Wednesday, 30 May 2012
14:52 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །འགྲོ་མགོན་བཀའ་བརྒྱུད་པའི་སྐྱོབ་པ་འཇིག་རྟེན་གསུམ་མགོན་དང་དབྱེར་མ་མཆིས་པའི་
༧སྒྲུབ་བརྒྱུད་༧སྐྱེ་སྔ་༧ཆོས་ཀྱི་ཉི་མའི་ཞབས་བརྟན་གསོལ་འདེབས་
རིན་ཆེན་རྒྱལ་པོའི་མཆོད་སྤྲིན་ཞེས་བྱ་བ། །
ན་མོ་གུ་རུ་དྷརྨྰ་རཏྣ་སུརྱ་ཡེ། །
ཆོས་དབྱིངས་སྤྲོས་མཐའ་བྲལ་བའི་ཕྱག་རྒྱ་ཆེར། །
དོན་དམ་ལྷན་སྐྱེས་དགའ་མའི་བདེ་ཆེན་བརྙེས། །
སྣང་སྲིད་རྣམ་དག་རྒྱལ་བའི་དཀྱིལ་འཁོར་ལས། །
ངེས་དོན་བཤེས་གཉེན་དམ་པས་དགེ་ལེགས་སྩོལ། །
འཁོར་བར་ངེས་འབྱུང་ཆེན་པོའི་ཚུལ་ཁྲིམས་ལྡན། །
བྱམས་བརྩེ་སྙིང་རྗེ་ཆེན་པོའི་བྱང་སེམས་ཅན། །
སྣོད་བཅུད་དག་མཉམ་རྟོགས་པའི་རྣལ་འབྱོར་པ། །
སྐྱེ་སྔ་ཆོས་ཀྱི་ཉི་མ་ཞབས་བརྟན་ཤོག །
དད་གུས་བརྩོན་འགྲུས་ཆེན་པོས་ཐོས་བསམ་སྒོམ། །
གཞན་ཕན་ཕྲིན་ལས་ཆེན་པོས་འཆད་རྩོད་རྩོམ། །
བཤད་སྒྲུབ་དམ་པའི་བརྒྱུད་འཛིན་འཇིག་རྟེན་མགོན། །
སྐྱོབ་པ་བསྟན་པའི་རྒྱལ་མཚན་ཞབས་བརྟན་ཤོག །
སྒྲུབ་བརྒྱུད་གོང་མའི་རྒྱལ་ཚབ་རིན་པོ་ཆེས། །
རྩ་གསུམ་རྒྱལ་བའི་བསྙེན་སྒྲུབ་ལེགས་མཛད་པས། །
དབང་ཁྲིད་བཀའ་གཏེར་གདམས་པའི་མཛོད་འཛིན་པ། །
མཁས་གྲུབ་བླ་མ་དམ་པ་ཞབས་བརྟན་ཤོག །
འཇིག་རྟེན་ལྷ་མིར་བཅས་པའི་ཕྱག་བྱའི་གནས། །
ཚོགས་གཉིས་ཡིད་བཞིན་ནོར་བུའི་འབྱུང་གནས་ཆེ། །
སྐུ་གསུམ་དོན་གྱི་བདག་པོ་རྡོ་རྗེ་འཆང་། །
སྐྱོབ་པ་འཇིག་རྟེན་གསུམ་མགོན་ཞབས་བརྟན་ཤོག །
སྐུ་མཆོག་མཚན་དཔེའི་རྣམ་སྨིན་རིག་འཛིན་ཐོབ། །
གསུང་ཆོས་ཚངས་དབྱངས་ཚེ་དབང་རིག་འཛིན་བརྙེས། །
ཐུགས་རྗེ་མཁྱེན་བརྩེའི་ཕྱག་ཆེན་རིག་འཛིན་རྒྱལ། །
ལྷུན་གྲུབ་རིག་འཛིན་ཆེན་པོར་ཞབས་བརྟན་ཤོག །
ཅེས་པ་འདི་ནི་རབ་རྒྱན་ཆུ་འབྲུག་ས་ག་ཟླ་བའི་ཡར་ཚེས་བཅུ་ཉིན་ལ་ཨེ་ཝྃ་ཆོས་སྨན་གླིང་གི་མཁན་པོ་འོད་གསལ་མཐའ་ཡས་ཀྱིས་བསྐུལ་བ་དང་རང་གིས་ཞབས་བརྟན་སྨོན་གསོལ་ཞིག་འབྲི་འདོད་ཡོད་པ་གཉིས་རྟེན་འབྲེལ་ལེགས་འགྲིགས་བྱུང་བས་དབྱིན་ཡུལ་བོད་བརྒྱུད་རྣལ་འབྱོར་ཆོས་ཚོགས་ཁང་ནས་གང་ཤར་ཐོལ་བྱུང་དུ་དཔལ་དགྱེས་པ་རྡོ་རྗེས་གློག་འཕྲུལ་མཛུབ་རིས་སུ་བགྱིས་པ་ཤྲྰི་སརྦ་ལོ་ཀ་བི་ཛ་ཡནྟུ།།
།།
Subscribe to:
Post Comments (Atom)
0 comments:
Post a Comment