Wednesday 12 June 2013
10:36 | 
Posted by
༄༅།། ཨེ་མ་ཧོའི་རིག་མཛོད་། |
| 2013-4-26 18:15:30 |
| ༄༅ ། ། རྒྱལ་པོ་ལུགས་ཀྱི་བསྟན་བཅོས་ས་གཞི་སྐྱོང་བའི་རྒྱན་ཞེས་བྱ་བ་བཞུགས་སོ། ། མི་ཕམ་འཇམ་དབྱངས་རྣམ་རྒྱལ་རྒྱ་མཚོས་མཛད། དེ་ལྟར་བརྟན་ཞིང་དེས་ལ་སྙོམས་གྱུར་ཅིང༌། ། སྙིང་རྗེའི་སེམས་དང་ལྡན་པའི་མི་བདག་དེས། ། རང་གི་མངའ་རིས་ལེགས་པར་སྐྱོང་བ་ཡི། ། ཐབས་ཚུལ་རྣམ་པ་མང་ལ་སེམས་པར་བྱེད། ། སྐྱེ་རྒུ་བདེ་བར་བྱེད་པ་འཚོ་ཚིས་ཡིན། ། མི་བདེ་འཕེལ་བ་འགོག་པ་ཁྲིམས་ཡིན་པས། ། འཇིག་རྟེན་བདེ་བར་འཚོ་དང་ཁྲིམས་ཀྱི་ལས། ། གཉིས་ཀྱི་སྒོ་ནས་སྐྱེ་རྒུ་སྲུང་བར་བྱེད། ། མི་བདག་རང་སྡེ་བསྲུང་འདོད་པས། ། སྔོན་དུ་རང་ཉིད་ལེགས་པར་བསྲུང༌། ། རང་ཡང་སྲུང་བར་མ་ནུས་པས། ། གཞན་དག་ཇི་ལྟར་བསྲུང་བར་བྱ། ། ཐོག་མར་བདག་གི་ཚེ་དང་ལུས། ། སྡེ་བཞིའི་རྩ་བར་གྱུར་པ་གང༌། ། ཡུན་དུ་བརྟན་ཞིང་འཚོ་བ་ཡི། ། ཐབས་ལ་འབད་པས་བསྲུང་བར་བྱ། ། རིན་ཆེན་སྨན་དང་རིག་སྔགས་ཀྱི། ། སྦྱོར་བའམ་རླུང་གི་རྣལ་འབྱོར་སོགས། ། ཐབས་དང་ལྡན་པའི་ཆོ་ག་ཡིས། ། ལུས་ནི་ལེགས་པར་བསྲུང་བར་བྱ། ། བསོད་ནམས་ཀྱིས་ནི་འདི་ཕྱིར་བདེ། ། བསོད་ནམས་ལྡན་ན་བསམ་པ་འགྲུབ། ། དེ་ཕྱིར་བསོད་ནམས་འབད་བྱ་སྟེ། ། བསོད་ནམས་སྟོབས་ཀྱི་རྣམ་ཐར་ལྟོས། ། བློ་གྲོས་བྱ་བ་གནས་གྲོགས་རྫས། ། ལ་སོགས་དཔལ་རྣམས་ཇི་སྙེད་པ། ། ལྷ་དང་ཀླུ་ལ་ནོར་བུ་བཞིན། ། བསོད་ནམས་སྟོབས་ཀྱིས་འབད་མེད་འཐོབ། ། དྲན་དང་ཤེས་བཞིན་བག་ཡོད་ཀྱིས། ། སེམས་ཀྱི་ཡོན་ཏན་བསྲུང་བྱ་ཞིང༌། ། བརྩོན་པས་གོང་ནས་གོང་དུ་ནི། ། འཕེལ་བའི་ཐབས་ལ་སྦྱར་བར་བྱ། ། འཕགས་པ་གསེར་འོད་དམ་པ་དང༌། ། རྒྱ་ཆེར་རོལ་པ་ཏོག་གི་གཟུངས། ། ས་སྙིང་འཁོར་ལོ་བཅུ་པ་དང༌། ། འཇམ་དཔལ་རྩ་བའི་རྒྱུད་ལ་སོགས། ། དེ་བཞིན་གཤེགས་པའི་གསུང་རབ་རྣམས། ། དགེ་བའི་བཤེས་ལས་ལུང་ནོད་ཅིང༌། ། མཆོད་དང་བཀུར་སྟི་ཆེར་བྱས་ནས། ། དུས་སུ་བཀླགས་ཤིང་བསམ་བྱས་ན། ། རྒྱལ་རིགས་དེ་དག་བསོད་ནམས་འཕེལ། ། སྔགས་ཀྱི་དཀྱིལ་འཁོར་རྣམ་མང་པོར། ། གང་དག་དད་པས་ལེགས་ཞུགས་ཏེ། ། དབང་ནོས་དམ་ཚིག་བཟུང་བྱས་ན། ། ཚེ་དང་བསོད་ནམས་གྲགས་པ་འཕེལ། ། ཇི་སྲིད་འདོད་ཆེན་མ་གྱུར་པ། ། དེ་སྲིད་ཡོན་ཏན་གཙང་བ་ཡིན། ། འདོད་ཆེན་ཉིད་ལ་ཞུགས་གྱུར་ན། ། ཡོན་ཏན་བཙུན་པར་ག་ལ་འགྱུར། ། ངོ་ཚ་མེད་ན་དེའི་ཡོན་ཏན། ། བརྗོད་བྱར་བྱས་ནས་གཏམ་ངན་འཕེལ། ། དེ་ཕྱིར་ངོ་ཚ་ཁྲེལ་ཡོད་པས། ། རང་གི་ཡོན་ཏན་བསྲུང་བར་བྱ། ། གནས་ཁང་མེ་རུ་འབར་ཚེ་སྔོན། ། ངོ་ཚས་ལུས་ནི་བྱིབས་བཞིན་དུ། ། ཤི་བའང་ཚངས་གནས་སྐྱེས་ཞེས་སུ། ། ཡོན་ཏན་དེ་ལྟར་མདོ་ལས་བཤད། ། ངོ་ཚ་ཙམ་ལ་དེ་ལྟ་བུའི། ། ཡོན་ཏན་ཆེ་དང་ལྡན་གྱུར་ན། ། ངོ་ཚ་ཁྲེལ་ཡོད་དང་ལྡན་པས། ། ཡོན་ཏན་སྲུང་བ་སྨོས་ཅི་འཚལ། ། ངོ་ཚ་མེད་པའི་མི་རྣམས་ནི། ། ཇི་ལྟར་བརྒྱན་ཀྱང་མཛེས་མ་ཡིན། ། ཁྱད་པར་ཆེན་པོའི་མི་རྣམས་ལ། ། ངོ་ཚ་ཁྲེལ་ཡོད་མཆོག་ཏུ་དགོས། ། ཆེ་རྣམས་ངོ་ཚ་མི་ཤེས་ན། ། ངོ་ཚ་མེད་རྣམས་སུ་ཡིས་འདུལ། ། སྐྱབས་ལས་འཇིགས་པ་བྱུང་བ་དང༌། ། ཆུ་ལས་མེ་འབར་སུས་ཞི་ནུས། ། ངོ་ཚ་མེད་པས་སྨ་ཕབ་པ། ། ཆེན་པོའི་གོ་གནས་ཡར་མོད་ཀྱི། ། ད་དུང་རང་ཚུལ་མི་ཤེས་པར། ། ཆེ་བར་རློམ་པ་ཀྱེ་མ་འཁྲུལ། ། འདོད་པས་གདུང་ལ་ཁྲེལ་མེད་ངོ་ཚ་མེད། ། བཀྲེས་པས་གདུང་ལ་སྟོབས་མེད་མདངས་ཀྱང་མེད། ། ནད་ཀྱིས་གདུང་ལ་གཉིད་མེད་བདེ་བ་མེད། ། དེ་ཕྱིར་འདོད་པའི་གནས་ལས་བག་ཡོད་བྱ། ། འདོད་པ་དང་འདྲའི་འདམ་རྫབ་མེད། ། ཞེ་སྡང་ལྟ་བུའི་གནོད་པ་མེད། ། གཏི་མུག་ལྟ་བུའི་རྒྱ་མེད་དེ། ། སྲེད་པ་ལྟ་བུའི་ཆུ་ཀླུང་མེད། ། ཆགས་པ་དང་འདྲ་འགྲོ་བའི་དྲི་མ་མེད། ། ཕྲག་དོག་དང་འདྲ་གཞན་ལ་གནོད་པ་མེད། ། སློང་བ་དང་འདྲའི་མཛའ་བ་ཡོད་མིན་ཏེ། ། གཏོང་བ་དང་མཉམ་ནོར་ནི་གཞན་ན་མེད། ། ཤེས་རབ་འདྲ་བའི་མིག་ནི་གཞན་ཡོད་མིན། ། ཐོས་པ་དང་འདྲ་བཤེས་གཉེན་གཞན་མེད་དེ། ། ཡོན་ཏན་འདྲ་བའི་རྒྱན་ནི་གཞན་དུ་མེད། ། དེ་ཕྱིར་སྐྱོན་ཡོན་ལེགས་བསམ་རང་ཉིད་སྲུང༌། ། མི་ཆོས་སྲོག་ཤིང་དྲང་པོ་སྟེ། ། ཡ་རབས་བྱ་བ་ཕལ་མོ་ཆེ། ། གྱ་གྱུའི་རྫབས་ཀྱིས་མ་གཡོགས་པར། ། གཙང་མའི་གསེར་བཞིན་མངོན་པ་ཡིན། ། གཡོ་སྒྱུས་བསྒྲུབ་པའི་ཟས་དང་ནོར། ། རྙེད་དོ་སྙམས་ཀྱང་ཤོར་ལས་ཐུ། ། ཡིད་རྟོན་སླུ་བར་བྱེད་པ་རྣམས། ། འཚོ་ཡང་འཚོ་བ་མིན་དང་འདྲ། ། རྒྱུ་འབྲས་མེད་པ་མི་སྲིད་ལ། ། ལྷ་མིག་སྒྲིབ་པར་མི་ནུས་པས། ། གྱ་གྱུ་ཅན་གྱི་ངན་མཚང་སྐྱོན། ། འདི་དང་ཕྱི་མར་ཡང་ཡང་མྱོང༌། ། ལས་འབྲས་ལྷ་མིག་དཔང་བཞག་སྟེ། ། རང་སེམས་གཙང་མར་གྱུར་པ་རྣམས། ། ལྷ་དང་མི་ཡི་འཇིག་རྟེན་ན། ། སྒྲིབ་མེད་ཟླ་རྒྱས་བཞིན་དུ་མཛེས། ། ངན་སྤྱོད་རང་གིས་མ་བྱས་ན། ། བརྒྱ་བྱིན་གྱིས་ཀྱང་སྨད་མི་ནུས། ། གང་ཞིག་ངན་སྤྱོད་མེད་པ་དེས། ། ངན་སྤྱོད་ཅན་རྣམས་འདུལ་བར་འོས། ། བཟང་པོ་ཤོར་ནས་ངན་པ་འཛིན། ། སྐྱེ་བོ་ངན་པ་ཆུ་ཚགས་འདྲ། ། ངན་པ་སྤངས་ནས་བཟང་པོ་སྒྲུབ། ། ཁབ་ལེན་རྡོ་དང་ཡ་རབས་མཚུངས། ། རང་ཉིད་དོན་ལ་མཁས་གྱུར་ཅིང༌། ། ཡ་རབས་བྱ་བར་རྟག་གནས་ན། ། རིན་ཆེན་སྒྲོན་མ་འོད་འབར་བ། ། འཐོར་རླུང་གིས་ནི་གནོད་མེད་འདྲ། ། མ་སྨྲས་གཞན་གྱིས་མ་བསྐུལ་བར། ། རྣམ་འགྱུར་སོགས་ལས་བསམ་པ་ཤེས། ། དུས་སུ་དོན་རྣམས་ཡོལ་མེད་དུ། ། སྒྲུབ་པར་ཤེས་ན་མཁས་པ་ཡིན། ། ཕལ་པས་རྟོགས་པར་དཀའ་བ་ཡི། ། མཁས་པའི་སྤྱོད་ཡུལ་ཤེས་ན་མཁས། ། སྲིན་བུས་ཤིང་ལ་ཡིག་རིས་བཞིན། ། སྟེས་དབང་དོན་གྲུབ་མཁས་པ་མིན། ། ཕན་དང་གནོད་པའི་ནུས་པ་ཅན། ། གང་ན་ཡོད་པར་མི་ཤེས་པས། ། སུ་ལའང་ཁྱད་དུ་མི་གསོད་པར། ། ཕན་པར་བྱས་ན་རང་ཉིད་འཕེལ། ། མཁས་པས་མ་འོངས་ཆེད་དུ་སྦྱིན། ། བླུན་པོས་རང་ཕན་མཐོང་ཚེ་སྦྱིན། ། བྱིན་པར་འདྲ་ཡང་ཕ་རོལ་ལ། ། ངོ་སོ་ཆེ་ཆུང་འདྲ་མི་འགྱུར། ། མཁས་པས་རང་ལ་གང་ཕན་བརྩི། ། བླུན་པོས་གང་འབྱོར་གང་མཐོ་བརྩི། ། ཕོ་རབ་ཆུས་ཀྱི་སྤྱི་རྒྱ་དཔྱོད། ། ཕོ་མཐའ་ཟ་ཁ་ཆེ་ཆུང་དཔྱོད། ། གྲོགས་བཟང་མཛའ་བོ་རྒུད་ཚེ་སྐྱོང༌། ། གྲོགས་ངན་མཛའ་བོ་འབྱོར་ཚེ་སྐྱོང༌། ། བསྐྱང་བར་འདྲ་ཡང་བློ་ལྡན་གྱིས། ། བལྟས་ན་སྐྱོང་ཚུལ་འདྲ་མི་འགྱུར། ། ཕོ་བཟང་རྒྱལ་ཁ་ཕྱི་ལ་རྩོད། ། ཕོ་ངན་རྒྱལ་ཁ་ནང་དུ་རྩོད། ། བརྩད་པར་འདྲ་ཡང་ཕ་རོལ་གྱིས། ། བལྟས་ན་རྩོད་ཚུལ་འདྲ་མི་འགྱུར། ། བླུན་པོས་ཐོག་མར་བདེ་འབྲས་འཚོལ། ། མཁས་པས་ཐོག་མར་བདེ་རྒྱུ་འཚོལ། ། བཙལ་བར་འདྲ་ཡང་གནད་ཤེས་པས། ། བལྟས་ན་འཚོལ་ཚུལ་འདྲ་མི་འགྱུར། ། དེ་སོགས་འདྲ་ལ་མི་འདྲ་བའི། ། བྱ་བའི་ཁྱད་ཀྱིས་བཟང་ངན་ཤེས། ། ཡོན་ཏན་མེད་པའི་གྲོགས་སྟོང་ལས། ། ཡོན་ཏན་ལྡན་པའི་གྲོགས་གཅིག་མཆོག ། དགྲ་གཅིག་ཡོད་ཀྱང་མང་དང་འདྲ། ། གཉེན་བརྒྱ་ཡོད་ཀྱང་ཉུང་དང་མཚུངས། ། དེ་བས་མཛའ་ཕྱོགས་མང་བྱ་ཞིང༌། ། སུ་ལའང་དགྲ་རུ་བསླང་མི་བྱ། ། བསྐྱང་ན་དགྲ་ཡང་གཉེན་དུ་འགྱུར། ། མནར་ན་བུ་ཡང་དགྲ་རུ་འགྲོ། ། སུ་ཡང་མཛའ་དང་དགྲ་མིན་གྱི། ། ཕལ་ཆེར་རང་གི་བྱ་བས་བྱས། ། འཇམ་པོས་རྩུབ་མོའང་འདུལ་ནུས་ན། ། འཇམ་པོ་ཉིད་ལ་སྨོས་ཅི་དགོས། ། འཇམ་ལ་དུས་སུ་རྣོ་བ་ནི། ། དགྲ་རྣམས་ཀྱིས་ཀྱང་ཐུབ་པར་དཀའ། ། དགྲས་ཀྱང་བརྙས་པའི་དེས་པ་དང༌། ། གཉེན་ཡང་འབྲོས་པའི་རྩུབ་མོ་དེས། ། ཅི་བྱ་ཞི་དྲག་གཉིས་ཀའི་མཐུ། ། གང་ལ་ཡོད་དེ་ཀུན་གྱིས་བསྔགས། ། རང་ལ་ལན་པ་མེད་པ་ཡི། ། དྲང་པོའི་ལམ་ལ་རྟག་གནས་ནས། ། ཕ་རོལ་རྒྱུ་མེད་འཚེ་བ་ལ། ། འདུད་པར་མི་བྱ་བརླིང་བར་བྱ། ། ཡོན་ཏན་ལྡན་ན་དགྲ་ཡང་མཛའ་རུ་བསྡུམ། ། མི་སྲུན་ངན་པ་མཛའ་ཡང་རྒྱབ་ཏུ་བོར། ། བར་མར་གནས་པ་བཏང་སྙོམས་ཚུལ་དུ་བྱ། ། དེ་ལྟར་ཤེས་ན་རྟག་ཏུ་བདེ་བ་འཐོབ། ། ཕྱི་ནས་འདི་འདྲར་འགྱུར་སྙམ་པའི། ། བསམ་གཞིགས་སྔོན་དུ་ལེགས་བཏང་སྟེ། ། བྱ་བ་འབྲས་བུར་ལྡན་བྱ་ཞིང༌། ། ལས་ཀུན་རྗེས་འགྱོད་མེད་པར་བྱ། ། དུས་ལ་བབ་པའི་བྱ་བ་རྣམས། ། ཚེགས་མེད་པར་ཡང་འགྲུབ་པར་འགྱུར། ། དུས་ཡོལ་བའམ་དུས་སྔ་བའི། ། བགྱི་བ་ཕལ་ཆེར་བསྒྲུབ་པར་དཀའ། ། ཚེ་འདིར་རྒྱལ་པོའི་ཁྲིམས་དང་ནི། ། ཕྱི་མ་རྣམ་སྨིན་འབྲས་བུ་ལ། ། སུ་ཡང་བྱོལ་བར་མི་འགྱུར་བས། ། མི་བདེན་པ་ན་ཕམ་ངོས་བླང༌། ། མི་ལ་ལྟ་བའི་མིག་ཡོད་ཀྱང༌། ། རང་ལ་ལྟ་ན་མེ་ལོང་དགོས། ། རང་བློ་ནང་དུ་མ་བསྡུས་ན། ། རང་སྐྱོན་རང་གིས་མཐོང་བར་དཀའ། ། བླུན་པོས་བདེ་དང་སྡུག་བསྔལ་ཀུན། ། གཞན་གྱི་རྐྱེན་ལས་བྱུང་སྙམ་དུ། ། རྟག་ཏུ་ཡུལ་ལ་འདོར་ལེན་གྱི། ། ཆགས་སྡང་རྣམ་རྟོག་རྦ་ལ་གཡེངས། ། མཁས་པས་བདེ་དང་སྡུག་བསྔལ་ཀུན། ། བདག་ལ་རག་ལས་ཤེས་བྱས་ནས། ། རྟག་པར་ནང་དུ་བློ་ཕྱོགས་ཏེ། ། བདག་ལ་རྟོག་ཅིང་བག་ཡོད་གནས། ། ལེགས་ཉེས་གང་དང་གང་མྱོང་ཡང༌། ། བསམ་དཔྱོད་ཅན་ལ་བློ་སྐྱེད་ཐོན། ། སྐྱིད་སྡུག་བརྒྱ་ཕྲག་མཐོང་ན་ཡང༌། ། བསམ་མེད་བླུན་པོར་བོགས་སྐྱེད་མེད། ། སྣ་ཚོགས་ནོར་བུ་ཇི་བཞིན་དུ། ། གོ་ས་དུས་དང་ཕ་རོལ་དང༌། ། བསྟུན་པའི་བྱ་བ་མཁས་པས་སྟོན། ། བླུན་པོ་རྡོ་ལ་མདོག་འགྱུར་ཅི། ། སྟོབས་ལྡན་འབྱོར་པ་རྒྱ་ཆེ་ཡང༌། ། གནས་མིན་གཞན་ལ་མནར་མི་བྱ། ། རྒྱལ་བར་གྱུར་ན་ཚོད་ཟིན་པའི། ། མི་བདག་དེ་ནི་རྟག་ཏུ་རྒྱལ། ། ནགས་ཚལ་ཚོགས་ཀྱིས་མགྲོན་དུ་བོས་པ་ཡི། ། ལྕེ་བདུན་གར་ཐབས་བསྐྱོད་ལ་སུ་མི་བྱོལ། ། དུས་སུ་ཆར་འབེབས་སྤྲིན་གྱི་རྔ་གསང་ཅན། ། ཆུ་འཛིན་གློག་ཕྲེང་མཛེས་འདིས་ཀུན་ཡིད་འཕྲོག ། ཇི་ཙམ་རྙེད་ཅིང་རྒྱལ་ཚེ་བླུན་པོ་རྣམས། ། བརྐམ་ཆགས་མེ་ལྟར་འབར་ནས་མྱུར་དུ་ཡལ། ། རྙེད་པ་འཕེལ་ཞིང་གཞན་ལས་རྒྱལ་ན་ཡང༌། ། མཁས་རྣམས་བག་ཡོད་སྒོ་ནས་སྤྲིན་བཞིན་བསིལ། ། མི་ངན་བསྟེན་རྫི་བྱེད་པ་དང༌། ། བན་སྔགས་དགྲ་རུ་བསླང་བ་གཉིས། ། རྒྱལ་པོ་ཡིན་ཀྱང་མི་བྱ་སྟེ། ། བྱས་ན་རང་ཉིད་ཕུང་བའི་རྒྱུ། ། འཁོན་རྙིང་པ་དང་བུ་ལོན་ལྷག ། མེ་མཆེད་ཆུང་ངུའི་དུས་ན་བཅད། ། རྐོན་པའི་ནང་ནས་བྱ་ཤོར་བཞིན། ། རྗེས་སུ་བགྱི་བར་དཀའ་བ་མཆི། ། ཇི་ཙམ་རྩི་ཞིང་བཀུར་བ་ན། ། དེ་ལྟ་དེ་ལྟར་དུལ་བར་བྱ། ། ཅི་ཙམ་བརྙས་ཤིང་འཚེ་བ་ན། ། དེ་ལྟ་དེ་ལྟར་གཏུམ་པར་བྱ། ། བཀུར་ན་ཁྲོ་ཞིང་བརྙས་ན་ཞི་འགྱུར་ལ། ། ཐུབ་ན་ལྷ་གསོད་མི་ཐུབ་བདུད་ཀྱང་མཆོད། ། འཐབ་ན་འབྲོས་ཤིང་བཏུད་ན་མནར་བྱེད་པའི། ། ངན་པའི་མི་ལ་བློ་ལྡན་སུ་ཞིག་དགའ། ། དགྲ་བོས་བརྙས་ཐབས་བྱས་ཀྱང་ཆུ་བཞིན་འཐུང༌། ། འཁོར་གྱིས་ཕན་པར་བྱས་ཀྱང་འཚེ་བར་རྩོམ། ། བླང་དོར་ལོག་པར་སྤྱོད་པའི་སྐྱེ་བོ་ལ། ། ཕན་པའི་གཉེན་ཀྱང་བསམ་པ་གཞན་དུ་ཕྱོགས། ། བློ་ལྡན་རང་ཉིད་འབྱོར་ཚེ་དམན་ལ་བྱམས། ། ཕ་རོལ་རྒུད་ཚེ་དགྲ་ཡང་ལེགས་སྐྱོང་བའི། ། ཚུལ་འདི་མཛེས་ཀྱང་མཛེས་ལ་འོས་ཀྱང་འོས། ། ལུགས་ཟུང་ཡོན་ཏན་དུས་གཅིག་མ་ངོམས་གསལ། ། གཉེན་ནོ་ཅོག་ལ་སྦྱིན་ཞི་སྙན་སྨྲ་སོགས། ། མཐུན་འཇུག་ཐབས་ཀྱིས་གཞན་ཡིད་བསྡུ་མཁས་པས། ། ཚེགས་མེད་བྱ་བས་རང་སྟོབས་སྐྱེད་བྱེད་ཅིང༌། ། ཡོན་ཏན་སྤོ་ལ་དར་བཞིན་མངོན་པར་བྱེད། ། འཁོན་མེད་པར་ནི་རྒྱལ་སྲིད་འཕྲོགས་པ་སོགས། ། ལས་ཀྱི་དགྲར་གྱུར་བཅོས་སུ་མི་རུང་བའི། ། མི་སྲུན་རྣམས་ལ་ཞི་བའི་ཐབས་ཀྱིས་ཅི། ། དེ་ཕྱིར་དྲག་པོའི་སྤོབས་པ་ངེས་པར་བསྐྱེད། ། གཉེན་དུ་བྱས་ན་ཕན་པ་ཆེ། ། དགྲ་རུ་བསླང་ན་གནོད་ནུས་པའི། ། མི་གང་དགྲ་ཟུན་གོ་ཆོད་པ། ། དེང་སང་སྙིགས་མའི་དུས་ན་དཀོན། ། མ་བརྙས་མི་ཡི་རྩ་བ་ཡིན། ། བརྙས་པའི་ནོར་གྱིས་ཅི་ཞིག་བྱ། ། དགྲ་གོ་ཟུན་གོ་མི་ཆོད་པ། ། མི་རུ་བཏགས་ཀྱང་ཕྱུགས་ལས་དམན། ། རྒྱལ་པོ་ཡུར་ཆུ་འཁྲི་ཤིང་དང༌། ། བུད་མེད་དམུས་ལོང་ལྔ་པོ་ནི། ། གཡོན་ཅན་གར་འཁྲིད་འགྲོ་བར་གསུངས། ། དེ་བས་གཞན་དྲིང་འཇོག་མི་བྱ། ། གཡོན་ཅན་གུས་པ་སྟོན་པ་ནི། ། དགོས་པའི་ཕྱིར་ཡིན་དགའ་བས་མིན། ། བརྟགས་ཤིང་གདེང་ནི་མ་ཐོབ་པར། ། སུ་ལའང་ཡིད་བརྟན་མི་བྱའོ། ། ཁ་ཅིག་རང་ལ་དཔེ་བླངས་ནས། ། སྐྱེ་བོ་གཞན་དག་འཇལ་བར་བྱེད། ། ཁ་ཅིག་ངན་པས་སུན་ཕྱུང་བས། ། དམ་པ་ལའང་ཡིད་མི་ཆེས། ། མཁས་པ་དག་གིས་བརྟགས་བྱས་ན། ། ངང་པས་ཆུ་ལས་འོ་མ་བཞིན། ། བཟང་ངན་དོན་ནི་ཁོང་ཆུད་དེ། ། བྱ་བའི་གནས་ལ་རྨོངས་མི་འགྱུར། ། གཡོན་ཅན་ཚུལ་བཟང་ངག་སྙན་སྟོན་པ་དང༌། ། འཁོན་རྙིང་དགྲ་དང་མ་བརྟགས་གསར་འགྲོགས་ལ། ། ཡིད་བརྟན་བྱས་པས་ཁ་ཅིག་ཕུང་འགྱུར་ཏེ། ། བྱ་རོག་གིས་ནི་འུག་པའི་ཚང་བསྲེགས་བཞིན། ། སེང་གེའི་ལུས་ཀྱི་འབུ་བཞིན་དུ། ། ཆེན་པོ་རྣམས་ལ་དགྲ་བས་ཀྱང༌། ། རང་གི་རིས་ནས་གནོད་པ་མང༌། ། དེ་ཕྱིར་འཁོར་དང་རིས་ལ་བརྟགས། ། ནོར་མཉམ་ནུས་པ་མཉམ་པ་དང༌། ། གནད་ཤེས་འབད་རྩོལ་ཆེ་བ་ཡི། ། རང་དང་རིས་སུ་མཉམ་པ་ལ། ། བག་ཟོན་མ་བྱས་དེ་འདྲས་ཕུང༌། ། ཕན་པ་མེད་ན་གཉེན་ཀྱང་གཞན། ། ཕ་རོལ་ཡིན་ཡང་གང་ཕན་གཉེན། ། ལུས་ལ་ལྷན་ཅིག་བྱུང་བའི་ནད། ། གསོ་བྱེད་དགོས་པའི་སྨན་བཞིན་ནོ། ། བྱས་པ་བཟོ་དང་ཕན་གནོད་ཚུལ། ། གོ་མ་ལོག་པའི་བྱ་བ་ནི། ། གནད་ཅན་གཅིག་གིས་སྐྱེས་བུ་དེའི། ། ཡོན་ཏན་དྲོད་ཚད་ཤེས་པར་ནུས། ། རྒུད་ཚེ་མཛའ་ཡང་སྤོང་བྱེད་ལ། ། འབྱོར་ཚེ་དགྲ་ཡང་མཆོད་བྱེད་པའི། ། ཐ་ཤལ་དེ་འདྲས་བདག་ཉིད་ལ། ། མཆོད་ཀྱང་བློ་ལྡན་སུ་ཞིག་མགུ། ། ཡིད་མཐུན་རིང་ན་གནས་ཀྱང་ཉེ། ། མི་མཐུན་གམ་ན་གནས་ཀྱང་རིང༌། ། ཤ་ལྷག་མཚོན་གྱིས་གཅོད་བྱེད་ལ། ། རྒྱན་བཟང་ལུས་ལ་སྲེལ་བར་བྱེད། ། དམ་པ་མིན་དང་དམ་པ་དག ། ལྷན་ཅིག་འགྲོགས་ཀྱང་འདྲེས་མི་འགྱུར། ། དམ་པ་གཉིས་ནི་རྒྱང་རིང་ཡང༌། ། མཐུན་འགྱུར་ཉི་དང་པད་ཚལ་བཞིན། ། ཉིན་བྱེད་དབང་པོ་ཤར་བའི་ཚེ། ། མིག་ལྡན་གཟུགས་ལ་ལྟ་བ་བཞིན། ། བློ་ལྡན་བློ་ལྡན་ཕྲད་པ་ན། ། ཚིག་གཅིག་གིས་ཀྱང་གྲོས་ངོགས་མཐོང༌། ། བླུན་པོ་རྣམས་ལ་ཕན་བཏགས་དང༌། ། གནོད་པ་བྱས་ཀྱང་དེ་ཡི་ཡིད། ། ཇི་ལྟར་གྱུར་པ་འབྱེད་དཀའ་སྟེ། ། མུན་པར་རྡོ་འཕངས་ཇི་བཞིན་ནོ། ། སྔར་བྱས་ཕན་གནོད་མི་བརྗེད་ཅིང༌། ། ད་ལྟ་གང་བརྩོན་དོན་ལྡན་བྱེད། ། འབྱུང་འགྱུར་དོན་ལ་བག་ཡོད་ཅན། ། མཁས་པས་དུས་གསུམ་རྗེས་སུ་བལྟ། ། བློ་རྒྱ་ཆེ་ཞིང་བློ་དཔངས་མཐོ། ། བློ་གསལ་བྱ་བ་ཀུན་ཤེས་པའི། ། མི་བུ་རིན་ཆེན་མཆོག་ཉིད་ནི། ། བརྒྱ་སྟོང་ནང་ན་རེ་རེ་ཙམ། ། ས་གཞི་རྡུལ་ཕྲན་མཚོ་ཆུ་ཐིགས། ། ཇི་བཞིན་སྐྱེ་བོའི་སེམས་ཀྱི་སྟོབས། ། མཆོག་དང་བར་མ་དམན་པའི་ཚད། ། ཀླུ་ཆེན་དང་འདྲ་མཁས་པས་ཤེས། ། སྐྱེ་བོ་ངན་པ་རྫིང་ཆུང་བཞིན། ། ཞག་གམ་ཟླ་བས་གཏིང་ཚོད་ལོན། ། མཚོ་འདྲའི་ཡོན་ཏན་ཅན་ཡུན་རིང༌། ། བསྟེན་ཀྱང་ཇེ་ཟབ་མཐའ་མི་མངོན། ། ཕན་སེམས་བརླང་ཚིག་སྨྲ་བ་དང༌། ། གཡོ་སྒྱུའི་འཛུམ་དཀར་སྟོན་པ་གཉིས། ། མཁས་པས་སོ་སོར་འབྱེད་འགྱུར་ལ། ། བླུན་པོས་ཤེས་པར་མི་འགྱུར་རོ། ། རི་བོང་ཅལ་སྒྲས་ཀུན་དཀྲོག་ལྟར། ། བླུན་པོ་གྲགས་པའི་རྗེས་སུ་འབྲངས། ། བསྲེགས་བཅད་བརྡར་བའི་གསེར་བཞིན་དུ། ། མཁས་པ་རང་གིས་བརྟགས་ནས་འབྱེད། ། རེ་ཞིག་ཕན་བྱེད་ཡིད་འོང་ཡང༌། ། ནམ་ཕུགས་གནོད་པ་དག་ཀྱང་སྲིད། ། རེ་ཞིག་གནོད་བྱས་མི་དགའ་ཡང༌། ། འགྲོགས་ན་ཕན་པར་འགྱུར་སྲིད་པས། ། ཡུད་ཙམ་ཞིག་གིས་མཛའ་བ་དང༌། ། མི་མཛའ་གཉིས་ཀ་མི་བྱ་བར། ། འཕྲལ་དུ་འགྲོགས་ན་བདེ་བ་དང༌། ། ཕུགས་སུ་ཆེས་ཆེར་བརླིང་བར་བྱ། ། བརྩོན་འགྲུས་སྟོབས་ལྡན་བློ་གྲོས་ཆེ་རྣམས་ལ། ། ལྷ་ཡང་འཇིགས་པ་སྐྱེ་ན་མི་ལྟ་ཅི། ། ཁོང་བཟང་གཡོ་མེད་ཀླན་ཀ་མི་འཚོལ་བའི། ། གྲོགས་པོ་བཟང་པོར་ལྷ་ཡང་དགའ་བ་སྐྱེ། ། གྲོགས་བཟང་དང་བཅས་ཐབས་མཁས་བློ་ལྡན་པས། ། རླུང་ཡོད་མེ་བཞིན་དུས་སུ་བརྩམས་བྱས་ན། ། འཇིག་རྟེན་ཀུན་གྱི་དཔལ་རྣམས་མ་ལུས་པ། ། ཡིད་ཀྱི་ལག་ཏུ་མཆིས་པ་བཞིན་དུ་འགྱུར། ། ཧ་ཅང་བྱམས་པ་ཆེ་དྲགས་ན། ། ཐ་མར་འཁོན་གྱི་རྒྱུ་རུ་འགྲོ། ། ཧ་ཅང་གཡོ་སྒྱུ་ཆེ་དྲགས་ན། ། ཐ་མར་རང་ཉིད་བརླག་པ་མང༌། ། ཟས་དང་སྨན་གྱི་ཚོད་བཞིན་དུ། ། བྱ་བ་གང་དང་ཅི་ལ་ཡང༌། ། དུས་དང་བསྟུན་པའི་ཚོད་ཤེས་ན། ། རྒུད་པ་ཆེན་པོས་མནར་མི་འགྱུར། ། གལ་ཏེ་རྟག་ཏུ་མཛའ་འདོད་ན། ། གསུམ་པོ་འདི་དག་མི་བྱ་སྟེ། ། རྒྱན་པོ་འགྱེད་དང་ནོར་འབྲེལ་དང༌། ། ལྐོག་ཏུ་ཆུང་མ་དང་སྨྲ་བའོ། ། གཡུལ་ངོར་དཔའ་བོ་ཇི་བཞིན་དུ། ། མཁས་པའི་ཡོན་ཏན་མཁས་པས་ཤེས། ། བླུན་པོས་མཁས་དང་རྨོངས་པ་དང༌། ། རྡོ་དང་རིན་ཆེན་མཉམ་པར་བལྟ། ། དམ་པ་ཡོན་ཏན་ལྡན་པ་དག ། དྲུང་ན་གནས་ཀྱང་བླུན་པོ་ཡིས། ། དེ་ཡི་ཡོན་ཏན་མི་ཤེས་ཏེ། ། ཉི་མ་ཤར་ཡང་འུག་པ་བཞིན། ། བློ་གྲོས་ལྡན་དེས་སྐྱེ་བོ་ལ། ། ཡོན་ཏན་གང་དང་ལྡན་གྱུར་པ། ། ཚིག་དང་བྱ་བས་རྒྱང་ནས་ཤེས། ། དུ་བའི་རྟགས་ལས་མེ་བཞིན་ནོ། ། གཡུལ་དུ་ཞུགས་ཚེ་དཔའ་བོ་ཤེས། ། འབྱོར་པ་ཟད་ཚེ་ཆུང་མ་རྟོགས། ། རྒུད་ཚེ་ཕན་པར་བྱེད་པ་ནི། ། མཛའ་བོ་ཡིན་པར་ངེས་པ་རྙེད། ། བོགས་མེད་ཚོང་དང་འཁོར་ལྡན་དག་ལ་འཚེ། ། སློང་ཞིང་འགྱིང་ལ་ནོར་མེད་འདོད་ལ་དགའ། ། བུད་མེད་གཞོན་ལ་ཚིག་རྩུབ་སྨྲ་བ་སྟེ། ། སྐྱེས་བུ་ལོག་པར་སྤྱོད་པ་ལྔ་ཞེས་གསུངས། ། བྱ་བ་མི་ལྕོགས་རྩོམ་པར་བྱེད་པ་དང༌། ། ཚོགས་དང་འཁོན་ཞིང་སྟོབས་ལྡན་དག་ལ་རྒོལ། ། བུད་མེད་ལ་ནི་ཡིད་བརྟན་བྱེད་པ་སྟེ། ། འཆི་བདག་དྲུང་ན་སྡོད་པ་བཞི་ཞེས་གསུངས། ། རིག་པ་ལོག་པར་ཤེས་པ་དུག ། རྒན་པོས་གཞོན་ནུ་བསྟེན་པ་དུག ། ནད་ལ་བཏང་སྙོམས་བྱ་བ་དུག ། དབུལ་པོ་ཉལ་དགའ་ཆེ་བ་དུག ། མ་སྨིན་ཟས་དང་མི་འཕྲོད་ཟ། ། ཉིན་པར་འཁྲིག་དང་ཉལ་དང་གཉིད། ། བུད་མེད་རྒན་དང་འཁྲིག་སྤྱོད་རྣམས། ། ལུས་སྟོབས་འཕྲོག་བྱེད་བཟློག་ན་འཕེལ། ། གང་དུ་ཕན་པ་མ་ཡིན་པའི། ། བྱ་བ་དང་ནི་སྤྱོད་ལམ་དང༌། ། ཟས་དང་གནས་དང་བྲན་ལ་སོགས། ། བརྟགས་ཏེ་རབ་ཏུ་སྤང་བར་བྱ། ། ལྟས་དང་བསམ་སྦྱོར་རྗེས་མཐའ་རྣམས། ། རང་ལ་དགེ་ཞིང་གང་ཤིས་པའི། ། གནས་གྲོགས་དུས་སོགས་བརྟེན་མཁས་ན། ། དོན་རྣམས་ཡིད་བཞིན་འགྲུབ་པར་འགྱུར། ། ཧ་ཅང་བྱམས་པ་གཉེན་ལའང་མིན། ། ཧ་ཅང་མནར་བ་དགྲ་ལའང་མིན། ། རྒྱལ་ཁྲིམས་ཧ་ཅང་ལྷོད་པ་དང༌། ། ཧ་ཅང་དོག་པ་མི་བྱའོ། ། ལོ་ལྔའི་བར་དུ་བུ་རྣམས་བྲིད། ། ལོ་བཅུའི་བར་དུ་དགྲ་ལྟར་བརྡེག ། བཅུ་དྲུག་ལོན་པར་གྱུར་ནས་ནི། ། བུ་ལ་མཛའ་ལྟར་བྱ་བར་གསུངས། ། འཁོར་ལ་བརྩེ་ཞིང་སྐབས་སུ་བསྡིགས། ། དགྲ་ལ་བསྡིགས་ཤིང་སྐབས་སུ་བརྩེ། ། བུད་མེད་བྱམས་བསྐྱང་ཟིལ་གྱིས་མནན། ། བྲན་གཡོག་བཀོལ་ཞིང་ནོར་གྱིས་བསྐྱང༌། ། དོན་ཆུང་བྱ་བར་གལ་མི་འཛུགས། ། གལ་ཆེན་དོན་རྣམས་ཡལ་མི་འདོར། ། མཁོས་ཆུང་བྱ་བར་ཞིབ་མི་འཇུག ། གནད་ཆེན་དོན་ལ་ཞིབ་མོར་སྒྲིམ། ། བདག་ལས་ཕྲོགས་པ་མ་ཡིན་ཕྱིར། ། གཞན་འབྱོར་གནས་ལ་རྔམ་མི་རིགས། ། ཚུར་རྒོལ་ལ་སོགས་རྒྱུ་མེད་པར། ། ཕ་རོལ་རྒྱལ་སྲིད་འཕྲོག་མི་བྱ། ། གཞན་འབྱོར་ལ་ནི་བརྣབ་སེམས་ཅན། ། དེ་ཡི་རེ་བ་མི་འགྲུབ་ཅིང༌། ། ལ་ཡོགས་རྣམ་སྨིན་མི་བཟད་པས། ། མྱུར་དུ་རང་ཕུང་འགྱུར་བར་ཟད། ། དེ་ཕྱིར་སྟོབས་དང་ལྡན་ན་ཡང༌། ། ཕ་རོལ་མནར་བར་མི་བྱེད་པའི། ། མི་བདག་རྣམས་ནི་བསོད་ནམས་ཀྱིས། ། རང་སྲིད་བརྟན་ཞིང་ཕྱོགས་ཀུན་འདུ། ། སྙིགས་དུས་ཚེ་འབྱོར་སྙན་གྲགས་སོགས། ། ལྷན་ཅིག་ཚང་བ་ཆུན་དཀའ་བས། ། ཅི་ནས་བསོད་ནམས་རྒྱ་ཆེན་པོ། ། བསགས་དང་ཐབས་ལ་མཁས་པར་བྱ། ། ཐབས་ཤེས་པ་ཡིས་ལེགས་བརྩམས་ན། ། འགྲུབ་པར་དཀའ་བའང་འགྲུབ་འགྱུར་ཏེ། ། སྔགས་སོགས་ཐབས་ཀྱི་ཆོ་ག་ཡིས། ། དུག་ཀྱང་བདུད་རྩིར་བསྒྱུར་བ་བཞིན། ། ལུགས་དང་མི་མཐུན་རྣོ་མྱུར་གྱིས། ། ཕྲལ་དུ་རང་དོན་འགྲུབ་པ་ཙམ། ། སྙིགས་དུས་ཕོ་བཟང་ཞེས་སྒྲོགས་ཀྱང༌། ། རྫིང་ཆུང་བཞིན་དུ་ཆེར་མི་འཕེལ། ། ལུགས་དང་མཐུན་པར་གནས་པ་རྣམས། ། ཕྲལ་དུ་མངོན་པར་མ་གྱུར་ཀྱང༌། ། ནམ་ཞིག་ཆུ་གཏེར་ཆེ་བཞིན་དུ། ། དཔལ་འབྱོར་རྒྱ་ཆེར་རྒྱས་ཤིང་བརྟན། ། བླུན་པོས་འབད་དེ་བཅོས་པ་ལས། ། མཁས་པས་དུས་སུ་སྨྲས་ཙམ་མཆོག ། ཐབས་མཁས་ལྡན་པའི་བྱ་བ་ནི། ། ཆུང་ཡང་འབྲས་བུ་ཆེ་བར་འགྱུར། ། ཐབས་མི་མཁས་པའི་ཡོན་ཏན་རྣམས། ། གྲགས་པ་ཆུང་ལ་སྐྱོན་ལྟར་སྨོད། ། ཐབས་མཁས་ལྡན་ན་སྐྱོན་རྣམས་ཀྱང༌། །ཡོན་ཏན་ལྟར་འགྱུར་གྲགས་པ་ཆེ། ། ནྱ་གྲོ་དྷ་ཡི་འབྲས་བུ་དང༌། ། ཉུངས་གཞི་ས་ལ་ལྷུང་ཚེ་མཉམ། ། ཐ་མར་རིམ་གྱིས་སྐྱེས་པའི་ཚེ། ། ཆེ་ཆུང་མཉམ་པར་མི་འགྱུར་བཞིན། ། རང་གི་རིས་སུ་མཚུངས་པ་ཡི། ། སྐྱེ་བོའི་ནང་ནས་ཡོན་ཏན་ཅན། ། ལོ་དང་ཟླ་བས་འཕེལ་འགྱུར་ཏེ། ། ཐ་མར་ཀུན་ལས་ཁྱད་དུ་འཕགས། ། དེ་ཕྱིར་རང་དོན་ཤེས་པ་ཡིས། ། ཉི་མ་དོན་མེད་མི་བྱ་བར། ། བཟླས་དང་བསོད་ནམས་བསགས་པ་དང༌། ། བསླབ་དང་བསྒྲུབ་བྱའི་དོན་ལ་འབད། ། སྡིག་པ་ཟད་འདོད་བདེ་བར་གཤེགས་ལ་དད། ། བསོད་ནམས་འཛད་འདོད་བསམ་པ་ངན་པ་འཆར། ། རིགས་བརྒྱུད་ཟད་འདོད་གླེན་ཞིང་ལྐུགས་པ་སྐྱེ། ། སྐལ་ངན་ཟད་འདོད་བསོད་ནམས་བསགས་པར་འདོད། ། མི་སྲུན་སྐྱེ་བོ་ས་ཁུང་ལས་བྱུང་བའི། ། ཚིག་ངན་སྦྲུལ་གྱིས་སྐྱེས་བུ་དམ་པར་ཟིན། ། དུག་དེ་ཞི་བར་བྱེད་པའི་གཉེན་པོ་ཡང༌། ། ཤེས་རབ་བཟོད་པའི་སྨན་མཆོག་བཏུང་བར་བྱ། ། སྐྱེ་བོ་བློ་དཔངས་མཐོ་རྣམས་ལ། ། ཚེ་འདིའི་བདེ་སྐྱིད་མཆོག་གཉིས་ཏེ། ། ཇི་འདོད་ཕུན་སུམ་ཚོགས་པ་དང༌། ། གཅིག་ཤོས་འདུ་འཛི་སྤང་བའོ། ། དམ་པའི་འགྲོ་བ་གཉིས་ཡིན་ཏེ། ། མེ་ཏོག་དག་ནི་མགོ་ལྕོག་བཞིན། ། འཇིག་རྟེན་ཀུན་གྱིས་སྤྱིར་བཀུར་བའམ། ། ནགས་ཉིད་དུ་ནི་དེངས་པའོ། ། དཔལ་ནི་རྒྱབ་ཀྱིས་ཕྱོགས་པ་དང་། ། རྩོལ་བ་དོན་མེད་ཉིད་གྱུར་ཅིང་། ། དམ་པ་དབུལ་པོར་གྱུར་པ་ལ། ། ནགས་ལས་གཞན་དུ་བདེ་བ་མེད། ། ཡོན་ཏན་ཤེས་ཤིང་བཀུར་བྱེད་པའི། ། གནས་སུ་མཁས་པས་གནས་པར་བྱ། ། སྦྲུལ་གདུག་ཁྲོད་ཀྱི་ནོར་བུ་བཞིན། ། མ་རབས་ཚོགས་སུ་གནས་མི་བྱ། ། ངང་པ་ཁྭ་ཡི་ཚོགས་ནང་མཛེས་མ་ཡིན། ། ཅང་ཤེས་བོང་བུའི་ཚོགས་ནང་མཛེས་མ་ཡིན། ། སེང་གེ་ཝ་ཡི་ཚོགས་ནང་མཛེས་མ་ཡིན། ། མཁས་པ་བླུན་པོའི་ཚོགས་ནང་ཇི་ལྟར་མཛེས། ། བླུན་པོས་བདག་གི་ཁྲོན་པ་འདི་ཡིན་ཞེས། ། ཆུ་གཙང་གཞན་སྤངས་བ་ཚྭ་ཅན་འཐུང་ལྟར། ། བསྒྲོད་པར་བྱ་བའི་ཡུལ་གཞན་ཡོད་བཞིན་དུ། ། འཁོར་དང་གནས་ངན་དག་ལ་ཅི་ཕྱིར་ཆགས། ། དགའ་ཞིང་མཐུན་པའི་ཡུལ་ན་གནས་པ་བདེ། ། བག་ཕེབ་ཡིད་རྟོན་གྲོགས་དང་འགྲོགས་པ་བདེ། ། བསོད་ནམས་བསགས་ཤིང་དམ་པ་བསྟེན་པ་བདེ། ། ཆོག་ཤེས་འབྱོར་ལྡན་རང་དབང་གྱུར་པ་བདེ། ། བྱིས་པའི་དུས་ན་ཕ་མའི་དབང་གྱུར་ལ། ། ལང་ཚོའི་དུས་ན་མཛའ་གྲོགས་དབང་གྱུར་ཅིང་། ། རྒས་པའི་དུས་ན་བུ་ཡི་དབང་གྱུར་པའི། ། བླུན་པོ་ནམ་ཡང་རང་དབང་ཡོད་མ་ཡིན། ། དབང་མེད་གྱུར་པས་ཡོན་ཏན་མི་ཐོབ་ཅིང་། ། རང་ཉིད་རྗེས་སུ་བསྲུང་བར་མི་ནུས་པ། ། དེ་ཕྱིར་རྟགས་ཏུ་རང་དབང་ཡོད་བགྱིས་ཏེ། ། རང་གི་དགོས་པ་དོན་དུ་གཉེར་བར་བྱ། ། རང་དབང་ཐམས་ཅད་བདེ་བ་སྟེ། ། གཞན་དབང་ཐམས་ཅད་སྡུག་བསྔལ་ཡིན། ། རང་དབང་ཐོབ་ནས་ཡོན་ཏན་ལ། ། འབད་པར་བྱེད་པ་དེ་བས་བདེ། ། ནད་ཀྱིས་འཇིགས་པ་མ་བྱུང་ལ། ། དམ་པ་དག་དང་འགྲོགས་པར་བརྩོན། ། སྐྱེ་བོས་བརྙས་ཐབས་མ་བྱུང་བའི། ། ཉིན་གཅིག་ལོ་བརྒྱ་བས་ཀྱང་མཆོག ། ལན་མེད་པ་ཡི་སྦྱིན་གཏོང་དང་། ། བཤེས་པ་མེད་པར་ཕན་འདོགས་དང་། ། ཟང་ཟིང་མེད་པར་ཆོས་སྟོན་པ། ། བདག་ཉིད་ཆེན་པོའི་ཆེ་བའི་རྟགས། ། ཇི་སྲིད་སྡུག་པའི་དུས་ཀྱི་ཟླ་རྒྱས་ཉིད། ། འཆི་བདག་གཟའ་ཆེན་འདི་ཡིས་མ་རྙེད་པ། ། དེ་སྲིད་བག་ཡོད་པར་ནི་གནས་བྱ་སྟེ། ། རིགས་དང་ཡོན་ཏན་ཚུལ་བཞིན་བསྲུང་བར་བྱ། ། དུས་ནི་ཡུན་ཐུང་རིག་པའི་རྣམ་པ་མང༌། ། ཚེ་ཡི་ཚད་ཀྱང་ཇི་ཙམ་མི་ཤེས་པས། ། ངང་པས་ཆུ་ནང་ནས་ནི་འོ་མ་བཞིན། ། གང་ཞིག་གཅེས་པ་དེ་ནི་བསྟེན་པར་གྱིས། ། བསྒྲུབ་པར་བྱ་བའི་དོན་ལ་ལེགས་འཇུག་ཅིང༌། ། དེ་ཡི་འབྲས་བུ་འདོད་པའི་དཔལ་གྱིས་བདེ། ། འདི་ཕྱིར་ལེགས་པའི་ཆོས་དཀར་འདུ་བྱེད་པས། ། གཏན་བདེ་ཐར་བའི་འབྲས་བུར་ལོངས་སྤྱོད་པ། ། མངོན་མཐོ་ངེས་ལེགས་རྒྱུ་འབྲས་ཕྲུག་བཞི་པོ། ། སྡེ་བཞི་ཞེས་གྲགས་དམ་པས་བསྒྲུབ་བྱ་སྟེ། ། བློ་ལྡན་བག་ཡོད་གྱུར་པ་རྣམས་ལ་ནི། ། འདི་འདྲའི་འབྲས་བུ་ཤིན་ཏུ་རྒྱ་ཆེར་ལྡན། ། གང་ཞིག་མི་མཁས་བག་མེད་སྐལ་ངན་རྣམས། ། ཤིན་ཏུ་ཡུན་རིང་འཚོ་བར་གྱུར་ཀྱང་ནི། ། ཚེ་འདིར་དོན་ཉམས་བདེ་བ་མི་འབྱུང་ལ། ། ཕྱི་མའི་དཔལ་ཡང་ཤིན་ཏུ་ཉམས་པར་འགྱུར། ། དེ་ཕྱིར་མི་ཡི་བདག་པོ་མཁས་རྣམས་ཀྱིས། ། སྡེ་བཞིའི་འབྲས་བུ་ཕུན་སུམ་ཚོགས་པ་ཡི། ། དཔག་བསམ་ལྗོན་པ་བསྐྱེད་པའི་ལག་རྗེས་ཀྱིས། ། འཇིག་རྟེན་ཐ་གྲུ་ཀུན་ཏུ་དགེ་བར་འགྱུར། ། ལུགས་ཀྱི་བསྟན་བཅོས་ས་གཞི་སྐྱོང་བའི་རྒྱན་ལས། མི་ཡི་བདག་པོ་རང་གིས་རང་ཉིད་ལེགས་པར་བསྲུང་བའི་ཚུལ་བརྟག་པ་སྟེ་རབ་ཏུ་བྱེད་པ་བཅུ་གསུམ་པའོ། ། ། ། |
Subscribe to:
Post Comments (Atom)
0 comments:
Post a Comment