་གཏོར་མ་ལེན་དུ་འོངས། རྡོ་རྗེ་
ཕག་མོ་སྐུ་མཐིང་ག་རིན་པོ་ཆེ་དང་རུས་པས་བརྒྱན་པ་མངོན་སུམ་བྱོན། དེར་དྲི་བ་འགའ་མཛད་པ་ན། དོ་ནུབ་དུས་
གཉན་པས་ལས་ཅན་གྱི་སློབ་མ་ཉུལ་དུ་འོངས། བླ་མ་དམ་པ་སྐུ་ཁམས་བཟང་ཟེར། ད་ལོ་སྐུ་ཆག་བདོ་བས་ཇི་ལྟ་
མཆི་དྲིས་པས། མཁའ་འགྲོ་མས། སངས་རྒྱས་ཀྱི་རྣམ་སྤྲུལ་ལ་བར་ཆད་ག་ན་འོང༌། གདུལ་བྱ་ལ་དགོངས་པ་ཡིན་བཱི་
མ་ལ་བོད་དུ་བྱོན་པ་མི་ཤེས་སམ་ཟེར། ད་ཅི་ཙམ་བཞུགས་དྲིས་པས། ལུག་ལོ་ཕྱི་མའི་བར་བཞུགས། དེ་ནས་
གདུལ་བྱ་དང་བསྟུན་པ་ལས་ངེས་པ་མེད་གསུངས། འོ་ན་ང་བླ་མ་ཀུ་མཱ་རཱ་ཛས་གཞན་དོན་ལ་བསྐུལ་ལམ་དྲིས་
པས། འོ་འོ་དེ་ཀ་ཟེར། ངས་གཅིག་པུར་བསྒྲུབས་ན་འོད་ལུས་གྲུབ་བམ། གཞན་དོན་བྱེད་ན་སེམས་ཅན་ལ་ཕན་ཇི་
ཙམ་ཐོགས་འོང༌། ལོ་ཇི་ཙམ་ཐུབ་དྲིས་པས། འོད་ལུས་འགྲུབ་ཀྱང་སེམས་ཅན་ལ་ཕན་འདོགས་དགོས། གཞན་དོན་
འུར་འུར། ད་ལོ་སུམ་ཅུ་ཐུབ་ཟེར། ང་ལ་བཀའ་སྲུང་ཇི་ལྟར་ཡོད་དྲིས་པས། མང་མང་བླ་མའི་ཐམས་ཅད་ཁྱོད་ལ་
ཡོད། ཁྱད་པར་རྡོ་རྗེ་གཡུ་སྒྲོན་མ་ཟེར། དེ་བཞིན་འགྲོ་དོན་ལྷོ་ནུབ་ཕྱོགས་ན་ཡོད། ཚེ་ཕྱི་མ་འདི་བས་ཀྱང་འགྲོ་དོན་
ཆེ་ཟེར། འོ་ན་མཁའ་འགྲོ་སྙིང་ཐིག་ལས་བཤད་པ་དེ་ཡིན་ནམ། དབང་ཁྲིད་གདབ་ཏུ་རུང་ངམ་དྲིས་པས། འོ་དེ་ཀ་
དེ་ཀམ་ནོར་མ་ནོར། ཆོས་ཀྱི་བདག་པོ་ཁྱོད་རང་ཡིན་པ་ལ་ལོས་ལོས་ཟེར། ཡང་མི་རྣམས་ཀྱིས་ཟོག་པོར་འཛིན་དུ་
མི་འོང་ངམ་དྲིས་པས། མིའི་ཁ་ལ་གཏད་པ་ཅི་ཡོད། སྐལ་ལྡན་རྣམས་ནི་ཁོ་མོས་སྡུད། སྐལ་མེད་སངས་རྒྱས་ལའང་
སྐུར་བ་འདེབས་ཟེར། སྙིང་ཏིག་གི་ཆོས་བཀའ་རྡོ་རྗེ་གཡུ་སྒྲོན་མའི་གནས་སུ་བྱེད་དམ་དྲིས་པས། འདི་ན་མཁའ་
འགྲོ་རང་བཞིན་གྱིས་འདུ་བས་འདིར་བྱེད་དགོས་ཟེར། བུམ་ཐང་གི་གཏེར་ཁའི་ལུང་ཡང་གསལ་བར་བཤད། སློབ་
དཔོན་ཆེན་པོ་དང་མཇལ་ལམ་དྲིས་པས། ལུང་གསུམ་གྱི་ཕུ། རི་གསུམ་གྱི་མདའ། བྲག་ཆུང་ངེ་བ་ཁ་ནུབ་ཏུ་བལྟ་
བའི་གཡས་ཟུར་དུ་མཇལ་ཟེར། བཱི་མ་ལ་ནམ་མཇལ་དྲིས་པས། མཇལ་ཟིན་འདུག་པ་ལ་ཟེར། ངས་རྟོགས་པའི་ལྟ་
བ་འདི་སྙིང་ཐིག་གི་དགོངས་པའི་མཐར་ཐུག་གམ་དྲིས་པས། མཐར་ཐུག་པ་ལ་ནོར་འཁྲུལ་མེད་ཟེར། སློབ་དཔོན་
རིན་རྡོར་གྱིས་སྤང་སྒང་པ་རིན་ཆེན་རྡོ་རྗེ་ད་ལྟ་གང་དུ་འཁྲུངས་འདུག་ཞུས་པས། བླ་མ་ལ་མཛུབ་མོ་བཙུགས་ནས་
འདི་ན་བཞུགས་འདུག་པ་ཟེར། དེར་བླ་མས། ཁོང་སྐྱེ་བ་དེའི་འོག་ཏུ་བུམ་ཐང་དུ་སྐྱེ་བ་ལ་ང་ག་ན་ཡིན་གསུངས་
པས། དེ་ཀ་ལྟར་སྐྱེ་བ་ཡིན། བར་དུ་ལོངས་སྐུའི་ཞིང་ཉུལ་དགོས་པ་དེ་སློབ་དཔོན་རིན་ཆེན་རྡོ་རྗེས་གཏེར་ཐོན་རྗེས་
ལོ་འགའ་གསང་ནས་སྒྲུབ་པ་མཛད་ན་རང་དོན་དུ་འོད་གསལ་ལོངས་སྐུའི་རྩལ་སྦྱོངས་དང༌། གཞན་ལ་ཕན་པ་རྒྱ་
ཆེན་པོ་འོང་བ་ལ་མ་གསང་བས་སྐུ་ཚེ་མཐར་མ་ཕྱིན། ད་ལྟ་ཁྱེད་དུ་སྐྱེས་དུས་འོད་གསལ་གྱི་སྣང་བ་ལམ་དུ་ཁྱེར་བ་
འདི་ནི་ལོངས་སྐུའི་ཞིང་ཁམས་དལ་གཅིག་ཉུལ་བ་དེ་ཡིན་ཟེར། ངས་ཕུང་པོ་ལྷག་མེད་ཨེ་འགྲུབ་དྲིས་པས། གཅིག་
པུར་བསྒོམས་ན་ད་ལྟ་འགྲུབ། གཞན་དོན་མཛད་པས་བར་དོར་གྲོལ། སྤྲུལ་པས་བུམ་ཐང་དུ་སྐྱེ་བ་བླངས་ཏེ་གཞན་
དོན་བྱེད། དེའང་ནུབ་ཕྱོགས་ཨོ་རྒྱན་གྱི་ཡུལ་དུ་གཤེགས་ནས་འཚང་རྒྱ་བའི་ཚུལ་སྟོན་གསུངས། ཡང་ངས་སྙིང་ཐིག་
གི་ཕན་ཐོགས་བཱི་མ་ལ་དང་མཁའ་འགྲོ་གཉིས་གང་ཆེ་དྲིས་པས། གཉིས་ཀས་ཕན་ཐོགས། བཱི་མ་ལ་རྒྱ་ཆེ་ལོ་བརྒྱ།
མཁའ་འགྲོ་སྙིང་ཏིག་ལོ་ལྔ་བརྒྱར་གནས། ད་ནས་འགོ་རྩོམ་པ་ཡིན་ཟེར། དེར་བླ་མ་ཡང་ཐུགས་ཉམས་འུར་ནས་སྐུ་
བཞེངས་ཏེ་རྡོ་རྗེའི་གླུ། ཚེ་འདི་ཡང་བདེ་སྟེ་ཕྱི་མ་སྐྱིད། །བར་དོ་རང་ངོ་ཤེས་པས་བདེ། །ད་ནི་བདེ་ནས་བདེ་བར་
འགྲོ། །གླུ་མཆོད་པ་འབུལ་ལོ་དཀོན་མཆོག་གསུམ། །ཐུགས་དགྱེས་པར་མཛོད་ཅིག་མཁའ་འགྲོའི་ཚོགས། །ཞེས་
པའི་མཐའ་ཅན་གྱི་མགུར་གནང༌། ད་དུང་མཁའ་འགྲོའི་སྣང་བ་བསམ་གྱིས་མི་ཁྱབ་པ་མཐོང་ཞིང་དེ་ཐམས་ཅད་བླ་
མ་ལ་ཐིམ། བླ་མ་ཡང་རེས་ལོངས་སྐུར་གནས་འགྱུར་བ་སོགས་མཐོང༌། དེ་ནས་ཚེས་ཉེར་བརྒྱད་ཀྱི་ཉིན་གཅིག་ལྷོ་
ནུབ་མཚམས་ནས་སློབ་དཔོན་ཆེན་པོ་སྐུ་མདོག་དཀར་གསལ་ཟ་འོག་གི་བེར་དང་ཤེའུའི་མཉེན་ཞུ་ཅན་འཁོར་དཔག་
ཏུ་མེད་པས་བསྐོར་ནས་བྱོན་ཏེ་བླ་མ་ལ་ཐིམ་པ་མཐོང༌། དེ་ནུབ་མཁའ་འགྲོ་མ་རུས་པའི་རྒྱན་ཅན་མཁའ་ལ་བུམ་
བུམ་འགྲོ་བས་བླ་མ་ལ་མཆོད་པ་བྱེད་ཅིང་བུད་མེད་སྨུག་ནག་གསུམ་གྱིས་བྲོ་འཁྲབ་པ་དང༌། ངེད་ཡོང་ཡོང་བདེ་ཆེན་
གྱི་གནས་ནས་ཡོང༌། །ལས་ཅན་གྱི་སློབ་མ་ཉུལ་དུ་འོངས། །དམ་ཚིག་གི་གཙང་སྦྲ་ལྟ་རུ་འོངས། །འགྲོ་དོན་མཛོད་
ཅིག་རིགས་ཀྱི་བུ། །ཟེར་བ་དང༌། ཡང་ནང་མཆོད་མཛད་པའི་དུས་སློབ་དཔོན་ཆེན་པོའི་གཡས་ན་བཱི་མ་ལ། གཡོན་
ན་རྡོ་རྗེ་ཕག་མོ། མདུན་ན་མཁའ་འགྲོ་མང་པོས་མི་རྐང་འབུད། རྒྱབ་ན་སྔགས་པ་མང་པོས་འཆམས། མཁའ་འགྲོ་
མ་གསེར་གྱི་གོ་ཞུབ་ཅན་མང་པོས་གླུ་གར་བྱེད་ཅིང་བསྐོར་བའི་དབུས་ན་བླ་མ་བཞེངས་ནས། དགའ་འོ་སྐྱིད་དོ་རྣལ་
འབྱོར་ཀུན། །དོ་ནུབ་འོག་མིན་དག་པའི་ཞིང༌། །རང་ལུས་ཞི་ཁྲོའི་ཕོ་བྲང་ན། །སྟོང་གསལ་རྒྱལ་བའི་དཀྱིལ་འཁོར་
རྒྱས། །སངས་རྒྱས་ཕྱི་ན་མེད་དོ་ནང་ན་ཡོད། །ཅེས་དང༌། སེམས་གཅིག་པུར་གནས་པའི་བསམ་གཏན་པ། །ཡིད་
གཅིག་ལ་མི་འཛིན་གང་བདེར་ཐོང༌། །སེམས་འཕྲོ་ཡང་སྟོང་ལ་གནས་ཀྱང་སྟོང༌། །གང་ཤར་ཡེ་ཤེས་ཀྱི་རོལ་པ་
ཡིན། །ཅེས་པ་ལ་སོགས་རྡོ་རྗེའི་གླུ་བཞེངས། དེ་དུས་རྡོ་རྗེ་གཡུ་སྒྲོན་མ་དཀར་མོ་མཆེད་བདུན་དང་བཅས་པ་བྱོན་
ནས་ང་ཡི་གནས་སུུ་གཤེགས་པར་ཞུ་ཟེར། བླ་མས་ཁྱོད་ཀྱི་གནས་སུ་རྒྱུན་དུ་སྡོད་དགོས་གསུངས་པས། རྒྱུན་དུ་
བཞུགས་ན་དགའ་སྟེ་དགུན་སྟོད་ལས་མི་བཞུགས་པ་འདྲ་ཟེར། ཁྱོད་ང་ལ་ཅིའི་ཕྱིར་འབྲངས་དྲིས་པས། གུ་རུའི་དམ་
འོག་ཏུ་ཚུད་པས་གཏེར་གྱི་ཕྱི་ལ་འབྲངས་ཟེར། གཏེར་ཆོས་ནི་ཕ་གིར་ཡོད། འདོན་མཁན་ནི་ཤི། འདིར་ཅི་བྱེད་བྱས་
པས། ཆོས་ཕ་གི་ཡོད་ཀྱང་དོན་འདི་ན་ཡོད། ཁྱོད་ཚེ་འཕོས་ཀྱང་བཀའ་སྲུང་ཚེ་མ་འཕོས་པས་ཡོང་བ་ཡིན་ཟེར།
བཀའ་སྲུང་རྣམས་ལུང་བསྟན་ཅིང༌། འདི་ནི་ཤིན་ཏུ་གཉན་པས་སྐུ་ཚེ་ལ་བར་ཆད་འོང་ཉེན་ཡོད་ཁྲིད་ཐེབས་ཉུང་ན་
དགའ་ཟེར། ང་ཡི་གཏེར་ཤོག་རྣམས་ཨེ་ཡོང་དྲིས་པས། སིབ་སིབ་ངེད་རྣམས་ཀྱི་ཡིད་སྒུལ་བ་ཡིན་མོད་ཟེར། ཡང་
ངས་ཁྱེད་ལ་དབུ་རུར་དངོས་གྲུབ་བྱིན་པ་མི་དྲན་ནམ་ཟེར། སྔར་ཅོག་ལའི་བྲག་ཕུག་གི་དེ་དྲན་ནས་རྡོ་རྗེ་གཡུ་སྒྲོན་
མ་ཨེ་ཡིན་ཞེས་པས། མིན་མིན་རྡོ་རྗེ་ཕག་མོ་ཡིན་ངོ་མ་ཤེས་སམ་ཟེར། འདི་ནི་འཇིག་རྟེན་པའི་གཟུགས་ཀྱིས་ཕྲིན་
ལས་བྱས་པ་དང༌། འདས་པའི་གཟུགས་ཀྱིས་མཆོག་གི་དངོས་གྲུབ་སྟེར་པའི་རྣམ་པ་ཆ་ཕྱེད་དགོས་པའོ། །འདི་ན་
ཐིག་ལེ་གཙོ་བོར་བཤད་ནས་དབང་གསུམ་པ་རྟེན་ཅན་དུ་བསྐུར་བ་ཇི་ལྟར་ལགས་དྲིས་པས། དེ་ཆགས་ཆེན་ལམ་དུ་
འཇུག་པ་ལ་དགོངས་པ་ཡིན། ཆགས་བྲལ་ལ་ཡིད་རིག་ཙམ་གྱིས་ཆོག་གསུངས། ངོ་སྤྲོད་ཀྱི་སྐབས་སུ་རྟོགས་པ་སྐྱེ་
མེད་དུ་འཇོག་པ་དང༌། བློ་རྩིས་མེད་དུ་འཇོག་པ་གང་ཡིན་དྲིས་པས། རྟོགས་པ་ལ་བརྟན་པོས་ཅི་བྱེད། ཡེ་གྲོལ་ཀློང་
ཡངས་ཆེན་པོར་ངོ་སྤྲོད་ཅིག་ཟེར། འོ་ན་སྙིང་ཏིག་འདི་བཤད་མི་མང་པོ་སྣང་ན་ངས་བཤད་ཅི་དགོས། ལུང་བྱེད་པ་
ཀརྨ་པ་དང༌། རིན་ཆེན་གླིང་པ་སོགས་འདུག་པས་སོ་བྱས་པས། བཤད་ཚུལ་དེ་དག་ལ་ངེད་མི་མགུ། ལུང་རྫ་ལའང་
ཡོད་དེ་དེས་གར་ཆོགབདག་པོ་རེ་ཡོད་དགོས་པ་ཡིན་མོད་ཟེར། རིན་ཆེན་གླིང་པའི་གཏེར་ཁ་དྲིས་པས། ཡིན་པ་
ཡིན་དག་རྒྱུ་མེད་ཟེར། ངས་ཁྱེད་མ་བསྒོམས་པར་འགྲུབ་པའི་རྒྱུ་མཚན་དྲིས་པས། ང་ལ་སྒོམ་པའི་ལྷ་འདུག་གམ།
བཟླས་པའི་སྔགས་འདུག་གམ། མཆོད་པའི་ཡུལ་འདུག་གམ། རྣལ་འབྱོར་པ་དམ་ཚིག་དང་རྟོགས་པ་ལྡན་པ་ཀུན་
ལ་ང་རྒྱུན་དུ་ཡོད་པ་མི་ཤེས་སམ། ཁྱེད་དང་ཚེ་རབས་ཐམས་ཅད་དུ་འདུུ་འབྲལ་མེད་ཟེར། མཆིམས་ཕུར་ལྷ་ལྕམ་གྱི་
ནོར་ཡོད་པ་དེ་ཅི་འདྲ་ཞིག་ན་འདུག་དྲིས་པས། བྲག་ལྷ་བཤོས་འདྲ་བ་རྩེ་མོ་མེད་པ་ཅིག་ན་འདུགད་དུང་དུས་ལ་མ་
བབས་ཟེར། བཱི་མ་ལའི་གཏེར་ཇི་ཙམ་ན་འདོན་དྲིས་པས། ད་ནས་ལོ་ལྔ་ན་སྔགས་པ་དཀར་པོ་གཅིག་གིས་བཏོན་
ནས་དར་བར་བྱེད། ཟབ་པ་པོད་བཞི་ཁྱོད་རང་གི་ལག་ན་འོང་བར་འདུག་ཟེར་བས་སྐབས་དེར་གདམས་པའི་དཀའ་
གནད་ཐམས་ཅད་ཀྱང་ཐུགས་རྒྱུད་ལ་འཁྲུངས་ཤིང༌། དེ་དག་མཚོ་རྒྱལ་ཡེ་ཤེས་སུ་ཕེབས་པས་འདི་དང་འདིའོ་ཞེས་
ངོ་སྤྲོད་འབུལ་བར་མཛད། དེ་དུས་གུ་རུ་པདྨས་དྲི་མེད་འོད་ཟེར་ཞེས་དང༌། མཚོ་རྒྱལ་གྱིས་རྡོ་རྗེ་གཟི་བརྗིད་རྩལ་
ཞེས་མཚན་གསོལ། སྤྲོས་བཅས་ཀྱི་དབང་གི་ཐིག་སྣེ་བུད་མེད་དམར་མོ་ཞིག་གིས་འཛིན་པ་དང་དཀྱིལ་འཁོར་ཡང་
བུད་མེད་གཅིག་གིས་འབྲི་གྲོགས་བྱེད་པ་བྱུང༌། དེ་སྐབས་ནམ་གྲུ་རེ་མ་ཏི་ཡང་བབ་ནས་ཡུས་པའི་རྣམ་པས་ཟབ་
གཏེར་གྱི་སྐལ་པ་མང་དུ་ཡོད་པ་རྣམས་ཀྱི་སྲུང་མ་ཡིན་ཚུལ་གྱིས་འུར་འུར་མང་དུ་བྱེད་པ་ལ། ང་ནང་འོད་གསལ་གྱི་
གཏེར་སྒོ་ཕྱེ་བ་ལ། །བྲག་སེར་ཀའི་གཏེར་གྱི་དགོས་པ་མེད། །གཏེར་ཡོད་ཀྱང་ཆོག་ལ་མེད་ཀྱང་ཆོག།སྐལ་ལྡན་
ཡིན་ཡང་ཆོག་ལ་མིན་ཡང་ཆོག།ང་ཆོས་ཟད་བློ་ཟད་ཀྱི་རྣལ་འབྱོར་ལ། །ཁྱེད་གཏེར་སྲུང་གི་ཡུས་ཆེན་འཚོང་མི་
དགོས། །ཞེས་གསུངས། ཐོད་རྒལ་ངོ་སྤྲོད་ཀྱི་དུས་སུ་མཐིང་ག་ཁྱབ་པ་ཆེན་པོའི་འོད་དང༌། དབྱིངས་རྣམ་དག་ཐིག་
ལེ་སྟོང་སྒྲོན་རྣམས་དཔེས་མཚོན་མི་དགོས་པར་མངོན་སུམ་དུ་སྟོན་པར་མཛད། རྡོ་རྗེ་ལེགས་པ་བབ་ནས་ཨོ་རྒྱན་
རྫོང་དུ་འབྱོན་དགོས་པ་དང་སློབ་མ་སོགས་ཀྱི་ལུང་བསྟན་ཕུལ། ནམ་གྲུ་མ་བབ་ནས་དེར་མི་བཞུད་པར་ཞུས་པ་ལ་
དགའ་མི་དགའ་སེམས་ཀྱི་ཆོ་འཕྲུལ་ཡིན་མོད་སོགས་གསུངས་པས་ཡི་རངས་ཕུལ། གཞན་ཡང་ལྷ་རུ་བྲགཨོ་རྒྱན་
རྫོང༌། ཞྭ་ཡི་ལྷ་ཁང་སོགས་གསོ་དགོས་པ་དང༌། བསྟན་བཅོས་རྩོམ་པའི་རྗེས་གནང་ལུང་བསྟན་ཀྱང་ཐོབ། གུ་རུ་
ཡབ་ཡུམ་གྱིས་རྫོགས་པ་ཆེན་པོ་ཀུན་བཟང་དགོངས་པ་ཀུན་འདུས་སྐོར་གཏེར་ཁ་གཉིས་སུ་མཛད་དེ་མཆིམས་ཕུའི་
མཆོད་རྟེན་དང་ལྷ་ཁང་གི་ཀ་གདན་ལ་སྦས་པའི་ཕྱི་མ་ཉིད་དབྱངས་ཅན་ལྷ་མོ་མཆེད་ལྔས་ལུང་བསྟན་པ་བཞིན་
སྐབས་དེ་ཉིད་དུ་འདོན་པར་མཛད། དེ་ནས་གཤེགས་པའི་ལམ་དུ་རྡོ་རྗེ་གཡུ་སྒྲོན་མ། བསྟན་མ་བཅུ་གཉིས། ལྷ་
རབས་མཆེད་དགུ་རྣམས་ཀྱིས་བསུས་ཏེ་གངས་རི་ཐོད་དཀར་དུ་བྱོན། དགོན་གནས་བཏབ་སྟེ་ཨོ་རྒྱན་རྫོང་དུ་མཚན་
བཏགས། དེར་སྐལ་ལྡན་གྱི་སློབ་མ་ཉི་ཤུ་རྩ་གཅིག་ལ་མཁའ་འགྲོ་སྙིང་ཐིག་གསུངས་པ་སོགས་ཆོས་འཁོར་ཡང་རྒྱསྔ་
ཆེར་བསྐོར། མཚན་མོ་འོད་གསལ་གྱི་སྣང་བ་ལས་ཆོས་སྐུའི་དགོངས་པ་ཀ་དག་གི་དབྱིངས་སུ་འཁྱིལ་ཚུལ། དེ་ལས་
རྩལ་སྣང་ལོངས་སྐུ་འཆར་ལུགས་སོགས་མཁའ་འགྲོས་ངོ་སྤྲོད་ཅེར་མཐོང་དུ་གནང། རྣལ་འབྱོར་པ་འོད་ཟེར་གོ་ཆས་
བསྐུལ་ནས་མཁའ་འགྲོ་ཡང་ཏིག་གི་ཡིག་ཆ་རྣམས་མཛད་པའི་ཚེ་འཇའ་འོད་དང་མཁའ་འགྲོའི་འདུ་བ་སོགས་ངོ་
མཚར་བ་བྱུང་ཞིང་མཛོད་བདུན་སོགས་གསུང་རྩོམ་ཕལ་ཆེ་བ་གནས་འདིར་མཛད། ཐོ་རངས་ཁར་རིག་འཛིན་ཀུ་མ་
རཱ་ཛ་བྱོན་ནས་སྡིགས་མཛུབ་མཛད་དེ་ཅང་མི་གསུང་བས་དབང་གི་བརྡར་མཁྱེན། གཤེགས་པའི་མཚན་མ་བྱུང་བ་
ཡང་ཏིང་ངེ་འཛིན་གཅིག་གིས་མོད་ལ་བཟློག་པར་མཛད། ཉི་མ་རྩེ་ཤར་བའི་སྐབས་ཤིག་ཤར་ཕྱོགས་ཀྱི་ནམ་མཁའ་
ནས་སྒྲ་ཞིག་བྱུང་སྟེ་གཟིགས་པས་འོད་ཀྱི་ཚོམ་བུའི་དབུས་སུ་ཀུན་བཟང་ཞི་ཁྲོའི་དཀྱིལ་འཁོར་མང་པོས་ཕྱོགས་
མཚམས་སྟེང་འོག་ཐམས་ཅད་གང་བ་དང༌། བཱི་མ་ལ་སྐུ་མདོག་ལྗང་སེར། མཁའ་སྤྱོད་ཀྱི་བླ་མ་བཞི། ཀུ་མ་ར་ཛ་
ལོངས་སྐུའི་ཆས་ཅན། ཨོ་རྒྱན་རྒྱལ་པོ་རྣམས་གཟིགས་སྐབས་ལྷ་དང་བླ་མའི་ཞལ་གཟིགས་ལུང་བསྟན་དང༌། ལྷུན་
གྲུབ་འོད་གསལ་ཚད་ཕེབས་ཀྱི་སྣང་བ་རྒྱུན་ཆགས་པར་བྱུང་ཞིང༌། སྐུས་བར་སྣང་རི་བྲག་ལ་ཐོགས་མེད་ཏུ་གཤེགས་
པ་དང༌། གསུང་གི་ཆ་ཤས་ཕྲ་མོས་ཀྱང་དཔྱོད་ལྡན་གྱི་ཡིད་འཕྲོག་ཅིང༌། ཐུགས་རྟོགས་པའི་གདེང་རྡོ་རྗེའི་གསུང་
གིས་ཡང་ཡང་བསྟན་པ་སོགས་ཚད་རྣམས་ཀྱང་མངོན་སུམ་དུ་གྱུར། ལྷ་རིང་བྲག་ཏུ་ཞི་ཁྲོའི་སྐོང་བཤགས་ཀྱི་ཆོ་ག་
མཛད་དུས་ནམ་མཁའ་ལ་ཞི་ཁྲོའི་དཀྱིལ་འཁོར་ཚོམ་བུར་བཅས་པ་དེར་ཡོད་ཀུན་ཀྱིས་མཐོང༌། དེ་ཡལ་ནས་ལྷོ་ནུབ་
མཚམས་ཀྱི་ནམ་མཁར་བཱི་མ་ལ་བཞུགས་པའི་ཕྱག་མཛུབ་ཤར་ལྷོའི་མཚམས་སུ་གཏད་ནས་ཞྭའི་ལྷ་ཁང་གསོ་བའི་
ལུང་བསྟན་གྱི་བསྐུལ་མ་མཛད། དེ་སྐབས་མནལ་ལམ་དུ་བཱི་མ་ལ་སེང་གེ་བཞིའི་ཁྲི་ལ་བཞུགས་པ་ཞིག་གིས། ང་ནི་
ཀུ་མ་རཱ་ཛ་ཡིན། །པདྨ་བརྩེགས་པའི་ཞིང་དུ་འགྲོ། །སངས་རྒྱས་བསྟན་པ་དར་བར་གྱིས། །གསུངས་པས་བླ་མ་ཀུ་མ་
རཱ་ཛ་གཤེགས་པ་མཁྱེན་ཏེ་དགོངས་པ་རྫོགས་ཐབས་སུ་འཁོར་གསུམ་ཡོངས་དག་ལན་གསུམ་དང༌། ཁྱད་པར་འོད་
གསལ་རྡོ་རྗེ་སྙིང་པོའི་བསྟན་པ་མི་ནུབ་པའི་ཆེད་དུ་སྐུ་ལུས་དུ་མར་སྤྲུལ་བ་དང༌། གཟའ་བདུད་བྲན་དུ་བཀོལ་བ་
སོགས་རྫུ་འཕྲུལ་ངོ་མཚར་བས་ཐེག་མཆོག་རིན་པོ་ཆེའི་མཛོད་ཡུན་ཐུང་ངུས་གྲུབ་པར་མཛད། རྒྱ་མ་གནས་སུ་
བསོད་ནམས་སེང་གེ་དང་སློབ་དཔོན་དཔལ་མཆོག་སོགས་དགེ་བཤེས་མང་པོ་འདུས་པ་ལ་སྙིང་ཐིག་གི་ཁྲིད་མཛད་
ཚེ་དྲི་བ་ལ་ཐུག་པ་ན་བགྲོ་གླེང་བྱེད་ཆོག་པར་ཞུས་པས། དེ་ལྟར་ན་ཟླ་བ་གཅིག་གི་བར་དུ་མདོ་རྒྱུད་དཔང་དུ་བཞག་
སྟེ་རྩོད་པ་བྱེད་གསུངས་ནས་ལུང་རིགས་གནམ་ལྕགས་འབར་བས་མཁས་རློམ་གྱི་རི་བོ་བསྙིལ། དེ་ནས་འབྲི་གུང་དུ་
སྒོམ་པ་ཀུན་རིན་གྱིས་སྤྱན་དྲངས་ཏེ། ཞྭའི་ལྷ་ཁང་གསོ་བའི་རྒྱུ་རྐྱེན་དང་ཨོ་རྒྱན་དགོན་ཕུལ་བས་མཚོན་གུས་པས་
བསྟེན་པ་ལ་ཟབ་མོའི་གདམས་པས་རྗེས་སུ་བཟུང་སྟེ་ཐར་བའི་ལམ་སྣ་ཟིན་པར་མཛད། ཏི་སྒྲོར་བྱོན་ཚེ་ཌཱཀྐིས་བསུ་
བ་བྱས་ཤིང་གནས་ཀྱང་ཕུལ། ཞྭའི་ལྷ་ཁང་དུ་བྱོན་པ་ན་མི་དཀར་ཞྭ་དཀར་ཅན་ཞིག་གིས་ཕྱག་བྱས་ཏེ་སྡིགས་མཛུབ་
གཏད་པ་རྡོ་རྗེ་ལེགས་པས་བསྐུལ་ཏེ་གསོ་བའི་དུས་ལ་བབ་པར་མཁྱེན། དབུ་རྩེའི་རྒྱབ་ན་གཏེར་མང་དུ་འདུག་པ་
ལས་མཐུན་རྐྱེན་དུ་གསེར་ཕྲན་བུ་དང༌། བསྟན་མ་བཅུ་གཉིས། རྡོ་རྗེ་ལེགས་པ་སོགས་ཀྱི་སྒྲུབ་ཐབས་དུ་མ་སྤྱན་
དྲངས། ས་རོ་བསལ་དུས་སྔར་གྱི་མནན་པའི་ཐོད་པ་རིགས་མི་གཅིག་པ་མང་པོ་འདུག་པ་གསོས་ཏེ་གནོན་པར་
བརྩམས་པ་ན། ས་རྡོའི་ཆར་དང་རླུང་འཚུབ་མུན་སྲོས་པ་ལྟ་བུའི་ཆོ་འཕྲུལ་གྱིས་འཁོར་རྣམས་བག་འཁུམས་ཤིང་ཅིབྱ་
གཏོལ་མེད་དུ་གྱུར་པ་ན་ཉིད་ཀྱིས་གསུང་སྔགས་སྒྲ་དྲག་པོ་དང་བཅས་སྐུའི་འགྱུར་བ་སྟངས་སྟབས་ཀྱིས་ཐོད་པ་
རྣམས་ཐུག་ཆོམ་གྱི་སྒྲ་དང་བཅས་འཕར་བ་ཞབས་ཀྱིས་མནན་པའི་མོད་ལ་ཆོ་འཕྲུལ་ཞི། འགའ་ཞིག་གིས་གུ་རུ་དྲག་
པོ་དངོས་སུ་ཡང་མཐོང༌། ཁྱད་པར་བྱིས་པ་གཡུ་རྣ་ཅན་ཞིག་གིས་ཉིན་བཞིན་བཟོ་བའི་གྲོགས་བྱས་ཏེ་ནུབ་མོ་གར་
སོང་ཆ་མེད་པས་དོགས་ཏེ། ལན་གཅིག་ཀུན་ཀྱིས་བསྲུང་པ་ན་རྩིག་གསེབ་ཏུ་ཐིམ་པ་སོགས་ལེགས་ཉེས་ཐམས་ཅད་
དམ་ཅན་གྱིས་མི་ལབ་པ་བཞིན་བསྟན། རྡོ་རིང་གཉིས་སྔར་ཐང་འགྱེལ་དུ་སོང་བ་ཐབས་འཕྲུལ་གང་གིས་ཀྱང་མ་
སློང་པ་བདེན་སྟོབས་གསུངས་ཤིང་སྐུ་ཆོས་ཀྱི་གཡབ་མོ་མཛད་པས་དེ་མ་ཐག་བསླངས། རབ་གནས་མཛད་དུས་
ཉིད་ཀུན་ཏུ་བཟང་པོའི་སྐུར་སྣང་བའི་ཐུགས་ཀ་ནས་སྤྲོས་པའི་འོད་ཟེར་རེ་རེའི་རྩེ་ལ་སངས་རྒྱས་དང་བྱང་ཆུབ་
སེམས་དཔའ་གྲངས་མེད་པས་བསྐོར་བ། དེ་དག་གིས་མེ་ཏོག་འཐོར་བ་སྐལ་ལྡན་དུ་མའི་མཐུན་སྣང་དུ་བསྟན་ཅིང༌།
གཟིགས་སྣང་དུ་ཐུབ་དབང་དང་བྱམས་པ་ལ་གནས་བརྟན་བཅུ་དྲུག་གིས་བསྐོར་བའི་བྱམས་པས་ཕྱག་མཛུབ་
གདེངས་མཛད་དེ། ཁྱེད་སྐྱེ་བ་གཉིས་འདས་པའི་འོག་ཏུ་པདྨ་བརྩེགས་པའི་ཞིང་དུ་རྒྱལ་བ་རི་རབ་མར་མེའི་རྒྱལ་
མཚན་ཞེས་བྱ་བར་འགྱུར་རོ། །ཞེས་ལུང་བསྟན་ཅིང་དབུགས་དབྱུང་བར་མཛད། དེ་སྐབས་སྤྲེལ་ཟླའི་ཚེས་བཅུ་ཉིན་
ནམ་མཁར་འོད་ཕུང་གི་དཀྱིལ་ཨོ་རྒྱན་རིན་པོ་ཆེ་ཌཱཀྐི་སྡེ་ལྔས་བསྐོར་བར་འོད་ཟེར་འཕྲོ་བ་ཡང་གཟིགས་ཤིང་ཁྲོམ་
བཞི་སྟོང་ཙམ་འདུས་པ་ལ་ཆོས་འཁོར་བསྐོར། དེ་ནས་ས་ཕག་གི་རྩོད་པས་དབུས་གཙང་མི་བདེ་བའི་རྟགས་
གཟིགས་པས་རང་རེ་དཔོན་སློབ་བུམ་ཐང་དུ་འགྲོ་བ་ཡིན་གསུངས་ཏེ་ཕེབས། ལམ་ཞོར་ལྷ་སར་བྱོན་པ་ན་འབྲི་གུང་
པ་དང་འབྲེལ་ཆེ་བས་ཡར་ཀླུངས་པའི་དམག་གིས་མཐའ་བསྐོར་ཏེ་བཀྲོང་བར་བརྩམས་ཚེ། སྐུ་མི་སྣང་བའི་རྫུ་
འཕྲུལ་བསྟན་པས་ད་ཅི་འདི་ན་རང་ཡོད་པ་ཡིན་ཏེ་བྲོས་ཚར་བ་ཡིན་ནམ་མི་འདུག་ཟེར་ཏེ་གླགས་མ་རྙེད། དེ་ནུབ་
བར་ཁང་དུ་གཟིམས་པས་མཚན་ལམ་དུ་ཉིད་ཇོ་བོའི་དྲུང་ན་བཞུགས་པ་ལ་ཇོ་བོའི་སྐུ་ལས་འོད་ཟེར་གསེར་ལྟ་བུ་
འཕྲོས་པ་དང་དབུ་ཐོག་ཏུ་འོད་ཀྱི་ནང་ན། སངས་རྒྱས་རབས་བདུན། སྒྲོལ་མ་དཀར་སྔོན། བདེ་མཆོག་དགྱེས་
རྡོར། སྤྱན་རས་གཟིགས་རྒྱལ་པོ་ལུགས། ཕྱག་སྟོང་སྤྱན་སྟོང༌། རྒྱལ་བ་རྒྱ་མཚོ་རྣམས་གསལ་ཞིང༌། མཐའ་སྐོར་
དུའང་དཔལ་མགོན་བེར་ནག་ཅན། རྒྱལ་ཆེན་སྡེ་བཞི། བདུད་མགོན་སེང་གདོང༌། དཔལ་ལྡན་ལྷ་མོ་རྣམས་
བཞེངས་ནས་ནམ་མཁར་གཟིགས་པ་ཞིག་མཇལ། ལ་ཡག་མན་ཐང་གནས་སུ་མཁན་ཆེན་ཁྱབ་བརྡལ་ལྷུན་གྲུབ་ཀྱི་
དབུས་སྐལ་ལྡན་དུ་མས་གུས་པས་མཆོད་པ་ལ་སྙིང་ཐིག་སོགས་ཟབ་ལམ་གྱི་གདམས་པས་སྨིན་པར་མཛད། རིམ་
གྱིས་ལྷོ་མོན་བུམ་ཐང་ཕྱོགས་སུ་གཤེགས་ཏེ། དགོན་གནས་གླིང་བརྒྱད་དུ་གྲགས་པ། བབ་རོན་ཐར་པ་གླིང༌། ཤིང་
མཁར་བདེ་ཆེན་གླིང༌། སྟོང་ཨོ་རྒྱན་གླིང༌། ཀུ་རེ་སྟོད་ཀུན་བཟང་གླིང༌། སྔོན་ལུང་འབྲེལ་བཅག་གླིང༌། ཁོ་ཐང་རིན་
ཆེན་གླིང༌། མེན་ལོག་ཀུན་བཟང་གླིང༌། སྤ་གྲོ་བསམ་གཏན་གླིང་རྣམས་བཏབ་ཅིང་དེ་དག་དང་ཁད་ཉེ་བར་སྒྲུབ་ཆུ་
བཏོན་པ་དང༌། རྡོ་ལ་ཕྱག་ཞབས་ཀྱི་རྗེས་མང་དུ་བཞག་ཅིང༌། མན་ལོག་ཏུ་འབྲུག་སྒོམ་ཞིག་པོའི་གདུང་བསོད་
ནམས་རིན་ཆེན་གྱིས་ཞབས་ནས་བཏེགས་ཏེ་བཞུགས་དུས། རི་ལོག་ཕན་ཚུན་འཕུར་ནས་གཤེགས་བཞུད་མཛད་པ་
སོགས་མཐའ་འཁོབ་ཀྱི་ཡུལ་གྲུ་ཆོས་ཀྱི་སྒྲ་ཙམ་ཡང་མི་གྲགས་པ་དེ་དག་ཏུ། ཐོགས་རྡུགས་མེད་པའི་རྫུ་འཕྲུལ་ཡ་མ་
ཟུང་དུ་མས་བཏུལ་ཏེ་དགེ་བཅུའི་ལམ་སྲོལ་ཡང་དག་པར་བཙུད་ནས་སོ་སོའི་རྒྱུད་དང་འཚམས་པའི་ཆོས་ཀྱིས་སྨིན་
གྲོལ་དུུ་མཛད་ཅིང༌། ཁྱུང་བདུད་དང་གདོང་ཟུར་སྨན་མོ་སོགས་མི་མ་ཡིན་གདུག་པ་ཅན་རྣམས་རྩིས་ལ་ཕབས་ཏེབྲན་
དུ་བཀོལ་བས། བླ་མ་ལ་སྔ་བ་དྲི་མེད་འོད་ཟེར་ཞེས་ངོ་མཚར་བའི་མཛད་པ་དེ་དག་ད་ལྟའི་བར་དུ་གླེང་ཞིང་
མཆོག་ཏུ་གུས་པར་བྱེད། ཐར་པ་གླིང་དུ་ཀུན་བཟང་དགོངས་པ་ཀུན་འདུས་ཀྱི་ཆོས་སྐོར་རྣམས་དང་གཞན་མན་ངག་
དུ་མ་ཞིག་ཀྱང་གཏེར་དུ་སྦས། སླར་ཡང་ལྷོ་བྲག་གི་ཆེ་དགུས་སྤྱན་དྲངས་ནས་ལ་ཡག་ལྷ་ལུང་སོགས་སུ་མཁན་ཆེན་
ཁྱབ་བརྡལ་ལྷུན་གྲུབ་སོགས་འདུས་པ་སྟོང་ཕྲག་ཏུ་ལོངས་པ་ལ་གསང་བ་སྙིང་ཐིག་གི་དབང་ཁྲིད་མཛད། ཕག་གྲུ་ཏ་
སི་བ་སྔར་འབྲི་གུང་པའི་སྟོབས་ཀྱིས་ཧ་ཅང་གུས་པ་མེད་ཀྱང་མཁྱེན་རྟོགས་དང་ཕྲིན་ལས་ལ་རྗེས་སུ་དད་ནས་
གཡོར་པོ་གཞུང་དུ་རྙེད་བཀུར་བཟང་པོས་ཡུན་རིང་དུ་མཆོད་ཅིང་ཉིས་སྟོང་དུ་ལོངས་པའི་འདུས་པ་ལ་སྙིང་ཐིག་གི་
དབང་ཁྲིད་མཛད་ཅིང༌། ཏ་སི་ཉིད་ཆོས་རྗེ་འདི་ཡི་མཁྱེན་རབ་ལ་ཧ་ལས་ཏེ་ཀློང་ཆེན་རབ་འབྱམས་པ་ཞེས་གུས་པ་
མཛད་པས་ཕྱིས་སུ་མཚན་དེ་ལྟར་དུ་གྲགས། གོང་དཀར་དུ་སི་ཏུ་པ་གཙོ་བོར་གྱུར་པ་ལ་དབང་དང་གདམས་པ་དུ་
མས་རྗེས་སུ་བཟུང༌། དབུས་ཀྱི་གཡོ་རུ་སྐལ་ལྡན་བྱམས་པ་སྡེངས། གཡུ་སྡེངས། སྤང་སྡེངས་རྣམས་ཀྱི་དགོན་པ་
བཏབ་སྟེ་ཅི་རིགས་སུ་བཞུགས་པས་གྲྭའི་སྡེངས་གསུམ་དུ་གྲགས། ས་སྐྱ་བླ་མ་དམ་པས་གཞི་ལམ་འབྲས་བུའི་
བཞེད་ཚུལ་གྱི་དྲི་བ་མཛད་པ་ལ་ལན་དུ་ཞུ་ཡིག་རིན་པོ་ཆེ་གསེར་གྱི་མཆོད་སྡོང་མཛད་པའི་རྗེས་སུ། རབ་གསལ་
སྙན་པར་སྨྲ་བའི་ངག་འདི་ནི། །འཆད་རྩོད་རྩོམ་པའི་གནས་ལ་མ་རྨོངས་ཤིང༌། །ལུང་རིགས་མན་ངག་དུ་མའི་བློ་
མིག་ཅན། །སྙིང་པོའི་དེ་ཉིད་རྟོགས་པའི་རྣལ་འབྱོར་པས། །གཞུང་རི་རིན་ཆེན་བརྩེགས་པའི་གནས་ནས་
ཕུལ། །ཞེས་པ་ཕུལ་བས་མཉེས་ཤིང་གཅེས་སྤྲས་སུ་མཛད། གཞན་ཡང་མདོ་སྔགས་སྤྱི་དང་ཁྱད་པར་རྫོགས་པ་ཆེན་
པོའི་གནད་འགག་གི་བསྟན་བཅོས་མང་དུ་མཛད་པ། གསང་ཕུག་གྲགས་བཟང་སོགས་མཁས་པ་ཕལ་གྱི་བློར་མ་
ཤོང་བས་དྲི་བ་རྣམས་ལ་དངོས་སུ་འབེལ་གཏམ་དང་བརྒྱུད་ནས་རིགས་ཤིང་འཐད་པའི་དྲིས་ལན་འཕྲིན་ཡིག་མཛད་
པས། ངེས་ཤེས་འདྲོངས་ནས་ཆོས་དང་གང་ཟག་ལ་དད་པ་ཐོབ་ཅིང་ཀུན་མཁྱེན་ཆོས་རྗེ་ཞེས་དོན་དང་མཐུན་པའི་
མཚན་ཤུགས་འབྱུང་དུ་ཐོགས། དེ་ཡང་འདན་སྒོམ་ཆོས་གྲགས་བཟང་པོས། ངག་གི་དབང་པོས་འཆད་ལུགས་མཐོང་
ཙ་ན། །སྐུ་མཆེད་གསུམ་གྱི་འཆད་ལུགས་དིག་དིག་པོ། །ཀློང་ཆེན་རབ་འབྱམས་རིགས་གྲལ་མཐོང་ཙ་ན། །ཕྱྭ་
གཙང་དན་གསུམ་རྩོད་པ་རྐྱང་རྐྱང་པོ། །ཀུན་མཁྱེན་ཆེན་པོས་རྩོམ་པ་མཐོང་ཙ་ན། །བུ་དོལ་ཤཱཀ་གསུམ་རྩོམ་པ་
མོག་མོག་པོ། །སྣ་ཚོགས་རང་གྲོལ་ལྟ་དགོངས་མཐོང་ཙ་ན། །ཆེན་པོ་གསུམ་གྱི་གྲུབ་མཐའ་ཡུ་ཡུ་པོ། །ཞེས་དོན་ལ་
གནས་པའི་བསྟོད་པ་ཕུལ། ལྷ་སར་བྱོན་པ་ན་དགེ་འདུན་མང་པོས་སེར་སྦྲེང་གིས་བསུས་ཤིང་ཟླ་བ་ཕྱེད་ཀྱི་རིང་ལྷ་
ས་དང་ར་མོ་ཆེའི་བར་དུ་ཆོས་ཁྲི་བརྩིགས་པའི་སྟེང་ནས་སེམས་བསྐྱེད་སོགས་ཆོས་འཁོར་རྒྱ་ཆེར་བསྐོར། གསང་
མཚུར་སྡེ་གསུམ་གྱི་མཁས་པ་ང་རྒྱལ་ཅན་མང་པོ་ལུང་རིགས་ཀྱིས་རྨེག་མེད་དུ་བཏུལ་ནས་དད་པའི་གནས་ལ་བཀོད།
གནས་བརྟན་རྣམས་ལ་མཆོད་པ་དང་བཤད་སྒྲུབ་ཀྱི་སྡེ་མང་པོར་ཚོགས་བསགས་རྒྱ་ཆེར་སྤེལ་ནས་བསྟན་འགྲོའི་
ཕན་བདེ་རྒྱས་པའི་རྒྱུར་བསྔོ་བར་མཛད། སྙེ་ཕུ་ཤུག་གསེབ་ཏུ་ཕེབས་ནས་སྐལ་ལྡན་གྱི་འདུས་པ་སྟོང་ཕྲག་བརྒལ་བ་
ཟབ་ལམ་རྫོགས་པ་ཆེན་པོས་སྨིན་པར་མཛད། མཁར་བ་རིར་སི་ཏི་ཤཱཀྱ་བཟང་པོས་མཆོད་ཅིང་དབང་དང་གདམས་
པ་དུ་མས་བྱིན་གྱིས་བརླབས། དབྱར་བཞུགས་ཀྱི་ཕོགས་ཕུལ་ནས་གྲོགས་ཨོ་རྒྱན་དགོན་པའི་ཕུའི་རྫ་འདབས་ནས་
མདའི་བྲག་རྩ་ཡན་གང་བས་ཆོས་གསན། འབྲི་གུང་གི་མཁན་སློབ་སོགས་ཆོས་འཆད་ཀྱི་སློབ་དཔོན་བཞི་བཅུ་ཙམ་
དང་མི་ཆེན་སྐྱ་བཙུན་མང་པོས་མཚོན་འདུས་པ་སུམ་སྟོང་དུ་ལོངས་པ་ལ་འོད་གསལ་རྡོ་རྗེ་སྙིང་པོའི་དབང་ཁྲིད་རྒྱབ་
ཆོས་དང་བཅས་པ་གསུངས་ཤིང༌། ཡོ་བྱད་དུ་མས་འགྱེད་ཆེན་དང་ཚེས་བཅུ་བྱུང་ངོ་ཅོག་ལ་འཕེན་ཡུལ་ནས་རྩེ་མོརྒྱལ་
བར་གྱི་ཚོགས་པ་རྣམས་ལ་མཆོད་པར་མཛད། དུས་རྒྱུན་དབེན་པར་གཤེགས་ནས་བསྟར་ཆགས་པའི་འཆད་
ཉན་དགོན་གནས་ལ་བརྟེན་པ་ཆེར་མ་བསྐྱངས་ཀྱང་ཕར་ཚད་སོགས་གཞུང་ཆེ་བ་འགའ་བློ་གསལ་ཅི་རིགས་པར་
གསུངས། དེ་ནས་རེ་ཞིག་ན་གཞན་དོན་ནུས་པ་བརྒྱ་ཕྲག་ལ་དབང་གོང་མ་སོགས་ཐུན་མོང་མིན་པའི་གདམས་པ་
དང་རྒྱུད་འགྲེལ་མན་ངག་རྣམས་མཐའ་རྒྱས་སུ་བསྩལ་ནས་རྒྱལ་སྲས་བཟོད་པ་ལ་ཐེམ་སྐས་དེ་བསྒྱུར་ལ་སུ་ཡང་མ་
གཏོང་བར་ཡི་གེ་ཚུགས་གསུངས། སློབ་ཚོགས་ཡོངས་ལ་ཞལ་ཆེམས་དྲི་མ་མེད་པའི་འོད་དང་གནད་ཀྱི་མེ་ལོང་
གཉིས་གནང༌། ཆོས་ཐོན་པའི་ཚོགས་འཁོར་གྱི་ཚེ་རང་རེ་དཔོན་སློབ་ཟབ་མོའི་ཆོས་ཀྱི་འཁོར་ལོ་བསྐོར་ནས་ཚོགས་
ཀྱི་དགའ་སྟོན་བྱེད་པ་ད་ནང་ཙམ་དུ་གདའ་འོ། །ཁྱེད་རང་གཞན་དོན་ནུས་པ་ཚོས་སྐལ་པ་ལྡན་པའི་སློབ་མ་རྣམས་
ལ་རང་འདོད་ཀྱི་འཁྲིས་མེད་པར་དབང་སྐུར། རྒྱུད་ཤོད། མན་ངག་སྟོན། དམ་ཆོས་ཉམས་སུ་ལེན་པ་རྣམས་འཇིག་
རྟེན་གྱི་བྱ་བ་དོན་དུ་མ་གཉེར་བར་ཁྲེགས་ཆོད་དང་ཐོད་རྒལ་གྱི་དོན་ལ་མཉམ་པར་ཞོག།མ་གོ་བའི་སྐབས་བྱུང་ན་
ཁོ་བོས་བྱས་པའི་ཡང་ཏིག་ཡིད་བཞིན་ནོར་བུ་འདི་ཡིད་བཞིན་གྱི་ནོར་བུ་བསམ་འཕེལ་དང་འདྲ་བ་ཡིན་པས་བལྟརྟོག་
ཞིབ་མོས་སྒོམས་ལ་གཏན་བདེའི་སྙིང་པོ་ལོན་པར་གྱིས་ཤིག་ཅེས་ཞལ་བཀོད་ནན་ཏན་མཛད། དེ་ནས་ཞྭ་ལྷ་
ཁང་དུ་བྱོན་ནས་མཆོད་པ་དང་སྨོན་ལམ་མཛད་ཅིང༌། ཁྲོམ་ཆོས་གསུང་དུས་མེ་ཏོག་གི་ཆར་ངོ་མཚར་བ་བབ། རིམ་
གྱིས་ཨོ་རྒྱན་དགོན་དུ་དལ་གཅིག་བཞུགས་ནས་ཁོ་བོས་ཁྱེད་རྣམས་ལ་མྱ་ངན་མི་འཇོག་གསུངས་ནས་མཆིམས་ཕུར་
ཕེབས། སློབ་རིགས་ཡོན་བདག་རྣམས་སྐྱེལ་ཐུང་བྱོན་པ་ལ་ད་ཁྱེད་རང་རྣམས་སེམས་འཕྲེང་བ་ལས་མི་ཡོང་བས་
ཕྱིར་ལོག་དགོས། ད་ཕྱིན་ཆོས་ལ་འབུངས་སོགས་ཞལ་འཁོས་མཛད་ནས་མཆིམས་ཕུར་ཕེབས། ཞལ་ནས་འོ་གནས་
འདི་རྒྱ་གར་གྱི་དུར་ཁྲོད་བསིལ་བ་ཚལ་དང་མཚུངས་པ་ཡིན། གཞན་དུ་སྐྱེ་བ་ལས་འདིར་ཤི་བ་དགའ་བར་བཤད་
པས་ད་སྒྱུ་ལུས་ཀྱི་ཕུང་པོ་འདི་ཡང་དུར་ཁྲོད་འདིར་འཇོག་བསམ་པ་དེ་ཐོག་ཏུ་ཕེབས་སོང་གསུངས། དེར་བསམ་
ཡས་དུད་གཏོང་དྲུག་སོགས་ཀྱིས་གདན་འདྲེན་ཞུས་ནས་འདུས་པ་མང་པོ་ལ་གསང་བ་བླ་ན་མེད་པའི་ཁྲིད་མཛད་པ་
ན། ཚོགས་པ་ཆེས་མང་བས་སྤྲོས་མེད་ཀྱི་དབང་ལ་ཞག་དུ་མར་འགོར་སྐབས་རིམ་གྱིས་སྙུན་པའི་ཚུལ་བསྟན། ཚེས་
བཅུ་དྲུག་གི་ཉིན་ཚོགས་གཏོར་ཤོམས་ཤིག་དབང་བྱེད་པ་ཡིན་གསུངས་པས། སྐུ་བསྙུན་པས་འོ་བརྒྱལ་བ་གདའ་
ཞག་ཤས་སྐུ་ངལ་གསོ་བར་ཞུས་པས། དེ་མི་དགོས་དབང་འདི་ཚར་བ་བྱེད་གསུངས་པ་ལ་ནན་གྱིས་ཞུས་
པས། དབང་ཚར་བ་གཅིག་བྱེད་བསམ་པ་ཡིན་ཏེ་ཁྱེད་རྣམས་མི་ཉན་པར་གདའ་གསུངས་ནས། དགུང་ལོ་ལྔ་བཅུ་རྩ་
དྲུག་བཞེས་པ་ཆུ་མོ་ཡོས་ཀྱི་ལོ་རྒྱལ་ཟླའི་ཚེས་བཅོ་བརྒྱད་ཀྱི་དྲོ་ཁའི་དུས་སུ་འོད་གསལ་རང་གྲོལ་དང༌། ཀུན་དཔལ་
སོགས་དྲུང་དུ་ཡོད་པ་རྣམས་ལ་མཆོད་པ་ཞིག་ཤོམས་ལ་ཕྱིར་སོང་གསུངས་པས། མཆོད་པ་བཤམས་ཏེ་འདུག་པར་
ཞུས་པས། འོ་ན་སྒྱུ་ལུས་གོག་པོ་འདི་དོར་བ་ཡིན་པས་ཁྱེད་རྣམས་ཅ་ཅོ་མ་བྱེད་པར་མཉམ་པར་ཞོག་ལ་སྡོད་ཅིག་
གསུངས་ནས། ཆོས་སྐུའི་བཞུགས་སྟངས་ཀྱིས་གདོད་མའི་ཟད་སར་གཤེགས་སོ། །དེའི་ཚེ་རྡུལ་བྲལ་གྱི་ནམ་མཁའ་
ལ་འཇའ་ཚོན་གྱི་གུར་དང་མེ་ཏོག་གི་ཆར་བབ་པ། སེ་བ་ལ་སོགས་པའི་ལོ་འདབ་དང་མེ་ཏོག་སྣ་ཚོགས་ཁ་འབུས་
པ། འགའ་ཞིག་འོད་གསལ་གྱི་རྟོགས་པ་ཕྱམ་བརྡལ་བ་བཅས་ངོ་མཚར་བའི་ལྟས་ཟླ་མཆོད་ཀྱི་བར་རྒྱུན་ཆགས་པ་
དང༌། མཆོད་པའི་དུས་ཞག་ཉེར་ལྔའི་བར་སྐུ་གདུང་ལ་ཙནྡན་དང་ག་བུར་གྱིས་ཀྱང་མཚོན་དུ་མེད་པའི་དྲི་བཟང་པོས་
ཀུན་ཏུ་ཁྱབ་ཅིང༌། སྤུར་ཁང་དུ་སྤྱན་དྲངས་པའི་ཚེ་ས་ཆེན་པོ་འདི་ལན་གསུམ་དུ་གཡོས་ཤིང་ཐུགས་ལྗགས་སྤྱན་
གསུམ་ཞུགས་ཀྱིས་མ་རྨས་པ་དང༌། ཁྱད་པར་དབུ་ཀླད་ཉམས་པ་མེད་པ་ཁ་དོག་དཀར་སེར་རྡོ་བ་ལྟར་མཁྲེགས་པའི་
གོང་བུ་ཤ་རི་རམ་གྱི་རང་བཞིན་སོགས་གདུང་རིགས་ལྔ་དང༌། རིང་བསྲེལ་ཕྲ་མོ་གྲངས་མེད་པ་དང༌། ཞུན་ཐིག་
ལས་ཚེ་དཔག་མེད་ལ་སོགས་པའི་སྐུ་དུ་མ་ཡང་བྱོན་ཞིང༌། ནང་རྟེན་དུ་སྐུ་བརྙན་དེ་དག་དང༌། ཕྱི་རྟེན་དུ་བྱང་ཆུབ་
ཆེན་མོའི་མཆོད་རྟེན་བྱས་པ་ཡང་གནས་དེ་ཉིད་དུུ་བསྒྲུབས། ཕྱི་རབས་གདུལ་བྱའི་བསྒོ་སྐལ་དུ་མདོ་དང་སྔགས་ཀྱི་
ཆོས་ཚུལ་གྱི་དགོངས་དོན་མ་ནོར་བ་གཏན་ལ་འབེབས་པའི་བསྟན་བཅོས་བདེ་བར་གཤེགས་པའི་གསུང་རབ་དང་
གཉིས་སུ་མ་མཆིས་པའི་གཞུང་ལུགས་ཆེན་མོ་མཛོད་ཆེན་བདུན་དང༌། ངལ་གསོ་སྐོར་གསུམ། མུན་སེལ་སྐོར་
གསུམ་སོགས་ཕྱི་ཡི་གནས་དང་ནང་གི་གནས་དང་དེ་ཁོ་ན་ཉིད་ཀྱི་གནས་གསུམ་དུ་རྣམ་པར་བཞག་པའི་གསུང་རབ་
ཉིད་མཛད་པ་དཀར་ཆག་རིན་ཆེན་མཛོད་ཁང་དུ་བཀོད་པ་ལྟར་ཆོས་ཚན་བརྒྱ་ཕྲག་དུ་མ་མཛད་ཅིང༌། མཚན་ཉིད་
ཐེག་པའི་སྐོར་གནས་དུས་ཀྱི་དབང་གིས་དེང་སང་ཆེར་མི་བཞུགས་ཀྱང༌། དགོངས་པ་ཀློང་ཆེན་ཡངས་པ་ཡེ་ཤེས་ཀྱི་
འཁོར་ལོ་ལས་རང་བྱུང་བའི་ཚུལ་དུ་བབ་པའི་སྔགས་རྫོགས་ཀྱི་སྐོར་ཕལ་ཆེར་རྒྱལ་བསྟན་ཡུན་གནས་ཀྱི་སྙིང་པོར་
འཛམ་གླིང་ན་ཉི་ཟླ་ལྟར་གསལ་བཞིན་བཞུགས་པ་ལགས་ན། ཇི་སྐད་དུ། ཆོས་རྗེ་དཔལ་སྤྲུལ་རིན་པོ་ཆེའི་ཞལ་ནས།
རྒྱལ་བའི་བསྟན་པ་ཇི་སྙེད་ཡོངས་རྫོགས་པའི། །གཞུང་བཟང་ཀུན་མཁྱེན་བླ་མས་བཀྲལ་འདི་འདྲ། །འཕགས་བོད་
མཁས་གྲུབ་སྐྱེ་བོ་སུ་ཡིས་ཀྱང༌། །སྔོན་ཆད་འཛམ་གླིང་ལྗོངས་འདིར་བཞག་པ་མེད། །རྒྱུ་འབྲས་ཐེག་པའི་ཆོས་ཀྱི་སྒོ་
དབྱེ་ནས། །རྒྱུ་འབྲས་མེད་དབྱིངས་མཉམ་པར་ལ་བཟླ་བའི། །ཀུན་མཁྱེན་བླ་མའི་གདམས་ངག་འདི་འདྲ་
བ། །འཆད་པའི་མཁས་གྲུབ་གཉིས་པ་སུ་ཡང་མེད། །གཞུང་བཟང་འདི་དག་ཡན་ལག་ཡོངས་རྫོགས་ཡིན། །ཞེས་
དང༌། ཀུན་མཁྱེན་བླ་མ་འཇའ་ལུས་སྒྱུ་མའི་སྐུ། །སྔོན་ཞིག་བཞུགས་ཀྱི་ད་ལྟ་མེད་པ་མིན། །མཐོང་བར་ནུས་ན་རང་
གི་མདུན་ན་བཞུགས། །རྟོག་པས་བསྒྲིབས་ན་མངོན་སུམ་བྱོན་ཀྱང་ཅི། །གསུང་གི་གནད་འདི་རྟོགས་པའི་འདྲ་
འབག་སྟེ། །ཡེ་ཤེས་ཆེན་པོ་ཚིག་དོན་བྱིན་གྱིས་བརླབས། །མོས་གུས་ཅན་ལ་བདེན་ཚིག་གཏད་རྒྱ་མཛད། །ངེས་
པར་བསྟེན་ན་བླ་མ་འདི་རང་ཡིན། །ཞེས་གསུངས་པ་ལྟར་རང་རེ་རྗེས་སུ་འཇུག་པའི་སྔ་འགྱུར་རིང་ལུགས་འཛིན་པ་
ཡོངས་ཀྱིས་ཐོས་བསམ་སྒོམ་གསུམ་ཆོས་སྤྱོད་ཀྱི་མཛད་པས་གསང་ཆེན་སྙིང་པོའི་བསྟན་པ་རིན་པོ་ཆེ་ཕྱོགས་དུས་
ཀུན་ཏུ་དར་ཞིང་རྒྱས་པར་མཛད་དུ་གསོལ་ཞེས་སྙིང་ནས་ཞུ་བ་ལགས་སོ ། ། གཞན་ཡང་ཀུན་མཁྱེན་བླ་མས་
གསུང་གི་བདུད་རྩིས་བསྐྱངས་ཤིང་བརྒྱུད་པ་འཛིན་པའི་ཐུགས་སྲས་ཞལ་སློབ་གཙོ་བོར་གྱུར་པ། མཁས་གྲུབ་ཁྱབ་
བརྡལ་ལྷུན་གྲུབ། མཁས་གྲུབ་བདེ་ལེགས་རྒྱ་མཚོ། མཁས་གྲུབ་ཆོས་ཀྱི་གྲགས་པ་སྟེ་གྲགས་པ་ཐོབ་པའི་མཁས་
གྲུབ་གསུམ། སྤྲུལ་སྐུ་དཔལ་འབྱོར་རྒྱ་མཚོ། སློབ་དཔོན་སངས་རྒྱས་ཀུན་དགའ། སློབ་དཔོན་བློ་གྲོས་བཟང་
པོ། སྟག་མགོའི་བྱ་བྲལ་ཆོས་རྗེ་སྟེ་བསྟན་པ་སྤེལ་བའི་བཤེས་གཉེན་བཞི། འདན་སྒོམ་ཆོས་གྲགས་བཟང་པོ། རྒྱལ་
སྲས་བཟོད་པ་གྲགས་པ། བླ་མ་དཔལ་མཆོག།གུ་རུ་ཡེ་ཤེས་རབ་འབྱམས། གཞོན་ནུ་སངས་རྒྱས་ཏེ་ཐུགས་སྲས་བུ་
ཆེན་ལྔ། ཕ་རྒོད་རྟོགས་ལྡན་རྒྱལ་པོ། རྣལ་འབྱོར་འོད་ཟེར་གོ་ཆ། གུ་རུ་འོད་གསལ་རང་གྲོལ། བྱ་བཏང་བསོད་
ནམས་འོད་ཟེར་ཏེ་གྲུབ་པ་ཐོབ་པའི་རྣལ་འབྱོར་པ་བཞི་རྣམས་དང༌། གཞན་ཡང་འཁྲུལ་ཞིག་སངས་རྒྱས་དབོན་པོ།
གླུ་མཁན་བསོད་ནམས་སེང་གེ། ཨོ་རྒྱན་ཆོས་རྗེ། གྲགས་པ་དཔལ། སངས་རྒྱས་དཔལ་རིན་སོགས་བགྲངས་པའི་
ཡུལ་ལས་འདས་པ་དང༌། དེ་བཞིན་རྟོགས་པའི་དབང་ཕྱུག་ལྷ་བཙུན་ཆེན་པོ་དང༌། གཏེར་ཆེན་འགྱུར་མེད་རྡོརྗེ།
འབྲི་གུང་རིན་ཆེན་ཕུན་ཚོགས། རིག་འཛིན་འཇིགས་མེད་གླིང་པ། མི་འགྱུར་ནམ་མཁའི་རྡོ་རྗེ། འཇམ་དབྱངས་
མཁྱེན་བརྩེའི་དབང་པོ་རྣམས་ལ་ཡེ་ཤེས་སྒྱུ་མའི་སྐུས་རྗེས་སུ་བཟུང་ཞིང་ཞལ་གཟིགས་ལུང་བསྟན་གནང་ནས་དོན་
བརྒྱུད་འཛིན་པའི་བཀའ་གཏད་མཛད་དོ། །
|
Subscribe to:
Post Comments (Atom)
0 comments:
Post a Comment