Tuesday 10 July 2012
21:39 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །ཞི་བདེའི་མཁའ་འགྲོ་དཀར་པོའི་འཁྲུངས་སྐར་ལ་བཀྲ་ཤིས་བདེ་ལེགས་ཞུ། །
ཤྲྰི་སྨྱོན་པ།ཨེ་མ་ཧོཿ
ནམ་མཁའ་འཇའ་འོད་ཀྱི་ཀློང་ན། །
ཞི་བདེའི་མཁའ་འགྲོ་ནི་དཀར་པོས། །
གཤོག་རྩལ་སྐྱོད་པ་འདི་མཐོང་ཚེ། །
སྙིང་གྲོགས་དམ་པ་ཞིག་དྲན་སོང་། །
སྣང་སྟོང་རྟེན་འབྱུང་གི་ལྟ་བའི། །
གཤོག་ཟུང་མཁའ་དབྱིངས་ལ་བསྐྱོད་བཞིན། །
རྒྱང་རིང་རྒྱལ་ཁམས་རྣམས་འཕུར་བའི། །
ཞི་བདེའི་མཁའ་འགྲོ་ཉིད་རྒྱལ་ལོ། །
གྲུ་འཛིན་ཞིང་མཆོག་གི་མཁའ་འགྲོས། །
གངས་དཀར་ཀླད་མེད་དུ་མ་བཞག །
མཁའ་སྤྱོད་བདེ་ལམ་དུ་མ་ཕེབས། །
གངས་ཅན་གཙུག་རྒྱན་དུ་བཞུགས་ཤིག །
གདོང་དམར་སྙིང་བརྩེ་ཡི་མཁའ་འགྲོ། །
གསང་གསུམ་དཀར་པོ་དག་མཐོང་ཚེ། །
འཛམ་གླིང་ཕུག་རོན་གྱི་ཡང་རྩེ། །
ཞི་བདེའི་ལྷ་བྱ་ཁྱེད་རྒྱལ་ལོ། །
མཁྱེན་བརྩེའི་ཕྱག་ཟུང་གི་ཐལ་སྦྱར། །
ཐབས་ཤེས་གཤོག་ཟུང་གིས་ལམ་སྟོན། །
མཁའ་འགྲོའི་སྤྱན་རིས་ཀྱིས་གཡོ་བས། །
འཁོར་འདས་ལམ་བཟང་ཞིག་བསྟན་སོང་། །
ཟིང་ཟིངས་རྨི་ལམ་གྱི་ངོགས་སུ། །
མེ་འབར་ཆུ་འཇིགས་ཀྱི་གནོད་པས། །
ཞི་བདེའི་མཁའ་འགྲོ་ལ་གཟན་པ། །
འཁྲུལ་སྣང་རང་བཟློག་ཏུ་སྨོན་ནོ། །
ལྷག་དཀར་དོན་བརྒྱད་ཀྱི་ཉིན་མོ། །
དམ་ཚིག་མཁའ་འགྲོ་ཁྱེད་དྲན་ཚེ། །
འཛམ་གླིང་ཞི་བདེ་ཡི་དེད་དཔོན། །
ལྷ་ལྡན་ཞིང་ཁམས་སུ་འཕུར་ཤོག །
ཆོས་དབྱིངས་ནོར་གླིང་གི་གདན་སར། །
མི་འཇིགས་མཁའ་འགྲོ་ཁྱེད་ཕེབས་དང་། །
ཁམས་གསུམ་འགྲོ་བ་ཡི་སྙིང་ལ། །
ཞི་བདེའི་བདུད་རྩི་ཞིག་འཁྲུངས་ཡོང་། །
ཤར་ནས་ནུབ་ཕྱོགས་སུ་འཕུར་བའི། །
ཞི་བདེའི་མཁའ་འགྲོ་ནི་དཀར་པོ། །
སླར་ཡང་རྟེན་འབྲེལ་གྱི་དབང་གིས། །
ཉི་ཟླའི་འགྲོས་བཞིན་དུ་ཕེབས་ཤོག །
གོས་དཀར་ཞལ་བཟང་དུ་བཏབས་པའི། །
སོལ་རྡུལ་ཕུང་པོ་ལ་དགོངས་ནས། །
དྲན་རྟེན་རྡོ་རིང་གི་ལོགས་སུ། །
མཁའ་འགྲོས་བྱིན་རླབས་ཤིག་མཛོད་ཅིག །
སྐྱིད་བཤོངས་ནུབ་ཁ་ཡི་མཚམས་སྤྲིན། །
དཀར་ནག་སྡིག་ཏོ་ཡི་སྤྱི་ཚོགས། །
དེང་རབས་ཤར་བསྐྱོད་དུ་མཛད་ནས། །
ཞི་བདེའི་མཁའ་འགྲོ་ཁྱེད་ཕེབས་ཤོག །
ཏང་སྐར་ཁྲག་ཞག་གི་རྒྱ་མཚོ། །
བྱམས་བརྩེའི་འོ་མཚོ་རུ་བསྒྱུར་ནས། །
དུང་གཙང་མི་ལུས་ཀྱི་རིན་ཐང་། །
རང་དབང་མཁའ་སྤྱོད་དུ་མཛོད་ཅིག །
ཁ་དར་ཁ་བ་དང་འདྲིས་ཞིང་། །
དཀར་འབྱམས་ཡུག་གཅིག་གི་གངས་ཅན། །
ཕྱི་ནང་གསང་གསུམ་གྱི་ཞི་བདེ། །
དུས་བབས་མཁའ་འགྲོ་ཡི་ཕྲིན་ལས། །
ལང་ཚོའི་འཁྲི་ཤིང་གི་འདབ་གཤོག།
འཆི་མེད་འཇའ་ལུས་སུ་ཕེབས་པས། །
མཚོ་འཁྲུངས་རྒྱལ་བ་ཡི་བརྒྱུད་འཛིན། །
བསྟན་འཛིན་མཁའ་འགྲོ་ཡི་འཛུམ་དྲུག །
བདེན་བཞིའི་ལམ་བཟང་གི་ཆོས་དབྱངས། །
འཁོར་འདས་རང་གྲོལ་གྱི་གདམས་ངག །
ཡང་གསང་རྣལ་འབྱོར་གྱི་ཐུགས་དམ། །
ཚེ་འཛིན་མཁའ་འགྲོ་ཡི་གསུང་ཆོས། །
ཀ་དག་ཆོས་ཉིད་ཀྱི་དགོངས་པ། །
ལྷུན་གྲུབ་གཉུག་མ་ཡི་འོད་གསལ། །
ཟུང་འཇུག་རིག་སྟོང་གི་སངས་རྒྱས། །
ཆོས་དབྱིངས་མཁའ་འགྲོ་ཡི་ཐུགས་རྗེ། །
ཡུན་རིང་མཇལ་འཛོམས་ཀྱི་རེ་སྒུག །
ཡིད་བཞིན་ནོར་བུ་ཡི་ཡོན་ཏན། །
བསོད་ནམས་ཡེ་ཤེས་ཀྱི་ཚོགས་ཆེན། །
འབད་མེད་ལྷུན་གྲུབ་ཏུ་སྩོལ་ཅིག །
ཅེས་པ་རབ་རྒྱན་ཆུ་འབྲུག་སྣྲོན་ཟླའི་གསོ་སྦྱོང་གི་སྐབས་སུ་དཔལ་ལྡན་ལྷ་མོ་དང་མཁའ་འགྲོ་བདེ་གཡང་གིས་བསྐུལ་བ་བཞིན་དུ་ཨེ་ཝྃ་མཁའ་འགྲོ་ཆོས་གླིང་ནས་༧གོང་ས་མཆོག་གི་འཁྲུངས་སྐར་དུ་ཤྲྰི་སྨྱོན་པས་སྙིང་ནས་སྨོན་པ་དོན་དང་ལྡན་པར་གྱུར་ཅིག ཤྲྰིཿསརྦ་ལོ་ཀ་བི་ཛ་ཡནྟུ། །
Subscribe to:
Post Comments (Atom)
0 comments:
Post a Comment