༄༅།། ཨེ་མ་ཧོའི་རིག་མཛོད།

སྡུད་སྒྲིག་པ་བོན་རྒྱ་བསྟན་འཛིན་རབ་རྒྱས།
ངེད་དང་མདོ་སྨད་སྤྱི་འཐུས་རྨོག་རུ་བསྟན་པ་གཉིས་ཀྱི་བཀོད་སྒྲིག་འོག  ཤེས་རབ་ཀྱི་ནམ་མཁར་ཕྱོགས་པའི་སྙན་ངག་གྱེར་འདོན་འདུ་འཛོམས་ཐེངས་བཞི་པ་སྤྱི་ལོ་ ༢༠༡༣ ཟླ་༨ ཚེས ༡༠ ཉིན་རྡ་སའི་མེག་ལོར་བསྟན་ནོར་གསོལ་མགྲོན་ཁང་དུ་བསྡུས་པ་ཡིན། སྤྱིར་ན་སྙན་ངག་གྱེར་འདོན་འདུ་འཛོམས་འདི་སྙན་ངག་པ་རྐྱང་བས་གྲུབ་ན་སྙམ་པའི་བསམ་བློ་ངེད་གཉིས་ལ་ཡོད་མོད། བརྗོད་བྱའི་དགོས་དབང་གི་མི་མང་གི་སྐུ་ཚབ་དང་ཁོང་ལ་དམིགས་བསལ་ལྟ་རྟོག་དང་རོགས་འདེགས་གནང་མཁན་གྱི་ཚོགས་པ་ཁག  ནང་མི་བཅས་མགྲོན་འབོད་བྱེད་དགོས་བྱུང་སོང་། ཡིན་ནའང་། ངེད་གཉིས་ཀྱིས་བགྲོ་གླེང་འདུ་འཛོམས་དེ་རིགས་གཉིས་ལྟ་བུ་ཞིག་ལ་བཀར་ནས་སྤྱི་འཐུས་རྣམ་པ་དང་ཚོགས་པ་ཁག་གི་སྐུ་ཚབ། ལྷ་མོ་སྐྱིད་བཅས་ཀྱི་བསམ་ཚུལ་གྲུབ་པ་དང་མཇུག་སྡོམ་བརྒྱབ་སྟེ་གསོལ་ཇ་བར་གསེང་བཞག དེ་རྗེས་གཞི་ནས་རྩོམ་པ་པོ་རྣམས་བསྐྱར་འཛོམས་ཀྱིས་ཁོང་གི་སྐོར་ལ་དགོངས་ཚུལ་དང་སྙན་ངག་གི་སྐོར་ལ་དགོངས་ཚུལ། སྙན་ངག་གྱེར་འདོན་བཅས་ཀྱི་ལས་རིམ་དེ་ཅུང་རྒྱུན་རིང་བོར་བསྐྱངས་པ་ཡིན། ཐེངས་འདིའི་གྱེར་འདོན་ཡང་གླིང་ཚའི་སྐོར་གྱི་སྙན་ངག་ཆིག་རྐྱང་ཞིག་མིན་པར་གཞིས་ཀྱི་སྙན་ངག་པ་འཇུ་སྐལ་བཟང་དང་མདའ་བཙན་པོ་སོགས་ཀྱི་ལ་རྒྱའི་སྙན་ངག་དང་བརྩེ་དུང་གི་སྙན་ངག་ཡང་གྱེར་འདོན་བྱས་པ་ཡིན་ལ།  ཧིན་རྡུའི་ནང་གི་སྙན་ངག་གཅིག་གཉིས་རེའང་གྱེར་འདོན་དང་འགྲེལ་བརྗོད་ཀྱིས་མྱོང་རོལ་བྱས་པ་ཡིན།  གཤམ་འོག་གི་འདི་དག་ནི་བདག་གིས་སྙན་ངག་གྱེར་འདོན་འདུ་འཛོམས་འདི་མགོ་འཛིན་སྐབས་ཀྱི་གཏམ་བཤད་དང་ཉིན་དེར་གྱེར་འདོན་བྱས་པའི་སྙན་ངག་ཁ་ཤས་ཡིན།

ཤེས་རབ་ཀྱི་ནམ་མཁར་ཕྱོགས་པའི་སྙན་ངག་གྱེར་འདོན་འདུ་འཛོམས་ཐེངས་བཞི་བའི་སྟེང་ཕེབས་པའི་ཕེབས་པའི་སྙན་ངག་པ་རྣམ་པ་དང་།  བོད་མི་མང་སྤྱི་འཐུས་རྣམ་པ།  དེ་བཞིན་ཚོགས་པ་ཁག་གི་སྐུ་ཚབ་དང་གསར་འགོད་པ་བཅས་པར་འཚམས་འདྲི་དང་བཅས།  ངས་ཤེས་རབ་ཀྱི་ནམ་མཁར་ཕྱོགས་པའི་གྱེར་འདོན་ཐེངས་བཞི་པ་དང་།  རྩོམ་པ་པོ་གླིང་ཚའི་སྐོར་ངོ་སྤྲོད་ཅུང་ཙམ་ཞུ་རྒྱུ་ཡིན། ད་རེས་འདི་ནི་ཤེས་རབ་ཀྱི་ནམ་མཁར་ཕྱོགས་པའི་སྙན་ངག་གྱེར་འདོན་འདུ་འཛོམས་ཐེངས་བཞི་པ་ཡིན་ལ། ཐེངས་དང་པོ་དང་གཉིས་པ་དེ་ལོ་གཉིས་དང་གསུམ་གྱི་ཡར་སྔོན་ལ་བསྡུས་པ་ཡིན།  ཐེངས་དང་པོ་དང་གཉིས་པའི་ཤུགས་རྐྱེན་ལས་གཞོན་ནུ་དང་བུད་མེད་ཀྱི་མར་མེ་ཁྲོམ་སྐོར་སྐབས་ལའང་སྙན་ངག་གྱེར་འདོན་རེ་བཀོད་སྒྲིག་བྱེད་པ་ལྟ་བུའི་འུར་ཆེན་པོ་ཞིག་ལངས་པ་དང་། ལྷག་པར་ཤིང་བཟའ་རིན་པོ་ཆེས་ཁྱབ་རྒྱ་ཆེ་ལ་འགྲོ་སོང་ཕོན་ཆེ་བཏང་ནས་སྙན་ངག་གྱེར་འདོན་གྱི་འགྲན་བསྡུར་བསྡུས་པ་སོགས་སྐབས་དེ་དག་ལ་སྙན་ངག་གི་ཕྱོགས་སུ་འུར་ཆེན་པོ་ལངས་པའི་རྣམ་པ་བྱུང་ནའང་།  དེང་སྐབས་དེ་དག་འཇགས་པའི་གནས་སྟངས་ཤིག་ཤར་འདུག དེའི་རྐྱེན་གྱིས་སྙན་ངག་གྱེར་འདོན་དེ་ངེས་པར་དགོས་ངེས་ཤིག་ལ་སྙམ་ནས་ཐེངས་བཞི་པ་འདི་བསྡུས་པ་ཡིན། ལྷག་པར་གོང་ས་མཆོག་གིས་བོད་ཀྱི་རྩ་དོན་ཐུག་ས་གཅིག་བོད་ཀྱི་སྐད་དང་ཡི་གེར་ཐུག་ཡོད་པའི་བཀའ་སློབ་ལན་མང་གནང་བ་མ་ཟད་ཐ་ན་སྐུ་རླུང་དྲག་པོ་བཞེངས་པའི་རྣམ་པར་ཡང་གནང་བ་དང་།  ཀུན་གཟིགས་པཎ་ཆེན་རིན་པོ་ཆེ་མཆོག་གིས་ཀྱང་སྐུ་ཚེ་སྨད་དེ་བོད་ཀྱི་སྐད་ཡིག་ཆོས་རིག་རྒྱུན་འཛིན་དང་དར་སྤེལ་གྱི་ཐད་བཏང་བ་རེད།  དེ་ལྟར་རྒྱལ་བ་ཡབ་སྲས་གཉིས་ཀྱི་བཞེད་དགོངས་གཅིག་ལ་འབབ་པའི་གནད་ས་དེ་དག་གི་ཐད་གཞུང་སྒེར་གཉིས་ནས་ནུས་པ་ཇི་ཡོད་ཀྱིས་ཤུགས་འདོན་རྒྱུ་གལ་ཆེ་བར་སྙམ་ནས་སྙན་ངག་གྱེར་འདོན་གྱི་འདུ་འཛོམས་འདི་དག་རིམ་པར་བསྡུས་པ་ཡིན།  སྤྱིར་ན་སྐད་ཡིག་གི་འཕེལ་རྒྱས་ནི་ཕ་སྐད་གཙང་མ་བཤད་དགོས་ཞེས་ཐ་སྙད་གཅིག་གཉིས་རེ་བོད་སྐད་སྟེང་ནས་བཤད་པ་ཙམ་མིན་པར།  སྐད་ཡིག་དེའི་ནང་སྒྱུ་རྩལ་དང་མཚན་ཉིད་རིག་པའི་མཚོན་པའི་རིག་གནས་སྡེ་ཁག་མང་པོ་ཞིག་གནས་ཐབས་བྱེད་རྒྱུ་དེ་ནི་སྐད་ཡིག་གི་བླ་སྲོག་བཟུང་བ་ངོ་མ་དེ་རེད་སྙམ།  ལྷག་པར་ང་ཚོའི་སྐད་ཡིག་འདི་ལ་རྒྱ་དབྱིན་གང་ནས་ཀྱང་ཇི་བཞིན་མི་ཁྲོལ་བའི་སྒྱུ་རྩལ་གྱི་མཚོན་ཐབས་བླ་ན་མེད་པ་མང་པོ་ཞིག་ང་ཚོས་སྐད་ཡིག་ནང་ཇི་བཞིན་མཚོན་ཞིང་བརྗོད་ནུས་པས་ང་ཚོས་དེ་དག་ངོ་ཤེས་པར་བྱས་ཏེ་སྒྱུ་རྩལ་ཀུན་གྱི་རྒྱལ་བོ་སྙན་ཚིག་རིག་པ་འདི་ཁྱབ་བརྡལ་དུ་ཕྱིན་ན་སྙམ་པ་དང་།  ལྷག་པར་རྒྱབ་རྩ་ན་རྒྱལ་ཁབ་མེད་ལ་བླ་ཆེན་དང་དཔོན་ཆེན་མེད་པའི་ང་ཚོ་དང་ཆ་འདྲ་བའི་སྙན་ངག་པ་གཉོམ་ཆུང་ཞིག་གི་ལག་པ་ཡ་གཅིག་གིས་ནམ་མཁའ་བཀྱག་ཏེ་ལུས་སྲོག་ལོངས་སྤྱོད་དང་བཅས་པ་བློས་བཏང་ནས་བཞུད་ཅིང་། ད་ལྟ་བོར་བརླག་ཏུ་གྱུར་ནས་ཟླ་བའི་སྟེང་ལ་ཟླ་བ་བརྩེགས་ནས་འགྲོ་གི་ཡོད་པ་དེ་ངེས་པར་ཤེས་དགོས་པ་དང་། རྩོམ་པ་པོ་ཙམ་མིན་པར་མི་མང་གིས་ངེས་པར་ཤེས་དགོས་པར་སྙམ་སྟེ་མི་མང་གི་སྐུ་ཚབ་རྣམ་པ་གདན་དྲངས་པ་ཡིན།
སྤྱིར་ན་གླིང་ཚ་ཚེ་བརྟན་རྡོ་རྗེ་ཞེས་པ་འདི་ནི་བརྩེ་དུངས་དང་བདེན་དོན་གྱི་ཆེད་དུ་མི་ཚེ་བསྟིམས་པའི་གང་ཟག་ཅིག་ཡིན་པའི་ཆ་ནས་རྩོམ་པ་པོའི་གཉུག་གཤིས་དང་དབང་རྩ་ཡོངས་སུ་ཚང་བའི་གང་ཟག་ཅིག་རེད།  ཁོང་གི་རྩོམ་ཡིག་དག་ཚད་ལྡན་དང་བླ་ན་མེད་པར་སྨྲ་མི་ཐུབ་མོད། ཁོང་གི་ཞི་བའི་འཐབ་རྩོད་ཀྱི་བྱུང་རིམ་དེ་ངོ་མཚར་བ་ཞིག་རེད། ངས་ཁོ་ལ་ཁྱོད་ཀྱི་ཞི་བའི་འཐབ་རྩོད་འདི་ཇིལྟར་བསླངས་པ་ཡིན་ཞེས་དུས། དེ་ནི་གན་དྷི་རྗེ་དང་༸གོང་ས་མཆོག་གི་བཀའ་སློབ་ཁག་ལ་ཡུན་རིང་སློབ་སྦྱོང་བྱས་པ་ལས་བྱུང་བ་ཡིན།  གོང་ས་མཆོག་གི་བཀའ་སློབ་གསར་ཐོན་ཞིག་ལ་ངས་མ་བཀླགས་པ་ཞིག་མེད་ལ།  ལྷག་པར་<<བྱམས་བརྩེ་དང་ནུས་སྟོབས་>>ཞེས་པ་དེ་ངས་བཀླགས་ནས་དེབ་ཡང་རལ་བར་གྱུར་སོང་ཞེས་ལན་གནང་སོང་། འོ་ན་ཁྱོད་ཀྱི་ཞི་བའི་འཐབ་རྩོད་ཅེས་པ་འདི་ཆབ་སྲིད་སྡེར་གཏོགས་ཤིག་ཡིན་ནམ་ཆོས་ལུགས་ཀྱི་སྡེར་གཏོགས་ཤིག་ཡིན།  ཁྱོད་དོན་ངོ་མ་ཅི་ཞིག་རྩོད་ཀྱིན་ཡོད་ཅེས་དྲིས་དུས། འདི་ནི་ཆབ་སྲིད་དང་ཆོས་ལུགས་གང་གི་སྡེར་གཏོགས་ཀྱང་མིན། མི་ཆོས་རིག་གནས་ཀྱི་སྡེར་གཏོགས་ཤིག་ཡིན།  ངས་བདེན་པ་དང་རང་དབང་རྩོད་ཀྱིན་ཡོད། དེ་ནི་མི་ཚང་མར་ཐོབ་འོས་པ་དང་རྩོད་འོས་པ་ཞིག་རེད་ཅེས་ལན་བརྒྱབ་སོང་།  འོ་ན་ཁྱོད་ཀྱི་བདེན་པ་ཞེས་པ་ཅི་ཞིག་ཡིན་ཞེས་དྲིས་དུས། བདེན་པ་ཞེས་པ་ནི་རོལ་མྱོང་བྱེད་རྒྱུ་ཞིག་ཡིན་པ་དང་། མིའི་རིགས་ཀྱི་ཚེ་སྲོག་གི་རིན་ཐང་ངོ་ཤེས་ན་དེ་ནི་ངས་བཤད་ཀྱིན་པའི་བདེན་པ་ཞེས་པ་དེ་ཡིན། ངས་གོམ་པ་རེ་རེ་བཞིན་སྤོ་དུས་བརྗེད་མི་ཐུབ་པ་ནི་ང་ཚོས་ཅིའི་ཕྱིར་བདེན་པ་བཤད་པ་དང་། བདེན་པ་ལས་པ། བདེན་པའི་ཆེད་དུ་ཡར་ལངས་མི་ཐུབ་པ་དེ་རེད་ཅེས་བཤད་སོང་། འོ་ན་ཁྱོད་ཀྱིས་རྒྱ་མིའི་དར་ཆ་ཅིའི་ཕྱིར་འཕྱར་བ་ཡིན་ཞེས་དྲིས་དུས། ངའི་བསམ་ཚུལ་ལ་ང་ཚོ་དགྲ་ཞེས་པ་འདི་ལས་གྲོགས་ཞེས་པ་དང་། འདྲ་མཉམ་ཞེས་པ་འདི་དང་ལེན་ཐུབ་ཀྱི་མི་འདུག སྤྱིར་ན་དགྲ་ཞེས་པ་ཞིག་ང་ཚོར་རྩ་བ་ནས་མེད་པའི་བསམ་བློ་དགོས་འདུག་སྙམ་ནས་རྒྱ་མིའི་རྒྱ་དར་ཁུར་བ་ཡིན་ཞེས་ལན་བརྒྱབ་སོང་།  འོ་ན་ད་ལོ་ཁྱེད་ཀྱིས་མི་འཁུར་དོན་ཅི་ཡིན་འདྲི་དུས།  ང་ཚོ་མི་མང་གིས་དེ་ངོས་ལེན་ཐུབ་ཀྱི་མེད་པས་མི་མང་གི་བསམ་བློ་བརྩི་བཀུར་བྱས་པ་ཡིན།  སྤྱིར་ན་རྒྱ་དར་མ་འཁྱེར་བ་ནི་ང་ལ་མཚོན་ན་ངའི་མགོ་ནས་སྐྲ་རྐང་གཅིག་བལ་བ་ལྟ་བུ་རེད། དེ་ནི་ངའི་ཞི་བའི་འཐབ་རྩོད་ཀྱི་གང་ཡང་མ་རེད། ང་ལ་སྐྲ་རྐང་གཅིག་ཀྱང་ཡོད་ཀྱང་མེད་ཀྱང་ཁྱད་པར་ཅི་ཡང་ཡོད་པ་མ་རེད་ཅེས་ལན་གནང་སོང་། འདི་ལྟར་ཁོང་ལ་དྲི་བ་དྲིས་ལན་གྱི་ལམ་ནས་རྒྱུས་ལོན་བྱས་དུས་ཁོང་གི་ཞི་བའི་འཐབ་རྩོད་དེ་ནི་བཅོས་མ་དང་འུ་ཚུགས་གང་ཡང་མིན་པར་ཁོ་ལ་དབང་མེད་གྱི་མྱོང་བ་ཐོན་ཡོད་པ་ལྟ་བུ་ཞིག་གི་ཚུལ་དུ་ཡོད་པ་ང་ནི་ངོ་མཚར་བར་གྱུར་ཡོད།  ཕལ་ཆེར་ཁྱེད་ཅག་ཡད་དེ་བཞིན་ཡིན་རྒྱུ་རེད།  མི་མང་གི་ཁོང་གི་དགོངས་ཚུལ་ཇི་བཞིན་མི་ལོན་ནའང་ང་ཚོ་རྩོམ་པ་པོ་ཚོས་ཁོང་གི་དགོངས་ཚུལ་ཇི་བཞིན་ལེན་རྒྱུ་གལ་ཆེན་པོ་རེད།  རྒྱུ་མཚན་དེ་འདྲའི་མང་པོ་ཞིག་གི་སྒོ་ནས་ཤེས་རབ་ཀྱི་ནམ་མཁར་ཕྱོགས་ཏེ་རྩོམ་པ་པོ་གླིང་ཚ་འཚོལ་བ་ཞེས་པའི་བརྗོད་གཞི་འདི་གདམ་པ་ཡིན། 

རྩོ་པ་པོ་ལྷ་ཆབ་སྦྱིན་པས་གླིང་ཚ་དང་ཁོང་གཉིས་ཆུང་དུས་ནས་འདྲིས་པའི་གྲོགས་པོ་ཡིན་སྐོར་གྱི་གཏམ་རྒྱུད་རྣམས་བཤད་རྗེས་ཁོང་ལ་བྲིས་པའི་སྙན་ངག་རྙིང་པ་འདི་གྱེར་འདོན་བྱས་སོང་།
གླིང་ཚང་ལ་རྒྱང་ལྟ།
ལྷ་ཆབ་པ།
མི་ནུབ་བདེན་པའི་སེམས་ཤིག་ཁྱེད་ལ་ཡོད།།
ཁྱེད་ཀྱི་སེམས་དེར་མི་འགྱུར་རྟགས་ཤིག་གྲུབ།།
རང་གི་རྐང་བ་གཉིས་ཀྱི་རྩེར་ལངས་ནས།།
ཧི་མ་ལ་ཡའི་ཕྱོགས་སུ་དལ་གྱིས་རྒྱུ།།

དཀར་བོའི་ལས་ཀྱི་མཐའ་ན་ལམ་ཞིག་ཡོད།།
ལམ་དེའི་སྣེ་མོ་ཁྱེད་ཀྱི་སྙིང་ལ་ཟུག།
ཚུགས་ཐུབ་དབུ་མ་ཆེན་མོའི་ཁྱིམ་དེ་ན།།
ཁྱེད་ཀྱི་མིག་ཟུང་ཕྱོགས་སའི་ལྷ་ཞིག་ཡོད།།

དྲོན་པོའི་མལ་ཞིག་མ་རྙེད་ལོ་གཅིག་འགོར།།
ཞིམ་པོའི་ཟས་ཤིག་མ་རག་ལོ་གཅིག་འགོར།།
སྡུག་གི་མགོ་བོ་ལས་ཀྱིས་བྱིན་ནའང་།།
བཟོད་པའི་ཕ་རོལ་ཡུལ་དུ་ཁྱོད་རང་ཕྱིན།།

ཁྱེད་ལ་སྙིང་སྟོབས་ཆེ་བའི་ཕ་ཞིག་ཡོད།།
བྱམས་དང་སྙིང་རྗེ་ཅན་གྱི་མ་ཞིག་ཡོད།།
བསམ་ན་ངོ་མཚར་ཆེ་བའི་མི་ཚང་ཞིག།
ས་ཡ་དྲུག་གི་ཆེད་དུ་འདི་ལྟར་བསྐྱོད།།

མཁའ་མཐའི་སྤྲིན་པ་དམར་བོའི་ཕྱོགས་དེ་ན།།
ཁྱེད་ཀྱི་རྐང་རྗེས་དཔར་བའི་ལམ་ཞིག་ཡོད།།
རྡོ་དང་འཚེར་མ་འཛིང་བའི་ལམ་དེ་ནས།།
ས་ཡ་དྲུག་གི་བུ་ཁྱོད་གནམ་གྱིས་སྲུང་།།

གསོན་པོའི་ལྷ་ཞིག་ཡོད་ན་དེ་རིང་ཤོག།
གླིང་གི་དཔའ་བོ་ལམ་ལ་ཆས་སོང་ལོ།།
མི་མིན་འབྱུང་བོའི་ཚོགས་རྣམས་རྒྱང་དུ་ཆོད།།
དཀར་ཕྱོགས་ལྷ་མི་དགའ་བའི་ཕེབས་བསུ་ཡོད།།

མི་འཇིགས་བདེན་པའི་དམ་བཅའ་སྙིང་ལ་བརྐོས།།
དཀའ་སྡུག་ལོ་ཟླས་སུབ་པར་མི་འགྱུར་བ།།
གླིང་གི་ཚ་བུ་ཁྱེད་ཀྱི་གོམ་སྒྲ་ནི།།
བདག་གི་རྨི་ལམ་དུ་ཡང་ལན་དུ་ཐོས།།

ཁྱེད་ཀྱི་བགྲོད་པ་སྤུ་གྲིའི་ཁ་ན་ཡོད།།
ཁྲག་གི་རྐང་རྗེས་བོད་མིའི་སྙིང་ན་ཡོད།།
ལོ་དང་ཟླ་བའི་རྔུལ་ཆུའི་ཐིགས་པ་ནི།།
རྨ་འབྲི་རྫ་གསུམ་རྒྱུན་དང་བསྡོངས་ནས་ཡོད།།
༢༠༡༣ ༣ ༡༤ ལ།

བུད་མེད་སྒྲུང་གཏམ་པ་དང་སྙན་ངག་པ་ཉི་མ་འཚོས་གླིང་ཚ་བོར་བརླག་སྐོར་གྱི་སེམས་ཁྲལ་སོགས་འགྲེལ་བརྗོད་ཉུང་ཉུང་ཞིག་དང་ལྷན། དེ་རིང་ཁོ་མོ་གླིང་ཚའི་བཟའ་ཟླ་ཡལ་གྱི་ཚོར་བའི་གཏིང་རུམ་ལ་འཛུལ་བར་འབད་བརྩོན་བྱེད་ཀྱི་ཡིན་ཞེས་འོག་གི་སྙན་ངག་འདི་ངག་འདར་འདར་དང་ཚོར་བའི་ཞིང་ཁམས་ལ་་རྦད་ཀྱིས་ཆས་པ་ཞིག་གི་ཉམས་གྱིས་གྱེར་འདོན་བྱས་ཏེ་སྙན་ངག་པ་ཚང་མའི་མིག་མཐར་མཆི་མ་བསྐྱིལ་སོང་ལ། ལྷག་པར་སྙན་ངག་པ་ལྷ་ཆབ་སྦྱིན་པས། ཁྱེད་ངག་འདར་འདར་གྱིས་བཀླགས་ཤིང་འོང་དུས། བདག་གི་མིག་ཟུང་ལའང་སྨྲ་ར་སོབ་སོབ་དང་བློ་དཀར་གཞུང་བཟང་གི་གྲོགས་པོ་ཁོང་དང་ཁོང་གི་ཐོད་པ་གུག་གུག་ཡིན་པའི་བྱིས་པ་དེ་གཉིས་དྲན་ནས་མིག་ལ་མཆི་ཞགས་འཁོར་བྱུང་། ཞེས་བྲིས་འདུག
ངོ་གདོང་སྨུག་པོ།  བརྩེ་བ་ཐེད་པོ།
ཉི་མ་འཚོ།
ང་དང་འདྲིས་མྱོང་བའི་ངོ་གདོང་སྨུག་པོ། ཁྱོད་གང་ན་ཡོད།
སེམས་ཁྲལ་གྱིས་གཉིད་ཁུག་པ་དང་། སེམས་ཁྲལ་གྱིས་གཉིད་ལས་སད་ཐེངས་རེར། ངལ་དུབ་ཀྱིས་ཟིན་པའི་ལུས་པོ་འདིར། ནུས་ཤུགས་ཅུང་ཙམ་ཡང་མི་འདུག མུན་པ་ལྟ་བུའི་གནམ་འོག་ནས། འོད་སྣང་མི་མཁོ་བའི་མི་སུ་ཡོད། ངས་ཀྱང་མུན་པའི་ཡོལ་རས་ལྟ་བུའི་མི་ཚེ་འདི་ཕར་ཕར་ཕྱེ་ན་བསམ།
མལ་དུ་ཉལ་དུས། ངས་རང་གི་ཉལ་ཁྲི་ཆེ་དྲགས་འདུག་བསམ་བྱུང་། གཡས་གཡོན་གང་ལ་ཨ་ལོག་བརྒྱབ་རུང་། ཟུར་གང་ཞིག་ལ་ལག་པས་རེག་ཀྱང་། སྟོང་པ་སྟོང་རྐྱང་རེད། སྐབས་འདིར། ངས་ཉལ་ཁྲི་ཆུང་ཆུང་ཞིག་དྲན་བྱུང་། ཨ་ལོག་གང་ལ་བརྒྱབ་རུང་། སུ་ཞིག་གིས་འཐམས་ནས་ཡོང་བ་དང་། གང་ལ་ཡང་རེག་ནས་ཡོང་བའི་མལ་ས་ཞིག་དྲན་བྱུང་། ད་བར་ངའི་ཉལ་ཁྲི་ཆེ་དྲགས་འདུག
རྡ་ས་ནས་འདྲིས་སོང་བའི་སེམས་པ་དང་། རྡ་ས་ནས་འགོ་བརྩམས་པའི་མི་ཚེ། ཕྱིར་འདང་རེ་བརྒྱབ་ན། སུ་ལ་ཡང་ཡོད་མ་མྱོང་བའི་བདེ་སྐྱིད་ཅིག་ཏུ་རློམ་མྱོང་། རྨི་ལམ་དུ་འཁྱམས་པ་ལྟར་གཉིད་ལས་སད་དུས། ངའི་བརྩེ་བ་གང་ན་ཡོད། ངའི་བདེ་སྐྱིད་གང་ན་ཡོད། སྐབས་འདིར། མི་ལ་མ་འོངས་པ་མཐོང་བའི་སྒྱུ་འཕྲུལ་གྱི་མེ་ལོང་ཞིག་ཅི་མ་རུང་སྙམ།
གཉིད་ལས་སད་དུས། ངས་རང་གི་གཡས་གཡོན་ལ་ལྟ་གི་ཡོད། སྟོང་སང་སིང་གི་སྣང་བས། ང་མནན་ནས་ཡོང་གི། མལ་སར་ལྷུང་བའི་སེམས་པ་འདིས། གངས་རིའི་བར་མཚམས་ཀྱི་གོམ་སྒྲ་ཞིག་ལ་ཡང་ཡང་ཉན། སྙིང་གི་འཕར་ལྡིང་ཇེ་མགྱོགས་སུ་འགྲོ་དུས། ང་སྐད་ཤུགས་གང་ཡོད་ཀྱིས་ངུས་ན་འདོད། གློ་བུར་དུ། ང་ཁང་པ་འདི་ལ་ཡང་ཤོང་གི་མེད་པ་ཚོར་བྱུང་། ང་ལ་རྒྱ་མཚོའི་བྲང་གཞུང་ལྟ་བུའི་སྙེས་ས་ཞིག་དགོས་པ་འདྲ། ངས་རང་ཉིད་ཡོམ་ཡོམ་སྐྱོམས་བཞིན་པ་ཚོར་གི། ང་ལ་ནམ་མཁའ་སྔོན་མོ་ལྟ་བུའི་འཕག་ས་ཞིག་དགོས་ཀྱིན་འདུག
ན་ཟུག་གི་ལོ་ཟླ། གྲི་ལྟར་རྣོན་པོ་རེད། མཚམས་རེར་ང་སྤུ་གྲིའི་སོ་ཁ་ན་མྱུལ་བཞིན་པ་འདྲ། རྨ་ཁ་ལྟར་གཟེར་བཞིན་པའི་སེམས་པ་དང་། གཙང་བོ་བཞིན་བཞུར་གྱིན་པའི་ཡིད་ཀྱི་མཆི་མ་འདི། བརྩེ་བ་བོར་བའི་མི་ཞིག་གི་སྡུག་བསྔལ་རེད་ཟེར་ན། ཁྱེད་ཀྱིས་ཡིད་ཆེས་གནང་ངམ།
སྒེའུ་ཁུང་ཕྱི་རོལ་ན་འབབ་བཞིན་པའི་ཆར་བ་ལ་ང་སུན་གི། ངོ་གདོང་སྨུག་པོའི་གྲིབ་གཟུགས་ཤིག་གིས་ངའི་གྲུ་ཟུར་རེ་རེ་ལ་རེག་བཞིན་པ་འདྲ། ཤེལ་ངོས་ལ་ཐག་ཐག་རྡུང་འོང་བའི་ཆར་ཐིགས་ལ་ལྷག་ཏུ་སུན་གི། སྒྲ་དེ་དག་ནི་སྙིང་ཉེ་བ་སུ་ཞིག་ཁང་བའི་བར་འཁྱམས་ན་ཡོང་བཞིན་བའི་གོམ་སྒྲ་དང་འདྲ་གི། སྒྲ་དེ་དག་གིས་སུ་ཞིག་གིས་ཁང་བའི་སྒོ་མོ་རྡུང་བཞིན་པ་ལྟར་ཀུ་རེ་རྩེད་གི། ངའི་ཉེ་འཁོར་གྱི་གོམ་སྒྲ་ཡོད་ཚད་འཇགས་སོང་བ་རེད། ངའི་མཐའ་འཁོར་གྱིས་དགོད་སྒྲ་དྲོན་པོ་ཁྱེར་སོང་བ་རེད། ཐ་ན་ཕྱེ་མ་ལེབ་ཀྱི་འཕུར་ལྡིང་ཡང་ཤི་སོང་བ་རེད། སྐབས་འདི་འདྲ་ཞིག་ལ། སུ་ཞིག་གིས་ང་ལ་ཀུ་རེ་རྩེད་ན། ངས་བཟོད་སྒོམ་བྱེད་ཐབས་མི་འདུག
མི་ཁ་དང་ཡུག་ས་མའི་མིང་ངན་འཁུར་བའི་ང་། ས་རུབ་ཐེངས་རེ་དང་ནམ་ལངས་ཐེངས་རེ་རེ། འཛུམ་མདངས་བཅོས་མ་དང་མཉམ་དུ། སྐད་ཆ་འདྲ་ཆགས་རེ་བཤད་ནས། རེ་བ་སྟོང་བ་ཞིག་གི་ཆེད་དུ་འཐམ་དགོས་དུས། ས་སྒང་རྒྱབ་ལ་འཁུར་བ་ལྟ་བུའི་ལྗིད་ཤུགས་ཀྱིས་མནན་ཡོང་གི། སྤྲིན་བལ་ལུས་ལ་དཀྲིས་པ་ལྟ་བུའི་འཆིང་བྱེད་ཀྱིས་བསྡམས་ཡོང་གི། སྐབས་འདིར། འཇིག་རྟེན་ན་ནམ་ལངས་རྒྱུ་མེད་ན་དགའ་བ་ལ་ཨང་། ངས་མུན་པ་གོས་སུ་བཀླུབས་ནས། མུན་པའི་གཏིང་རིམ་ནས་རང་ཤི་རྒྱག་ན་འདོད།
༼ཨ་ཕ་གང་དུ་བུད་སོང་༽ཞེས་པའི་དྲི་བ་དེ་ང་ཡོལ་དགོས་ས་གཅིག་པོ་ཡིན། སྐད་ཆ་དེ་ཐོག་རེད། སྐད་ཆ་དེ་གློག་རེད། གློག་དམར་འཁྱུག་འཁྱུག་དང་གནམ་ལྕགས་ཐོག་སྒྲ་ཡིས་བཅུན་ཡོང་བའི་དངངས་སྐྲག་འདི། ངས་འཛུམ་མདངས་རྫུན་མ་ཞིག་གིས་བསུ་བཞིན་ཡོད། སྐབས་འདིར།  གློག་དམར་གྱིས་འཐག་བཞིན་པ་དེ་ང་ཡིན། གློག་དམར་བཞིན་འཁྱུག་དགོས་པ་དེའང་ང་རེད། ང་ལ་དབུགས་རིང་པོ་ཞིག་གཏོང་ས་ཡང་མེད་གི།
སྲང་ལམ་གྱི་ངོ་གདོང་ཡོད་ཚད་ཁྲ་ཁྲ་རེད། ང་དང་ངོ་བོ་དབྱེར་མེད་དུ་འདྲིས་སོང་བའི་ངོ་གདོང་སྨུག་པོ་དེ་གང་ན་ཡོད། སེམས་ལ་སིམ་སོང་བའི་ངོ་གདོང་སྨུག་པོ། གང་ཞིག་ནས་བོར་སོང་བ་དྲན་ན། ལུས་སེམས་གཉིས་ཀ་སྦྲིད་པར་གྱུར་འགྲོ། ཁྲོམ་གཞུང་ནས་ཀྱང་འགྱེལ་འགྲོ་བའི་སེམས་ཁྲལ་ཅི་འདྲའི་ཆེ་ཨང་། གོམ་པ་སྔར་ལས་ཇེ་ལྗིད་སོང་བ་ནི་སེམས་ཁྲལ་རེད། ལུས་པོ་སྔར་ནས་སྐམ་དུ་སོང་བ་ཡང་སེམས་ཁྲལ་རེད། སེམས་ཁྲལ་གྱིས་མནན་ཡོང་བའི་རྒྱ་ཁྱོན་ནི་གནམ་ལས་ཀྱང་ཆེ་བ་འདུག
བརྩེ་བ་ལ་བཟོད་སྒོམ་ཟེར་བ་ཞིག་མེད་པ་འདྲ། བརྩེ་བ་ལ་ཚབ་མཚོན་ཟེར་བ་ཞིག་ཀྱང་མེད་པ་འདྲ། གལ་སྲིད་ཡོད་ན། ཤ་ལས་ཆད་པའི་གཅེས་ཕྲུག་འདི་གཉིས་ཀྱིས་ཅིས་ཀྱང་ཚབ་མཚོན་ཐུབ་དགོས། དྲང་མོ་བཤད་ན། ཁྱོད་མེད་པའི་ཉི་མ་ལྔ་བརྒྱ་ཉེར་དྲུག་འདིའི་ནང་། ང་ནད་པ་ཡིན། ང་སྨྱོན་པ་ཡིན། མཚམས་རེར་བར་དོ་བའང་ཡིན།
ཁྱེད་ཀྱིས་ང་ལ་ཀུ་རེ་རྩེད་སོང་། ངའི་བརྩེ་བ་དང་ལང་ཚོ་ལ་ཀུ་རེ་རྩེད་སོང་། ངའི་མི་ཚེ་དང་ཁྱིམ་ཚང་ལ་ཀུ་རེ་རྩེད་སོང་། ང་ཤོག་སྙིགས་མིན་རུང་། ཁ་ཕྱོགས་མེད་པའི་ལྷགས་རླུང་ལ་བསྐུར་སོང་། བུ་ཕྲུག་གཉིས་ལམ་བར་གྱི་རྡེའུ་བཞིན་བསྐྱུར་སོང་། གདོང་སྨུག་པོ་ཅན་གྱི་རྒྱུ་འབྲས་ཀྱི་བདག་པོ་ཚོ། འདི་ལྟར་བུད་སོང་ན་ཆོག་ནི་ཨེ་རེད། ལན་ཞིག་ཐོབས་དང་། ངོ་གདོང་སྨུག་པོ།
ངོ་གདོང་སྨུག་པོ། བརྩེ་བ་ཐེད་པོ།

དེ་རྗེས་ས་རཱའི་སློབ་ཟུར་སྙན་ངག་པ་ཨ་བྱམས་ཀྱིས་ཁོ་ལ་དམིགས་བསལ་བསམ་ཚུལ་བཤད་ཀྱི་མེད་ལ།  སྙན་ངག་པའང་མིན་མོད་སྙན་ངག་ཀློག་པར་མོས་པ་ཆེ་བ་དང་སྙན་ངག་བཀླགས་ན་ཁྱེད་སྙན་ངག་པ་དག་ཀྱང་ང་ལ་འགྲན་ཐུབ་ཀྱི་མ་རེད་སྙམ་པའི་གདེང་ཚོད་ཡོད། དེའི་ཆ་ནས་ད་ཐེངས་ངའི་སྙན་ངག་གཉིས་གྱེར་འདོན་ཞུ་རྒྱུ་ཡིན།  དང་པོ་དེ་སྙན་ངག་པ་དུར་ཐང་གི་སྙན་ངག  <<མདུན་ལམ་ནག་པོ།  ཁ་དོག་ལྗང་ཁུ།>>ཞེས་པ་དེ་དང་གཞིས་བཞུགས་སྙན་ངག་པ་མདའ་བཙན་པོའི་བརྩེ་དུང་སྙན་ངག་ཅིག་ཡིོན་ཞེས་སྙན་ངག་གཉིས་རིམ་པར་གྱེར་ཞིང་སྙན་ངག་པ་རྣམས་ལ་ཡིད་འགུལ་ཐེབས་བཅུག་པ་མ་ཟད།  ཧབ་ཆའང་སྐག་དིར་རི་བཏང་སོང་བས།  གནམ་ངོ་དང་བརྗོད་བྱ། ཚོར་སྣང་ཡོད་ཚད་འཐིབས་ཤིང་ལྗིད་ཏིག་གེར་ཡོད་དེ་སྐད་ཅིག་ལས་སངས་པ་ལྟ་བུ་ཞིག་གིས།  དེ་ནི་ཉིན་འདིའི་འཕྲོད་བསྟེན་དཔེ་མེད་ཅིག་ལ་གྱུར།
མདུན་ལམ་ནག་པོ  ཁ་དོག་ལྗང་ཁུ……..དུར་བྱང་།_{(དཔའ་རྒོད་གླིང་ཚ་ཚེ་བརྟན་རྡོ་རྗེ་ལ་ཕུལ་བ།)}
ཉིན་མ་དེར
ཁྱེད་ཀྱི་རླུང་བུ་ལ་ངར་ཤུགས་ཆེ་དྲགས་པས
ཁྱེད་ཀྱི་ཟླ་བ་ལ་འོད་མདངས་གསལ་དྲགས་པས
ལྗོན་པ་དག་བསྒུལ་དུ་བཅུག
སྐར་ཚོགས་དག་འདར་དུ་བཅུག
འདབ་ལོ་ཡོམ་ཡོམ་འདྲ
ཁ་དོག་འཚེར་འཚེར་འདྲ
བདག་གིས་སྔ་མོ་ནས
རི་བོ་དེར་སེམས་ཀྱིས་ཉན་ཡོད
མྱི་ཚོགས་དེར་ལྐོག་ནས་བལྟས་ཡོད
ཁྱོད་སོང་ཤུལ་དུ
བདག་ཁོ་ནས
མདུན་ལམ་ནག་པོ་ཞིག་ལ་སྟ་གོན་བྱས་ཏེ
ཁ་དོག་ལྗང་ཁུ་ཞིག་ལ་ཚོད་དཔོག་བྱས་ཡོད
དེ་ནི་དེ་ཙམ་དུ་ཟད་ཀྱི
ཁྱོད་བོར་ཤུལ་ནས
བདག་གི་ཚོད་དཔོག་ཁྲོད་ཀྱི་མྱི་དེ་ཚོ
སེམས་ཀྱི་ལྡོག་ལམ་དུ་མཆིས་ཤིང
མིག་གི་སྤྱོད་ཡུལ་ཙམ་དུ་བྲེལ་ཏེ
རྟག་པར་ཕྱི་ཡི་མཛེས་བཟོ་ལ་འཐམས
སྐག་རྩི་དང་སྐག་ཚོན་དག་གི་འགྲོ་གྲོན་ནི་ཚབས་ཆེན་རེད
དེ་ལྟ་ནའང
ཡོད་ཚད་རང་ཉིད་ཀྱི་ཕྲག་ཏུ་ལོངས1“ཡིད་ཀྱི་སྟ་གོན་སྔར་ནས་བྱས་འདུག”པས
འགོ་རྩོམ་ས་དེ་ནས་དཔའ་མ་ཞུམ་ལགས
ཐོག་མའི་ཁ་ཕོ་དང་འགལ་འདུག་པས
དེང་སང་ཁྱོད་གང་དུ་ཡོད
ས་མིང་དེ་མི་ཡུལ་གྱི་ས་ཁྲའི་ངོས་སུ་མི་གསལ
ཐ་སྙད་དེ་འཛམ་གླིང་གི་སྐད་མཛོད་གསེབ་ནས་མ་རྙེད
ད་ལྟ
ཁྱོད་ཀྱི་མྱི་རྣམས་རྨོངས་འདུག
ཡོད་ཚད་ལ་རྨོངས་འདུག
མཐའ་ན་ཁྱེད་ཉིད་ལའང་རྨོངས་འདུག
རྨོངས་པ་ནི་ཚབས་ཆེན་རེད2013.8.8
_{༡ (“ཡིད་ཀྱི་སྟ་གོན་སྔར་ནས་བྱས་འདུག”ཅེས་པ་འདི་སྙན་ངག་པ་གྲགས་ཆེན་ལྗང་བུའི་ཚིག་གཡར་བ་ཡིན།)}

དེ་རྗེས་ནོར་གླིང་སློབ་ཟུར་སྙན་ངག་པ་རྫ་སྲས་བདེ་ཆེན་གྱིས་ཀྱང་བསམ་ཚུལ་དམིགས་བསལ་མེད་ཅེས་ཟུར་ཁ་དང་ཚོར་སྣང་གིས་གཏམས་པའི་སྙན་ངག་འདི་གྱེར་འདོན་བྱས་སོང་།
འདི་སྐད་བདག་གིས་འབྲི་འདོད་པ།
རྫ་སྲས་བདེ་ཆེན།
རི་བོ་དང་སེམས་པའི་ཟུར་ལ
དྲག་ཆར་ཚད་མེད་དུ་བབས་པ་གཅིག་པུ་མ་ཡིན་པར
དབྱར་ཁ་ཁོ་ན་ཡིན་པའི་མཆུ་ཏོ་དག་སྲིང་ལམ་དུ་ཡང་ཡང་འཐོར་ཡོང་བས་ན
ང་ལ་མིག་ཆུ་གཏོང་ཁུལ་དང་ཐལ་མོ་སྦྱོར་ཁུལ་བྱེད་པའི་ཁོམ་པ་མི་འདུག
དགོངས་པ་མ་ཚོམ    ངས་སྙག་ངག་འབྲི་དགོས

བསྟོད་པ་ཞིག་བྱུང་ན་ཅི་མ་རུང་སྙམ་པའི་མིག་ཟུང་དེས
མིག་ཟུང་དེས་བདག་ལ་གཟིགས་པ་མ་གནང
ང་ལ་ཁྱོད་ཀྱིས་འཚོལ་བཞིན་པའི་འོད་སྣང་དེ་མེད
དགོངས་པ་མ་ཚོམ ངས་སྙན་ངག་འབྲི་དགོས

མིག་ཆུ་ལ་ན་ཟུག་གང་ཡང་མེད་ས་ནས
འཛུམ་མདངས་ལ་རིན་ཐང་ཅི་ཡང་མེད་ས་ནས
རླུང་ཁོ་ན་འུར་འུར་གྱིས་ལྡང་ཞིང་ལྡང་བཞིན་པའི་ཡུལ་གྲུ་ནས
འུ་ཚོས  ཐ་ན་སྙན་ངག་ཅེས་བྱ་བ་ཞིག་ཀྱང་འབྲི་ཐུབ་བམ
ཡང་ན འུ་ཚོས་མ་མཐའ་ཡང་སྙན་ངག་ཟེར་བ་དེ་འབྲི་དགོས་སམ
༢༠༡༣/8/10 ཞོགས་པར་རྡ་ས་ནས་སྙན་ངག་གི་འདུ་འཛོམས་ཐེངས་བཞི་པར་ཆེད་དུ་བྲིས།

དེ་རྗེས་ས་རཱའི་སློབ་ཟུར་དང་སྨོན་ལམ་བརྡ་འཕྲིན་ཞིབ་འཇུག་ཁང་གི་སྙན་ངག་པ་སྨིན་སྣང་མཛེས་ཀྱིས་ཁོ་མོའི་དུངས་པ་དང་དགའ་ཞེན་དབང་གིས་གཞིས་བཞུགས་སྙན་ངག་པ་འཇུ་སྐལ་བཟང་གི་སྙན་ངག་ཅིག་གྱེར་འདོན་ཞུ་རྒྱུ་ཞེས།  བློ་ཐོག་ནས་སྒེག་པའི་ཉམས་དང་བཅས་ཏེ་སྐྱོར་བ་དེས་ཀྱང་སྙན་ངག་པ་རྣམས་ཀྱིས་མིག་ཟུང་ཧེད་ཅིང་སྙིང་ཆུང་ལྡང་བར་བྱས།  འོག་གི་སྙན་ངག་འདི་ནི་ཉིན་དེར་ཁོ་མོའི་ཁྱེར་ཡོང་བའི་སྙན་ངག་རེད།
སེམས་ཀྱི་སྐྱེལ་མ།
སྨིན་སྣང་མཛེས།
ས་ཆེན་སྨུག་པས་བཟུང་བའི་དགོང་མོ་དེ་ལ།།
ངོ་གདོང་ཆར་ཆུས་བརླན་པའི་འབབ་ཚིགས་དེ་ལ།།
རྒྱང་བཞུད་གྲོགས་པོ་སྐྱེལ་བའི་གྱེས་ཕྱག་ཁྲོད་དུ།།
སེམས་པ་གློ་བུར་གཅོང་གིས་མནར་ནས་བུད་ཐ།།
མི་ཚོགས་འདུ་འོང་རྒོད་པའི་ས་གནས་དེ་ལ།།
རླངས་འཁོར་ལྡིར་སྒྲའི་ཁེངས་པའི་འབབ་ཚིགས་དེ་ལ།།
གཉེན་ཉེ་གྲོགས་པོའི་སེམས་ཀྱི་ཁ་བཏགས་ཀློང་ན།།
གྲོགས་ཁྱེད་བསམ་དོན་འགྲུབ་པའི་རྟགས་ཤིག་མངོན་འདུག།
སྐྲ་ལོ་རླུང་གིས་གཟེད་པའི་ཆར་དུས་དེ་ལ།།
སེམས་པ་མིག་ཆུས་བརླན་པའི་འབབ་ཚིགས་དེ་ལ།།
ཡུན་རིང་འགྲོགས་པའི་གྲོགས་ཀྱི་གྱེས་ཕྱག་གཙང་མ།།
སེམས་པ་སྐྱོ་བས་མནར་བའི་གཞི་མ་ཡིན་འགྲོ།
རྒྱང་བཞུད་གྲོགས་ལ་སེམས་ཀྱི་དམིགས་འདུན་ལོས་ཡོད།།
ཤུལ་ལུས་ང་ཚོར་བྲལ་བའི་གདུང་བ་ལོས་ཡོད།།
འདུ་འབྲལ་སེམས་ཀྱིས་མྱོང་བའི་འཇིག་རྟེན་ལྟད་མོ།།
རླངས་འཁོར་འབབ་ཚུགས་འདི་ན་གསལ་ལེར་མངོན་འདུག།
ཁྱེད་ཉིད་འགྲོ་ས་འདུག་སའི་ས་ཕྱོགས་གང་ནས།།
བསམ་དོན་ཐམས་ཅད་ཡར་ངོས་ཟླ་ལྟར་འཕེལ་ཞིང་།།
འདོད་དོན་ཐམས་ཅད་གེགས་མེད་ལྷུན་གྱིས་གྲུབ་པའི།།
གསོལ་བ་སྨོན་ལམ་སྙིང་ནས་ཡང་ཡང་འདེབས་སོ།།
ཞེས་སྤྱི་ལོ༢༠༡༣ལོའི་ཟླ་༧ཚེས༢༣ཉིན། གྲོགས་པོ་ཞིག་ལ་སྐྱེལ་མ་བྱས་རྗེས།

དེ་རྗེས་ནོར་གླིང་སློབ་ཟུར་སྙན་ངག་པ་ཁྲོ་གཏུམ་གྱིས་སྙན་ངག་གྱེར་འདོན་དག་ནི་སྒྲ་གདངས་རིགས་གཅིག་གིས་གྱེར་འདོན་བྱེད་ཀྱིན་འདུག  དེ་འདྲ་རང་ཨེ་ཡིན་སྙམ་ཞེས་ཁོ་རང་གིས་དངོས་གནས་སྒྲ་གདངས་ཡ་མཚན་ཞིག་གིས་འོག་གི་སྙན་ངག་ཡ་མཚན་དེ་གྱེར་བས་སྙན་ངག་པ་རྣམས་ཀྱིས་རོལ་མྱོང་དམིགས་བསལ་བ་ཞིག་མྱོང་རྒྱུ་བྱུང་།
གོ་ལོག་མིན་ན་ཁྱོད་རང་བོར་སོང་ཟེར།
ཁྲོ་གཏུམ།
—འཕྲུལ་ཆས་ཀྱི་ཡོ་ལང་ཁྲོད་ནས་རྐང་ཐང་གི་རིན་དོད་གངས་འདབས་སུ་འཐེན་པའི་མི་འགྱུར་གངས་ཕྲུག་ལ་ཕུལ།
དྲ་ཚིགས་ཀྱི་ངོས་སུ
ཁྱོད་རང་གི་རྐང་རྗེས་མི་འཇོག་དོན་ཅི་ཡིན
སྔོན་ཆད་ཁྱོད་རང་ཉིན་རྒྱུན་སླེབས་པ་འདྲ
རྐང་ཐང་བརྡར་ནས
གང་ལ་བུད་སོང
ག་རེ་བྱས་སོང
དྲན་སྒོ་ནས་གཅུ་ལོག་རེ་རྒྱག་པའི་དུས
རྡོག་མཁྲེས་འཁུར་བའི་རྒྱབ་གཟུགས་ཙམ་གྱིས
དྲན་སྣང་ལ་རམ་འདེགས་བྱས་རུང
ངས་ད་དུང་ཁྱོད་ཉིད་རིག་འདོད་པ་ཞིག་གིས
དྲ་ཚིགས་མྱུལ་བ་ཡིན
ས་ཆེན་པོ་གོམ་པས་གཞལ་བའི་རྣོ་ལྕགས་ཀྱི་དམ་བཅའ
ཧི་མ་ལའི་རྫ་འདབས་ནས་དབུ་བཙུགས་ཤིང
གངས་རིའི་འདབས་རོལ་ལ་བཞུད་པའི་དུས་ཙ་ན
མི་གཅིག་གིས་ཅི་ཞིག་འཇོན་ཟེར
ཁ་སང་དེ་རིང
སྦྲ་རྒན་ནག་ལྡང་ཚང་ནས་མི་མཐོང་ལ
རྨོག་རིའི་དྲ་ལམ་ཁྲོད་ནས་མི་རྙེད་པའི་ཁྱེད
ཤེས་རབ་ཀྱི་ནམ་མཁར་བསྐོར་ཞིང
ཁྱོད་སར་འཁོར་བའི་ནམ་མཁའ་འདི་ནི
ཁྱོད་ལ་གཏད་པའི་ཨམ་མཆོག་གི་རེ་བ་དང
ཁྱོད་ཀྱི་བློས་གཏོང་གི་བྱ་གཞག་དག་ལ་གདུང་སེམས་བསྐྱེད་པ་ཞིག
མི་སེམས་རྙེད་མི་ཐུབ་པའི་རྡ་ས་ན
རླབས་ཆེ་བའི་སེམས་དཔའ་ཁྱོད་ལ་མཇུག་གནོན་ཡོད་དམ
ངས་ནི་ཅི་ཡང་མ་མཐོང
ཨ གླིང་ཚ་ཡ
ཚེ་སྲོག་གི་རིན་ཐང
སྙིང་སྟོབས་ཀྱི་ངར་ལྕགས
སྡུག་རུས་ཀྱི་ཆུ་རྒྱུན
མདུན་བསྐྱོད་བྱས་མཐར་གང་ལ་བུད་སོང
གོ་ལོག་མིན་ན་ཁྱོད་རང་བོར་སོང་ཟེར
མི་བོར་བའི་གཏམ་རྒྱུད་ཁྲོད་ནས
མི་བདག་སུ་ཞིག་གིས
ས་བཙལ་གནམ་བཙལ་མ་བྱས་པ་ཞིག་ཡོད་དམ
ཡིན་ནའང
གྲགས་འགུལ་མེད་པའི་ཡུལ་ལུང་ཁ་མང་འདིར
ཤེས་རབ་ཀྱི་ནམ་མཁར་ཕྱོགས་པ་ལས་གཞན་ཅི་ཞིག་མཆིས
མ་ཡོད་དེ ཁྱོད་ཀྱི་བླ་སྲོག་འཚོལ་མཁན་མི་འདུག
ཁྱོད་ལ་ལྐོག་ཉན་བྱེད་མཁན་མང་ཡང
ཁྱོད་ཀྱི་མིག་མདུན་ནས་མི་འགའ་བགད་ཡོད་ཀྱང
ཁ་སང་དེ་རིང་གི་དུས་ལ
ཡོད་ཚད་ཀྱིས་མགོ་བོ་རུམ་ལ་འཇུག་ཅི་ཐུབ་བྱས་འདུག
༢༠༢༣/8/8 ཉིན།

དེ་རྗེས་ས་རཱའི་མཐོ་སློབ་ཀྱི་སྙན་ངག་པ་ཀརྨ་རྣམ་དག་གིས་ཁོ་བོ་ཨ་རོགས་ཁམས་པའི་སྐད་འདི་སྙན་ངག་གྱེར་འདོན་ལ་དེ་ཙམ་བདེ་བོ་མེད་ལ་གྱེར་ཡང་མ་མྱོང་མོད།  དེ་རིང་ཚོར་བའི་འཕར་ཟུག་འོག་ནས་གྱེར་འདོད་ཆེན་པོ་བྱུང་ཞེས་འོག་གི་སྙན་ངག་འདི་གྱེར་འདོན་བྱས།
བྱང་བགྲོད་འགྲོན་པོ་ཁེར་རྐྱང་།
ཀརྨ་རྣམ་དག
ཁ་བཏགས་དང་མིག་ཆུའི་ཁྲོད་ནས།
ཁྱོད་རང་ཡང་བསྐྱར་ལམ་ལ་ཆས་སོང་།
ཆུང་མ་དང་བུ་ཕྲུག་པང་ནས་བཞག་སྟེ།
ཡབ་ཆེན་དང་ཡུམ་ཆེན་འཁྲིས་ནས་དོར་ཏེ།
ཁྱོད་རང་ཁེར་རྐྱང་གིས་      བྱང་ལམ་འདེད་བཞིན་ཐོན་སོང་།
རྐང་ཞབས་ན་ཆུ་བུར་རྡོལ་བཞིན།
ཁ་ལག་གི་སེར་ཁ་གས་བཞིན།
ངོ་གདོང་གི་ཤུན་པགས་རལ་བཞིན།
ཡང་སྙིང་ཁྱོད་རང་     སུ་ཞིག་གི་ཆེད་དུ་གང་ཞིག་ཏུ་བུད་སོང་།
གངས་རི་དེའི་ཆེད་དུ། རྩྭ་ཐང་དེའི་ཕྱིར་དུ།
ལས་དབང་འདིའི་སླད་དུ། མདོར་ན་མི་རིགས་འདིའི་དོན་དུ།
ཁྱོད་ཀྱིས་རང་སྲོག་སྤར་མོ་གང་བོ་གཏའ་མར་བཞག་སྟེ།
བརྩེ་དུང་གི་ཨ་ལོང་ལས་ཤོར་བའི་སེམས་འཕྲིན་དམར་པོ་འབྲི་མཚམས་བཅད་དེ་་་་་་་།
མྱིང་སྲིང་མང་པོའི་ཚེ་སྲོག་མེ་རུ་ཐིམ་པའི་སྔ་གཞུག་ཏུ།
དོན་ངོ་མར། གནས་འདི་དང་འདི་ནས།
རྣམ་ཤེས་ལྡོམ་པོ་དེ་ཚོའི་རྒྱབ་དཔུང་དུ་ལང་མཁན་ནི་ཁྱོད་ཁོ་ན་མ་ཡིན་ནམ།
ཐུགས་རྗེ་ཆེ།  ཕུ་བོ་ལགས། ངོ་མ་་་་་་།  བཀའ་དྲིན་ཆེ།
ཁྱེད་ཀྱིས། བཙན་པོའི་སྙིང་སྟོབས་ཁྱེར་ཏེ། ཁེར་བུར་ཆས་པའི་བློས་བཏང་དེས།
ཆོད་སེམས་དེས། གདེང་སྤོབས་དེས། བདག་ལ་རེ་བ་སྤར་བྱུང་།
ངར་ཤུགས་བསླངས་བྱུང་། སྤོབས་པ་བསྩལ་བྱུང་།  གཟི་བརྗིད་བསྣན་བྱུང་།
ཕུ་བོ་ལགས།  ངས་ཁྱེད་ཉིད་འཚོལ་བཞིན་པའི་རྒྱང་འབོད་འདི་ཨེ་ཚོར་གི
དུས་ད་ལྟ་ཁྱེད་རང་གང་ན་ཡོད། ཕུ་བོ་ལགས།
སྤྱིལོ་ ༢༠༡༣ ཟླ་ ༨ ཚེས་ ༨ ཉིན་སྡེ་དགེ་ཀརྨ་རྣམ་དག་གིས།

དེ་རྗེས་ནོར་གླིང་སློབ་ཟུར་སྙན་ངག་པ་ཨ་ཉོག་ལྕགས་རྡོས་གླིང་ཚ་བོར་བརླག་ཏུ་ཤོར་བ་ལ་ད་ལྟའི་བར་གྱི་དཔོན་ཆེན་མི་ཆེན་དག་གི་ཨ་མ་དང་ནང་མིར་སེམས་ཁྲལ་བྱེད་དགོས་པ་མ་རེད་ཅེས་ཁ་སྙན་མོ་བཤད་ཀྱིན་འདུག  ཡིན་ནའང་།  སེམས་ཁྲལ་ངེས་པར་བྱེད་དགོས་པ་རེད།  ནང་མི་ཙམ་མིན་པར་གཞུང་དང་མི་མང་ཚང་མས་སེམས་ཁྲལ་བྱེད་དགོས་པ་རེད།  འགྲོ་སྟངས་དེ་འདྲའི་ཞེད་སྣང་ཚ་བོ་དང་འགྲོ་ས་དེ་འདྲའི་ཞེད་སྣང་ཚ་བོ་ཞིག་ཡིན་པས་དེ་ལ་སེམས་ཁྲལ་མི་བྱེད་གང་ལ་བྱེད། སེམས་ཁྲལ་བྱས་ན་འདི་ལྟར་ལྷིང་འཇགས་ངང་བསྡད་ཀི་མ་རེད།  སེམས་ཁྲལ་བྱེད་དགོས་པ་རེད་ཅེས་དང་། སྙན་ངག་པ་རྣམས་ཀྱིས་སྙན་ངག་སྐྱོར་མི་ཤེས་ཞེས་ཞེ་བོ་ཞིག་བཤད་ཀི་འདུག ཚུལ་འཆོས་དེ་ལ་ང་ཧང་སངས་ཀྱིན་ཡོད། སོ་སོའི་སྙན་ངག་སོ་སོས་སྐྱོར་མི་ཤེས་ལབ་ན་ག་རེ་ཟེར་གི་ཡོད་རེད།  ང་ལ་མཚོན་ན་རང་ཉིད་ཀྱིས་བྲིས་པའི་སྙན་ངག་འདི་སྐྱོར་མི་ཤེས་པ་གང་ཡང་མི་འདུག་ཅེས་རང་མཐོང་གི་སྤོབས་དང་བཅས་འོག་གི་སྙན་ངག་འདི་སྐྱོར་བས་ཚང་མ་དལ་ཅག་གེར་བཏང་སོང་།
རྡ་ས་ནས་ཐོན་པའི་གླིང་ཚ།
_____”ཤེས་རབ་ཀྱི་ནམ་ཁར་ཕྱོགས་པའི་སྙན་ངག་གྱེར་འདོན་ཐེངས་བཞི་པ།  རྩོམ་པ་པོ་གླིང་ཚ་འཚོལ་བ” ཞེས་པར་ཆེད་དུ་བྲིས།
ཁྱོད་ལ་བསྟོད་པའི་སྙིང་རུས་བཙན་ཚུལ་དང་།།
ཁྱོད་ལ་སྡིགས་པའི་སྡར་རྟགས་ཐོན་ཚུལ་གྱིས།།
ཡིན་མིན་གཏམ་གྱིས་ཉོག་ལུད་མི་བཞུར་བར།།
བདག་གིས་ཁྱོད་དང་རྡ་སའི་གསང་རེ་འཚོལ།།
བརྩེ་བ་ལོང་ལ་བརྒྱུས་པའི་མཛའ་གཞས་དེ།།
ཡིད་འཐད་བུ་མོའི་མགུལ་ལ་ལེན་པའི་དུས།།
གསོམ་ཤིང་གཡུ་ལོ་འཐབ་པའི་རྡ་སའི་ཁྲོམ།།
དཀར་དམར་མེ་ཏོག་ལོ་མས་ཅི་འདྲ་མཛེས།།
ཡ་ཁོག་ངར་གྱིས་བརྒྱངས་པའི་ཀི་བསྭོ་སྐད།།
ལྷ་སའི་གསང་ཁང་དབུ་ནས་འཕྱུར་བ་ལས།།
ཆོལ་གསུམ་ཟིང་ཟིང་ཁོལ་བའི་དོན་རྐྱེན་དེ།།
རྡ་སའི་གསེང་ནས་འུར་དུས་ཅི་འདྲ་བརྗིད།།
ཀི་སྐད་རྡོ་ལ་བརྡབས་པའི་མེ་ལྕེའི་རླབས།།
གཅེས་ལུས་ཤ་ལ་འཆེད་པའི་ཚ་ངབ་ཀྱིས།།
ཕ་སའི་རུས་རྐང་ཚག་ཚག་བསྲེགས་པ་ན།།
རྡ་སའི་མི་ཚོགས་ངུ་སྟངས་ཅི་འདྲ་འདར།།
ལྕགས་ནག་ཚེར་མ་གཟེང་བའི་ལམ་རིང་དེ།།
རྐང་རུས་གཅེར་རྗེན་མ་ཡིས་ཉུལ་བའི་དུས།།
འཇིགས་རུང་སྒྱུ་མའི་གར་ལ་ཁ་འདྲེས་ཅན།།
རྡ་སའི་མཚམས་མེད་ཁ་དམག་ཅི་འདྲ་ངར།།
རྡ་སའི་རི་གྲོང་ཆར་ཆུས་བརླན་ངོགས་ནས།།
ཆར་བའི་ཤུགས་སྒྲ་རྣ་བར་གཟན་སོང་ཞེས།།
ཡིད་སུན་སྐྱོ་ངལ་ངག་གིས་མཐུ་འབོད་ལས།།
རྒྱང་བཞུད་གླུ་སྐད་ཡལ་ལུགས་ཅི་འདྲ་རེད།།
གང་གི་མུ་མཐའ་ཀུན་ལ་གཞིགས་གཞིག་ན།།
ད་གཟོད་རྡོ་གོང་འདྲ་བའི་ཚིག་ཆད་འགའ།།
ངང་གིས་ཐོན་པའི་ངག་གཤིས་གྱོང་པོ་ལས།།
དེ་རིང་གླིང་ཚ་ཁྱོད་ལའང་འདི་ཚོ་བཏེགས།།
༢༠༡༣ ༨ ༡༠ ཉིན།   ཨ་ཉོག་ལྕགས་རྡོས།

དེ་རྗེས་སྐད་ཡིག་རྒྱུན་འཛིན་ཚོགས་པའི་ཚོགས་གཙོ་འབྲོག་རུ་ཆོས་དར་གྱིས་སྐུ་འཆམ་ཅུང་བཞེས་པའི་རྐྱེན་གྱིས་སྐད་མགོ་དམའ་མོ་དང་ཉམ་ཆུང་བའི་རྣམ་པར་མིག་བཙུམ་ནས་སྙན་ངག་འདི་སྐྱོར་ཏེ་ཕྱིན་སོང་།
རྒོད་པོ་མཐུར་མེད།
འབྲོག་རུ་ཆོས་དར།
ནམ་མཁར་དུ་སྤྲིན་འཁྲིགས་ཤིང་རྒོད་པོའི་འཕུར་ལྡིང་རྒོད།
ངུ་སྐད་འཇགས་མ་མྱོང་བའི་མི་ཡུལ་གྱི་གྲུ་ཟུར་དེ་ན།
འཇིགས་སུ་རུང་བའི་གཡུལ་ས་བཙན་པོ་ཞིག
ཤེས་རིག་གི་མཚོན་ཆ་ཐོགས་པའི་གྱད་མི་དག
གནས་དེ་ན།    གནས་དེ་ན།
ཡོད་ཚད་ཀྱི་སྲོག་ཤིང་དུ་གྱུར་བའི་གནམ་འདེགས་ཀ་བ།
འདི་ནི་ཁྱེད་ཀྱི་རང་གཤིས་ཨེ་ཡིན།
སེམས་བསམ་པའི་སྟེང་ནས།
ཁྱེད་ལ་བསྔགས་བརྗོད་ཀྱི་མེ་ཏོག་གཏོར་བསམ་ཡང་།
ངས་ཅི་ལྟར་བཙལ་ཡང་།
ཁྱེད་ལ་རན་པའི་དཔེ་འཇོག་ཅིག་མ་རྙེད་པའི་དབང་གིས།
མགོ་བོ་ཡར་ལ་དགྱེ་དུས།
ངོ་ཚ་ཡིད་ལ་ཤར་བྱུང་།
དུས་དེ་ནས་བཟུང་།
ཤེས་རིག་གིས་བསྐྱངས་པའི་རྒོད་པོ་མཐུར་མེད་ཀྱི་ལོ་རྒྱུས་འདི་དང་ལེན་བྱས།

དེ་རྗེས་ཧིན་རྡུའི་སྙན་ངག་པ་འཆི་མེད་གཡུང་དྲུང་གིས་<<བོད། ང་ཡི་ཕ་ཡུལ>>ཞེས་པའི་ཧན་རྡུའི་སྙན་ངག་ཅིག་དང་མེར་བསྲེགས་སྐོར་ལ་བྲིས་པའི་སྙན་ངག་ཅིག་བཅས་ཧིན་སྐད་ནང་གྱེར་འདོན་དང་།  འགྲེལ་བརྗོད་བྱས་སོང་མོད།  མ་ཕྱི་མ་རག་པས་འདིར་འགོད་ཐབས་མ་བྱུང་། ད་དུང་སྙན་ངག་པ་ལྗང་ལོས་ཀྱང་བཙན་བྱོལ་ནང་སྦིར་གྲགས་བྱུང་བའི་སྙན་ངག་ཅིག་གི་རྗེས་ཀྱི་ཚོར་སྣང་དང་འབྲེལ་བའི་སྙན་ངག་ཅིག་གྱེར་འདོན་བྱས་སོང་མོད།  མ་ཕྱི་མ་རག་པས་འདིར་མ་བཀོད།

དེ་རྗེས་ཐེངས་འདིའི་བཀོད་སྒྲིག་པ་དང་བོད་མི་མང་སྤྱི་འཐུས་སྙན་ངག་པ་རིག་པའི་ཁུ་བྱུག་གིས། དེ་རིང་བདག་གིས་ངེད་ཟུང་གི་འདུ་འཛོམས་འདི་ལ་ཆེད་དུ་རྒྱ་གར་ལྷོ་ཕྱོགས་ནས་བསྐུར་ཡོང་བའི་སྙན་ངག་པ་གྲོང་གསེབ་བུ་མོའི་སྙན་ངག་མར་མེ་ཆུང་ཆུང་ཞེས་པ་འདི་གྱེར་འདོན་ཞུ་རྒྱུ་ཡིན། ཡིན་ནའང་། སྙན་ངག་ཟེར་བ་འདི་ཚོར་བ་ཡོད་པའི་སྒོ་ནས་སྐྱོར་དགོས་པ་ཞིག་ཡིན་པས། ངས་ཁོ་མོའི་ཚོར་སྣང་ལ་མྱོང་ཞུགས་ཞུ་ཐུབ་རྒྱུ་མ་རེད་ཅེས་ཀུ་རེ་དང་བཅས་སྙན་ངག་འདི་གྱེར་འདོན་བྱས་སོང་།
མར་མེ་ཆུང་ཆུང་།
གྲོང་གསེབ་བུ་མོ།
མར་མེ་ཆུང་ཆུང་།
བསིལ་རླུང་འཇམ་པོ་ཞིག་གིས།
ཁྱེད་རང་དལ་གྱིས་གཡོ་བར་བྱས་ཤིང་།
འོད་ལམ་མེར་བདག་གི་ངོ་གདོང་ལ་འཚེར་དུས།
ང་ཁྱེད་ཀྱི་འོད་སྣང་གི་འཇིག་རྟེན་དུ་ཡུན་རིང་ལུས།
མར་མེ་ཆུང་ཆུང་།
རླུང་བུ་ལྡང་ཕྱོགས་ཤིག་གིས།
ཁྱོད་ཉིད་ཡོམ་ཡོམ་དུ་འདར་ཞིང་།
མུན་ནག་གིས་བསྒྲིབས་ཕྱིར།
ངས་རེ་སྒུག་གིས་ཅེར་བའི་མིག་ཟུང་ལོང་བར་གྱུར།
མར་མེ་ཆུང་ཆུང་།
རླུང་བུ་ཇི་ལྟར་ལྡང་ཡང་རུང་།
འོད་སྣང་དང་མུན་པ་གང་དུའང་།
ཁྱོད་ཉིད་བདག་གི་སེམས་ཁོངས་ན་ཟད་མེད་དུ་འབར་ལ།
ཁྱོད་ཉིད་བདག་གི་མིག་གོང་ན་མཛེས་སྡུག་གིས་འཚོ་ཆོག
མར་མེ་ཆུང་ཆུང་།
ཁ་སང་གི་ལོ་ཟླ་སེམས་ཀྱིས་ཀློག་བཞིན།
དེ་རིང་གི་གྱེས་བྲལ་མིག་གོང་དུ་བསུ་དུས།
འབྱུང་འགྱུར་ལ་རེ་བ་མེད་པ་ཤེས་མོད་ཀྱང་།
འཇིག་རྟེན་གྱི་བྱ་བར་ཡ་མཚན་དོན་ཅི།
མར་མེ་ཆུང་ཆུང་།
བདག་ཡིད་ཀྱི་འོད་སྣང་ཟླུམ་པོ—བདེ་མོ་བྱོས།
ཁྱེད་རང་ནམ་ཡང་བདག་སེམས་སུ་བཞུར་བའི།
སྐྱོ་གདོང་གི་མིག་ཆུ་རྡོག་གཅིག
འགྱུར་མི་སྲིད་པའི་བརྩེ་དུང་གསོན་པོ།
སུ་ཞིག་ལ་བཅིངས་པའི་སླད་མེད་ཀྱི་སེམས་པ་ཡིན།
དེ་རྗེས་བདག་གིས་རྒྱ་གར་ཅན་རྡི་སྒར་གྱི་སྨན་ཁང་ལ་བཞུགས་པའི་སྙན་ངག་པ་གཅེར་བུ་བས་ཆེད་དུ་འདུ་འཛོམས་འདིར་བཏང་བའི་སྙན་ངག་འདི་བདག་གིས་གྱེར་འདོན་བྱས་པ་ཡིན། བདག་ལ་སྙན་ངག་གྱེར་འདོན་གྱི་སྐད་གདངས་སོགས་གང་ཡང་མེད་མོད། སྙན་ངག་པའི་ཚིག་རྩལ་དང་སྡེབ་སྦྱོར་གྱིས་སྙན་ངག་པ་རྣམས་ཀྱི་ཡིད་སེམས་དབང་མེད་དུ་འཕྲོག་ཏེ། ངས་སྙན་ངག་སྐྱོར་ཚར་རྗེས་ཀྱང་སྙན་ངག་པ་རྣམས་ཀྱི་སྐར་ཆེན་ལྟ་བུ་མིག་ཟུང་དག་ང་ལ་གདེང་ནས་བསྡད་འདུག

གླིང་ཚ་སེམས་པས་མཇལ་ན།
གཅེར་བུ་བ།____ཞི་བའི་གོམ་བགྲོད་པ་གླིང་ཚ་ལ་ཕུལ་བ།
རྡོག་སྣེ་ནས་འོད་ཅིག་འཕྲོས་སོང་ཉི་འོད་གཉོམ་སོང་།།
སྙིང་རྩ་ནས་སྟོབས་ཤིག་འཕག་སོང་ས་གཞི་བསྒུལ་སོང་།།
བློས་བཏང་གིས་རྒྱལ་ས་ཟིན་སོང་སྤྱི་དོན་ཆེད་དུ།།
བཙན་པོ་ཡི་དབུ་རྨོག་གྱོན་སོང་ད་དུང་མ་རྙིང་།།
རྒྱ་བལ་གྱི་འཕྲང་ལམ་དོག་མོ་རྐང་པས་འཇུ་དུས།།
ཚ་གདུང་གི་ངལ་དུབ་དག་གིས་མགོ་བོ་མ་སྨད།།
གསེར་ནག་གིས་གན་རྡུང་བྱས་འདྲའི་ཞག་ནག་གྱ་གསུམ།།
སུ་ཞིག་གི་ཆེད་དུ་བསྟབས་པའི་ནོམ་པ་ཡིན་ནམ།།
དབུ་ལམ་དང་རང་བཙན་སྣེ་མོར་མགོ་བདེ་མ་འཁྲབ།།
ནུབ་གླིང་ནས་ལྟོ་བའི་འཐབ་རྩོད་རྒྱབ་ཏུ་བསྐྱུར་ནས།།
སྤྱི་དོན་ལ་སྒེར་གྱི་ཕྲག་པས་ནུས་ཤུགས་འདེགས་མཁན།།
སེམས་དཔའ་ཁྱོས་བློ་གཤོག་འདི་ལ་ཐོགས་རྡིབ་མི་མངའ།།
ལམ་རྒྱགས་དག་ལམ་ནས་འཁེལ་སའི་རྐང་འཁོར་ཆུང་ཆུང་།།
འཁོར་ལོ་ཟུང་ཟད་ནས་འཇམ་ཆས་ངོས་ཀུན་ཟིན་ཅིང་།།
ཉིན་ལྟར་དུ་ལམ་མང་བདས་པའི་རྐང་ཆུང་ལེབ་མོ།།
ཆུ་བུར་དང་སྐྲང་གཟུགས་ཁུར་ཡང་བགྲོད་མཚམས་མ་བཞག།
ལ་ཞེན་གྱི་ཟུང་ཁྲག་རྒྱུ་སྟངས་འདི་འདྲ་མགྱོགས་པ།།
བདེན་སྟོབས་ལ་ཡིད་ཆེས་བརྙེས་པ་འདི་འདྲ་གཙང་བ།།
འདང་ཆེན་གྱི་བུ་དང་ཆུང་མ་ཡན་ཆད་དོར་བའི།།
རྒྱུད་རིམ་དེ་མི་སྔར་མཐོང་དུས་སེམས་ཁ་འཆོལ་འགྲོ།།
བཙོན་ཁང་གི་མནར་གཅོད་ཇི་འདྲ་ཡིད་ཁར་མངོན་ཡང་།།
སྙིང་ཤུགས་ཀྱིས་སེམས་སུ་བརྒྱབ་པའི་རྡོ་རྗེ་མདུད་པ།།
རང་རིགས་ལ་ཞེན་པ་དཀར་པོའི་གཟུགས་སུ་འཕོས་པས།།
འཚེ་མེད་ཀྱི་སྟོབས་ཤུགས་འདི་ཡང་སྲ་རུ་བཏང་འདྲ།།
དགའ་ཞེན་གྱི་དབང་ཤུགས་འདི་ལ་སྟོབས་ཤིག་ཡོད་ངེས།།
བར་མཚམས་དང་མཐོ་དམའ་མེད་པའི་སྟོབས་ཤིག་ཡོད་ངེས།།
རང་ཉིད་ཀྱི་གོ་སར་རང་ཉིད་ཀེར་གྱིས་ལངས་ཏེ།།
ཡོད་ཚད་ལ་དྲང་སྙོམས་སྤོབས་པ་བདག་གི་སྟོབས་ཡིན།།
རང་དབང་གི་འཐབ་རྩོད་དཔའ་བའི་(ཀིང་)གི་ལངས་ཕྱོགས།།
མདེལ་ཁ་ནས་བདག་གི་སྟོབས་ཤུགས་ཤེད་ཀྱིས་ངོམ་སྟེ།།
འདྲ་མཉམ་གྱི་འཚོ་བ་གསོན་པོའི་དབུགས་ཐག་རིང་པོ།།
གདོང་དམར་བའི་བྲང་ཁོག་ནང་དུ་ད་ཐེངས་འཁྲུངས་འདྲ།།
བདེན་པ་ལ་ཨུ་ཚུགས་བསྟེན་པའི་གྲུ་རྫིངས་དེ་ཡིས།།
བཙན་གནོན་གྱི་ཆུ་བོ་རབ་མེད་འཕྲད་དུ་བཅད་རྗེས།།
སེམས་དཔའ་ཡི་མཚན་གྱི་བ་དན་དགུང་དུ་བསྒྲེང་མཁན།།
གེན་དྷི་ཡིས་རྣམ་ཐར་སྐྱོང་བའི་བོད་རིགས་རྐང་གཅིག།
གླིང་ཆེན་གྱི་སུམ་གཉིས་དབང་བསྒྱུར་དམག་གིས་བྱས་ཤིང་།།
གསོད་གཏུབ་ཀྱི་སྙིང་ཁམས་རྒྱས་པའི་བཙན་པོ་ཁྱུ་ཞིག།
གནམ་མཐའ་ནས་གཟི་འོད་འབར་བཞིན་མཇའ་ལ་འཐིམ་ཡང་།།
དེ་རིང་གི་གྱང་ཆག་ཁྲོད་ནས་ཁྱེད་རང་རྙེད་སོང་།།
༢༠༡༣ ༦ ༡
ཐེངས་འདིའི་གྱེར་འདོན་སྟེང་སྙན་ངག་པ་ཁོ་ན་སུམ་ཅུར་ཉེ་བ་འབྱོར་བས་སྙན་ངག་འདུ་འཛོམས་གྲ་རྒྱས་ཤོས་ཤིག་ལ་གྱུར་ཡོད་མོད།  སྙན་ངག་པ་ཁ་ཤས་ངོ་ཚ་སྨིན་པོ་དང་སྐུ་འཆམ་བཞེས་པ་སོགས་ཀྱི་རྐྱེན་གྱིས་ཡོད་ཚད་ཀྱིས་དགོངས་ཚུལ་དང་གྱེར་འདོན་གྱི་ཆ་ཤས་བླངས་མ་སོང་།  ལྷག་པར་བུད་མེད་སྙན་ངག་པ་གཟུངས་འདུས་སྐྱིད་དང་ཁ་བའི་འབྲོག་མོ་དང་ སྐྲན། ཁ་བ་སྐམ་པོ་སོགས་ཀྱིས་སྙན་ངག་རེ་བྲིས་ནས་ཡོང་ཡོད་ནའང་གྱེར་འདོན་བྱས་མ་སོང་།  དེ་དག་གི་སྙན་ངག་ལས་མ་ཡིག་འབྱོར་བ་ཁག་འོག་ལ་བཀོད་ཡོད་སྙན་ངག་གི་མ་ཡིག་ང་ལ་མ་འབྱོར་བ་དག་དེ་རིང་དྲ་ཐོག་ལ་འགོད་ཐུབ་མ་སོང་།

བོར་མ་མྱོང་བའི་ཁྱེད།
གཟུངས་འདུས་སྐྱིད།
—-སེམས་ཀྱི་གླིང་ཚ་འཚོལ་བ།
གླེང་གཞི།

ཉི་ངོགས་ནས་སྐར་ངོགས་སུ་བསྐྱལ་ཞིང། སྐར་མའི་འཇིག་རྟེན་ནས་སེམས་ཁར་ཡང་ཡང་གླན་མྱོང་བའི་ཁྱེད། ངའི་མཁའ་དབྱིངས་དང་ནམ་མཁའ་ན་མཛེས་སྡུག་གིས་བཞད་པའི་རོགས་ཆུང་ལོ་བཞིན། དྲན་ཤིང་ལ་ན་ཟུག་དང་སྨྲེ་ངག་ལ་གཏན་ཚིགས་མངའ་བའི་ཁྱེད། ནམ་ཡང་སེམས་ནས་བོར་མ་མྱོང་བའི་ཁྱེད། ཟུངས་ཁྲག་ལ་འདྲེས་ནས་ཡོད་པ། ཟླ་བའི་མཐོང་ཡོད་ལ། སྐར་ཚོགས་ཀྱིས་ཀྱང་ཐོས་ཡོད་པ་གླེང་གིན་ཡིན།
གཅིག
ནངས་མོ་དེེར། སྙིང་ཉེ་ཞིང་སེམས་སོང་བའི་ཁྱེད་ཀྱིས་ཚེ་སྲོག་དང་རེ་བའི་ཁྲོད་ཀྱི་ཡོད་ཚད་ལ་ཕྱིར་མིག་དང་འཁྲེང་ཞེན་མེད་པར། རང་ཉིད་ཀྱིས་མི་ཐེག་པའི་རྡོག་ཁྲེས་ལྗིད་མོ་ཞིག་ཁུར་ཏེ་ལམ་ལ་ཆས་པ་ནས་བཟུང་། བདག་གི་དོན་ལྔ་སྣོད་དྲུག་དང་ཟུངས་ཁྲག་གི་བརྒྱུད་ལམ་རེ་རེར་ནམ་ཡང་ཡལ་མི་སྲིད་པའི་མེ་ཏོག་གི་རྐང་རྗེས་དག་ཕབ་ནས་བུད་སོང། དུས་དེ་ནས་ངའི་འགུལ་གྱིན་པའི་རྣམ་ཤེས་གསོན་པོས་ཉི་ནུབ་ཀྱི་བར་སྲུབས་རེ་ནས་ཁྱེད་ཉིད་བཙལ་ཞིང་ཁྱེད་ཉིད་གླེང་ན། སྒྱུ་འཕྲུལ་གྱི་འཇིག་རྟེན་འཁྲུལ་སྣང་གིས་འཁྱེར་བ་བཞིན། སེམས་ངོགས་སུ་འཁོར་ཡོང་བ་ནི། ཤ་གཟན་གང་ཞིག་གིས་མཆེ་བ་གཙིགས་པ་སོགས་མང་པོ་ཞིག་མང་པོ་ཞིག་དྲན་ནས་ཡོང་དུས་སེམས་འདི་བདེ་ལ་བབས་མ་མྱོང། ཁྱེད་ཀྱི་བླ་ན་མ་མཆིས་པའི་རླབས་ཆེན་གྱི་བློས་བཏང་ཡོད་ཚད་རུས་རྐང་ལ་ཟུག་ནས་ཡོང་ན། ད་གཟོད་ངས་རང་ཉིད་ཀྱི་རྩ་ཆེན་ཚེ་སྲོག་ལ་རིན་ཐང་མེད་པ་དང་གང་ཡང་མ་བྱས་པའི་ཁ་སང་། ཅི་ཡང་མ་འཇོན་པའི་དེ་རིང། ཅི་ཡང་བྱ་མི་ཐུབ་པའི་སང་ཉིན་སོགས་རེ་རེ་བཞིན་དྲན་ནས་ཡོད།
གཉིས།
སྐྱ་རེངས་དང་ལྷན་དུ། འཇིགས་རུང་གི་འབྲུག་སྒྲ་དང་བཅས་ཏེ་ན་བུན་གྱིས་མཁའ་དབྱིངས་བསྒྲིབས་ནས་དྲག་ཆར་དང་རླུང་འཚུབ་རྒོད་པའི་སྐབས་དེར། རྒྱལ་སྤྱིའི་གཞུང་ལམ་རིང་མོ་དེའི་སྟེང་ན་སེམས་ཀྱི་ཁྱེད་ཀྱི་འཁྱར་འཁྱོར་གྱི་གོམ་པའི་སྟངས་སྟབས་དང་དཀའ་ཚེགས་ཆེ་བའི་ལུས་ཀྱི་ཉམས་འགྱུར་དག ནུས་མེད་ང་“ལྟ་བ་རྒྱང་མཐོང་དང་ཉན་པ་རྣ་རིང”བཞིན་ཚང་མ་གོ་ནས། ཡོངས་རྫོགས་རིག་ནས་ཡོང་དུས། ངའི་ཕྱི་ལུས་ཆར་བའི་ནང་དུ་ལྷག་མེད་ཀྱང་སེམས་པ་ཆར་བས་སྦངས་ནས་ང་གནས་མལ་འདི་ནས་ལངས་མི་ཐུབ་ཀི ཡང་ཉིན་གུང་དེར་གོ་ལའི་སྒལ་གཞུང་ཚ་བས་འཕྱུར་ཡོང་ན་སེམས་ཀྱི་ཁྱེད། སྙིང་ཉེ་བའི་བདག་གི་གཅེས་ནོར་ཁྱེད། བདེན་པའི་རྡོག་ཁྲེས་ལྗིད་མོ་དང་རིགས་ཞེན་གྱི་བོད་ཆས་རྣལ་མ་ཞིག་གྱོན་ནས། ཤིང་སྡོང་རྐང་གཅིག་གི་གྲིབ་བསིལ་ཙམ་ཡང་མེད་པའི་ཚ་ངར་གྱི་ཁྲོད་ན། རྔུལ་ཆུ་ཁྲོམ་ཁྲོམ་དུ་གཏོར་གྱིན་རྨ་ཁའི་ན་ཟུག་ཟ་འཕྲུག་དང་བཅས་པ་བསྲན་གྱིས་སྒོམ་པ་སོགས། ཁྱོད་ཀྱི་དཀའ་ངལ་རེ་རེ་བཞིན་དྲན་ངོགས་སུ་རྒྱུ་ཡོང་དུས། ངའི་ལུས་ལ་ཚ་བ་མེད་ཀྱང་སེམས་ཆུང་ཕྲ་མོ་ཚ་བས་བསྲེགས་ནས་ཡོང་གི ད་དུང་སྲོད་དུས་ཀྱི་མུན་པས་འཇིག་རྟེན་དཀར་ངོགས་བསྒྲིབས་ཡོང་དུས་ཁྱེད་ཁེར་རྐྱང་གི་གོམ་སྒྲ་དང། མི་མེད་ཁྱིམ་སྟོང་གི་ལུང་ཁུག་དག་ན་ལྟོགས་སྐོམ་གྱི་འདར་ཟུག་ཇི་འདྲ་ཞིག་རྒྱག་གིན་པ། དགུང་གི་སྐར་ཚོགས་ཀྱིས་ཚོར་བ་ལས་ས་ཡ་དྲུག་གི་སྤྱན་ཟུང་རུབ་ནས་ཡོད་པ་དྲན་ཚེ། གནོང་འགྱོད་ཀྱི་སེམས་པས་ཀུན་ནས་བསླངས་ཏེ་གཉིད་མི་ཁུག་པའི་མཚན་མོ་ཤིན་ཏུ་ནས་མང་ལ། རང་སེམས་ན་ཉེས་པ་ཡོད་པས་ང་བར་དོ་ནས་ནམ་ཡང་གཉིད་ཁུག་ཐུབ་ནི་མ་རེད་སྙམ།
གསུམ།
ངའི་ཟུངས་ཁྲག་དང་གསོལ་འདེབས་ཁྲི་ཕྲག་གི་བར་ན། ནམ་ཡང་དཔའ་ངར་གྱིས་རྒྱུ་བཞིན་པའི་སྙིང་གི་ཁྱེད། སེམས་སོང་བའི་ཁྱེད་ཀྱི་ཚེ་སྲོག་དང་སང་ཉིན། རིགས་ཞེན་དང་ལ་རྒྱ་ཅན་གྱི་བོད་མི་ཚོས་བསྲུངས་མ་ཐུབ་པས། སྐྱབས་གནས་དཀོན་མཆོག་ལ་བཅོལ་དགོས་བྱུང། བོད་མི་སུ་ལ་ཡང་ཡོད་མ་མྱོང་པའི་རྩ་ཆེན་ཚེ་སྲོག་ལ་བར་ཆད་གང་གིས་ཀྱང་མི་གཅུན་པའི་སྨོན་འདུན་ཟབ་མོ་ཞིག་བཅོས་མིན་སེམས་ནས་འདེབས་ཞོར་འཆར་ཡན་གྱི་ཀློང་ལ། ཁྱེད་དང་ཁྱེད་ཀྱི་སང་ཉིན་སོགས་དྲན་ཚེ་ནུས་མེད་ཀྱི་ང། བཤད་མི་ཤེས་པའི་ཚོར་སྣང་ཞིག་གིས་འཇིག་རྟེན་སྡུག་བསྔལ་གྱི་གཞོང་བར་ལྷུང་ནས་ཡོད། སྙིང་ཉེ་བའི་བདག་གི་རོགས་ཆུང་ལོ། ཟླ་བ་ཁེར་འགྲོ་ཞིག་ལ་ངས་སེམས་ཀྱི་གནོང་འགྱོད་དང། ཡིད་ཀྱི་དུངས་ཀ བདེན་པའི་གཏམ་གླེང་། ཁྱེད་ཀྱི་ཚེ་སྲོག་གི་བདེ་འཇགས། འབྱུང་འགྱུར་གྱི་སྨོན་འདུན་སོགས་ཡོད་ཚད་ཅིག་བསྐུར་ནས་ཡོད།
མཇུག་གཏམ།
རིགས་མཐུན་གྱི་བདག་གི་ཡོད་ཚད་དེ། ཚེ་འདི་ཕྱི་གཉིས་ཀྱི་སྐྱབས་གནས་བླ་མ། ཁ་རྗེ་དབང་ཐང་ཅན་གྱི་གོང་གི་དཔོན་པོ། ཤེས་འཇོན་གཉིས་ལྡན་གྱི་མཁས་དབང་རིམ་བྱོན། རིགས་ཞེན་ལ་རྒྱ་ཅན་གྱི་ཤེས་ཡོན་པའི་སྡེ་ཚོ། ངའི་མི་རིགས་དང་བདག་གི་བོད་པ་ཞེས་སྟོང་གཏམ་གྱི་གདུང་དབྱངས་གཉོམ་པོ་རྒྱ་ཁང་གི་རྩེག་རིམ་བཞིན་བརྩེགས་ནས་ཅི་ལ་ཕན། ངེས་པ་དོན་གྱིས་འགྲོ་དགོས་ས་ཟིག་ལ་སོང་ནས། ཐོན་དགོས་ས་དེ་རུ་འཐོན་པར་བྱེད་ནས། ང་ཚོས་གནད་འགག་གི་སྣེ་དང་དཀའ་སྡུག་གི་ཀློང་ནས་ཅིས་ཀྱང་མཐུན་སྒྲིལ་དང་དཔུང་བ་མཉམ་གཤིབ་ཀྱིས་འཇིག་རྟེན་ནས་བོར་ཟིན་ཅིང་བདག་སེམས་ནས་བོར་མ་མྱོང་བའི་མི་རིགས་ཀྱི་དཔའ་རྒོད་ཁེར་འགྲོ་སྟེ། བརྩེ་འདང་ཟབ་བའི་བདག་སེམས་ཀྱི་བརྩེ་དུང་གི་རྒྱལ་སྲས་ཐོག་མ། རོགས་ཆུང་ལོ་ངེས་པར་དུ་འཚོལ་དགོས།
གླིང་ཚ་འཚོལ་བ།
ཁ་བའི་འབྲོག་མོ།
རྔུལ་ཆུ་རྡོག་རིལ་དེས་ལམ་ཆེན་སྦངས་དུས།།
མི་བཟོད་མིག་ཆུ་དེས་སེམས་པ་བརླན་བྱུང་།།
འཛུམ་ཆུང་རི་མོ་ཡི་གདེང་ཚོད་དཔར་བས།།
རང་དབང་རྒྱལ་ཁབ་ཅིག་མདུན་དུ་མངོན་བྱུང་།།
སྙིང་སྟོབས་གོམ་སྒྲ་དེ་རྒྱང་དུ་འཐེན་སོང་།།
ཟུངས་ཁྲག་དྭངས་མ་ཡི་མེ་ལྕེ་མཆེད་སོང་།།
གཞན་གྱི་བདེ་སྡུག་དེ་གདོང་དུ་འཁུར་བའི།།
དཔའ་བོ་གླིང་ཚ་རང་གང་དུ་གནས་སམ།།
མུན་ནག་མཐུག་པོ་དེ་དྲག་པོའི་ཡུལ་རེད།།
སྒྲོན་མེའི་འོད་སྣང་དེ་དཔའ་བོས་སྒྲོན་ཡོད།།
ཕྱི་རོལ་ས་མཐའ་རུ་བཞུད་པའི་དཔའ་རྒོད།།
ཞི་བདེའི་གླུ་དབྱངས་དེ་རྒྱང་ནས་ཁྲོལ་ཤོག །
ཉམ་ཐག་མི་ཚོགས་ཀྱི་དཔའ་བོ་ཁེར་རྐྱང་།།
དགྲ་བོའི་མེ་སྒྱོགས་ལ་གདོང་བ་གཏོད་བཞིན།།
བདེན་པའི་གནས་ལུགས་ཀྱི་གད་རྒྱངས་བསྒྲགས་སོང་།།
དཔའ་བོ་གླིང་ཚ་ཁྱེད་ལྷ་ཡིས་སྲུངས་ཤིག །
ས་ཡ་དྲུག་པོ་ཡི་བདེ་སྐྱིད་འཚོ་བ།།
ཆོལ་ཁ་གསུམ་པོ་ཡི་གནས་ཚང་དྲོན་མོ།།
མི་འགྱང་མ་འོངས་ལ་མངོན་འགྱུར་འབྱུང་བས།།
ཉམ་ཆུང་དཔའ་བོ་ཁྱེད་བདེ་བར་གནས་ཤོག།
༢༠༡༣/༠༨/༠༧།