༄༅།། ཨེ་མ་ཧོའི་རིག་མཛོད།

༄༅། །ཏྰ་ཡི་སི་ཏུའི་ཀརྨ་པ་ལ་གདམས་པ་ཞྭ་རྩོད་གཅོད་པའི་
གནམ་ལྕགས་རལ་གྲི་བཞུགས་སོ། །
ན་མོ་གུ་རུ་ཀརྨ་དུ་ཁཿཡེ། །
ཆོས་འཇིག་རྟེན་ཡ་རབ་དྲིན་བཟོ་ཞིག །
དེ་མེད་ན་དམ་ཆོས་རྩ་བ་རུལ། །
གཞི་སྡོང་པོ་མེད་པའི་ཡལ་ག་བཞིན། །
འབྱུང་མི་སྲིད་དཔེ་དོན་ཨེ་ཤེས་སམ། །
ཕྱི་དཀའ་སྤྱད་མེད་པའི་ཆོས་པ་གཅིག །
ནང་ཆགས་སྡང་མ་ཞིག་ལོག་རྟོག་གཉིས། །
དོན་རང་དོན་སེམས་པའི་གང་ཟག་གསུམ། །
སུས་སྒྲུབ་ཀྱང་དམ་ཆོས་མ་ཡིན་ལགས། །
གཞི་སོ་ཐར་ངེས་འབྱུང་རྣམ་དག་གཅིག །
ལམ་བྱང་སེམས་སྙིང་རྗེ་ཆེན་པོ་གཉིས། །
དོན་གསང་སྔགས་དག་མཉམ་བདེན་པ་གསུམ། །
སུས་སྒྲུབ་ཀྱང་དམ་ཆོས་དེ་ཉིད་ཡིན། །
ཡ་གྲོགས་པོ་མིང་མེད་གཤིན་པོ་ཁྱེད།
བློ་མ་བདེ་ཟིན་བྲིས་ཞིག་ལ་སྡང་། །
ངས་ཡང་གསང་སྙིང་གཏམ་བསྔོ་སྨོན་བྱས། །
དོན་མ་གོ་བསྟན་དགྲ་དམ་ཉམས་ཟེར། །
ཟེར་ཆེ་ནས་ང་ཡིས་བདེན་པ་བརྡར། །
གྲོགས་སྙིང་དམར་ཨ་ཁྱིག་ཀརྨ་པ །
གྲོགས་ཞབས་འདྲེན་དེ་ཚོ་ཁྱེད་ཀྱིས་ཕུད། །
ད་སྙིང་པོ་ལོན་སོང་སྙིང་གི་གྲོགས། །
ངའི་བརྒྱུད་གསུམ་བླ་མ་རིན་པོ་ཆེས། །
ལས་དེ་འདྲའི་བྱ་བ་མི་བྱེད་ཁི། །
དོན་དེ་འདྲ་སྙིང་པོ་མི་འཛིན་ཁི། །
གོ་ཨེ་བྱུང་སྙིང་མེད་བླ་བཙོངས་ཁྱེད། །
ཁྱོད་ད་དུང་བཤད་འདོད་འཕག་འདོད་ན། །
དེང་བླ་རྫུན་ཁྲེལ་མེད་ང་རྒྱལ་ཅན། །
ཁྱེད་སྤྲུལ་རྫུན་ཚང་མའི་རྫུན་རྐུབ་དེ། །
དུས་གཅིག་ལ་གཞི་མེད་བཟོ་རྒྱུ་ཡིན། །
འགྲོ་བག་མེད་རང་སྣང་གང་ཤར་དང་། །
གདུགས་ཟངས་གསེར་མལ་ཁྲི་སྟེང་ནས་འགྱིངས། །
ཟས་ཤ་ཁྲག་ལོངས་སྤྱོད་ངོམས་མེད་སྤྱོད། །
གཉིད་གཏི་མུག་རོ་ཉལ་རྒྱགས་ཆེ་ཚོ། །
ཕྱི་རྒྱ་སྤྲུལ་ཟེར་བའི་ཤ་རྒྱགས་གཅིག །
ནང་བླ་ཆེན་ཟེར་བའི་ཀླད་རུལ་གཉིས། །
དོན་བྱམས་བརྩེ་བྲལ་པའི་ཁྲེལ་མེད་གསུམ། །
སྤྱིར་སངས་རྒྱས་བསྟན་པའི་དགྲ་བོ་ལགས། །
དཔེར་སི་ཏུའི་བླ་སྤྲུལ་ངོས་འཛིན་དེ། །
ཆོས་མ་ཤེས་འཇིག་རྟེན་སྒྲུབ་ཟས་རེད། །
ཆོས་ཆོས་བཞིན་སྙིང་པོ་མ་ལོན་ན། །
ཆོས་ངན་སོང་འགྲོ་བའི་རྒྱུ་ཡིན་གསུངས། །
ཞྭ་སྙིང་པོ་བསམ་ནས་ཞྭ་རྩོད་འཛིན། །
རྒྱུ་སྙིང་པོ་བསམ་ནས་རྒྱུ་རྩོད་སྐྱོང་། །
ནོར་སྙིང་པོ་བསམ་ནས་ནོར་རྩོད་སྤེལ། །
སྡོད་མ་ཚུགས་ས་གཞི་དམ་ཉམས་བསྐང་། །
དྲིན་མ་ཤེས་དྲིན་ལན་ལོག་མཇལ་བྱས། །
དཔེར་རི་བོ་ཆེ་ཡི་བུ་ཆུང་འདི། །
གཅེས་ཆེ་ནས་རང་ཆོས་རང་གི་ཕུང་། །
དོན་སྙིང་པོ་འདུག་གམ་གཤིན་པོ་ལགས། །
མི་འདི་ཡི་ལོ་རྒྱུས་ང་ཡིས་ཤེས། །
གྲགས་ཆེ་བ་ས་གཞི་འགེངས་སོ་ཟེར། །
དོན་མེད་པར་ཕྱག་ཆེན་གྱི་ན་བོར། །
དྲིན་ཆེ་ནི་སྙིང་ནས་མི་བསམ་ཁི། །
གྲོགས་བླ་རྒན་སངས་རྒྱས་བསྟན་འཛིན་དེ། །
ཆོས་སྙིང་པོ་བསྟན་པའི་སྲོག་འཛིན་ཀྱང་། །
བུ་ཀརྨས་སྨོན་ལམ་འཛུགས་དགོས་ལབ། །
མཐར་དོན་མེད་རང་སྲོག་གྱི་ནར་བོར། །
རྒྱ་ནག་པོའི་ཤེས་ཆེན་བསམ་ངན་ཚོས། །
བུ་འདི་ཉིད་ལུ་གུ་གསོ་གསོ་བྱས། །
དམའ་སྤྲང་པོའི་མགོ་བོར་རྐང་པས་བརྣན། །
དེ་བྱིན་རླབས་ཅན་ཞིག་མི་བསམ་ཁི། །
རྒྱ་ནག་པོའི་ཞིང་ཆེན་བཅུ་གཉིས་དང་། །
བོད་ཡུལ་གྱི་ཆབ་མདོ་ནང་ཆེན་དུ། །
མི་འདི་ཉིད་སངས་རྒྱས་དངོས་ཡིན་ལབ། །
དོན་སྙིང་པོ་མ་ལོན་གྱི་ནར་བོར། །
རྒྱ་དཀར་པོའི་བོད་མི་གཞི་ཆགས་ཚོས། །
བུ་འདི་ཉིད་ཁྱི་གུ་གསོ་གསོ་བྱས། །
ཆོས་གྲུབ་མཐའི་གཙོ་འཛིན་ཡིན་ཟེར་ཀྱང་། །
ཕོ་སྙིང་སྟོབས་ཅན་ཞིག་མི་བསམ་ཁི །
གོང་བླ་མ་ཞེ་ས་མི་བྱེད་པའི། །
བུ་ཡོན་ཏན་མེད་ཀྱང་གྲལ་མགོར་བཞག །
དཔལ་དོན་ཡོད་གྲུབ་པས་གཅེས་ཕྲུག་ཟེར། །
དྲིན་མ་བསམ་སྙིང་པོ་གྱི་ནར་བོར། །
དུས་ད་དུང་ཏྰ་ལའི་བླ་མ་དང་། །
ས་བཀའ་རྙིང་གཙོ་འཛིན་ཕལ་མོ་ཆེར། །
ཤོབ་རྫུན་གཏམ་འདི་འདྲ་བཤད་ཕོད་དམ། །
ད་རང་ཚོད་བཟུང་ཞིག་སི་ཏུ་པ།
ང་དྲིན་ཆེན་ཡིན་ནོ་སི་ཏུ་པ། །
ཁྱོད་མ་རིག་གཉིད་ལས་སད་པར་བྱས། །
ཆོས་ཆོས་བརྒྱད་སྙིང་པོ་མེད་པར་བྱས། །
ཞྭ་རྟག་འཛིན་མི་རྟག་བསྐུལ་མས་བསྣུབས། །
ངས་སྨད་པས་ལམ་ནས་རྒོལ་ན་ཡང་། །
ཆོས་སྙིང་པོ་ཤེས་ན་བསྟོད་པ་ལགས། །
དོན་འཇིག་རྟེན་ཚང་མ་འདི་ཀར་སྣང་། །
ངོ་ཨེ་ཤེས་སི་ཏུར་ཀརྨ་པ། །
ཕྱི་སྡང་པའི་ཤུགས་ལྡན་ཚོགས་པ་གཅིག །
ནང་ཆགས་པའི་ཀརྨའི་ཚོགས་པ་གཉིས། །
དོན་རྨོངས་པའི་འཇིག་རྟེན་ལས་ཀ་གསུམ། །
ཁ་ཁོག་པས་ཞེན་པ་གཏིང་ནས་ལོག །
དེའི་མི་ཚད་གྲུབ་མཐར་ཁ་ཁྱེར་པའི། །
ས་བཀའ་དགེ་བོན་རྙིང་ཁྱད་པར་མེད། །
དོན་འཇིག་རྟེན་སྒྲུབ་པའི་ཁང་ཁྱིམ་ཚོ། །
གཞི་མི་བརྟན་རྫུན་རྐུབ་བུད་གྱུར་ཅིག །
ཁ་ངན་པ་དཔལ་དགྱེས་རྡོ་རྗེ་ངས། །
ཁོག་བསམ་པ་དྲང་པོ་ཞུས་པ་ཡིན། །
ཐུགས་འགལ་བ་སོང་ན་བཟོད་པ་གསོལ། །
ཆོས་བཤད་སྒྲུབ་བསྟན་པ་སྤེལ་བར་མཛོད། །ཅེས་པ་འདི་ནི་རབ་རྒྱན་ས་གླང་ཟླ་༡་ཚེས་༡༦་གཟའ་ལྷག་པ་དང་རྒོལ་ངན་འཇོམས་པའི་བརྟན་ལས་སྒྲ་གཅན་དུ་འཇུག་རྒྱུ་བའི་འཁོར་ལོ་ལེགས་འཛོམས་སྐབས་སུ་ཁ་ཙམ་གྱི་འབྲི་གུང་པ་ཀུན་ཏུ་རྒྱུའམ་སྤྲོ་ཚེས་ཟིན་བྲིས་ཀྱིས་བསྐུལ་མ་ལ་བརྟེན་ནས་ཀུན་སློང་བཟང་པོས་རྣམ་རྟོག་ངན་པ་དག་ལ་གཅོས་བསྒྱུར་མེད་པར་ཡོ་རོབ་ལྷ་ཧ་ཀའི་རི་ཁྲོད་ནས་རིག་འཛིན་དཔལ་དགྱེས་པ་རྡོ་རྗེ་འམ་མ་ར་ཡ་ཤྲྰི་སྨྱོན་པས་བྲིས་པ་ཤྲྰི་སརྦ་བི་ཛ་ཡནྟུ།།
།