Sunday, 19 June 2011
05:58 | 
Posted by
༄༅།། ཨེ་མ་ཧོའི་རིག་མཛོད་། |
ན་མོ་གུ་རུ་དྷརྨྰ་ར་ཛ་ཡེ། །
ཆོས༷་དབྱིངས༷་སྐྱེ་མེད་ནམ་མཁའ་ཡངས་པ་ལས། །
ཡེ་ཤེས་རྡོ༷་རྗེ༷་མཁྱེན་བརྩེའི་འོད་ཟེར་ཅན། །
རྣལ་འབྱོར་དམ་པའི་ཉི་མ་ཆོས་ཀྱི་རྒྱལ། །
གསང་ཆེན་བསྟན་པའི་བདག་པོ་ཁྱེད་ལ་འདུད། །
དཔལ་ལྡན་བླ་མའི་རྣམ་ཐར་སྲིད་ཞིའི་རྒྱན། །
ཞབས་རྡུལ་སྤྱི་བོས་བསྟེན་པའི་གྱི་ན་བས། །
ཡིད་ལ་གང་ཤར་སྒྲོ་བསྐུར་བྲལ་བ་ཡིས། །
ཆོས་དུང་སྙན་པའི་སྒྲ་དབྱངས་འདི་ནས་འབུད། །
འཕགས་ནོར༷་དབང་ཕྱུག༷་བླ་མ་རིན་པོ་ཆེའི། །
སྐུ་གསུང་ཐུགས་ཡོན་ཕྲིན་ལས་རྒྱ་མཚོའི་གཏེར། །
ཟབ་རྒྱས་ཕ་མཐའ་འཇལ་བ་ནུས་མིན་ཡང་། །
དྲན་པའི་མིག་ཆུ་སྐྲ་རྩེའི་ཐིག་ཙམ་འབྲི། །
ཕྱོགས་དུས་རྒྱལ་བའི་སྤྱན་སྔར་ཐུགས་བསྐྱེད་ནས། །
དཔལ་ལྡན་ཚོགས་གཉིས་རྫོགས་པ་མཐར་ཕྱིན་ཀྱང་། །
ཡང་སངས་རྒྱས་པའི་གསང་ཆེན་རྣལ་འབྱོར་པ། །
མར་པ་ཆོས་དབྱིངས་རྡོ་རྗེ་ཡང་ཡང་དྲན། །
ཐུགས་མཆོག་སྒ་ཡི་མཆོད་རྟེན་དཀར་པོའི་འགྲམ། །
འབྲི་ཀླུང་དལ་གྱིས་བབས་སའི་གཡས་ཕྱོགས་སུ། །
ཆོས་མོས་ཡབ་མིང་ཚུལ་ཁྲིམས་རྒྱལ་མཚན་དང། །
ཡུམ་ཆེན་བཀྲ་ཤིས་ལྷ་མོའི་ལྷུམས་སུ་ཞུགས། །
བཀྲ་ཤིས་རྟེན་འབྲེལ་བཟང་པོའི་ཚེས་བཅུ་ལ། །
གནམ་ས་འཇའ་འོད་འཁྱིལ་བའི་སྦྲ་གུར་ལས། །
ཡ་མཚན་ཀུན་ལེགས་ཁྱེའུ་མཐོང་དགའ་བ། །
དུང་དཀར་ལྗོངས་སུ་མཚན་དཔེ་གསར་དུ་བལྟམས། །
ཆུང་ནས་དད་དང་སྙིང་རྗེའི་བདག་ཉིད་ཅན། །
ཀུན་དགའ་ཕ་ཁྱིམ་ནོར་མང་ལོངས་སྤྱོད་འཕེལ། །
ཐུབ་བསྟན་དར་རྒྱས་བླ་མས་གུས་ཕྱག་བཅས། །
མཚན་ལ་ནོར་ཕྱུག་རིན་ཆེན་ཞེས་སུ་གསོལ། །
རབ་བྱུང་མཚན་ལ་ངག་དབང་དཔལ་ལྡན་དང་། །
གཞི་བརྒྱུད་དོན་གྱི་དབང་ཆེན་ཐོབ་པའི་རྗེས། །
གཟིམས་ལམ་ལྷ་དང་བླ་མས་ལུང་བསྟན་དུ། །
རྣལ་འབྱོར་ཆོས་དབྱིངས་རྡོ་རྗེ་མཚན་དུ་གསོལ། །
འཁོར་བར་ཞེན་པ་ལོག་པའི་ངེས་འབྱུང་དང་། །
བྱམས་སོགས་ཚད་མེད་བྱང་སེམས་ལྷན་སྐྱེས་མངའ། །
སྣང་སྲིད་དག་མཉམ་ཆོས་སྐུའི་ངོར་མཐོང་བས། །
ཏིང་འཛིན་ཞི་དུལ་འཚོ་བར་རྒྱུན་ཏུ་རོལ། །
གྲུབ་དབང་སངས་རྒྱས་བཟང་པོའི་ཞབས་བཏུད་ནས། །
དབང་ཁྲིད་བཀའ་ལུང་བྱིན་རླབས་ཉེ་བརྒྱུད་བཅས། །
སྒྲོན་མེ་ལག་གཏད་བཞིན་དུ་ལེགས་ཐོབ་སོགས། །
ནྰ་ལུང་མཚམས་པས་འབྱུང་འགྱུར་ལུང་བསྟན་བསྩལ། །
གང་ཤར་བླ་མ་ཆོས་ཉིད་རྡོ་རྗེ་དང་། །
གང་སྐུ་ཆོས་མཆེད་དམ་པ་རྗེས་འཇུག་དག །
སོར་བྱང་སྔགས་ཀྱི་ས་ལམ་མྱུར་བགྲོད་པས། །
བླ་མ་དགྱེས་པའི་དགོངས་པ་རབ་ཏུ་ཟིན། །
ཐུབ་བསྟན་དགོན་དུ་ཚོགས་ཞུགས་ཆོས་གྲལ་ཕེབས། །
ཁྱད་པར་རྫ་རྒྱུད་ལྕང་མ་རི་སིལ་ནས། །
མཁས་གྲུབ་རིག་འཛིན་བརྒྱུད་པའི་ཞལ་བཟང་ཆབ། །
གདམས་ངག་བདུད་རྩིའི་སྙིང་ཐིག་ཐུགས་སུ་གཏམས། །
བླ་མ་དམ་པ་སངས་རྒྱས་དངོས་སུ་མཐོང་། །
ཡི་དམ་སྟོན་པ་ཤྰཀྱ་ཐུབ་པར་བསྟེན། །
སྔོན་འགྲོ་དངོས་གཞིའི་ས་ལམ་རབ་འབད་པས། །
སྐྱབས་འགྲོའི་ལམ་རྟགས་མ་ལུས་མངོན་དུ་གྱུར། །
དབུ་མ་ཆེན་པོའི་ལྟ་བར་ངེས་ཤེས་སྐྱེས། །
ཕྱག་རྒྱ་ཆེན་པོའི་སྒོམ་པར་མཉམ་པར་བཞག །
རྩ་རླུང་ཐིག་ལེའི་གནད་གསང་རྟེན་འབྲེལ་ཤར། །
རྫོགས་པ་ཆེན་པོའི་འབྲས་བའི་མངོན་དུ་གྱུར། །
ནག་ཕྱོགས་ཀླ་ཀློས་དཔུང་གི་མུན་ཀློང་ན། །
ནག་ནོག་གྲིབ་མས་མ་གོས་དུང་ཟླ་བཞིན། །
སྒྲུབ་པའི་རྒྱལ་མཚན་མི་ལོ་ཉེར་བདུན་རིང་། །
མི་ནུབ་བསྟན་པའི་འོད་ཟེར་རྒྱུན་དུ་འབར། །
གུ་རུས་རྗེས་བཟུང་བྱིན་རླབས་དངོས་གྲུབ་གནང་། །
ཇོ་བོ་དགྱེས་མཛུམ་འོད་ཟེར་དབང་ཆེན་བསྐུར། །
ཐང་ལྷ་གཉེན་པོས་གསོལ་སྟོན་སྦྱིན་བདག་མཛད། །
ཡང་གསང་བསྟན་པའི་ཆོས་འཁོར་སླར་ཡང་བསྐོར། །
ཕུང་ཁམས་དག་པས་གཤེགས་པ་གཤེགས་མར་དག །
ཡན་ལག་དག་པས་ཁྲོ་བོ་ཁྲོ་མོར་རྫོགས། །
དབང་ཤེས་དག་པས་སེམས་དཔའ་སེམས་མར་སྨིན། །
གསང་གསུམ་དཀྱིལ་འཁོར་སྙིང་ཐིག་མངོན་དུ་གྱུར། །
གསང་ཆེན་བླ་མེད་འབྲས་བུ་མངོན་གྱུར་པས། །
ཚེམས་དང་དབུ་སྐྲར་རིང་བསྲེལ་གྲངས་མེད་འཁྲུངས། །
བྱིན་ཆེན་ཕབས་པས་དཔའ་བོ་དཔའ་མོ་དག །
དབང་གྲལ་བདེ་ཆེན་གླུ་བྲོ་མཉམ་དུ་རོལ། །
ཀུན་མཁྱེན་ཡབ་སྲས་འཇའ་ལུས་རིག་པ་འཛིན། །
བརྒྱུད་གསུམ་བླ་མའི་རྣལ་འབྱོར་རྟག་བརྩོན་ནས། །
ཐུན་བཞི་ལས་དྲུག་རྩ་གསུམ་བསྙེན་སྒྲུབ་ལ། །
རྩེ་གཅིག་འདུན་པའི་སྒྲུབ་དཔོན་དམ་པར་རྒྱལ། །
མ་ཕམ་གཡུ་མཚོ་གངས་རི་ཆེ་བཞི་དང་། །
རྩྭ་རིའི་གནས་སོགས་བོད་ཡུལ་ཞབས་སོར་བཀོད། །
མདོ་དབུས་ཁམས་ཀྱི་གནས་ཆེན་ཐམས་ཅད་ལ། །
ཉམས་ལེན་སྒྲུབ་པའི་རྒྱལ་མཚན་བླ་ན་མཐོ། །
རི་བོ་རྩེ་ལྔར་རྗེ་བཙུན་འཇམ་དཔལ་དབྱངས། །
རི་བོ་གྲུ་འཛིན་འཕགས་པ་སྤྱན་རིས་གཟིགས། །
རི་བོ་ལྕང་ལོར་ཕྱག་ན་རྡོ་རྗེ་འཛིན། །
ཕུན་ཚོགས་རྣམ་ལྔའི་ཞིང་གི་སྣོད་བཅུད་མཇལ། །
རི་བོ་བྱ་རྐང་རྒྱལ་ཚབ་བྱམས་པ་མགོན། །
གླང་ཆེན་འགྱིང་རིར་བྱང་སེམས་ཀུན་ཏུ་བཟང་། །
དཔལ་རི་རྩེ་དགུར་ས་ཡི་སྙིང་པོ་སོགས།
བྱང་ཆུབ་སེམས་དཔའི་རྟུལ་ཞུགས་བདག་གིར་བཞེས། །
དད་པའི་བསོད་ནམས་སྤྲིན་ལས་རིན་པོ་ཆེས། །
གདུལ་བྱའི་དགེ་ལེགས་སྤེལ་བའི་ཆར་རྒྱུན་ཅན། །
གསང་ཆེན་བསྟན་པའི་འབྲུག་སྒྲ་སྒྲོག་མཁས་པས། །
སྨིན་གྲོལ་ཐོབ་པའི་སྐལ་བཟང་སྐྱེས་བུ་བསྐྲུན། །
ཏིང་འཛིན་རྒྱལ་པོའི་དོན་ལ་དབང་བསྒྱུར་བས། །
ལེགས་བཤད་རྩོམ་དང་སྒྲུབ་ལ་མངོན་བརྩོན་པའི། །
རྣལ་འབྱོར་དབང་ཕྱུག་གསང་སྔགས་རིག་པ་འཛིན། །
ཀུན་གྱི་གཙུག་རྒྱན་དཔལ་ལྡན་བླ་མ་རྒྱལ། །
སྔོན་ཚེ་སངས་རྒྱས་རྣམ་གཟིགས་གཙུག་ཏོར་ཅན། །
རབ་བསྙེན་བྱང་ཆུབ་དང་པོའི་ཐུགས་བསྐྱེད་དེ། །
ནམ་མཁའ་མ་ཞིག་འཁོར་བ་མ་སྟོང་བར། །
འགྲོ་ཀུན་སྒྲོལ་བའི་ཐུགས་དམ་བདག་གིར་མཛད། །
འོན་ཀྱང་ཛམ་གླིང་བསོད་ནམས་མཐུ་ཆུང་བས། །
མཚན་ལྡན་བླ་མ་སྦས་པའི་རྟུལ་ཞུགས་ཅན། །
མཇལ་བའི་གོ་སྐབས་ཉིན་མོའི་སྐར་མ་བཞིན། །
འུར་སྒྲོག་འུག་པའི་མིག་ལ་མཛའ་བཤེས་དབེན། །
ཆོས་རྗེ་དམ་པས་བསྔགས་པའི་མེ་ཏོག་ཐོར། །
པན་ཆེན་བླ་མས་གསང་ཆེན་རྣལ་འབྱོར་གསོལ། །
རིས་མེད་བསྟན་པའི་སྲོག་ཤིང་སྒོམ་ཆེན་པ། །
མཆོག་ཐུན་དངོས་གྲུབ་བདག་པོ་ཁྱེད་ལ་གུས། །
རྡོ་རྗེ་གདན་དུ་རྒྱལ་བ་རིན་ཆེན་ལ། །
ལེགས་པ་མཇལ་བའི་བསྐལ་བཟང་དུས་ཚེས་ན། །
ཞི་བདེ་ཆོས་ཀྱི་ཉི་མ་འོད་པོ་ཆེ། །
ཛམ་གླིང་ཁྱབ་པར་ཆོས་དབྱིངས་གླིང་པས་གསུངས། །
རྒྱལ་ཀུན་སྤྱི་གཟུགས་ཨོ་རྒྱན་རིན་པོ་ཆེས། །
ཡེ་ཤེས་སྤྲུལ་པའི་སྐུ་ཡིས་རྗེས་སུ་བཟུང་། །
བརྒྱུད་གསུམ་དགོངས་པའི་ཕ་ནོར་ཁྱེད་ལ་གནང་། །
བཀའ་གཏེར་དག་སྣང་རིག་པའི་རྩལ་དུ་ཤར། །
ཤིང་རྟ་ཆེན་པོ་དཔལ་ལྡན་ཇོ་བོ་རྗེ། །
མངོན་སུམ་ཞལ་གཟིགས་རྒྱུན་དུ་རྗེས་བཟུང་བས། །
མདོ་སྔགས་ཕ་རོལ་ཕྱིན་པའི་དགོངས་པ་བརྙེས། །
གཞུང་ལུགས་གདམས་པར་ཤར་བའི་མཁས་གྲུབ་དངོས། །
དེ་བཞིན་དཔལ་ལྡན་བླ་མ་རྡོ་རྗེ་སེམས། །
རབ་དཀར་གངས་ཀྱི་མདོག་ལྟར་མངོན་སུམ་མཇལ། །
དབང་བཞིའི་འོད་ཟེར་སྣ་ཚོགས་དྲ་བ་ཅན། །
བྱིན་རླབས་བསྩལ་བའི་དག་མཉམ་ཁྱེད་ལ་རྫོགས། །
སྐྱབས་འགྲོར་ལྟུང་བཤགས་ཆོ་ག་མཛད་པའི་ཚེ། །
སངས་རྒྱས་སུམ་ཅུ་སོ་ལྔ་མངོན་སུམ་བྱོན། །
སོ་སོའི་སྐུ་མཆོག་དབྱིབས་དང་ཕྱག་མཚན་སོགས། །
ཇི་བཞིན་གཟིགས་པས་བདེ་གཤེགས་བསྟོད་པ་མཛད། །
རྒྱལ་བའི་ཡུམ་ཆེན་ཤེས་རབ་ཕར་ཕྱིན་དང། །
རྒྱལ་ཡུམ་རྗེ་བཙུན་སྒྲོལ་མ་ཉེར་གཅིག་སོགས། །
སྐུ་གསུམ་རྒྱལ་བའི་མཁའ་འགྲོ་རྒྱ་མཚོ་ཡིས། །
གསང་གསུམ་དགའ་བདེས་མཆོད་པ་ཁྱེད་ལ་རོལ། །
རང་སྣང་དག་པའི་ཞིང་ཁམས་བདེ་བ་ཅན། །
རྒྱལ་དང་རྒྱལ་སྲས་ཉན་རང་ལྷ་ཀླུ་ཚོགས། །
རྟུལ་གྱི་གོང་བུ་ཕྱེ་བ་བཞིན་གཟིགས་པ། །
ཟག་མེད་བདེ་མཆོག་ཧེ་རུ་ཀ་དཔལ་རྒྱལ། །
རྒྱལ་བའི་མཛད་ཕྲིན་སྒྲུབ་པར་ལེགས་མཛད་པས། །
ལྷ་མིའི་སྟོན་པ་ཤཱཀྱའི་རྒྱལ་པོ་དང་། །
སྨན་གྱི་བླ་མ་སངས་རྒྱས་འོད་དཔག་མེད། །
འཁོར་ཚོགས་རྒྱ་མཚོའི་དབུས་ན་ལྷམ་མེར་མཇལ། །
ཛམ་གླིང་མཛེས་པའི་པན་གྲུབ་བཅུ་བདུན་དང་། །
གནས་བརྟན་བཅུ་དྲུག་འཕགས་ཚོགས་དགེ་འདུན་གྱིས། །
རྗེས་བཟུང་བཀའ་བསྟན་བཤད་སྒྲུབ་བཀའ་བབས་པའི། །
འདྲེན་མཆོག་དཔལ་ལྡན་བླ་མ་སྲིད་ཞིའི་མགོན། །
སྒྱུ་འཕྲུལ་དྲ་བའི་རྩ་རླུང་ཐིག་ལེའི་ཁམས། །
མ་ཉམས་ཡན་ལག་དྲུག་གི་གནད་གསང་སྟོན། །
བཅོམ་ལྡན་འདས་དུས་ཀྱི་འཁོར་ལོའི་སྐུ་བཞེངས་པའི། །
འགྱུར་མེད་སྐུ་ཡི་རྡོ་རྗེའི་རྣལ་འབྱོར་པ། །
སྣང་སྲིད་ཟབ་གསལ་གཉིས་མེད་ཆོས་ཀྱི་དོན། །
བདེན་བཞི་མཐའ་དྲུག་ཚུལ་བཞིས་ལེགས་པར་སྟོན། །
ཚངས་དབྱངས་དགྱེས་པའི་ཆོས་འཁོར་བསྐོར་བའི་མགོན། །
འགགས་མེད་གསུང་གི་རྡོ་རྗེའི་རྣལ་འབྱོར་པ། །
ཟབ་ཞི་སྤྲོས་བྲལ་བདེ་གཤེགས་སྙིང་པོའི་སྐུ། །
མཁྱེན་གཉིས་གཟིགས་པ་སངས་རྒྱས་ཡེ་ཤེས་ཉིད། །
སྤོངས་རྟོགས་ཡོངས་རྫོགས་རྒྱལ་ཀུན་འདུས་པའི་བདག །
གཡོ་མེད་ཐུགས་ཀྱི་རྡོ་རྗེའི་རྣལ་འབྱོར་པ། །
ལྟེ་བའི་རྩ་འཁོར་གཏུམ་མོ་ཙཎྡ་ལིས། །
སྤྱི་བོའི་ཧཱུཾ་ཡིག་དབུ་མར་བཞུ་བ་ལས། །
ལྷན་སྐྱེས་ཡོན་ཏན་དཔལ་ལ་རྣལ་འབྱོར་པ། །
རྡོ་རྗེ་འབེབས་པའི་ཤིང་རྟའི་སྲོལ་འཛིན་རྒྱལ།།
མདོར་ན་ཚེ་དང་སྒྲུབ་པ་མཐར་ཕྱིན་པའི། །
བཤད་སྒྲུབ་ཕྲིན་ལས་འཛིན་སྐྱོང་སྤེལ་བའི་མགོན། །
བཤེས་གཉེན་ཀུན་བཟང་བླ་མ་དམ་པ་ཁྱེད། །
རྨི་ལམ་མཇལ་བར་སྐལ་བཟང་ཨེ་མ་ཧོ། །
འདིར་སྨྲས་དགེ་བའི་ཚོགས་བསགས་ཡན་ལག་ཀུན། །
ཀུན་བཟང་མཆོད་སྤྲིན་ནམ་མཁའ་མཉམ་པར་འབུལ།
རྒྱལ་ཀུན་དགྱེས་ཞིང་འགྲོ་ཀུན་ཕན་བདེ་སྨོན། །
ཀུན་བཟང་དཔལ་ལྡན་བླ་མའི་ས་ཐོབ་ཤོག །
ཅེས་པ་འདི་ཡང་རབ་རྒྱན་ལྕགས་ཡོས་ས་ག་ཟླ་བའི་དབང་ཕྱོགས་སྟོང་པ་དང་པོའི་ཉིན་གྱི་སྔ་མོར་རྨི་ལམ་དུ་གསང་ཆེན་བླ་མེད་ཀྱི་རྣལ་འབྱོར་པ་ཆོས་དབྱིངས་རྡོ་རྗེ་མཇལ་བའི་དགའ་སྐྱོ་ཟུང་གིས་བསྐུལ་པ་བཞིན་བྱུང་བས་གང་ཤར་དུ་དཔལ་དགྱེས་པ་རྡོ་རྗེས་སྙིང་ནས་གསོལ་འདེབས་སུ་ཝ་ཡེལ་བོད་བརྒྱུད་རྣལ་འབྱོར་ཆོས་ཚོགས་ཁང་གི་དབེན་ཁྲོད་ནས་བྲིས་པ་དགེའོ། །
སྤྱི་ལོ་༢༠༡༡ ༠༦ ༡༩ དབྱིན་ཡུལ་ཨ་ཕ་རྣམས་སྐྱིད་པའི་དུས་དྲན་སྐབས་སུའོ། །
Subscribe to:
Post Comments (Atom)
0 comments:
Post a Comment