Wednesday, 4 September 2013
03:34 | 
Posted by
༄༅།། ཨེ་མ་ཧོའི་རིག་མཛོད་། |
༄༅། །བོད་ཡུལ་གྱི་སྣོད་བཅུད་ལ་གདམས་པ་བློ་ལྡན་ཉི་མའི་འོད་སྣང་།
།
ན་མོ་གུ་རུ་ཨརྱ་ཏྰ་ར་ཡེ། །
ཀ་ཡེ་གསོན་དང་གངས་ཅན་ཕོ་མོ་ཀུན། །
ཁ་བ་རི་བའི་སྣོད་བཅུད་ཕུན་ཚོགས་ལ། །
ག་དུས་ཡིན་ཀྱང་འཛིན་སྐྱོང་སྤེལ་བར་གལ། །
ང་ཚོའི་ཆོས་རིག་སྙིང་སྲོག་འདི་ཀ་ལགས། །
ཅ་དག་གཙང་མའི་འཁོར་ཡུག་སྲུང་སྐྱོབ་གཅིག
།
ཆ་ལུགས་བཟང་པོའི་བོད་ཆས་གྱོན་པ་གཉིས། །
ཇ་རྩམ་གྲོ་རིགས་དཀར་ཟས་ལོངས་སྤྱོད་གསུམ།
།
ཉ་ཚེས་ཟླ་བཞིན་གོང་འཕེལ་གནང་བར་མཁྱེན། །
ཏ་ཐྰ་ག་ཏའི་བསྟན་པ་རིན་ཆེན་གཅིག །
ཐ་སྙད་རིག་པའི་གནའ་དེང་ཤེས་བྱ་གཉིས། །
ད་ལྟའི་ཚན་རིག་གསར་བའི་ལེགས་ཆ་གསུམ། །
ན་ཚོགས་ཁྱད་མེད་དུང་དུ་ལེན་པར་འཚལ། །
པ་མའི་བཀའ་དྲིན་དྲན་པའི་ཡ་རབས་གཅིག །
ཕ་མེས་སྲོལ་རྒྱུན་འཛིན་པའི་བསམ་བཟང་གཉིས།
།
བ་གླང་ཕྱུགས་ཀྱི་རྟུལ་ཞུགས་མི་འཛིན་གསུམ།
།
མ་ལུས་བོད་རིགས་ཀུན་གྱིས་སྒྲུབ་པར་མཛོད།
།
ཙ་ར་བརྟག་དཔྱོད་མེད་པའི་རྨོངས་རྒྱུག་གཅིག
།
ཚ་བསྲེག་རང་གཞན་གནོད་པའི་ལས་འགུལ་གཉིས།
།
ཛ་ཡའི་བསྟན་པར་གཤིག་པའི་ལས་ངན་གསུམ། །
ཝ་བཞིན་རྨོངས་པའི་བྱ་བྱེད་རྟག་ཏུ་སྤོངས།
།
ཞ་ལོང་ཉམས་ཐག་སྨད་པའི་ཅོལ་ཆུང་གཅིག །
ཟ་འོག་རྒྱུ་ནོར་གཏོར་བའི་དྲོད་ཆུང་གཉིས།
།
འ་ཅག་གཉིས་ཕན་མེད་པའི་ཐ་ཆད་གསུམ། །
ཡ་རབས་བསམ་སྤྱོད་མིན་པས་གཡུགས་ཤིག་ཨང་།
།
ར་ལུག་རྟ་གཡག་འཚོ་བའི་ཞིང་འབྲོག་གཅིག །
ལ་རྒྱའི་སྤྱི་ཕན་སྒྲུབ་པའི་འབད་བརྩོན་གཉིས།
།
ཤ་ཁྲག་རུས་པར་ཞེན་པའི་རྒྱལ་ཡོངས་གསུམ། །
ས་སྟེང་བོད་མིའི་དམ་ཚིག་དང་པོ་ཡིན། །
ཧ་ཅང་དཀའ་སྤྱད་གནང་བའི་ཉན་ཐོས་གཅིག །
ཨ་བུ་བྱང་སེམས་ལྡན་པའི་ཐེག་ཆེན་གཉིས། །
ཨོ་རྒྱན་རིག་འཛིན་བརྒྱུད་པའི་སྲོལ་འཛིན་གསུམ།
།
ཨེ་མ་གངས་ཅན་བསྟན་པའི་སྲོག་ཤིང་ལགས། །
ཨུ་ཚུགས་འབད་པའི་ངལ་བར་མ་ལྟོས་པར། །
ཨི་ལ་བ་ཏིའི་རྒྱུན་ལྟར་ཤར་གྱིས་ཐལ། །
དགེ་བས་བསྟན་སྲིད་དབྱར་གྱི་མཚོ་ལྟར་རྒྱས།
།
དགེ་ལེགས་འབྲས་བཟང་འཇིག་རྟེན་དཔལ་དུ་སྨོན།
།
ཞེས་པ་འདི་ཡང་རབ་རྒྱན་ཆུ་སྦྲུལ་ཟླ་༨ཚེས་༡དགེ་བར་ཡུལ་གངས་ཅན་པ་ཡོངས་ལ་ཕན་བདེའི་ཐབས་སུ་སེངྒ་གླིང་གི་ཤྲྰི་མ་ཧྰ་བཛྲའི་ཆོས་ཚོགས་ཁང་ནས་གང་འཆར་དག་ཤྲྰི་སྨྱོན་ཨེ་མ་ཧོས་གདམས་པ་དོན་དང་ལྡན་པར་གྱུར་ཅིག་གུ།
།
Subscribe to:
Post Comments (Atom)
0 comments:
Post a Comment