Tuesday 19 July 2011
08:52 | 
Posted by
༄༅།། ཨེ་མ་ཧོའི་རིག་མཛོད་། |
ཨེ་མ་ཧོ། །
དབང་ཆེན་དུས་ཀྱི་འཕོ་འགྱུར་ནུབ་རི་ལ་ཉེ་ཡང་། །
བདེ་ཆེན་གཏན་གྱི་བདེ་བ་བགྲེས་རྒུད་དང་བྲལ་བས། །
གཉིས་སྦྱོར་ཚོར་བའི་གནས་ལ་ཞེན་ཆགས་རང་མི་དགོས། །
རང་རིག་ནམ་མཁའི་རྣལ་འབྱོར་གུ་ཡངས་ལ་བཞུགས་སོ། །
བསམ་ཡས་སྒྱུ་འཕྲུལ་དྲ་བའི་རི་ཤན་གྱི་གླིང་ཀར། །
ཚེ་རིང་ཉི་མ་སྐྱིད་པའི་ལོངས་སྤྱོད་ཅིག་ཡོད་སྐད། །
ལྷ་དང་ལྷ་མོ་རྩེན་པའི་ལྔ་ཕུང་གི་སྒྱུ་ལུས། །
སྣང་སྲིད་དག་པ་རབ་འབྱམས་རང་རིག་གི་རྣམ་རོལ། །
འདུ་ཤེས་མི་རྟག་འཇིག་པའི་འཁོར་བ་ལ་མི་ཞེན། །
དངོས་ཆོས་ལས་ཀྱི་ཕྱག་རྒྱའི་བདེ་བ་ལ་མི་ཆགས། །
ཕྱོགས་ཞེན་གྲུབ་མཐའི་འཛིན་མཚམས་ལུང་རིགས་ལ་མི་སྡང་། །
མ་རིག་རྨོངས་པ་སངས་པའི་རིག་འཛིན་ལ་འདུད་དོ། །
རྒྱ་ཆད་ཕྱོགས་ལྷུང་བྲལ་བའི་དྲི་མེད་ཀྱི་ལྷག་བསམ། །
བསྟན་དང་འགྲོ་བའི་དོན་ལ་ཞབས་བརྟན་དུ་གསོལ་ན། །
གང་བསམ་ལྷུན་གྲུབ་འབྱུང་གནས་ཡིད་བཞིན་གྱི་ནོར་བུ། །
ཞི་བདེ་རང་དབང་འབྱོར་བའི་དངོས་གྲུབ་འདི་ཨ་ཧོ། །
ཞེས་པ་འདི་ཡང་གང་ཤར་རྩོལ་མེད་དུ་དཔའ་བོ་དྲི་མེད་ལྷག་བསམ་དང་དཔའ་མོ་ཚེ་རིང་ལྷ་མོ་ལ་ཤྲྰིས་སྨྱོ་གཏམ་གླུ་རུ་བླངས་པ་དགེའོ། །
Subscribe to:
Post Comments (Atom)
0 comments:
Post a Comment