Wednesday 17 October 2012
10:44 | 
Posted by
༄༅།། ཨེ་མ་ཧོའི་རིག་མཛོད་། |
༄༅།། གྲུབ་དབང་བླ་མ་ལུང་རྟོགས་རྒྱལ་མཚན་་དཔལ་བཟང་པོ་སྐུ་ཞི་བར་གཤེགས་ནས་ལོ་འཁོར་གཅིག་ལོན་པའི་རྗེས་དྲན་དུ།
ཆོས་ཀུན་མ་འདྲེས་སོ་སོར་གསལ་བའི་མཁྱེན་པའི་མེ་ལོང་གཙང་མའི་ངོར།།
གཙུག་ལག་གཞུང་གི་ཟབ་རྒྱས་སྙིང་པོ་རྣམ་པར་གསལ་བའི་ངོ་མཚར་འབུམ།།
མཁས་རློམ་རལ་བ་གདན་དུ་ལེན་པའི་ལུང་རྟོགས་བསྟན་པའི་མཛོད་འཆང་བ།།
འདྲེན་མཆོག་བླ་མའི་ཞབས་སེན་རྡུལ་ལ་མི་ཕྱེད་དད་པས་ལྷ་ཕྱག་བརྩེགས།།
སྙིགས་མའི་འགྲོ་བའི་ཡིད་ཀྱི་ས་ཆེན་དུས་ཀྱི་མུན་པས་ཡོངས་བཀབ་སྟེ།།
རྨོངས་བའི་ཡོལ་བ་ཡངས་པོར་ཕྱེ་བའི་དབྱིངས་ཀྱི་ལྷ་ཚོགས་ངལ་བའི་ཚེ།།
མཛད་འཕྲིན་འཁོར་ལོའི་མུ་ཁྱུད་གཅིག་ཏུ་འགྲོ་ཀུན་ཟླུམ་པའི་ཤེད་མོང་གིས།།
མཐོན་པོའི་རྒྱལ་མཚན་བླ་རུ་བསྒྲེངས་བའི་ཕ་རྒོད་བླ་མ་སྙིང་ནས་དྲན།།
རིང་མོའི་དུས་ནས་ཚོགས་གཉིས་ལ་བརྟེན་གཉུག་མའི་བཙན་ས་ཟིན་ལེགས་ཀྱང་།།
ཉམ་ཐག་འགྲོ་ལ་བརྩེ་བས་རྗེས་ཆགས་སྒྱུ་འཕྲུལ་སར་བ་སར་བའི་གར།།
མི་མཇེད་ཞིང་གི་འཇིག་རྟེན་འདི་ནས་བསྒྱུར་བའི་བྱུང་བ་རླབས་པོ་ཆེ།།
བརྗོད་པར་རྒྱལ་བའི་ལྗགས་ཀྱང་ངལ་བས་དམན་པོའི་ལྕེ་རྩེར་ཤོང་ནུས་མིན།།
རྩོད་ངག་གནམ་ལྩགས་འཁོར་ལོ་འབར་བས་ལོག་རྟོག་གླང་བོའི་ཀླད་ལ་འགེམས།།
མི་འཇིགས་སྟོབས་བཅུའི་རྩལ་རབ་རྗོགས་པས་ཤྰཀྱ་སེང་གེ་གཞན་ཡོད་མིན།།
རྨད་བྱུང་ཐུབ་བསྟན་སྐྱ་རེངས་དཀར་པོ་ཕྱོགས་ཀྱི་མཐའ་རུ་འདྲེན་པའི་མགོན།།
དེ་རིང་འདབ་བརྒྱད་སྙིང་གི་ཟེའུ་འབྲུར་བཞེངས་ཤིག་དྲན་པས་ཆོ་ངུ་བགྱིད།།
འོག་འགྱུ་རླུང་གི་རྟོག་ཚོགས་རྒོད་པོའི་ཆུ་འཛིན་ལ་འཁྲིལ་སྲེད་པའི་ཆུར།།
མི་མཐོང་ཀུན་གཞིའི་གཤིན་སའི་འགྲམ་པར་ཟོལ་གྱིས་འཇོ་བའི་རྟེན་འབྲེལ་གྱིས།།
རེ་དོགས་མྱུ་གུའི་ཚང་ཚིང་འབུས་བའི་རྨི་ལམ་ཞིག་གི་རྩེད་འཇོ་ལ།།
ཅིར་ཡང་འཁྲུལ་བའི་ཉམ་ཆུང་བུ་ང་ས་ནག་གྲུ་བཞིའི་ཕང་ནས་ངུ།།
འཇམ་མཉེན་ཕྱག་ཟུང་རིང་དུ་བརྐྱངས་ནས་དབུགས་དབྱུང་མེ་ཏོག་གཏོར་བའི་མགོན།།
ལས་འབྲས་ཟབ་མོའི་རྣམ་བཞག་རེ་རེ་སྙན་པའི་གསུང་ལ་རབ་བརྒྱུས་ཏེ།།
ལུས་སྐྱེས་བ་སྤུ་ལོང་ལོང་གཡོ་བའི་དད་ལྡན་སྐྱེ་བོའི་མཆོད་སྡོང་དུ།།
ཆོས་དབྱིངས་སྒེག་མོའི་མངལ་ལས་འཛུམ་གྲོལ་ཁྱེ་སྐུ་ཉི་གཞོན་ག་དུས་འཆར།།
མཐོན་པོའི་རི་རྒྱབ་སྨུག་གི་གནོན་པའི་སྤེན་མ་འཛིངས་བའི་རྫ་གཤོལ་ཞིག།
ཤང་ཤང་ཆུ་མོའི་དབྱངས་རྟ་འཁྱིལ་བའི་བརྡ་ཁོལ་དབེན་པའི་ཐིག་ལེ་ཞེས།།
ཆོས་བརྒྱད་འཕྱོན་མ་ཐབས་ཀྱིས་ཕོངས་བའི་མཚུངས་མེད་བླ་མའི་བསྟི་གནས་སུ།།
འཁྱམས་པོའི་ཡིད་ཀྱི་གས་སྲུབས་ཞིག་ལས་དྲན་པའི་སྨྲེ་ངག་འདི་ཙམ་ཐལ།།
༢༠༡༢
༩ ༢
Subscribe to:
Post Comments (Atom)
0 comments:
Post a Comment