Monday 20 June 2011
11:37 | 
Posted by
༄༅།། ཨེ་མ་ཧོའི་རིག་མཛོད་། |
ན་མོ་ཌྰཀྐི་ནི། །
རྒྱ་ཆད་ཕྱོགས་ལྷུང་བྲལ་བའི་མཛེས་ལྗོངས་ཀྱི་དཀྱིལ་འཁོར། །
རང་བྱུང་བསམ་ཡས་ལྷུན་གྲུབ་བདེ་མཆོག་གི་ཕོ་བྲང་། །
མ་འོས་མགྲོན་དུ་ཁུགས་པའི་ཚེ་རིང་གི་ལྷ་མོས། །
སྒྱུ་འཕྲུལ་སྙན་པའི་བརྡ་གླུ་ཁུ་བྱུག་ལས་སྙན་སོང་། །
ས་མཐའི་གྲོང་མཐར་ཉུལ་བའི་འདོ་མེད་ཀྱི་སྤྲང་པོ། །
རྨི་ལམ་ཞིང་ཁམས་མཇལ་བའི་རྟོགས་ལྡན་གྱི་རྣལ་འབྱོར། །
ཡིད་མཐུན་ལྷ་ལྕམ་ཕེབས་པའི་ལྗོངས་རྒྱུ་རུ་འོང་ནས། །
དགའ་བདེ་བཅུ་དྲུག་སྨྱོས་པའི་གླུ་བྲོ་རེ་ཁྲབ་ཡ། །
དབེན་གསུམ་ཏིང་འཛིན་རྒྱལ་པོའི་ཐུགས་དམ་དེ་སད་པས། །
འཇམ་མཉེན་ཕྱག་རྒྱའི་གར་སྟབས་ཅི་དགའ་རུ་བསྒྱུར་ནས། །
ཨེ་ཝྃ་ཐོལ་བྱུང་དོ་ཧ་གང་དགའ་རུ་བླངས་པས། །
གནས་གསུམ་མཁའ་འགྲོ་དགྱེས་པའི་ཚོགས་གྲལ་དུ་ཕེབས་འགྲོ། །
མི་འཇིགས་རྡོ་རྗེའི་གར་གྱི་དཔའ་རྫོང་གི་དབང་ཕྱུག །
བདེ་ཆེན་པདྨ་དགྱེས་པའི་རྩལ་དྲུག་གི་དཔུང་ཤུགས། །
དབུས་རྒྱལ་ལྷུན་པོའི་གཡོ་འགུལ་བྱེད་པ་དེ་མཐོང་ངམ། །
ལྷ་མིན་དམག་ཚོགས་འཇོམས་པའི་གཡུལ་ངོ་རུ་ཆས་ཐལ། །
བྱམས་བརྩེའི་སྤྲིན་ཆེན་འཁྲིགས་པའི་དུང་ཁང་གི་དཀྱིལ་ནས། །
སྙིང་ཐིག་བདུད་རྩིའི་ཆར་ཆེན་འབད་མེད་དུ་འཇོ་བས། །
འདོད་ཡོན་རྒྱན་དུ་འཆར་བའི་རིག་མ་འདྲ་ཡོད་ན། །
གང་འདོད་ལོངས་སུ་སྤྱོད་པའི་མཆོད་སྦྱིན་དུ་འབུལ་ལོ། །
ཆགས་མེད་ཆགས་པ་ཆེན་པོ་དབང་ཆེན་གྱི་རང་མདངས། །
རྟེན་གཡོའི་སྣང་སྲིད་སོར་རྟོགས་ཡེ་ཤེས་ཀྱི་ཉིན་མོར། །
འཁོར་འདས་ཀུན་ཁྱབ་རིག་པའི་རྟུལ་ཞུགས་ཀྱི་འོད་སྣང་། །
བདེ་སྟོང་རང་བྱུང་མཆོག་གི་ལོངས་སྤྱོད་ལ་རོལ་ཤོག །
དྲི་མེད་ལྷག་བསམ་དཀར་པོའི་སེམས་བསྐྱེད་ཀྱི་དྭངས་མ། །
མ་ལུས་སེམས་ཅན་རྒྱུད་ལ་འབད་མེད་དུ་འཕོས་ནས། །
ཞི་བདེ་རྒྱ་མཚོ་ཆེན་པོ་མྱང་འདས་ཀྱི་རྒྱལ་ཁམས། །
དག་རྫོགས་སྨིན་པའི་དགའ་སྟོན་ལོངས་སྤྱོད་འདི་ཨ་ཧོ། །
ཞེས་པའང་དྲི་མེད་ལྷག་བསམ་གྱིས་བསྐུལ་བ་ལྟ་བུས་སྦས་གསང་མེད་པར་ཤྲྰི་སྨྱོན་པས་པུནྱེ་དེ་ཝི་ལ་སྤྲིངས་པ་དགེའོ། །
Subscribe to:
Post Comments (Atom)
0 comments:
Post a Comment