༄༅།། ཨེ་མ་ཧོའི་རིག་མཛོད།

ཨེ་མ་ཧོ། །

རབ་འབྱམས་རྒྱལ་བའི་སྟོང་ཉིད་སྙིང་རྗེའི་ཐུགས༎གཟུགས་སྐུའི་ངོ་བོར་འཕོས་པའི་བཀའ་དྲིན་ཅན༎འཇིགས་བྲལ་ཆོས་ཀྱི་རྒྱལ་པོའི་ཡེ་ཤེས་སྐུས༎
མངོན་སུམ་རྗེས་བཟུང་གནས་ལུགས་སྟོན་པར་ཤོག །ལུས་ཀྱི་གཡེན་པ་ལྟ་བུའི་དགྲ་བོ་འདི༎བཏུལ་ཞིང་བཏུལ་ཞིང་མང་དུ་འགྱུར་བས་ན༎མཛའ་དང་སྡང་ལ་རེ་དོག་མི་ཆེ་བར༎ཚིག་གསུམ་གནད་ཀྱིས་སྙིང་ལ་བརྡེག་པར་ཤོག །སྲིན་བུའི་དར་ཐག་འདྲ་བའི་རྒྱུ་རྫས་འདི༎བསགས་ཤིང་བསགས་ཤིང་རང་ཉིད་འཆིངས་བས་ན༎སྤེལ་དང་བསྲུང་བའི་འདུ་འཛི་མི་མང་བར༎བཞག་ཐབས་བཞི་ཡིས་རང་མགོ་ནོན་པར་ཤོག །ཚོང་འདུས་མགྲོན་པོ་ལྟ་བུའི་གཉེན་གྲོགས་འདི༎འབྲེལ་ཞིང་འབྲེལ་ཞིང་འཁོན་པ་མང་བས་ན༎འདུ་དང་འབྲལ་བའི་དགའ་སྡུག་མི་རྐྱེན་པར༎གཟེར་བུ་བདུན་གྱིས་དབེན་སར་འདོགས་པར་ཤོག །ལན་ཚྭའི་རྫིངས་བུ་འདྲ་བའི་འདོད་ཡོན་འདི༎སྤྱད་ཀྱིན་སྤྱད་ཀྱིན་འདོད་གདུང་འཕེལ་བས་ན༎ཐོབ་དང་ཤོར་བའི་ཟུག་རྔུ་རྒྱང་བསྲིངས་ནས༎སྒོམ་ཉམས་དྲུག་གིས་སེམས་ཕུག་དྲོས་པར་ཤོག །རང་གི་གྲིབ་མ་འདྲ་བའི་ལས་འབྲས་འདིར༎བྲོས་དང་གབ་པས་བཟུར་ས་མེད་པས་ན༎བཤག་དང་བཤག་བྱའི་གཉིས་འཛིན་མི་དམ་པར༎ཚིག་ཆེན་བརྒྱད་ཀྱིས་དབུགས་དབྱུང་ཐོབ་པར་ཤོག །སྲིད་པའི་རྡུལ་ཕྲན་འདྲ་བའི་ཤེས་བྱ་འདི༎བསླབས་ཤིང་བསླབས་ཀྱང་ཤེས་དུས་མི་འདུག་པས༎ཐོས་དང་བསམ་པའི་རྩོལ་སྒྲུབ་མི་མང་བར༎སྒྲོན་མ་བཞི་ཡིས་རང་སྣང་གསལ་བར་ཤོག །འདམ་ཁུང་ཆུ་མིག་ལྟ་བུའི་རིག་པ་འདི༎དཀྲུག་ཅིང་དཀྲུག་ཅིང་རྙོགས་པར་འགྱུར་བས་ན༎རྟོག་དང་དཔྱོད་པས་དགག་སྒྲུབ་མི་སློང་བར༎ཡེ་ཤེས་བླ་མའི་རང་ཞལ་མཐོང་བར་ཤོག །ཅེས་པ་འདི་ཡང་མཁན་ཆེན་དཔལ་དགྱེས་པ་རྡོ་རྗེས་ཇོ་མོ་མཁར་ཆེན་མཚོ་རྒྱལ་གྱི་ཞུས་ལན་གདམས་ངག་མར་གྱི་ཡང་ཞུན་ཞེས་པའི་གདམ་པ་ཟབ་མོ་ཞིག་བསྐུར་འབྱོར་བྱུང་ ཉིན་བྲིས་ཏེ་ལན་གྱི་ཚུལ་དུ་ཕུལ།། །།