Wednesday, 11 May 2011
12:05 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །མཁན་ཆེན་བླ་མ་དཔལ་དགྱེས་པ་རྡོ་རྗེར་བསྟོད་པ་མེ་ཏོག་གི་ཆུན་པོ། །
རྣལ་ཞོལ་ཤེས་རབ་ཆོས་འབྱོར། བླ་རུང་།
གང་སྐུ་མཚན་དཔེའི་སྒྱུ་འཕྲུལ་སྤྲོ་བསྡུ་ཡིས། །
སྲིད་ཞིའི་མཛེས་སྡུག་འབུམ་གྱི་ཉམས་བརྒྱ་སྒེག །
གང་ཐུགས་ཀུན་ཤེས་མེ་ལོང་དྭངས་པའི་མཁར། །
སྣ་ཚོགས་ཤེས་རིག་མེ་ཏོག་འདབ་སྟོང་དགོད། །
མཁྱེན་བརྩེ་ཆུ་ཤེལ་དབང་པོའི་གུར་ཁང་ནས། །
ཀུན་ཕན་ཕྲིན་ལས་འོད་དཀར་བཀྱེ་བསྡུ་ཅན། །
སྐལ་བཟང་ཀུ་མུད་གསོན་པོར་བཞད་པའི་གཉེན། །
མཚུངས་མེད་ཆོས་ཀྱི་རྒྱལ་པོ་ཁྱེད་ལ་བསྟོད། །
རྒྱལ་ཀུན་ཡེ་ཤེས་ཕུང་པོ་གཅིག་བསྡུས་འཕྲུལ། །
འཆད་རྩོད་རཙོམ་པའི་རླབས་ཕྲེང་མཁའ་ལ་འཕྱོ། །
མཁས་བཙུན་བཟང་པོའི་རྣམ་ཐར་ཇི་སྙེད་སྤྲིན། །
བསྔགས་པའི་ཆོ་ག་བགྱིད་ལ་སྤྲོ་བ་འཛུམ། །
མཁས་གྲུབ་བྱེ་བའི་གཙུག་ན་འཛུམ་པའི་དཔལ༵། །
རྒྱལ་རྣམ་དགྱེ༵ས་པ༵འི་མཁས་དབང་རྡོ༵་རྗེ༵་ལ། །
ལྷ་མིའི་སྐྱེ་རྒུས་མགྲིན་གཅིག་བསྟི་སྟང་བཅས། །
ཤིས་ཚིག་མེ་ཏོག་ཆུན་པོ་འཐོར་ལ་བྲེལ། །
ཞེས་པ་འདི་ལྷ་ས་ཞིང་ཆེན་ལྷོ་ཁ་རྣལ་ཞོལ་ཤེས་རབ་ཆོས་འབྱོར་གྱིས་གུས་པས་བྲིས་པ་དགེ །
Subscribe to:
Post Comments (Atom)
0 comments:
Post a Comment