Thursday 6 March 2014
00:09 | 
Posted by
༄༅།། ཨེ་མ་ཧོའི་རིག་མཛོད་། |
༄༅།།བཀྲ་ཤིས་བདེ་ལེགས་ཀྱི་ཞབས་གདུབ་རིན་པོ་ཆེ།།
ན་མོ་གུ་རུ་ཤྲྰིཿམངྒ་ལྃ་ཡེ།།
སངས་རྒྱས་ཆོས་དང་འཕགས་པའི་དགེ་འདུན་ལ།།
ཕྱག་འཚལ་མཆོད་འབུལ་སྐྱབས་མཆི་གསོལ་བ་འདེབས།།
བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག།
ཐོ་རེངས་དད་དགའི་ཉམས་ལེན་རབ་ཏུ་བཀྲ༵།།
ཞོགས་པར་ཉི་མའི་འཛུམ་མདངས་ཀུན་ཏུ་ཤིས༵།།
ཉིན་གུང་འཚོ་བའི་གསོལ་ཚིགས་ཤིན་ཏུ་བདེ༵།།
དགེ་མཚན་རྨི་ལམ་འོད་གསལ་རྟག་ཏུ་ལེགས༵།
བྱང་ཆུབ་སེམས་མཆོག་འབད་པའི་དགེ་མཚན་དང་།།
བླ་མ་ནམ་རྒྱུན་སྒོམ་པའི་རྣལ་འབྱོར་མཐུས།།
ཡི་དམ་མཁའ་འགྲོར་དགོངས་པ་གཅིག་མཐུན་ནས།།
དམ་ཅན་ཆོས་སྐྱོང་སྲུང་མས་རྟག་ཏུ་སྐྱོང་།།
ན་ཆུང་བྱིས་པ་སློབ་སྦྱོང་གནས་ལ་སྤྲོ།།
གཞོན་ནུ་བློ་ལྡན་དམ་པའི་ཆོས་ལ་དགྱེས།།
འཛམ་གླིང་སྐྱེ་འགྲོ་ཞི་བདེའི་དཔལ་ལ་སྤྱོད།།
ཀུན་བཟང་རྫོགས་ལྡན་དང་པོ་མངོན་པར་བཞད།
ཐོས་བསམ་རྣམ་དཔྱོད་བློ་གྲོས་ཉི་འོད་བཀྲ༵།།
སྒོམ་པའི་ཉམས་མྱོང་ལྷག་བསམ་དུང་ཟླ་ཤིས༵།།
རབ་འབྱམས་ཤེས་བྱའི་སྐར་ཚོགས་མཁྱེན་པས་བདེ༵།།
འབད་མེད་ཕྲིན་ལས་ཀུན་བཟང་ངང་གིས་ལེགས༵།།
བཀྲ༵་ཤིས༵་འགོག་ལམ་བདེན་པའི་དེ་ཉིད་མཇལ།།
བདེ༵་ལེགས༵་སྡུག་ཀུན་སྤངས་པའི་སྐལ་བཟང་རིགས།།
ཕུན༵་སུམ༵་ཚོགས༵་པའི་རིག་དང་ཞབས་སུ་ལྡན།།
ཆོས་བཞིན་སྤྱོད་པ་འཇིག་རྟེན་རྒྱན་ཏུ་མཛེས།།
རྫོགས་པ་ཆེན་པོའི་བསྟན་པ་ཕྱོགས་ཀུན་ཁྱབ།།
རིག་འཛིན་བརྒྱུད་པའི་སྲོལ་བཟང་གོང་དུ་འཕེལ།།
འཇའ་ལུས་མཁའ་སྤྱོད་བགྲོད་པའི་མཆེད་ལྕམ་ཚོགས།།
འཁོར་འདས་དཔལ་དུ་ཞབས་པད་བརྟན་གྱུར་ཅིག།
ཅེས་པ་རབ་རྒྱན་ཤིང་རྟའི་རྒྱལ་ཟླའི་ཡར་ཚེས་རྫོགས་ལྡན་དང་པོའི་སྐབས་སུ་མཁའ་འགྲོ་ཚེ་རིང་སྒྲོལ་དཀར་གྱིས་བསྐུལ་བ་བཞིན་དུ་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་དུ་མཁན་ཆེན་བླ་མ་འམ་རིག་འཛིན་ཨེ་མ་ཧོས་གང་འཆར་དུ་གསོལ་འདེབས་སྨོན་ལམ་བགྱིས་པར་དགེའོ།། །།
Subscribe to:
Post Comments (Atom)
0 comments:
Post a Comment