དཀའ་ཚེགས་ཡེ་མི་དགོས་པར་གོ་ལ་ཇེ་ཆུང་དང་འབྲེལ་འདྲིས་ཇེ་ཉེ་རུ་ཐུབ་པའི་དྲ་ཚིགས་ལ་བརྟེན་ནས་དྲང་བདེན་རིགས་པའི་བླང་དོར་གསལ་བའི་སྒྲོན་མེ་ཞིག་སྦར་ན་བསམས། བདག་ནི་སྐྱེས་སྦྱང་གི་ཡོན་ཏན་ན་ཕྲ་ཡང་ལྷག་བསམ་དྲང་བདེན་གྱི་བསམ་པ་རྒྱ་ཆེ་བས་རྒྱལ་བསྟན་སྤྱི་དང་བོད་རང་གི་གནའ་དེང་གི་རིག་གཞུང་ལ་གོམས་འདྲིས་ཀྱི་མྱོང་ཚོར་དག་ངོ་ལྐོག་མེད་པར་རྒྱལ་ཕྱི་ནང་གི་རང་རིགས་སྤུན་མཆེད་དག་ལ་དམ་པའི་ཆོས་དང་མཐུན་མི་མཐུན་གྱི་བཟང་ངན་ཤན་འབྱེད་ཅིག་ཐུན་མིན་བོད་རང་གི་སྐད་ཡིག་ལས་སྟོན་པར་འདོད་ཐལ།

དྲ་ངོས་བཀླགས་གྲངས

ཡིག་ཚགས

སྒེར་གྱི་རྒྱུ་ཆ

མཚན་ཉིད་ཀུན་ལྡན་དམ་ཆོས་བླ་མར་མི་ཕྱེད་དད་གུས་ངེས་པར་ཤེས། ། རིགས་དྲུག་འགྲོ་བར་བཅོས་མིན་སྙིང་རྗེས་བདག་ལས་གཞན་གཅེས་སེམས་པར་ཞེན། ། གཡོ་སྒྱུའི་དཔུང་ལ་ངོ་བསྟོད་མི་བྱར་རང་གཤིས་དྲང་བདེན་ཕྲག་ཏུ་བཞེས། སད་རྨིར་དྲང་སྲོང་རྟུལ་ཞུགས་དཔལ་ལྡན་ཐབས་ཤེས་དགྱེས་པའི་གྲུབ་མཐའ་སྐྱོང་། །

ངེད་ཀྱི་སྐོར

༄༅།། ཨེ་མ་ཧོའི་རིག་མཛོད་།
མཚན་ཉིད་ཀུན་ལྡན་དམ་ཆོས་བླ་མར་མི་ཕྱེད་དད་གུས་ངེས་པར་ཤེས། ། རིགས་དྲུག་འགྲོ་བར་བཅོས་མིན་སྙིང་རྗེས་བདག་ལས་གཞན་གཅེས་སེམས་པར་ཞེན། ། གཡོ་སྒྱུའི་དཔུང་ལ་ངོ་བསྟོད་མི་བྱར་རང་གཤིས་དྲང་བདེན་ཕྲག་ཏུ་བཞེས། སད་རྨིར་དྲང་སྲོང་རྟུལ་ཞུགས་དཔལ་ལྡན་ཐབས་ཤེས་དགྱེས་པའི་གྲུབ་མཐའ་སྐྱོང་། །
View my complete profile
Powered by Blogger.
Tuesday, 26 February 2013

༧རྗེ་སྐུ་འབུམ་དགོན་པའི་མར་བཟོས་མེ་ཏོག་མཆོད་པའི་པར་རིས།

2013-2-25 0:50:32


ཙོང་ཁ་བརྒྱད་ཅུའི་གོས་དྲུབ་ཐང་ཀ

རྗེ་བཙུན་འཛིན་གྲྭས་བཞེངས་པའི་འཕགས་པ་སྤྱན་རས་གཟིགས་ཀྱི་སྐྭུ་བརྙན།

སྒོ་མང་འཛིན་གྲྭས་བཞེངས་པའི་རྗེ་བཙུན་བྱམས་པའི་སྐུ་བརྙན།

སྒོ་མང་འཛིན་གྲྭས་བཞེངས་པའི་བྱམས་པའི་ཞིང་བཀོད་ངོ་མཚར།

རྗེ་བཙུན་པས་བཞེངས་པའི་ཆོས་རྒྱལ་སྲོང་བཙན་སྒམ་པོའི་རྣམ་ཐར།

རྗེ་བཙུན་པའི་དགེ་འདུན་པ་རྣམས་ཀྱིས་མར་བཟོས་མཆོད་པ་བཤམས་པའི་ཚུལ།

དད་ལྡན་མཇལ་བ་ཚོས་ཁ་བཏགས་བཟུང་སྟེ་མར་བཟོས་མཆོད་པར་ཕྱག་མཇལ་ཞུ་བཞིན་པའི་ཚུལ།

ཉིན་གུང་དད་ལྡན་མང་ཚོགས་ཀྱི་འདུ་འགོད།
དམག་མི་རྣམས་ཀྱིས་མང་ཚོགས་ཀྱི་སྣེ་ཁྲིད་པའི་རྣམ་པ།

དགོང་མོའི་དུས་ཚོད་བཅུ་བའི་སྟེང་མཆོད་མཇལ་བའི་འཚང་ག་ཤིག་ཤིགགིས་མདུན་དུ་བསྐྱོད་བཞིན་པའི་རྣམ་པ།

དོ་ནུབ་ཀྱི་རྗེ་སྐུ་འབུམ་དགོན་པའི་གསེར་ཏོག་དང་བཅོ་ལྔའི་དུང་ཟླ།
༧རྗེ་སྐུ་འབུམ་མེ་ཏོག་མཆོད་པ
རྩོམ་པ་པོ།   ཞོ་བཟང་དགེ་འདུན་ཚུལ་ཁྲིམས་ཀྱིས་བརྩམས།
བོད་གནའ་རབས་བསྐལ་པ་ཡ་ཐོག་གི་དུས་སྐབས་ནས་བཟུང་ཆེ་བ་དགོན་པ་དང་ཆུང་བ་ཁྱིམ་ཚང་ཡོངས་ཀྱིས་གནམ་ལོ་གསར་ཚེས་དང་དུས་ཆེན་ཁྱད་པར་ཅན་སོགས་ཀྱི་སྐབས་སུ་བཞེངས་པའི་མེ་ཏོག་མཆོད་པ་ནི། ལག་ཟུང་ཁོ་ནར་རྟེན་ནས་དུས་ཡུན་རིང་པོའི་བརྒྱུད་རིམ་ཁྲོད་འཕེལ་རྒྱས་བྱུང་བའི་སྒྱུ་རྩལ་བླ་མེད་ཅིག་ཡིན་པས་བདག་གིས་ངོ་སྤྲོད་རགས་ཙམ་བྱ་རྒྱུ་ཡིན།
སྙན་གྲགས་ཀྱི་བ་དན་དཀར་པོ་ཕྱོགས་བཅུར་གཡོ་བའི་ཞྭ་སེར་བསྟན་པའི་དགོན་ཆེན་དྲུག་གི་ཡ་གྱལ་ཏེ། མདོ་སྨད་ཀྱི་ཆོས་སྡེ་ཆེན་པོ་སྐུ་འབུམ་བྱམས་པ་གླིང་གི་སྒྱུ་རྩལ་རྣམ་གསུམ་སྟེ། མེ་ཏོག་མཆོད་པ་དང་ལྡེབས་རིས། འཚེམས་དྲུབ་བཅས་ནི་སྒྱུ་རྩལ་གྱི་རིན་ཐང་ཧ་ཅང་ཆེ་བ་ཞིག་རེད། དེ་ལས་མེ་ཏོག་མཆོད་པ་ཇི་ལྟར་བྱུང་ཚུལ་ནི།
རྗེ་ཙོང་ཁ་པ་ཆེན་པོ་བློ་བཟང་གྲགས་པའི་དཔལ་དགུང་ལོ་ང་གསུམ་བཞེས་པ་རབ་བྱུང་བདུན་པའི་ས་གླང་སྤྱི་ལོ་༡༨༠༩ལོར་ལྷ་དང་བླ་མའི་ལུང་བསྟན་བཞིན་ཆོ་འཕྲུལ་སྨོན་ལམ་ཆེན་མོ་གསར་འཛུགས་གནང་བ་དང་། དེའི་མཚན་མོ་ཞིག་ལ་ཁོང་གི་མནལ་ལམ་དུ་ས་གཞིའི་སྟེང་གི་རྩྭ་དང་རྩི་ཤིང་ཐམས་ཅད་སྒྲོན་མེ་དང་། ཚེར་མ་དང་རྡོ་ཟེགས་ཐམས་ཅད་མེ་ཏོག་ཏུ་གྱུར་བའི་རྨི་ལམ་ངོ་མཚར་བ་ཞིག་རྨིས། ཕྱི་ཉིན། ཁོང་གིས་མནལ་ལམ་དུ་བྱུང་བ་ཇི་བཞིན་འཁོར་རྣམས་ལ་གསོལ་མར་གྱིས་མེ་ཏོག་བཟོ་བར་སྐུལ་ནས། བདོ་ཟླ་དང་པོའི་ཚེས་བཅོ་ལྔའི་མཚན་མོར། ལྷ་ལྡན་གཙུག་ལག་ཁང་གི་མདུན་དུ་ཇོ་བོ་ཤཱཀྱ་མུ་ནེ་གཙོ་བྱས་པའི་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ལ་མེ་ཏོག་མཆོད་པ་ཕུལ་ནས། སངས་རྒྱས་ཀྱི་བསྟན་པ་ཡུན་རིང་རྒྱས་པའི་སྨོན་ལམ་རྒྱ་ཆེར་བཏབ། དེ་ནས་བཟུང་སྟེ་རི་བོ་དགེ་ལྡན་པའི་དགོན་པ་ཁག་ལ་མེ་ཏོག་མཆོད་པ་འབུལ་བའི་སྲོལ་དར་བ་རེད།
སྐུ་འབུམ་བྱམས་པ་གླིང་ལ་རབ་བྱུང་བཅུ་པའི་ཤིང་རྟ་སྤྱི་ལོ་༡༥༩༧ལོར་ཟི་ན་བླ་མ་དཔལ་འབྱོར་རྒྱལ་མཚན་དང་དཔལ་འབྱོར་རིན་ཆེན་ཁུ་དབོན་གཉིས་ཀྱིས་མགོན་ཁང་ཆེན་མོ་གསར་བཞེངས་བྱས་ནས་རབ་གནས་གནང་རྗེས། བོད་ཟླ་དང་པོའི་ཚེས་བཅོ་ལྔའི་མཚན་མོར་མེ་ཏོག་མཆོད་པ་འབུལ་བའི་སྲོལ་བཙུགས། ལོ་དེ་ནས་བཟུང་སྟེ་སྐུ་འབུམ་བྱམས་པ་གླིང་གི་དགེ་འདུན་པ་ཚོས་གནམ་ལོ་མ་གསར་གོང་གི་ཧོར་ཟླ་བཅུ་པའི་ཚེས་ཉེར་ལྔའི་ཉིན་ནས་མགོ་བརྩམས་ཏེ། ཕྱི་ལོའི་ཟླ་དང་པོའི་ཚེས་བཅོ་ལྔའི་ཉིན་བར་མཐོ་ཚད་ཐོག་བརྩེགས་གསུམ་ལྷག་ཙམ་ཡོད་པ། མི་རིགས་ཀྱི་ཁྱད་ཆོས་དང་སྒྱུ་རྩལ་གྱི་ཉམས་འགྱུར་ཆེས་འབུར་དུ་ཐོན་པ་ཞིག་དཀའ་ཁག་རབ་དང་རིམ་པ་བརྒྱུད་ནས་མར་གྱིས་མེ་ཏོག་མཆོད་པ་བཞེངས་ཏེ། ཉིན་དེའི་དགོང་མོར་ཧ་ཅང་གཟབ་རྒྱས་ཆེན་པོའི་སྒོ་ནས་མེ་ཏོག་མཆོད་པ་བཤམས་བཞིན་ཡོད། ཉིན་དེའི་ནུབ་མོར། རྗེ་ཙོང་ཁ་པ་མཆོག་གི་མནལ་ལམ་དུ་བྱུང་བ་བཞིན་དུ་ནམ་མ་གསལ་གོང་ལ་མེ་ཏོག་མཆོད་པ་བཤམས་པའི་ཤུལ་ཡང་མེད་པར་བཟོ་དགོས།
རྗེས་སུ། ཁྲི་ཆེན་ལྔ་པ་ཆུ་བཟང་བ་རྣམ་རྒྱལ་དཔལ་འབྱོར་གྱིས་གཞུང་རྙིང་པའི་འཛིན་གྲྭ་ལ་སྒོ་མང་སྐབས་དང་པོ་དང་། རྗེ་བཙུན་སྐབས་དང་པོ་གཉིས་སུ་ཕྱེ་བ་ནས་བཟུང་སྟེ། སྒོ་མང་འཛིན་གྲྭའི་དགེ་འདུན་པ་བཅོ་ལྔ་ལྷག་ཙམ་གྱིས་བཞེངས་པའི་མེ་ཏོག་མཆོད་པ་ཞིག་དང་། རྗེ་བཙུན་འཛིན་གྲྭའི་དགེ་འདུན་པ་བཅོ་ལྔ་ལྷག་ཙམ་གྱིས་བཞེངས་པའི་མེ་ཏོག་མཆོད་པ་ཞིག་སྟེ། བཞེངས་སྲོལ་གཉིས་ཡོད་པ་རེད། སྒོ་མང་འཇིན་གྲྭའི་མེ་ཏོག་མཆོད་པ་འདུ་ཁང་ཆེན་མོའི་གཡས་ལོགས་དང་། རྗེ་བཙུན་འཛིན་གྲྭའི་མེ་ཏོག་མཆོད་པ་ཐམས་ཅད་མཁྱེན་པའི་ལྷ་ཁང་གི་རྒྱབ་ལོགས་སུ་མཆོད་མཇལ་བ་དང་ལྗོངས་རྒྱུ་བ་ཁྲི་ཕྲག་མང་པོའི་སྤྱན་ལམ་དུ་བཤམ་གྱིན་ཡོད། འཛིན་གྲྭ་འདི་གཉིས་ཀྱིས་ལོ་རེར་གསང་རྒྱ་ཡོད་པའི་སྒོ་ནས་བཞེངས་ཏེ། མེ་ཏོག་མཆོད་པའི་བཟོ་རྩལ་འགྲན་སྡུར་བྱས་ནས་བཞེངས་བཞིན་ཡོད།
མེ་ཏོག་མཆོད་པ་ནི་ཇི་ལྟར་བཞེངས་པ་ཡིན་ཞེ་ན། ཐོག་མར་བཟོ་དབྱིབས་ཆེ་ཆུང་གང་དགོས་ཀྱི་ཤིང་རུས་སྣ་ཚོགས་བཟོས་ནས། མེ་ཏོག་སོགས་ཀྱི་ཡུ་བ་ཤིང་དང་། ལྕགས་སྐུད་བྱས་ཏེ། དེའི་སྟེང་ལ་འབྲི་མར་སྦྱོར་ལེན་བྱེད་བདེ་བ་ཡོང་བའི་ཆེད་དུ་གསོ་མའི་སྐུད་པ་སོགས་དཀྲིས་ཤིང་། འབྲི་མར་ཧ་ཅང་སྲ་མཁྲེགས་ལྡན་པ་ཞིག་ཡོང་ཆེད་ལ་གྲོ་རྩྭ་བསྲེགས་པའི་ཐལ་བ་མར་དང་བསྲེས། མར་ནག་དེ་ཡིས་བཞེང་བྱ་རྣམས་ཀྱི་དབྱིབས་རགས་ཙམ་བཟོས་རྗེས། དགུན་དུས་ཀྱི་འབྲི་མར་དཀར་པོ་ལོ་མ་ལོན་པ། ལས་སྣོན་བྱས་ཚེ་འཇམ་ཞིང་མཉེན་ལ་ལག་པས་གང་འདོད་ལྟར་བཟོ་སླ་བའི་ཁྱད་ཆོས་ལྡན་པ། ཞལ་རས་དང་ཕྱག་སོགས་བཞེངས་ཚེ་མདངས་ཁྱད་པར་བ་ཞིག་ཐོན་པ་དེས་གཙོ་བྱས། འབྲི་མར་མང་ཤོས་ཀྱི་ནང་དུ་དུས་ཡུན་རིང་པོ་བཞག་ཀྱང་མདོག་མི་ཡལ་བའི་རྡོ་ཚོན་དམར་པོ་དང་སེར་པོ། སྔོན་པོ། ལྗང་ཁུ། ལི་ཁྲི་སོགས་གང་མཁོའི་ཚོན་སྔ་མང་པོ་བསྲེས་ནས་བཞེངས་དགོས། གནའ་བོའི་སྟབས་བདེའི་ལག་ཆ་དང་ལག་པ་ཟུང་ལ་བརྟེན་ནས་ཆེས་གསོན་ཉམས་ལྡན་པའི་ལྷ་སྐུ་དང་མི་སྣ། རྩྭ་ཐང་། ནོར་ལུག ལྗོན་ཤིང་། བྱ་བྱེའུ། རི་བྲག གཅན་གཟན། ལྡིང་ཁང་། མེ་ཏོག་སོགས་བཞེངས་པའི་མེ་ཏོག་མཆོད་པ་ལའང་རྣམ་པ་མང་ཞིང་རྒྱ་ཆེ་བ་ཞིག་རེད།
མེ་ཏོག་མཆོད་པའི་བརྗོད་བྱའི་ཆ་ནས་བཤད་ན། གཙོ་སྐུ་ལ། སྤྱན་རས་གཟིགས་དང་འཇམ་པའི་དབྱངས། གསང་བདག། རྗེ་བཙུན་བྱམས་པ་སོགས་ལོ་རེ་བཞིན་དུ་རེས་མོས་ཀྱི་སྒོ་ནས་བཞེངས་ཀྱིན་ཡོད་ལ། ཟུར་རྒྱན་གྱི་རྣམ་ཐར་ལའང་སངས་རྒྱས་ཀྱི་མཛད་པ་བཅུ་གཉིས་དང་། ཙོང་ཁ་བརྒྱད་ཅུ། མི་ལ་རས་པའི་མཛད་རྣམ། ཇོ་བོ་ཨ་ཏི་ཤ་བོད་དུ་ཕེབས་ཚུལ། སྟག་མོ་ལུས་སྦྱིན། དྲི་མེད་ཀུན་ལྡན། འགྲོ་བཟང་མོ། ཐང་སྟོང་རྒྱལ་པོ། དོན་ཡོད་དོན་གྲུབ་། རྒྱ་བཟའ་བོད་དུ་བསུ་བ་སོགས་ལས་གཞན། ལོགས་དང་གྲུ་གར་བཀྲ་ཤིས་རྟགས་བརྒྱད་དང་བཀྲ་ཤིས་རྫས་བརྒྱད། ཚེ་རིང་རྣམ་དྲུག མཐུན་པ་སྤུན་བཞི། རྒྱལ་སྲིད་སྣ་བདུན། འདོད་ཡོན་སྣ་ལྔ། སྟག་སེང་ཁྱུང་འབྲུག་སོགས་བཞེངས་སྲོལ་ཡོད། སྐབས་རེར་ད་ལྟའི་རིག་ལྡན་རྒྱལ་པོ་མ་འགགས་པ་དང་། རྣམ་ཐར་ལ་རིག་ལྡན་ཞིང་བཀོད་སོགས་བཞེངས་པའི་སྐབས་ཀྱང་ཡོད།
མར་བཟོ་སྒྱུ་རྩལ་འདི་ནི། ཚོན་བཟོ་དང་འཇིམ་བཟོ་ལྟར་ཚ་ཐབ་དྲོན་མོའི་སྟེང་དང་ཉི་མ་དྲོ་སར་བསྡད་ནས་བཞེངས་ཐུབ་པ་ཞིག་གཏན་ནས་མ་ཡིན་པར། མར་གྱི་སྲ་མཁྲེགས་སྲུང་འཛིན་བྱ་ཐུབ་ཆེད་དུ་གྲང་རེག་བཟོད་དཀའ་བའི་དགུན་ཁར་ཁང་བའི་ནང་དུ་མེ་ཡང་མི་འབུད་པར། ཆུ་འཁྱག་ནང་དུ་ལག་པའི་དྲོད་ཡལ་དུ་འཇུག་བཞིན་བཞེངས་དགོས་ལ། བཞེངས་ཟིན་པའི་མེ་ཏོག་མཆོད་པ་ལ་ཁྱད་ཆོས་ཧ་ཅང་མོད།
དེ་ལས་གཙོ་སྐུ་འཇམ་པའི་དབྱང་ལྟ་བུའི་ཁྱད་ཆོས་ཅུང་ཟད་བརྗོད་ན། འཇམ་པའི་དབྱངས་ཀྱི་སྐུ་དྲང་བོར་བཞུགས་ཤིང་། ཕྱུག་གཡས་པས་པད་སྡོང་གི་ཡུ་བ་བསྣམས་ཤིང་སྟེང་དུ་རལ་གྲིས་མཚན་པ། གཡོན་པས་ཀྱང་དེ་བཞིན་དུ་པད་སྡོང་གི་ཡུ་བ་བསྣམས་ཤིང་སྟེང་དུ་ཤེར་ཕྱིན་གྱི་གླེགས་བམ་བསྣམས་པ། ཞབས་གཡས་བསྐུམས་ཤིང་གཡོན་བརྐྱངས་པའི་སྟབས་ཀྱིས་བཞུགས་པའི་ཉམས་འགྱུར་མཛེས་ལ། སྐུའི་དབུ་རྒྱན་སྙན་རྒྱན། ན་བཟའ་། ལྷམ་སོགས་ཀྱི་སྟེང་ལ་འཕྲ་རྒྱན་སྤྲས་པ་དེ་དག་ཀྱང་། གསེར་དངུལ་གཡུ་བྱུར་དངོས་གནས་པའི་རྣམ་པ་འཆར་བ་མ་གཏོགས། མར་གྱིས་བཟོས་པའི་རྣམ་པ་གཏན་ནས་མི་འཆར་ཞིང་། དེ་བཞིན་དུ་ཞལ་གྱི་དཀྱིལ་འཁོར་ལའང་དཀར་ལ་དམར་བའི་མདངས་ཆགས་ཤིང་ཅུང་ཟད་འཛུམ་པའི་ཉམས་དང་ལྡན་པ། ད་དུང་སྐུའི་ན་བཟའ་དང་ལྷམ་སོགས་ལ་རང་རང་གི་ཁྱད་ཆོས་འབུར་དུ་ཐོན་ཡོད་པར་མ་ཟད། ན་བཟའི་སྟེང་གི་རི་མོར་ཞིབ་ཚགས་ལྡན་ཞིང་པང་ཁེབས་ལ་དེ་ལས་ལྷག་པའི་ཟ་འོག་གོས་ཆེན་གྱི་རྣམ་པ་འབུར་དུ་བཏོན་ནས་བཞེངས་ཡོད་པས། དེའི་སྟེང་གི་མེ་ཏོག་དང་ལོ་མ། རི་མོ་སྣ་ཚོགས་ཀུ་ཤའི་རྩེ་མོ་ལྟར་ཕན་ཚུན་མ་འདྲེས་པར་རང་རང་གི་མཛེས་ཉམས་ཤིག་མངོན་ཡོད་པས་ཆེས་ཁྱད་དུ་འཕགས་པའི་སྒྱུ་རྩལ་ཞིག་རེད་ཅེས་བརྗོད་ཆོག་ལ། དེ་བཞིན་དུ། དགོན་པ་དང་ལྷ་ཁང་། མཆོད་རྟེན། བླ་མ། གྲྭ་པ་སོགས་ཆོས་ལུགས་ཀྱི་སྐོར་དང་། རྒྱལ་པོ་དང་བློན་པོ་བཙུན་མོ། འཁོར་གཡོག སྒོ་ཕྱུགས། དམག་འཁྲུག་བྱེད་པ་སོགས་ལ་ཞི་རྒྱས་དབང་དྲག་གི་ཉམས་དང་ལྡན་ལ་རི་བྲག་དང་གཅན་གཟན། ལྗོན་ཤིང་། བྱ་བྱེའི། མེ་ཏོག་སོགས་ཧ་ཅང་ཞིབ་ཚགས་དང་གསོན་ཉམས་ལྡན་པའི་སྒོ་ནས་བཞེངས་ཡོད་པས། བོད་གངས་ཅན་ན་མ་གཏོག་ཡུལ་གྲུ་གཞན་ན་མཐོང་དཀོན་པའི་སྒྱུ་རྩལ་འདི་ལ། མཇལ་སྐོར་བ་དང་ལྗོངས་རྒྱུ་བ་དག་གིས་མཐོང་མ་ཉིད་ནས་འདི་ནི་ཆེས་ཁྱད་དུ་འཕགས་པའི་སྒྱུ་རྩལ་ཞིག་རེད་ཅེས་བསྟོད་པའི་མཐེ་བོང་མི་སྒྲེང་མཁན་གཅིག་ཀྱང་མེད་དོ། །

0 comments:

ཟིན་བྲིས་འཚོལ་ཡུལ