Friday, 13 May 2011
14:46 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །མཁན་ཆེན་དཔལ་དགྱེས་པ་རྡོ་རྗེ་ལ་བསྟོད་པ་སྙན་འཇེབས་འགྱུར་ཁུག་གསར་པ། །
ཚུལ་ཁྲིམས་རྣམ་རྒྱལ། བླ་རུང་།
ལང་ཚོའི་རྟ་བདུན་དབང་པོ་མཁའ་ལ་ཤར། །
ཉེས་རྒུད་མུན་པའི་སྨག་རུམ་དྭངས་བས་དཀར། །
དམ་ཆོས་བདུད་རྩིའི་དངོས་གྲུབ་མཁའ་ནས་འཇོ། །
ཡིད་ལ་རེ་བ་སྟེར་བའི་ནོར་བུ་ལགས། །
ཤེས་རབ་རྒྱ་མཚོའི་རྦ་རླབས་མཁའ་ལ་གཡོ། །
རིན་ཆེན་གསེར་གྱི་ལྕང་སྨྱུག་ལག་ཏུ་འཛིན། །
ཐུབ་བསྟན་ཐར་བའི་ལམ་བཟང་སྟོན་མཁས་པ། །
ནམ་ཡང་བསླུ་བ་མེད་དོ་དཔལ༵་དགྱེས༵་མཚན། །
ཡལ་གའི་ཙན་དན་དྲི་བསང་ཀུན་ཏུ་ལྡང་། །
གསུང་དབྱངས་འཐུལ་པ་དབྱར་གྱི་རྔ་གསང་བཞིན། །
སྙན་གྲགས་འགྲན་ཟླ་བྲལ་བའི་དཔའ་བོ་རྒྱལ། །
བརྩེ་བའི་བདག་ཉིད་དཔལ་ལྡན་མགོན་པོ་ཡིས། །
ཤེས་རབ་རིག་པའི་རལ་གྲི་མཁའ་ལ་འཕྱར། །
ཉོན་མོངས་རྩ་བའི་སྡོང་བོ་གྲི་ཡིས་བཅད། །
འཇམ་དབྱངས་ཀུན་ཏུ་མཚུངས་སོ་དཔལ༵་དགྱེས༵་མཚན། །
ཤེས་བྱ་ཀུན་ནས་གསལ་བའི་བཤེས་གཉེན་པ། །
ངུར་སྨྲིག་ཚང་ཚིང་གཡོ་བའི་ལི་ཁྲིའི་མདོག །
ངག་འཇམ་ཨུད་དཔལ་མེ་ཏོག་འདབ་མ་བཞིན། །
གང་ནས་ཐོས་ཤིང་སེམས་པའི་ཡིད་དབང་འཕྲོག །
ཐོས་ཤེས་ཀུན་ནས་གསལ་བའི་སྒྲོན་མེ་ཆེ། །
རིས་མེད་ཏ་ཐའི་ཆོས་ལ་ལེགས་སློབ་པའི། །
སྐྱབས་མེད་ལས་ངན་འདྲེན་པའི་སྐྱེས་བུ་མཆོག །
སྐལ་བཟང་སྐྱེས་བུ་ལྷམ་མེར་ཨེ་མ་རྨད། །
ཨུ་དུམ་ཝ་ར་མཚུངས་པའི་བཙུན་པ་ལགས། །
དམ་ཆོས་ནོར་བུའི་གཏེར་སྒོ་ཁྱེད་ལ་ཡོད། །
དྲི་ཞིམ་པདྨའི་ནང་ནས་ཁྱེད་དཔལ་བརྗོད། །
ལྷ་རྫས་ལག་ཏུ་ཐོག་ཏེ་མཇལ་བར་སྤྲོ། །
རྫ་སྟོད་རྟ་ནག་བླ་ཆུང་དགོན་གྱི་ཚུལ་ཁྲིམས་རྣམ་རྒྱལ་གྱིས་བླ་རུང་ཆོས་སྒར་ནས་བྲིས་པ་དགེ །
Subscribe to:
Post Comments (Atom)
0 comments:
Post a Comment