༄༅།། ཨེ་མ་ཧོའི་རིག་མཛོད།

༧ཀུན་མཁྱེན་བླ་མ་ཚུལ་ཁྲིམས་བློ་གྲོས་དཔལ་བཟང་པོའི་བསྟོད་གསོལ་གཉུག་མའི་རང་སྒྲ་ཞེས་བྱ་བ། །
ཨེ་མ་ཧོ། །
རབ་འབྱམས་རྒྱལ་ཀུན་སྤྱི་གཟུགས་པདྨ་འབྱུང་། །
མདོ་སྔགས་བསྟན་པའི་བདག་པོ་ཞི་བ་འཚོ། །
བསྟན་སྲིད་རིག་པའི་རྒྱལ་པོ་ཁྲི་སྲོང་རྗེ། །
ཀུན་འདུས་ཀུན་མཁྱེན་བླ་མ་རྒྱལ་གྱུར་ཅིག །
མགོན་ཁྱེད་ཆོས་རྗེ་བླ་མའི་ཐུགས་སྲས་མཆོག །
ཟབ་རྒྱས་གདམས་པའི་མཛོད་འཛིན་རྒྱལ་བ་དངོས། །
བསྟན་འགྲོར་ཕན་བདེ་སྒྲུབ་པའི་དེད་དཔོན་རྗེ། །
འཇིག་རྟེན་མུན་པ་བསལ་བའི་ཉི་ཟླར་མཚུངས། །
མཁས་བཙུན་བཟང་པོའི་མཚན་ལྡན་དགེ་བའི་བཤེས། །
འཆད་རྩོད་རྩོམ་པའི་ལེགས་བཤད་སྒྲ་བརྒྱའི་དབྱངས། །
ཐོས་བསམ་སྒོམ་པའི་གྲུབ་འབྲས་མཐར་སོན་པའི། །
ཀུན་མཁྱེན་རྒྱལ་བ་གཉིས་པ་ཁྱེད་མིན་སུ། །
ཆོས་བརྒྱད་དྲི་མས་མ་གོས་བླ་མ་རྗེ། །
ཆོས་ཀུན་དེ་ཉིད་གཟིགས་པའི་ཆོས་ཀྱི་རྗེ། །
ཆོས་སྲིད་ལམ་བཟང་སྟོན་པའི་སྐྱབས་གནས་རྗེ། །
རྗེ་བཙུན་རིག་འཛིན་བླ་མ་ཞབས་བརྟན་གསོལ། །
མཚོ་སྐྱེས་རྒྱལ་བ་འཁྲུངས་པའི་དུས་བཟང་དང་། །
ཚོགས་གཉིས་བསགས་པའི་དུས་ཆེན་རྟེན་འབྲེལ་ལ། །
སྐུ་ཉིད་མཚན་དཔེ་བཞད་པའི་བསྐལ་བཟང་འདི། །
སྐྱེ་དགུ་བསོད་ནམས་སྨིན་པའི་དགེ་ལེགས་ཕུལ། །
འཛམ་གླིང་གོ་ལ་ཟླུམ་པའི་ཡོངས་སྟེང་རུ། །
ཆོས་བཞིན་སྤྱོད་པའི་རྒྱལ་བ་གཉིས་པ་ཁྱེད། །
གསང་གསུམ་བསྟན་པའི་རྒྱན་དུ་ཡོངས་ཤར་བ། །
མཇལ་བའི་སྐལ་བཟང་ངེད་ཅག་བསོད་ནམས་ཆེ། །
ཚུལ་ཁྲིམས་རྣམ་དག་གནས་བརྟན་དགེ་སློང་ཆེ། །
བློ་གྲོས་མཚུངས་མེད་རྗེ་བཙུན་འཇམ་དཔལ་དབྱངས། །
མཁས་གྲུབ་རིག་འཛིན་རྒྱལ་པོ་ཀུན་ཏུ་བཟང་། །
ཀུན་མཁྱེན་བླ་མའི་བཞེད་དོན་ལྷུན་གྲུབ་ཤོག །
སྐུ་མཆོག་གཡོ་མེད་རྟག་བརྟན་རྡོ་རྗེའི་སྐུ། །
གསུང་དབྱངས་འགགས་མེད་ཚངས་དབྱངས་དྲུག་ཅུའི་གསུང་། །
ཐུགས་རྗེ་དྲི་མེད་སྤངས་རྟོགས་ཡེ་ཤེས་དཔལ། །
ཕྲིན་ལས་ཟླ་མེད་འཁོར་འདས་རྒྱན་ཏུ་ཤོག །
ཅེས་པ་འདི་ཡང་རབ་རྒྱན་ཆུ་སྦྲུལ་ཆུ་སྟོད་ཟླ་བའི་ཡར་ཚེས་བཅུ་ཉིན་སྤྲུལ་སྐུ་པདྨ་དབང་ཆེན་རིགས་པའི་རྒྱལ་པོའི་གསུང་བསྐུལ་བཞིན་དུ་གང་དྲན་བཅོས་བསྒྱུར་མེད་པར་མགོན་པོ་གང་གི་སློབ་བུ་ཐ་ཤལ་བ་ཤྲྰི་སྨྱོན་པས་ཝ་ཡེལ་ཚན་རིག་དུས་སྟོན་ཚོགས་གྲལ་ནས་གསོལ་བ་འདེབས་པར་ཁ་པར་ནང་ནས་མགྱོགས་བྲིས་བགྱིས་པར་དགེའོ། །