Wednesday 23 October 2013
14:31 | 
Posted by
༄༅།། ཨེ་མ་ཧོའི་རིག་མཛོད་། |
གླིང་ཚ་ཚེ་བརྟན་རྡོ་རྗེ་རྨི་ལམ་རྨིས་པ་འོད་གསལ་སྒྱུ་མའི་གྲོང་ཁྱེར།
།
ན་མོ་གུ་རུ་བུདྡྷ་ཛྙྰ་ན་ཡེ།
།
ཀ་དག་ཡེ་ཤེས་མཆོག་བརྙེས་ཀུན་ཏུ་བཟང་།
།
ཁ་སྦྱོར་ཡན་ལག་བདུན་ལྡན་རྡོ་རྗེ་འཆང་།
།
ག་བུར་དབང་པོའི་མདངས་འཛིན་སེམས་དཔའ་མཆོག
།
ང་ཡི་བརྒྱུད་གསུམ་བླ་མས་རྟག་སྐྱོངས་ཤིག
།
ཅ་ཅོ་སྨྲ་བ་མང་པའི་མི་དམངས་ཁྲོད།
།
ཆ་ལུགས་ངན་པའི་ཆས་གྱོན་གསལ་མི་གསལ།
།
ཇ་ཡུན་ཙམ་ལ་འཆར་བའི་འཕྲིན་ཐུང་ཞིག
།
ཉ་བཞིན་ལྕགས་ཀྱུའི་གྲོང་ནས་འདི་སྐད་ཐལ།
།
ཏྰ་ལའི་བླ་མ་དད་པ་འགྱུར་མེད་དང་།
།
ཐ་དག་བོད་ལ་འབུལ་བའི་ཡི་དྭགས་ང་།
།
ད་ལྟ་འཆི་མ་གསོན་གྱི་གྲོང་ཁྱེར་ནས།
།
ན་ཚའི་གདུང་བ་བཟོད་ཐབས་དཀའ་འོ་གསུངས།
།
པ་མེས་རིག་དཔལ་གནས་ལ་དུང་བའི་ཕྱིར།
།
ཕ་མ་བཟའ་ཚང་ཕྱི་ཕྱག་འཚལ་ནས་སོང་།
།
བ་གླང་དྲིན་ཆེན་ཞིག་གིས་ཕན་འདོགས་བཞིན།
།
མ་ལུས་སྤྱི་དོན་ཆེད་དུ་འབད་དོ་གསུངས།
།
ཙ་རི་གནས་སྐོར་ཆེད་དུ་མ་ཡིན་ཀྱང་།
།
ཚ་གྲང་དཀའ་སྤྱད་གངས་ཅན་བསྟན་སྲིད་ཕྱིར།
།
ཛ་དྲག་ལས་ཀྱིས་དེད་པའི་ཁྱེར་རྐྱང་ང་།
།
ཝ་བཞིན་དོན་མེད་འདུར་རྒྱུགས་བྱས་མེད་གསུངས།
།
ཞ་ལོང་ལྐུག་པའི་རྟུལ་ཞུགས་མ་ཡིན་ཀྱང་།
།
ཟ་འདོད་ནང་རུལ་མཁན་ལ་ཅི་ཆ་ཡང་།
།
འ་ཅག་དེད་དཔོན་༧གོང་ས་རིན་ཆེན་ལ།
།
ཡ་ཁོག་དྲང་བདེན་བྱས་པའི་དོད་ཡིན་གསུངས།
།
ར་བཞིན་ཚེ་ཟད་སྲིན་པོའི་སྒོ་ཁར་ལྷུང་།
།
ལ་རྒྱའི་གཏེར་ཆེན་ནམ་མཁའ་མཛོད་དུ་སྦས།
།
ཤ་ཁྲག་རུས་པའི་རྒྱུད་ཐག་ཆད་ཀྱང་རུང་།
།
ས་སྟེང་སྐྱེ་བའི་སྙིང་པོ་ལོན་ཐལ་གསུངས།
།
ཧ་ཅང་བརྩེ་དུང་ཅན་གྱི་གྲོགས་པོ་དང་།
།
ཨ་མའི་བུ་ངར་སེམས་པའི་གངས་ཅན་པར།
།
ཨོ་རྒྱན་པདྨས་བྱིན་རླབས་སྙིང་ཞུགས་ནས།
།
ཨེ་མ་སྐྱིད་པའི་བར་དོ་མྱུར་འཆར་སྨོན།
།
ཨུ་ཚུགས་འདོད་པའི་ཞེན་ཆགས་རབ་བརྟས་ནས།
།
ཨི་ཤི་ཀ་ཡི་བདེ་ཆེན་ཞིང་མཐོང་བར།
།
ཡིད་ལ་འདོད་པའི་དོན་ཀུན་ལྷུན་གྲུབ་ནས།
།
གངས་ལྗོངས་བསྟན་སྲིད་རྟག་ཏུ་བརྟན་པར་ཤོག
།
དེས་སྐད་བགྲོ་ནས་མི་ཚོགས་གྲལ་དུ་ཡལ།
།
རང་ཉིད་སྐྱོ་གདུང་བཟོད་མི་ཐུབ་པའི་ངང་།
།
སད་རྨི་གང་ཡིན་མ་ཤེས་སྙིང་རླུང་ལྡིང་།
།
རྩ་བརྒྱུད་བླ་མར་གདུང་བའི་དབྱངས་ཀྱིས་བསྐུལ།
།
ཆོས་བརྒྱད་ཞེན་པ་ལོག་པའི་ངེས་འབྱུང་གཅིག
།
བྱང་ཆུབ་སེམས་མཆོག་སྐྱེ་བའི་སྨོན་ལམ་གཉིས།
།
སྣང་སྲིད་དག་མཉམ་རྟོགས་པའི་ལྟ་དགོངས་གསུམ།
།
འགྲོ་ཀུན་རྒྱུད་ལ་འབྱོར་བའི་བདེན་ཚིག་བརྗོད།
།
གླིང་ཚ་དཀར་པོ་རྨི་ལམ་ཞིང་ནས་མཇལ།
།
ཚེ་བརྟན་རྡོ་རྗེའི་སྐྱོ་གླུའི་ཟློས་གར་དེ།
།
གསལ་མ་གསལ་གྱི་རང་སྣང་དྲོན་མོ་ཉིད།
།
གང་ཤར་སྒྲོ་བཀུར་བྲལ་བའི་ངང་ནས་བྲིས།
།
ཞེས་པ་འདི་ཡང་རབ་རྒྱན་སྨྲིན་ཟླའི་དབང་ཕྱོགས་རྫོགས་པ་དང་པོར་མ་བསམ་ས་ནས་གླིང་ཚ་ཚེ་བརྟན་རྡོ་རྗེ་སྐྱོ་ཉམས་བཅས་རྨི་ལམ་རྨིས་པས་རྩོམ་པ་པོས་བསྐུལ་མ་ལྟ་བུས་རྐྱེན་ལས་གང་དྲན་དུ་རྨི་ལམ་དབང་ཕྱུག་གམ་རིག་འཛིན་ཨེ་མ་ཧོས་ཨེ་ཝཾ་ཏྰ་ར་ཆོས་གླིང་ནས་བྲིས་པར་དགེའོ།
།
Subscribe to:
Post Comments (Atom)
0 comments:
Post a Comment