Tuesday 27 November 2012
22:33 | 
Posted by
༄༅།། ཨེ་མ་ཧོའི་རིག་མཛོད་། |
ཨེ་མ་ཧོའི་ཞབས་བརྟན་ཀ་རྩོམ་མཆེད་ལྔ། །
ཕུལ་བྱུང་གི་སྙན་ངག་པས།
༄། །གསོལ་འདེབས་ཀྰ་ལིའི་དོ་ཤལ་ཞེས་བྱ་བ་བཞུགས་སོ།།
ཀླུ་སྨྱོན་ཧེ་རུ་ཀ ཨ་རི།
ཀ་དག་ཆོས་དབྱིངས་ཁ་སྦྱོར་ནམ་མཁའི་མདོག །
ག་ས་གང་དུ་ང་ཅག་མགོན་སྣང་མཁྱེན།
།
ཅ་ཅོའི་སྤྲོས་བྲལ་ཆ་རྫོགས་ཉམས་རྟོགས་མཛོད།
།
ཇ་ཆང་འདོད་ཡོན་ཉ་རྒྱས་དབང་སྡུད་བསྔག
།
ཏ་ལའི་འདབ་འདྲའི་ཐ་དད་འགྲོ་བ་རྣམས།
།
ད་ལྟ་དུས་གསུམ་ན་རྒ་འཇིགས་སྐྱོབ་རྒྱལ།
།
པ་ར་མི་ཏའི་ཕ་མཐའ་མཁྱེན་པའི་ཐུགས།
།
བ་ལང་ལ་སོགས་མ་རྒན་འདྲེན་ཁྱོད་དྲན།
།
ཙ་རི་ལ་སོགས་ཚ་བའི་ཡུལ་ལྗོངས་སུ།
།
ཛ་དྲག་བསྟན་སྤེལ་ཝ་ལེར་བཞུགས་གསོལ་འདེབས།
།
ཞ་ལོང་འགྲོ་བར་ཟ་འཐུང་སྩོལ་མཛད་ཅིང་།
།
འ་ཅག་དམ་ཚིག་ཡ་མཚན་བདེན་སྟོབས་མཐུས།
།
ར་རིའི་དྲི་བྲལ་ལ་ལུང་བརྒལ་བའི་ཟླ།
།
ཤ་ཚའི་གསུང་སྙན་ས་སྟེང་ཁྱབ་བཞིན་བཞུགས།
།
ཧ་ཅང་བརྩེ་བའི་ཨ་ལགས་མཁན་ཆེན་མཆོག
།
སྐུ་ཚེ་བརྟན་ཅིང་མཛད་འཕྲིན་རྒྱས་པར་སྨོན།
།
ཞེས་པ་འདི་ཡང་།
དུས་མཐའ་འདིར་ལུང་རྟོགས་ཡོན་ཏན་གྱིས་ཕྱུག་པའི་མཁན་ཆེན་བླ་མ་རིན་པོ་ཆེ་ མཆོག་གི་ཞབས་བརྟན་གསོལ་འདེབས་སུ་དམིགས་ཏེ།
ས་མཐའི་ལྡོམ་པོ་ཀླུ་སྨྱོན་ཁྲག་འཐུང་གླིང་པ་ ཞེས་འབོད་པ་དེས་ཨ་རིའི་ཡུལ་ནས་རྩེ་གཅིག་ཏུ་སྨོན་པ་དགེའོ།
།
སློབ་དཔོན་དགྱེས་དཔལ་རྡོ་རྗེའི་གསོལ་འདེབས་བྱིན་རླབས་ཆར་འབེབས་ཞེས་བྱ་བ་བཞུགས་སོ།།
དགེ་བཤེས་བེ་རི་འཇིགས་མེད།
དྷརྨ་ས་ལ།
ཀ་དག་ཁྲེགས་ཆོད་གཉུག་མའི་རང་སེམས་གསལ།།
ཁ་བ་དུང་དང་པད་རྩ་ལྟ་བུའི་སྐུ།།
ག་ཤལ་མགྲིན་པའི་རྩ་མདུད་གྲོལ་བའི་གསུང་།།
ང་ཡི་མཆེད་གྲོགས་དགྱེས་དཔལ་རྡོ་རྗེ་མཁྱེན།།
ཅ་ཅོ་ཆོ་མེད་གསུང་གི་སྒོ་ན་མེད།།
ཆ་སྤྱོད་ཆོས་བརྒྱད་སྐུ་ཡི་ཉམས་ན་མེད།།
ཇ་ཆང་འདོད་ལ་ཆགས་སེམས་ཐུགས་ན་མེད།།
ཉ་རྒྱས་ཟླ་གཞོན་དགྱེས་དཔལ་རྡོ་རྗེ་མཁྱེན།།
ཏ་ཐྰ་ག་ཏྰའི་བསྟན་ལ་ཉམས་ལེན་ཟབ།།
ཐ་སྙད་རིག་པའི་གནས་ལ་མཁྱེན་རྒྱ་ཡངས།།
ད་ལྟར་ཕྱི་གླིང་གང་སར་འཕྲིན་ལས་རྒྱས།།
ན་རའི་མཆོག་གྱུར་དགྱེས་དཔལ་རྡོ་རྗེ་མཁྱེན།།
པ་ལོ་དབུ་ལ་བཅིངས་པའི་གྲུབ་ཐོབ་པ།།
ཕ་རོལ་ཕྱིན་གཞུང་མཁས་པའི་པཎྜི་ཏ།།
བ་སོ་ལྟར་དཀར་བྱང་སེམས་ས་གནས་པ།།
མ་ལུས་མགྲོ་མགོན་དགྱེས་དཔལ་རྡོ་རྗེ་མཁྱེན།།
ཙ་ཀྲ་གསུམ་གྱི་དགོངས་དོན་ཐུགས་སུ་ཆུབ།།
ཚ་གྲང་ཁྱད་བསད་སྒོམ་པའི་ཉམས་མྱོང་ཐོན།།
ཛ་ཡའི་བསྟན་པ་འཛམ་གླིང་ཤར་ནུབ་ལ།།
ཝ་ལེར་གསལ་མཛད་དགྱེས་དཔལ་རྡོ་རྗེ་མཁྱེན།།
ཞྭ་མདོག་ཕྱོགས་རེས་བྲལ་བའི་ཉམས་ལེན་ཟབ།།
ཟ་འཐུང་ངན་ངོན་ཙམ་གྱི་ཆོག་ཤེས་ལྡན།།
འ་འུར་གཡམ་རྒྱུག་མེད་པའི་བརྟན་ལྷིངས་ཅན།།
ཡ་མཚན་སྐྱེས་ཆེན་དགྱེས་དཔལ་རྡོ་རྗེ་མཁྱེན།།
ར་མགོ་ལུག་སྦྱར་བྱེད་པའི་མཛད་སྤྱོད་མེད།།
ལ་ལུང་མགོ་སྐོར་བཏང་བའི་ལོ་རྒྱུས་མེད།།
ཤ་ཚའི་ཟོལ་གྱིས་བསླུས་པའི་གྱོད་གཞི་མེད།།
ས་མཐའི་འདྲེན་པ་དགྱེས་དཔལ་རྡོ་རྗེ་མཁྱེན།།
ཧ་ཅང་སྙིགས་མའི་དུས་རླུང་འཚུབ་མའི་ནང་།།
ཨ་དོན་སྐྱེ་མེད་དམ་པའི་ཆོས་ཚུལ་གྱིས།།
ཧ་ལོ་འབོད་པའི་ཡུལ་གྲུར་གསལ་མཛད་པ།།
ཨ་ལགས་མཆོག་སྤྲུལ་དགྱེས་དཔལ་རྡོ་རྗེ་མཁྱེན།།
ཅེས་མ་མཇལ་རིག་པའི་མཆེད་གྲོགས་སློབ་དཔོན་དགྱེས་དཔལ་རྡོ་རྗེའི་གསོལ་འདེབས་བྱིན་རླབས་ཆར་འབེབས་ཞེས་བྱ་བ་འདི་ནི།
སྙན་ངག་པ་བེ་རི་འཇིགས་མེད་ཀྱིས། མཐའ་དག་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས་ཆེན་པོ་གང་ན་བཞུགས་པའི་གནས་མཆོག་ཛ་ལནྡྷ་ར་དེང་གི་ཆར་དྷརྨ་ས་ལ་ཞེས་སུ་འབོད་པའི་ནགས་འདབས་སུ།
སྤྱི་ལོ་ ༢༠༡༢། ༩། ༦། ཉིན་ཐོལ་བྱུང་དུ་བྲིས་པ་དགེ་ལེགས་འཕེལ། །
ཀ་བསྟོད་རྒྱལ་སྲས་དགྱེས་པའི་འཛུམ་མདངས་བཞུགས་སོ། །
ཤར་སྤྲུལ་རིན་པོ་ཆེ། འབྲས་ལྗོངས།
ཀ་དག་གདོད་མའི་གཞི་ཀློང་ནས།
ཁ་དོག་སྒྱུ་འཕྲུལ་དྲྭ་བའི་འོད།
ག་གི་དགྱེས་པ་རྡོ་རྗེ་མཆོག།
ང་ཅག་དཔལ་དུ་ཤར་འདི་རྨད།
ཅ་ཅོའི་ཚིག་གི་སྤྲོས་བྲལ་ཞིང་།
ཆ་མེད་དོན་དམ་གནས་ལུགས་ལ།
ཇ་ཡུན་གཅེར་མཐོང་ངོ་སྤྲོད་པས།
ཉ་གང་ཟླ་ལྟར་ལྷུན་གྱིས་གྲུབ།
ཏ་ཚ་དབྱིག་སྙིང་ཞི་བསིལ་ཆོས།
ཐ་སྙད་ཐོས་བསམས་སྒྲོ་མདོགས་ཆོད།
ད་ལྟའི་ཤར་ནུབ་སྐྱེ་འགྲོ་དག།
ན་ཀྲ་འཁོར་བའི་འཇིགས་ལས་བསྐྱབ།
པ་ཊ་རྟེན་འབྱུང་འཁོར་འདས་ཆོས།
ཕ་རོལ་ཕྱིན་བཅུའི་ཐེམ་སྐས་ལ།
བ་གླང་མ་རིག་དུཿཁས་འགྲོ།
མ་ལུས་འདྲེན་ལ་ལྕགས་ཀྱུའི་མཆོག།
ཙ་རི་དག་པ་ཤེལ་རི་ནས།
ཚ་གྲང་འཇོམས་མཛད་མཁའ་འགྲོས་ཚོགས།
ཛ་དྲག་ཁྱེད་ཀྱིས་བཀའ་ཕེབས་ན།
ཝ་ལེར་འདུ་ལ་སྤྲོ་བ་འཕེལ།
ཞ་ཞོར་བྱམས་དང་བརྩེ་བའི་ཐུགས།
ཟ་ཟིས་གཡེང་ལ་མི་བསྐུར་ནས།
འ་འུར་སྐལ་ལྡན་བུ་སློབ་ཀུན།
ཡ་རབས་འཇུག་ལ་བསྐུལ་མ་འདེབས།
ར་བ་ཁོར་ཡུག་ངེས་མེད་དུ།
ལ་འུར་མི་རྟག་དྲན་བསྐུལ་ཏེ།
ཤ་ཚ་ཅན་གྱི་ལྔ་བདོའི་འགྲོ།
ས་མཆོག་ཐར་ལམ་བཀོད་ལ་བྲེལ།
ཧ་ཅང་མཁས་པའི་མཛད་རྣམ་ལ།
ཨ་ཙི་བདག་འདྲའི་རྟོགས་དཀའ་ཀྱང་།
ཨེ་མ་ཀ་མད་སུམ་བཅུའི་སྒྲས།
ཝཾ་ཡིག་སྤྲོས་བྲལ་དོན་རྟོགས་ཤོག།
འདིའང་དམ་ཆོས་རྒྱ་མཚོ་ཞེས་པ་ངེས་མེད་ཉུལ་བའི་རྨོངས་འཁྱམ་པ་དེས་སྦས་ཡུལ་འབྲས་མོ་ལྗོངས་སུ་རྟེན་འབྲེལ་གྱིས་བལྟས་ཅུང་ཟད་བྱུང་བ་བསྟུན་དཔལ་དགྱེས་པ་རྡོ་རྗེ་ལ་ཀ་མད་སུམ་བཅུས་བསྟོད་པ་འདི་ཕྱི་ལོ་༢༠༡༢/ཟླ་༤/༥ཉིན་གུས་པ་དང་བཅས་སྟེ་ཕུལ།
།
༄༅།། དཔལ་དགྱེས་པ་རྡོ་རྗེའམ་མཁན་ཆེན་བླ་མ་མཆོག་ལ་ཕུལ།
ཀ་དག་རྟོགས་པ་སད་པའི་རིག་འཛིན་གྱི་རྣལ་འབྱོར། ། ཁ་དོག་ཆ་ལུགས་མ་ངེས་བརྟུལ་ཞུགས་ཀྱི་མཛད་སྤྱོད།
།
ག་ས་གང་དུ་བཞུགས་པའི་འཕྲིན་ལས་ཀྱི་གདུགས་དཀར། ། ང་ཡི་མིག་ལམ་འཕྱར་དུས་ཡིད་སེམས་དེ་སྤྲོ་སོང་།
།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
སྔགས་སྨྱོན་ནས་འདི་ཙམ་མོ།།
ཀ་རྩོམ་ཐོལ་བྱུང་སྨྱོན་པའི་གླུ་དབྱངས།།
ཀ་ནས་དག་པ་གཞི་ཡི་གནས་ལུགས་རྟོགས། །
ཁ་སྦྱོར་བདུན་ལྡན་ལྷུན་གྲུབ་ལོངས་སྤྱོད་རྫོགས། །
ག་ཆད་འཁོར་འདས་དབྱེར་མེད་ཕྱག་རྒྱའི་གདབ། །
ང་རྒྱལ་རང་བྱུང་གདོད་མའི་མགོན་པོ་རྒྱལ། །
ཅ་ཅོ་མ་བཅོས་གཉུག་མའི་རང་མདངས་ཤར། །
ཆ་ལུགས་ངེས་མེད་བརྟུལ་ཞུགས་སྤྱོད་པའི་མཛེས། །
ཇ་ཆང་འདོད་ཡོན་ལོངས་སྤྱོད་ལམ་དུ་འཁྱེར། །
ཉ་གོང་དཔལ་བཞིན་དཔལ་དགྱེས་ཧེ་རུ་ཀ །
ཏ་ཐ་ག་ཏའི་ཟབ་གསང་བསྟན་པ་འཛིན། །
ཐ་མལ་སྣང་གྲོལ་རིག་པར་ཅེར་གྱིས་གཟིགས། །
ད་ཀི་དཔའ་མོའི་ཚོགས་རྗེར་དབང་བསྒྱུར་བ། །
ན་འཆིའི་འཇིགས་བྲལ་ཆེ་མཆོག་རོལ་བ་རྒྱལ། །
པ་སངས་འོ་མའི་སྙིང་བཅུད་ཀློང་ཆེན་པའི། །
ཕ་ཆོས་སྙིང་ཐིག་ཟབ་མོའི་གཏེར་ལ་དབང། །
བ་མཆོག་འོ་བཅུད་ཞི་བ་སྤྲོས་བྲལ་རྟོགས། །
མ་གྱུར་འགྲོ་ཀུན་བྱམས་གཅིག་འདྲེན་གྱུར་ཅིག །
ཙ་རི་ཏྲ་སོགས་དབེན་གནས་སྒྲུབ་གནས་ཀུན། །
ཚ་གྲང་མུན་སྒོམ་ཡུལ་ལས་རབ་འདས་པའི། །
ཛ་ཡའི་གསུང་མཆོག་ཐེག་དགུའི་ཡང་རྩེའི་དོན། །
ཝ་ལེར་ཐུགས་ཀྱི་དགོངས་ཀློང་འདྲེས་དེས་སྤྲོ། །
ཞྭ་གོས་ངུར་སྨིག་རྟོག་འཛིན་རབ་བྲལ་ཞིང།
ཟ་འཆག་སྤྱོད་ལམ་མ་བཅོས་ཡེ་བབ་ངང། །
འ་འུར་གྲགས་སྟོང་རྒྱལ་བའི་རང་སྒྲར་ཤེས། །
ཡ་མཚན་གུ་རུ་ཉིད་དང་དབྱེར་མེད་ཤོག །
རྭ་ལོ་གྲགས་རྒྱལ་མཐུ་སྟོབས་ལུས་དང་འགྲོགས། །
ལྭ་དཀར་རས་པའི་དམ་ཚིགས་སེམས་དང་འགྲོགས།།
ཤ་རྭ་རྔོན་པའི་ལས་འཕྲོས་བཀའ་གདམས་རྒྱུད། །
ས་ཐོབ་སེམས་དཔའ་མཆོག་ལ་གླུ་འདི་འབུལ། །
ཧ་ཧ་ཉམས་སྣང་བདེ་བའི་རོལ་མོ་ལས། །
ཧོ་ཧོ་འོད་གསལ་རྫོགས་ཆེན་དགོངས་པ་ཤར། །
ཨ་ཨ་ཆོས་རྣམས་སྐྱེ་མེད་སེམས་ཀྱི་གཤིས། །
ཨོ་ཨོ་རིག་པའི་རང་ངོ་ཤེས་གྱུར་ཅིག །
ས་མ་ཡཿ
ཞེས་པ་མཁན་ཆེན་བླ་མའི་འཁྲུངས་སྐར་ཉིན་རྟེན་འབྲེལ་དག་སྣང་གི་ཚུལ་དུ་སྐར་མ་བཅུ་ཙམ་གྱི་རིང་ལ་ཤར་མར་བྲིས་པ་དེ་རིང་སླར་ཡང་བཟོ་བཅོས་དང་ཞུ་དག་ཅང་ཟད་བགྱིས་ཏེ་ཕུལ་ལོ།།
Subscribe to:
Post Comments (Atom)
0 comments:
Post a Comment