Friday 20 April 2012
11:32 | 
Posted by
༄༅།། ཨེ་མ་ཧོའི་རིག་མཛོད་། |
ཨེ་མ་ཧོཿརེ་གཅིག་པ།
༄། །དཔལ་དགྱེས་པ་རྡོ་རྗེའི་བརྟན་གསོལ་མ་བཅོས་ལྷུག་པའི་གླུ་ཆུང་། །
ཀཿཐོག་རིག་འཛིན་ཆེན་པོ། རིག་ཀློང་།
ན་མོ་གུ་ར་ཝེ།
བརྒྱུད་གསུམ་བླ་མའི་ཡེ་ཤེས་བྱིན་ཆེན་ཐོབ། །
གནས་གསུམ་མཁའ་འགྲོའི་དགའ་བཞིའི་ལེགས་སྐྱེས་རོལ། །
ཁམས་གསུམ་འདི་རུ་སྒྱུ་མའི་མཛད་པ་ངོམ། །
སྣང་གསུམ་ལམ་བྱེད་རྨི་ལམ་དབང་ཕྱུག་རྒྱལ། །
མཐོ་ལ་རེ་དོགས་ཆུང་བས་ཀུན་དང་འགྲས། །
དམའ་ལ་བྱམས་བརྩེ་ཆེ་བས་ཀུན་གྱིས་བཀུར། །
སུ་ལ་མི་འཇིགས་ཆ་ལུགས་ངེས་མེད་བསྒྱུར། །
གང་བྱུང་མཛད་པ་ཀུན་ཀྱིས་བློ་ལས་འགོངས། །
སྙེད་བཀུར་ཞགས་པས་མི་འཆིང་ཉི་ཟླའི་འགྲོས། །
ཚུལ་འཆོས་ཁྲིམས་ཀྱིས་མི་ཁོག་ནམ་མཁའི་གཤིས། །
ལུགས་གཉིས་སྐར་མའི་ཕྲ་ཚོམ་ངེས་མེད་འགོད། །
དད་པའི་རྒྱ་མཚོ་འཕྱུར་བའི་རླབས་ཕྲེང་མཐོ། །
མ་བཅོས་མེད་དང་གཅིག་པུའི་ཚུལ་ཁྲིམས་དང་། །
སྡེ་གསུམ་ཀློང་དགུ་ནཱ་དའི་དབྱངས་ཀྱི་གསུང་། །
སྣ་ཚོགས་རང་གྲོལ་གཏད་འཛིན་གཞི་གྲོལ་ཐུགས། །
རྨི་ལམ་དབང་ཕྱུག་ཡེ་ཤེས་རྒྱན་དུ་རོལ། །
སྟོང་ཉིད་དྲ་བ་ཐབས་ཀྱི་གཡེར་ཀའི་སྒྲས། །
དཔའ་མཚན་སྟག་ལྤག་གོས་ཅན་ཚོགས་དབང་བསྒྱུར། །
དཀར་དམར་བདུད་རྩི་བདེ་སྐྱོང་དབྱིངས་སྟོབས་པའི། །
གསང་བ་འཛིན་དབང་རྡོ་རྗེའི་ཆོས་ཆར་ཕོབས། །
ཐུབ་བསྟན་སྤྱི་དང་མཚོ་སྐྱེས་རྒྱལ་བའི་བསྟན། །
སྣ་ཚོགས་ཚུལ་གྱིས་འཛིན་སྐྱོང་སྤེལ་བ་དང་། །
སེམས་དཔའ་ཆེན་པོ་འཇིགས་པ་མེད་པའི་སྡེས། །
ཐུགས་ཀྱི་བཞེད་དོན་སྒྲུབ་ཕྱིར་ཞབས་བརྟན་ཤོག །
ཅེས་པའང་ངོ་དེབ་ནས་ཡིག་ཆུང་འགའ་མིག་ལམ་དུ་ཤར་མ་ཐག་སོར་མོའི་འདུ་བྱེད་བསྒྱུར་ཏེ་གང་དྲན་བཅོས་མེད་དུ་ཀཿཐོག་པ་རིག་འཛིན་ཆེན་པོའི་སྐྱེ་མིང་པ་པདྨ་དབང་ཆེན་དགྱེས་པས་ཤར་མར་སྤེལ། །
Subscribe to:
Post Comments (Atom)
0 comments:
Post a Comment